| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၅. ပန္နရသမဝဂ္ဂော
15. Pannarasamavaggo
(၁၄၈) ၄. ခဏလယမုဟုတ္တကထာ
(148) 4. Khaṇalayamuhuttakathā
၇၂၂. ခဏော ပရိနိပ္ဖန္နော, လယော ပရိနိပ္ဖန္နော, မုဟုတ္တံ ပရိနိပ္ဖန္နန္တိ? အာမန္တာ။ ရူပန္တိ? န ဟေဝံ ဝတ္တဗ္ဗေ။ပေ.။ ဝေဒနာ။ သညာ။ သင္ခာရာ။ ဝိညာဏန္တိ? န ဟေဝံ ဝတ္တဗ္ဗေ။ပေ.။။
722. Khaṇo parinipphanno, layo parinipphanno, muhuttaṃ parinipphannanti? Āmantā. Rūpanti? Na hevaṃ vattabbe…pe… vedanā… saññā… saṅkhārā… viññāṇanti? Na hevaṃ vattabbe…pe….
၇၂၃. န ဝတ္တဗ္ဗံ – ‘‘မုဟုတ္တံ ပရိနိပ္ဖန္နန္တိ? အာမန္တာ။ နနု ဝုတ္တံ ဘဂဝတာ – ‘‘တီဏိမာနိ, ဘိက္ခဝေ, ကထာဝတ္ထူနိ! ကတမာနိ တီဏိ? အတီတံ ဝာ, ဘိက္ခဝေ, အဒ္ဓာနံ အာရဗ္ဘ ကထံ ကထေယ္ယ – ‘ဧဝံ အဟောသိ အတီတမဒ္ဓာန’န္တိ; အနာဂတံ ဝာ, ဘိက္ခဝေ, အဒ္ဓာနံ အာရဗ္ဘ ကထံ ကထေယ္ယ – ‘ဧဝံ ဘဝိသ္သတိ အနာဂတမဒ္ဓာန’န္တိ; ဧတရဟိ ဝာ, ဘိက္ခဝေ, ပစ္စုပ္ပန္နံ အဒ္ဓာနံ အာရဗ္ဘ ကထံ ကထေယ္ယ – ‘ဧဝံ ဟောတိ ဧတရဟိ ပစ္စုပ္ပန္န’န္တိ။ ဣမာနိ ခော, ဘိက္ခဝေ, တီဏိ ကထာဝတ္ထူနီ’’တိ။ အတ္ထေဝ သုတ္တန္တောတိ? အာမန္တာ။ တေန ဟိ မုဟုတ္တံ ပရိနိပ္ဖန္နန္တိ။
723. Na vattabbaṃ – ‘‘muhuttaṃ parinipphannanti? Āmantā. Nanu vuttaṃ bhagavatā – ‘‘tīṇimāni, bhikkhave, kathāvatthūni! Katamāni tīṇi? Atītaṃ vā, bhikkhave, addhānaṃ ārabbha kathaṃ katheyya – ‘evaṃ ahosi atītamaddhāna’nti; anāgataṃ vā, bhikkhave, addhānaṃ ārabbha kathaṃ katheyya – ‘evaṃ bhavissati anāgatamaddhāna’nti; etarahi vā, bhikkhave, paccuppannaṃ addhānaṃ ārabbha kathaṃ katheyya – ‘evaṃ hoti etarahi paccuppanna’nti. Imāni kho, bhikkhave, tīṇi kathāvatthūnī’’ti. Attheva suttantoti? Āmantā. Tena hi muhuttaṃ parinipphannanti.
ခဏလယမုဟုတ္တကထာ နိဋ္ဌိတာ။
Khaṇalayamuhuttakathā niṭṭhitā.
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၄. ခဏလယမုဟုတ္တကထာဝဏ္ဏနာ • 4. Khaṇalayamuhuttakathāvaṇṇanā
