| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৬. খণ্ডসুমনত্থেরগাথাৰণ্ণনা
6. Khaṇḍasumanattheragāthāvaṇṇanā
একপুপ্ফং চজিত্ৰানাতি আযস্মতো খণ্ডসুমনত্থেরস্স গাথা। কা উপ্পত্তি? সো কির পদুমুত্তরস্স ভগৰতো কালে কুলগেহে নিব্বত্তিত্ৰা ৰিঞ্ঞুতং পত্তো সত্থরি পরিনিব্বুতে তস্স থূপস্স সমন্ততো চন্দনৰেদিকায পরিক্খিপিত্ৰা মহন্তং পূজং অকাসি। সো তেন পুঞ্ঞকম্মেন দেৰমনুস্সেসু উল়ারং সম্পত্তিং অনুভৰন্তো কস্সপস্স ভগৰতো কালে কুটুম্বিককুলে নিব্বত্তো সত্থরি পরিনিব্বুতে কনকথূপং উদ্দিস্স রঞ্ঞা পুপ্ফপূজায কযিরমানায পুপ্ফানি অলভন্তো একং খণ্ডসুমনপুপ্ফং দিস্ৰা মহতা মূলেন তং কিণিত্ৰা গণ্হন্তো চেতিযে পূজং করোন্তো উল়ারং পীতিসোমনস্সং উপ্পাদেসি। সো তেন পুঞ্ঞকম্মেন দেৰলোকে নিব্বত্তিত্ৰা অসীতি ৰস্সকোটিযো সগ্গসুখং অনুভৰিত্ৰা ইমস্মিং বুদ্ধুপ্পাদে পাৰাযং মল্লরাজকুলে নিব্বত্তি। তস্স জাতকালে গেহে খণ্ডসক্খরা সুমনপুপ্ফানি চ উপ্পন্নানি অহেসুং। তেনস্স খণ্ডসুমনোতি নামমকংসু। সো ৰিঞ্ঞুতং পত্তো ভগৰতি পাৰাযং চুন্দস্স অম্বৰনে ৰিহরন্তে উপসঙ্কমিত্ৰা ধম্মং সুত্ৰা পটিলদ্ধসদ্ধো পব্বজিত্ৰা ৰিপস্সনায কম্মং করোন্তো নচিরস্সেৰ ছল়ভিঞ্ঞো অহোসি। তেন ৰুত্তং অপদানে (অপ॰ থের ১.১৫.১৫-২০) –
Ekapupphaṃcajitvānāti āyasmato khaṇḍasumanattherassa gāthā. Kā uppatti? So kira padumuttarassa bhagavato kāle kulagehe nibbattitvā viññutaṃ patto satthari parinibbute tassa thūpassa samantato candanavedikāya parikkhipitvā mahantaṃ pūjaṃ akāsi. So tena puññakammena devamanussesu uḷāraṃ sampattiṃ anubhavanto kassapassa bhagavato kāle kuṭumbikakule nibbatto satthari parinibbute kanakathūpaṃ uddissa raññā pupphapūjāya kayiramānāya pupphāni alabhanto ekaṃ khaṇḍasumanapupphaṃ disvā mahatā mūlena taṃ kiṇitvā gaṇhanto cetiye pūjaṃ karonto uḷāraṃ pītisomanassaṃ uppādesi. So tena puññakammena devaloke nibbattitvā asīti vassakoṭiyo saggasukhaṃ anubhavitvā imasmiṃ buddhuppāde pāvāyaṃ mallarājakule nibbatti. Tassa jātakāle gehe khaṇḍasakkharā sumanapupphāni ca uppannāni ahesuṃ. Tenassa khaṇḍasumanoti nāmamakaṃsu. So viññutaṃ patto bhagavati pāvāyaṃ cundassa ambavane viharante upasaṅkamitvā dhammaṃ sutvā paṭiladdhasaddho pabbajitvā vipassanāya kammaṃ karonto nacirasseva chaḷabhiñño ahosi. Tena vuttaṃ apadāne (apa. thera 1.15.15-20) –
‘‘পদুমুত্তরো নাম জিনো, লোকজেট্ঠো নরাসভো।
‘‘Padumuttaro nāma jino, lokajeṭṭho narāsabho;
জলিত্ৰা অগ্গিক্খন্ধোৰ, সম্বুদ্ধো পরিনিব্বুতো॥
Jalitvā aggikkhandhova, sambuddho parinibbuto.
‘‘নিব্বুতে চ মহাৰীরে, থূপো ৰিত্থারিকো অহু।
‘‘Nibbute ca mahāvīre, thūpo vitthāriko ahu;
দূরতোৰ উপট্ঠেন্তি, ধাতুগেহৰরুত্তমে॥
Dūratova upaṭṭhenti, dhātugehavaruttame.
‘‘পসন্নচিত্তো, সুমনো, অকং চন্দনৰেদিকং।
‘‘Pasannacitto, sumano, akaṃ candanavedikaṃ;
দিস্সতি থূপখন্ধো চ, থূপানুচ্ছৰিকো তদা॥
Dissati thūpakhandho ca, thūpānucchaviko tadā.
‘‘ভৰে নিব্বত্তমানম্হি, দেৰত্তে অথ মানুসে।
‘‘Bhave nibbattamānamhi, devatte atha mānuse;
ওমত্তং মে ন পস্সামি, পুব্বকম্মস্সিদং ফলং॥
Omattaṃ me na passāmi, pubbakammassidaṃ phalaṃ.
‘‘পঞ্চদসকপ্পসতে, ইতো অট্ঠ জনা অহুং।
‘‘Pañcadasakappasate, ito aṭṭha janā ahuṃ;
সব্বে সমত্তনামা তে চক্কৰত্তী মহব্বলা॥
Sabbe samattanāmā te cakkavattī mahabbalā.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহত্তং পন পত্ৰা অত্তনো পুরিমজাতিং অনুস্সরন্তো তত্থ অত্তনো সুমনপুপ্ফপরিচ্চাগস্স সগ্গসম্পত্তিনিমিত্তকং নিব্বানূপনিস্সযতঞ্চ দিস্ৰা উদানৰসেন তমত্থং পকাসেন্তো –
Arahattaṃ pana patvā attano purimajātiṃ anussaranto tattha attano sumanapupphapariccāgassa saggasampattinimittakaṃ nibbānūpanissayatañca disvā udānavasena tamatthaṃ pakāsento –
৯৬.
96.
‘‘একপুপ্ফং চজিত্ৰান, অসীতি ৰস্সকোটিযো।
‘‘Ekapupphaṃ cajitvāna, asīti vassakoṭiyo;
সগ্গেসু পরিচারেত্ৰা, সেসকেনম্হি নিব্বুতো’’তি॥ – গাথং অভাসি।
Saggesu paricāretvā, sesakenamhi nibbuto’’ti. – gāthaṃ abhāsi;
তত্থ একপুপ্ফন্তি একং কুসুমং, তং পন ইধ সুমনপুপ্ফং অধিপ্পেতং। চজিত্ৰানাতি সত্থু থূপপূজাকরণৰসেন পরিচ্চজিত্ৰা পরিচ্চাগহেতু। অসীতি ৰস্সকোটিযোতি মনুস্সগণনায ৰস্সানং অসীতি কোটিযো, অচ্চন্তসংযোগে চেতং উপযোগৰচনং, ইদঞ্চ ছসু কামসগ্গেসু দুতিযে অপরাপরুপ্পত্তিৰসেন ৰুত্তন্তি ৰেদিতব্বং। তস্মা সগ্গেসূতি তাৰতিংসসঙ্খাতে সগ্গলোকে, পুনপ্পুনং উপ্পজ্জনৰসেন হেত্থ বহুৰচনং। পরিচারেত্ৰাতি রূপাদীসু আরম্মণেসু ইন্দ্রিযানি পরিচারেত্ৰা সুখং অনুভৰিত্ৰা, দেৰচ্ছরাহি ৰা অত্তানং পরিচারেত্ৰা উপট্ঠাপেত্ৰা। সেসকেনম্হি নিব্বুতোতি পুপ্ফপূজায ৰসেন পৰত্তকুসলচেতনাসু ভৰসম্পত্তি দাযককম্মতো সেসেন যং তত্থ ৰিৰট্টূপনিস্সযভূতং, তং সন্ধায ৰদতি। বহূ হি তত্থ পুব্বাপরৰসেন পৰত্তা চেতনা। সেসকেনাতি ৰা তস্সেৰ কম্মস্স ৰিপাকাৰসেসেন অপরিক্খীণেযেৰ তস্মিং কম্মৰিপাকে নিব্বুতো অম্হি, কিলেসপরিনিব্বানেন পরিনিব্বুতোস্মি। এতেন যস্মিং অত্তভাৰে ঠত্ৰা অত্তনা অরহত্তং সচ্ছিকতং, সোপি চরিমত্তভাৰো তস্স কম্মৰিপাকোতি দস্সেতি। যাদিসং সন্ধায অঞ্ঞত্থাপি ‘‘তস্সেৰ কম্মস্স ৰিপাকাৰসেসেনা’’তি (পারা॰ ২২৮; সং॰ নি॰ ১.১৩১) ৰুত্তং।
Tattha ekapupphanti ekaṃ kusumaṃ, taṃ pana idha sumanapupphaṃ adhippetaṃ. Cajitvānāti satthu thūpapūjākaraṇavasena pariccajitvā pariccāgahetu. Asīti vassakoṭiyoti manussagaṇanāya vassānaṃ asīti koṭiyo, accantasaṃyoge cetaṃ upayogavacanaṃ, idañca chasu kāmasaggesu dutiye aparāparuppattivasena vuttanti veditabbaṃ. Tasmā saggesūti tāvatiṃsasaṅkhāte saggaloke, punappunaṃ uppajjanavasena hettha bahuvacanaṃ. Paricāretvāti rūpādīsu ārammaṇesu indriyāni paricāretvā sukhaṃ anubhavitvā, devaccharāhi vā attānaṃ paricāretvā upaṭṭhāpetvā. Sesakenamhi nibbutoti pupphapūjāya vasena pavattakusalacetanāsu bhavasampatti dāyakakammato sesena yaṃ tattha vivaṭṭūpanissayabhūtaṃ, taṃ sandhāya vadati. Bahū hi tattha pubbāparavasena pavattā cetanā. Sesakenāti vā tasseva kammassa vipākāvasesena aparikkhīṇeyeva tasmiṃ kammavipāke nibbuto amhi, kilesaparinibbānena parinibbutosmi. Etena yasmiṃ attabhāve ṭhatvā attanā arahattaṃ sacchikataṃ, sopi carimattabhāvo tassa kammavipākoti dasseti. Yādisaṃ sandhāya aññatthāpi ‘‘tasseva kammassa vipākāvasesenā’’ti (pārā. 228; saṃ. ni. 1.131) vuttaṃ.
খণ্ডসুমনত্থেরগাথাৰণ্ণনা নিট্ঠিতা।
Khaṇḍasumanattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৬. খণ্ডসুমনত্থেরগাথা • 6. Khaṇḍasumanattheragāthā
