| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. க²ணஸுத்தவண்ணனா
2. Khaṇasuttavaṇṇanā
135. து³தியே ச²ப²ஸ்ஸாயதனிகா நாமாதி விஸுங் ச²ப²ஸ்ஸாயதனிகா நாம நிரயா நத்தி². ஸப்³பே³ஸுபி ஹி ஏகதிங்ஸமஹானிரயேஸு ச²த்³வாரப²ஸ்ஸாயதனபஞ்ஞத்தி ஹோதியேவ. இத³ங் பன அவீசிமஹானிரயங் ஸந்தா⁴ய வுத்தங். ஸக்³கா³தி இதா⁴பி தாவதிங்ஸபுரமேவ அதி⁴ப்பேதங். காமாவசரதே³வலோகே பன ஏகஸ்மிம்பி ச²ப²ஸ்ஸாயதனபஞ்ஞத்தியா அபா⁴வோ நாம நத்தி². இமினா கிங் தீ³பேதி? நிரயே ஏகந்தது³க்க²ஸமப்பிதபா⁴வேன, தே³வலோகே ச ஏகந்தஸுக²ஸமப்பிதத்தா ஏகந்தகி²ட்³டா³ரதிவஸேன உப்பன்னபமாதே³ன மக்³க³ப்³ரஹ்மசரியவாஸங் வஸிதுங் ந ஸக்கா. மனுஸ்ஸலோகோ பன வோகிண்ணஸுக²து³க்கோ², இதே⁴வ அபாயோபி ஸக்³கோ³பி பஞ்ஞாயதி. அயங் மக்³க³ப்³ரஹ்மசரியஸ்ஸ கம்மபூ⁴மி நாம, ஸா தும்ஹேஹி லத்³தா⁴. தஸ்மா யே வோ இமே மானுஸ்ஸகா க²ந்தா⁴ லத்³தா⁴, தே வோ லாபா⁴. யஞ்ச வோ இத³ங் மனுஸ்ஸத்தங் லத்³த⁴ங், படிலத்³தோ⁴ வோ ப்³ரஹ்மசரியவாஸஸ்ஸ க²ணோ ஸமயோதி. வுத்தம்பி ஹேதங் போராணேஹி –
135. Dutiye chaphassāyatanikā nāmāti visuṃ chaphassāyatanikā nāma nirayā natthi. Sabbesupi hi ekatiṃsamahānirayesu chadvāraphassāyatanapaññatti hotiyeva. Idaṃ pana avīcimahānirayaṃ sandhāya vuttaṃ. Saggāti idhāpi tāvatiṃsapurameva adhippetaṃ. Kāmāvacaradevaloke pana ekasmimpi chaphassāyatanapaññattiyā abhāvo nāma natthi. Iminā kiṃ dīpeti? Niraye ekantadukkhasamappitabhāvena, devaloke ca ekantasukhasamappitattā ekantakhiḍḍārativasena uppannapamādena maggabrahmacariyavāsaṃ vasituṃ na sakkā. Manussaloko pana vokiṇṇasukhadukkho, idheva apāyopi saggopi paññāyati. Ayaṃ maggabrahmacariyassa kammabhūmi nāma, sā tumhehi laddhā. Tasmā ye vo ime mānussakā khandhā laddhā, te vo lābhā. Yañca vo idaṃ manussattaṃ laddhaṃ, paṭiladdho vo brahmacariyavāsassa khaṇo samayoti. Vuttampi hetaṃ porāṇehi –
‘‘அயங் கம்மபூ⁴மி இத⁴ மக்³க³பா⁴வனா,
‘‘Ayaṃ kammabhūmi idha maggabhāvanā,
டா²னானி ஸங்வேஜனியா ப³ஹூ இத⁴;
Ṭhānāni saṃvejaniyā bahū idha;
ஸங்வேக³ஸங்வேஜனியேஸு வத்து²ஸு,
Saṃvegasaṃvejaniyesu vatthusu,
ஸங்வேக³ஜாதோவ பயுஞ்ச யோனிஸோ’’தி.
Saṃvegajātova payuñca yoniso’’ti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. க²ணஸுத்தங் • 2. Khaṇasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. க²ணஸுத்தவண்ணனா • 2. Khaṇasuttavaṇṇanā
