| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. க²ந்த⁴ஸுத்தங்
6. Khandhasuttaṃ
48. ஸாவத்தி²னிதா³னங். ‘‘பஞ்ச, பி⁴க்க²வே, க²ந்தே⁴ தே³ஸெஸ்ஸாமி , பஞ்சுபாதா³னக்க²ந்தே⁴ ச. தங் ஸுணாத². கதமே ச, பி⁴க்க²வே, பஞ்சக்க²ந்தா⁴? யங் கிஞ்சி, பி⁴க்க²வே, ரூபங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா, அயங் வுச்சதி ரூபக்க²ந்தோ⁴. யா காசி வேத³னா…பே॰… யா காசி ஸஞ்ஞா… யே கேசி ஸங்கா²ரா அதீதானாக³தபச்சுப்பன்னா அஜ்ஜ²த்தங் வா ப³ஹித்³தா⁴ வா ஓளாரிகா வா ஸுகு²மா வா…பே॰… அயங் வுச்சதி ஸங்கா²ரக்க²ந்தோ⁴. யங் கிஞ்சி விஞ்ஞாணங் அதீதானாக³தபச்சுப்பன்னங் அஜ்ஜ²த்தங் வா ப³ஹித்³தா⁴ வா ஓளாரிகங் வா ஸுகு²மங் வா ஹீனங் வா பணீதங் வா யங் தூ³ரே ஸந்திகே வா, அயங் வுச்சதி விஞ்ஞாணக்க²ந்தோ⁴. இமே வுச்சந்தி, பி⁴க்க²வே, பஞ்சக்க²ந்தா⁴’’.
48. Sāvatthinidānaṃ. ‘‘Pañca, bhikkhave, khandhe desessāmi , pañcupādānakkhandhe ca. Taṃ suṇātha. Katame ca, bhikkhave, pañcakkhandhā? Yaṃ kiñci, bhikkhave, rūpaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, ayaṃ vuccati rūpakkhandho. Yā kāci vedanā…pe… yā kāci saññā… ye keci saṅkhārā atītānāgatapaccuppannā ajjhattaṃ vā bahiddhā vā oḷārikā vā sukhumā vā…pe… ayaṃ vuccati saṅkhārakkhandho. Yaṃ kiñci viññāṇaṃ atītānāgatapaccuppannaṃ ajjhattaṃ vā bahiddhā vā oḷārikaṃ vā sukhumaṃ vā hīnaṃ vā paṇītaṃ vā yaṃ dūre santike vā, ayaṃ vuccati viññāṇakkhandho. Ime vuccanti, bhikkhave, pañcakkhandhā’’.
‘‘கதமே ச, பி⁴க்க²வே, பஞ்சுபாதா³னக்க²ந்தா⁴? யங் கிஞ்சி, பி⁴க்க²வே, ரூபங் அதீதானாக³தபச்சுப்பன்னங்…பே॰… யங் தூ³ரே ஸந்திகே வா ஸாஸவங் உபாதா³னியங், அயங் வுச்சதி ரூபுபாதா³னக்க²ந்தோ⁴. யா காசி வேத³னா…பே॰… யா தூ³ரே ஸந்திகே வா ஸாஸவா உபாதா³னியா, அயங் வுச்சதி வேத³னுபாதா³னக்க²ந்தோ⁴. யா காசி ஸஞ்ஞா…பே॰… யா தூ³ரே ஸந்திகே வா ஸாஸவா உபாதா³னியா, அயங் வுச்சதி ஸஞ்ஞுபாதா³னக்க²ந்தோ⁴. யே கேசி ஸங்கா²ரா…பே॰… ஸாஸவா உபாதா³னியா, அயங் வுச்சதி ஸங்கா²ருபாதா³னக்க²ந்தோ⁴. யங் கிஞ்சி விஞ்ஞாணங் அதீதானாக³தபச்சுப்பன்னங்…பே॰… யங் தூ³ரே ஸந்திகே வா ஸாஸவங் உபாதா³னியங், அயங் வுச்சதி விஞ்ஞாணுபாதா³னக்க²ந்தோ⁴. இமே வுச்சந்தி, பி⁴க்க²வே, பஞ்சுபாதா³னக்க²ந்தா⁴’’தி. ச²ட்ட²ங்.
‘‘Katame ca, bhikkhave, pañcupādānakkhandhā? Yaṃ kiñci, bhikkhave, rūpaṃ atītānāgatapaccuppannaṃ…pe… yaṃ dūre santike vā sāsavaṃ upādāniyaṃ, ayaṃ vuccati rūpupādānakkhandho. Yā kāci vedanā…pe… yā dūre santike vā sāsavā upādāniyā, ayaṃ vuccati vedanupādānakkhandho. Yā kāci saññā…pe… yā dūre santike vā sāsavā upādāniyā, ayaṃ vuccati saññupādānakkhandho. Ye keci saṅkhārā…pe… sāsavā upādāniyā, ayaṃ vuccati saṅkhārupādānakkhandho. Yaṃ kiñci viññāṇaṃ atītānāgatapaccuppannaṃ…pe… yaṃ dūre santike vā sāsavaṃ upādāniyaṃ, ayaṃ vuccati viññāṇupādānakkhandho. Ime vuccanti, bhikkhave, pañcupādānakkhandhā’’ti. Chaṭṭhaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. க²ந்த⁴ஸுத்தவண்ணனா • 6. Khandhasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. க²ந்த⁴ஸுத்தவண்ணனா • 6. Khandhasuttavaṇṇanā
