| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
3. க²ம்ப⁴கதவக்³க³வண்ணனா
3. Khambhakatavaggavaṇṇanā
603. ததியவக்³கே³ பத்தே ஸஞ்ஞா பத்தஸஞ்ஞா, ஸா அஸ்ஸ அத்தீ²தி பத்தஸஞ்ஞீ, அத்தனோ பா⁴ஜனே உபனிப³ந்த⁴ஸஞ்ஞீ ஹுத்வாதி அத்தோ². ப்³யஞ்ஜனங் பன அனாதி³யித்வா அத்த²மத்தமேவ த³ஸ்ஸேதுங் ‘‘பத்தே ஸஞ்ஞங் கத்வா’’தி வுத்தங்.
603. Tatiyavagge patte saññā pattasaññā, sā assa atthīti pattasaññī, attano bhājane upanibandhasaññī hutvāti attho. Byañjanaṃ pana anādiyitvā atthamattameva dassetuṃ ‘‘patte saññaṃ katvā’’ti vuttaṃ.
604. ஓலோணீதி ஏகா ப்³யஞ்ஜனவிகதி. ‘‘யோ கோசி ஸுத்³தோ⁴ கஞ்ஜிகதக்காதி³ரஸஓ’’தி கேசி. ஸாகஸூபெய்ய-க்³க³ஹணேன யா காசி ஸூபெய்யஸாகேஹி கதா ப்³யஞ்ஜனவிகதி வுத்தா. மங்ஸரஸாதீ³னீதி ஆதி³-ஸத்³தே³ன அவஸேஸா ஸப்³பா³பி ப்³யஞ்ஜனவிகதி ஸங்க³ஹிதாதி த³ட்ட²ப்³ப³ங். தேனேவ மாதிகாட்ட²கதா²யங் (கங்கா²॰ அட்ட²॰ ஸமஸூபகபடிக்³க³ஹணஸிக்கா²பத³வண்ணனா) வுத்தங் ‘‘ட²பெத்வா பன ஸூபங் அவஸேஸா ஸப்³பா³பி ஸூபெய்யா ப்³யஞ்ஜனவிகதி ரஸரஸோ நாம ஹோதீ’’தி.
604.Oloṇīti ekā byañjanavikati. ‘‘Yo koci suddho kañjikatakkādirasao’’ti keci. Sākasūpeyya-ggahaṇena yā kāci sūpeyyasākehi katā byañjanavikati vuttā. Maṃsarasādīnīti ādi-saddena avasesā sabbāpi byañjanavikati saṅgahitāti daṭṭhabbaṃ. Teneva mātikāṭṭhakathāyaṃ (kaṅkhā. aṭṭha. samasūpakapaṭiggahaṇasikkhāpadavaṇṇanā) vuttaṃ ‘‘ṭhapetvā pana sūpaṃ avasesā sabbāpi sūpeyyā byañjanavikati rasaraso nāma hotī’’ti.
605. ஸமபுண்ணந்தி அதி⁴ட்டா²னுபக³ஸ்ஸ பத்தஸ்ஸ அந்தோமுக²வட்டிலேக²ங் அனதிக்காமெத்வா ரசிதங். ஸமப⁴ரிதந்தி தஸ்ஸேவ வேவசனங். ப²லாப²லாதீ³தி ஆதி³-ஸத்³தே³ன ஓத³னாதி³ம்பி ஸங்க³ண்ஹாதி. ஹெட்டா² ஓரோஹதீதி ஸமந்தா ஓகாஸஸப்³பா⁴வதோ சாலியமானங் ஹெட்டா² ப⁴ஸ்ஸதி. மத்த²கே தூ²பீகதங் பூவமேவ வடங்ஸகஸதி³ஸத்தா ‘‘பூவவடங்ஸக’’ந்தி வுத்தங். புப்ப²வடங்ஸகாதீ³ஸுபி ஏஸேவ நயோ.
605.Samapuṇṇanti adhiṭṭhānupagassa pattassa antomukhavaṭṭilekhaṃ anatikkāmetvā racitaṃ. Samabharitanti tasseva vevacanaṃ. Phalāphalādīti ādi-saddena odanādimpi saṅgaṇhāti. Heṭṭhā orohatīti samantā okāsasabbhāvato cāliyamānaṃ heṭṭhā bhassati. Matthake thūpīkataṃ pūvameva vaṭaṃsakasadisattā ‘‘pūvavaṭaṃsaka’’nti vuttaṃ. Pupphavaṭaṃsakādīsupi eseva nayo.
யஸ்மா ‘‘ஸமதித்திகோ பிண்ட³பாதோ படிக்³க³ஹேதப்³போ³’’தி வசனங் பிண்ட³பாதோ ஸம்புண்ணோ படிக்³க³ஹேதப்³போ³தி தீ³பேதி, தஸ்மா அத்தனோ ஹத்த²க³தே பத்தே பிண்ட³பாதோ தி³ய்யமானோ தூ²பீகதோபி சே ஹோதி, வட்டதீதி தீ³பேதி. ‘‘தூ²பீகதங் பிண்ட³பாதங் படிக்³க³ண்ஹாதி, ஆபத்தி து³க்கடஸ்ஸா’’தி ஹி வசனங் பட²மங் தூ²பீகதங் பிண்ட³பாதங் பச்சா² படிக்³க³ண்ஹதோ ஆபத்தீதி தீ³பேதி. ‘‘பத்தே படிக்³க³ண்ஹதோ ச தூ²பீகதங் ஹோதி, வட்டதி அதூ²பீகதஸ்ஸ படிக்³க³ஹிதத்தா, பயோகோ³ பன நத்தி² அஞ்ஞத்ர புப்³ப³தே³ஸா’’தி கேனசி வுத்தங், தங் ந ஸாரதோ பச்சேதப்³ப³ங். ‘‘ந தூ²பீகதங் பிண்ட³பாதங் படிக்³க³ண்ஹாதீ’’தி வசனங் பட²மங் தூ²பீகதஸ்ஸேவ பச்சா² படிக்³க³ண்ஹனங் தீ³பேதி. ந ஹி ஹத்த²க³தேபி பத்தே தி³ய்யமானங் தூ²பீகதங் க³ண்ஹந்தோ தூ²பீகதங் பிண்ட³பாதங் படிக்³க³ண்ஹந்தோ நாம ந ஹோதி, ந ச தேன ஸமதித்திகோ பிண்ட³பாதோ படிக்³க³ஹிதோதி ஸக்கா விஞ்ஞாதுங். ‘‘தூ²பீகத’’ந்தி ச பா⁴வனபுங்ஸகனித்³தே³ஸே க³ய்ஹமானே அயமத்தோ² ஸுட்டு²தரங் பாகடோயேவாதி.
Yasmā ‘‘samatittiko piṇḍapāto paṭiggahetabbo’’ti vacanaṃ piṇḍapāto sampuṇṇo paṭiggahetabboti dīpeti, tasmā attano hatthagate patte piṇḍapāto diyyamāno thūpīkatopi ce hoti, vaṭṭatīti dīpeti. ‘‘Thūpīkataṃ piṇḍapātaṃ paṭiggaṇhāti, āpatti dukkaṭassā’’ti hi vacanaṃ paṭhamaṃ thūpīkataṃ piṇḍapātaṃ pacchā paṭiggaṇhato āpattīti dīpeti. ‘‘Patte paṭiggaṇhato ca thūpīkataṃ hoti, vaṭṭati athūpīkatassa paṭiggahitattā, payogo pana natthi aññatra pubbadesā’’ti kenaci vuttaṃ, taṃ na sārato paccetabbaṃ. ‘‘Na thūpīkataṃ piṇḍapātaṃ paṭiggaṇhātī’’ti vacanaṃ paṭhamaṃ thūpīkatasseva pacchā paṭiggaṇhanaṃ dīpeti. Na hi hatthagatepi patte diyyamānaṃ thūpīkataṃ gaṇhanto thūpīkataṃ piṇḍapātaṃ paṭiggaṇhanto nāma na hoti, na ca tena samatittiko piṇḍapāto paṭiggahitoti sakkā viññātuṃ. ‘‘Thūpīkata’’nti ca bhāvanapuṃsakaniddese gayhamāne ayamattho suṭṭhutaraṃ pākaṭoyevāti.
க²ம்ப⁴கதவக்³க³வண்ணனா நிட்டி²தா.
Khambhakatavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 3. க²ம்ப⁴கதவக்³கோ³ • 3. Khambhakatavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. க²ம்ப⁴கதவக்³க³வண்ணனா • 3. Khambhakatavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. க²ம்ப⁴கதவக்³க³வண்ணனா • 3. Khambhakatavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. க²ம்ப⁴கதவக்³க³வண்ணனா • 3. Khambhakatavaggavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. க²ம்ப⁴கதவக்³க³-அத்த²யோஜனா • 3. Khambhakatavagga-atthayojanā
