| Library / Tipiṭaka / ติปิฎก • Tipiṭaka / สํยุตฺตนิกาย (อฎฺฐกถา) • Saṃyuttanikāya (aṭṭhakathā) |
๒. ขณสุตฺตวณฺณนา
2. Khaṇasuttavaṇṇanā
๑๓๕. ทุติเย ฉผสฺสายตนิกา นามาติ วิสุํ ฉผสฺสายตนิกา นาม นิรยา นตฺถิฯ สเพฺพสุปิ หิ เอกติํสมหานิรเยสุ ฉทฺวารผสฺสายตนปญฺญตฺติ โหติเยวฯ อิทํ ปน อวีจิมหานิรยํ สนฺธาย วุตฺตํฯ สคฺคาติ อิธาปิ ตาวติํสปุรเมว อธิเปฺปตํฯ กามาวจรเทวโลเก ปน เอกสฺมิมฺปิ ฉผสฺสายตนปญฺญตฺติยา อภาโว นาม นตฺถิฯ อิมินา กิํ ทีเปติ? นิรเย เอกนฺตทุกฺขสมปฺปิตภาเวน, เทวโลเก จ เอกนฺตสุขสมปฺปิตตฺตา เอกนฺตขิฑฺฑารติวเสน อุปฺปนฺนปมาเทน มคฺคพฺรหฺมจริยวาสํ วสิตุํ น สกฺกาฯ มนุสฺสโลโก ปน โวกิณฺณสุขทุโกฺข, อิเธว อปาโยปิ สโคฺคปิ ปญฺญายติฯ อยํ มคฺคพฺรหฺมจริยสฺส กมฺมภูมิ นาม, สา ตุเมฺหหิ ลทฺธาฯ ตสฺมา เย โว อิเม มานุสฺสกา ขนฺธา ลทฺธา, เต โว ลาภาฯ ยญฺจ โว อิทํ มนุสฺสตฺตํ ลทฺธํ, ปฎิลโทฺธ โว พฺรหฺมจริยวาสสฺส ขโณ สมโยติฯ วุตฺตมฺปิ เหตํ โปราเณหิ –
135. Dutiye chaphassāyatanikā nāmāti visuṃ chaphassāyatanikā nāma nirayā natthi. Sabbesupi hi ekatiṃsamahānirayesu chadvāraphassāyatanapaññatti hotiyeva. Idaṃ pana avīcimahānirayaṃ sandhāya vuttaṃ. Saggāti idhāpi tāvatiṃsapurameva adhippetaṃ. Kāmāvacaradevaloke pana ekasmimpi chaphassāyatanapaññattiyā abhāvo nāma natthi. Iminā kiṃ dīpeti? Niraye ekantadukkhasamappitabhāvena, devaloke ca ekantasukhasamappitattā ekantakhiḍḍārativasena uppannapamādena maggabrahmacariyavāsaṃ vasituṃ na sakkā. Manussaloko pana vokiṇṇasukhadukkho, idheva apāyopi saggopi paññāyati. Ayaṃ maggabrahmacariyassa kammabhūmi nāma, sā tumhehi laddhā. Tasmā ye vo ime mānussakā khandhā laddhā, te vo lābhā. Yañca vo idaṃ manussattaṃ laddhaṃ, paṭiladdho vo brahmacariyavāsassa khaṇo samayoti. Vuttampi hetaṃ porāṇehi –
‘‘อยํ กมฺมภูมิ อิธ มคฺคภาวนา,
‘‘Ayaṃ kammabhūmi idha maggabhāvanā,
ฐานานิ สํเวชนิยา พหู อิธ;
Ṭhānāni saṃvejaniyā bahū idha;
สํเวคสํเวชนิเยสุ วตฺถุสุ,
Saṃvegasaṃvejaniyesu vatthusu,
สํเวคชาโตว ปยุญฺจ โยนิโส’’ติฯ
Saṃvegajātova payuñca yoniso’’ti.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / สํยุตฺตนิกาย • Saṃyuttanikāya / ๒. ขณสุตฺตํ • 2. Khaṇasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๒. ขณสุตฺตวณฺณนา • 2. Khaṇasuttavaṇṇanā
