| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
২. খদিরপত্তসুত্তং
2. Khadirapattasuttaṃ
১১০২. ‘‘যো, ভিক্খৰে, এৰং ৰদেয্য – ‘অহং দুক্খং অরিযসচ্চং যথাভূতং অনভিসমেচ্চ, দুক্খসমুদযং অরিযসচ্চং যথাভূতং অনভিসমেচ্চ, দুক্খনিরোধং অরিযসচ্চং যথাভূতং অনভিসমেচ্চ, দুক্খনিরোধগামিনিং পটিপদং অরিযসচ্চং যথাভূতং অনভিসমেচ্চ সম্মা দুক্খস্সন্তং করিস্সামী’তি – নেতং ঠানং ৰিজ্জতি।
1102. ‘‘Yo, bhikkhave, evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca, dukkhasamudayaṃ ariyasaccaṃ yathābhūtaṃ anabhisamecca, dukkhanirodhaṃ ariyasaccaṃ yathābhūtaṃ anabhisamecca, dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘সেয্যথাপি , ভিক্খৰে, যো এৰং ৰদেয্য – ‘অহং খদিরপত্তানং ৰা সরলপত্তানং 1 ৰা আমলকপত্তানং ৰা পুটং করিত্ৰা উদকং ৰা তালপত্তং ৰা আহরিস্সামী’তি – নেতং ঠানং ৰিজ্জতি; এৰমেৰ খো, ভিক্খৰে, যো এৰং ৰদেয্য – ‘অহং দুক্খং অরিযসচ্চং যথাভূতং অনভিসমেচ্চ…পে॰… দুক্খনিরোধগামিনিং পটিপদং অরিযসচ্চং যথাভূতং অনভিসমেচ্চ সম্মা দুক্খস্সন্তং করিস্সামী’তি – নেতং ঠানং ৰিজ্জতি।
‘‘Seyyathāpi , bhikkhave, yo evaṃ vadeyya – ‘ahaṃ khadirapattānaṃ vā saralapattānaṃ 2 vā āmalakapattānaṃ vā puṭaṃ karitvā udakaṃ vā tālapattaṃ vā āharissāmī’ti – netaṃ ṭhānaṃ vijjati; evameva kho, bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘যো চ খো, ভিক্খৰে, এৰং ৰদেয্য – ‘অহং দুক্খং অরিযসচ্চং যথাভূতং অভিসমেচ্চ, দুক্খসমুদযং অরিযসচ্চং যথাভূতং অভিসমেচ্চ, দুক্খনিরোধং অরিযসচ্চং যথাভূতং অভিসমেচ্চ, দুক্খনিরোধগামিনিং পটিপদং অরিযসচ্চং যথাভূতং অভিসমেচ্চ সম্মা দুক্খস্সন্তং করিস্সামী’তি – ঠানমেতং ৰিজ্জতি।
‘‘Yo ca kho, bhikkhave, evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca, dukkhasamudayaṃ ariyasaccaṃ yathābhūtaṃ abhisamecca, dukkhanirodhaṃ ariyasaccaṃ yathābhūtaṃ abhisamecca, dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘সেয্যথাপি, ভিক্খৰে, যো এৰং ৰদেয্য – ‘অহং পদুমপত্তানং ৰা পলাসপত্তানং ৰা মালুৰপত্তানং ৰা পুটং করিত্ৰা উদকং ৰা তালপত্তং ৰা আহরিস্সামী’তি – ঠানমেতং ৰিজ্জতি; এৰমেৰ খো, ভিক্খৰে, যো এৰং ৰদেয্য – ‘অহং দুক্খং অরিযসচ্চং যথাভূতং অভিসমেচ্চ …পে॰… দুক্খনিরোধগামিনিং পটিপদং অরিযসচ্চং যথাভূতং অভিসমেচ্চ সম্মা দুক্খস্সন্তং করিস্সামী’তি – ঠানমেতং ৰিজ্জতি।
‘‘Seyyathāpi, bhikkhave, yo evaṃ vadeyya – ‘ahaṃ padumapattānaṃ vā palāsapattānaṃ vā māluvapattānaṃ vā puṭaṃ karitvā udakaṃ vā tālapattaṃ vā āharissāmī’ti – ṭhānametaṃ vijjati; evameva kho, bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca …pe… dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘তস্মাতিহ, ভিক্খৰে, ‘ইদং দুক্খ’ন্তি যোগো করণীযো…পে॰… ‘অযং দুক্খনিরোধগামিনী পটিপদা’তি যোগো করণীযো’’তি। দুতিযং।
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. খদিরপত্তসুত্তৰণ্ণনা • 2. Khadirapattasuttavaṇṇanā
