| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১০. খন্ধসুত্তং
10. Khandhasuttaṃ
৩১১. সাৰত্থিনিদানং। ‘‘রূপং, ভিক্খৰে, অনিচ্চং ৰিপরিণামি অঞ্ঞথাভাৰি; ৰেদনা অনিচ্চা ৰিপরিণামী অঞ্ঞথাভাৰী; সঞ্ঞা… সঙ্খারা অনিচ্চা ৰিপরিণামিনো অঞ্ঞথাভাৰিনো; ৰিঞ্ঞাণং অনিচ্চং ৰিপরিণামি অঞ্ঞথাভাৰি । যো, ভিক্খৰে, ইমে ধম্মে এৰং সদ্দহতি অধিমুচ্চতি, অযং ৰুচ্চতি সদ্ধানুসারী, ওক্কন্তো সম্মত্তনিযামং , সপ্পুরিসভূমিং ওক্কন্তো, ৰীতিৰত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৰা নিরযং ৰা তিরচ্ছানযোনিং ৰা পেত্তিৰিসযং ৰা উপপজ্জেয্য; অভব্বো চ তাৰ কালং কাতুং যাৰ ন সোতাপত্তিফলং সচ্ছিকরোতি’’।
311. Sāvatthinidānaṃ. ‘‘Rūpaṃ, bhikkhave, aniccaṃ vipariṇāmi aññathābhāvi; vedanā aniccā vipariṇāmī aññathābhāvī; saññā… saṅkhārā aniccā vipariṇāmino aññathābhāvino; viññāṇaṃ aniccaṃ vipariṇāmi aññathābhāvi . Yo, bhikkhave, ime dhamme evaṃ saddahati adhimuccati, ayaṃ vuccati saddhānusārī, okkanto sammattaniyāmaṃ , sappurisabhūmiṃ okkanto, vītivatto puthujjanabhūmiṃ; abhabbo taṃ kammaṃ kātuṃ, yaṃ kammaṃ katvā nirayaṃ vā tiracchānayoniṃ vā pettivisayaṃ vā upapajjeyya; abhabbo ca tāva kālaṃ kātuṃ yāva na sotāpattiphalaṃ sacchikaroti’’.
‘‘যস্স খো, ভিক্খৰে, ইমে ধম্মা এৰং পঞ্ঞায মত্তসো নিজ্ঝানং খমন্তি, অযং ৰুচ্চতি – ‘ধম্মানুসারী, ওক্কন্তো সম্মত্তনিযামং, সপ্পুরিসভূমিং ওক্কন্তো, ৰীতিৰত্তো পুথুজ্জনভূমিং; অভব্বো তং কম্মং কাতুং, যং কম্মং কত্ৰা নিরযং ৰা তিরচ্ছানযোনিং ৰা পেত্তিৰিসযং ৰা উপপজ্জেয্য; অভব্বো চ তাৰ কালং কাতুং যাৰ ন সোতাপত্তিফলং সচ্ছিকরোতি’। যো, ভিক্খৰে, ইমে ধম্মে এৰং পজানাতি এৰং পস্সতি, অযং ৰুচ্চতি – ‘সোতাপন্নো অৰিনিপাতধম্মো নিযতো সম্বোধিপরাযনো’’’তি। দসমং।
‘‘Yassa kho, bhikkhave, ime dhammā evaṃ paññāya mattaso nijjhānaṃ khamanti, ayaṃ vuccati – ‘dhammānusārī, okkanto sammattaniyāmaṃ, sappurisabhūmiṃ okkanto, vītivatto puthujjanabhūmiṃ; abhabbo taṃ kammaṃ kātuṃ, yaṃ kammaṃ katvā nirayaṃ vā tiracchānayoniṃ vā pettivisayaṃ vā upapajjeyya; abhabbo ca tāva kālaṃ kātuṃ yāva na sotāpattiphalaṃ sacchikaroti’. Yo, bhikkhave, ime dhamme evaṃ pajānāti evaṃ passati, ayaṃ vuccati – ‘sotāpanno avinipātadhammo niyato sambodhiparāyano’’’ti. Dasamaṃ.
তস্সুদ্দানং –
Tassuddānaṃ –
চক্খু রূপঞ্চ ৰিঞ্ঞাণং, ফস্সো চ ৰেদনায চ।
Cakkhu rūpañca viññāṇaṃ, phasso ca vedanāya ca;
সঞ্ঞা চ চেতনা তণ্হা, ধাতু খন্ধেন তে দসাতি॥
Saññā ca cetanā taṇhā, dhātu khandhena te dasāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১-১০. চক্খুসুত্তাদিৰণ্ণনা • 1-10. Cakkhusuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১-১০. চক্খুসুত্তাদিৰণ্ণনা • 1-10. Cakkhusuttādivaṇṇanā
