| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
3. க²ம்ப⁴கதவக்³க³வண்ணனா
3. Khambhakatavaggavaṇṇanā
596-8. க²ம்ப⁴கதோ நாம கடியங் ஹத்த²ங் ட²பெத்வா கதக²ம்போ⁴. ஓகு³ண்டி²தோதி ஸஸீஸங் பாருதோ.
596-8.Khambhakato nāma kaṭiyaṃ hatthaṃ ṭhapetvā katakhambho. Oguṇṭhitoti sasīsaṃ pāruto.
600. உக்குடிகாயாதி எத்த² உக்குடிகா வுச்சதி பண்ஹியோ உக்கி²பித்வா அக்³க³பாதே³ஹி வா, அக்³க³பாதே³ வா உக்கி²பித்வா பண்ஹீஹியேவ வா பூ⁴மிங் பு²ஸந்தஸ்ஸ க³மனங். கரணவசனங் பனெத்த² வுத்தலக்க²ணமேவ.
600.Ukkuṭikāyāti ettha ukkuṭikā vuccati paṇhiyo ukkhipitvā aggapādehi vā, aggapāde vā ukkhipitvā paṇhīhiyeva vā bhūmiṃ phusantassa gamanaṃ. Karaṇavacanaṃ panettha vuttalakkhaṇameva.
601. து³ஸ்ஸபல்லத்தி²காயாதி எத்த² ஆயோக³பல்லத்தி²காபி து³ஸ்ஸபல்லத்தி²கா ஏவ.
601.Dussapallatthikāyāti ettha āyogapallatthikāpi dussapallatthikā eva.
602. ஸக்கச்சந்தி ஸதிங் உபட்ட²பெத்வா.
602.Sakkaccanti satiṃ upaṭṭhapetvā.
603. ஆகிரந்தேபீதி பிண்ட³பாதங் தெ³ந்தேபி. பத்தஸஞ்ஞீதி பத்தே ஸஞ்ஞங் கத்வா.
603.Ākirantepīti piṇḍapātaṃ dentepi. Pattasaññīti patte saññaṃ katvā.
604. ஸமஸூபகோ நாம யத்த² ப⁴த்தஸ்ஸ சதுத்த²பா⁴க³ப்பமாணோ ஸூபோ ஹோதி. முக்³க³ஸூபோ மாஸஸூபோதி எத்த² குலத்தா²தீ³ஹி கதஸூபாபி ஸங்க³ஹங் க³ச்ச²ந்தியேவாதி மஹாபச்சரியங் வுத்தங். ரஸரஸேதி எத்த² ட²பெத்வா த்³வே ஸூபே அவஸேஸானி ஓலோணீஸாகஸூபெய்யமச்ச²ரஸமங்ஸரஸாதீ³னி ரஸரஸாதி வேதி³தப்³பா³னி. தங் ரஸரஸங் ப³ஹும்பி க³ண்ஹந்தஸ்ஸ அனாபத்தி.
604.Samasūpako nāma yattha bhattassa catutthabhāgappamāṇo sūpo hoti. Muggasūpo māsasūpoti ettha kulatthādīhi katasūpāpi saṅgahaṃ gacchantiyevāti mahāpaccariyaṃ vuttaṃ. Rasaraseti ettha ṭhapetvā dve sūpe avasesāni oloṇīsākasūpeyyamaccharasamaṃsarasādīni rasarasāti veditabbāni. Taṃ rasarasaṃ bahumpi gaṇhantassa anāpatti.
605. ஸமதித்திகந்தி ஸமபுண்ணங் ஸமப⁴ரிதங். தூ²பீகதங் பிண்ட³பாதங் படிக்³க³ண்ஹாதி, ஆபத்தி து³க்கடஸ்ஸாதி எத்த² தூ²பீகதோ நாம பத்தஸ்ஸ அந்தோமுக²வட்டிலேக²ங் அதிக்கமித்வா கதோ; பத்தே பக்கி²த்தோ ரசிதோ பூரிதோதி அத்தோ². ஏவங் கதங் அக³ஹெத்வா அந்தோமுக²வட்டிலேகா²ஸமப்பமாணோ க³ஹேதப்³போ³.
605.Samatittikanti samapuṇṇaṃ samabharitaṃ. Thūpīkataṃ piṇḍapātaṃ paṭiggaṇhāti, āpatti dukkaṭassāti ettha thūpīkato nāma pattassa antomukhavaṭṭilekhaṃ atikkamitvā kato; patte pakkhitto racito pūritoti attho. Evaṃ kataṃ agahetvā antomukhavaṭṭilekhāsamappamāṇo gahetabbo.
தத்த² தூ²பீகதங் நாம ‘‘பஞ்சஹி போ⁴ஜனேஹி கத’’ந்தி அப⁴யத்தே²ரோ ஆஹ. திபிடகசூளனாக³த்தே²ரோ பன ‘‘பிண்ட³பாதோ நாம யாகு³பி ப⁴த்தம்பி கா²த³னீயம்பி சுண்ணபிண்டோ³பி த³ந்தகட்ட²ம்பி த³ஸிகஸுத்தம்பீ’’தி இத³ங் ஸுத்தங் வத்வா த³ஸிகஸுத்தம்பி தூ²பீகதங் ந வட்டதீதி ஆஹ. தேஸங் வாத³ங் ஸுத்வா பி⁴க்கூ² ரோஹணங் க³ந்த்வா சூளஸுமனத்தே²ரங் புச்சி²ங்ஸு – ‘‘ப⁴ந்தே தூ²பீகதபிண்ட³பாதோ கேன பரிச்சி²ன்னோ’’தி? தேஸஞ்ச தே²ரானங் வாத³ங் ஆரோசேஸுங். தே²ரோ ஸுத்வா ஆஹ – ‘‘அஹோ, சூளனாகோ³ ஸாஸனதோ ப⁴ட்டோ², அஹங் ஏதஸ்ஸ ஸத்தக்க²த்துங் வினயங் வாசெந்தோ ந கதா³சி ஏவங் அவசங், அயங் குதோ லபி⁴த்வா ஏவங் வத³ஸீ’’தி. பி⁴க்கூ² தே²ரங் யாசிங்ஸு – ‘‘கதே²த² தா³னி, ப⁴ந்தே, கேன பரிச்சி²ன்னோ’’தி? ‘‘யாவகாலிகேனாவுஸோ’’தி தே²ரோ ஆஹ. தஸ்மா யங்கிஞ்சி யாகு³ப⁴த்தங் வா ப²லாப²லங் வா ஆமிஸஜாதிகங் ஸமதித்திகமேவ க³ஹேதப்³ப³ங். தஞ்ச கோ² அதி⁴ட்டா²னுபகே³ன பத்தேன, இதரேன பன தூ²பீகதம்பி வட்டதி. யாமகாலிகஸத்தாஹகாலிகயாவஜீவிகானி பன அதி⁴ட்டா²னுபக³பத்தேபி தூ²பீகதானி வட்டந்தி. த்³வீஸு பத்தேஸு ப⁴த்தங் க³ஹெத்வா ஏகஸ்மிங் பூரெத்வா விஹாரங் பேஸேதுங் வட்டதீதி மஹாபச்சரியங் பன வுத்தங். யங் பத்தே பக்கி²பியமானங் பூவஉச்சு²க²ண்ட³ப²லாப²லாதி³ ஹெட்டா² ஓரோஹதி, தங் தூ²பீகதங் நாம ந ஹோதி. பூவவடங்ஸகங் ட²பெத்வா பிண்ட³பாதங் தெ³ந்தி, தூ²பீகதமேவ ஹோதி. புப்ப²வடங்ஸகதக்கோலகடுகப²லாதி³வடங்ஸகே பன ட²பெத்வா தி³ன்னங் தூ²பீகதங் ந ஹோதி. ப⁴த்தஸ்ஸ உபரி தா²லகங் வா பத்தங் வா ட²பெத்வா பூரெத்வா க³ண்ஹாதி, தூ²பீகதங் நாம ந ஹோதி. குருந்தி³யம்பி வுத்தங் – ‘‘தா²லகே வா பண்ணே வா பக்கி²பித்வா தங் பத்தமத்த²கே ட²பெத்வா தெ³ந்தி, பாடேக்கபா⁴ஜனங் வட்டதீ’’தி.
Tattha thūpīkataṃ nāma ‘‘pañcahi bhojanehi kata’’nti abhayatthero āha. Tipiṭakacūḷanāgatthero pana ‘‘piṇḍapāto nāma yāgupi bhattampi khādanīyampi cuṇṇapiṇḍopi dantakaṭṭhampi dasikasuttampī’’ti idaṃ suttaṃ vatvā dasikasuttampi thūpīkataṃ na vaṭṭatīti āha. Tesaṃ vādaṃ sutvā bhikkhū rohaṇaṃ gantvā cūḷasumanattheraṃ pucchiṃsu – ‘‘bhante thūpīkatapiṇḍapāto kena paricchinno’’ti? Tesañca therānaṃ vādaṃ ārocesuṃ. Thero sutvā āha – ‘‘aho, cūḷanāgo sāsanato bhaṭṭho, ahaṃ etassa sattakkhattuṃ vinayaṃ vācento na kadāci evaṃ avacaṃ, ayaṃ kuto labhitvā evaṃ vadasī’’ti. Bhikkhū theraṃ yāciṃsu – ‘‘kathetha dāni, bhante, kena paricchinno’’ti? ‘‘Yāvakālikenāvuso’’ti thero āha. Tasmā yaṃkiñci yāgubhattaṃ vā phalāphalaṃ vā āmisajātikaṃ samatittikameva gahetabbaṃ. Tañca kho adhiṭṭhānupagena pattena, itarena pana thūpīkatampi vaṭṭati. Yāmakālikasattāhakālikayāvajīvikāni pana adhiṭṭhānupagapattepi thūpīkatāni vaṭṭanti. Dvīsu pattesu bhattaṃ gahetvā ekasmiṃ pūretvā vihāraṃ pesetuṃ vaṭṭatīti mahāpaccariyaṃ pana vuttaṃ. Yaṃ patte pakkhipiyamānaṃ pūvaucchukhaṇḍaphalāphalādi heṭṭhā orohati, taṃ thūpīkataṃ nāma na hoti. Pūvavaṭaṃsakaṃ ṭhapetvā piṇḍapātaṃ denti, thūpīkatameva hoti. Pupphavaṭaṃsakatakkolakaṭukaphalādivaṭaṃsake pana ṭhapetvā dinnaṃ thūpīkataṃ na hoti. Bhattassa upari thālakaṃ vā pattaṃ vā ṭhapetvā pūretvā gaṇhāti, thūpīkataṃ nāma na hoti. Kurundiyampi vuttaṃ – ‘‘thālake vā paṇṇe vā pakkhipitvā taṃ pattamatthake ṭhapetvā denti, pāṭekkabhājanaṃ vaṭṭatī’’ti.
இத⁴ அனாபத்தியங் கி³லானோ ந ஆக³தோ, தஸ்மா கி³லானஸ்ஸபி தூ²பீகதங் ந வட்டதி. ஸப்³ப³த்த² பன படிக்³க³ஹேதுமேவ ந வட்டதி. படிக்³க³ஹிதங் பன ஸுபடிக்³க³ஹிதமேவ ஹோதி, பரிபு⁴ஞ்ஜிதுங் வட்டதீதி.
Idha anāpattiyaṃ gilāno na āgato, tasmā gilānassapi thūpīkataṃ na vaṭṭati. Sabbattha pana paṭiggahetumeva na vaṭṭati. Paṭiggahitaṃ pana supaṭiggahitameva hoti, paribhuñjituṃ vaṭṭatīti.
ததியோ வக்³கோ³.
Tatiyo vaggo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 3. க²ம்ப⁴கதவக்³கோ³ • 3. Khambhakatavaggo
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 3. க²ம்ப⁴கதவக்³க³வண்ணனா • 3. Khambhakatavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. க²ம்ப⁴கதவக்³க³வண்ணனா • 3. Khambhakatavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. க²ம்ப⁴கதவக்³க³வண்ணனா • 3. Khambhakatavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. க²ம்ப⁴கதவக்³க³-அத்த²யோஜனா • 3. Khambhakatavagga-atthayojanā
