| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. கேஸமுத்திஸுத்தவண்ணனா
5. Kesamuttisuttavaṇṇanā
66. பஞ்சமே கேஸமுத்தங் நிவாஸோ ஏதேஸந்தி கேஸமுத்தியாதி ஆஹ ‘‘கேஸமுத்தனிக³மவாஸினோ’’தி. அட்ட²வித⁴பானகானீதி அம்ப³பானாதி³அட்ட²விதா⁴னி பானானி.
66. Pañcame kesamuttaṃ nivāso etesanti kesamuttiyāti āha ‘‘kesamuttanigamavāsino’’ti. Aṭṭhavidhapānakānīti ambapānādiaṭṭhavidhāni pānāni.
‘‘மா அனுஸ்ஸவேனா’’திஆதீ³ஸு பன ஏகோ த³ஹரகாலதோ பட்டா²ய ஏவங் அனுஸ்ஸவோ அத்தி², ஏவங் சிரகாலகதாய அனுஸ்ஸுதியா லப்³ப⁴மானங் கத²மித³ங் அஞ்ஞதா² ஸியா, தஸ்மா பூ⁴தமேதந்தி அனுஸ்ஸவேன க³ண்ஹாதி, ததா² க³ஹணங் படிக்கி²பந்தோ ‘‘மா அனுஸ்ஸவேனா’’தி ஆஹ. அனு அனு ஸவனங் அனுஸ்ஸவோ. அபரோ ‘‘அம்ஹாகங் பிதுபிதாமஹாதி³வுத்³தா⁴னங் உபதே³ஸபரம்பராய இத³மாப⁴தங், ஏவங் பரம்பராப⁴தகத²ங் நாம ந அஞ்ஞதா² ஸியா, தஸ்மா பூ⁴தமேத’’ந்தி க³ண்ஹாதி, தங் படிக்கி²பந்தோ ‘‘மா பரம்பராயா’’தி ஆஹ. ஏகோ கேனசி கிஸ்மிஞ்சி வுத்தமத்தே ‘‘ஏவங் கிர ஏத’’ந்தி க³ண்ஹாதி, தங் நிஸேதெ⁴ந்தோ ‘‘மா இதிகிராயா’’தி ஆஹ. பிடகங் க³ந்தோ² ஸம்பதீ³யதி ஏதஸ்ஸாதி பிடகஸம்பதா³னங், க³ந்த²ஸ்ஸ உக்³க³ண்ஹனகோ. தேன பிடகஉக்³க³ண்ஹனகபா⁴வேன ஏகச்சோ தாதி³ஸங் க³ந்த²ங் பகு³ணங் கத்வா தேன தங் ஸமெந்தங் ஸமேதி, தஸ்மா ‘‘பூ⁴தமேத’’ந்தி க³ண்ஹாதி, தங் ஸந்தா⁴யேஸ படிக்கே²போ ‘‘மா பிடகஸம்பதா³னேனா’’தி, அத்தனோ உக்³க³ஹக³ந்த²ஸம்பத்தியா மா க³ண்ஹித்தா²தி வுத்தங் ஹோதி. ஸமேதந்தி ஸங்க³தங்.
‘‘Mā anussavenā’’tiādīsu pana eko daharakālato paṭṭhāya evaṃ anussavo atthi, evaṃ cirakālakatāya anussutiyā labbhamānaṃ kathamidaṃ aññathā siyā, tasmā bhūtametanti anussavena gaṇhāti, tathā gahaṇaṃ paṭikkhipanto ‘‘mā anussavenā’’ti āha. Anu anu savanaṃ anussavo. Aparo ‘‘amhākaṃ pitupitāmahādivuddhānaṃ upadesaparamparāya idamābhataṃ, evaṃ paramparābhatakathaṃ nāma na aññathā siyā, tasmā bhūtameta’’nti gaṇhāti, taṃ paṭikkhipanto ‘‘mā paramparāyā’’ti āha. Eko kenaci kismiñci vuttamatte ‘‘evaṃ kira eta’’nti gaṇhāti, taṃ nisedhento ‘‘mā itikirāyā’’ti āha. Piṭakaṃ gantho sampadīyati etassāti piṭakasampadānaṃ, ganthassa uggaṇhanako. Tena piṭakauggaṇhanakabhāvena ekacco tādisaṃ ganthaṃ paguṇaṃ katvā tena taṃ samentaṃ sameti, tasmā ‘‘bhūtameta’’nti gaṇhāti, taṃ sandhāyesa paṭikkhepo ‘‘mā piṭakasampadānenā’’ti, attano uggahaganthasampattiyā mā gaṇhitthāti vuttaṃ hoti. Sametanti saṃgataṃ.
கோசி கஞ்சி விதக்கெந்தோ ‘‘ஏவமேவ தேன ப⁴விதப்³ப³’’ந்தி கேவலங் அத்தனோ ஸங்கப்பவஸேன ‘‘பூ⁴தமித³’’ந்தி க³ண்ஹாதி, தங் ஸந்தா⁴யேதங் வுத்தங் ‘‘மா தக்கஹேதூ’’தி. அஞ்ஞோ ‘‘இமாய யுத்தியா பூ⁴தமித³’’ந்தி கேவலங் அனுமானதோ நயக்³கா³ஹேன க³ண்ஹாதி, தங் படிக்கி²பந்தோ ‘‘மா நயஹேதூ’’தி ஆஹ. கஸ்ஸசி ‘‘ஏவமேதங் ஸியா’’தி பரிகப்பெந்தஸ்ஸ ஏகங் காரணங் உபட்டா²தி, ஸோ ‘‘அத்தே²த’’ந்தி அத்தனோ பரிகப்பிதாகாரேன க³ண்ஹாதி, தங் படிஸேதெ⁴ந்தோ ‘‘மா ஆகாரபரிவிதக்கேனா’’தி ஆஹ. அபரஸ்ஸ சிந்தயதோ யதா²பரிகப்பிதங் கஞ்சி அத்த²ங் ‘‘ஏவமேதங் ந அஞ்ஞதா²’’தி அபி⁴னிவிஸந்தஸ்ஸ ஏகா தி³ட்டி² உப்பஜ்ஜதி. யா யஸ்ஸ தங் காரணங் நிஜ்ஜா²யந்தஸ்ஸ பச்சக்க²ங் விய நிரூபெத்வா சிந்தெந்தஸ்ஸ க²மதி. ஸோ ‘‘அத்தே²த’’ந்தி தி³ட்டி²னிஜ்ஜா²னக்க²ந்தியா க³ண்ஹாதி, தங் ஸந்தா⁴யாஹ ‘‘மா தி³ட்டி²னிஜ்ஜா²னக்க²ந்தியா’’தி.
Koci kañci vitakkento ‘‘evameva tena bhavitabba’’nti kevalaṃ attano saṅkappavasena ‘‘bhūtamida’’nti gaṇhāti, taṃ sandhāyetaṃ vuttaṃ ‘‘mā takkahetū’’ti. Añño ‘‘imāya yuttiyā bhūtamida’’nti kevalaṃ anumānato nayaggāhena gaṇhāti, taṃ paṭikkhipanto ‘‘mā nayahetū’’ti āha. Kassaci ‘‘evametaṃ siyā’’ti parikappentassa ekaṃ kāraṇaṃ upaṭṭhāti, so ‘‘attheta’’nti attano parikappitākārena gaṇhāti, taṃ paṭisedhento ‘‘mā ākāraparivitakkenā’’ti āha. Aparassa cintayato yathāparikappitaṃ kañci atthaṃ ‘‘evametaṃ na aññathā’’ti abhinivisantassa ekā diṭṭhi uppajjati. Yā yassa taṃ kāraṇaṃ nijjhāyantassa paccakkhaṃ viya nirūpetvā cintentassa khamati. So ‘‘attheta’’nti diṭṭhinijjhānakkhantiyā gaṇhāti, taṃ sandhāyāha ‘‘mā diṭṭhinijjhānakkhantiyā’’ti.
அகுஸலவேரஸ்ஸாதி பாணாதிபாதாதி³பஞ்சவித⁴ங் வேரங் ஸந்தா⁴ய வத³தி. கோதோ⁴ நாம சேதஸோ து³க்க²ந்தி ஆஹ ‘‘கோத⁴சித்தஸ்ஸ அபா⁴வேனா’’தி. கிலேஸஸ்ஸாதி சித்தங் விபா³தெ⁴ந்தஸ்ஸ உபதாபெந்தஸ்ஸ உத்³த⁴ச்சகுக்குச்சாதி³கிலேஸஸ்ஸ. ஸேஸமெத்த² உத்தானமேவ.
Akusalaverassāti pāṇātipātādipañcavidhaṃ veraṃ sandhāya vadati. Kodho nāma cetaso dukkhanti āha ‘‘kodhacittassa abhāvenā’’ti. Kilesassāti cittaṃ vibādhentassa upatāpentassa uddhaccakukkuccādikilesassa. Sesamettha uttānameva.
கேஸமுத்திஸுத்தவண்ணனா நிட்டி²தா.
Kesamuttisuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. கேஸமுத்திஸுத்தங் • 5. Kesamuttisuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. கேஸமுத்திஸுத்தவண்ணனா • 5. Kesamuttisuttavaṇṇanā
