| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৫. কেসমুত্তিসুত্তৰণ্ণনা
5. Kesamuttisuttavaṇṇanā
৬৬. পঞ্চমে কেসমুত্তং নিৰাসো এতেসন্তি কেসমুত্তিযাতি আহ ‘‘কেসমুত্তনিগমৰাসিনো’’তি। অট্ঠৰিধপানকানীতি অম্বপানাদিঅট্ঠৰিধানি পানানি।
66. Pañcame kesamuttaṃ nivāso etesanti kesamuttiyāti āha ‘‘kesamuttanigamavāsino’’ti. Aṭṭhavidhapānakānīti ambapānādiaṭṭhavidhāni pānāni.
‘‘মা অনুস্সৰেনা’’তিআদীসু পন একো দহরকালতো পট্ঠায এৰং অনুস্সৰো অত্থি, এৰং চিরকালকতায অনুস্সুতিযা লব্ভমানং কথমিদং অঞ্ঞথা সিযা, তস্মা ভূতমেতন্তি অনুস্সৰেন গণ্হাতি, তথা গহণং পটিক্খিপন্তো ‘‘মা অনুস্সৰেনা’’তি আহ। অনু অনু সৰনং অনুস্সৰো। অপরো ‘‘অম্হাকং পিতুপিতামহাদিৰুদ্ধানং উপদেসপরম্পরায ইদমাভতং, এৰং পরম্পরাভতকথং নাম ন অঞ্ঞথা সিযা, তস্মা ভূতমেত’’ন্তি গণ্হাতি, তং পটিক্খিপন্তো ‘‘মা পরম্পরাযা’’তি আহ। একো কেনচি কিস্মিঞ্চি ৰুত্তমত্তে ‘‘এৰং কির এত’’ন্তি গণ্হাতি, তং নিসেধেন্তো ‘‘মা ইতিকিরাযা’’তি আহ। পিটকং গন্থো সম্পদীযতি এতস্সাতি পিটকসম্পদানং, গন্থস্স উগ্গণ্হনকো। তেন পিটকউগ্গণ্হনকভাৰেন একচ্চো তাদিসং গন্থং পগুণং কত্ৰা তেন তং সমেন্তং সমেতি, তস্মা ‘‘ভূতমেত’’ন্তি গণ্হাতি, তং সন্ধাযেস পটিক্খেপো ‘‘মা পিটকসম্পদানেনা’’তি, অত্তনো উগ্গহগন্থসম্পত্তিযা মা গণ্হিত্থাতি ৰুত্তং হোতি। সমেতন্তি সংগতং।
‘‘Mā anussavenā’’tiādīsu pana eko daharakālato paṭṭhāya evaṃ anussavo atthi, evaṃ cirakālakatāya anussutiyā labbhamānaṃ kathamidaṃ aññathā siyā, tasmā bhūtametanti anussavena gaṇhāti, tathā gahaṇaṃ paṭikkhipanto ‘‘mā anussavenā’’ti āha. Anu anu savanaṃ anussavo. Aparo ‘‘amhākaṃ pitupitāmahādivuddhānaṃ upadesaparamparāya idamābhataṃ, evaṃ paramparābhatakathaṃ nāma na aññathā siyā, tasmā bhūtameta’’nti gaṇhāti, taṃ paṭikkhipanto ‘‘mā paramparāyā’’ti āha. Eko kenaci kismiñci vuttamatte ‘‘evaṃ kira eta’’nti gaṇhāti, taṃ nisedhento ‘‘mā itikirāyā’’ti āha. Piṭakaṃ gantho sampadīyati etassāti piṭakasampadānaṃ, ganthassa uggaṇhanako. Tena piṭakauggaṇhanakabhāvena ekacco tādisaṃ ganthaṃ paguṇaṃ katvā tena taṃ samentaṃ sameti, tasmā ‘‘bhūtameta’’nti gaṇhāti, taṃ sandhāyesa paṭikkhepo ‘‘mā piṭakasampadānenā’’ti, attano uggahaganthasampattiyā mā gaṇhitthāti vuttaṃ hoti. Sametanti saṃgataṃ.
কোচি কঞ্চি ৰিতক্কেন্তো ‘‘এৰমেৰ তেন ভৰিতব্ব’’ন্তি কেৰলং অত্তনো সঙ্কপ্পৰসেন ‘‘ভূতমিদ’’ন্তি গণ্হাতি, তং সন্ধাযেতং ৰুত্তং ‘‘মা তক্কহেতূ’’তি। অঞ্ঞো ‘‘ইমায যুত্তিযা ভূতমিদ’’ন্তি কেৰলং অনুমানতো নযগ্গাহেন গণ্হাতি, তং পটিক্খিপন্তো ‘‘মা নযহেতূ’’তি আহ। কস্সচি ‘‘এৰমেতং সিযা’’তি পরিকপ্পেন্তস্স একং কারণং উপট্ঠাতি, সো ‘‘অত্থেত’’ন্তি অত্তনো পরিকপ্পিতাকারেন গণ্হাতি, তং পটিসেধেন্তো ‘‘মা আকারপরিৰিতক্কেনা’’তি আহ। অপরস্স চিন্তযতো যথাপরিকপ্পিতং কঞ্চি অত্থং ‘‘এৰমেতং ন অঞ্ঞথা’’তি অভিনিৰিসন্তস্স একা দিট্ঠি উপ্পজ্জতি। যা যস্স তং কারণং নিজ্ঝাযন্তস্স পচ্চক্খং ৰিয নিরূপেত্ৰা চিন্তেন্তস্স খমতি। সো ‘‘অত্থেত’’ন্তি দিট্ঠিনিজ্ঝানক্খন্তিযা গণ্হাতি, তং সন্ধাযাহ ‘‘মা দিট্ঠিনিজ্ঝানক্খন্তিযা’’তি।
Koci kañci vitakkento ‘‘evameva tena bhavitabba’’nti kevalaṃ attano saṅkappavasena ‘‘bhūtamida’’nti gaṇhāti, taṃ sandhāyetaṃ vuttaṃ ‘‘mā takkahetū’’ti. Añño ‘‘imāya yuttiyā bhūtamida’’nti kevalaṃ anumānato nayaggāhena gaṇhāti, taṃ paṭikkhipanto ‘‘mā nayahetū’’ti āha. Kassaci ‘‘evametaṃ siyā’’ti parikappentassa ekaṃ kāraṇaṃ upaṭṭhāti, so ‘‘attheta’’nti attano parikappitākārena gaṇhāti, taṃ paṭisedhento ‘‘mā ākāraparivitakkenā’’ti āha. Aparassa cintayato yathāparikappitaṃ kañci atthaṃ ‘‘evametaṃ na aññathā’’ti abhinivisantassa ekā diṭṭhi uppajjati. Yā yassa taṃ kāraṇaṃ nijjhāyantassa paccakkhaṃ viya nirūpetvā cintentassa khamati. So ‘‘attheta’’nti diṭṭhinijjhānakkhantiyā gaṇhāti, taṃ sandhāyāha ‘‘mā diṭṭhinijjhānakkhantiyā’’ti.
অকুসলৰেরস্সাতি পাণাতিপাতাদিপঞ্চৰিধং ৰেরং সন্ধায ৰদতি। কোধো নাম চেতসো দুক্খন্তি আহ ‘‘কোধচিত্তস্স অভাৰেনা’’তি। কিলেসস্সাতি চিত্তং ৰিবাধেন্তস্স উপতাপেন্তস্স উদ্ধচ্চকুক্কুচ্চাদিকিলেসস্স। সেসমেত্থ উত্তানমেৰ।
Akusalaverassāti pāṇātipātādipañcavidhaṃ veraṃ sandhāya vadati. Kodho nāma cetaso dukkhanti āha ‘‘kodhacittassa abhāvenā’’ti. Kilesassāti cittaṃ vibādhentassa upatāpentassa uddhaccakukkuccādikilesassa. Sesamettha uttānameva.
কেসমুত্তিসুত্তৰণ্ণনা নিট্ঠিতা।
Kesamuttisuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৫. কেসমুত্তিসুত্তং • 5. Kesamuttisuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৫. কেসমুত্তিসুত্তৰণ্ণনা • 5. Kesamuttisuttavaṇṇanā
