| Library / Tipiṭaka / ತಿಪಿಟಕ • Tipiṭaka / ದೀಘನಿಕಾಯ • Dīghanikāya |
೧೧. ಕೇವಟ್ಟಸುತ್ತಂ
11. Kevaṭṭasuttaṃ
ಕೇವಟ್ಟಗಹಪತಿಪುತ್ತವತ್ಥು
Kevaṭṭagahapatiputtavatthu
೪೮೧. ಏವಂ ಮೇ ಸುತಂ – ಏಕಂ ಸಮಯಂ ಭಗವಾ ನಾಳನ್ದಾಯಂ ವಿಹರತಿ ಪಾವಾರಿಕಮ್ಬವನೇ। ಅಥ ಖೋ ಕೇವಟ್ಟೋ ಗಹಪತಿಪುತ್ತೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವನ್ತಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನೋ ಖೋ ಕೇವಟ್ಟೋ ಗಹಪತಿಪುತ್ತೋ ಭಗವನ್ತಂ ಏತದವೋಚ – ‘‘ಅಯಂ, ಭನ್ತೇ, ನಾಳನ್ದಾ ಇದ್ಧಾ ಚೇವ ಫೀತಾ ಚ ಬಹುಜನಾ ಆಕಿಣ್ಣಮನುಸ್ಸಾ ಭಗವತಿ ಅಭಿಪ್ಪಸನ್ನಾ। ಸಾಧು, ಭನ್ತೇ, ಭಗವಾ ಏಕಂ ಭಿಕ್ಖುಂ ಸಮಾದಿಸತು, ಯೋ ಉತ್ತರಿಮನುಸ್ಸಧಮ್ಮಾ, ಇದ್ಧಿಪಾಟಿಹಾರಿಯಂ ಕರಿಸ್ಸತಿ; ಏವಾಯಂ ನಾಳನ್ದಾ ಭಿಯ್ಯೋಸೋ ಮತ್ತಾಯ ಭಗವತಿ ಅಭಿಪ್ಪಸೀದಿಸ್ಸತೀ’’ತಿ। ಏವಂ ವುತ್ತೇ, ಭಗವಾ ಕೇವಟ್ಟಂ ಗಹಪತಿಪುತ್ತಂ ಏತದವೋಚ – ‘‘ನ ಖೋ ಅಹಂ, ಕೇವಟ್ಟ, ಭಿಕ್ಖೂನಂ ಏವಂ ಧಮ್ಮಂ ದೇಸೇಮಿ – ಏಥ ತುಮ್ಹೇ, ಭಿಕ್ಖವೇ, ಗಿಹೀನಂ ಓದಾತವಸನಾನಂ ಉತ್ತರಿಮನುಸ್ಸಧಮ್ಮಾ ಇದ್ಧಿಪಾಟಿಹಾರಿಯಂ ಕರೋಥಾ’’ತಿ।
481. Evaṃ me sutaṃ – ekaṃ samayaṃ bhagavā nāḷandāyaṃ viharati pāvārikambavane. Atha kho kevaṭṭo gahapatiputto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho kevaṭṭo gahapatiputto bhagavantaṃ etadavoca – ‘‘ayaṃ, bhante, nāḷandā iddhā ceva phītā ca bahujanā ākiṇṇamanussā bhagavati abhippasannā. Sādhu, bhante, bhagavā ekaṃ bhikkhuṃ samādisatu, yo uttarimanussadhammā, iddhipāṭihāriyaṃ karissati; evāyaṃ nāḷandā bhiyyoso mattāya bhagavati abhippasīdissatī’’ti. Evaṃ vutte, bhagavā kevaṭṭaṃ gahapatiputtaṃ etadavoca – ‘‘na kho ahaṃ, kevaṭṭa, bhikkhūnaṃ evaṃ dhammaṃ desemi – etha tumhe, bhikkhave, gihīnaṃ odātavasanānaṃ uttarimanussadhammā iddhipāṭihāriyaṃ karothā’’ti.
೪೮೨. ದುತಿಯಮ್ಪಿ ಖೋ ಕೇವಟ್ಟೋ ಗಹಪತಿಪುತ್ತೋ ಭಗವನ್ತಂ ಏತದವೋಚ – ‘‘ನಾಹಂ, ಭನ್ತೇ, ಭಗವನ್ತಂ ಧಂಸೇಮಿ; ಅಪಿ ಚ, ಏವಂ ವದಾಮಿ – ‘ಅಯಂ, ಭನ್ತೇ, ನಾಳನ್ದಾ ಇದ್ಧಾ ಚೇವ ಫೀತಾ ಚ ಬಹುಜನಾ ಆಕಿಣ್ಣಮನುಸ್ಸಾ ಭಗವತಿ ಅಭಿಪ್ಪಸನ್ನಾ। ಸಾಧು, ಭನ್ತೇ, ಭಗವಾ ಏಕಂ ಭಿಕ್ಖುಂ ಸಮಾದಿಸತು, ಯೋ ಉತ್ತರಿಮನುಸ್ಸಧಮ್ಮಾ ಇದ್ಧಿಪಾಟಿಹಾರಿಯಂ ಕರಿಸ್ಸತಿ; ಏವಾಯಂ ನಾಳನ್ದಾ ಭಿಯ್ಯೋಸೋ ಮತ್ತಾಯ ಭಗವತಿ ಅಭಿಪ್ಪಸೀದಿಸ್ಸತೀ’’’ತಿ। ದುತಿಯಮ್ಪಿ ಖೋ ಭಗವಾ ಕೇವಟ್ಟಂ ಗಹಪತಿಪುತ್ತಂ ಏತದವೋಚ – ‘‘ನ ಖೋ ಅಹಂ, ಕೇವಟ್ಟ, ಭಿಕ್ಖೂನಂ ಏವಂ ಧಮ್ಮಂ ದೇಸೇಮಿ – ಏಥ ತುಮ್ಹೇ, ಭಿಕ್ಖವೇ, ಗಿಹೀನಂ ಓದಾತವಸನಾನಂ ಉತ್ತರಿಮನುಸ್ಸಧಮ್ಮಾ ಇದ್ಧಿಪಾಟಿಹಾರಿಯಂ ಕರೋಥಾ’’’ತಿ।
482. Dutiyampi kho kevaṭṭo gahapatiputto bhagavantaṃ etadavoca – ‘‘nāhaṃ, bhante, bhagavantaṃ dhaṃsemi; api ca, evaṃ vadāmi – ‘ayaṃ, bhante, nāḷandā iddhā ceva phītā ca bahujanā ākiṇṇamanussā bhagavati abhippasannā. Sādhu, bhante, bhagavā ekaṃ bhikkhuṃ samādisatu, yo uttarimanussadhammā iddhipāṭihāriyaṃ karissati; evāyaṃ nāḷandā bhiyyoso mattāya bhagavati abhippasīdissatī’’’ti. Dutiyampi kho bhagavā kevaṭṭaṃ gahapatiputtaṃ etadavoca – ‘‘na kho ahaṃ, kevaṭṭa, bhikkhūnaṃ evaṃ dhammaṃ desemi – etha tumhe, bhikkhave, gihīnaṃ odātavasanānaṃ uttarimanussadhammā iddhipāṭihāriyaṃ karothā’’’ti.
ತತಿಯಮ್ಪಿ ಖೋ ಕೇವಟ್ಟೋ ಗಹಪತಿಪುತ್ತೋ ಭಗವನ್ತಂ ಏತದವೋಚ – ‘‘ನಾಹಂ, ಭನ್ತೇ, ಭಗವನ್ತಂ ಧಂಸೇಮಿ; ಅಪಿ ಚ, ಏವಂ ವದಾಮಿ – ‘ಅಯಂ, ಭನ್ತೇ, ನಾಳನ್ದಾ ಇದ್ಧಾ ಚೇವ ಫೀತಾ ಚ ಬಹುಜನಾ ಆಕಿಣ್ಣಮನುಸ್ಸಾ ಭಗವತಿ ಅಭಿಪ್ಪಸನ್ನಾ। ಸಾಧು, ಭನ್ತೇ, ಭಗವಾ ಏಕಂ ಭಿಕ್ಖುಂ ಸಮಾದಿಸತು, ಯೋ ಉತ್ತರಿಮನುಸ್ಸಧಮ್ಮಾ ಇದ್ಧಿಪಾಟಿಹಾರಿಯಂ ಕರಿಸ್ಸತಿ। ಏವಾಯಂ ನಾಳನ್ದಾ ಭಿಯ್ಯೋಸೋ ಮತ್ತಾಯ ಭಗವತಿ ಅಭಿಪ್ಪಸೀದಿಸ್ಸತೀ’ತಿ।
Tatiyampi kho kevaṭṭo gahapatiputto bhagavantaṃ etadavoca – ‘‘nāhaṃ, bhante, bhagavantaṃ dhaṃsemi; api ca, evaṃ vadāmi – ‘ayaṃ, bhante, nāḷandā iddhā ceva phītā ca bahujanā ākiṇṇamanussā bhagavati abhippasannā. Sādhu, bhante, bhagavā ekaṃ bhikkhuṃ samādisatu, yo uttarimanussadhammā iddhipāṭihāriyaṃ karissati. Evāyaṃ nāḷandā bhiyyoso mattāya bhagavati abhippasīdissatī’ti.
ಇದ್ಧಿಪಾಟಿಹಾರಿಯಂ
Iddhipāṭihāriyaṃ
೪೮೩. ‘‘ತೀಣಿ ಖೋ ಇಮಾನಿ, ಕೇವಟ್ಟ, ಪಾಟಿಹಾರಿಯಾನಿ ಮಯಾ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಪವೇದಿತಾನಿ। ಕತಮಾನಿ ತೀಣಿ? ಇದ್ಧಿಪಾಟಿಹಾರಿಯಂ, ಆದೇಸನಾಪಾಟಿಹಾರಿಯಂ , ಅನುಸಾಸನೀಪಾಟಿಹಾರಿಯಂ।
483. ‘‘Tīṇi kho imāni, kevaṭṭa, pāṭihāriyāni mayā sayaṃ abhiññā sacchikatvā paveditāni. Katamāni tīṇi? Iddhipāṭihāriyaṃ, ādesanāpāṭihāriyaṃ , anusāsanīpāṭihāriyaṃ.
೪೮೪. ‘‘ಕತಮಞ್ಚ, ಕೇವಟ್ಟ, ಇದ್ಧಿಪಾಟಿಹಾರಿಯಂ? ಇಧ, ಕೇವಟ್ಟ, ಭಿಕ್ಖು ಅನೇಕವಿಹಿತಂ ಇದ್ಧಿವಿಧಂ ಪಚ್ಚನುಭೋತಿ। ಏಕೋಪಿ ಹುತ್ವಾ ಬಹುಧಾ ಹೋತಿ, ಬಹುಧಾಪಿ ಹುತ್ವಾ ಏಕೋ ಹೋತಿ; ಆವಿಭಾವಂ ತಿರೋಭಾವಂ ತಿರೋಕುಟ್ಟಂ ತಿರೋಪಾಕಾರಂ ತಿರೋಪಬ್ಬತಂ ಅಸಜ್ಜಮಾನೋ ಗಚ್ಛತಿ ಸೇಯ್ಯಥಾಪಿ ಆಕಾಸೇ; ಪಥವಿಯಾಪಿ ಉಮ್ಮುಜ್ಜನಿಮುಜ್ಜಂ ಕರೋತಿ ಸೇಯ್ಯಥಾಪಿ ಉದಕೇ; ಉದಕೇಪಿ ಅಭಿಜ್ಜಮಾನೇ ಗಚ್ಛತಿ ಸೇಯ್ಯಥಾಪಿ ಪಥವಿಯಂ; ಆಕಾಸೇಪಿ ಪಲ್ಲಙ್ಕೇನ ಕಮತಿ ಸೇಯ್ಯಥಾಪಿ ಪಕ್ಖೀ ಸಕುಣೋ; ಇಮೇಪಿ ಚನ್ದಿಮಸೂರಿಯೇ ಏವಂ ಮಹಿದ್ಧಿಕೇ ಏವಂ ಮಹಾನುಭಾವೇ ಪಾಣಿನಾ ಪರಾಮಸತಿ ಪರಿಮಜ್ಜತಿ; ಯಾವ ಬ್ರಹ್ಮಲೋಕಾಪಿ ಕಾಯೇನ ವಸಂ ವತ್ತೇತಿ।
484. ‘‘Katamañca, kevaṭṭa, iddhipāṭihāriyaṃ? Idha, kevaṭṭa, bhikkhu anekavihitaṃ iddhividhaṃ paccanubhoti. Ekopi hutvā bahudhā hoti, bahudhāpi hutvā eko hoti; āvibhāvaṃ tirobhāvaṃ tirokuṭṭaṃ tiropākāraṃ tiropabbataṃ asajjamāno gacchati seyyathāpi ākāse; pathaviyāpi ummujjanimujjaṃ karoti seyyathāpi udake; udakepi abhijjamāne gacchati seyyathāpi pathaviyaṃ; ākāsepi pallaṅkena kamati seyyathāpi pakkhī sakuṇo; imepi candimasūriye evaṃ mahiddhike evaṃ mahānubhāve pāṇinā parāmasati parimajjati; yāva brahmalokāpi kāyena vasaṃ vatteti.
‘‘ತಮೇನಂ ಅಞ್ಞತರೋ ಸದ್ಧೋ ಪಸನ್ನೋ ಪಸ್ಸತಿ ತಂ ಭಿಕ್ಖುಂ ಅನೇಕವಿಹಿತಂ ಇದ್ಧಿವಿಧಂ ಪಚ್ಚನುಭೋನ್ತಂ – ಏಕೋಪಿ ಹುತ್ವಾ ಬಹುಧಾ ಹೋನ್ತಂ, ಬಹುಧಾಪಿ ಹುತ್ವಾ ಏಕೋ ಹೋನ್ತಂ; ಆವಿಭಾವಂ ತಿರೋಭಾವಂ; ತಿರೋಕುಟ್ಟಂ ತಿರೋಪಾಕಾರಂ ತಿರೋಪಬ್ಬತಂ ಅಸಜ್ಜಮಾನಂ ಗಚ್ಛನ್ತಂ ಸೇಯ್ಯಥಾಪಿ ಆಕಾಸೇ; ಪಥವಿಯಾಪಿ ಉಮ್ಮುಜ್ಜನಿಮುಜ್ಜಂ ಕರೋನ್ತಂ ಸೇಯ್ಯಥಾಪಿ ಉದಕೇ; ಉದಕೇಪಿ ಅಭಿಜ್ಜಮಾನೇ ಗಚ್ಛನ್ತಂ ಸೇಯ್ಯಥಾಪಿ ಪಥವಿಯಂ; ಆಕಾಸೇಪಿ ಪಲ್ಲಙ್ಕೇನ ಕಮನ್ತಂ ಸೇಯ್ಯಥಾಪಿ ಪಕ್ಖೀ ಸಕುಣೋ; ಇಮೇಪಿ ಚನ್ದಿಮಸೂರಿಯೇ ಏವಂ ಮಹಿದ್ಧಿಕೇ ಏವಂ ಮಹಾನುಭಾವೇ ಪಾಣಿನಾ ಪರಾಮಸನ್ತಂ ಪರಿಮಜ್ಜನ್ತಂ ಯಾವ ಬ್ರಹ್ಮಲೋಕಾಪಿ ಕಾಯೇನ ವಸಂ ವತ್ತೇನ್ತಂ।
‘‘Tamenaṃ aññataro saddho pasanno passati taṃ bhikkhuṃ anekavihitaṃ iddhividhaṃ paccanubhontaṃ – ekopi hutvā bahudhā hontaṃ, bahudhāpi hutvā eko hontaṃ; āvibhāvaṃ tirobhāvaṃ; tirokuṭṭaṃ tiropākāraṃ tiropabbataṃ asajjamānaṃ gacchantaṃ seyyathāpi ākāse; pathaviyāpi ummujjanimujjaṃ karontaṃ seyyathāpi udake; udakepi abhijjamāne gacchantaṃ seyyathāpi pathaviyaṃ; ākāsepi pallaṅkena kamantaṃ seyyathāpi pakkhī sakuṇo; imepi candimasūriye evaṃ mahiddhike evaṃ mahānubhāve pāṇinā parāmasantaṃ parimajjantaṃ yāva brahmalokāpi kāyena vasaṃ vattentaṃ.
‘‘ತಮೇನಂ ಸೋ ಸದ್ಧೋ ಪಸನ್ನೋ ಅಞ್ಞತರಸ್ಸ ಅಸ್ಸದ್ಧಸ್ಸ ಅಪ್ಪಸನ್ನಸ್ಸ ಆರೋಚೇತಿ – ‘ಅಚ್ಛರಿಯಂ ವತ, ಭೋ, ಅಬ್ಭುತಂ ವತ, ಭೋ, ಸಮಣಸ್ಸ ಮಹಿದ್ಧಿಕತಾ ಮಹಾನುಭಾವತಾ। ಅಮಾಹಂ ಭಿಕ್ಖುಂ ಅದ್ದಸಂ ಅನೇಕವಿಹಿತಂ ಇದ್ಧಿವಿಧಂ ಪಚ್ಚನುಭೋನ್ತಂ – ಏಕೋಪಿ ಹುತ್ವಾ ಬಹುಧಾ ಹೋನ್ತಂ, ಬಹುಧಾಪಿ ಹುತ್ವಾ ಏಕೋ ಹೋನ್ತಂ…ಪೇ॰… ಯಾವ ಬ್ರಹ್ಮಲೋಕಾಪಿ ಕಾಯೇನ ವಸಂ ವತ್ತೇನ್ತ’ನ್ತಿ।
‘‘Tamenaṃ so saddho pasanno aññatarassa assaddhassa appasannassa āroceti – ‘acchariyaṃ vata, bho, abbhutaṃ vata, bho, samaṇassa mahiddhikatā mahānubhāvatā. Amāhaṃ bhikkhuṃ addasaṃ anekavihitaṃ iddhividhaṃ paccanubhontaṃ – ekopi hutvā bahudhā hontaṃ, bahudhāpi hutvā eko hontaṃ…pe… yāva brahmalokāpi kāyena vasaṃ vattenta’nti.
‘‘ತಮೇನಂ ಸೋ ಅಸ್ಸದ್ಧೋ ಅಪ್ಪಸನ್ನೋ ತಂ ಸದ್ಧಂ ಪಸನ್ನಂ ಏವಂ ವದೇಯ್ಯ – ‘ಅತ್ಥಿ ಖೋ, ಭೋ, ಗನ್ಧಾರೀ ನಾಮ ವಿಜ್ಜಾ। ತಾಯ ಸೋ ಭಿಕ್ಖು ಅನೇಕವಿಹಿತಂ ಇದ್ಧಿವಿಧಂ ಪಚ್ಚನುಭೋತಿ – ಏಕೋಪಿ ಹುತ್ವಾ ಬಹುಧಾ ಹೋತಿ, ಬಹುಧಾಪಿ ಹುತ್ವಾ ಏಕೋ ಹೋತಿ…ಪೇ॰… ಯಾವ ಬ್ರಹ್ಮಲೋಕಾಪಿ ಕಾಯೇನ ವಸಂ ವತ್ತೇತೀ’ತಿ।
‘‘Tamenaṃ so assaddho appasanno taṃ saddhaṃ pasannaṃ evaṃ vadeyya – ‘atthi kho, bho, gandhārī nāma vijjā. Tāya so bhikkhu anekavihitaṃ iddhividhaṃ paccanubhoti – ekopi hutvā bahudhā hoti, bahudhāpi hutvā eko hoti…pe… yāva brahmalokāpi kāyena vasaṃ vattetī’ti.
‘‘ತಂ ಕಿಂ ಮಞ್ಞಸಿ, ಕೇವಟ್ಟ, ಅಪಿ ನು ಸೋ ಅಸ್ಸದ್ಧೋ ಅಪ್ಪಸನ್ನೋ ತಂ ಸದ್ಧಂ ಪಸನ್ನಂ ಏವಂ ವದೇಯ್ಯಾ’’ತಿ? ‘‘ವದೇಯ್ಯ, ಭನ್ತೇ’’ತಿ। ‘‘ಇಮಂ ಖೋ ಅಹಂ, ಕೇವಟ್ಟ, ಇದ್ಧಿಪಾಟಿಹಾರಿಯೇ ಆದೀನವಂ ಸಮ್ಪಸ್ಸಮಾನೋ ಇದ್ಧಿಪಾಟಿಹಾರಿಯೇನ ಅಟ್ಟೀಯಾಮಿ ಹರಾಯಾಮಿ ಜಿಗುಚ್ಛಾಮಿ’’।
‘‘Taṃ kiṃ maññasi, kevaṭṭa, api nu so assaddho appasanno taṃ saddhaṃ pasannaṃ evaṃ vadeyyā’’ti? ‘‘Vadeyya, bhante’’ti. ‘‘Imaṃ kho ahaṃ, kevaṭṭa, iddhipāṭihāriye ādīnavaṃ sampassamāno iddhipāṭihāriyena aṭṭīyāmi harāyāmi jigucchāmi’’.
ಆದೇಸನಾಪಾಟಿಹಾರಿಯಂ
Ādesanāpāṭihāriyaṃ
೪೮೫. ‘‘ಕತಮಞ್ಚ, ಕೇವಟ್ಟ, ಆದೇಸನಾಪಾಟಿಹಾರಿಯಂ? ಇಧ, ಕೇವಟ್ಟ, ಭಿಕ್ಖು ಪರಸತ್ತಾನಂ ಪರಪುಗ್ಗಲಾನಂ ಚಿತ್ತಮ್ಪಿ ಆದಿಸತಿ, ಚೇತಸಿಕಮ್ಪಿ ಆದಿಸತಿ, ವಿತಕ್ಕಿತಮ್ಪಿ ಆದಿಸತಿ, ವಿಚಾರಿತಮ್ಪಿ ಆದಿಸತಿ – ‘ಏವಮ್ಪಿ ತೇ ಮನೋ, ಇತ್ಥಮ್ಪಿ ತೇ ಮನೋ, ಇತಿಪಿ ತೇ ಚಿತ್ತ’ನ್ತಿ।
485. ‘‘Katamañca, kevaṭṭa, ādesanāpāṭihāriyaṃ? Idha, kevaṭṭa, bhikkhu parasattānaṃ parapuggalānaṃ cittampi ādisati, cetasikampi ādisati, vitakkitampi ādisati, vicāritampi ādisati – ‘evampi te mano, itthampi te mano, itipi te citta’nti.
‘‘ತಮೇನಂ ಅಞ್ಞತರೋ ಸದ್ಧೋ ಪಸನ್ನೋ ಪಸ್ಸತಿ ತಂ ಭಿಕ್ಖುಂ ಪರಸತ್ತಾನಂ ಪರಪುಗ್ಗಲಾನಂ ಚಿತ್ತಮ್ಪಿ ಆದಿಸನ್ತಂ, ಚೇತಸಿಕಮ್ಪಿ ಆದಿಸನ್ತಂ, ವಿತಕ್ಕಿತಮ್ಪಿ ಆದಿಸನ್ತಂ, ವಿಚಾರಿತಮ್ಪಿ ಆದಿಸನ್ತಂ – ‘ಏವಮ್ಪಿ ತೇ ಮನೋ, ಇತ್ಥಮ್ಪಿ ತೇ ಮನೋ, ಇತಿಪಿ ತೇ ಚಿತ್ತ’ನ್ತಿ। ತಮೇನಂ ಸೋ ಸದ್ಧೋ ಪಸನ್ನೋ ಅಞ್ಞತರಸ್ಸ ಅಸ್ಸದ್ಧಸ್ಸ ಅಪ್ಪಸನ್ನಸ್ಸ ಆರೋಚೇತಿ – ‘ಅಚ್ಛರಿಯಂ ವತ, ಭೋ, ಅಬ್ಭುತಂ ವತ, ಭೋ, ಸಮಣಸ್ಸ ಮಹಿದ್ಧಿಕತಾ ಮಹಾನುಭಾವತಾ। ಅಮಾಹಂ ಭಿಕ್ಖುಂ ಅದ್ದಸಂ ಪರಸತ್ತಾನಂ ಪರಪುಗ್ಗಲಾನಂ ಚಿತ್ತಮ್ಪಿ ಆದಿಸನ್ತಂ, ಚೇತಸಿಕಮ್ಪಿ ಆದಿಸನ್ತಂ, ವಿತಕ್ಕಿತಮ್ಪಿ ಆದಿಸನ್ತಂ, ವಿಚಾರಿತಮ್ಪಿ ಆದಿಸನ್ತಂ – ‘‘ಏವಮ್ಪಿ ತೇ ಮನೋ, ಇತ್ಥಮ್ಪಿ ತೇ ಮನೋ, ಇತಿಪಿ ತೇ ಚಿತ್ತ’’’ನ್ತಿ।
‘‘Tamenaṃ aññataro saddho pasanno passati taṃ bhikkhuṃ parasattānaṃ parapuggalānaṃ cittampi ādisantaṃ, cetasikampi ādisantaṃ, vitakkitampi ādisantaṃ, vicāritampi ādisantaṃ – ‘evampi te mano, itthampi te mano, itipi te citta’nti. Tamenaṃ so saddho pasanno aññatarassa assaddhassa appasannassa āroceti – ‘acchariyaṃ vata, bho, abbhutaṃ vata, bho, samaṇassa mahiddhikatā mahānubhāvatā. Amāhaṃ bhikkhuṃ addasaṃ parasattānaṃ parapuggalānaṃ cittampi ādisantaṃ, cetasikampi ādisantaṃ, vitakkitampi ādisantaṃ, vicāritampi ādisantaṃ – ‘‘evampi te mano, itthampi te mano, itipi te citta’’’nti.
‘‘ತಮೇನಂ ಸೋ ಅಸ್ಸದ್ಧೋ ಅಪ್ಪಸನ್ನೋ ತಂ ಸದ್ಧಂ ಪಸನ್ನಂ ಏವಂ ವದೇಯ್ಯ – ‘ಅತ್ಥಿ ಖೋ, ಭೋ, ಮಣಿಕಾ ನಾಮ ವಿಜ್ಜಾ; ತಾಯ ಸೋ ಭಿಕ್ಖು ಪರಸತ್ತಾನಂ ಪರಪುಗ್ಗಲಾನಂ ಚಿತ್ತಮ್ಪಿ ಆದಿಸತಿ, ಚೇತಸಿಕಮ್ಪಿ ಆದಿಸತಿ, ವಿತಕ್ಕಿತಮ್ಪಿ ಆದಿಸತಿ, ವಿಚಾರಿತಮ್ಪಿ ಆದಿಸತಿ – ‘ಏವಮ್ಪಿ ತೇ ಮನೋ, ಇತ್ಥಮ್ಪಿ ತೇ ಮನೋ, ಇತಿಪಿ ತೇ ಚಿತ್ತ’’’ನ್ತಿ।
‘‘Tamenaṃ so assaddho appasanno taṃ saddhaṃ pasannaṃ evaṃ vadeyya – ‘atthi kho, bho, maṇikā nāma vijjā; tāya so bhikkhu parasattānaṃ parapuggalānaṃ cittampi ādisati, cetasikampi ādisati, vitakkitampi ādisati, vicāritampi ādisati – ‘evampi te mano, itthampi te mano, itipi te citta’’’nti.
‘‘ತಂ ಕಿಂ ಮಞ್ಞಸಿ, ಕೇವಟ್ಟ, ಅಪಿ ನು ಸೋ ಅಸ್ಸದ್ಧೋ ಅಪ್ಪಸನ್ನೋ ತಂ ಸದ್ಧಂ ಪಸನ್ನಂ ಏವಂ ವದೇಯ್ಯಾ’’ತಿ ? ‘‘ವದೇಯ್ಯ, ಭನ್ತೇ’’ತಿ। ‘‘ಇಮಂ ಖೋ ಅಹಂ, ಕೇವಟ್ಟ, ಆದೇಸನಾಪಾಟಿಹಾರಿಯೇ ಆದೀನವಂ ಸಮ್ಪಸ್ಸಮಾನೋ ಆದೇಸನಾಪಾಟಿಹಾರಿಯೇನ ಅಟ್ಟೀಯಾಮಿ ಹರಾಯಾಮಿ ಜಿಗುಚ್ಛಾಮಿ’’।
‘‘Taṃ kiṃ maññasi, kevaṭṭa, api nu so assaddho appasanno taṃ saddhaṃ pasannaṃ evaṃ vadeyyā’’ti ? ‘‘Vadeyya, bhante’’ti. ‘‘Imaṃ kho ahaṃ, kevaṭṭa, ādesanāpāṭihāriye ādīnavaṃ sampassamāno ādesanāpāṭihāriyena aṭṭīyāmi harāyāmi jigucchāmi’’.
ಅನುಸಾಸನೀಪಾಟಿಹಾರಿಯಂ
Anusāsanīpāṭihāriyaṃ
೪೮೬. ‘‘ಕತಮಞ್ಚ, ಕೇವಟ್ಟ, ಅನುಸಾಸನೀಪಾಟಿಹಾರಿಯಂ? ಇಧ, ಕೇವಟ್ಟ, ಭಿಕ್ಖು ಏವಮನುಸಾಸತಿ – ‘ಏವಂ ವಿತಕ್ಕೇಥ, ಮಾ ಏವಂ ವಿತಕ್ಕಯಿತ್ಥ, ಏವಂ ಮನಸಿಕರೋಥ, ಮಾ ಏವಂ ಮನಸಾಕತ್ಥ, ಇದಂ ಪಜಹಥ, ಇದಂ ಉಪಸಮ್ಪಜ್ಜ ವಿಹರಥಾ’ತಿ। ಇದಂ ವುಚ್ಚತಿ, ಕೇವಟ್ಟ, ಅನುಸಾಸನೀಪಾಟಿಹಾರಿಯಂ।
486. ‘‘Katamañca, kevaṭṭa, anusāsanīpāṭihāriyaṃ? Idha, kevaṭṭa, bhikkhu evamanusāsati – ‘evaṃ vitakketha, mā evaṃ vitakkayittha, evaṃ manasikarotha, mā evaṃ manasākattha, idaṃ pajahatha, idaṃ upasampajja viharathā’ti. Idaṃ vuccati, kevaṭṭa, anusāsanīpāṭihāriyaṃ.
‘‘ಪುನ ಚಪರಂ, ಕೇವಟ್ಟ, ಇಧ ತಥಾಗತೋ ಲೋಕೇ ಉಪ್ಪಜ್ಜತಿ ಅರಹಂ ಸಮ್ಮಾಸಮ್ಬುದ್ಧೋ …ಪೇ॰… (ಯಥಾ ೧೯೦-೨೧೨ ಅನುಚ್ಛೇದೇಸು ಏವಂ ವಿತ್ಥಾರೇತಬ್ಬಂ)। ಏವಂ ಖೋ, ಕೇವಟ್ಟ, ಭಿಕ್ಖು ಸೀಲಸಮ್ಪನ್ನೋ ಹೋತಿ…ಪೇ॰… ಪಠಮಂ ಝಾನಂ ಉಪಸಮ್ಪಜ್ಜ ವಿಹರತಿ। ಇದಮ್ಪಿ ವುಚ್ಚತಿ, ಕೇವಟ್ಟ, ಅನುಸಾಸನೀಪಾಟಿಹಾರಿಯಂ…ಪೇ॰… ದುತಿಯಂ ಝಾನಂ…ಪೇ॰… ತತಿಯಂ ಝಾನಂ…ಪೇ॰… ಚತುತ್ಥಂ ಝಾನಂ ಉಪಸಮ್ಪಜ್ಜ ವಿಹರತಿ। ಇದಮ್ಪಿ ವುಚ್ಚತಿ, ಕೇವಟ್ಟ, ಅನುಸಾಸನೀಪಾಟಿಹಾರಿಯಂ…ಪೇ॰… ಞಾಣದಸ್ಸನಾಯ ಚಿತ್ತಂ ಅಭಿನೀಹರತಿ ಅಭಿನಿನ್ನಾಮೇತಿ…ಪೇ॰… ಇದಮ್ಪಿ ವುಚ್ಚತಿ, ಕೇವಟ್ಟ, ಅನುಸಾಸನೀಪಾಟಿಹಾರಿಯಂ…ಪೇ॰… ನಾಪರಂ ಇತ್ಥತ್ತಾಯಾತಿ ಪಜಾನಾತಿ…ಪೇ॰… ಇದಮ್ಪಿ ವುಚ್ಚತಿ, ಕೇವಟ್ಟ, ಅನುಸಾಸನೀಪಾಟಿಹಾರಿಯಂ।
‘‘Puna caparaṃ, kevaṭṭa, idha tathāgato loke uppajjati arahaṃ sammāsambuddho …pe… (yathā 190-212 anucchedesu evaṃ vitthāretabbaṃ). Evaṃ kho, kevaṭṭa, bhikkhu sīlasampanno hoti…pe… paṭhamaṃ jhānaṃ upasampajja viharati. Idampi vuccati, kevaṭṭa, anusāsanīpāṭihāriyaṃ…pe… dutiyaṃ jhānaṃ…pe… tatiyaṃ jhānaṃ…pe… catutthaṃ jhānaṃ upasampajja viharati. Idampi vuccati, kevaṭṭa, anusāsanīpāṭihāriyaṃ…pe… ñāṇadassanāya cittaṃ abhinīharati abhininnāmeti…pe… idampi vuccati, kevaṭṭa, anusāsanīpāṭihāriyaṃ…pe… nāparaṃ itthattāyāti pajānāti…pe… idampi vuccati, kevaṭṭa, anusāsanīpāṭihāriyaṃ.
‘‘ಇಮಾನಿ ಖೋ, ಕೇವಟ್ಟ, ತೀಣಿ ಪಾಟಿಹಾರಿಯಾನಿ ಮಯಾ ಸಯಂ ಅಭಿಞ್ಞಾ ಸಚ್ಛಿಕತ್ವಾ ಪವೇದಿತಾನಿ’’।
‘‘Imāni kho, kevaṭṭa, tīṇi pāṭihāriyāni mayā sayaṃ abhiññā sacchikatvā paveditāni’’.
ಭೂತನಿರೋಧೇಸಕಭಿಕ್ಖುವತ್ಥು
Bhūtanirodhesakabhikkhuvatthu
೪೮೭. ‘‘ಭೂತಪುಬ್ಬಂ, ಕೇವಟ್ಟ, ಇಮಸ್ಮಿಞ್ಞೇವ ಭಿಕ್ಖುಸಙ್ಘೇ ಅಞ್ಞತರಸ್ಸ ಭಿಕ್ಖುನೋ ಏವಂ ಚೇತಸೋ ಪರಿವಿತಕ್ಕೋ ಉದಪಾದಿ – ‘ಕತ್ಥ ನು ಖೋ ಇಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’ತಿ?
487. ‘‘Bhūtapubbaṃ, kevaṭṭa, imasmiññeva bhikkhusaṅghe aññatarassa bhikkhuno evaṃ cetaso parivitakko udapādi – ‘kattha nu kho ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti?
೪೮೮. ‘‘ಅಥ ಖೋ ಸೋ, ಕೇವಟ್ಟ, ಭಿಕ್ಖು ತಥಾರೂಪಂ ಸಮಾಧಿಂ ಸಮಾಪಜ್ಜಿ, ಯಥಾಸಮಾಹಿತೇ ಚಿತ್ತೇ ದೇವಯಾನಿಯೋ ಮಗ್ಗೋ ಪಾತುರಹೋಸಿ। ಅಥ ಖೋ ಸೋ, ಕೇವಟ್ಟ, ಭಿಕ್ಖು ಯೇನ ಚಾತುಮಹಾರಾಜಿಕಾ ದೇವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಚಾತುಮಹಾರಾಜಿಕೇ ದೇವೇ ಏತದವೋಚ – ‘ಕತ್ಥ ನು ಖೋ, ಆವುಸೋ, ಇಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’ತಿ?
488. ‘‘Atha kho so, kevaṭṭa, bhikkhu tathārūpaṃ samādhiṃ samāpajji, yathāsamāhite citte devayāniyo maggo pāturahosi. Atha kho so, kevaṭṭa, bhikkhu yena cātumahārājikā devā tenupasaṅkami; upasaṅkamitvā cātumahārājike deve etadavoca – ‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti?
‘‘ಏವಂ ವುತ್ತೇ, ಕೇವಟ್ಟ, ಚಾತುಮಹಾರಾಜಿಕಾ ದೇವಾ ತಂ ಭಿಕ್ಖುಂ ಏತದವೋಚುಂ – ‘ಮಯಮ್ಪಿ ಖೋ, ಭಿಕ್ಖು, ನ ಜಾನಾಮ, ಯತ್ಥಿಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂತಿ 1। ಅತ್ಥಿ ಖೋ 2, ಭಿಕ್ಖು, ಚತ್ತಾರೋ ಮಹಾರಾಜಾನೋ ಅಮ್ಹೇಹಿ ಅಭಿಕ್ಕನ್ತತರಾ ಚ ಪಣೀತತರಾ ಚ। ತೇ ಖೋ ಏತಂ ಜಾನೇಯ್ಯುಂ, ಯತ್ಥಿಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’ತಿ।
‘‘Evaṃ vutte, kevaṭṭa, cātumahārājikā devā taṃ bhikkhuṃ etadavocuṃ – ‘mayampi kho, bhikkhu, na jānāma, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātūti 3. Atthi kho 4, bhikkhu, cattāro mahārājāno amhehi abhikkantatarā ca paṇītatarā ca. Te kho etaṃ jāneyyuṃ, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti.
೪೮೯. ‘‘ಅಥ ಖೋ ಸೋ, ಕೇವಟ್ಟ, ಭಿಕ್ಖು ಯೇನ ಚತ್ತಾರೋ ಮಹಾರಾಜಾನೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಚತ್ತಾರೋ ಮಹಾರಾಜೇ ಏತದವೋಚ – ‘ಕತ್ಥ ನು ಖೋ, ಆವುಸೋ, ಇಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’ತಿ? ಏವಂ ವುತ್ತೇ, ಕೇವಟ್ಟ, ಚತ್ತಾರೋ ಮಹಾರಾಜಾನೋ ತಂ ಭಿಕ್ಖುಂ ಏತದವೋಚುಂ – ‘ಮಯಮ್ಪಿ ಖೋ, ಭಿಕ್ಖು, ನ ಜಾನಾಮ, ಯತ್ಥಿಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು, ಆಪೋಧಾತು ತೇಜೋಧಾತು ವಾಯೋಧಾತೂತಿ। ಅತ್ಥಿ ಖೋ, ಭಿಕ್ಖು, ತಾವತಿಂಸಾ ನಾಮ ದೇವಾ ಅಮ್ಹೇಹಿ ಅಭಿಕ್ಕನ್ತತರಾ ಚ ಪಣೀತತರಾ ಚ। ತೇ ಖೋ ಏತಂ ಜಾನೇಯ್ಯುಂ, ಯತ್ಥಿಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’ತಿ।
489. ‘‘Atha kho so, kevaṭṭa, bhikkhu yena cattāro mahārājāno tenupasaṅkami; upasaṅkamitvā cattāro mahārāje etadavoca – ‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti? Evaṃ vutte, kevaṭṭa, cattāro mahārājāno taṃ bhikkhuṃ etadavocuṃ – ‘mayampi kho, bhikkhu, na jānāma, yatthime cattāro mahābhūtā aparisesā nirujjhanti, seyyathidaṃ – pathavīdhātu, āpodhātu tejodhātu vāyodhātūti. Atthi kho, bhikkhu, tāvatiṃsā nāma devā amhehi abhikkantatarā ca paṇītatarā ca. Te kho etaṃ jāneyyuṃ, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti.
೪೯೦. ‘‘ಅಥ ಖೋ ಸೋ, ಕೇವಟ್ಟ, ಭಿಕ್ಖು ಯೇನ ತಾವತಿಂಸಾ ದೇವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಾವತಿಂಸೇ ದೇವೇ ಏತದವೋಚ – ‘ಕತ್ಥ ನು ಖೋ, ಆವುಸೋ, ಇಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’ತಿ? ಏವಂ ವುತ್ತೇ, ಕೇವಟ್ಟ, ತಾವತಿಂಸಾ ದೇವಾ ತಂ ಭಿಕ್ಖುಂ ಏತದವೋಚುಂ – ‘ಮಯಮ್ಪಿ ಖೋ, ಭಿಕ್ಖು, ನ ಜಾನಾಮ, ಯತ್ಥಿಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂತಿ। ಅತ್ಥಿ ಖೋ, ಭಿಕ್ಖು, ಸಕ್ಕೋ ನಾಮ ದೇವಾನಮಿನ್ದೋ ಅಮ್ಹೇಹಿ ಅಭಿಕ್ಕನ್ತತರೋ ಚ ಪಣೀತತರೋ ಚ। ಸೋ ಖೋ ಏತಂ ಜಾನೇಯ್ಯ, ಯತ್ಥಿಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’ತಿ।
490. ‘‘Atha kho so, kevaṭṭa, bhikkhu yena tāvatiṃsā devā tenupasaṅkami; upasaṅkamitvā tāvatiṃse deve etadavoca – ‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti? Evaṃ vutte, kevaṭṭa, tāvatiṃsā devā taṃ bhikkhuṃ etadavocuṃ – ‘mayampi kho, bhikkhu, na jānāma, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātūti. Atthi kho, bhikkhu, sakko nāma devānamindo amhehi abhikkantataro ca paṇītataro ca. So kho etaṃ jāneyya, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti.
೪೯೧. ‘‘ಅಥ ಖೋ ಸೋ, ಕೇವಟ್ಟ, ಭಿಕ್ಖು ಯೇನ ಸಕ್ಕೋ ದೇವಾನಮಿನ್ದೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಸಕ್ಕಂ ದೇವಾನಮಿನ್ದಂ ಏತದವೋಚ – ‘ಕತ್ಥ ನು ಖೋ, ಆವುಸೋ, ಇಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’ತಿ? ಏವಂ ವುತ್ತೇ, ಕೇವಟ್ಟ, ಸಕ್ಕೋ ದೇವಾನಮಿನ್ದೋ ತಂ ಭಿಕ್ಖುಂ ಏತದವೋಚ – ‘ಅಹಮ್ಪಿ ಖೋ, ಭಿಕ್ಖು, ನ ಜಾನಾಮಿ, ಯತ್ಥಿಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂತಿ। ಅತ್ಥಿ ಖೋ, ಭಿಕ್ಖು, ಯಾಮಾ ನಾಮ ದೇವಾ…ಪೇ॰… ಸುಯಾಮೋ ನಾಮ ದೇವಪುತ್ತೋ… ತುಸಿತಾ ನಾಮ ದೇವಾ… ಸನ್ತುಸ್ಸಿತೋ ನಾಮ ದೇವಪುತ್ತೋ… ನಿಮ್ಮಾನರತೀ ನಾಮ ದೇವಾ … ಸುನಿಮ್ಮಿತೋ ನಾಮ ದೇವಪುತ್ತೋ… ಪರನಿಮ್ಮಿತವಸವತ್ತೀ ನಾಮ ದೇವಾ… ವಸವತ್ತೀ ನಾಮ ದೇವಪುತ್ತೋ ಅಮ್ಹೇಹಿ ಅಭಿಕ್ಕನ್ತತರೋ ಚ ಪಣೀತತರೋ ಚ। ಸೋ ಖೋ ಏತಂ ಜಾನೇಯ್ಯ, ಯತ್ಥಿಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’ತಿ।
491. ‘‘Atha kho so, kevaṭṭa, bhikkhu yena sakko devānamindo tenupasaṅkami; upasaṅkamitvā sakkaṃ devānamindaṃ etadavoca – ‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti? Evaṃ vutte, kevaṭṭa, sakko devānamindo taṃ bhikkhuṃ etadavoca – ‘ahampi kho, bhikkhu, na jānāmi, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātūti. Atthi kho, bhikkhu, yāmā nāma devā…pe… suyāmo nāma devaputto… tusitā nāma devā… santussito nāma devaputto… nimmānaratī nāma devā … sunimmito nāma devaputto… paranimmitavasavattī nāma devā… vasavattī nāma devaputto amhehi abhikkantataro ca paṇītataro ca. So kho etaṃ jāneyya, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti.
೪೯೨. ‘‘ಅಥ ಖೋ ಸೋ, ಕೇವಟ್ಟ, ಭಿಕ್ಖು ಯೇನ ವಸವತ್ತೀ ದೇವಪುತ್ತೋ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ವಸವತ್ತಿಂ ದೇವಪುತ್ತಂ ಏತದವೋಚ – ‘ಕತ್ಥ ನು ಖೋ, ಆವುಸೋ, ಇಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’ತಿ? ಏವಂ ವುತ್ತೇ , ಕೇವಟ್ಟ, ವಸವತ್ತೀ ದೇವಪುತ್ತೋ ತಂ ಭಿಕ್ಖುಂ ಏತದವೋಚ – ‘ಅಹಮ್ಪಿ ಖೋ, ಭಿಕ್ಖು, ನ ಜಾನಾಮಿ ಯತ್ಥಿಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂತಿ। ಅತ್ಥಿ ಖೋ, ಭಿಕ್ಖು, ಬ್ರಹ್ಮಕಾಯಿಕಾ ನಾಮ ದೇವಾ ಅಮ್ಹೇಹಿ ಅಭಿಕ್ಕನ್ತತರಾ ಚ ಪಣೀತತರಾ ಚ। ತೇ ಖೋ ಏತಂ ಜಾನೇಯ್ಯುಂ, ಯತ್ಥಿಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’ತಿ।
492. ‘‘Atha kho so, kevaṭṭa, bhikkhu yena vasavattī devaputto tenupasaṅkami; upasaṅkamitvā vasavattiṃ devaputtaṃ etadavoca – ‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti? Evaṃ vutte , kevaṭṭa, vasavattī devaputto taṃ bhikkhuṃ etadavoca – ‘ahampi kho, bhikkhu, na jānāmi yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātūti. Atthi kho, bhikkhu, brahmakāyikā nāma devā amhehi abhikkantatarā ca paṇītatarā ca. Te kho etaṃ jāneyyuṃ, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti.
೪೯೩. ‘‘ಅಥ ಖೋ ಸೋ, ಕೇವಟ್ಟ, ಭಿಕ್ಖು ತಥಾರೂಪಂ ಸಮಾಧಿಂ ಸಮಾಪಜ್ಜಿ, ಯಥಾಸಮಾಹಿತೇ ಚಿತ್ತೇ ಬ್ರಹ್ಮಯಾನಿಯೋ ಮಗ್ಗೋ ಪಾತುರಹೋಸಿ। ಅಥ ಖೋ ಸೋ, ಕೇವಟ್ಟ, ಭಿಕ್ಖು ಯೇನ ಬ್ರಹ್ಮಕಾಯಿಕಾ ದೇವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಬ್ರಹ್ಮಕಾಯಿಕೇ ದೇವೇ ಏತದವೋಚ – ‘ಕತ್ಥ ನು ಖೋ, ಆವುಸೋ, ಇಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’ತಿ? ಏವಂ ವುತ್ತೇ, ಕೇವಟ್ಟ, ಬ್ರಹ್ಮಕಾಯಿಕಾ ದೇವಾ ತಂ ಭಿಕ್ಖುಂ ಏತದವೋಚುಂ – ‘ಮಯಮ್ಪಿ ಖೋ, ಭಿಕ್ಖು, ನ ಜಾನಾಮ, ಯತ್ಥಿಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂತಿ। ಅತ್ಥಿ ಖೋ, ಭಿಕ್ಖು, ಬ್ರಹ್ಮಾ ಮಹಾಬ್ರಹ್ಮಾ ಅಭಿಭೂ ಅನಭಿಭೂತೋ ಅಞ್ಞದತ್ಥುದಸೋ ವಸವತ್ತೀ ಇಸ್ಸರೋ ಕತ್ತಾ ನಿಮ್ಮಾತಾ ಸೇಟ್ಠೋ ಸಜಿತಾ ವಸೀ ಪಿತಾ ಭೂತಭಬ್ಯಾನಂ ಅಮ್ಹೇಹಿ ಅಭಿಕ್ಕನ್ತತರೋ ಚ ಪಣೀತತರೋ ಚ। ಸೋ ಖೋ ಏತಂ ಜಾನೇಯ್ಯ, ಯತ್ಥಿಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’’ತಿ।
493. ‘‘Atha kho so, kevaṭṭa, bhikkhu tathārūpaṃ samādhiṃ samāpajji, yathāsamāhite citte brahmayāniyo maggo pāturahosi. Atha kho so, kevaṭṭa, bhikkhu yena brahmakāyikā devā tenupasaṅkami; upasaṅkamitvā brahmakāyike deve etadavoca – ‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti? Evaṃ vutte, kevaṭṭa, brahmakāyikā devā taṃ bhikkhuṃ etadavocuṃ – ‘mayampi kho, bhikkhu, na jānāma, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātūti. Atthi kho, bhikkhu, brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyānaṃ amhehi abhikkantataro ca paṇītataro ca. So kho etaṃ jāneyya, yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’’ti.
‘‘‘ಕಹಂ ಪನಾವುಸೋ, ಏತರಹಿ ಸೋ ಮಹಾಬ್ರಹ್ಮಾ’ತಿ? ‘ಮಯಮ್ಪಿ ಖೋ, ಭಿಕ್ಖು, ನ ಜಾನಾಮ, ಯತ್ಥ ವಾ ಬ್ರಹ್ಮಾ ಯೇನ ವಾ ಬ್ರಹ್ಮಾ ಯಹಿಂ ವಾ ಬ್ರಹ್ಮಾ; ಅಪಿ ಚ, ಭಿಕ್ಖು, ಯಥಾ ನಿಮಿತ್ತಾ ದಿಸ್ಸನ್ತಿ, ಆಲೋಕೋ ಸಞ್ಜಾಯತಿ, ಓಭಾಸೋ ಪಾತುಭವತಿ, ಬ್ರಹ್ಮಾ ಪಾತುಭವಿಸ್ಸತಿ, ಬ್ರಹ್ಮುನೋ ಹೇತಂ ಪುಬ್ಬನಿಮಿತ್ತಂ ಪಾತುಭಾವಾಯ, ಯದಿದಂ ಆಲೋಕೋ ಸಞ್ಜಾಯತಿ, ಓಭಾಸೋ ಪಾತುಭವತೀ’ತಿ। ಅಥ ಖೋ ಸೋ, ಕೇವಟ್ಟ, ಮಹಾಬ್ರಹ್ಮಾ ನಚಿರಸ್ಸೇವ ಪಾತುರಹೋಸಿ ।
‘‘‘Kahaṃ panāvuso, etarahi so mahābrahmā’ti? ‘Mayampi kho, bhikkhu, na jānāma, yattha vā brahmā yena vā brahmā yahiṃ vā brahmā; api ca, bhikkhu, yathā nimittā dissanti, āloko sañjāyati, obhāso pātubhavati, brahmā pātubhavissati, brahmuno hetaṃ pubbanimittaṃ pātubhāvāya, yadidaṃ āloko sañjāyati, obhāso pātubhavatī’ti. Atha kho so, kevaṭṭa, mahābrahmā nacirasseva pāturahosi .
೪೯೪. ‘‘ಅಥ ಖೋ ಸೋ, ಕೇವಟ್ಟ, ಭಿಕ್ಖು ಯೇನ ಸೋ ಮಹಾಬ್ರಹ್ಮಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ತಂ ಮಹಾಬ್ರಹ್ಮಾನಂ ಏತದವೋಚ – ‘ಕತ್ಥ ನು ಖೋ, ಆವುಸೋ, ಇಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’’ತಿ? ಏವಂ ವುತ್ತೇ, ಕೇವಟ್ಟ, ಸೋ ಮಹಾಬ್ರಹ್ಮಾ ತಂ ಭಿಕ್ಖುಂ ಏತದವೋಚ – ‘ಅಹಮಸ್ಮಿ, ಭಿಕ್ಖು, ಬ್ರಹ್ಮಾ ಮಹಾಬ್ರಹ್ಮಾ ಅಭಿಭೂ ಅನಭಿಭೂತೋ ಅಞ್ಞದತ್ಥುದಸೋ ವಸವತ್ತೀ ಇಸ್ಸರೋ ಕತ್ತಾ ನಿಮ್ಮಾತಾ ಸೇಟ್ಠೋ ಸಜಿತಾ ವಸೀ ಪಿತಾ ಭೂತಭಬ್ಯಾನ’ನ್ತಿ।
494. ‘‘Atha kho so, kevaṭṭa, bhikkhu yena so mahābrahmā tenupasaṅkami; upasaṅkamitvā taṃ mahābrahmānaṃ etadavoca – ‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’’ti? Evaṃ vutte, kevaṭṭa, so mahābrahmā taṃ bhikkhuṃ etadavoca – ‘ahamasmi, bhikkhu, brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyāna’nti.
‘‘ದುತಿಯಮ್ಪಿ ಖೋ ಸೋ, ಕೇವಟ್ಟ, ಭಿಕ್ಖು ತಂ ಮಹಾಬ್ರಹ್ಮಾನಂ ಏತದವೋಚ – ‘ನ ಖೋಹಂ ತಂ, ಆವುಸೋ, ಏವಂ ಪುಚ್ಛಾಮಿ – ‘‘ತ್ವಮಸಿ ಬ್ರಹ್ಮಾ ಮಹಾಬ್ರಹ್ಮಾ ಅಭಿಭೂ ಅನಭಿಭೂತೋ ಅಞ್ಞದತ್ಥುದಸೋ ವಸವತ್ತೀ ಇಸ್ಸರೋ ಕತ್ತಾ ನಿಮ್ಮಾತಾ ಸೇಟ್ಠೋ ಸಜಿತಾ ವಸೀ ಪಿತಾ ಭೂತಭಬ್ಯಾನ’’ನ್ತಿ। ಏವಞ್ಚ ಖೋ ಅಹಂ ತಂ, ಆವುಸೋ, ಪುಚ್ಛಾಮಿ – ‘‘ಕತ್ಥ ನು ಖೋ, ಆವುಸೋ, ಇಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’’’ತಿ?
‘‘Dutiyampi kho so, kevaṭṭa, bhikkhu taṃ mahābrahmānaṃ etadavoca – ‘na khohaṃ taṃ, āvuso, evaṃ pucchāmi – ‘‘tvamasi brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyāna’’nti. Evañca kho ahaṃ taṃ, āvuso, pucchāmi – ‘‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’’’ti?
‘‘ದುತಿಯಮ್ಪಿ ಖೋ ಸೋ, ಕೇವಟ್ಟ, ಮಹಾಬ್ರಹ್ಮಾ ತಂ ಭಿಕ್ಖುಂ ಏತದವೋಚ – ‘ಅಹಮಸ್ಮಿ, ಭಿಕ್ಖು, ಬ್ರಹ್ಮಾ ಮಹಾಬ್ರಹ್ಮಾ ಅಭಿಭೂ ಅನಭಿಭೂತೋ ಅಞ್ಞದತ್ಥುದಸೋ ವಸವತ್ತೀ ಇಸ್ಸರೋ ಕತ್ತಾ ನಿಮ್ಮಾತಾ ಸೇಟ್ಠೋ ಸಜಿತಾ ವಸೀ ಪಿತಾ ಭೂತಭಬ್ಯಾನ’ನ್ತಿ। ತತಿಯಮ್ಪಿ ಖೋ ಸೋ, ಕೇವಟ್ಟ, ಭಿಕ್ಖು ತಂ ಮಹಾಬ್ರಹ್ಮಾನಂ ಏತದವೋಚ – ‘ನ ಖೋಹಂ ತಂ, ಆವುಸೋ, ಏವಂ ಪುಚ್ಛಾಮಿ – ‘‘ತ್ವಮಸಿ ಬ್ರಹ್ಮಾ ಮಹಾಬ್ರಹ್ಮಾ ಅಭಿಭೂ ಅನಭಿಭೂತೋ ಅಞ್ಞದತ್ಥುದಸೋ ವಸವತ್ತೀ ಇಸ್ಸರೋ ಕತ್ತಾ ನಿಮ್ಮಾತಾ ಸೇಟ್ಠೋ ಸಜಿತಾ ವಸೀ ಪಿತಾ ಭೂತಭಬ್ಯಾನ’’ನ್ತಿ। ಏವಞ್ಚ ಖೋ ಅಹಂ ತಂ, ಆವುಸೋ, ಪುಚ್ಛಾಮಿ – ‘‘ಕತ್ಥ ನು ಖೋ, ಆವುಸೋ, ಇಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’’’ತಿ?
‘‘Dutiyampi kho so, kevaṭṭa, mahābrahmā taṃ bhikkhuṃ etadavoca – ‘ahamasmi, bhikkhu, brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyāna’nti. Tatiyampi kho so, kevaṭṭa, bhikkhu taṃ mahābrahmānaṃ etadavoca – ‘na khohaṃ taṃ, āvuso, evaṃ pucchāmi – ‘‘tvamasi brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyāna’’nti. Evañca kho ahaṃ taṃ, āvuso, pucchāmi – ‘‘kattha nu kho, āvuso, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’’’ti?
೪೯೫. ‘‘ಅಥ ಖೋ ಸೋ, ಕೇವಟ್ಟ, ಮಹಾಬ್ರಹ್ಮಾ ತಂ ಭಿಕ್ಖುಂ ಬಾಹಾಯಂ ಗಹೇತ್ವಾ ಏಕಮನ್ತಂ ಅಪನೇತ್ವಾ ತಂ ಭಿಕ್ಖುಂ ಏತದವೋಚ – ‘ಇಮೇ ಖೋ ಮಂ, ಭಿಕ್ಖು, ಬ್ರಹ್ಮಕಾಯಿಕಾ ದೇವಾ ಏವಂ ಜಾನನ್ತಿ, ‘‘ನತ್ಥಿ ಕಿಞ್ಚಿ ಬ್ರಹ್ಮುನೋ ಅಞ್ಞಾತಂ, ನತ್ಥಿ ಕಿಞ್ಚಿ ಬ್ರಹ್ಮುನೋ ಅದಿಟ್ಠಂ, ನತ್ಥಿ ಕಿಞ್ಚಿ ಬ್ರಹ್ಮುನೋ ಅವಿದಿತಂ, ನತ್ಥಿ ಕಿಞ್ಚಿ ಬ್ರಹ್ಮುನೋ ಅಸಚ್ಛಿಕತ’’ನ್ತಿ। ತಸ್ಮಾಹಂ ತೇಸಂ ಸಮ್ಮುಖಾ ನ ಬ್ಯಾಕಾಸಿಂ। ಅಹಮ್ಪಿ ಖೋ, ಭಿಕ್ಖು, ನ ಜಾನಾಮಿ ಯತ್ಥಿಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂತಿ। ತಸ್ಮಾತಿಹ, ಭಿಕ್ಖು, ತುಯ್ಹೇವೇತಂ ದುಕ್ಕಟಂ, ತುಯ್ಹೇವೇತಂ ಅಪರದ್ಧಂ, ಯಂ ತ್ವಂ ತಂ ಭಗವನ್ತಂ ಅತಿಧಾವಿತ್ವಾ ಬಹಿದ್ಧಾ ಪರಿಯೇಟ್ಠಿಂ ಆಪಜ್ಜಸಿ ಇಮಸ್ಸ ಪಞ್ಹಸ್ಸ ವೇಯ್ಯಾಕರಣಾಯ। ಗಚ್ಛ ತ್ವಂ, ಭಿಕ್ಖು, ತಮೇವ ಭಗವನ್ತಂ ಉಪಸಙ್ಕಮಿತ್ವಾ ಇಮಂ ಪಞ್ಹಂ ಪುಚ್ಛ, ಯಥಾ ಚ ತೇ ಭಗವಾ ಬ್ಯಾಕರೋತಿ, ತಥಾ ನಂ ಧಾರೇಯ್ಯಾಸೀ’ತಿ।
495. ‘‘Atha kho so, kevaṭṭa, mahābrahmā taṃ bhikkhuṃ bāhāyaṃ gahetvā ekamantaṃ apanetvā taṃ bhikkhuṃ etadavoca – ‘ime kho maṃ, bhikkhu, brahmakāyikā devā evaṃ jānanti, ‘‘natthi kiñci brahmuno aññātaṃ, natthi kiñci brahmuno adiṭṭhaṃ, natthi kiñci brahmuno aviditaṃ, natthi kiñci brahmuno asacchikata’’nti. Tasmāhaṃ tesaṃ sammukhā na byākāsiṃ. Ahampi kho, bhikkhu, na jānāmi yatthime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātūti. Tasmātiha, bhikkhu, tuyhevetaṃ dukkaṭaṃ, tuyhevetaṃ aparaddhaṃ, yaṃ tvaṃ taṃ bhagavantaṃ atidhāvitvā bahiddhā pariyeṭṭhiṃ āpajjasi imassa pañhassa veyyākaraṇāya. Gaccha tvaṃ, bhikkhu, tameva bhagavantaṃ upasaṅkamitvā imaṃ pañhaṃ puccha, yathā ca te bhagavā byākaroti, tathā naṃ dhāreyyāsī’ti.
೪೯೬. ‘‘ಅಥ ಖೋ ಸೋ, ಕೇವಟ್ಟ, ಭಿಕ್ಖು – ಸೇಯ್ಯಥಾಪಿ ನಾಮ ಬಲವಾ ಪುರಿಸೋ ಸಮಿಞ್ಜಿತಂ ವಾ ಬಾಹಂ ಪಸಾರೇಯ್ಯ, ಪಸಾರಿತಂ ವಾ ಬಾಹಂ ಸಮಿಞ್ಜೇಯ್ಯ ಏವಮೇವ ಬ್ರಹ್ಮಲೋಕೇ ಅನ್ತರಹಿತೋ ಮಮ ಪುರತೋ ಪಾತುರಹೋಸಿ। ಅಥ ಖೋ ಸೋ, ಕೇವಟ್ಟ, ಭಿಕ್ಖು ಮಂ ಅಭಿವಾದೇತ್ವಾ ಏಕಮನ್ತಂ ನಿಸೀದಿ, ಏಕಮನ್ತಂ ನಿಸಿನ್ನೋ ಖೋ, ಕೇವಟ್ಟ, ಸೋ ಭಿಕ್ಖು ಮಂ ಏತದವೋಚ – ‘ಕತ್ಥ ನು ಖೋ, ಭನ್ತೇ, ಇಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’ತಿ?
496. ‘‘Atha kho so, kevaṭṭa, bhikkhu – seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya evameva brahmaloke antarahito mama purato pāturahosi. Atha kho so, kevaṭṭa, bhikkhu maṃ abhivādetvā ekamantaṃ nisīdi, ekamantaṃ nisinno kho, kevaṭṭa, so bhikkhu maṃ etadavoca – ‘kattha nu kho, bhante, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti?
ತೀರದಸ್ಸಿಸಕುಣುಪಮಾ
Tīradassisakuṇupamā
೪೯೭. ‘‘ಏವಂ ವುತ್ತೇ, ಅಹಂ, ಕೇವಟ್ಟ, ತಂ ಭಿಕ್ಖುಂ ಏತದವೋಚಂ – ‘ಭೂತಪುಬ್ಬಂ, ಭಿಕ್ಖು, ಸಾಮುದ್ದಿಕಾ ವಾಣಿಜಾ ತೀರದಸ್ಸಿಂ ಸಕುಣಂ ಗಹೇತ್ವಾ ನಾವಾಯ ಸಮುದ್ದಂ ಅಜ್ಝೋಗಾಹನ್ತಿ। ತೇ ಅತೀರದಕ್ಖಿನಿಯಾ ನಾವಾಯ ತೀರದಸ್ಸಿಂ ಸಕುಣಂ ಮುಞ್ಚನ್ತಿ। ಸೋ ಗಚ್ಛತೇವ ಪುರತ್ಥಿಮಂ ದಿಸಂ, ಗಚ್ಛತಿ ದಕ್ಖಿಣಂ ದಿಸಂ, ಗಚ್ಛತಿ ಪಚ್ಛಿಮಂ ದಿಸಂ, ಗಚ್ಛತಿ ಉತ್ತರಂ ದಿಸಂ, ಗಚ್ಛತಿ ಉದ್ಧಂ ದಿಸಂ, ಗಚ್ಛತಿ ಅನುದಿಸಂ। ಸಚೇ ಸೋ ಸಮನ್ತಾ ತೀರಂ ಪಸ್ಸತಿ, ತಥಾಗತಕೋವ 5 ಹೋತಿ। ಸಚೇ ಪನ ಸೋ ಸಮನ್ತಾ ತೀರಂ ನ ಪಸ್ಸತಿ, ತಮೇವ ನಾವಂ ಪಚ್ಚಾಗಚ್ಛತಿ। ಏವಮೇವ ಖೋ ತ್ವಂ, ಭಿಕ್ಖು, ಯತೋ ಯಾವ ಬ್ರಹ್ಮಲೋಕಾ ಪರಿಯೇಸಮಾನೋ ಇಮಸ್ಸ ಪಞ್ಹಸ್ಸ ವೇಯ್ಯಾಕರಣಂ ನಾಜ್ಝಗಾ, ಅಥ ಮಮಞ್ಞೇವ ಸನ್ತಿಕೇ ಪಚ್ಚಾಗತೋ। ನ ಖೋ ಏಸೋ, ಭಿಕ್ಖು, ಪಞ್ಹೋ ಏವಂ ಪುಚ್ಛಿತಬ್ಬೋ – ‘ಕತ್ಥ ನು ಖೋ, ಭನ್ತೇ, ಇಮೇ ಚತ್ತಾರೋ ಮಹಾಭೂತಾ ಅಪರಿಸೇಸಾ ನಿರುಜ್ಝನ್ತಿ, ಸೇಯ್ಯಥಿದಂ – ಪಥವೀಧಾತು ಆಪೋಧಾತು ತೇಜೋಧಾತು ವಾಯೋಧಾತೂ’ತಿ?
497. ‘‘Evaṃ vutte, ahaṃ, kevaṭṭa, taṃ bhikkhuṃ etadavocaṃ – ‘bhūtapubbaṃ, bhikkhu, sāmuddikā vāṇijā tīradassiṃ sakuṇaṃ gahetvā nāvāya samuddaṃ ajjhogāhanti. Te atīradakkhiniyā nāvāya tīradassiṃ sakuṇaṃ muñcanti. So gacchateva puratthimaṃ disaṃ, gacchati dakkhiṇaṃ disaṃ, gacchati pacchimaṃ disaṃ, gacchati uttaraṃ disaṃ, gacchati uddhaṃ disaṃ, gacchati anudisaṃ. Sace so samantā tīraṃ passati, tathāgatakova 6 hoti. Sace pana so samantā tīraṃ na passati, tameva nāvaṃ paccāgacchati. Evameva kho tvaṃ, bhikkhu, yato yāva brahmalokā pariyesamāno imassa pañhassa veyyākaraṇaṃ nājjhagā, atha mamaññeva santike paccāgato. Na kho eso, bhikkhu, pañho evaṃ pucchitabbo – ‘kattha nu kho, bhante, ime cattāro mahābhūtā aparisesā nirujjhanti, seyyathidaṃ – pathavīdhātu āpodhātu tejodhātu vāyodhātū’ti?
೪೯೮. ‘‘ಏವಞ್ಚ ಖೋ ಏಸೋ, ಭಿಕ್ಖು, ಪಞ್ಹೋ ಪುಚ್ಛಿತಬ್ಬೋ –
498. ‘‘Evañca kho eso, bhikkhu, pañho pucchitabbo –
‘ಕತ್ಥ ಆಪೋ ಚ ಪಥವೀ, ತೇಜೋ ವಾಯೋ ನ ಗಾಧತಿ।
‘Kattha āpo ca pathavī, tejo vāyo na gādhati;
ಕತ್ಥ ದೀಘಞ್ಚ ರಸ್ಸಞ್ಚ, ಅಣುಂ ಥೂಲಂ ಸುಭಾಸುಭಂ।
Kattha dīghañca rassañca, aṇuṃ thūlaṃ subhāsubhaṃ;
ಕತ್ಥ ನಾಮಞ್ಚ ರೂಪಞ್ಚ, ಅಸೇಸಂ ಉಪರುಜ್ಝತೀ’ತಿ॥
Kattha nāmañca rūpañca, asesaṃ uparujjhatī’ti.
೪೯೯. ‘‘ತತ್ರ ವೇಯ್ಯಾಕರಣಂ ಭವತಿ –
499. ‘‘Tatra veyyākaraṇaṃ bhavati –
‘ವಿಞ್ಞಾಣಂ ಅನಿದಸ್ಸನಂ, ಅನನ್ತಂ ಸಬ್ಬತೋಪಭಂ।
‘Viññāṇaṃ anidassanaṃ, anantaṃ sabbatopabhaṃ;
ಏತ್ಥ ಆಪೋ ಚ ಪಥವೀ, ತೇಜೋ ವಾಯೋ ನ ಗಾಧತಿ॥
Ettha āpo ca pathavī, tejo vāyo na gādhati.
ಏತ್ಥ ದೀಘಞ್ಚ ರಸ್ಸಞ್ಚ, ಅಣುಂ ಥೂಲಂ ಸುಭಾಸುಭಂ।
Ettha dīghañca rassañca, aṇuṃ thūlaṃ subhāsubhaṃ;
ಏತ್ಥ ನಾಮಞ್ಚ ರೂಪಞ್ಚ, ಅಸೇಸಂ ಉಪರುಜ್ಝತಿ।
Ettha nāmañca rūpañca, asesaṃ uparujjhati;
ವಿಞ್ಞಾಣಸ್ಸ ನಿರೋಧೇನ, ಏತ್ಥೇತಂ ಉಪರುಜ್ಝತೀ’ತಿ॥
Viññāṇassa nirodhena, etthetaṃ uparujjhatī’ti.
೫೦೦. ಇದಮವೋಚ ಭಗವಾ। ಅತ್ತಮನೋ ಕೇವಟ್ಟೋ ಗಹಪತಿಪುತ್ತೋ ಭಗವತೋ ಭಾಸಿತಂ ಅಭಿನನ್ದೀತಿ।
500. Idamavoca bhagavā. Attamano kevaṭṭo gahapatiputto bhagavato bhāsitaṃ abhinandīti.
ಕೇವಟ್ಟಸುತ್ತಂ ನಿಟ್ಠಿತಂ ಏಕಾದಸಮಂ।
Kevaṭṭasuttaṃ niṭṭhitaṃ ekādasamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ದೀಘ ನಿಕಾಯ (ಅಟ್ಠಕಥಾ) • Dīgha nikāya (aṭṭhakathā) / ೧೧. ಕೇವಟ್ಟಸುತ್ತವಣ್ಣನಾ • 11. Kevaṭṭasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ದೀಘನಿಕಾಯ (ಟೀಕಾ) • Dīghanikāya (ṭīkā) / ೧೧. ಕೇವಟ್ಟಸುತ್ತವಣ್ಣನಾ • 11. Kevaṭṭasuttavaṇṇanā
