| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. ඛන්‌ධසුත්‌තං
10. Khandhasuttaṃ
321. සාවත්‌ථිනිදානං . ‘‘යො ඛො, භික්‌ඛවෙ, රූපස්‌ස උප්‌පාදො ඨිති අභිනිබ්‌බත්‌ති පාතුභාවො, දුක්‌ඛස්‌සෙසො උප්‌පාදො, රොගානං ඨිති, ජරාමරණස්‌ස පාතුභාවො. යො වෙදනාය… යො සඤ්‌ඤාය… යො සඞ්‌ඛාරානං… යො විඤ්‌ඤාණස්‌ස උප්‌පාදො ඨිති අභිනිබ්‌බත්‌ති පාතුභාවො, දුක්‌ඛස්‌සෙසො උප්‌පාදො, රොගානං ඨිති, ජරාමරණස්‌ස පාතුභාවො. යො ච ඛො, භික්‌ඛවෙ, රූපස්‌ස නිරොධො වූපසමො අත්‌ථඞ්‌ගමො, දුක්‌ඛස්‌සෙසො නිරොධො, රොගානං වූපසමො, ජරාමරණස්‌ස අත්‌ථඞ්‌ගමො. යො වෙදනාය… යො සඤ්‌ඤාය… යො සඞ්‌ඛාරානං… යො විඤ්‌ඤාණස්‌ස නිරොධො වූපසමො අත්‌ථඞ්‌ගමො, දුක්‌ඛස්‌සෙසො නිරොධො, රොගානං වූපසමො, ජරාමරණස්‌ස අත්‌ථඞ්‌ගමො’’ති. දසමං.
321. Sāvatthinidānaṃ . ‘‘Yo kho, bhikkhave, rūpassa uppādo ṭhiti abhinibbatti pātubhāvo, dukkhasseso uppādo, rogānaṃ ṭhiti, jarāmaraṇassa pātubhāvo. Yo vedanāya… yo saññāya… yo saṅkhārānaṃ… yo viññāṇassa uppādo ṭhiti abhinibbatti pātubhāvo, dukkhasseso uppādo, rogānaṃ ṭhiti, jarāmaraṇassa pātubhāvo. Yo ca kho, bhikkhave, rūpassa nirodho vūpasamo atthaṅgamo, dukkhasseso nirodho, rogānaṃ vūpasamo, jarāmaraṇassa atthaṅgamo. Yo vedanāya… yo saññāya… yo saṅkhārānaṃ… yo viññāṇassa nirodho vūpasamo atthaṅgamo, dukkhasseso nirodho, rogānaṃ vūpasamo, jarāmaraṇassa atthaṅgamo’’ti. Dasamaṃ.
උප්‌පාදසංයුත්‌තං සමත්‌තං.
Uppādasaṃyuttaṃ samattaṃ.
තස්‌සුද්‌දානං –
Tassuddānaṃ –
චක්‌ඛු රූපඤ්‌ච විඤ්‌ඤාණං, ඵස්‌සො ච වෙදනාය ච;
Cakkhu rūpañca viññāṇaṃ, phasso ca vedanāya ca;
සඤ්‌ඤා ච චෙතනා තණ්‌හා, ධාතු ඛන්‌ධෙන තෙ දසාති.
Saññā ca cetanā taṇhā, dhātu khandhena te dasāti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 5. උප්‌පාදසංයුත්‌තවණ්‌ණනා • 5. Uppādasaṃyuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 5. උප්‌පාදසංයුත්‌තවණ්‌ණනා • 5. Uppādasaṃyuttavaṇṇanā
