| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
২. খণসুত্তৰণ্ণনা
2. Khaṇasuttavaṇṇanā
১৩৫. দুতিযে ছফস্সাযতনিকা নামাতি ৰিসুং ছফস্সাযতনিকা নাম নিরযা নত্থি। সব্বেসুপি হি একতিংসমহানিরযেসু ছদ্ৰারফস্সাযতনপঞ্ঞত্তি হোতিযেৰ। ইদং পন অৰীচিমহানিরযং সন্ধায ৰুত্তং। সগ্গাতি ইধাপি তাৰতিংসপুরমেৰ অধিপ্পেতং। কামাৰচরদেৰলোকে পন একস্মিম্পি ছফস্সাযতনপঞ্ঞত্তিযা অভাৰো নাম নত্থি। ইমিনা কিং দীপেতি? নিরযে একন্তদুক্খসমপ্পিতভাৰেন, দেৰলোকে চ একন্তসুখসমপ্পিতত্তা একন্তখিড্ডারতিৰসেন উপ্পন্নপমাদেন মগ্গব্রহ্মচরিযৰাসং ৰসিতুং ন সক্কা। মনুস্সলোকো পন ৰোকিণ্ণসুখদুক্খো, ইধেৰ অপাযোপি সগ্গোপি পঞ্ঞাযতি। অযং মগ্গব্রহ্মচরিযস্স কম্মভূমি নাম, সা তুম্হেহি লদ্ধা। তস্মা যে ৰো ইমে মানুস্সকা খন্ধা লদ্ধা, তে ৰো লাভা। যঞ্চ ৰো ইদং মনুস্সত্তং লদ্ধং, পটিলদ্ধো ৰো ব্রহ্মচরিযৰাসস্স খণো সমযোতি। ৰুত্তম্পি হেতং পোরাণেহি –
135. Dutiye chaphassāyatanikā nāmāti visuṃ chaphassāyatanikā nāma nirayā natthi. Sabbesupi hi ekatiṃsamahānirayesu chadvāraphassāyatanapaññatti hotiyeva. Idaṃ pana avīcimahānirayaṃ sandhāya vuttaṃ. Saggāti idhāpi tāvatiṃsapurameva adhippetaṃ. Kāmāvacaradevaloke pana ekasmimpi chaphassāyatanapaññattiyā abhāvo nāma natthi. Iminā kiṃ dīpeti? Niraye ekantadukkhasamappitabhāvena, devaloke ca ekantasukhasamappitattā ekantakhiḍḍārativasena uppannapamādena maggabrahmacariyavāsaṃ vasituṃ na sakkā. Manussaloko pana vokiṇṇasukhadukkho, idheva apāyopi saggopi paññāyati. Ayaṃ maggabrahmacariyassa kammabhūmi nāma, sā tumhehi laddhā. Tasmā ye vo ime mānussakā khandhā laddhā, te vo lābhā. Yañca vo idaṃ manussattaṃ laddhaṃ, paṭiladdho vo brahmacariyavāsassa khaṇo samayoti. Vuttampi hetaṃ porāṇehi –
‘‘অযং কম্মভূমি ইধ মগ্গভাৰনা,
‘‘Ayaṃ kammabhūmi idha maggabhāvanā,
ঠানানি সংৰেজনিযা বহূ ইধ।
Ṭhānāni saṃvejaniyā bahū idha;
সংৰেগসংৰেজনিযেসু ৰত্থুসু,
Saṃvegasaṃvejaniyesu vatthusu,
সংৰেগজাতোৰ পযুঞ্চ যোনিসো’’তি॥
Saṃvegajātova payuñca yoniso’’ti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. খণসুত্তং • 2. Khaṇasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ২. খণসুত্তৰণ্ণনা • 2. Khaṇasuttavaṇṇanā
