| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. க²தி³ரபத்தஸுத்தங்
2. Khadirapattasuttaṃ
1102. ‘‘யோ, பி⁴க்க²வே, ஏவங் வதெ³ய்ய – ‘அஹங் து³க்க²ங் அரியஸச்சங் யதா²பூ⁴தங் அனபி⁴ஸமேச்ச, து³க்க²ஸமுத³யங் அரியஸச்சங் யதா²பூ⁴தங் அனபி⁴ஸமேச்ச, து³க்க²னிரோத⁴ங் அரியஸச்சங் யதா²பூ⁴தங் அனபி⁴ஸமேச்ச, து³க்க²னிரோத⁴கா³மினிங் படிபத³ங் அரியஸச்சங் யதா²பூ⁴தங் அனபி⁴ஸமேச்ச ஸம்மா து³க்க²ஸ்ஸந்தங் கரிஸ்ஸாமீ’தி – நேதங் டா²னங் விஜ்ஜதி.
1102. ‘‘Yo, bhikkhave, evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca, dukkhasamudayaṃ ariyasaccaṃ yathābhūtaṃ anabhisamecca, dukkhanirodhaṃ ariyasaccaṃ yathābhūtaṃ anabhisamecca, dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘ஸெய்யதா²பி , பி⁴க்க²வே, யோ ஏவங் வதெ³ய்ய – ‘அஹங் க²தி³ரபத்தானங் வா ஸரலபத்தானங் 1 வா ஆமலகபத்தானங் வா புடங் கரித்வா உத³கங் வா தாலபத்தங் வா ஆஹரிஸ்ஸாமீ’தி – நேதங் டா²னங் விஜ்ஜதி; ஏவமேவ கோ², பி⁴க்க²வே, யோ ஏவங் வதெ³ய்ய – ‘அஹங் து³க்க²ங் அரியஸச்சங் யதா²பூ⁴தங் அனபி⁴ஸமேச்ச…பே॰… து³க்க²னிரோத⁴கா³மினிங் படிபத³ங் அரியஸச்சங் யதா²பூ⁴தங் அனபி⁴ஸமேச்ச ஸம்மா து³க்க²ஸ்ஸந்தங் கரிஸ்ஸாமீ’தி – நேதங் டா²னங் விஜ்ஜதி.
‘‘Seyyathāpi , bhikkhave, yo evaṃ vadeyya – ‘ahaṃ khadirapattānaṃ vā saralapattānaṃ 2 vā āmalakapattānaṃ vā puṭaṃ karitvā udakaṃ vā tālapattaṃ vā āharissāmī’ti – netaṃ ṭhānaṃ vijjati; evameva kho, bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘யோ ச கோ², பி⁴க்க²வே, ஏவங் வதெ³ய்ய – ‘அஹங் து³க்க²ங் அரியஸச்சங் யதா²பூ⁴தங் அபி⁴ஸமேச்ச, து³க்க²ஸமுத³யங் அரியஸச்சங் யதா²பூ⁴தங் அபி⁴ஸமேச்ச, து³க்க²னிரோத⁴ங் அரியஸச்சங் யதா²பூ⁴தங் அபி⁴ஸமேச்ச, து³க்க²னிரோத⁴கா³மினிங் படிபத³ங் அரியஸச்சங் யதா²பூ⁴தங் அபி⁴ஸமேச்ச ஸம்மா து³க்க²ஸ்ஸந்தங் கரிஸ்ஸாமீ’தி – டா²னமேதங் விஜ்ஜதி.
‘‘Yo ca kho, bhikkhave, evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca, dukkhasamudayaṃ ariyasaccaṃ yathābhūtaṃ abhisamecca, dukkhanirodhaṃ ariyasaccaṃ yathābhūtaṃ abhisamecca, dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘ஸெய்யதா²பி, பி⁴க்க²வே, யோ ஏவங் வதெ³ய்ய – ‘அஹங் பது³மபத்தானங் வா பலாஸபத்தானங் வா மாலுவபத்தானங் வா புடங் கரித்வா உத³கங் வா தாலபத்தங் வா ஆஹரிஸ்ஸாமீ’தி – டா²னமேதங் விஜ்ஜதி; ஏவமேவ கோ², பி⁴க்க²வே, யோ ஏவங் வதெ³ய்ய – ‘அஹங் து³க்க²ங் அரியஸச்சங் யதா²பூ⁴தங் அபி⁴ஸமேச்ச …பே॰… து³க்க²னிரோத⁴கா³மினிங் படிபத³ங் அரியஸச்சங் யதா²பூ⁴தங் அபி⁴ஸமேச்ச ஸம்மா து³க்க²ஸ்ஸந்தங் கரிஸ்ஸாமீ’தி – டா²னமேதங் விஜ்ஜதி.
‘‘Seyyathāpi, bhikkhave, yo evaṃ vadeyya – ‘ahaṃ padumapattānaṃ vā palāsapattānaṃ vā māluvapattānaṃ vā puṭaṃ karitvā udakaṃ vā tālapattaṃ vā āharissāmī’ti – ṭhānametaṃ vijjati; evameva kho, bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca …pe… dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘தஸ்மாதிஹ, பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. து³தியங்.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. க²தி³ரபத்தஸுத்தவண்ணனா • 2. Khadirapattasuttavaṇṇanā
