| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
3. க²ஜ்ஜகதா³யகத்தே²ரஅபதா³னவண்ணனா
3. Khajjakadāyakattheraapadānavaṇṇanā
திஸ்ஸஸ்ஸ கோ² ப⁴க³வதோதிஆதி³கங் ஆயஸ்மதோ க²ஜ்ஜகதா³யகத்தே²ரஸ்ஸ அபதா³னங். அயம்பி புரிமஜினவரேஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ திஸ்ஸஸ்ஸ ப⁴க³வதோ காலே ஸுத்³த³குலே நிப்³ப³த்தோ ப⁴க³வந்தங் தி³ஸ்வா பஸன்னமானஸோ அம்ப³ஜம்பு³ஆதி³மனேகங் மது⁴ரப²லாப²லங் நாளிகேரங் பூவக²ஜ்ஜகஞ்ச அதா³ஸி. ப⁴க³வா தஸ்ஸ பஸாத³வட்³ட⁴னத்தா²ய பஸ்ஸந்தஸ்ஸேவ பரிபு⁴ஞ்ஜி. ஸோ தேன புஞ்ஞேன ஸுக³திஸம்பத்தியோயேவ அனுப⁴வித்வா இமஸ்மிங் பு³த்³து⁴ப்பாதே³ ஸாவத்தி²யங் குலகே³ஹே நிப்³ப³த்தோ விஞ்ஞுதங் பத்வா ஸத்து² த⁴ம்மதே³ஸனங் ஸுத்வா ஸஞ்ஜாதஸத்³தோ⁴ பஸாத³ப³ஹுமானோ பப்³ப³ஜித்வா வத்தபடிபத்தியா ஸாஸனங் ஸோபெ⁴ந்தோ ஸீலாலங்காரபடிமண்டி³தோ நசிரஸ்ஸேவ அரஹத்தங் பாபுணி.
Tissassa kho bhagavatotiādikaṃ āyasmato khajjakadāyakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle suddakule nibbatto bhagavantaṃ disvā pasannamānaso ambajambuādimanekaṃ madhuraphalāphalaṃ nāḷikeraṃ pūvakhajjakañca adāsi. Bhagavā tassa pasādavaḍḍhanatthāya passantasseva paribhuñji. So tena puññena sugatisampattiyoyeva anubhavitvā imasmiṃ buddhuppāde sāvatthiyaṃ kulagehe nibbatto viññutaṃ patvā satthu dhammadesanaṃ sutvā sañjātasaddho pasādabahumāno pabbajitvā vattapaṭipattiyā sāsanaṃ sobhento sīlālaṅkārapaṭimaṇḍito nacirasseva arahattaṃ pāpuṇi.
13. ஸோ புப்³ப³கம்மங் ஸரந்தோ ‘‘புப்³பே³ மயா ஸுகெ²த்தே குஸலங் கதங் ஸுந்த³ர’’ந்தி ஸோமனஸ்ஸஜாதோ புப்³ப³சரிதாபதா³னங் பகாஸெந்தோ திஸ்ஸஸ்ஸ கோ² ப⁴க³வதோதிஆதி³மாஹ. தத்த² திஸ்ஸோபி ப⁴வஸம்பத்தியோ த³த³மானோ ஜாதோதி மாதாபிதூஹி கதனாமவஸேன திஸ்ஸோ. அத² வா தீஹி ஸரணக³மனேஹி அஸ்ஸாஸெந்தோ ஓவத³ந்தோ ஹேதுஸம்பன்னபுக்³க³லே ஸக்³க³மொக்க²த்³வயே பதிட்டா²பெந்தோ பு³த்³தோ⁴ ஜாதோதி திஸ்ஸோ. ஸமாபத்திகு³ணாதீ³ஹி ப⁴கே³ஹி யுத்தோதி ப⁴க³வா, தஸ்ஸ திஸ்ஸஸ்ஸ ப⁴க³வதோ புப்³பே³ அஹங் ப²லங் அதா³ஸிந்தி ஸம்ப³ந்தோ⁴. நாளிகேரஞ்ச பாதா³ஸிந்தி நாளிகாகாரேன பவத்தங் ப²லங் நாளிகேரங், தஞ்ச ப²லங் அதா³ஸிந்தி அத்தோ². க²ஜ்ஜகங் அபி⁴ஸம்மதந்தி கா²தி³தப்³ப³ங் க²ஜ்ஜகங் அபி⁴ விஸேஸேன மது⁴ஸக்கராதீ³ஹி ஸம்மிஸ்ஸங் கத்வா நிப்பா²தி³தங் ஸுந்த³ரங் மது⁴ரந்தி ஸம்மதங் ஞாதங் அபி⁴ஸம்மதங் க²ஜ்ஜகஞ்ச அதா³ஸிந்தி அத்தோ². ஸேஸங் ஸுவிஞ்ஞெய்யமேவாதி.
13. So pubbakammaṃ saranto ‘‘pubbe mayā sukhette kusalaṃ kataṃ sundara’’nti somanassajāto pubbacaritāpadānaṃ pakāsento tissassa kho bhagavatotiādimāha. Tattha tissopi bhavasampattiyo dadamāno jātoti mātāpitūhi katanāmavasena tisso. Atha vā tīhi saraṇagamanehi assāsento ovadanto hetusampannapuggale saggamokkhadvaye patiṭṭhāpento buddho jātoti tisso. Samāpattiguṇādīhi bhagehi yuttoti bhagavā, tassa tissassa bhagavato pubbe ahaṃ phalaṃ adāsinti sambandho. Nāḷikerañca pādāsinti nāḷikākārena pavattaṃ phalaṃ nāḷikeraṃ, tañca phalaṃ adāsinti attho. Khajjakaṃ abhisammatanti khāditabbaṃ khajjakaṃ abhi visesena madhusakkarādīhi sammissaṃ katvā nipphāditaṃ sundaraṃ madhuranti sammataṃ ñātaṃ abhisammataṃ khajjakañca adāsinti attho. Sesaṃ suviññeyyamevāti.
க²ஜ்ஜகதா³யகத்தே²ரஅபதா³னவண்ணனா ஸமத்தா.
Khajjakadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 3. க²ஜ்ஜகதா³யகத்தே²ரஅபதா³னங் • 3. Khajjakadāyakattheraapadānaṃ
