| Library / Tipiṭaka / ತಿಪಿಟಕ • Tipiṭaka / ವಿನಯವಿನಿಚ್ಛಯ-ಟೀಕಾ • Vinayavinicchaya-ṭīkā |
ಖನ್ಧಕಪುಚ್ಛಾಕಥಾವಣ್ಣನಾ
Khandhakapucchākathāvaṇṇanā
೩೦೦. ಸೇಸೇಸೂತಿ ಅಭಬ್ಬಪುಗ್ಗಲಪರಿದೀಪಕೇಸು ಸಬ್ಬಪದೇಸು।
300.Sesesūti abhabbapuggalaparidīpakesu sabbapadesu.
೩೦೨. ‘‘ನಸ್ಸನ್ತು ಏತೇ’’ತಿ ಪದಚ್ಛೇದೋ। ಪುರಕ್ಖಕಾತಿ ಏತ್ಥ ಸಾಮಿಅತ್ಥೇ ಪಚ್ಚತ್ತವಚನಂ, ಭೇದಪುರೇಕ್ಖಕಸ್ಸ, ಭೇದಪುರೇಕ್ಖಕಾಯಾತಿ ಅತ್ಥೋ।
302. ‘‘Nassantu ete’’ti padacchedo. Purakkhakāti ettha sāmiatthe paccattavacanaṃ, bhedapurekkhakassa, bhedapurekkhakāyāti attho.
೩೦೩. ಸೇಸೇಸೂತಿ ಅವಸೇಸೇಸು ಅಸಂವಾಸಕಾದಿದೀಪಕೇಸು ಪಟಿಕ್ಖೇಪಪದೇಸು।
303.Sesesūti avasesesu asaṃvāsakādidīpakesu paṭikkhepapadesu.
೩೦೪. ಏಕಾವ ದುಕ್ಕಟಾಪತ್ತಿ ವುತ್ತಾತಿ ವಸ್ಸಂ ಅನುಪಗಮನಾದಿಪಚ್ಚಯಾ ಜಾತಿತೋ ಏಕಾವ ದುಕ್ಕಟಾಪತ್ತಿ ವುತ್ತಾ।
304.Ekāvadukkaṭāpatti vuttāti vassaṃ anupagamanādipaccayā jātito ekāva dukkaṭāpatti vuttā.
೩೦೫. ಉಪೋಸಥಸಮಾ ಮತಾತಿ ಉಪೋಸಥಕ್ಖನ್ಧಕೇ ವುತ್ತಸದಿಸಾ ಜಾತಾ ಆಪತ್ತಿಯೋ ಮತಾ ಅಧಿಪ್ಪೇತಾ।
305.Uposathasamāmatāti uposathakkhandhake vuttasadisā jātā āpattiyo matā adhippetā.
೩೦೬. ಚಮ್ಮೇತಿ ಚಮ್ಮಕ್ಖನ್ಧಕೇ। ವಚ್ಛತರಿಂ ಗಹೇತ್ವಾ ಮಾರೇನ್ತಾನಂ ಛಬ್ಬಗ್ಗಿಯಾನಂ ಪಾಚಿತ್ತಿ ವುತ್ತಾತಿ ಸಮ್ಬನ್ಧೋ। ವಚ್ಛತರಿನ್ತಿ ಬಲಸಮ್ಪನ್ನಂ ತರುಣಗಾವಿಂ। ಸಾ ಹಿ ವಚ್ಛಕಭಾವಂ ತರಿತ್ವಾ ಅತಿಕ್ಕಮಿತ್ವಾ ಠಿತತ್ತಾ ‘‘ವಚ್ಛತರೀ’’ತಿ ವುಚ್ಚತಿ।
306.Cammeti cammakkhandhake. Vacchatariṃ gahetvā mārentānaṃ chabbaggiyānaṃ pācitti vuttāti sambandho. Vacchatarinti balasampannaṃ taruṇagāviṃ. Sā hi vacchakabhāvaṃ taritvā atikkamitvā ṭhitattā ‘‘vacchatarī’’ti vuccati.
೩೦೭. ಅಙ್ಗಜಾತಂ ಛುಪನ್ತಸ್ಸಾತಿ ಗಾವೀನಂ ಅಙ್ಗಜಾತಂ ಅತ್ತನೋ ಅಙ್ಗಜಾತೇನ ಬಹಿ ಛುಪನ್ತಸ್ಸ। ಸೇಸೇಸೂತಿ ಗಾವೀನಂ ವಿಸಾಣಾದೀಸು ಗಹಣೇ, ಪಿಟ್ಠಿಅಭಿರುಹಣೇ ಚ। ಯಥಾಹ ‘‘ಛಬ್ಬಗ್ಗಿಯಾ ಭಿಕ್ಖೂ ಅಚಿರವತಿಯಾ ನದಿಯಾ ಗಾವೀನಂ ತರನ್ತೀನಂ ವಿಸಾಣೇಸುಪಿ ಗಣ್ಹನ್ತೀ’’ತಿಆದಿ (ಮಹಾವ॰ ೨೫೨)।
307.Aṅgajātaṃ chupantassāti gāvīnaṃ aṅgajātaṃ attano aṅgajātena bahi chupantassa. Sesesūti gāvīnaṃ visāṇādīsu gahaṇe, piṭṭhiabhiruhaṇe ca. Yathāha ‘‘chabbaggiyā bhikkhū aciravatiyā nadiyā gāvīnaṃ tarantīnaṃ visāṇesupi gaṇhantī’’tiādi (mahāva. 252).
೩೦೯. ತತ್ಥ ಭೇಸಜ್ಜಕ್ಖನ್ಧಕೇ। ಸಾಮನ್ತಾ ದ್ವಙ್ಗುಲೇತಿ ವಚ್ಚಮಗ್ಗಪಸ್ಸಾವಮಗ್ಗಾನಂ ಸಾಮನ್ತಾ ದ್ವಙ್ಗುಲಮತ್ತೇ ಪದೇಸೇ। ಸತ್ಥಕಮ್ಮಂ ಕರೋನ್ತಸ್ಸ ಥುಲ್ಲಚ್ಚಯಮುದೀರಿತನ್ತಿ ಯೋಜನಾ। ಯಥಾಹ – ‘‘ನ, ಭಿಕ್ಖವೇ, ಸಮ್ಬಾಧಸ್ಸ ಸಾಮನ್ತಾ ದ್ವಙ್ಗುಲೇ ಸತ್ಥಕಮ್ಮಂ ವಾ ವತ್ಥಿಕಮ್ಮಂ ವಾ ಕಾರೇತಬ್ಬಂ, ಯೋ ಕಾರೇಯ್ಯ, ಆಪತ್ತಿ ಥುಲ್ಲಚ್ಚಯಸ್ಸಾ’’ತಿ (ಮಹಾವ॰ ೨೭೯)। ಏತ್ಥ ಚ ‘‘ಸಾಮನ್ತಾ ದ್ವಙ್ಗುಲೇ’’ತಿ ಇದಂ ಸತ್ಥಕಮ್ಮಂಯೇವ ಸನ್ಧಾಯ ವುತ್ತಂ। ವತ್ಥಿಕಮ್ಮಂ ಪನ ಸಮ್ಬಾಧೇಯೇವ ಪಟಿಕ್ಖಿತ್ತಂ।
309.Tattha bhesajjakkhandhake. Sāmantā dvaṅguleti vaccamaggapassāvamaggānaṃ sāmantā dvaṅgulamatte padese. Satthakammaṃ karontassa thullaccayamudīritanti yojanā. Yathāha – ‘‘na, bhikkhave, sambādhassa sāmantā dvaṅgule satthakammaṃ vā vatthikammaṃ vā kāretabbaṃ, yo kāreyya, āpatti thullaccayassā’’ti (mahāva. 279). Ettha ca ‘‘sāmantā dvaṅgule’’ti idaṃ satthakammaṃyeva sandhāya vuttaṃ. Vatthikammaṃ pana sambādheyeva paṭikkhittaṃ.
‘‘ನ, ಭಿಕ್ಖವೇ, ಅಞ್ಞತ್ರ ನಿಮನ್ತಿತೇನ ಅಞ್ಞಸ್ಸ ಭೋಜ್ಜಯಾಗು ಪರಿಭುಞ್ಜಿತಬ್ಬಾ, ಯೋ ಪರಿಭುಞ್ಜೇಯ್ಯ, ಯಥಾಧಮ್ಮೋ ಕಾರೇತಬ್ಬೋ’’ತಿ (ಮಹಾವ॰ ೨೮೩) ವುತ್ತತ್ತಾ ಆಹ ‘‘ಭೋಜ್ಜಯಾಗೂಸು ಪಾಚಿತ್ತೀ’’ತಿ। ಏತ್ಥ ಚ ಭೋಜ್ಜಯಾಗು ನಾಮ ಬಹಲಯಾಗು। ‘‘ಪಿಣ್ಡಂ ವಟ್ಟೇತ್ವಾ ಪಾತಬ್ಬಯಾಗೂ’’ತಿ ಗಣ್ಠಿಪದೇ ವುತ್ತಂ। ಪಾಚಿತ್ತೀತಿ ಪರಮ್ಪರಭೋಜನಪವಾರಣಸಿಕ್ಖಾಪದೇಹಿ ಪಾಚಿತ್ತಿ। ಸೇಸೇಸೂತಿ ಅನ್ತೋವುತ್ಥಅನ್ತೋಪಕ್ಕಸಯಂಪಕ್ಕಪರಿಭೋಗಾದೀಸು। ಯಥಾಹ ‘‘ನ, ಭಿಕ್ಖವೇ, ಅನ್ತೋವುತ್ಥಂ ಅನ್ತೋಪಕ್ಕಂ ಸಾಮಂಪಕ್ಕಂ ಪರಿಭುಞ್ಜಿತಬ್ಬಂ, ಯೋ ಪರಿಭುಞ್ಜೇಯ್ಯ, ಆಪತ್ತಿ ದುಕ್ಕಟಸ್ಸಾ’’ತಿಆದಿ (ಮಹಾವ॰ ೨೭೪)।
‘‘Na, bhikkhave, aññatra nimantitena aññassa bhojjayāgu paribhuñjitabbā, yo paribhuñjeyya, yathādhammo kāretabbo’’ti (mahāva. 283) vuttattā āha ‘‘bhojjayāgūsu pācittī’’ti. Ettha ca bhojjayāgu nāma bahalayāgu. ‘‘Piṇḍaṃ vaṭṭetvā pātabbayāgū’’ti gaṇṭhipade vuttaṃ. Pācittīti paramparabhojanapavāraṇasikkhāpadehi pācitti. Sesesūti antovutthaantopakkasayaṃpakkaparibhogādīsu. Yathāha ‘‘na, bhikkhave, antovutthaṃ antopakkaṃ sāmaṃpakkaṃ paribhuñjitabbaṃ, yo paribhuñjeyya, āpatti dukkaṭassā’’tiādi (mahāva. 274).
೩೧೦. ಚೀವರಸಂಯುತ್ತೇತಿ ಚೀವರಕ್ಖನ್ಧಕೇ।
310.Cīvarasaṃyutteti cīvarakkhandhake.
೩೧೩. ಚಮ್ಪೇಯ್ಯಕೇ ಚ ಕೋಸಮ್ಬೇತಿ ಚಮ್ಪೇಯ್ಯಕ್ಖನ್ಧಕೇ ಚೇವ ಕೋಸಮ್ಬಕಕ್ಖನ್ಧಕೇ ಚ। ‘‘ಕಮ್ಮಸ್ಮಿ’’ನ್ತಿಆದೀಸುಪಿ ಏಸೇವ ನಯೋ।
313.Campeyyakeca kosambeti campeyyakkhandhake ceva kosambakakkhandhake ca. ‘‘Kammasmi’’ntiādīsupi eseva nayo.
೩೧೭. ರೋಮನ್ಥೇತಿ ಭುತ್ತಸ್ಸ ಲಹುಂ ಪಾಕತ್ತಾಯ ಕುಚ್ಛಿಗತಂ ಮುಖಂ ಆರೋಪೇತ್ವಾ ಸಣ್ಹಕರಣವಸೇನ ಅನುಚಾಲನೇ।
317.Romantheti bhuttassa lahuṃ pākattāya kucchigataṃ mukhaṃ āropetvā saṇhakaraṇavasena anucālane.
೩೧೮. ಸೇನಾಸನಸ್ಮಿನ್ತಿ ಸೇನಾಸನಕ್ಖನ್ಧಕೇ। ಗರುನೋತಿ ಗರುಭಣ್ಡಸ್ಸ।
318.Senāsanasminti senāsanakkhandhake. Garunoti garubhaṇḍassa.
೩೨೦. ಸಙ್ಘಭೇದೇತಿ ಸಙ್ಘಭೇದಕಕ್ಖನ್ಧಕೇ।
320.Saṅghabhedeti saṅghabhedakakkhandhake.
೩೨೧. ಭೇದಾನುವತ್ತಕಾನನ್ತಿ ಸಙ್ಘಭೇದಾನುವತ್ತಕಾನಂ। ಗಣಭೋಗೇತಿ ಗಣಭೋಜನೇ।
321.Bhedānuvattakānanti saṅghabhedānuvattakānaṃ. Gaṇabhogeti gaṇabhojane.
೩೨೨. ಸಾತಿ ಏತ್ಥ ಸಬ್ಬವತ್ತೇಸು ಅನಾದರಿಯೇನ ಹೋತೀತಿ ಸೇಸೋ। ಸೇಸಂ ಉತ್ತಾನತ್ಥಮೇವ।
322.Sāti ettha sabbavattesu anādariyena hotīti seso. Sesaṃ uttānatthameva.
ಇತಿ ಉತ್ತರೇ ಲೀನತ್ಥಪಕಾಸನಿಯಾ
Iti uttare līnatthapakāsaniyā
ಖನ್ಧಕಪುಚ್ಛಾಕಥಾವಣ್ಣನಾ ನಿಟ್ಠಿತಾ।
Khandhakapucchākathāvaṇṇanā niṭṭhitā.
