| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೨. ಖಣಸುತ್ತವಣ್ಣನಾ
2. Khaṇasuttavaṇṇanā
೧೩೫. ಛಫಸ್ಸಾಯತನಿಕಾತಿ ಛಹಿ ಫಸ್ಸಾಯತನೇಹಿ ಅನಿಟ್ಠಸಂವೇದನಿಯಾ। ಛದ್ವಾರಫಸ್ಸಪಟಿವಿಞ್ಞತ್ತೀತಿ ಛಹಿಪಿ ದ್ವಾರೇಹಿ ಆರಮ್ಮಣಸ್ಸ ಪಟಿಸಂವೇದನಾ ಹೋತಿಯೇವ ಸಬ್ಬಸೋ ದುಕ್ಖಾನುಭವನತ್ಥಂ। ತಾವತಿಂಸಪುರನ್ತಿ ಸುದಸ್ಸನಮಹಾನಗರಂ। ಅಭಾವೋ ನಾಮ ನತ್ಥಿ ಸಬ್ಬಥಾ ಸುಖಾನುಭವನತೋ। ನಿರಯೇತಿ ಇಮಿನಾ ದುಗ್ಗತಿ ಭವಸಾಮಞ್ಞೇನ ಇತರಾಪಾಯಾಪಿ ಗಹಿತಾ ಏವ। ಮಗ್ಗಬ್ರಹ್ಮಚರಿಯವಾಸಂ ವಸಿತುಂ ನ ಸಕ್ಕಾತಿ ಇಮಿನಾ ಪನ ಸಬ್ಬೇಸಮ್ಪಿ ಅಚ್ಛಿನ್ದಿಕಟ್ಠಾನಾನಂ ಗಹಣಂ ದಟ್ಠಬ್ಬಂ। ಇಮೇವಾತಿ ಇಮಸ್ಮಿಂ ಮನುಸ್ಸಲೋಕೇ ಏವ। ಅಪಾಯೋಪಿ ಪಞ್ಞಾಯತಿ ಅಪಾಯದುಕ್ಖಸದಿಸಸ್ಸ ದುಕ್ಖಸ್ಸ ಕದಾಚಿ ಪಟಿಸಂವೇದನತೋ। ಸಗ್ಗೋಪಿ ಪಞ್ಞಾಯತಿ ದೇವಭೋಗಸದಿಸಸಮ್ಪತ್ತಿಯಾ ಕದಾಚಿ ಪಟಿಲಭಿತಬ್ಬತೋ।
135.Chaphassāyatanikāti chahi phassāyatanehi aniṭṭhasaṃvedaniyā. Chadvāraphassapaṭiviññattīti chahipi dvārehi ārammaṇassa paṭisaṃvedanā hotiyeva sabbaso dukkhānubhavanatthaṃ. Tāvatiṃsapuranti sudassanamahānagaraṃ. Abhāvo nāma natthi sabbathā sukhānubhavanato. Nirayeti iminā duggati bhavasāmaññena itarāpāyāpi gahitā eva. Maggabrahmacariyavāsaṃ vasituṃ na sakkāti iminā pana sabbesampi acchindikaṭṭhānānaṃ gahaṇaṃ daṭṭhabbaṃ. Imevāti imasmiṃ manussaloke eva. Apāyopi paññāyati apāyadukkhasadisassa dukkhassa kadāci paṭisaṃvedanato. Saggopi paññāyati devabhogasadisasampattiyā kadāci paṭilabhitabbato.
ಅಯಂ ಕಮ್ಮಭೂಮೀತಿ ಅಯಂ ಮನುಸ್ಸಲೋಕೋ ಪುರಿಸಥಾಮಕರಣಾಯ ಕಮ್ಮಭೂಮಿ ನಾಮ ತಾಸಂ ಯೋಗ್ಯಟ್ಠಾನಭಾವತೋ। ತತ್ಥ ಪಧಾನಕಮ್ಮಂ ದಸ್ಸೇನ್ತೋ ‘‘ಇಧ ಮಗ್ಗಭಾವನಾ’’ತಿ ಆಹ। ಠಾನಾನೀತಿ ಕಾರಣಾನಿ। ಸಂವೇಜನಿಯಾನೀತಿ ಸಂವೇಗಜನನಾನಿ ಬಹೂನಿ ಜಾತಿಆದೀನಿ। ತಥಾ ಹಿ ಜಾತಿ, ಜರಾ, ಬ್ಯಾಧಿ, ಮರಣಂ, ಅಪಾಯಭವಂ, ತತ್ಥಪಿ ನಿರಯೂಪಪತ್ತಿಹೇತುಕಂ, ತಿರಚ್ಛಾನುಪಪತ್ತಿಹೇತುಕಂ, ಅಸೂರಕಾಯೂಪಪತ್ತಿಹೇತುಕಂ, ಅತೀತೇ ವಟ್ಟಮೂಲಕಂ, ಅನಾಗತೇ ವಟ್ಟಮೂಲಕಂ, ಪಚ್ಚುಪ್ಪನ್ನೇ ಆಹಾರಪರಿಯೇಟ್ಠಿಮೂಲಕನ್ತಿ ಬಹೂನಿ ಸಂವೇಗವತ್ಥೂನಿ ಪಚ್ಚವೇಕ್ಖಿತ್ವಾ ಸಂವೇಗಜಾತೋ ಸಞ್ಜಾತಸಂವೇಗೋ ಯೋನಿಸೋ ಪಧಾನಮನುಯುಞ್ಜಸ್ಸು। ಸಂವೇಗಾತಿ ಸಂವೇಗಮಾಪಜ್ಜಸ್ಸು।
Ayaṃ kammabhūmīti ayaṃ manussaloko purisathāmakaraṇāya kammabhūmi nāma tāsaṃ yogyaṭṭhānabhāvato. Tattha padhānakammaṃ dassento ‘‘idha maggabhāvanā’’ti āha. Ṭhānānīti kāraṇāni. Saṃvejaniyānīti saṃvegajananāni bahūni jātiādīni. Tathā hi jāti, jarā, byādhi, maraṇaṃ, apāyabhavaṃ, tatthapi nirayūpapattihetukaṃ, tiracchānupapattihetukaṃ, asūrakāyūpapattihetukaṃ, atīte vaṭṭamūlakaṃ, anāgate vaṭṭamūlakaṃ, paccuppanne āhārapariyeṭṭhimūlakanti bahūni saṃvegavatthūni paccavekkhitvā saṃvegajāto sañjātasaṃvego yoniso padhānamanuyuñjassu. Saṃvegāti saṃvegamāpajjassu.
ಖಣಸುತ್ತವಣ್ಣನಾ ನಿಟ್ಠಿತಾ।
Khaṇasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೨. ಖಣಸುತ್ತಂ • 2. Khaṇasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೨. ಖಣಸುತ್ತವಣ್ಣನಾ • 2. Khaṇasuttavaṇṇanā
