| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
৩. খম্ভকতৰগ্গ-অত্থযোজনা
3. Khambhakatavagga-atthayojanā
৫৯৬. খম্ভো কতো যেনাতি খম্ভকতো। খম্ভোতি চ পটিবদ্ধো। কত্থ পটিবদ্ধোতি আহ ‘‘কটিযং হত্থং ঠপেত্ৰা’’তি। সসীসং অৰগুণ্ঠযতি পরিৰেঠতীতি ওগুণ্ঠিতোতি আহ ‘‘সসীসং পারুতো’’তি।
596. Khambho kato yenāti khambhakato. Khambhoti ca paṭibaddho. Kattha paṭibaddhoti āha ‘‘kaṭiyaṃ hatthaṃ ṭhapetvā’’ti. Sasīsaṃ avaguṇṭhayati pariveṭhatīti oguṇṭhitoti āha ‘‘sasīsaṃ pāruto’’ti.
৬০০. উদ্ধং একা কোটি ইমিস্সা গমনাযাতি উক্কুটিকাতি দস্সেন্তো আহ ‘‘উক্কুটিকা ৰুচ্চতী’’তিআদি। এত্থাতি ‘‘উক্কুটিকাযা’’তিপদে।
600. Uddhaṃ ekā koṭi imissā gamanāyāti ukkuṭikāti dassento āha ‘‘ukkuṭikā vuccatī’’tiādi. Etthāti ‘‘ukkuṭikāyā’’tipade.
৬০১. হত্থপল্লত্থীকদুস্সপল্লত্থীকেসু দ্ৰীসু দুস্সপল্লত্থিকে আযোগপল্লত্থীকাপি সঙ্গহং গচ্ছতীতি আহ ‘‘আযোগপল্লত্থিকাপি দুস্সপল্লত্থিকা এৰা’’তি।
601. Hatthapallatthīkadussapallatthīkesu dvīsu dussapallatthike āyogapallatthīkāpi saṅgahaṃ gacchatīti āha ‘‘āyogapallatthikāpi dussapallatthikā evā’’ti.
৬০২. সতিযা উপট্ঠানং সক্কচ্চন্তি আহ ‘‘সতিংউপট্ঠপেত্ৰা’’তি।
602. Satiyā upaṭṭhānaṃ sakkaccanti āha ‘‘satiṃupaṭṭhapetvā’’ti.
৬০৩. পিণ্ডপাতং দেন্তেপীতি পিণ্ডপাতং পত্তে পক্খিপন্তেপি। পত্তে সঞ্ঞা পত্তসঞ্ঞা, সা অস্সত্থীতি পত্তসঞ্ঞী। ‘‘কত্ৰা’’ তিইমিনা কিরিযাৰিসেসনভাৰং দস্সেতি।
603.Piṇḍapātaṃ dentepīti piṇḍapātaṃ patte pakkhipantepi. Patte saññā pattasaññā, sā assatthīti pattasaññī. ‘‘Katvā’’ tiiminā kiriyāvisesanabhāvaṃ dasseti.
৬০৪. সমসূপকং পিণ্ডপাতন্তি এত্থ সূপপিণ্ডপাতানং সমউপড্ঢভাৰং আসঙ্কা ভৰেয্যাতি আহ ‘‘সমসূপকো নামা’’তিআদি। যত্থাতি পিণ্ডপাতে। ভত্তস্স চতুত্থভাগপমাণো সূপো হোতি, সো পিণ্ডপাতো সমসূপকো নামাতি যোজনা। ওলোণী চ সাকসূপেয্যঞ্চ মচ্ছরসো চ মংসরসো চাতি দ্ৰন্দো। তত্থ ওলোণীতি একা ব্যঞ্জনৰিকতি। সাকসূপেয্যন্তি সূপস্স হিতং সূপেয্যং, সাকমেৰ সূপেয্যং সাকসূপেয্যং। ইমিনা সব্বাপি সাকসূপেয্যব্যঞ্জনৰিকতি গহিতা। মচ্ছরসমংসরসাদীনীতি এত্থ আদিসদ্দেন অৰসেসা সব্বাপি ব্যঞ্জনৰিকতি সঙ্গহিতা। তং সব্বং রসানং রসো রসরসোতি কত্ৰা ‘‘রসরসো’’তি ৰুচ্চতি।
604.Samasūpakaṃ piṇḍapātanti ettha sūpapiṇḍapātānaṃ samaupaḍḍhabhāvaṃ āsaṅkā bhaveyyāti āha ‘‘samasūpako nāmā’’tiādi. Yatthāti piṇḍapāte. Bhattassa catutthabhāgapamāṇo sūpo hoti, so piṇḍapāto samasūpako nāmāti yojanā. Oloṇī ca sākasūpeyyañca maccharaso ca maṃsaraso cāti dvando. Tattha oloṇīti ekā byañjanavikati. Sākasūpeyyanti sūpassa hitaṃ sūpeyyaṃ, sākameva sūpeyyaṃ sākasūpeyyaṃ. Iminā sabbāpi sākasūpeyyabyañjanavikati gahitā. Maccharasamaṃsarasādīnīti ettha ādisaddena avasesā sabbāpi byañjanavikati saṅgahitā. Taṃ sabbaṃ rasānaṃ raso rasarasoti katvā ‘‘rasaraso’’ti vuccati.
৬০৫. সমপুণ্ণং সমভরিতন্তি ৰেৰচনমেৰ। থূপং কতো থূপীকতোতি অত্থং দস্সেন্তো আহ ‘‘থূপীকতো নামা’’তিআদি।
605. Samapuṇṇaṃ samabharitanti vevacanameva. Thūpaṃ kato thūpīkatoti atthaṃ dassento āha ‘‘thūpīkato nāmā’’tiādi.
তত্থাতি ‘‘থূপীকত’’ন্তিআদিৰচনে। তেসন্তি অভযত্থেরতিপিটকচূল়নাগত্থেরানং। ইতি পুচ্ছিংসু, তেসঞ্চ থেরানং ৰাদং আরোচেসুন্তি যোজনা। থেরোতি চূল়সুমনত্থেরো। এতস্সাতি তিপিটকচূল়নাগত্থেরস্স । সত্তক্খত্তুন্তি সত্ত ৰারে। কুতোতি কস্সাচরিযস্স সন্তিকা। তস্মাতি যস্মা যাৰকালিকেন পরিচ্ছিন্নো, তস্মা। আমিসজাতিকং যাগুভত্তং ৰা ফলাফলং ৰাতি যোজনা। তঞ্চ খোতি তঞ্চ সমতিত্থিকং। ইতরেন পনাতি নাধিট্ঠানুপগেন পত্তেন পন। যং পূৰউচ্ছুখণ্ডফলাফলাদি হেট্ঠা ওরোহতি, তং পূৰউচ্ছুখণ্ডফলাফলাদীতি যোজনা। পূৰৰটংসকোতি এত্থ ৰটংসকোতি উত্তংসো। সো হি উদ্ধং তসীযতে অলঙ্করীযতেতি ৰটংসোতি ৰুচ্চতি উকারস্স ৰকারং, তকারস্স চ টকারং কত্ৰা, সোযেৰ ৰটংসকো, মুদ্ধনি পিলন্ধিতো একো অলঙ্কারৰিসেসো। পূৰমেৰ তংসদিসত্তা পূৰৰটংসকো, তং। পুপ্ফৰটংসকো চ তক্কোলকটুকফলাদিৰটংসকো চাতি দ্ৰন্দো, তে।
Tatthāti ‘‘thūpīkata’’ntiādivacane. Tesanti abhayattheratipiṭakacūḷanāgattherānaṃ. Iti pucchiṃsu, tesañca therānaṃ vādaṃ ārocesunti yojanā. Theroti cūḷasumanatthero. Etassāti tipiṭakacūḷanāgattherassa . Sattakkhattunti satta vāre. Kutoti kassācariyassa santikā. Tasmāti yasmā yāvakālikena paricchinno, tasmā. Āmisajātikaṃ yāgubhattaṃ vā phalāphalaṃ vāti yojanā. Tañca khoti tañca samatitthikaṃ. Itarena panāti nādhiṭṭhānupagena pattena pana. Yaṃ pūvaucchukhaṇḍaphalāphalādi heṭṭhā orohati, taṃ pūvaucchukhaṇḍaphalāphalādīti yojanā. Pūvavaṭaṃsakoti ettha vaṭaṃsakoti uttaṃso. So hi uddhaṃ tasīyate alaṅkarīyateti vaṭaṃsoti vuccati ukārassa vakāraṃ, takārassa ca ṭakāraṃ katvā, soyeva vaṭaṃsako, muddhani pilandhito eko alaṅkāraviseso. Pūvameva taṃsadisattā pūvavaṭaṃsako, taṃ. Pupphavaṭaṃsako ca takkolakaṭukaphalādivaṭaṃsako cāti dvando, te.
ইধাতি ইমস্মিং সিক্খাপদে। ননু সব্বথূপীকতেসু পটিগ্গহণস্স অকপ্পিযত্তা পরিভুঞ্জনম্পি ন ৰট্টতীতি আহ ‘‘সব্বত্থ পনা’’তিআদি। তত্থ সব্বত্থাতি সব্বেসু থূপীকতেসূতি। ততিযো ৰগ্গো।
Idhāti imasmiṃ sikkhāpade. Nanu sabbathūpīkatesu paṭiggahaṇassa akappiyattā paribhuñjanampi na vaṭṭatīti āha ‘‘sabbattha panā’’tiādi. Tattha sabbatthāti sabbesu thūpīkatesūti. Tatiyo vaggo.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৩. খম্ভকতৰগ্গো • 3. Khambhakatavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৩. খম্ভকতৰগ্গৰণ্ণনা • 3. Khambhakatavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৩. খম্ভকতৰগ্গৰণ্ণনা • 3. Khambhakatavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৩. খম্ভকতৰগ্গৰণ্ণনা • 3. Khambhakatavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৩. খম্ভকতৰগ্গৰণ্ণনা • 3. Khambhakatavaggavaṇṇanā
