| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. க²ந்த⁴ஸுத்தங்
3. Khandhasuttaṃ
1083. ‘‘சத்தாரிமானி, பி⁴க்க²வே, அரியஸச்சானி. கதமானி சத்தாரி? து³க்க²ங் அரியஸச்சங், து³க்க²ஸமுத³யங் அரியஸச்சங், து³க்க²னிரோத⁴ங் அரியஸச்சங் 1 து³க்க²னிரோத⁴கா³மினீ படிபதா³ அரியஸச்சங்.
1083. ‘‘Cattārimāni, bhikkhave, ariyasaccāni. Katamāni cattāri? Dukkhaṃ ariyasaccaṃ, dukkhasamudayaṃ ariyasaccaṃ, dukkhanirodhaṃ ariyasaccaṃ 2 dukkhanirodhagāminī paṭipadā ariyasaccaṃ.
‘‘கதமஞ்ச , பி⁴க்க²வே, து³க்க²ங் அரியஸச்சங்? ‘பஞ்சுபாதா³னக்க²ந்தா⁴’ திஸ்ஸ வசனீயங், ஸெய்யதி²த³ங் 3 – ரூபுபாதா³னக்க²ந்தோ⁴…பே॰… விஞ்ஞாணுபாதா³னக்க²ந்தோ⁴. இத³ங் வுச்சதி, பி⁴க்க²வே, து³க்க²ங் அரியஸச்சங்.
‘‘Katamañca , bhikkhave, dukkhaṃ ariyasaccaṃ? ‘Pañcupādānakkhandhā’ tissa vacanīyaṃ, seyyathidaṃ 4 – rūpupādānakkhandho…pe… viññāṇupādānakkhandho. Idaṃ vuccati, bhikkhave, dukkhaṃ ariyasaccaṃ.
‘‘கதமஞ்ச, பி⁴க்க²வே, து³க்க²ஸமுத³யங் அரியஸச்சங்? யாயங் தண்ஹா போனொப்³ப⁴விகா நந்தி³ராக³ஸஹக³தா தத்ரதத்ராபி⁴னந்தி³னீ, ஸெய்யதி²த³ங் – காமதண்ஹா, ப⁴வதண்ஹா, விப⁴வதண்ஹா. இத³ங் வுச்சதி, பி⁴க்க²வே, து³க்க²ஸமுத³யங் அரியஸச்சங்.
‘‘Katamañca, bhikkhave, dukkhasamudayaṃ ariyasaccaṃ? Yāyaṃ taṇhā ponobbhavikā nandirāgasahagatā tatratatrābhinandinī, seyyathidaṃ – kāmataṇhā, bhavataṇhā, vibhavataṇhā. Idaṃ vuccati, bhikkhave, dukkhasamudayaṃ ariyasaccaṃ.
‘‘கதமஞ்ச , பி⁴க்க²வே, து³க்க²னிரோத⁴ங் அரியஸச்சங்? யோ தஸ்ஸாயேவ தண்ஹாய அஸேஸவிராக³னிரோதோ⁴ சாகோ³ படினிஸ்ஸக்³கோ³ முத்தி அனாலயோ – இத³ங் வுச்சதி, பி⁴க்க²வே, து³க்க²னிரோத⁴ங் அரியஸச்சங்.
‘‘Katamañca , bhikkhave, dukkhanirodhaṃ ariyasaccaṃ? Yo tassāyeva taṇhāya asesavirāganirodho cāgo paṭinissaggo mutti anālayo – idaṃ vuccati, bhikkhave, dukkhanirodhaṃ ariyasaccaṃ.
‘‘கதமஞ்ச, பி⁴க்க²வே, து³க்க²னிரோத⁴கா³மினீ படிபதா³ அரியஸச்சங்? அயமேவ அரியோ அட்ட²ங்கி³கோ மக்³கோ³, ஸெய்யதி²த³ங் – ஸம்மாதி³ட்டி²…பே॰… ஸம்மாஸமாதி⁴ – இத³ங் வுச்சதி, பி⁴க்க²வே, து³க்க²னிரோத⁴கா³மினீ படிபதா³ அரியஸச்சங். இமானி கோ², பி⁴க்க²வே, சத்தாரி அரியஸச்சானி.
‘‘Katamañca, bhikkhave, dukkhanirodhagāminī paṭipadā ariyasaccaṃ? Ayameva ariyo aṭṭhaṅgiko maggo, seyyathidaṃ – sammādiṭṭhi…pe… sammāsamādhi – idaṃ vuccati, bhikkhave, dukkhanirodhagāminī paṭipadā ariyasaccaṃ. Imāni kho, bhikkhave, cattāri ariyasaccāni.
‘‘தஸ்மாதிஹ, பி⁴க்க²வே, ‘இத³ங் து³க்க²’ந்தி யோகோ³ கரணீயோ…பே॰… ‘அயங் து³க்க²னிரோத⁴கா³மினீ படிபதா³’தி யோகோ³ கரணீயோ’’தி. ததியங்.
‘‘Tasmātiha, bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Tatiyaṃ.
Footnotes:
