| Library / Tipiṭaka / തിപിടക • Tipiṭaka / സംയുത്തനികായ • Saṃyuttanikāya |
൨. ഖദിരപത്തസുത്തം
2. Khadirapattasuttaṃ
൧൧൦൨. ‘‘യോ, ഭിക്ഖവേ, ഏവം വദേയ്യ – ‘അഹം ദുക്ഖം അരിയസച്ചം യഥാഭൂതം അനഭിസമേച്ച, ദുക്ഖസമുദയം അരിയസച്ചം യഥാഭൂതം അനഭിസമേച്ച, ദുക്ഖനിരോധം അരിയസച്ചം യഥാഭൂതം അനഭിസമേച്ച, ദുക്ഖനിരോധഗാമിനിം പടിപദം അരിയസച്ചം യഥാഭൂതം അനഭിസമേച്ച സമ്മാ ദുക്ഖസ്സന്തം കരിസ്സാമീ’തി – നേതം ഠാനം വിജ്ജതി.
1102. ‘‘Yo, bhikkhave, evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca, dukkhasamudayaṃ ariyasaccaṃ yathābhūtaṃ anabhisamecca, dukkhanirodhaṃ ariyasaccaṃ yathābhūtaṃ anabhisamecca, dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘സേയ്യഥാപി , ഭിക്ഖവേ, യോ ഏവം വദേയ്യ – ‘അഹം ഖദിരപത്താനം വാ സരലപത്താനം 1 വാ ആമലകപത്താനം വാ പുടം കരിത്വാ ഉദകം വാ താലപത്തം വാ ആഹരിസ്സാമീ’തി – നേതം ഠാനം വിജ്ജതി; ഏവമേവ ഖോ, ഭിക്ഖവേ, യോ ഏവം വദേയ്യ – ‘അഹം ദുക്ഖം അരിയസച്ചം യഥാഭൂതം അനഭിസമേച്ച…പേ॰… ദുക്ഖനിരോധഗാമിനിം പടിപദം അരിയസച്ചം യഥാഭൂതം അനഭിസമേച്ച സമ്മാ ദുക്ഖസ്സന്തം കരിസ്സാമീ’തി – നേതം ഠാനം വിജ്ജതി.
‘‘Seyyathāpi , bhikkhave, yo evaṃ vadeyya – ‘ahaṃ khadirapattānaṃ vā saralapattānaṃ 2 vā āmalakapattānaṃ vā puṭaṃ karitvā udakaṃ vā tālapattaṃ vā āharissāmī’ti – netaṃ ṭhānaṃ vijjati; evameva kho, bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘യോ ച ഖോ, ഭിക്ഖവേ, ഏവം വദേയ്യ – ‘അഹം ദുക്ഖം അരിയസച്ചം യഥാഭൂതം അഭിസമേച്ച, ദുക്ഖസമുദയം അരിയസച്ചം യഥാഭൂതം അഭിസമേച്ച, ദുക്ഖനിരോധം അരിയസച്ചം യഥാഭൂതം അഭിസമേച്ച, ദുക്ഖനിരോധഗാമിനിം പടിപദം അരിയസച്ചം യഥാഭൂതം അഭിസമേച്ച സമ്മാ ദുക്ഖസ്സന്തം കരിസ്സാമീ’തി – ഠാനമേതം വിജ്ജതി.
‘‘Yo ca kho, bhikkhave, evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca, dukkhasamudayaṃ ariyasaccaṃ yathābhūtaṃ abhisamecca, dukkhanirodhaṃ ariyasaccaṃ yathābhūtaṃ abhisamecca, dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘സേയ്യഥാപി, ഭിക്ഖവേ, യോ ഏവം വദേയ്യ – ‘അഹം പദുമപത്താനം വാ പലാസപത്താനം വാ മാലുവപത്താനം വാ പുടം കരിത്വാ ഉദകം വാ താലപത്തം വാ ആഹരിസ്സാമീ’തി – ഠാനമേതം വിജ്ജതി; ഏവമേവ ഖോ, ഭിക്ഖവേ, യോ ഏവം വദേയ്യ – ‘അഹം ദുക്ഖം അരിയസച്ചം യഥാഭൂതം അഭിസമേച്ച …പേ॰… ദുക്ഖനിരോധഗാമിനിം പടിപദം അരിയസച്ചം യഥാഭൂതം അഭിസമേച്ച സമ്മാ ദുക്ഖസ്സന്തം കരിസ്സാമീ’തി – ഠാനമേതം വിജ്ജതി.
‘‘Seyyathāpi, bhikkhave, yo evaṃ vadeyya – ‘ahaṃ padumapattānaṃ vā palāsapattānaṃ vā māluvapattānaṃ vā puṭaṃ karitvā udakaṃ vā tālapattaṃ vā āharissāmī’ti – ṭhānametaṃ vijjati; evameva kho, bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca …pe… dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘തസ്മാതിഹ, ഭിക്ഖവേ, ‘ഇദം ദുക്ഖ’ന്തി യോഗോ കരണീയോ…പേ॰… ‘അയം ദുക്ഖനിരോധഗാമിനീ പടിപദാ’തി യോഗോ കരണീയോ’’തി. ദുതിയം.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Dutiyaṃ.
Footnotes:
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൨. ഖദിരപത്തസുത്തവണ്ണനാ • 2. Khadirapattasuttavaṇṇanā
