| Library / Tipiṭaka / තිපිටක • Tipiṭaka / පටිසම්‌භිදාමග්‌ගපාළි • Paṭisambhidāmaggapāḷi |
6. ඛන්‌ධාදිවාරො
6. Khandhādivāro
35. ‘‘‘යාවතා ඛන්‌ධානං ඛන්‌ධට්‌ඨො, ඤාතො දිට්‌ඨො විදිතො සච්‌ඡිකතො ඵස්‌සිතො පඤ්‌ඤාය. අඵස්‌සිතො පඤ්‌ඤාය ඛන්‌ධට්‌ඨො නත්‌ථී’ති – චක්‌ඛුං උදපාදි, ඤාණං උදපාදි, පඤ්‌ඤා උදපාදි, විජ්‌ජා උදපාදි, ආලොකො උදපාදි’’. ඛන්‌ධානං ඛන්‌ධට්‌ඨෙ පඤ්‌චවීසති ධම්‌මා, පඤ්‌චවීසති අත්‌ථා, පඤ්‌ඤාස නිරුත්‌තියො, සතං ඤාණානි.
35. ‘‘‘Yāvatā khandhānaṃ khandhaṭṭho, ñāto diṭṭho vidito sacchikato phassito paññāya. Aphassito paññāya khandhaṭṭho natthī’ti – cakkhuṃ udapādi, ñāṇaṃ udapādi, paññā udapādi, vijjā udapādi, āloko udapādi’’. Khandhānaṃ khandhaṭṭhe pañcavīsati dhammā, pañcavīsati atthā, paññāsa niruttiyo, sataṃ ñāṇāni.
‘‘‘යාවතා ධාතූනං ධාතුට්‌ඨො…පෙ.… යාවතා ආයතනානං ආයතනට්‌ඨො…පෙ.… යාවතා සඞ්‌ඛතානං සඞ්‌ඛතට්‌ඨො…පෙ.… යාවතා අසඞ්‌ඛතස්‌ස අසඞ්‌ඛතට්‌ඨො ඤාතො දිට්‌ඨො විදිතො සච්‌ඡිකතො ඵස්‌සිතො පඤ්‌ඤාය. අඵස්‌සිතො පඤ්‌ඤාය අසඞ්‌ඛතට්‌ඨො නත්‌ථී’ති – චක්‌ඛුං උදපාදි…පෙ.… ආලොකො උදපාදි’’. අසඞ්‌ඛතස්‌ස අසඞ්‌ඛතට්‌ඨෙ පඤ්‌චවීසති ධම්‌මා, පඤ්‌චවීසති අත්‌ථා, පඤ්‌ඤාස නිරුත්‌තියො, සතං ඤාණානි.
‘‘‘Yāvatā dhātūnaṃ dhātuṭṭho…pe… yāvatā āyatanānaṃ āyatanaṭṭho…pe… yāvatā saṅkhatānaṃ saṅkhataṭṭho…pe… yāvatā asaṅkhatassa asaṅkhataṭṭho ñāto diṭṭho vidito sacchikato phassito paññāya. Aphassito paññāya asaṅkhataṭṭho natthī’ti – cakkhuṃ udapādi…pe… āloko udapādi’’. Asaṅkhatassa asaṅkhataṭṭhe pañcavīsati dhammā, pañcavīsati atthā, paññāsa niruttiyo, sataṃ ñāṇāni.
ඛන්‌ධානං ඛන්‌ධට්‌ඨෙ, ධාතූනං ධාතුට්‌ඨෙ, ආයතනානං ආයතනට්‌ඨෙ සඞ්‌ඛතානං සඞ්‌ඛතට්‌ඨෙ, අසඞ්‌ඛතස්‌ස අසඞ්‌ඛතට්‌ඨෙ පඤ්‌චවීසතිසතං ධම්‌මා, පඤ්‌චවීසතිසතං අත්‌ථා, අඩ්‌ඪතෙය්‍යානි නිරුත්‌තිසතානි, පඤ්‌ච ඤාණසතානි.
Khandhānaṃ khandhaṭṭhe, dhātūnaṃ dhātuṭṭhe, āyatanānaṃ āyatanaṭṭhe saṅkhatānaṃ saṅkhataṭṭhe, asaṅkhatassa asaṅkhataṭṭhe pañcavīsatisataṃ dhammā, pañcavīsatisataṃ atthā, aḍḍhateyyāni niruttisatāni, pañca ñāṇasatāni.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / පටිසම්‌භිදාමග්‌ග-අට්‌ඨකථා • Paṭisambhidāmagga-aṭṭhakathā / 4-8. සත්‌තබොධිසත්‌තවාරාදිවණ්‌ණනා • 4-8. Sattabodhisattavārādivaṇṇanā
