| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၆. ခန္ဓာဒိဝာရော
6. Khandhādivāro
၃၅. ‘‘‘ယာဝတာ ခန္ဓာနံ ခန္ဓဋ္ဌော, ဉာတော ဒိဋ္ဌော ဝိဒိတော သစ္ဆိကတော ဖသ္သိတော ပညာယ။ အဖသ္သိတော ပညာယ ခန္ဓဋ္ဌော နတ္ထီ’တိ – စက္ခုံ ဥဒပာဒိ, ဉာဏံ ဥဒပာဒိ, ပညာ ဥဒပာဒိ, ဝိဇ္ဇာ ဥဒပာဒိ, အာလောကော ဥဒပာဒိ’’။ ခန္ဓာနံ ခန္ဓဋ္ဌေ ပဉ္စဝီသတိ ဓမ္မာ, ပဉ္စဝီသတိ အတ္ထာ, ပညာသ နိရုတ္တိယော, သတံ ဉာဏာနိ။
35. ‘‘‘Yāvatā khandhānaṃ khandhaṭṭho, ñāto diṭṭho vidito sacchikato phassito paññāya. Aphassito paññāya khandhaṭṭho natthī’ti – cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi’’. Khandhānaṃ khandhaṭṭhe pañcavīsati dhammā, pañcavīsati atthā, paññāsa niruttiyo, sataṃ ñāṇāni.
‘‘‘ယာဝတာ ဓာတူနံ ဓာတုဋ္ဌော။ပေ.။ ယာဝတာ အာယတနာနံ အာယတနဋ္ဌော။ပေ.။ ယာဝတာ သင္ခတာနံ သင္ခတဋ္ဌော။ပေ.။ ယာဝတာ အသင္ခတသ္သ အသင္ခတဋ္ဌော ဉာတော ဒိဋ္ဌော ဝိဒိတော သစ္ဆိကတော ဖသ္သိတော ပညာယ။ အဖသ္သိတော ပညာယ အသင္ခတဋ္ဌော နတ္ထီ’တိ – စက္ခုံ ဥဒပာဒိ။ပေ.။ အာလောကော ဥဒပာဒိ’’။ အသင္ခတသ္သ အသင္ခတဋ္ဌေ ပဉ္စဝီသတိ ဓမ္မာ, ပဉ္စဝီသတိ အတ္ထာ, ပညာသ နိရုတ္တိယော, သတံ ဉာဏာနိ။
‘‘‘Yāvatā dhātūnaṃ dhātuṭṭho…pe… yāvatā āyatanānaṃ āyatanaṭṭho…pe… yāvatā saṅkhatānaṃ saṅkhataṭṭho…pe… yāvatā asaṅkhatassa asaṅkhataṭṭho ñāto diṭṭho vidito sacchikato phassito paññāya. Aphassito paññāya asaṅkhataṭṭho natthī’ti – cakkhuṃ udapādi…pe… āloko udapādi’’. Asaṅkhatassa asaṅkhataṭṭhe pañcavīsati dhammā, pañcavīsati atthā, paññāsa niruttiyo, sataṃ ñāṇāni.
ခန္ဓာနံ ခန္ဓဋ္ဌေ, ဓာတူနံ ဓာတုဋ္ဌေ, အာယတနာနံ အာယတနဋ္ဌေ သင္ခတာနံ သင္ခတဋ္ဌေ, အသင္ခတသ္သ အသင္ခတဋ္ဌေ ပဉ္စဝီသတိသတံ ဓမ္မာ, ပဉ္စဝီသတိသတံ အတ္ထာ, အဍ္ဎတေယ္ယာနိ နိရုတ္တိသတာနိ, ပဉ္စ ဉာဏသတာနိ။
Khandhānaṃ khandhaṭṭhe, dhātūnaṃ dhātuṭṭhe, āyatanānaṃ āyatanaṭṭhe saṅkhatānaṃ saṅkhataṭṭhe, asaṅkhatassa asaṅkhataṭṭhe pañcavīsatisataṃ dhammā, pañcavīsatisataṃ atthā, aḍḍhateyyāni niruttisatāni, pañca ñāṇasatāni.
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / ၄-၈. သတ္တဗောဓိသတ္တဝာရာဒိဝဏ္ဏနာ • 4-8. Sattabodhisattavārādivaṇṇanā
