| Library / Tipiṭaka / တိပိဋက • Tipiṭaka / အပဒာန-အဋ္ဌကထာ • Apadāna-aṭṭhakathā |
၃. ခဇ္ဇကဒာယကတ္ထေရအပဒာနဝဏ္ဏနာ
3. Khajjakadāyakattheraapadānavaṇṇanā
တိသ္သသ္သ ခော ဘဂဝတောတိအာဒိကံ အာယသ္မတော ခဇ္ဇကဒာယကတ္ထေရသ္သ အပဒာနံ။ အယမ္ပိ ပုရိမဇိနဝရေသု ကတာဓိကာရော တတ္ထ တတ္ထ ဘဝေ ဝိဝဋ္ဋူပနိသ္သယာနိ ပုညာနိ ဥပစိနန္တော တိသ္သသ္သ ဘဂဝတော ကာလေ သုဒ္ဒကုလေ နိဗ္ဗတ္တော ဘဂဝန္တံ ဒိသ္ဝာ ပသန္နမာနသော အမ္ဗဇမ္ဗုအာဒိမနေကံ မဓုရဖလာဖလံ နာဠိကေရံ ပူဝခဇ္ဇကဉ္စ အဒာသိ။ ဘဂဝာ တသ္သ ပသာဒဝဍ္ဎနတ္ထာယ ပသ္သန္တသ္သေဝ ပရိဘုဉ္ဇိ။ သော တေန ပုညေန သုဂတိသမ္ပတ္တိယောယေဝ အနုဘဝိတ္ဝာ ဣမသ္မိံ ဗုဒ္ဓုပ္ပာဒေ သာဝတ္ထိယံ ကုလဂေဟေ နိဗ္ဗတ္တော ဝိညုတံ ပတ္ဝာ သတ္ထု ဓမ္မဒေသနံ သုတ္ဝာ သဉ္ဇာတသဒ္ဓော ပသာဒဗဟုမာနော ပဗ္ဗဇိတ္ဝာ ဝတ္တပဋိပတ္တိယာ သာသနံ သောဘေန္တော သီလာလင္ကာရပဋိမဏ္ဍိတော နစိရသ္သေဝ အရဟတ္တံ ပာပုဏိ။
Tissassa kho bhagavatotiādikaṃ āyasmato khajjakadāyakattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto tissassa bhagavato kāle suddakule nibbatto bhagavantaṃ disvā pasannamānaso ambajambuādimanekaṃ madhuraphalāphalaṃ nāḷikeraṃ pūvakhajjakañca adāsi. Bhagavā tassa pasādavaḍḍhanatthāya passantasseva paribhuñji. So tena puññena sugatisampattiyoyeva anubhavitvā imasmiṃ buddhuppāde sāvatthiyaṃ kulagehe nibbatto viññutaṃ patvā satthu dhammadesanaṃ sutvā sañjātasaddho pasādabahumāno pabbajitvā vattapaṭipattiyā sāsanaṃ sobhento sīlālaṅkārapaṭimaṇḍito nacirasseva arahattaṃ pāpuṇi.
၁၃. သော ပုဗ္ဗကမ္မံ သရန္တော ‘‘ပုဗ္ဗေ မယာ သုခေတ္တေ ကုသလံ ကတံ သုန္ဒရ’’န္တိ သောမနသ္သဇာတော ပုဗ္ဗစရိတာပဒာနံ ပကာသေန္တော တိသ္သသ္သ ခော ဘဂဝတောတိအာဒိမာဟ။ တတ္ထ တိသ္သောပိ ဘဝသမ္ပတ္တိယော ဒဒမာနော ဇာတောတိ မာတာပိတူဟိ ကတနာမဝသေန တိသ္သော။ အထ ဝာ တီဟိ သရဏဂမနေဟိ အသ္သာသေန္တော ဩဝဒန္တော ဟေတုသမ္ပန္နပုဂ္ဂလေ သဂ္ဂမောက္ခဒ္ဝယေ ပတိဋ္ဌာပေန္တော ဗုဒ္ဓော ဇာတောတိ တိသ္သော။ သမာပတ္တိဂုဏာဒီဟိ ဘဂေဟိ ယုတ္တောတိ ဘဂဝာ, တသ္သ တိသ္သသ္သ ဘဂဝတော ပုဗ္ဗေ အဟံ ဖလံ အဒာသိန္တိ သမ္ဗန္ဓော။ နာဠိကေရဉ္စ ပာဒာသိန္တိ နာဠိကာကာရေန ပဝတ္တံ ဖလံ နာဠိကေရံ, တဉ္စ ဖလံ အဒာသိန္တိ အတ္ထော။ ခဇ္ဇကံ အဘိသမ္မတန္တိ ခာဒိတဗ္ဗံ ခဇ္ဇကံ အဘိ ဝိသေသေန မဓုသက္ကရာဒီဟိ သမ္မိသ္သံ ကတ္ဝာ နိပ္ဖာဒိတံ သုန္ဒရံ မဓုရန္တိ သမ္မတံ ဉာတံ အဘိသမ္မတံ ခဇ္ဇကဉ္စ အဒာသိန္တိ အတ္ထော။ သေသံ သုဝိညေယ္ယမေဝာတိ။
13. So pubbakammaṃ saranto ‘‘pubbe mayā sukhette kusalaṃ kataṃ sundara’’nti somanassajāto pubbacaritāpadānaṃ pakāsento tissassa kho bhagavatotiādimāha. Tattha tissopi bhavasampattiyo dadamāno jātoti mātāpitūhi katanāmavasena tisso. Atha vā tīhi saraṇagamanehi assāsento ovadanto hetusampannapuggale saggamokkhadvaye patiṭṭhāpento buddho jātoti tisso. Samāpattiguṇādīhi bhagehi yuttoti bhagavā, tassa tissassa bhagavato pubbe ahaṃ phalaṃ adāsinti sambandho. Nāḷikerañca pādāsinti nāḷikākārena pavattaṃ phalaṃ nāḷikeraṃ, tañca phalaṃ adāsinti attho. Khajjakaṃ abhisammatanti khāditabbaṃ khajjakaṃ abhi visesena madhusakkarādīhi sammissaṃ katvā nipphāditaṃ sundaraṃ madhuranti sammataṃ ñātaṃ abhisammataṃ khajjakañca adāsinti attho. Sesaṃ suviññeyyamevāti.
ခဇ္ဇကဒာယကတ္ထေရအပဒာနဝဏ္ဏနာ သမတ္တာ။
Khajjakadāyakattheraapadānavaṇṇanā samattā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / အပဒာနပာဠိ • Apadānapāḷi / ၃. ခဇ္ဇကဒာယကတ္ထေရအပဒာနံ • 3. Khajjakadāyakattheraapadānaṃ
