| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3-9. க²தி³ரவனியத்தே²ரஅபதா³னவண்ணனா
3-9. Khadiravaniyattheraapadānavaṇṇanā
க³ங்கா³ பா⁴கீ³ரதீ² நாமாதிஆதி³கங் ஆயஸ்மதோ க²தி³ரவனியத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஹங்ஸவதீனக³ரே தித்த²னாவிககுலே நிப்³ப³த்தித்வா மஹாக³ங்கா³ய பயாக³தித்தே² தித்த²னாவாய கம்மங் கரொந்தோ ஏகதி³வஸங் ஸஸாவகஸங்க⁴ங் ப⁴க³வந்தங் க³ங்கா³தீரங் உபக³தங் தி³ஸ்வா பஸன்னமானஸோ நாவாஸங்கா⁴டங் யோஜெத்வா மஹந்தேன பூஜாஸக்காரேன பரதீரங் பாபெத்வா அஞ்ஞதரங் பி⁴க்கு²ங் ஸத்தா²ரா ஆரஞ்ஞகானங் பி⁴க்கூ²னங் அக்³க³ட்டா²னே ட²பியமானங் தி³ஸ்வா தங் டா²னந்தரங் பத்தெ²த்வா ப⁴க³வதோ பி⁴க்கு²ஸங்க⁴ஸ்ஸ ச மஹாதா³னங் பவத்தெத்வா பணிதா⁴னங் அகாஸி. ப⁴க³வா தஸ்ஸ பத்த²னாய அவஞ்ஜ²பா⁴வங் ப்³யாகாஸி.
Gaṅgābhāgīrathī nāmātiādikaṃ āyasmato khadiravaniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle haṃsavatīnagare titthanāvikakule nibbattitvā mahāgaṅgāya payāgatitthe titthanāvāya kammaṃ karonto ekadivasaṃ sasāvakasaṅghaṃ bhagavantaṃ gaṅgātīraṃ upagataṃ disvā pasannamānaso nāvāsaṅghāṭaṃ yojetvā mahantena pūjāsakkārena paratīraṃ pāpetvā aññataraṃ bhikkhuṃ satthārā āraññakānaṃ bhikkhūnaṃ aggaṭṭhāne ṭhapiyamānaṃ disvā taṃ ṭhānantaraṃ patthetvā bhagavato bhikkhusaṅghassa ca mahādānaṃ pavattetvā paṇidhānaṃ akāsi. Bhagavā tassa patthanāya avañjhabhāvaṃ byākāsi.
ஸோ ததோ பட்டா²ய புஞ்ஞானி உபசினந்தோ தே³வமனுஸ்ஸேஸு ஸங்ஸரந்தோ உப⁴யஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ மக³த⁴ரட்டே² நாலககா³மே ரூபஸாரியா நாம ப்³ராஹ்மணியா குச்சி²ம்ஹி நிப்³ப³த்தி. தங் வயப்பத்தங் மாதாபிதரோ க⁴ரப³ந்த⁴னேன ப³ந்தி⁴துகாமா ஹுத்வா தஸ்ஸ ஆரோசேஸுங். ஸோ ஸாரிபுத்தத்தே²ரஸ்ஸ பப்³ப³ஜிதபா⁴வங் ஸுத்வா ‘‘மய்ஹங் ஜெட்ட²பா⁴தா அய்யோ உபதிஸ்ஸோ இமங் விப⁴வங் ச²ட்³டெ³த்வா பப்³ப³ஜிதோ, தேன வந்தங் கே²ளபிண்ட³ங் கதா²ஹங் அனுப⁴விஸ்ஸாமீ’’தி ஜாதஸங்வேகோ³ பாஸங் அனுபக³ச்ச²மானமிகோ³ விய ஞாதகே வஞ்செத்வா ஹேதுஸம்பத்தியா சோதி³யமானோ பி⁴க்கூ²னங் ஸந்திகங் க³ந்த்வா த⁴ம்மஸேனாபதினோ கனிட்ட²பா⁴வங் நிவேதெ³த்வா அத்தனோ பப்³ப³ஜ்ஜாய ச²ந்த³ங் ஆரோசேஸி. பி⁴க்கூ² தங் பப்³பா³ஜெத்வா பரிபுண்ணவீஸதிவஸ்ஸங் உபஸம்பாதெ³த்வா கம்மட்டா²னே நியோஜேஸுங். ஸோ கம்மட்டா²னங் க³ஹெத்வா க²தி³ரவனங் பவிஸித்வா விஸ்ஸமந்தோ க⁴டெந்தோ வாயமந்தோ ஞாணஸ்ஸ பரிபாகங் க³தத்தா நசிரஸ்ஸேவ ச²ளபி⁴ஞ்ஞோ அரஹா அஹோஸி. ஸோ அரஹா ஹுத்வா ஸத்தா²ரங் த⁴ம்மஸேனாபதிஞ்ச வந்தி³துங் ஸேனாஸனங் ஸங்ஸாமெத்வா பத்தசீவரமாதா³ய நிக்க²மித்வா அனுபுப்³பே³ன ஸாவத்தி²ங் பத்வா ஜேதவனங் பவிஸித்வா ஸத்தா²ரங் த⁴ம்மஸேனாபதிஞ்ச வந்தி³த்வா கதிபாஹங் ஜேதவனே விஹாஸி. அத² நங் ஸத்தா² அரியக³ணமஜ்ஜே² நிஸின்னோ ஆரஞ்ஞகானங் பி⁴க்கூ²னங் அக்³க³ட்டா²னே ட²பேஸி – ‘‘ஏதத³க்³க³ங், பி⁴க்க²வே, மம ஸாவகானங் பி⁴க்கூ²னங் ஆரஞ்ஞகானங் யதி³த³ங் ரேவதோ’’தி (அ॰ நி॰ 1.198, 203).
So tato paṭṭhāya puññāni upacinanto devamanussesu saṃsaranto ubhayasampattiyo anubhavitvā imasmiṃ buddhuppāde magadharaṭṭhe nālakagāme rūpasāriyā nāma brāhmaṇiyā kucchimhi nibbatti. Taṃ vayappattaṃ mātāpitaro gharabandhanena bandhitukāmā hutvā tassa ārocesuṃ. So sāriputtattherassa pabbajitabhāvaṃ sutvā ‘‘mayhaṃ jeṭṭhabhātā ayyo upatisso imaṃ vibhavaṃ chaḍḍetvā pabbajito, tena vantaṃ kheḷapiṇḍaṃ kathāhaṃ anubhavissāmī’’ti jātasaṃvego pāsaṃ anupagacchamānamigo viya ñātake vañcetvā hetusampattiyā codiyamāno bhikkhūnaṃ santikaṃ gantvā dhammasenāpatino kaniṭṭhabhāvaṃ nivedetvā attano pabbajjāya chandaṃ ārocesi. Bhikkhū taṃ pabbājetvā paripuṇṇavīsativassaṃ upasampādetvā kammaṭṭhāne niyojesuṃ. So kammaṭṭhānaṃ gahetvā khadiravanaṃ pavisitvā vissamanto ghaṭento vāyamanto ñāṇassa paripākaṃ gatattā nacirasseva chaḷabhiñño arahā ahosi. So arahā hutvā satthāraṃ dhammasenāpatiñca vandituṃ senāsanaṃ saṃsāmetvā pattacīvaramādāya nikkhamitvā anupubbena sāvatthiṃ patvā jetavanaṃ pavisitvā satthāraṃ dhammasenāpatiñca vanditvā katipāhaṃ jetavane vihāsi. Atha naṃ satthā ariyagaṇamajjhe nisinno āraññakānaṃ bhikkhūnaṃ aggaṭṭhāne ṭhapesi – ‘‘etadaggaṃ, bhikkhave, mama sāvakānaṃ bhikkhūnaṃ āraññakānaṃ yadidaṃ revato’’ti (a. ni. 1.198, 203).
628. ஏவங் ஏதத³க்³க³ட்டா²னங் பத்வா அத்தனோ புப்³ப³கம்மங் ஸரித்வா பீதிஸோமனஸ்ஸவஸேன புப்³ப³சரிதாபதா³னங் பகாஸெந்தோ க³ங்கா³ பா⁴கீ³ரதீ²திஆதி³மாஹ. தத்த² க³ங்கா³தி கா³யமானா கோ⁴ஸங் குருமானா க³ச்ச²தீதி க³ங்கா³. அத² வா கோ³ வுச்சதி பத²வீ, தஸ்மிங் க³தா பவத்தாதி க³ங்கா³. அனோதத்தத³ஹங் திக்க²த்துங் பத³க்கி²ணங் கத்வா க³தட்டா²னே ஆவட்டக³ங்கா³தி ச பப்³ப³தமத்த²கேன க³தட்டா²னே ப³ஹலக³ங்கா³தி ச திரச்சா²னபப்³ப³தங் விஜ்ஜி²த்வா க³தட்டா²னே உமங்க³க³ங்கா³தி ச ததோ ப³ஹலபப்³ப³தங் பஹரித்வா பஞ்சயோஜனங் ஆகாஸேன க³தட்டா²னே ஆகாஸக³ங்கா³தி ச தஸ்ஸா பதிதட்டா²னங் பி⁴ந்தி³த்வா ஜாதங் பஞ்ச யோஜனங் பொக்க²ரணீகூலங் பி⁴ந்தி³த்வா தத்த² பன பஞ்சங்கு³லி விய பஞ்ச தா⁴ரா ஹுத்வா க³ங்கா³ யமுனா ஸரபூ⁴ மஹீ அசிரவதீதி பஞ்ச நாமா ஹுத்வா ஜம்பு³தீ³பங் பஞ்ச பா⁴க³ங் பஞ்ச கொட்டா²ஸங் கத்வா பஞ்ச பா⁴கே³ பஞ்ச கொட்டா²ஸே இதா க³தா பவத்தாதி பா⁴கீ³ரதீ². க³ங்கா³ ச ஸா பா⁴கீ³ரதீ² சேதி க³ங்கா³பா⁴கீ³ரதீ². ‘‘பா⁴கீ³ரதீ² க³ங்கா³’’தி வத்தப்³பே³ கா³தா²ப³ந்த⁴ஸுக²த்த²ங் புப்³ப³சரியவஸேன வுத்தந்தி த³ட்ட²ப்³ப³ங். ஹிமவந்தா பபா⁴விதாதி ஸத்தே ஹிங்ஸதி ஸீதேன ஹனதி மதே²தி ஆலோளேதீதி ஹிமோ, ஹிமோ அஸ்ஸ அத்தீ²தி ஹிமவா, ததோ ஹிமவந்ததோ பட்டா²ய பபா⁴விதா பவத்தா ஸந்த³மானாதி ஹிமவந்தபபா⁴விதா. குதித்தே² நாவிகோ ஆஸிந்தி தஸ்ஸா க³ங்கா³ய சண்ட³ஸோதஸமாபன்னே விஸமதித்தே² கேவட்டகுலே உப்பன்னோ நாவிகோ ஆஸிங் அஹோஸிந்தி அத்தோ². ஓரிமே ச தரிங் அஹந்தி ஸம்பத்தஸம்பத்தமனுஸ்ஸே பாரிமா தீரா ஓரிமங் தீரங் அஹங் தரிங் தாரேஸிந்தி அத்தோ².
628. Evaṃ etadaggaṭṭhānaṃ patvā attano pubbakammaṃ saritvā pītisomanassavasena pubbacaritāpadānaṃ pakāsento gaṅgā bhāgīrathītiādimāha. Tattha gaṅgāti gāyamānā ghosaṃ kurumānā gacchatīti gaṅgā. Atha vā go vuccati pathavī, tasmiṃ gatā pavattāti gaṅgā. Anotattadahaṃ tikkhattuṃ padakkhiṇaṃ katvā gataṭṭhāne āvaṭṭagaṅgāti ca pabbatamatthakena gataṭṭhāne bahalagaṅgāti ca tiracchānapabbataṃ vijjhitvā gataṭṭhāne umaṅgagaṅgāti ca tato bahalapabbataṃ paharitvā pañcayojanaṃ ākāsena gataṭṭhāne ākāsagaṅgāti ca tassā patitaṭṭhānaṃ bhinditvā jātaṃ pañca yojanaṃ pokkharaṇīkūlaṃ bhinditvā tattha pana pañcaṅguli viya pañca dhārā hutvā gaṅgā yamunā sarabhū mahī aciravatīti pañca nāmā hutvā jambudīpaṃ pañca bhāgaṃ pañca koṭṭhāsaṃ katvā pañca bhāge pañca koṭṭhāse itā gatā pavattāti bhāgīrathī. Gaṅgā ca sā bhāgīrathī ceti gaṅgābhāgīrathī. ‘‘Bhāgīrathī gaṅgā’’ti vattabbe gāthābandhasukhatthaṃ pubbacariyavasena vuttanti daṭṭhabbaṃ. Himavantā pabhāvitāti satte hiṃsati sītena hanati matheti āloḷetīti himo, himo assa atthīti himavā, tato himavantato paṭṭhāya pabhāvitā pavattā sandamānāti himavantapabhāvitā. Kutitthe nāviko āsinti tassā gaṅgāya caṇḍasotasamāpanne visamatitthe kevaṭṭakule uppanno nāviko āsiṃ ahosinti attho. Orime ca tariṃ ahanti sampattasampattamanusse pārimā tīrā orimaṃ tīraṃ ahaṃ tariṃ tāresinti attho.
629. பது³முத்தரோ நாயகோதி த்³விபதா³னங் உத்தமோ ஸத்தே நிப்³பா³னங் நாயகோ பாபனகோ பது³முத்தரபு³த்³தோ⁴ மம புஞ்ஞஸம்பத்திங் நிப்பா²தெ³ந்தோ. வஸீஸதஸஹஸ்ஸேஹி கீ²ணாஸவஸதஸஹஸ்ஸேஹி க³ங்கா³ஸோதங் தரிதுங் தித்த²ங் பத்தோதி ஸம்ப³ந்தோ⁴.
629.Padumuttaro nāyakoti dvipadānaṃ uttamo satte nibbānaṃ nāyako pāpanako padumuttarabuddho mama puññasampattiṃ nipphādento. Vasīsatasahassehi khīṇāsavasatasahassehi gaṅgāsotaṃ tarituṃ titthaṃ pattoti sambandho.
630. ப³ஹூ நாவா ஸமானெத்வாதி ஸம்பத்தங் தங் ஸம்மாஸம்பு³த்³த⁴ங் தி³ஸ்வா வட்³ட⁴கீஹி ஸுட்டு² ஸங்க²தங் கதங் நிப்பா²தி³தங் ப³ஹூ நாவாயோ ஸமானெத்வா த்³வே த்³வே நாவாயோ ஏகதோ கத்வா தஸ்ஸா நாவாய உபரி மண்ட³பச²த³னங் கத்வா நராஸப⁴ங் பது³முத்தரஸம்பு³த்³த⁴ங் படிமானிங் பூஜேஸிந்தி அத்தோ².
630.Bahū nāvā samānetvāti sampattaṃ taṃ sammāsambuddhaṃ disvā vaḍḍhakīhi suṭṭhu saṅkhataṃ kataṃ nipphāditaṃ bahū nāvāyo samānetvā dve dve nāvāyo ekato katvā tassā nāvāya upari maṇḍapachadanaṃ katvā narāsabhaṃ padumuttarasambuddhaṃ paṭimāniṃ pūjesinti attho.
631. ஆக³ந்த்வான ச ஸம்பு³த்³தோ⁴தி ஏவங் ஸங்க⁴டிதாய நாவாய தத்த² ஆக³ந்த்வான தஞ்ச நாவகங் நாவமுத்தமங் ஆருஹீதி ஸம்ப³ந்தோ⁴. வாரிமஜ்ஜே² டி²தோ ஸத்தா²தி நாவமாரூள்ஹோ ஸத்தா² க³ங்கா³ஜலமஜ்ஜே² டி²தோ ஸமானோ இமா ஸோமனஸ்ஸபடிஸங்யுத்தகா³தா² அபா⁴ஸத² கதே²ஸீதி ஸம்ப³ந்தோ⁴.
631.Āgantvānaca sambuddhoti evaṃ saṅghaṭitāya nāvāya tattha āgantvāna tañca nāvakaṃ nāvamuttamaṃ āruhīti sambandho. Vārimajjhe ṭhito satthāti nāvamārūḷho satthā gaṅgājalamajjhe ṭhito samāno imā somanassapaṭisaṃyuttagāthā abhāsatha kathesīti sambandho.
632. யோ ஸோ தாரேஸி ஸம்பு³த்³த⁴ந்தி யோ ஸோ நாவிகோ க³ங்கா³ஸோதாய ஸம்பு³த்³த⁴ங் அதாரேஸி. ஸங்க⁴ஞ்சாபி அனாஸவந்தி ந கேவலமேவ ஸம்பு³த்³த⁴ங் தாரேஸி, அனாஸவங் நிக்கிலேஸங் ஸங்க⁴ஞ்சாபி தாரேஸீதி அத்தோ². தேன சித்தபஸாதே³னாதி தேன நாவாபாஜனகாலே உப்பன்னேன ஸோமனஸ்ஸஸஹக³தசித்தபஸாதே³ன தே³வலோகே ச²ஸு காமஸக்³கே³ஸு ரமிஸ்ஸதி தி³ப்³ப³ஸம்பத்திங் அனுப⁴விஸ்ஸதீதி அத்தோ².
632.Yo so tāresi sambuddhanti yo so nāviko gaṅgāsotāya sambuddhaṃ atāresi. Saṅghañcāpi anāsavanti na kevalameva sambuddhaṃ tāresi, anāsavaṃ nikkilesaṃ saṅghañcāpi tāresīti attho. Tena cittapasādenāti tena nāvāpājanakāle uppannena somanassasahagatacittapasādena devaloke chasu kāmasaggesu ramissati dibbasampattiṃ anubhavissatīti attho.
633. நிப்³ப³த்திஸ்ஸதி தே ப்³யம்ஹந்தி தே³வலோகே உப்பன்னஸ்ஸ தே துய்ஹங் ப்³யம்ஹங் விமானங் ஸுகதங் ஸுட்டு² நிப்³ப³த்தங் நாவஸண்டி²தங் நாவாஸண்டா²னங் நிப்³ப³த்திஸ்ஸதி பாதுப⁴விஸ்ஸதீதி அத்தோ². ஆகாஸே புப்ப²ச²த³னந்தி நாவாய உபரிமண்ட³பகதகம்மஸ்ஸ நிஸ்ஸந்தே³ன ஸப்³ப³தா³ க³தக³தட்டா²னே ஆகாஸே புப்ப²ச²த³னங் தா⁴ரயிஸ்ஸதீதி ஸம்ப³ந்தோ⁴.
633.Nibbattissatite byamhanti devaloke uppannassa te tuyhaṃ byamhaṃ vimānaṃ sukataṃ suṭṭhu nibbattaṃ nāvasaṇṭhitaṃ nāvāsaṇṭhānaṃ nibbattissati pātubhavissatīti attho. Ākāse pupphachadananti nāvāya uparimaṇḍapakatakammassa nissandena sabbadā gatagataṭṭhāne ākāse pupphachadanaṃ dhārayissatīti sambandho.
634. அட்ட²பஞ்ஞாஸகப்பம்ஹீதி இதோ புஞ்ஞகரணகாலதோ பட்டா²ய அட்ட²பண்ணாஸகப்பங் அதிக்கமித்வா நாமேன தாரகோ நாம சக்கவத்தீ க²த்தியோ சாதுரந்தோ சதூஸு தீ³பேஸு இஸ்ஸரோ விஜிதாவீ ஜிதவந்தோ ப⁴விஸ்ஸதீதி ஸம்ப³ந்தோ⁴. ஸேஸகா³தா² உத்தானத்தா²வ.
634.Aṭṭhapaññāsakappamhīti ito puññakaraṇakālato paṭṭhāya aṭṭhapaṇṇāsakappaṃ atikkamitvā nāmena tārako nāma cakkavattī khattiyo cāturanto catūsu dīpesu issaro vijitāvī jitavanto bhavissatīti sambandho. Sesagāthā uttānatthāva.
637. ரேவதோ நாம நாமேனாதி ரேவதீனக்க²த்தேன ஜாதத்தா ‘‘ரேவதோ’’தி லத்³த⁴னாமோ ப்³ரஹ்மப³ந்து⁴ ப்³ராஹ்மணபுத்தபூ⁴தோ ப⁴விஸ்ஸதி ப்³ராஹ்மணகுலே உப்பஜ்ஜிஸ்ஸதீதி அத்தோ².
637.Revato nāma nāmenāti revatīnakkhattena jātattā ‘‘revato’’ti laddhanāmo brahmabandhu brāhmaṇaputtabhūto bhavissati brāhmaṇakule uppajjissatīti attho.
639. நிப்³பா³யிஸ்ஸதினாஸவோதி நிக்கிலேஸோ க²ந்த⁴பரினிப்³பா³னேன நிப்³பா³யிஸ்ஸதி.
639.Nibbāyissatināsavoti nikkileso khandhaparinibbānena nibbāyissati.
640. வீரியங் மே து⁴ரதோ⁴ரய்ஹந்தி ஏவங் பது³முத்தரேன ப⁴க³வதா ப்³யாகதோ அஹங் கமேன பாரமிதாகோடிங் பத்வா மே மய்ஹங் வீரியங் அஸிதி²லவீரியங் து⁴ரதோ⁴ரய்ஹங் து⁴ரவாஹங் து⁴ராதா⁴ரங் யோகே³ஹி கே²மஸ்ஸ நிப்³ப⁴யஸ்ஸ நிப்³பா³னஸ்ஸ அதி⁴வாஹனங் ஆவஹனங் அஹோஸீதி அத்தோ². தா⁴ரேமி அந்திமங் தே³ஹந்தி இதா³னாஹங் ஸம்மாஸம்பு³த்³த⁴ஸாஸனே பரியோஸானஸரீரங் தா⁴ரேமீதி ஸம்ப³ந்தோ⁴.
640.Vīriyaṃ me dhuradhorayhanti evaṃ padumuttarena bhagavatā byākato ahaṃ kamena pāramitākoṭiṃ patvā me mayhaṃ vīriyaṃ asithilavīriyaṃ dhuradhorayhaṃ dhuravāhaṃ dhurādhāraṃ yogehi khemassa nibbhayassa nibbānassa adhivāhanaṃ āvahanaṃ ahosīti attho. Dhāremi antimaṃ dehanti idānāhaṃ sammāsambuddhasāsane pariyosānasarīraṃ dhāremīti sambandho.
ஸோ அபரபா⁴கே³ அத்தனோ ஜாதகா³மங் க³ந்த்வா ‘‘சாலா, உபசாலா, ஸீஸூபசாலா’’தி திஸ்ஸன்னங் ப⁴கி³னீனங் புத்தே ‘‘சாலா, உபசாலா, ஸீஸூபசாலா’’தி தயோ பா⁴கி³னெய்யே ஆனெத்வா பப்³பா³ஜெத்வா கம்மட்டா²னே நியோஜேஸி. தே கம்மட்டா²னங் அனுயுத்தா விஹரிங்ஸு.
So aparabhāge attano jātagāmaṃ gantvā ‘‘cālā, upacālā, sīsūpacālā’’ti tissannaṃ bhaginīnaṃ putte ‘‘cālā, upacālā, sīsūpacālā’’ti tayo bhāgineyye ānetvā pabbājetvā kammaṭṭhāne niyojesi. Te kammaṭṭhānaṃ anuyuttā vihariṃsu.
தஸ்மிஞ்ச ஸமயே தே²ரஸ்ஸ கோசிதே³வ ஆபா³தோ⁴ உப்பன்னோ, தங் ஸுத்வா ஸாரிபுத்தத்தே²ரோ – ‘‘ரேவதஸ்ஸ கி³லானபுச்ச²னங் அதி⁴க³மபுச்ச²னஞ்ச கரிஸ்ஸாமீ’’தி உபக³ஞ்சி². ரேவதத்தே²ரோ த⁴ம்மஸேனாபதிங் தூ³ரதோவ ஆக³ச்ச²ந்தங் தி³ஸ்வா தேஸங் ஸாமணேரானங் ஸதுப்பாத³வஸேன ஓவதி³யமானோ சாலேதிகா³த²ங் அபா⁴ஸித்த². தத்த² சாலே உபசாலே ஸீஸூபசாலேதி தேஸங் ஆலபனங். சாலா, உபசாலா, ஸீஸூபசாலாதி ஹி இத்தி²லிங்க³வஸேன லத்³த⁴னாமா தயோ தா³ரகா பப்³ப³ஜிதாபி ததா² வோஹரிய்யந்தி. ‘‘சாலீ, உபசாலீ, ஸீஸூபசாலீதி தேஸங் நாமானீ’’தி ச வத³ந்தி. யத³த்த²ங் ‘‘சாலே’’திஆதி³னா ஆமந்தனங் கதங், தங் த³ஸ்ஸெந்தோ ‘‘பதிஸ்ஸதா நு கோ² விஹரதா²’’தி வத்வா தத்த² காரணங் ஆஹ – ‘‘ஆக³தோ வோ வாலங் விய வேதீ⁴’’தி. பதிஸ்ஸதாதி பதிஸ்ஸதிகா . கோ²தி அவதா⁴ரணே. ஆக³தோதி ஆக³ஞ்சி². வோதி தும்ஹாகங். வாலங் விய வேதீ⁴தி வாலவேதி⁴ விய. அயஞ்ஹெத்த² ஸங்கே²பத்தோ² – திக்க²ஜவனநிப்³பே³தி⁴கபஞ்ஞதாய வாலவேதி⁴ரூபோ ஸத்து²கப்போ தும்ஹாகங் மாதுலத்தே²ரோ ஆக³தோ, தஸ்மா ஸமணஸஞ்ஞங் உபட்ட²பெத்வா ஸதிஸம்பஜஞ்ஞயுத்தா ஏவ ஹுத்வா விஹரத², யதா²தி⁴க³தே விஹாரே அப்பமத்தா ப⁴வதா²தி.
Tasmiñca samaye therassa kocideva ābādho uppanno, taṃ sutvā sāriputtatthero – ‘‘revatassa gilānapucchanaṃ adhigamapucchanañca karissāmī’’ti upagañchi. Revatatthero dhammasenāpatiṃ dūratova āgacchantaṃ disvā tesaṃ sāmaṇerānaṃ satuppādavasena ovadiyamāno cāletigāthaṃ abhāsittha. Tattha cāle upacāle sīsūpacāleti tesaṃ ālapanaṃ. Cālā, upacālā, sīsūpacālāti hi itthiliṅgavasena laddhanāmā tayo dārakā pabbajitāpi tathā vohariyyanti. ‘‘Cālī, upacālī, sīsūpacālīti tesaṃ nāmānī’’ti ca vadanti. Yadatthaṃ ‘‘cāle’’tiādinā āmantanaṃ kataṃ, taṃ dassento ‘‘patissatā nu kho viharathā’’ti vatvā tattha kāraṇaṃ āha – ‘‘āgato vo vālaṃ viya vedhī’’ti. Patissatāti patissatikā . Khoti avadhāraṇe. Āgatoti āgañchi. Voti tumhākaṃ. Vālaṃ viya vedhīti vālavedhi viya. Ayañhettha saṅkhepattho – tikkhajavananibbedhikapaññatāya vālavedhirūpo satthukappo tumhākaṃ mātulatthero āgato, tasmā samaṇasaññaṃ upaṭṭhapetvā satisampajaññayuttā eva hutvā viharatha, yathādhigate vihāre appamattā bhavathāti.
தங் ஸுத்வா தே ஸாமணேரா த⁴ம்மஸேனாபதிஸ்ஸ பச்சுக்³க³மனாதி³வத்தங் கத்வா உபி⁴ன்னங் மாதுலத்தே²ரானங் படிஸந்தா²ரவேலாயங் நாதிதூ³ரே ஸமாதி⁴ங் ஸமாபஜ்ஜித்வா நிஸீதி³ங்ஸு. த⁴ம்மஸேனாபதி ரேவதத்தே²ரேன ஸத்³தி⁴ங் படிஸந்தா²ரங் கத்வா உட்டா²யாஸனா தே ஸாமணேரே உபஸங்கமி. தே ததா² காலபரிச்சே²த³ஸ்ஸ கதத்தா தே²ரே உபஸங்கமந்தே உட்ட²ஹித்வா வந்தி³த்வா அட்ட²ங்ஸு. தே²ரோ – ‘‘கதரகதரவிஹாரேன விஹரதா²’’தி புச்சி²த்வா தேஹி ‘‘இமாய இமாயா’’தி வுத்தே தா³ரகேபி ஏவங் வினெந்தோ – ‘‘மய்ஹங் பா⁴திகோ ஸச்சவாதீ³ வத த⁴ம்மஸ்ஸ அனுத⁴ம்மசாரி’’ந்தி தே²ரங் பஸங்ஸந்தோ பக்காமி. ஸேஸமெத்த² உத்தானத்த²மேவாதி.
Taṃ sutvā te sāmaṇerā dhammasenāpatissa paccuggamanādivattaṃ katvā ubhinnaṃ mātulattherānaṃ paṭisanthāravelāyaṃ nātidūre samādhiṃ samāpajjitvā nisīdiṃsu. Dhammasenāpati revatattherena saddhiṃ paṭisanthāraṃ katvā uṭṭhāyāsanā te sāmaṇere upasaṅkami. Te tathā kālaparicchedassa katattā there upasaṅkamante uṭṭhahitvā vanditvā aṭṭhaṃsu. Thero – ‘‘katarakataravihārena viharathā’’ti pucchitvā tehi ‘‘imāya imāyā’’ti vutte dārakepi evaṃ vinento – ‘‘mayhaṃ bhātiko saccavādī vata dhammassa anudhammacāri’’nti theraṃ pasaṃsanto pakkāmi. Sesamettha uttānatthamevāti.
க²தி³ரவனியத்தே²ரஅபதா³னவண்ணனா ஸமத்தா.
Khadiravaniyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3-9. க²தி³ரவனியரேவதத்தே²ரஅபதா³னங் • 3-9. Khadiravaniyarevatattheraapadānaṃ
