Library / Tipiṭaka / ཏིཔིཊཀ • Tipiṭaka / ཝིབྷངྒ-ཨནུཊཱིཀཱ • Vibhaṅga-anuṭīkā

    ༎ ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ༎

    Namo tassa bhagavato arahato sammāsambuddhassa

    ཨབྷིདྷམྨཔིཊཀེ

    Abhidhammapiṭake

    ཝིབྷངྒ-ཨནུཊཱིཀཱ

    Vibhaṅga-anuṭīkā

    ༡. ཁནྡྷཝིབྷངྒོ

    1. Khandhavibhaṅgo

    ༡. སུཏྟནྟབྷཱཛནཱིཡཝཎྞནཱ

    1. Suttantabhājanīyavaṇṇanā

    ཙཏུསཙྩནྟོགདྷཏྟཱ ཙཏུནྣཾ ཨརིཡསཙྩཱནཾ གཱཐཱཡཾ ‘‘ཙཏུསཙྩདསོ’’ཏི ནིཔྤདེསཏོ སཙྩཱནི གཧིཏཱནཱིཏི ནིཔྤདེསཏོ ཨེཝ ཏདཏྠཾ ཝིབྷཱཝེནྟོ ‘‘ཙཏྟཱརི སཙྩཱནཱི’’ཏིཨཱདིམཱཧ། ཏཏྠ སམཱཧཊཱནཱིཏི སམཱནཱིཏཱནི, ཙིཏྟེན ཨེཀཏོ གཧིཏཱནཱིཏི ཨདྷིཔྤཱཡོ། ‘‘སམཱཧཊཱནཱི’’ཏི ཙ ཨེཏེན སམཱཧཱརེ ཨཡཾ སམཱསོཏི དསྶེཏི། ཏེནེཝསྶ ཀཏེཀཏྟསྶ ཙཏུསཙྩནྟི ནཔུཾསཀནིདྡེསོ ‘‘ཏིཝཊྚ’’ནྟིཨཱདཱིསུ ཝིཡ། པཏྟཱདིཔཀྑེཔེན ཧིསྶ ན ཨིཏྠིལིངྒཏཱ ཡཐཱ པཉྩཔཏྟཾ, ཙཏུཡུགཾ, ཏིབྷུཝནནྟི, ཏཾ ཙཏུསཙྩཾ པསྶི ཨདཀྑི, པརིཉྙཱཔཧཱནསཙྪིཀིརིཡཱབྷཱཝནཱབྷིསམཡཝསེན པཊིཝིཛ྄ཛྷཱིཏི ཨཏྠོ། ཀསྨཱ པནེཏྠ ཨནནྟཱཔརིམཱཎེསུ ཨནཉྙསཱདྷཱརཎེསུ མཧཱཀརུཎཱསབྦཉྙུཏཉྙཱཎཱདཱིསུ བུདྡྷགུཎེསུ སཾཝིཛྫམཱནེསུ སཱཝཀེཧི, པཙྩེཀབུདྡྷེཧི ཙ སཱདྷཱརཎེན ཙཏུསཙྩདསྶནེན བྷགཝནྟཾ ཐོམེཏཱིཏི ཙོདནཾ མནསི ཀཏྭཱ ཨཱཧ ‘‘སཏིཔི སཱཝཀཱན’’ནྟིཨཱདི། ཏཏྠ ‘‘ཨནཉྙཔུབྦཀཏྟཱ’’ཏི ཨིམིནཱ སཱཝཀེཧི, ‘‘ཏཏྠ ཙཱ’’ཏིཨཱདིནཱ པཙྩེཀབུདྡྷེཧི ཙ བྷགཝཏོ ཙཏུསཙྩདསྶནསྶ ཨསཱདྷཱརཎཏཾ, ནིརཏིསཡཏཉྩ དསྶེཏི། པརསནྟཱནེསུ པསཱརིཏབྷཱཝེན སུཔཱཀཊཏྟཱཏི དེསནཱནུབྷཱཝེན ཝེནེཡྻསནྟཱནེསུ ཙཏུསཙྩདསྶནསྶ ཝིཏྠཱརིཏབྷཱཝེན ཡཱཝ དེཝམནུསྶེསུ སུཔྤཀཱསིཏཏྟཱ། ནཱཐསདྡཾ ལོཀེ ཡཱཙནུཔཏཱཔིསྶརིཡཱསཱིསཱསུ པཋནྟཱིཏི ཏམཏྠཾ དསྶེཏུཾ ‘‘ནཱཐཏཱིཏི ནཱཐོ’’ཏིཨཱདི ཝུཏྟཾ། ཏཏྠ ཡསྨཱ བྷགཝཱ ཙཏུསཙྩདསྶནབྷཱཝེནེཝ ཨཏྟནོ ཧིཏསུཁཱསཱིསཱཡ ཀིལེསབྱསནུཔཏཱཔནསྶ, ཧིཏཔཊིཔཏྟིཡཱཙནསྶ ཙ མཏྠཀཾ པཏྟོ, ཏསྨཱ ཏཾ ཏེནེཝ པཀཱསིཏནྟི ཨཏྠུདྡྷཱརཾ ཨནཱམསིཏྭཱ པདུདྡྷཱརཝསེན ནཱཐསདྡསྶ ཨཏྠཾ དསྶེནྟོ ‘‘ཝེནེཡྻཱནཾ ཧིཏསུཁཾ ཨཱསཱིསཏཱི’’ཏིཨཱདིམཱཧ། ‘‘ཙཏུསཙྩདསོ’’ཏི ཝཱ ཨིམིནཱ ཨནཉྙསཱདྷཱརཎོ བྷགཝཏོ ཉཱཎཱནུབྷཱཝོ པཀཱསིཏོཏི ‘‘ནཱཐོ’’ཏི ཨིམིནཱ ཨནཉྙསཱདྷཱརཎཾ ཀརུཎཱནུབྷཱཝཾ ཝིབྷཱཝེཏུཾ ‘‘ཝེནེཡྻཱན’’ནྟིཨཱདི ཝུཏྟཾ། པརམེན ཙིཏྟིསྶརིཡེན སམནྣཱགཏོ བྷགཝཱ ནཱཐོཏི ཝུཙྩཏཱིཏི ཡོཛནཱ། ཏཐཱ པརམེན ཙིཏྟིསྶརིཡེན སམནྣཱགཏོ སབྦསཏྟེ གུཎེཧི ཨཱིསཏཱིཏི ཡོཛེཏབྦཾ། ཙིཏྟིསྶརིཡེནཱཏི ཨརིཡིདྡྷིཨཱདིནཱ ཙིཏྟེ ཝསཱིབྷཱཝེན། གུཎེཧི ཨཱིསཏཱིཏི པརམུཀྐཾསགཏེཧི ཨཏྟནོ སཱིལཱདིགུཎེཧི དྷམྨེན ཨིསྶརིཡཾ ཝཏྟེཏཱིཏི ཨཏྠོ། ཨེཝཾབྷཱུཏོ ཡསྨཱ སབྦཱབྷིབྷཱུ ནཱམ ཧོཏི, ཏེན ཝུཏྟཾ ‘‘ཨབྷིབྷཝཏཱི’’ཏི། ཏཐཱ ཙཱཧ ‘‘སདེཝཀེ, བྷིཀྑཝེ, ལོཀེ…པེ॰… ཨབྷིབྷཱུ ཨནབྷིབྷཱུཏོ, ཏསྨཱ ‘ཏཐཱགཏོ’ཏི ཝུཙྩཏཱི’’ཏི (ཨ॰ ནི॰ ༤.༢༣; དཱི॰ ནི॰ ༡.༡༨༨)། དུཝིདྷེནཱཔི ཨིསྶརིཡཏྠཾ ནཱཐསདྡཾ དསྶེཏི།

    Catusaccantogadhattā catunnaṃ ariyasaccānaṃ gāthāyaṃ ‘‘catusaccadaso’’ti nippadesato saccāni gahitānīti nippadesato eva tadatthaṃ vibhāvento ‘‘cattāri saccānī’’tiādimāha. Tattha samāhaṭānīti samānītāni, cittena ekato gahitānīti adhippāyo. ‘‘Samāhaṭānī’’ti ca etena samāhāre ayaṃ samāsoti dasseti. Tenevassa katekattassa catusaccanti napuṃsakaniddeso ‘‘tivaṭṭa’’ntiādīsu viya. Pattādipakkhepena hissa na itthiliṅgatā yathā pañcapattaṃ, catuyugaṃ, tibhuvananti, taṃ catusaccaṃ passi adakkhi, pariññāpahānasacchikiriyābhāvanābhisamayavasena paṭivijjhīti attho. Kasmā panettha anantāparimāṇesu anaññasādhāraṇesu mahākaruṇāsabbaññutaññāṇādīsu buddhaguṇesu saṃvijjamānesu sāvakehi, paccekabuddhehi ca sādhāraṇena catusaccadassanena bhagavantaṃ thometīti codanaṃ manasi katvā āha ‘‘satipi sāvakāna’’ntiādi. Tattha ‘‘anaññapubbakattā’’ti iminā sāvakehi, ‘‘tattha cā’’tiādinā paccekabuddhehi ca bhagavato catusaccadassanassa asādhāraṇataṃ, niratisayatañca dasseti. Parasantānesu pasāritabhāvena supākaṭattāti desanānubhāvena veneyyasantānesu catusaccadassanassa vitthāritabhāvena yāva devamanussesu suppakāsitattā. Nāthasaddaṃ loke yācanupatāpissariyāsīsāsu paṭhantīti tamatthaṃ dassetuṃ ‘‘nāthatīti nātho’’tiādi vuttaṃ. Tattha yasmā bhagavā catusaccadassanabhāveneva attano hitasukhāsīsāya kilesabyasanupatāpanassa, hitapaṭipattiyācanassa ca matthakaṃ patto, tasmā taṃ teneva pakāsitanti atthuddhāraṃ anāmasitvā paduddhāravasena nāthasaddassa atthaṃ dassento ‘‘veneyyānaṃ hitasukhaṃ āsīsatī’’tiādimāha. ‘‘Catusaccadaso’’ti vā iminā anaññasādhāraṇo bhagavato ñāṇānubhāvo pakāsitoti ‘‘nātho’’ti iminā anaññasādhāraṇaṃ karuṇānubhāvaṃ vibhāvetuṃ ‘‘veneyyāna’’ntiādi vuttaṃ. Paramena cittissariyena samannāgato bhagavā nāthoti vuccatīti yojanā. Tathā paramena cittissariyena samannāgato sabbasatte guṇehi īsatīti yojetabbaṃ. Cittissariyenāti ariyiddhiādinā citte vasībhāvena. Guṇehi īsatīti paramukkaṃsagatehi attano sīlādiguṇehi dhammena issariyaṃ vattetīti attho. Evaṃbhūto yasmā sabbābhibhū nāma hoti, tena vuttaṃ ‘‘abhibhavatī’’ti. Tathā cāha ‘‘sadevake, bhikkhave, loke…pe… abhibhū anabhibhūto, tasmā ‘tathāgato’ti vuccatī’’ti (a. ni. 4.23; dī. ni. 1.188). Duvidhenāpi issariyatthaṃ nāthasaddaṃ dasseti.

    ཨཊྛཱརསཔྤབྷེདཱཡ དེསནཱཡ ཐོམནམེཝཱཏི ཡོཛནཱ། སམཱནགཎནགུཎེཧཱིཏི སམཱནགཎནེཧི གུཎེཧི ཀརཎབྷཱུཏེཧི། ཡཐཱཝུཏྟེན ནིརཏིསཡེན ཙཏུསཙྩདསྶནེནཱཏི སབྦཉྙུཏཉྙཱཎསྶ, དསབལེསུ ཝསཱིབྷཱཝསྶ ཙ པདཊྛཱནབྷཱུཏེན། སཙྩཱབྷིསམྦོདྷེན ཧི ཨབྷིནཱིཧཱརཱནུརཱུཔཾ རཱུཔཱརཱུཔདྷམྨེསུ ཚཏྟིཾསཀོཊིསཏསཧསྶམུཁཔྤཝཏྟེན སཱཏིསཡཾ སནྟཏིསམཱུཧཀིཙྩཱརམྨཎགྷནཔྤབྷེདེན མཧཱཝཛིརཉཱཎསངྑཱཏེན བུདྡྷཱཝེཎིཀེན སམྨསནེན སམྦྷཱུཏེན བྷགཝཱ སམྨཱསམྦོདྷིཡཾ པཏིཊྛིཏོཝ ཀུསལཱདིབྷེདེན, ཕསྶཱདིབྷེདེན ཙ དྷམྨེ ཝིབྷཛནྟོ ཙིཏྟུཔྤཱདཀཎྜཱདིཝསེན དྷམྨསངྒཧཾ ཙཏུདྷཱ དེསེཏུཾ སམཏྠོ ཨཧོསི། ཏཐཱ ཨཏཱིཏཾསེ ཨཔྤཊིཧཏཉཱཎཏཱདིབུདྡྷདྷམྨསམནྣཱགཏོ བྷགཝཱ ཨཏཱིཏཱདིབྷེདཏོ ཁནྡྷཱདིཀེ ཝིབྷཛིཏྭཱ དེསེཏུཾ སམཏྠོ ཨཧོསི། ཏེན ཝུཏྟཾ ‘‘ཡཐཱཝུཏྟེན…པེ॰… ཝིབྷངྒ’’ནྟི། ‘‘སབྦཉྙུབྷཱསིཏཏྟཱ’’ཏི ཝཏྭཱ པུན ‘‘ཨསབྦཉྙུནཱ དེསེཏུཾ ཨསཀྐུཎེཡྻཏཾ དསྶེནྟོ’’ཏི ཨེཏེན དྷམྨསངྒཎཱིཝིབྷངྒཱནཾ ཨནྭཡཏོ བྱཏིརེཀཏོ ཙ སམྨཱསམྦུདྡྷཔྤཝེདིཏཏཉྙེཝ ཝིབྷཱཝེཏི། སམྨཱསམྦུདྡྷཏཱདིགུཎེཏི བུདྡྷརཏནསྶ སམྨཱསམྦུདྡྷཏཱ, དྷམྨསངྒྷརཏནཱནཾ སྭཱཀྑཱཏཏཱ, སུཔྤཊིཔནྣཏཱཏི ཨེཝམཱདིགུཎེ པཀཱསེཏི།

    Aṭṭhārasappabhedāya desanāya thomanamevāti yojanā. Samānagaṇanaguṇehīti samānagaṇanehi guṇehi karaṇabhūtehi. Yathāvuttena niratisayena catusaccadassanenāti sabbaññutaññāṇassa, dasabalesu vasībhāvassa ca padaṭṭhānabhūtena. Saccābhisambodhena hi abhinīhārānurūpaṃ rūpārūpadhammesu chattiṃsakoṭisatasahassamukhappavattena sātisayaṃ santatisamūhakiccārammaṇaghanappabhedena mahāvajirañāṇasaṅkhātena buddhāveṇikena sammasanena sambhūtena bhagavā sammāsambodhiyaṃ patiṭṭhitova kusalādibhedena, phassādibhedena ca dhamme vibhajanto cittuppādakaṇḍādivasena dhammasaṅgahaṃ catudhā desetuṃ samattho ahosi. Tathā atītaṃse appaṭihatañāṇatādibuddhadhammasamannāgato bhagavā atītādibhedato khandhādike vibhajitvā desetuṃ samattho ahosi. Tena vuttaṃ ‘‘yathāvuttena…pe… vibhaṅga’’nti. ‘‘Sabbaññubhāsitattā’’ti vatvā puna ‘‘asabbaññunā desetuṃ asakkuṇeyyataṃ dassento’’ti etena dhammasaṅgaṇīvibhaṅgānaṃ anvayato byatirekato ca sammāsambuddhappaveditataññeva vibhāveti. Sammāsambuddhatādiguṇeti buddharatanassa sammāsambuddhatā, dhammasaṅgharatanānaṃ svākkhātatā, suppaṭipannatāti evamādiguṇe pakāseti.

    ནནུ ཙ ‘‘ཙཏུསཙྩདསོ’’ཏིཨཱདིནཱ བྷགཝཏོཝ གུཎཱ ཝིབྷཱཝིཏཱཏི? སཙྩཾ, ཏེནེཝ དྷམྨསངྒྷཱནམྤི གུཎཱ ཝིབྷཱཝིཏཱ ཧོནྟི ཏཔྤབྷཝསྶ ཨནཉྙཐཱབྷཱཝཏོ, ཏདཔདེསེན ཝཱ དྷམྨོ, ཏདཱདྷཱརོ ཙ སངྒྷོ ཝུཏྟོཝ ཧོཏཱིཏི ཝུཏྟཾ ‘‘བུདྡྷཱདཱིནཾ…པེ॰… ཝིབྷཱཝེཏཱི’’ཏི།

    Nanu ca ‘‘catusaccadaso’’tiādinā bhagavatova guṇā vibhāvitāti? Saccaṃ, teneva dhammasaṅghānampi guṇā vibhāvitā honti tappabhavassa anaññathābhāvato, tadapadesena vā dhammo, tadādhāro ca saṅgho vuttova hotīti vuttaṃ ‘‘buddhādīnaṃ…pe… vibhāvetī’’ti.

    ཨཏཱིཏཾསེཏི ཨཏཱིཏཀོཊྛཱསེ, པུབྦནྟེཏི ཨཏྠོ། ཨཔྤཊིཧཏནྟི ནཔྤཊིཧཏཾ, ཉཱཎསྶ པཊིགྷཱཏོ ནཱམ ཨཉྙཱཎཾ, སབྦམྤི ཝཱ ཀིལེསཛཱཏཾ། ཏཾ ཡསྨཱ བྷགཝཏོ སཧ ཝཱསནཱཡ པཧཱིནཾ, ཏསྨཱསྶ ཨཏཱིཏཾསེ སབྦཏྠཀམེཝ ཉེཡྻཱཝརཎཔྤཧཱནེན ཉཱཎཾ ཨཔྤཊིཧཏནྟི ཝུཙྩཏི། ཨེས ནཡོ སེསེསུཔི། ཀིཾ པནེཏཱནི པཱཊིཡེཀྐཾ ཝིསུཾ ཉཱཎཱནི, ཨུདཱཧུ ཨཏཱིཏཱདཱིསུ པཝཏྟནཀཉཱཎཱནི ཨེཝ? ཏཱིསུ ཀཱལེསུ ཨཔྤཊིཧཏཉཱཎཱནི ནཱམ པཱཊིཡེཀྐཾ བྷགཝཏོ ཏཱིཎི ཉཱཎཱནེཝཱཏི ཝདནྟི། ཨེཀཾཡེཝ ཧུཏྭཱ ཏཱིསུ ཀཱལེསུ ཨཔྤཊིཧཏཉཱཎཾ ནཱམ སབྦཉྙུཏཉྙཱཎམེཝ། སབྦཾ ཀཱཡཀམྨནྟི ཡཾ ཀིཉྩི བྷགཝཏཱ ཀཏྟབྦཾ ཀཱཡཀམྨཾ། ཉཱཎཔུབྦངྒམནྟི ཉཱཎཔུརེཙཱརིཀཾ། ཉཱཎཱནུཔརིཝཏྟནྟི ཉཱཎསྶ ཨནུཔརིཝཏྟནཀཾ, སབྦཾ ཀཱཡཔཡོགཾ པཝཏྟེནྟོ བྷགཝཱ ཉཱཎེན པརིཙྪིནྡིཏྭཱ ཉཱཎསཧིཏམེཝ པཝཏྟེཏཱིཏི ཨཏྠོ། སེསཔདདྭཡེཔི ཨེསེཝ ནཡོ། ཚནྡསྶཱཏི ཀཏྟུཀམྱཏཱཡ, མཧཱཀརུཎཱསམཱཡོགཏོ སཏྟཱནཾ ཨེཀནྟཧིཏེསིཏཱཡ ཧིཏཀིརིཡཱཚནྡསྶཱཏི ཨཏྠོ། དྷམྨདེསནཱཡཱཏི དྷམྨཀཐཱཡ། ཨཔརིཀྑཡཱཔརིམེཡྻཔཊིབྷཱནཏཱཡ ཧི བྷགཝཏོ ཀརཎསམྤཏྟིཡཱ ཙ དྷམྨདེསནཱ ནིརནྟརཾ པཝཏྟིཡམཱནཱཔི ན ཀདཱཙིཔི པརིཀྑཡཾ གཙྪཏི, ཨཉྙདཏྠུ ཨུཔརཱུཔརི ཝཌྜྷཏེཝ། ཝཱིརིཡསྶཱཏི པརཧིཏཔཊིཔཏྟིཡཾ ཨུསྶཱཧསྶ། ཝིམུཏྟིཡཱཏི ཕལཝིམུཏྟིཡཱ། ཨེཏྠ ཙ སམཱདྷིཨཱདཱིནཾ ཨཧཱནི ཏཾཏཾཔཊིཔཀྑསྶ སཝཱསནཔཧཱིནཏྟཱ ཨནཉྙསཱདྷཱརཎཏཱཡ ཝེདིཏབྦཱ། ཚནྡཱདཱིནཾ པན མཧཱཀརུཎཱསམཱཡོགཏོཔི། སེསཾ སུཝིཉྙེཡྻམེཝ།

    Atītaṃseti atītakoṭṭhāse, pubbanteti attho. Appaṭihatanti nappaṭihataṃ, ñāṇassa paṭighāto nāma aññāṇaṃ, sabbampi vā kilesajātaṃ. Taṃ yasmā bhagavato saha vāsanāya pahīnaṃ, tasmāssa atītaṃse sabbatthakameva ñeyyāvaraṇappahānena ñāṇaṃ appaṭihatanti vuccati. Esa nayo sesesupi. Kiṃ panetāni pāṭiyekkaṃ visuṃ ñāṇāni, udāhu atītādīsu pavattanakañāṇāni eva? Tīsu kālesu appaṭihatañāṇāni nāma pāṭiyekkaṃ bhagavato tīṇi ñāṇānevāti vadanti. Ekaṃyeva hutvā tīsu kālesu appaṭihatañāṇaṃ nāma sabbaññutaññāṇameva. Sabbaṃ kāyakammanti yaṃ kiñci bhagavatā kattabbaṃ kāyakammaṃ. Ñāṇapubbaṅgamanti ñāṇapurecārikaṃ. Ñāṇānuparivattanti ñāṇassa anuparivattanakaṃ, sabbaṃ kāyapayogaṃ pavattento bhagavā ñāṇena paricchinditvā ñāṇasahitameva pavattetīti attho. Sesapadadvayepi eseva nayo. Chandassāti kattukamyatāya, mahākaruṇāsamāyogato sattānaṃ ekantahitesitāya hitakiriyāchandassāti attho. Dhammadesanāyāti dhammakathāya. Aparikkhayāparimeyyapaṭibhānatāya hi bhagavato karaṇasampattiyā ca dhammadesanā nirantaraṃ pavattiyamānāpi na kadācipi parikkhayaṃ gacchati, aññadatthu uparūpari vaḍḍhateva. Vīriyassāti parahitapaṭipattiyaṃ ussāhassa. Vimuttiyāti phalavimuttiyā. Ettha ca samādhiādīnaṃ ahāni taṃtaṃpaṭipakkhassa savāsanapahīnattā anaññasādhāraṇatāya veditabbā. Chandādīnaṃ pana mahākaruṇāsamāyogatopi. Sesaṃ suviññeyyameva.

    ༡. ཏེ ཨེཝ དྷམྨེཏི ཏེ ཨེཝ ཀུསལཱདིཀེ ཏིཀདུཀེཧི སངྒཧིཏེ དྷམྨེ། སུཏྟནྟེ ཁནྡྷཱདིཝསེན ཝུཏྟེ ཁནྡྷཱདིཝསེན ཝིབྷཛིཏུནྟི ཡོཛནཱ། ནནུ སུཏྟནྟེ པཊིསམྦྷིདཱཝསེན ཏེ ན ཝུཏྟཱཏི? ཡདིཔི སརཱུཔཏོ ན ཝུཏྟཱ, ‘‘ཛརཱམརཎེ ཉཱཎཾ, ཛརཱམརཎསམུདཡེ ཉཱཎ’’ནྟིཨཱདིནཱ (སཾ॰ ནི॰ ༢.༣༣) པན ཧེཏུཧེཏུཕལཱདཱིསུ ཉཱཎཝིབྷཱགསྶ ཝུཏྟཏྟཱ ཨཏྠཏོ ཝུཏྟཱ ཨེཝ ཧོནྟི, པཊིསམྦྷིདཱམགྒེ (པཊི॰ མ॰ ༢.༣༠) ཝཱ པཊིསམྦྷིདཱནཾ ཨཱགཏཏྟཱ སུཏྟནྟེ པཊིསམྦྷིདཱཝསེནཔི ཏེ དྷམྨཱ ཝུཏྟཱ ཨེཝ། ཏཏྠཱཏི ཏསྨིཾ སུཏྟནྟེ། སངྑེཔེནཱཏི སམཱསེན། ཨུདྡེསནིདྡེསམཏྟེནེཝ ཧི སུཏྟནྟེ ཁནྡྷཱདཡོ དེསིཏཱ, ན པཊིནིདྡེསཱདིནཱཏི སངྑེཔེན ཏེ ཏཏྠ ཝུཏྟཱཏི ཝུཏྟཱ། ཏཏྠཱཏི ཝཱ དྷམྨསངྒཧེ། ཏཏྠཱཔི ཧི ‘‘ཏསྨིཾ ཁོ པན སམཡེ ཙཏྟཱརོ ཁནྡྷཱ ཧོནྟཱི’’ཏིཨཱདིནཱ (དྷ॰ ས॰ ༥༨) ཁནྡྷཱདཡོ སངྑེཔེན ཝུཏྟཱཏི། ཝིབྷཛཱིཡནྟི ཨེཏྠ, ཨེཏེན ཝཱ ཁནྡྷཱདཡོཏི ཝིབྷངྒོ, ཏེ ཨེཝ པཀིརཱིཡནྟི པཊྛཔཱིཡནྟི ཨེཏྠ, ཨེཏེན ཝཱཏི པཀརཎཾ, ཝིབྷངྒོ ཙ སོ པཀརཎཉྩཱཏི ཝིབྷངྒཔྤཀརཎཾ། ཨཱདིསདྡཏྠཛོཏཀེནཱཏི ‘‘ཨིཏི ཝཱ, ཨིཏི ཨེཝརཱུཔཱ ནཙྩགཱིཏཝཱདིཏཝིསཱུཀདསྶནཱ པཊིཝིརཏོ’’ཏིཨཱདཱིསུ (དཱི॰ ནི॰ ༡.༡༣) ཝིཡ ཨཱདིསདྡསྶ ཨཏྠདཱིཔཀེན། པཀཱརཏྠཛོཏཀེནཱཏི ‘‘ཨིཏི ཁོ, བྷིཀྑཝེ, སཔྤཊིབྷཡོ བཱལོ, ཨཔྤཊིབྷཡོ པཎྜིཏོ’’ཏིཨཱདཱིསུ (ཨ॰ ནི॰ ༣.༡) ཝིཡ པཀཱརཏྠཝིབྷཱཝཀེན། ‘‘ཨེཀདེསེན སམུདཱཡཾ ནིདསྶེཏཱི’’ཏི ཨེཏེན ‘‘རཱུཔཀྑནྡྷོ…པེ॰… ཝིཉྙཱཎཀྑནྡྷོ’’ཏི ཨེཏྠ ཨིཏིསདྡསྶ ནིདསྶནཏྠཏཾ དསྶེཏི། ནིདསྶནཏྠོཔི ཧི ཨིཏི-སདྡོ དིཊྛོ ཡཐཱ ‘‘ཨཏྠཱིཏི ཁོ, ཀཙྩཱན, ཨཡམེཀོ ཨནྟོ’’ཏིཨཱདཱིསུ (སཾ॰ ནི॰ ༢.༡༥; ༣.༩༠)། པརིསམཱཔནཏྠོ ཝཱ ‘‘ཏསྨཱཏིཧ མེ, བྷིཀྑཝེ, དྷམྨདཱཡཱདཱ བྷཝཐ, ནོ ཨཱམིསདཱཡཱདཱ། ཨཏྠི མེ ཏུམྷེསུ ཨནུཀམྤཱ ‘ཀིནྟི མེ སཱཝཀཱ དྷམྨདཱཡཱདཱ བྷཝེཡྻུཾ, ནོ ཨཱམིསདཱཡཱདཱ’ཏི’’ (མ॰ ནི॰ ༡.༢༩) ཨེཝམཱདཱིསུ ཝིཡ། པརིསམཱཔནཉྷེཏཾ སུཏྟནྟབྷཱཛནཱིཡསྶ ཨེཀདེསདསྶནེན ཡདིདཾ ‘‘པཉྩཀྑནྡྷཱ རཱུཔཀྑནྡྷོ…པེ॰… ཝིཉྙཱཎཀྑནྡྷོ’’ཏི ཏཱཝ ཏདཏྠསྶ སངྒཧིཏཏྟཱ། ཏཏྠཱཏི ཝིབྷངྒཔྤཀརཎེ། ‘‘ནིབྦཱནཝཛྫཱན’’ནྟི ཨེཏྠ ཡདི ནིབྦཱནཝཛྫཱནཾ…པེ॰… ཨཔྤཀཏརཔདཏྟཱ ཁནྡྷཱནཾ ཁནྡྷཝིབྷངྒོ ཨཱདིམྷི ཝུཏྟོ, ནནུ སཧ ནིབྦཱནེན སབྦདྷམྨསངྒཱཧཀཏྟཱ, སབྦདྷམྨསངྒཱཧཀེཧི ཙ ཨཱཡཏནཱདཱིཧི ཁནྡྷེཧི ཙ ཨཔྤཀཏརཔདཏྟཱ སཙྩཝིབྷངྒོ ཨཱདིམྷི ཝཏྟབྦོཏི ? ན, ཏཏྠཱཔི དུཀྑསཙྩཝིབྷངྒེ ཨེཀདེསེན ཁནྡྷཱནཾ ཨེཝ ཝིབྷཛིཏབྦཏོ། ཡཐཱཧ ‘‘ཏཏྠ ཀཏམཾ དུཀྑཾ ཨརིཡསཙྩཾ? ཛཱཏིཔི དུཀྑཱ…པེ॰… སཾཁིཏྟེན པཉྩུཔཱདཱནཀྑནྡྷཱ དུཀྑཱ’’ཏི (ཝིབྷ॰ ༡༩༠; དཱི॰ ནི॰ ༢.༣༨༧; མ॰ ནི॰ ༡.༡༢༠; ༣.༣༧༣)། ཨིདྷ པན ཨནཝསེསཏོཝ ཁནྡྷཱ ཝིབྷཛཱིཡནྟཱིཏི ནིབྦཱནཝཛྫཱནཾ…པེ॰… ཨཔྤཀཏརཔདཏྟཱ ཁནྡྷཱནཾ ཁནྡྷཝིབྷངྒོ ཨཱདིམྷི ཝུཏྟོ།

    1. Teeva dhammeti te eva kusalādike tikadukehi saṅgahite dhamme. Suttante khandhādivasena vutte khandhādivasena vibhajitunti yojanā. Nanu suttante paṭisambhidāvasena te na vuttāti? Yadipi sarūpato na vuttā, ‘‘jarāmaraṇe ñāṇaṃ, jarāmaraṇasamudaye ñāṇa’’ntiādinā (saṃ. ni. 2.33) pana hetuhetuphalādīsu ñāṇavibhāgassa vuttattā atthato vuttā eva honti, paṭisambhidāmagge (paṭi. ma. 2.30) vā paṭisambhidānaṃ āgatattā suttante paṭisambhidāvasenapi te dhammā vuttā eva. Tatthāti tasmiṃ suttante. Saṅkhepenāti samāsena. Uddesaniddesamatteneva hi suttante khandhādayo desitā, na paṭiniddesādināti saṅkhepena te tattha vuttāti vuttā. Tatthāti vā dhammasaṅgahe. Tatthāpi hi ‘‘tasmiṃ kho pana samaye cattāro khandhā hontī’’tiādinā (dha. sa. 58) khandhādayo saṅkhepena vuttāti. Vibhajīyanti ettha, etena vā khandhādayoti vibhaṅgo, te eva pakirīyanti paṭṭhapīyanti ettha, etena vāti pakaraṇaṃ, vibhaṅgo ca so pakaraṇañcāti vibhaṅgappakaraṇaṃ. Ādisaddatthajotakenāti ‘‘iti vā, iti evarūpā naccagītavāditavisūkadassanā paṭivirato’’tiādīsu (dī. ni. 1.13) viya ādisaddassa atthadīpakena. Pakāratthajotakenāti ‘‘iti kho, bhikkhave, sappaṭibhayo bālo, appaṭibhayo paṇḍito’’tiādīsu (a. ni. 3.1) viya pakāratthavibhāvakena. ‘‘Ekadesena samudāyaṃ nidassetī’’ti etena ‘‘rūpakkhandho…pe… viññāṇakkhandho’’ti ettha itisaddassa nidassanatthataṃ dasseti. Nidassanatthopi hi iti-saddo diṭṭho yathā ‘‘atthīti kho, kaccāna, ayameko anto’’tiādīsu (saṃ. ni. 2.15; 3.90). Parisamāpanattho vā ‘‘tasmātiha me, bhikkhave, dhammadāyādā bhavatha, no āmisadāyādā. Atthi me tumhesu anukampā ‘kinti me sāvakā dhammadāyādā bhaveyyuṃ, no āmisadāyādā’ti’’ (ma. ni. 1.29) evamādīsu viya. Parisamāpanañhetaṃ suttantabhājanīyassa ekadesadassanena yadidaṃ ‘‘pañcakkhandhā rūpakkhandho…pe… viññāṇakkhandho’’ti tāva tadatthassa saṅgahitattā. Tatthāti vibhaṅgappakaraṇe. ‘‘Nibbānavajjāna’’nti ettha yadi nibbānavajjānaṃ…pe… appakatarapadattā khandhānaṃ khandhavibhaṅgo ādimhi vutto, nanu saha nibbānena sabbadhammasaṅgāhakattā, sabbadhammasaṅgāhakehi ca āyatanādīhi khandhehi ca appakatarapadattā saccavibhaṅgo ādimhi vattabboti ? Na, tatthāpi dukkhasaccavibhaṅge ekadesena khandhānaṃ eva vibhajitabbato. Yathāha ‘‘tattha katamaṃ dukkhaṃ ariyasaccaṃ? Jātipi dukkhā…pe… saṃkhittena pañcupādānakkhandhā dukkhā’’ti (vibha. 190; dī. ni. 2.387; ma. ni. 1.120; 3.373). Idha pana anavasesatova khandhā vibhajīyantīti nibbānavajjānaṃ…pe… appakatarapadattā khandhānaṃ khandhavibhaṅgo ādimhi vutto.

    ཨཔིཙ རཱུཔསམྨཱུལ༹ྷཱ ཨརཱུཔསམྨཱུལ༹ྷཱ ཨུབྷཡསམྨཱུལ༹ྷཱཏི ཏིཝིདྷཱ བོདྷནེཡྻཔུགྒལཱ, ཏཐཱ སཾཁིཏྟརུཙིནོ ཝིཏྠཱརརུཙིནོ ནཱཏིསངྑེཔཝིཏྠཱརརུཙིནོ, ཏིཀྑིནྡྲིཡཱ མུདིནྡྲིཡཱ མཛ྄ཛྷིམིནྡྲིཡཱཏི ཙ། ཏེསུ ཨརཱུཔསམྨཱུལ༹ྷཱནཾ ཨུཔཀཱརཱཡ ཁནྡྷདེསནཱ, རཱུཔསམྨཱུལ༹ྷཱནཾ ཨཱཡཏནདེསནཱ, ཨུབྷཡསམྨཱུལ༹ྷཱནཾ དྷཱཏུདེསནཱ། ཏཐཱ སཾཁིཏྟརུཙཱིནཾ ཁནྡྷདེསནཱ, ནཱཏིསངྑེཔཝིཏྠཱརརུཙཱིནཾ ཨཱཡཏནདེསནཱ, ཝིཏྠཱརརུཙཱིནཾ དྷཱཏུདེསནཱ། ཏིཀྑིནྡྲིཡཱནཾ ཁནྡྷདེསནཱ, མཛ྄ཛྷིམིནྡྲིཡཱནཾ ཨཱཡཏནདེསནཱ, མུདིནྡྲིཡཱནཾ དྷཱཏུདེསནཱཏི ཨིམིནཱ པཡོཛནེན ཨནུཀྐམེན ཙ ཁནྡྷཱཡཏནདྷཱཏུཝིབྷངྒཱནཾ དེསནཱཀྐམོཝ ཝེདིཏབྦོ། ཏཾ པནེཏཾ ཁནྡྷཱདིཏྟཡཾ པཝཏྟིནིཝཏྟིཏདུབྷཡཧེཏུམུཁེནེཝ ཉཱཡམཱནཾ ཡཐཱབྷཱུཏཱཝབོདྷཱཡ ཧོཏི, ནཱཉྙཐཱཏི དསྶནཏྠཾ སཙྩཝིབྷངྒདེསནཱ པཝཏྟཱ། སོ ཙ ཡཐཱབྷཱུཏཱཝབོདྷོ ཝིསེསཏོ ཨིནྡྲིཡསནྣིསྶཡེནཱཏི ཨིནྡྲིཡཝིབྷངྒདེསནཱ། ཨིནྡྲིཡཱནཉྩ ཨིནྡཊྛོ ཏཾཏཾཔཙྩཡདྷམྨབྷཱུཏཱནཾ ཡཐཱསཀཾ པཙྩཡུཔྤནྣེསུ པཙྩཡབྷཱཝཝིསེསེནེཝཱཏི པཙྩཡཔཙྩཡུཔྤནྣཝིབྷཱགསནྡསྶནཱི པཙྩཡཱཀཱརཝིབྷངྒདེསནཱ། པཙྩཡཱཀཱརསྶ ཁནྡྷཱདཱིནཉྩ ཨཝིཔརཱིཏསབྷཱཝཱཝབོདྷོ སཏིཔཊྛཱནཱདཱིསུ སམྨཱམནསིཀཱརེནཱཏི སཏིཔཊྛཱནསམྨཔྤདྷཱནཨིདྡྷིཔཱདབོཛ྄ཛྷངྒམགྒངྒཝིབྷངྒདེསནཱ། སྭཱཡཾ སཏིཔཊྛཱནཱདཱིསུ སམྨཱམནསིཀཱརོ ཨིམཱཡ པཊིཔཏྟིཡཱ ཧོཏཱིཏི ཛྷཱནཨཔྤམཉྙཱཝིབྷངྒདེསནཱ, སཱ སམྨཱཔཊིཔཏྟི ཨེཏྟཀེ སཱིལེ པཏིཊྛིཏསྶ སམྦྷཝཏཱིཏི སིཀྑཱཔདཝིབྷངྒདེསནཱ, ཡཐཱཝུཏྟཱཡ ཙ སམྨཱཔཊིཔཏྟིཡཱ ཨིམེ ཨཱནིསཾསཱཏི པཊིསམྦྷིདཱཉཱཎཝིབྷངྒདེསནཱ, ཏེ ཙིམེ ཉཱཎཝིསེསཱ ཨིམེསུ ཀིལེསེསུ པཧཱིཡནྟེསུ ཙ སམྦྷཝནྟི, ནཱཉྙཐཱཏི ཀིལེསཝིབྷངྒདེསནཱ, ཨེཝཾ ཝིཏྠཱརཏོ དེསིཏེ ཁནྡྷཱདིཀེ སངྑེཔཏོཔི ཛཱནནྟསྶ ཨཏྠསིདྡྷི ཧོཏི ཨེཝཱཏི དསྶནཏྠཾ པརིཡོསཱནེ དྷམྨཧདཡཝིབྷངྒདེསནཱ པཝཏྟཱཏི ཨེཝམེཏེསཾ ཨཊྛཱརསནྣཾ མཧཱཝིབྷངྒཱནཾ དེསནཱཀྐམཀཱརཎཾ ཝེདིཏབྦཾ།

    Apica rūpasammūḷhā arūpasammūḷhā ubhayasammūḷhāti tividhā bodhaneyyapuggalā, tathā saṃkhittarucino vitthārarucino nātisaṅkhepavitthārarucino, tikkhindriyā mudindriyā majjhimindriyāti ca. Tesu arūpasammūḷhānaṃ upakārāya khandhadesanā, rūpasammūḷhānaṃ āyatanadesanā, ubhayasammūḷhānaṃ dhātudesanā. Tathā saṃkhittarucīnaṃ khandhadesanā, nātisaṅkhepavitthārarucīnaṃ āyatanadesanā, vitthārarucīnaṃ dhātudesanā. Tikkhindriyānaṃ khandhadesanā, majjhimindriyānaṃ āyatanadesanā, mudindriyānaṃ dhātudesanāti iminā payojanena anukkamena ca khandhāyatanadhātuvibhaṅgānaṃ desanākkamova veditabbo. Taṃ panetaṃ khandhādittayaṃ pavattinivattitadubhayahetumukheneva ñāyamānaṃ yathābhūtāvabodhāya hoti, nāññathāti dassanatthaṃ saccavibhaṅgadesanā pavattā. So ca yathābhūtāvabodho visesato indriyasannissayenāti indriyavibhaṅgadesanā. Indriyānañca indaṭṭho taṃtaṃpaccayadhammabhūtānaṃ yathāsakaṃ paccayuppannesu paccayabhāvavisesenevāti paccayapaccayuppannavibhāgasandassanī paccayākāravibhaṅgadesanā. Paccayākārassa khandhādīnañca aviparītasabhāvāvabodho satipaṭṭhānādīsu sammāmanasikārenāti satipaṭṭhānasammappadhānaiddhipādabojjhaṅgamaggaṅgavibhaṅgadesanā. Svāyaṃ satipaṭṭhānādīsu sammāmanasikāro imāya paṭipattiyā hotīti jhānaappamaññāvibhaṅgadesanā, sā sammāpaṭipatti ettake sīle patiṭṭhitassa sambhavatīti sikkhāpadavibhaṅgadesanā, yathāvuttāya ca sammāpaṭipattiyā ime ānisaṃsāti paṭisambhidāñāṇavibhaṅgadesanā, te cime ñāṇavisesā imesu kilesesu pahīyantesu ca sambhavanti, nāññathāti kilesavibhaṅgadesanā, evaṃ vitthārato desite khandhādike saṅkhepatopi jānantassa atthasiddhi hoti evāti dassanatthaṃ pariyosāne dhammahadayavibhaṅgadesanā pavattāti evametesaṃ aṭṭhārasannaṃ mahāvibhaṅgānaṃ desanākkamakāraṇaṃ veditabbaṃ.

    རཱུཔཱདཱིནནྟི རཱུཔཝེདནཱསཉྙཱསངྑཱརཝིཉྙཱཎཱནཾ། ཝེདཡིཏཱདིསབྷཱཝཏྟཱབྷཱཝཱཏི ཡཐཱཀྐམཾ ཨནུབྷཝནསཉྫཱནནཱབྷིསངྑརཎཱདིསབྷཱཝཏྟཱབྷཱཝཱ། ན ཧི རཱུཔཾ ཝེདཡིཏཱདིསབྷཱཝཾ, ཝེདནཱདི ཝཱ རུཔྤནཱདིསབྷཱཝཾ། ཡཏོ རཱུཔཱདཱིནཾ ཝེདནཱསམཝརོདྷནེན ‘‘ཙཏྟཱརོ ཁནྡྷཱ’’ཏིཨཱདིནཱ སངྑིཔིཏྭཱ ཁནྡྷཱ ༠༦ དེསེཏབྦཱ སིཡུཾ། རུཔྤནཱདིཏོ ཨཉྙསྶཱབྷཱཝཱཏི རུཔྤནཱནུབྷཝནཱདིསབྷཱཝཏོ ཨཉྙསྶ ཨཏཱིཏཱདིཀེ གཧེཏྭཱ རཱསིཝསེན ཝཏྟབྦསྶ སཾཁིཏྟསྶ སབྷཱཝསྶ ཨབྷཱཝཱ། ན ཧི ཙེཏསིཀཱདིབྷཱཝོ ཝེདནཱདཱིནཾ སབྷཱཝོ། ཧེཊྛཱ གཎནེསཱུཏི པཉྩཏོ ཧེཊྛཱ གཎནེསུ། ཨནིཊྛཱནནྟི ཨཔརིཡོསཱནཾ། རཱུཔཱདཱིསུ ཧི ཀཏིཔཡེ, ཨེཀམྤི ཝཱ ཨགྒཧེཏྭཱ ཝུཙྩམཱནཱ ཁནྡྷཝསེན དེསནཱ ཨནཝསེསསངྑཏདྷམྨསངྒཱཧིནཱི ན སམྦྷཝཏི། ཁནྡྷསྶཱཏི རཱསཊྛསྶ ཁནྡྷསྶ། ཏེནེཝཱཧ ‘‘ན ཧཱི’’ཏིཨཱདི། སཝིབྷཱགདྷམྨེཧཱིཏི སཔྤབྷེདདྷམྨེཧི།

    Rūpādīnanti rūpavedanāsaññāsaṅkhāraviññāṇānaṃ. Vedayitādisabhāvattābhāvāti yathākkamaṃ anubhavanasañjānanābhisaṅkharaṇādisabhāvattābhāvā. Na hi rūpaṃ vedayitādisabhāvaṃ, vedanādi vā ruppanādisabhāvaṃ. Yato rūpādīnaṃ vedanāsamavarodhanena ‘‘cattāro khandhā’’tiādinā saṅkhipitvā khandhā 06 desetabbā siyuṃ. Ruppanādito aññassābhāvāti ruppanānubhavanādisabhāvato aññassa atītādike gahetvā rāsivasena vattabbassa saṃkhittassa sabhāvassa abhāvā. Na hi cetasikādibhāvo vedanādīnaṃ sabhāvo. Heṭṭhā gaṇanesūti pañcato heṭṭhā gaṇanesu. Aniṭṭhānanti apariyosānaṃ. Rūpādīsu hi katipaye, ekampi vā aggahetvā vuccamānā khandhavasena desanā anavasesasaṅkhatadhammasaṅgāhinī na sambhavati. Khandhassāti rāsaṭṭhassa khandhassa. Tenevāha ‘‘na hī’’tiādi. Savibhāgadhammehīti sappabhedadhammehi.

    ‘‘སདྡཏྠསཧིཏཾ ཁནྡྷསདྡསྶ ཝིསཡཾ དསྶེཏཱི’’ཏི ཨེཏེན རཱསིསདྡསྶ ཝིཡ རཱསཊྛེ ཁནྡྷསདྡསྶ ཝཱཙཀབྷཱཝེན པཝཏྟིཾ དསྶེཏི པརིཡཱཡནྟརབྷཱཝཏོ། གུཎཱདཱིསུ པན ཀེཝལཾ ཏབྦིསཡཔཡོགབྷཱཝེནེཝ པཝཏྟི, ན ཝཱཙཀབྷཱཝེནཱཏི ཨཱཧ ‘‘གུཎེ…པེ॰… ན སདྡཏྠ’’ནྟི། ཁནྡྷསདྡོཏི སཱིལཱདིསདྡེ སནྣིདྷཱཔིཏོ ཁནྡྷསདྡོ། ཏེནེཝཱཧ ‘‘སཱིལཱདིགུཎཝིསིཊྛཾ རཱསཊྛཾ དཱིཔེཏཱི’’ཏི། ཀེཙཱིཏི དྷམྨསིརིཏྠེརཾ སནྡྷཱཡ ཝདཏི། ཨེཏྠཱཏི ‘‘སཱིལཀྑནྡྷོ སམཱདྷིཀྑནྡྷོ’’ཏི (དཱི॰ ནི॰ ༣.༣༥༥) ཨེཏྠ། ན ཀེཝལཉྩ སོ ཨེཝ, ཨཊྛཀཐཱཙརིཡེཧིཔི ཨེཏྠ གུཎཏྠཏཱ ཨིཙྪིཏཱ ཨེཝ། ཏཐཱ ཧི ཨཊྛསཱལིནིཡཾ ‘‘སཱིལཀྑནྡྷོ སམཱདྷིཀྑནྡྷོཏིཨཱདཱིསུ གུཎཊྛེནཱ’’ཏི (དྷ॰ ས॰ ཨཊྛ॰ ༥) ཝུཏྟཾ། ནནུ ཙ ཀེཝལོཔི ཁནྡྷསདྡོ ‘‘ཏིཎྞཾ ཁོ, མཱཎཝ, ཁནྡྷཱནཾ ཝཎྞཝཱདཱི, ན ཁོ, ཨཱཝུསོ ཝིསཱཁ, ཏཱིཧི ཁནྡྷེཧི ཨརིཡོ ཨཊྛངྒིཀོ མགྒོ སངྒཧིཏོ’’ཏི (མ॰ ནི॰ ༡.༤༦༢) ཙ ཨཱདཱིསུ སཱིལཱདིཝཱཙཀོ དིཊྛོཏི? ན, ཏཏྠཱཔི ཨདྷིཀཱརཱདིཝཙྪེདཀཝསེནེཝསྶ སཱིལཱདཱིསུ པཝཏྟིདསྶནཏོ། ན ཁནྡྷསདྡོ པཉྙཏྟིསདྡསྶ ཨཏྠེ ཝཏྟཏཱིཏི ནིརུཏྟིཝོཧཱརཱདིསདྡཱ ཝིཡ པཉྙཏྟིཔརིཡཱཡོ ན ཧོཏཱིཏི ཨཏྠོ། དཱརུཀྑནྡྷོཏི པཉྙཏྟི ཧོཏཱིཏི ཏསྶ ཁནྡྷསདྡསྶ པཉྙཏྟིཝིསེསཔྤཝཏྟིཏཾ དསྶེཏི། ཝིཉྙཱཎཀྑནྡྷོཏི ཁནྡྷསདྡོཏི ‘‘ཝིཉྙཱཎཾ ཝིཉྙཱཎཀྑནྡྷོ’’ཏི (ཡམ॰ ༡.ཁནྡྷཡམཀ.༣༢) ཨེཏྠ ཝུཏྟོ ཁནྡྷསདྡོ། སམུདཱཡེ ནིརུལ༹ྷོཏི ཨཏཱིཏཱདིབྷེདབྷིནྣསྶ པཉྙཱཡ ཨབྷིསཾཡཱུཧནེན རཱསིཀཏེ ཝིཉྙཱཎསམཱུཧེ ནིརུལ༹ྷོ། ཏཱཡ ཨེཝ རུལ༹ྷིཡཱ པཝཏྟཏཱིཏི ཏཱཡ སམུདཱཡེ ནིརུལ༹ྷཏཱཡ ཏདཝཡཝེ ཨེཀསྨིམྤི ཝིཉྙཱཎེ པཝཏྟཏཱིཏི། ཨེཏྠ ཙ ཉཱཎསམྤཡུཏྟེ ནིརུལ༹ྷོ ཀོསལླསམྦྷཱུཏཊྛེན ཀུསལབྷཱཝོ ཝིཡ ཉཱཎཝིཔྤཡུཏྟེ ཝིཉྙཱཎསམུདཱཡེ ནིརུལ༹ྷོ ཏདེཀདེསེཔི རུལ༹ྷིཡཱ པཝཏྟཏཱིཏི ཝེདིཏབྦཾ། ཨཐ ཝཱ ཀིཉྩི ནིམིཏྟཾ གཧེཏྭཱ སཏིཔི ཨཉྙསྨིཾ ཏནྣིམིཏྟཡུཏྟེ ཀིསྨིཉྩིདེཝ ཝིསཡེ སམྨུཏིཡཱ ཙིརཀཱལཏཱཝསེན ནིམིཏྟཝིརཧེཔི པཝཏྟི རུལ༹ྷི ནཱམ, ཡཐཱ མཧིཡཾ སེཏཱིཏི མཧིཾསོ, གཙྪནྟཱིཏི གཱཝོཏི, ཨེཝཾ ཁནྡྷསདྡསྶཱཔི རུལ༹ྷིབྷཱཝོ ཝེདིཏབྦོ།

    ‘‘Saddatthasahitaṃ khandhasaddassa visayaṃ dassetī’’ti etena rāsisaddassa viya rāsaṭṭhe khandhasaddassa vācakabhāvena pavattiṃ dasseti pariyāyantarabhāvato. Guṇādīsu pana kevalaṃ tabbisayapayogabhāveneva pavatti, na vācakabhāvenāti āha ‘‘guṇe…pe… na saddattha’’nti. Khandhasaddoti sīlādisadde sannidhāpito khandhasaddo. Tenevāha ‘‘sīlādiguṇavisiṭṭhaṃ rāsaṭṭhaṃ dīpetī’’ti. Kecīti dhammasirittheraṃ sandhāya vadati. Etthāti ‘‘sīlakkhandho samādhikkhandho’’ti (dī. ni. 3.355) ettha. Na kevalañca so eva, aṭṭhakathācariyehipi ettha guṇatthatā icchitā eva. Tathā hi aṭṭhasāliniyaṃ ‘‘sīlakkhandho samādhikkhandhotiādīsu guṇaṭṭhenā’’ti (dha. sa. aṭṭha. 5) vuttaṃ. Nanu ca kevalopi khandhasaddo ‘‘tiṇṇaṃ kho, māṇava, khandhānaṃ vaṇṇavādī, na kho, āvuso visākha, tīhi khandhehi ariyo aṭṭhaṅgiko maggo saṅgahito’’ti (ma. ni. 1.462) ca ādīsu sīlādivācako diṭṭhoti? Na, tatthāpi adhikārādivacchedakavasenevassa sīlādīsu pavattidassanato. Na khandhasaddo paññattisaddassa atthe vattatīti niruttivohārādisaddā viya paññattipariyāyo na hotīti attho. Dārukkhandhoti paññatti hotīti tassa khandhasaddassa paññattivisesappavattitaṃ dasseti. Viññāṇakkhandhoti khandhasaddoti ‘‘viññāṇaṃ viññāṇakkhandho’’ti (yama. 1.khandhayamaka.32) ettha vutto khandhasaddo. Samudāye niruḷhoti atītādibhedabhinnassa paññāya abhisaṃyūhanena rāsikate viññāṇasamūhe niruḷho. Tāya eva ruḷhiyā pavattatīti tāya samudāye niruḷhatāya tadavayave ekasmimpi viññāṇe pavattatīti. Ettha ca ñāṇasampayutte niruḷho kosallasambhūtaṭṭhena kusalabhāvo viya ñāṇavippayutte viññāṇasamudāye niruḷho tadekadesepi ruḷhiyā pavattatīti veditabbaṃ. Atha vā kiñci nimittaṃ gahetvā satipi aññasmiṃ tannimittayutte kismiñcideva visaye sammutiyā cirakālatāvasena nimittavirahepi pavatti ruḷhi nāma, yathā mahiyaṃ setīti mahiṃso, gacchantīti gāvoti, evaṃ khandhasaddassāpi ruḷhibhāvo veditabbo.

    རཱསིཏོ གུཎཏོཏི སབྦཏྠ བྷུམྨཏྠེ ཝཱ ནིསྶཀྐཝཙནཾ དཊྛབྦཾ། ནིཡམེཏྭཱཏི ཝཝཏྠཔེཏྭཱ། པིཎྜཊྛོཏི སངྒྷཱཏཏྠོ། ཏསྨཱཏི ཡསྨཱ པཉྩེཝ ཁནྡྷཱ ཝུཏྟཱ, ཀོཊྛཱསཊྛེ ཙ ཁནྡྷཊྛེ ནིབྦཱནསྶ ཝསེན ཚཊྛེནཱཔི ཁནྡྷེན བྷཝིཏབྦཾ, ཏསྨཱ ཁནྡྷཊྛོ ནཱམ རཱསཊྛོཏི ཡུཏྟཾ། ‘‘ཡེསཾ ཝཱ ཨཏཱིཏཱདིཝསེན བྷེདོ ཨཏྠཱི’’ཏིཨཱདིནཱ ཨཏཱིཏཱདིཝིབྷཱགབྷིནྣེསུ རུཔྤནཱདིསབྷཱཝདྷམྨེསུ ཝིསུཾ ཝིསུཾ ཀོཊྛཱསབྷཱཝེན གཡ྄ཧམཱནེསུ ཏབྦིབྷཱགརཧིཏསྶ ཨེཀསྶ ནིབྦཱནསྶ རཱསཊྛཏཱ ཝིཡ ཀོཊྛཱསཊྛཏཱཔི ན སམྦྷཝཏཱིཏི དསྶེཏི། ཨེཏེན པཉྙཏྟིཡཱཔི ཁནྡྷེསུ ཨགྒཧཎེ ཀཱརཎཾ ཝུཏྟནྟི ཝེདིཏབྦཾ།

    Rāsito guṇatoti sabbattha bhummatthe vā nissakkavacanaṃ daṭṭhabbaṃ. Niyametvāti vavatthapetvā. Piṇḍaṭṭhoti saṅghātattho. Tasmāti yasmā pañceva khandhā vuttā, koṭṭhāsaṭṭhe ca khandhaṭṭhe nibbānassa vasena chaṭṭhenāpi khandhena bhavitabbaṃ, tasmā khandhaṭṭho nāma rāsaṭṭhoti yuttaṃ. ‘‘Yesaṃ vā atītādivasena bhedo atthī’’tiādinā atītādivibhāgabhinnesu ruppanādisabhāvadhammesu visuṃ visuṃ koṭṭhāsabhāvena gayhamānesu tabbibhāgarahitassa ekassa nibbānassa rāsaṭṭhatā viya koṭṭhāsaṭṭhatāpi na sambhavatīti dasseti. Etena paññattiyāpi khandhesu aggahaṇe kāraṇaṃ vuttanti veditabbaṃ.

    ཀསྨཱ པནེཏྠ ཕསྶཱདིཀེ ཝིཡ སངྑཱརཀྑནྡྷེ ཨནཝརོདྷེཏྭཱ ཝེདནཱསཉྙཱ ཝིསུཾ ཁནྡྷབྷཱཝེན གཧིཏཱཏི? ཝིཝཱདམཱུལཏཱདིཝིསེསདསྶནཏྠཾ། གཧཊྛཱནཉྷི ཝིཝཱདཀཱརཎཾ ཀཱམཛ྄ཛྷོསཱནཾ། ཝུཏྟཉྩེཏཾ ‘‘པུན ཙཔརཾ, བྷིཀྑཝེ, ཀཱམཧེཏུ ཀཱམནིདཱནཾ ཀཱམཱདྷིཀརཎཾ ཀཱམཱནམེཝ ཧེཏུ མཱཏཱཔི པུཏྟེན ཝིཝདཏི, པུཏྟོཔི མཱཏརཱ ཝིཝདཏཱི’’ཏིཨཱདི (མ॰ ནི॰ ༡.༡༦༨, ༡༧༨)། པབྦཛིཏཱནཾ དིཊྛཱབྷིནིཝེསོ། ཝུཏྟམྤི ཙེཏཾ ‘‘ཡེ དིཊྛིམུགྒཡ྄ཧ ཝིཝཱདཡནྟི, ‘ཨིདམེཝ སཙྩ’ནྟི (སུ॰ ནི॰ ༨༣༨; མཧཱནི॰ ༦༧) ཙ ཝཱདཡནྟཱི’’ཏིཨཱདི། ཏེསུ ཀཱམཛ྄ཛྷོསཱནཾ ཝེདནསྶཱདེན ཧོཏི, དིཊྛཱབྷིནིཝེསོ སཉྙཱཝིཔལླཱསེན། སཉྙཱཝིཔལླཱསེན ཧི ཙིཏྟཝིཔལླཱསོ, ཙིཏྟཝིཔལླཱསེན དིཊྛིམཱནཏཎྷཱཔཔཉྩཱནཾ ཝིཔལླཱསོཏི། ཏཐཱ ཝེདནཱནུགིདྡྷོ ཝིཔལླཏྠསཉྙོ ཙ སཾསརཏི། ཝེདནཱནུགིདྡྷསྶ ཧི ཝེདནཱཔཙྩཡཱ ཏཎྷཱ སིདྡྷཱ ཧོཏི, ཏཏོ ཙ ཏཎྷཱཔཙྩཡཱ ཨུཔཱདཱནནྟི ཨཱཝཊྚཏི བྷཝཙཀྐཾ། ཝིཔལླཏྠསཉྙིསྶ ཙ ‘‘སཉྙཱནིདཱནཱ ཧི པཔཉྩསངྑཱ’’ཏི (སུ॰ ནི॰ ༨༨༠) ཝཙནཏོ དིཊྛིམཱནཏཎྷཱཔཔཉྩཱནཾ ཨནུཔཙྪེདཏོ སཾསཱརསྶ ཨནུཔཙྪེདོཝ། ཨིཏི ཝིཝཱདཀཱརཎཱནཾ ཀཱམཛ྄ཛྷོསཱནདིཊྛཱབྷིནིཝེསཱནཾ ཀཱརཎབྷཱཝོ སཾསཱརཧེཏུབྷཱཝོཏི ཨིམསྶ ཝིཝཱདམཱུལཏཱདིཝིསེསསྶ དསྶནཏྠཾ སངྑཱརཀྑནྡྷེ ཨནཝརོདྷེཏྭཱ ཝེདནཱསཉྙཱ ཝིསུཾ ཁནྡྷབྷཱཝེན གཧིཏཱཏི ཝེདིཏབྦཾ།

    Kasmā panettha phassādike viya saṅkhārakkhandhe anavarodhetvā vedanāsaññā visuṃ khandhabhāvena gahitāti? Vivādamūlatādivisesadassanatthaṃ. Gahaṭṭhānañhi vivādakāraṇaṃ kāmajjhosānaṃ. Vuttañcetaṃ ‘‘puna caparaṃ, bhikkhave, kāmahetu kāmanidānaṃ kāmādhikaraṇaṃ kāmānameva hetu mātāpi puttena vivadati, puttopi mātarā vivadatī’’tiādi (ma. ni. 1.168, 178). Pabbajitānaṃ diṭṭhābhiniveso. Vuttampi cetaṃ ‘‘ye diṭṭhimuggayha vivādayanti, ‘idameva sacca’nti (su. ni. 838; mahāni. 67) ca vādayantī’’tiādi. Tesu kāmajjhosānaṃ vedanassādena hoti, diṭṭhābhiniveso saññāvipallāsena. Saññāvipallāsena hi cittavipallāso, cittavipallāsena diṭṭhimānataṇhāpapañcānaṃ vipallāsoti. Tathā vedanānugiddho vipallatthasañño ca saṃsarati. Vedanānugiddhassa hi vedanāpaccayā taṇhā siddhā hoti, tato ca taṇhāpaccayā upādānanti āvaṭṭati bhavacakkaṃ. Vipallatthasaññissa ca ‘‘saññānidānā hi papañcasaṅkhā’’ti (su. ni. 880) vacanato diṭṭhimānataṇhāpapañcānaṃ anupacchedato saṃsārassa anupacchedova. Iti vivādakāraṇānaṃ kāmajjhosānadiṭṭhābhinivesānaṃ kāraṇabhāvo saṃsārahetubhāvoti imassa vivādamūlatādivisesassa dassanatthaṃ saṅkhārakkhandhe anavarodhetvā vedanāsaññā visuṃ khandhabhāvena gahitāti veditabbaṃ.

    ཨོཀཱསེསཱུཏི ཝིབྷཛནཀིརིཡཱཡ པཝཏྟིཊྛཱནབྷཱཝཏོ ཨཏཱིཏཱདཡོ ཨོཀཱསཱཏི ཝུཏྟཱ། ཨིཏིསདྡེནཱཏི ‘‘ཨུཔཱདཱཡརཱུཔ’’ནྟི ཨེཝཾ ཨཊྛཀཐཱཡཾ ཝུཏྟཨིཏིསདྡེན། ནིདསྶནཏྠེནཱཏི ཨུདཱཧརཎཏྠེན། སབྦོཏི སཀལོ ཨེཀཱདསསུ ཨོཀཱསེསུ ཝིབྷཏྟོ ཝིབྷཛནནཡོ། ཨིདཉྩ ཝིབྷཛནནྟི ‘‘ཙཏྟཱརོ ཙ མཧཱབྷཱུཏཱ…པེ॰… ཨུཔཱདཱཡརཱུཔ’’ནྟི ཨེཝཾ ཝིབྷཏྟཾ ཨིདཉྩ ཝིབྷཛནཾ། ཨོལཱ༹རིཀཱདཱིསཱུཏི ཨོལཱ༹རིཀསུཁུམཧཱིནཔཎཱིཏདཱུརསནྟིཀེསུ། ཙཀྑཱཡཏནནྟིཨཱདིཝིབྷཛནཉྩཱཏི ‘‘ཙཀྑཱཡཏནཾ…པེ॰… ཕོཊྛབྦཱཡཏནཾ ཨིཏྠིནྡྲིཡཾ…པེ॰… ཀབལཱི༹ཀཱརོ ཨཱཧཱརོ རཱུཔཱ སདྡཱ གནྡྷཱ རསཱ ཕོཊྛབྦཱཏི ཨེཝཾ པཝཏྟཾ ཝིབྷཛནཉྩ། ཡཐཱསམྦྷཝནྟི ཡཐཱརཧཾ། ཨེཀཱདསསུ ཨོཀཱསེསུ ཡཾ ཡཏྠ ཝིབྷཛནཾ ཡུཏྟཾ, ཏཾ ཏཏྠ ཡོཛེཏབྦཾ། ཨེཝཾ ཝེདནཱཀྑནྡྷཱདཱིསུཔཱིཏི ཡཐཱ རཱུཔཀྑནྡྷེ ཡཐཱསམྦྷཝཾ ཨེཀཱདསསུ ཨོཀཱསེསུ ཝིབྷཛནཾ ཡོཛེཏབྦནྟི ཝུཏྟཾ, ཨེཝཾ ཝེདནཱཀྑནྡྷཱདཱིསུཔི ཡཐཱསམྦྷཝཾ ཨེཀཱདསསུ ཨོཀཱསེསུ ཝིབྷཛནཾ ཡོཛེཏབྦནྟི ཨཏྠོ།

    Okāsesūti vibhajanakiriyāya pavattiṭṭhānabhāvato atītādayo okāsāti vuttā. Itisaddenāti ‘‘upādāyarūpa’’nti evaṃ aṭṭhakathāyaṃ vuttaitisaddena. Nidassanatthenāti udāharaṇatthena. Sabboti sakalo ekādasasu okāsesu vibhatto vibhajananayo. Idañca vibhajananti ‘‘cattāro ca mahābhūtā…pe… upādāyarūpa’’nti evaṃ vibhattaṃ idañca vibhajanaṃ. Oḷārikādīsūti oḷārikasukhumahīnapaṇītadūrasantikesu. Cakkhāyatanantiādivibhajanañcāti ‘‘cakkhāyatanaṃ…pe… phoṭṭhabbāyatanaṃ itthindriyaṃ…pe… kabaḷīkāro āhāro rūpā saddā gandhā rasā phoṭṭhabbāti evaṃ pavattaṃ vibhajanañca. Yathāsambhavanti yathārahaṃ. Ekādasasu okāsesu yaṃ yattha vibhajanaṃ yuttaṃ, taṃ tattha yojetabbaṃ. Evaṃ vedanākkhandhādīsupīti yathā rūpakkhandhe yathāsambhavaṃ ekādasasu okāsesu vibhajanaṃ yojetabbanti vuttaṃ, evaṃ vedanākkhandhādīsupi yathāsambhavaṃ ekādasasu okāsesu vibhajanaṃ yojetabbanti attho.

    ཏཏྠ ཝེདནཱཀྑནྡྷོ ཏཱཝ པུརིམེ ཨོཀཱསཔཉྩཀེ སུཁཱདིཝེདནཱཏྟིཀཝསེན ཝིབྷཏྟོ, ཨིཏརསྨིཾ ཀུསལཏྟིཀཝེདནཱཏྟིཀསམཱཔནྣདུཀསཱསཝདུཀཝསེན། སཉྙཱཀྑནྡྷོ པན པུརིམེ ཨོཀཱསཔཉྩཀེ ཚཕསྶདྭཱརཝསེན, ཨིཏརསྨིཾ ཨོལཱ༹རིཀདུཀེ པཊིགྷསམྥསྶདུཀཝསེན ཙེཝ ཡཐཱཝུཏྟཀུསལཏྟིཀཱདིཝསེན ཙ ཝིབྷཏྟོ། སེསེསུ ཀུསལཏྟིཀཱདིཝསེནེཝ། ཏཐཱ སངྑཱརཀྑནྡྷོ། པཊིགྷསམྥསྶདུཀོ པནེཏྠ ནཏྠེཝ། ཙེཏནཱཡ ཨེཝ ཙེཏྠ ནིདྡེསོ སངྑཱརཀྑནྡྷདྷམྨཱནཾ ཙེཏནཱཔྤདྷཱནབྷཱཝདསྶནཏྠཾ། ཏཐཱ ཧི སཱ ‘‘སངྑཱརཀྑནྡྷོ’’ཏི ཝུཏྟཱ། ཏཏྠཱཏི ཏསྨིཾ ཝིཉྙཱཎཀྑནྡྷསྶ ཝིབྷཛནེ པཊིནིདྡེསེ། ཏཾ པན དྭཡནྟི མནོདྷཱཏུམནོཝིཉྙཱཎདྷཱཏུདྭཡཾ། ཡཉྷི སཏྟཝིཉྙཱཎདྷཱཏུདེསནཱཡཾ ‘‘མནོདྷཱཏུ, མནོཝིཉྙཱཎདྷཱཏཱུ’’ཏི དྭཡཾ དེསིཏཾ, ཏཾ ཚཝིཉྙཱཎཀཱཡདེསནཱཡཾ ‘‘མནོཝིཉྙཱཎ’’ནྟྭེཝ ཝུཙྩཏཱིཏི།

    Tattha vedanākkhandho tāva purime okāsapañcake sukhādivedanāttikavasena vibhatto, itarasmiṃ kusalattikavedanāttikasamāpannadukasāsavadukavasena. Saññākkhandho pana purime okāsapañcake chaphassadvāravasena, itarasmiṃ oḷārikaduke paṭighasamphassadukavasena ceva yathāvuttakusalattikādivasena ca vibhatto. Sesesu kusalattikādivaseneva. Tathā saṅkhārakkhandho. Paṭighasamphassaduko panettha nattheva. Cetanāya eva cettha niddeso saṅkhārakkhandhadhammānaṃ cetanāppadhānabhāvadassanatthaṃ. Tathā hi sā ‘‘saṅkhārakkhandho’’ti vuttā. Tatthāti tasmiṃ viññāṇakkhandhassa vibhajane paṭiniddese. Taṃ pana dvayanti manodhātumanoviññāṇadhātudvayaṃ. Yañhi sattaviññāṇadhātudesanāyaṃ ‘‘manodhātu, manoviññāṇadhātū’’ti dvayaṃ desitaṃ, taṃ chaviññāṇakāyadesanāyaṃ ‘‘manoviññāṇa’’ntveva vuccatīti.

    པཱལི༹ནཡེནཱཏི ཁནྡྷཝིབྷངྒཔཱལི༹ནཡེན། ཨཉྙེན པཀཱརེནཱཏི དྷམྨསངྒཧེ, ཏདཊྛཀཐཱཡཉྩ ཨཱགཏེན པཀཱརནྟརེན།

    Pāḷinayenāti khandhavibhaṅgapāḷinayena. Aññena pakārenāti dhammasaṅgahe, tadaṭṭhakathāyañca āgatena pakārantarena.

    ༡. རཱུཔཀྑནྡྷནིདྡེསཝཎྞནཱ

    1. Rūpakkhandhaniddesavaṇṇanā

    ༢. ‘‘ཀིཉྩཱི’’ཏི པདཾ ‘‘ཨེཀཙྩ’’ནྟི ཨིམིནཱ སམཱནཏྠནྟི ཨཱཧ ‘‘ཀིཉྩཱིཏི པཀཱརནྟརབྷེདཾ ཨཱམསིཏྭཱ ཨནིཡམནིདསྶན’’ནྟི། ཨུབྷཡེནཱཏི པཀཱརབྷེདཾ ཨནཱམསིཏྭཱ ཨཱམསིཏྭཱ ཙ ཨནིཡམདསྶནཝསེན པཝཏྟེན ‘‘ཡཾ ཀིཉྩཱི’’ཏི པདདྭཡེན། ཨདྷིཔྤེཏཏྠནྟི རཱུཔཾ། ཨཏིཙྩཱཏི ཨཏིཀྐམིཏྭཱ། པཝཏྟིཏོཏི པཝཏྟནཏོ། ནིཡམནཏྠནྟི ནིཝཏྟནཏྠཾ།

    2. ‘‘Kiñcī’’ti padaṃ ‘‘ekacca’’nti iminā samānatthanti āha ‘‘kiñcīti pakārantarabhedaṃ āmasitvā aniyamanidassana’’nti. Ubhayenāti pakārabhedaṃ anāmasitvā āmasitvā ca aniyamadassanavasena pavattena ‘‘yaṃ kiñcī’’ti padadvayena. Adhippetatthanti rūpaṃ. Aticcāti atikkamitvā. Pavattitoti pavattanato. Niyamanatthanti nivattanatthaṃ.

    ‘‘ཀིཉྩཱ’’ཏི ཨེཏྠ ཀིཾ-སདྡོ པུཙྪཱཡཾ ཧེཏུཨཏྠདཱིཔཀོ, ཀརཎེ ཙེཏཾ པཙྩཏྟཝཙནཾ, ཙ-སདྡོ ཝཙནཱལངྐཱརོཏི ཨཱཧ ‘‘ཀེན ཀཱརཎེན ཝདེཐཱ’’ཏི། དུཏིཡཝིཀཔྤེ པན ཝུཏྟནཡེནེཝ ཀཱརཎཏྠེ པཝཏྟཾ ཀིཾ-སདྡཾ ‘‘ཝདེཐཱ’’ཏི ཀིརིཡཱཔདསམྦནྡྷནེན ཨུཔཡོགཝསེན པརིཎཱམེཏྭཱ ཝདཏི ‘‘ཏཾ ཀཱརཎཾ ཝདེཐཱ’’ཏི།

    ‘‘Kiñcā’’ti ettha kiṃ-saddo pucchāyaṃ hetuatthadīpako, karaṇe cetaṃ paccattavacanaṃ, ca-saddo vacanālaṅkāroti āha ‘‘kena kāraṇena vadethā’’ti. Dutiyavikappe pana vuttanayeneva kāraṇatthe pavattaṃ kiṃ-saddaṃ ‘‘vadethā’’ti kiriyāpadasambandhanena upayogavasena pariṇāmetvā vadati ‘‘taṃ kāraṇaṃ vadethā’’ti.

    པུརིམསནྟཱནསྶ བྷེདནྟི པུརིམསནྟཱནསྶ ཝིནཱསཾ, ཝིནཱསཱཔདེསེན ཙེཏྠ སནྟཱནེ ཝིསདིསུཔྤཱདམེཝ དསྶེཏི། ཏེནེཝཱཧ ‘‘ཝིསདིསསནྟཱནུཔྤཏྟིདསྶནཏོ’’ཏི། ནནུ ཙ ཨརཱུཔདྷམྨཱནམྤི ཝིརོདྷིཔཙྩཡསམཝཱཡེ ཝིསདིསུཔྤཏྟི ཨཏྠཱིཏི? སཙྩཾ ཨཏྠི, སཱ པན ན པཱཀཊཏརཱ, པཱཀཊཏརཱ ཙ ཨིདྷཱདྷིཔྤེཏཱ། ཏེནེཝཱཧ ‘‘སཱིཏཱདིསནྣིཔཱཏེ’’ཏི། ཏཐཱ ཙཱཧ བྷགཝཱ ‘‘སཱིཏེནཔི རུཔྤཏི, ཨུཎྷེནཔི རུཔྤཏཱི’’ཏིཨཱདི (སཾ॰ ནི॰ ༣.༧༩)། ཨིདཱནི བྷེད-སདྡོ ཨུཛུཀམེཝ ཝིཀཱརཱཔཏྟིཾ ཝདཏཱིཏི དསྶེནྟོ ‘‘བྷེདོ ཙཱ’’ཏིཨཱདིམཱཧ ། ཝིསདིསརཱུཔུཔྤཏྟིཡེཝ, ན ཨུཔྤནྣསྶ ཨཉྙཐཱབྷཱཝོཏི ཨདྷིཔྤཱཡོ། ཏེན ཀཱཔིལིཡཾ པརིཎཱམཝཱདཾ པཊིཀྑིཔཏི། ཡདི པུརིམསནྟཱནཏོ བྷེདོ ཝིསདིསུཔྤཏྟི རུཔྤནཾ, ཨེཝཾ སནྟེ ལཀྑཎསྶ ཨཏིཔྤསངྒོ སིཡཱཏི ཙོདནཾ མནསི ཀཏྭཱ ཨཱཧ ‘‘ཨརཱུཔཀྑནྡྷཱན’’ནྟིཨཱདི། ཨེཏྠ སཱིཏཱདཱིཧཱིཏི ཨཱདི-སདྡེན ཡཐཱ ཨུཎྷཛིགྷཙྪཱདཡོ སངྒཡ྄ཧནྟི, ཨེཝཾ ཨཱཧཱརཱདཱིནམྤི སངྒཧོ དཊྛབྦོ། ཡེནཱཏི ཡེན སཱིཏཱདཱིཧི སམཱགམེན། ཏཏྠཱཏི ཏེསུ རཱུཔདྷམྨེསུ། ཨཱཧཱརཱདིཀསྶ ཝཱ ཋིཏིཔྤཏྟསྶཱཏི སམྦནྡྷོ། ཡཐཱ རཱུཔདྷམྨཱནཾ ཋིཏིཀྑཎེ སཱིཏཱདཱིཧི སམཱགམོ ཧོཏི, ཨེཝཾ ཨརཱུཔཀྑནྡྷཱནཾ ཨཉྙེཧི སམཱགམོ ནཏྠི ཨཏིལཧུཔརིཝཏྟིཏོ, ཏསྨཱ ཨརཱུཔདྷམྨཱ རཱུཔདྷམྨཱནཾ ཝིཡ པཱཀཊསྶ ཝིཀཱརསྶ ཨབྷཱཝཏོ ‘‘རུཔྤནྟཱི’’ཏི, ‘‘རུཔྤནལཀྑཎཱ’’ཏི ཙ ན ཝུཙྩནྟཱིཏི སམྦནྡྷོ། ‘‘རུཔྤཏཱི’’ཏི པདསྶ ཀཏྟུཀམྨསཱདྷནཱནཾ ཝསེན ཨཏྠཾ དསྶེཏུཾ ཨཊྛཀཐཱཡཾ ‘‘ཀུཔྤཏི གྷཊྚཱིཡཏི པཱིལཱི༹ཡཏི བྷིཛྫཏཱི’’ཏི ཝུཏྟནྟི ཏདཏྠཾ ཝིཝརནྟོ ‘‘ཀུཔྤཏཱིཏི ཨེཏེནཱ’’ཏིཨཱདིམཱཧ། ཀོཔཱདིཀིརིཡཱཏི ཀོཔསངྒྷཊྚནཔཱིལ༹ནཀིརིཡཱ། ཀོཔ-སདྡོ ཙེཏྠ ཁོབྷཔརིཡཱཡོ ཝེདིཏབྦོ། ཀཏྟུབྷཱུཏོ ཀམྨབྷཱུཏོ ཙ ཨཏྠོཏི ཀཏྟུཀམྨསཱདྷནཱནཾ ཝསེན ཝུཙྩམཱནོ བྷཱུཏུཔཱདཱཡརཱུཔསངྑཱཏོ ཨཏྠོ། ཀམྨཀཏྟུཏྠེན བྷིཛྫཏི-སདྡེནཱཏི ཡདཱ ཀམྨཀཏྟུཏྠོ རུཔྤཏི-སདྡོ, ཏདཱ བྷིཛྫཏི-སདྡོཔི ཏདཏྠོ ཨེཝ ཝེདིཏབྦོཏི ཨཏྠོ། ཏཏྠ ཡདཱ ཀམྨཏྠེ ‘‘རུཔྤཏཱི’’ཏི པདཾ, ཏདཱ ‘‘སཱིཏེནཱ’’ཏིཨཱདཱིསུ ཀཏྟུཨཏྠེ ཀརཎཝཙནཾ། ཡདཱ པན ‘‘རུཔྤཏཱི’’ཏི པདཾ ཀཏྟུཨཏྠེ ཀམྨཀཏྟུཨཏྠེ ཝཱ, ཏདཱ ཧེཏུམྷི ཀརཎཝཙནཾ ཝེདིཏབྦཾ། ‘‘ཡཾ པན རུཔྤཏཱི’’ཏིཨཱདིནཱ ‘‘ཀུཔྤཏཱི’’ཏིཨཱདཱིནཾ ཀཏྟུཀམྨཏྠཱནམྤི ཨཏྠཝཙནཱནཾ ཝཙནེ ཀཱརཎཾ དསྶེཏི། ཡདིཔི ཨཏྠ-སདྡོ ‘‘པཱིལ༹ནཊྛོ’’ཏིཨཱདཱིསུ (པཊི॰ མ॰ ༡.༡༧; ༢.༨) སབྷཱཝཔརིཡཱཡོཔི ཧོཏི, ‘‘ཀེནཊྛེནཱ’’ཏི པནེཏྠ ཨབྷིདྷེཡྻཔརིཡཱཡོ ཨདྷིཔྤེཏོཏི ཨཱཧ ‘‘ཀེནཊྛེནཱཏི པུཙྪཱསབྷཱགཝསེན རུཔྤནཊྛེནཱ’’ཏི, རུཔྤནསདྡཱབྷིདྷེཡྻབྷཱཝེནཱཏི ཨཏྠོ། ཏེནེཝཱཧ ‘‘ན ཀེཝལཾ སདྡཏྠོཡེཝ རུཔྤན’’ནྟི། ཏསྶ ཨཏྠསྶཱཏི ཏསྶ བྷཱུཏུཔཱདཱཡཔྤབྷེདསྶ སབྷཱཝདྷམྨསྶ། རུཔྤནལཀྑཎཉྩ ནཱམེཏཾ ཨནིཙྩཏཱདི ཝིཡ ཀཀྑལ༹ཏྟཱདིཏོ ཨཉྙནྟི ན གཧེཏབྦཾ། པཉྙཏྟིཝིསེསོ ཧི ཏནྟི, ཀཀྑལ༹ཏྟཱདཱིནཾཡེཝ པན ཨརཱུཔདྷམྨཝིདྷུརོ སབྷཱཝཝིསེསོཏི ཝེདིཏབྦཾ།

    Purimasantānassa bhedanti purimasantānassa vināsaṃ, vināsāpadesena cettha santāne visadisuppādameva dasseti. Tenevāha ‘‘visadisasantānuppattidassanato’’ti. Nanu ca arūpadhammānampi virodhipaccayasamavāye visadisuppatti atthīti? Saccaṃ atthi, sā pana na pākaṭatarā, pākaṭatarā ca idhādhippetā. Tenevāha ‘‘sītādisannipāte’’ti. Tathā cāha bhagavā ‘‘sītenapi ruppati, uṇhenapi ruppatī’’tiādi (saṃ. ni. 3.79). Idāni bheda-saddo ujukameva vikārāpattiṃ vadatīti dassento ‘‘bhedo cā’’tiādimāha . Visadisarūpuppattiyeva, na uppannassa aññathābhāvoti adhippāyo. Tena kāpiliyaṃ pariṇāmavādaṃ paṭikkhipati. Yadi purimasantānato bhedo visadisuppatti ruppanaṃ, evaṃ sante lakkhaṇassa atippasaṅgo siyāti codanaṃ manasi katvā āha ‘‘arūpakkhandhāna’’ntiādi. Ettha sītādīhīti ādi-saddena yathā uṇhajighacchādayo saṅgayhanti, evaṃ āhārādīnampi saṅgaho daṭṭhabbo. Yenāti yena sītādīhi samāgamena. Tatthāti tesu rūpadhammesu. Āhārādikassa vā ṭhitippattassāti sambandho. Yathā rūpadhammānaṃ ṭhitikkhaṇe sītādīhi samāgamo hoti, evaṃ arūpakkhandhānaṃ aññehi samāgamo natthi atilahuparivattito, tasmā arūpadhammā rūpadhammānaṃ viya pākaṭassa vikārassa abhāvato ‘‘ruppantī’’ti, ‘‘ruppanalakkhaṇā’’ti ca na vuccantīti sambandho. ‘‘Ruppatī’’ti padassa kattukammasādhanānaṃ vasena atthaṃ dassetuṃ aṭṭhakathāyaṃ ‘‘kuppati ghaṭṭīyati pīḷīyati bhijjatī’’ti vuttanti tadatthaṃ vivaranto ‘‘kuppatīti etenā’’tiādimāha. Kopādikiriyāti kopasaṅghaṭṭanapīḷanakiriyā. Kopa-saddo cettha khobhapariyāyo veditabbo. Kattubhūto kammabhūto ca atthoti kattukammasādhanānaṃ vasena vuccamāno bhūtupādāyarūpasaṅkhāto attho. Kammakattutthena bhijjati-saddenāti yadā kammakattuttho ruppati-saddo, tadā bhijjati-saddopi tadattho eva veditabboti attho. Tattha yadā kammatthe ‘‘ruppatī’’ti padaṃ, tadā ‘‘sītenā’’tiādīsu kattuatthe karaṇavacanaṃ. Yadā pana ‘‘ruppatī’’ti padaṃ kattuatthe kammakattuatthe vā, tadā hetumhi karaṇavacanaṃ veditabbaṃ. ‘‘Yaṃ pana ruppatī’’tiādinā ‘‘kuppatī’’tiādīnaṃ kattukammatthānampi atthavacanānaṃ vacane kāraṇaṃ dasseti. Yadipi attha-saddo ‘‘pīḷanaṭṭho’’tiādīsu (paṭi. ma. 1.17; 2.8) sabhāvapariyāyopi hoti, ‘‘kenaṭṭhenā’’ti panettha abhidheyyapariyāyo adhippetoti āha ‘‘kenaṭṭhenāti pucchāsabhāgavasena ruppanaṭṭhenā’’ti, ruppanasaddābhidheyyabhāvenāti attho. Tenevāha ‘‘na kevalaṃ saddatthoyeva ruppana’’nti. Tassa atthassāti tassa bhūtupādāyappabhedassa sabhāvadhammassa. Ruppanalakkhaṇañca nāmetaṃ aniccatādi viya kakkhaḷattādito aññanti na gahetabbaṃ. Paññattiviseso hi tanti, kakkhaḷattādīnaṃyeva pana arūpadhammavidhuro sabhāvavisesoti veditabbaṃ.

    མུཙྪཱཔཏྟིཡཱཏི མུཙྪཱཡ མོཧསྶ ཨཱཔཛྫནེན། ཀཔྤསཎྛཱནཾ ཨུདཀནྟི ཀཔྤསཎྛཱཔཀམཧཱམེགྷཝུཊྛཾ ཨུདཀཾ། ཏཐཱཏི ཏཔྤཀཱརཏཱཡ ཁཱརབྷཱཝེ སཏི ཨུདཀེན ཀཔྤཝུཊྛཱནཀཱལེ ཝིཡ པཐཝཱི ཝིལཱིཡེཡྻ། ལོཀནྟརིཡསཏྟཱནཾ པན པཱཔཀམྨབལེན ཨཁཱརེཔི ཁཱརེ ཝིཡ སརཱིརསྶ ཝིལཱིཡནཱ ཝེདིཏབྦཱ། ཏེནེཝཱཏི སཨུསྶདནིསྶཡནིརཡསྶ ཝུཏྟཏྟཱ ཨེཝ། ན ཧི ཨཝཱིཙིམྷི པཉྩཝིདྷབནྡྷནཱདིཀམྨཀཱརཎཾ ཀརོནྟི།

    Mucchāpattiyāti mucchāya mohassa āpajjanena. Kappasaṇṭhānaṃ udakanti kappasaṇṭhāpakamahāmeghavuṭṭhaṃ udakaṃ. Tathāti tappakāratāya khārabhāve sati udakena kappavuṭṭhānakāle viya pathavī vilīyeyya. Lokantariyasattānaṃ pana pāpakammabalena akhārepi khāre viya sarīrassa vilīyanā veditabbā. Tenevāti saussadanissayanirayassa vuttattā eva. Na hi avīcimhi pañcavidhabandhanādikammakāraṇaṃ karonti.

    ༣. པཀརཎཔྤཏྟཾ རཱུཔཾ པཀྑིཔིཏྭཱ མཱཏིཀཱ ཋཔིཏཱཏི ཨཱནེཏྭཱ སམྦནྡྷོ། མཧཱབྷཱུཏུ…པེ॰… ཨཱཔཛྫཏི ཏཔྤཀཱརབྷཱཝེན ཨཏཱིཏཾསེ གཎནཾ གཏནྟི ཝུཏྟཏྟཱཏི ཨདྷིཔྤཱཡོ། ‘‘ན ཧཱི’’ཏིཨཱདིནཱ དྷམྨནྟརནིཝཏྟནཏྠཏཱ པཀཱརནྟརནིཝཏྟནཏྠཏཱ ཙ བྷཱུཏུཔཱདཱཡགཧཎསྶ ནཏྠཱིཏི དསྶེཏི། ཏཾདསྶནེཏི གཎནནྟརདསྶནེ། ཏཾསབྷཱཝཏྟཱཏི བྷཱུཏུཔཱདཱཡསབྷཱཝཏྟཱ། ‘‘ན ཙཱ’’ཏིཨཱདིནཱ བྷཱུཏུཔཱདཱཡསབྷཱཝོ ཨཏཱིཏཾསགཎིཏཏཱཡ ཏཾསབྷཱཝསྶཔི ཨཉྙཐཱ གཎིཏཏྟཱ, ཨཏཾསབྷཱཝསྶ ཙ ཏཐཱ གཎིཏཏྟཱ ཨཀཱརཎནྟི དསྶེཏི། ‘‘ཨཛ྄ཛྷཏྟ…པེ॰… ལབྦྷཏཱི’’ཏི ཨེཏེན དུཏིཡནཡེ ན ཀེཝལཾ ཡཐཱཝུཏྟོཝ དོསོ, ཨཐ ཁོ ཨབྱཱཔིཏོཔི དོསོཏི དསྶེཏི། ཏདེཏཾ པན ཨཀཱརཎཾ ཀཱརཎབྷཱཝསྶེཝ ཨནདྷིཔྤེཏཏྟཱ། ན ཧེཏྠ བྷཱུཏུཔཱདཱཡརཱུཔབྷཱཝོ ཨཏཱིཏཾསེ གཎནསྶ ཀཱརཎནྟི ཨདྷིཔྤེཏཾ, ཡཏོ ཡཐཱཝུཏྟདོསཱཔཏྟི སིཡཱ།

    3. Pakaraṇappattaṃ rūpaṃ pakkhipitvā mātikā ṭhapitāti ānetvā sambandho. Mahābhūtu…pe… āpajjati tappakārabhāvena atītaṃse gaṇanaṃ gatanti vuttattāti adhippāyo. ‘‘Na hī’’tiādinā dhammantaranivattanatthatā pakārantaranivattanatthatā ca bhūtupādāyagahaṇassa natthīti dasseti. Taṃdassaneti gaṇanantaradassane. Taṃsabhāvattāti bhūtupādāyasabhāvattā. ‘‘Na cā’’tiādinā bhūtupādāyasabhāvo atītaṃsagaṇitatāya taṃsabhāvassapi aññathā gaṇitattā, ataṃsabhāvassa ca tathā gaṇitattā akāraṇanti dasseti. ‘‘Ajjhatta…pe… labbhatī’’ti etena dutiyanaye na kevalaṃ yathāvuttova doso, atha kho abyāpitopi dosoti dasseti. Tadetaṃ pana akāraṇaṃ kāraṇabhāvasseva anadhippetattā. Na hettha bhūtupādāyarūpabhāvo atītaṃse gaṇanassa kāraṇanti adhippetaṃ, yato yathāvuttadosāpatti siyā.

    ‘‘ཀིནྟཱི’’ཏི ཨེཏྠ ‘‘ཀི’’ནྟི པུབྦེ ཡཾ ‘‘རཱུཔ’’ནྟི སཱམཉྙཏོ གཧིཏཾ, ཏསྶ སརཱུཔཔུཙྪཱ། ཨིཏི-སདྡོ ནིདསྶནཏྠོ, ན ཀཱརཎཏྠོ། ཏེནསྶ ཡཾ རཱུཔཾ ཨཏཱིཏཾ ནིརུདྡྷཾ…པེ॰… ཨཏཱིཏཾསེན སངྒཧིཏཾ ཨཏཱིཏཀོཊྛཱསེ གཎནཾ གཏཾ, ཏཾ ཀིནྟི ཙེ? ‘‘ཙཏྟཱརོ ཙ…པེ॰… རཱུཔ’’ནྟི བྷཱུཏུཔཱདཱཡཝིབྷཱགདསྶནམུཁེན ཝིསེསཾ ནིདསྶེཏི། ཡཏྟཀཱ ཧི ཨིདྷ ཝིསེསཱ ནིདྡིཊྛཱ ཙཀྑཱཡཏནཱདཡོ, ཏེསམིདཾ ནིདསྶནནྟི། ན ཙེཏྠ པུརིམནཡཏོ ཨཝིསེསོ། ཏཏྠ ཧི རཱུཔསྶ བྷཱུཏུཔཱདཱཡཏཱམཏྟསབྷཱཝདསྶནཏཱ ཝུཏྟཱ། ཏེནཱཧ ཨཊྛཀཐཱཡཾ ‘‘ཨཏཱིཏརཱུཔམྤི བྷཱུཏཱནི ཙེཝཱ’’ཏིཨཱདི། ཨིདྷ པན བྷཱུཏུཔཱདཱཡེན ནིདསྶནབྷཱུཏེན རཱུཔསྶ སབྦཝིསེསཝིབྷཱཝནཏཱ དསྶིཏཱ། ཨེཝཉྩ ཀཏྭཱ ཨབྱཱཔིཏདོསོཔི ཙེཏྠ ཨནོཀཱསོཝ, ཡཾ རཱུཔཾ ཨཛ྄ཛྷཏྟཾ…པེ॰… ཨུཔཱདིནྣཾ, ཀིནྟི? ཙཏྟཱརོ ཙ…པེ॰… རཱུཔནྟི ཏདཉྙཝིསེསནིདསྶནསྶ ཨདྷིཔྤེཏཏྟཱ། ཏཐཱ ཙཱཧ ‘‘ཨེཝཾ སབྦཏྠ ཨཏྠོ ཝེདིཏབྦོ’’ཏི།

    ‘‘Kintī’’ti ettha ‘‘ki’’nti pubbe yaṃ ‘‘rūpa’’nti sāmaññato gahitaṃ, tassa sarūpapucchā. Iti-saddo nidassanattho, na kāraṇattho. Tenassa yaṃ rūpaṃ atītaṃ niruddhaṃ…pe… atītaṃsena saṅgahitaṃ atītakoṭṭhāse gaṇanaṃ gataṃ, taṃ kinti ce? ‘‘Cattāro ca…pe… rūpa’’nti bhūtupādāyavibhāgadassanamukhena visesaṃ nidasseti. Yattakā hi idha visesā niddiṭṭhā cakkhāyatanādayo, tesamidaṃ nidassananti. Na cettha purimanayato aviseso. Tattha hi rūpassa bhūtupādāyatāmattasabhāvadassanatā vuttā. Tenāha aṭṭhakathāyaṃ ‘‘atītarūpampi bhūtāni cevā’’tiādi. Idha pana bhūtupādāyena nidassanabhūtena rūpassa sabbavisesavibhāvanatā dassitā. Evañca katvā abyāpitadosopi cettha anokāsova, yaṃ rūpaṃ ajjhattaṃ…pe… upādinnaṃ, kinti? Cattāro ca…pe… rūpanti tadaññavisesanidassanassa adhippetattā. Tathā cāha ‘‘evaṃ sabbattha attho veditabbo’’ti.

    པརིཡཱཡདེསནཏྟཱཏི སབྷཱཝཏོ པརིཡཱཡནཾ པརིཝཏྟནཾ པརིཡཱཡོ, ཨུཛུཀཾ ཨཔྤཝཏྟཱིཏི ཨཏྠོ། པརིཡཱཡེན, པརིཡཱཡབྷཱུཏཱ ཝཱ དེསནཱ ཨེཏྠཱཏི པརིཡཱཡདེསནཾ, སུཏྟནྟཾ། སུཏྟནྟཉྷི ཝེནེཡྻཛ྄ཛྷཱསཡཝསེན དེསེཏབྦདྷམྨེ ལེསཏོ ལབྦྷམཱནབྷཱཝཀཐནཾ, ན ཨུཛུནིཔྤདེསབྷཱཝཀཐནནྟི པརིཡཱཡདེསནཾ ནཱམ། ཏེནེཝ ཏཾ ‘‘ཡཐཱནུལོམསཱསན’’ནྟི ཝུཙྩཏི། ཨབྷིདྷམྨོ པན དེསེཏབྦདྷམྨེ ཨུཛུནིཔྤདེསཀཐནནྟི ནིཔྤརིཡཱཡདེསནཾ ནཱམ, ཡཏོ ‘‘ཡཐཱདྷམྨསཱསན’’ནྟི ཝུཙྩཏི། ནིཙྪཡེན དེསོཏི ཝཝཏྠཱནཏོ ཀཐནཾ། ཏཐཱ བྷདྡེཀརཏྟསུཏྟཱདཱིསུ (མ॰ ནི॰ ༣.༢༧༢ ཨཱདཡོ) ཝིཡ ཨཏཱིཏཱདིབྷཱཝོ ཨཏཱིཏཱནཱགཏཔཙྩུཔྤནྣབྷཱཝོ ཨདྡྷཱཝསེན ཨིདྷཱཔི ཁནྡྷཝིབྷངྒེ སུཏྟནྟབྷཱཛནཱིཡཏྟཱ ནིདྡིསིཏབྦོ སིཡཱཏི ཡོཛནཱ།

    Pariyāyadesanattāti sabhāvato pariyāyanaṃ parivattanaṃ pariyāyo, ujukaṃ appavattīti attho. Pariyāyena, pariyāyabhūtā vā desanā etthāti pariyāyadesanaṃ, suttantaṃ. Suttantañhi veneyyajjhāsayavasena desetabbadhamme lesato labbhamānabhāvakathanaṃ, na ujunippadesabhāvakathananti pariyāyadesanaṃ nāma. Teneva taṃ ‘‘yathānulomasāsana’’nti vuccati. Abhidhammo pana desetabbadhamme ujunippadesakathananti nippariyāyadesanaṃ nāma, yato ‘‘yathādhammasāsana’’nti vuccati. Nicchayena desoti vavatthānato kathanaṃ. Tathā bhaddekarattasuttādīsu (ma. ni. 3.272 ādayo) viya atītādibhāvo atītānāgatapaccuppannabhāvo addhāvasena idhāpi khandhavibhaṅge suttantabhājanīyattā niddisitabbo siyāti yojanā.

    སནྣིཔཏིཏནྟི སམཱགཏཾ། སནྟཱནཝསེནཱཏི པུབྦཱཔརཝསེན། པུབྦེནཱཔརསྶ སམཔྤམཱཎཏཱཡ ཨནཱུནཾ ཨནདྷིཀཾ, ཏཏོ ཨེཝ ཨེཀཱཀཱརཾ། པཝཏྟིཀཱལཝསེན ཝཱ ཨནཱུནཾ ཨནདྷིཀཾ, སམཱནསབྷཱཝཏཱཡ ཨེཀཱཀཱརཾ། ཏེན ཝིསབྷཱགཨུཏུནཱ ཨནནྟརིཏཏཾ དསྶེཏི། ཨེཝཾ ཨཱཧཱརེཔཱིཏི ཨེཏྠ ཝིསབྷཱགཱཧཱརེན ཨནནྟརིཏོ ཨནེཀཝཱརཾ ཨནེཀདིཝསམྤི བྷུཏྟོ སབྷཱགེཀཱཧཱརཾ ནཱམ། ‘‘ཏཏོ པུབྦེ ཝིསབྷཱགཨུཏུཨཱཧཱརསམུཊྛཱནཾ ཨཏཱིཏཾ, པཙྪཱ ཨནཱགཏ’’ནྟི ཧི ཝུཏྟནྟི། ‘‘ཨེཀཱཧཱརསམུཊྛཱན’’ནྟི པན ཝུཏྟཏྟཱ ཨེཀསྶེཝ ཨཱཧཱརསྶ ཡོཛནཱ ཡུཏྟརཱུཔཱཏི ཨཔརེ། པཉྩདྭཱརཝསེནཱཏི ཨེཏྠ པཉྩདྭཱརཱཝཛྫནཏོ པཊྛཱཡ ཡཱཝ ཏདཱརམྨཎཾ, ཡཱཝ ཛཝནཾ, ཡཱཝ ཝཱ ཝོཊྛབྦནཾ, ཏཱཝ པཝཏྟཱ ཙིཏྟསནྟཏི ཨེཀཝཱིཐི། ཨེཀཛཝནསམུཊྛཱནནྟི ཨེཀཛཝནཝཱརསམུཊྛཱནཾ། ཨེཏྠ ཙ སམཡཾ ཨནཱམསིཏྭཱཝ སནྟཏིཝསེན, སནྟཏིཉྩ ཨནཱམསིཏྭཱཝ སམཡཝསེན ཨཏཱིཏཱདིཝིབྷཱགོ གཧེཏབྦོ།

    Sannipatitanti samāgataṃ. Santānavasenāti pubbāparavasena. Pubbenāparassa samappamāṇatāya anūnaṃ anadhikaṃ, tato eva ekākāraṃ. Pavattikālavasena vā anūnaṃ anadhikaṃ, samānasabhāvatāya ekākāraṃ. Tena visabhāgautunā anantaritataṃ dasseti. Evaṃ āhārepīti ettha visabhāgāhārena anantarito anekavāraṃ anekadivasampi bhutto sabhāgekāhāraṃ nāma. ‘‘Tato pubbe visabhāgautuāhārasamuṭṭhānaṃ atītaṃ, pacchā anāgata’’nti hi vuttanti. ‘‘Ekāhārasamuṭṭhāna’’nti pana vuttattā ekasseva āhārassa yojanā yuttarūpāti apare. Pañcadvāravasenāti ettha pañcadvārāvajjanato paṭṭhāya yāva tadārammaṇaṃ, yāva javanaṃ, yāva vā voṭṭhabbanaṃ, tāva pavattā cittasantati ekavīthi. Ekajavanasamuṭṭhānanti ekajavanavārasamuṭṭhānaṃ. Ettha ca samayaṃ anāmasitvāva santativasena, santatiñca anāmasitvāva samayavasena atītādivibhāgo gahetabbo.

    ཏེསནྟི ཧེཏུཔཙྩཡཱནཾ། ཀལཱཔསྶཱཏི རཱུཔཀལཱཔསྶ། ཀམྨཱནནྟརཱདཱིཏི ཀམྨཱདི, ཨནནྟརཱདཱིཏི པཙྩེཀཾ ཨཱདི-སདྡོ ཡོཛེཏབྦོ། ཏཏྠ པཋམེན ཨཱདིསདྡེན ཨུཔནིསྶཡཔཙྩཡསྶ ཨཱཧཱརཱདིནོ ཙ དུཏིཡེན སམནནྟརཱནནྟརཱུཔནིསྶཡཱདིནོ སངྒཧོ ཝེདིཏབྦོ། ཙིཏྟུཔྤཱདསྶ ཙེཏྠ ཀམྨཱནནྟརཱདིཔཙྩཡཝསེན, ཨིཏརསྶ ཀམྨཱདིཝསེནེཝ ཛནཀབྷཱཝེ ཡོཛནཱ དཊྛབྦཱ། ཏཐཱ ཙིཏྟུཔྤཱདསྶ པུརེཛཱཏཝསེན, ཨིཏརསྶ པཙྪཱཛཱཏཝསེན, ཨུབྷཡེསམྤི སཧཛཱཏཝསེན ཨུཔཏྠམྦྷནཾ ཝེདིཏབྦཾ ། ཏེནེཝཱཧ ‘‘ཡཐཱསམྦྷཝཾ ཡོཛེཏབྦ’’ནྟི། ཨུཔྤཱདཀྑཎེཏི ཧེཏུཀིཙྩཀྑཎེ། ཧེཏུཀིཙྩཾ ནཱམ ཏསྶ ཏསྶ ཨུཔྤཱདེཏབྦསྶ ཨུཔྤཏྟིཀརཎཾ, ཏཉྩ ཏསྨིཾ ཁཎེ ཨུཔྤནྣཕལཏྟཱ ཏཏོ པརཾ ཀཏྟབྦཱབྷཱཝཏོ ནིཊྛིཏཉྩཱཏི དཊྛབྦཾ། ཨིཏརཾ པན ཏཱིསུཔི ཁཎེསུ པཙྩཡཀིཙྩཾ དཊྛབྦནྟི ཡོཛནཱ།

    Tesanti hetupaccayānaṃ. Kalāpassāti rūpakalāpassa. Kammānantarādīti kammādi, anantarādīti paccekaṃ ādi-saddo yojetabbo. Tattha paṭhamena ādisaddena upanissayapaccayassa āhārādino ca dutiyena samanantarānantarūpanissayādino saṅgaho veditabbo. Cittuppādassa cettha kammānantarādipaccayavasena, itarassa kammādivaseneva janakabhāve yojanā daṭṭhabbā. Tathā cittuppādassa purejātavasena, itarassa pacchājātavasena, ubhayesampi sahajātavasena upatthambhanaṃ veditabbaṃ . Tenevāha ‘‘yathāsambhavaṃ yojetabba’’nti. Uppādakkhaṇeti hetukiccakkhaṇe. Hetukiccaṃ nāma tassa tassa uppādetabbassa uppattikaraṇaṃ, tañca tasmiṃ khaṇe uppannaphalattā tato paraṃ kattabbābhāvato niṭṭhitañcāti daṭṭhabbaṃ. Itaraṃ pana tīsupi khaṇesu paccayakiccaṃ daṭṭhabbanti yojanā.

    ༦. ཨནིཊྛནཱམནིཝཏྟནསྶཱཏི ཨནིཊྛནཱམནིཝཏྟིཡཱ ཨཀཱརཎབྷཱཝདསྶནེན ཨིཊྛནཱམལཱབྷཱཔནསྶ ཨཀཱརཎབྷཱཝཾ དསྶེཏི།

    6. Aniṭṭhanāmanivattanassāti aniṭṭhanāmanivattiyā akāraṇabhāvadassanena iṭṭhanāmalābhāpanassa akāraṇabhāvaṃ dasseti.

    དེཝམནུསྶསམྤཏྟིབྷཝེཏི སམྤཏྟིཡུཏྟེ སམྤནྣེ དེཝམནུསྶབྷཝེ། སམིདྡྷསོབྷནཏཱཏི ཨབྷིཝུདྡྷསོབྷནཏཱ། ཏཏོ ཨེཝཱཏི སམྤཏྟིཝིརཧཏོ ཨེཝ, ཨསམྤནྣཏྟཱ ཨེཝཱཏི ཨཏྠོ། ཏེསཾཡེཝ ཧཏྠིཨཱདཱིནཾ སུཁསྶ ཧེཏུབྷཱཝཾ ན གཙྪནྟི སཱརཎཱདིཝསེན དུཀྑཔཙྩཡཏྟཱ། ཏེསནྟི ཧཏྠིརཱུཔཱདཱིནཾ། ‘‘ཏསྶ ཏསྶེཝཱ’’ཏིཨཱདིནཱ ཡཐཱཝུཏྟམཏྠཾ ཝིཝརཏི། ཨཀུསལེན ཨཏྟནཱ ཀཏེན ནིབྦཏྟཾ དུཀྑསྶ པཙྩཡོ ཧོཏཱིཏི ཡོཛནཱ། ཏསྨཱཏི ཡསྨཱ ཀམྨཾ ཡསྨིཾ སནྟཱནེ ནིབྦཏྟཾ, ཏཏྠེཝ སུཁདུཀྑཱནཾ པཙྩཡོ ཧོཏི, ན ཨཉྙཏྠ, ཏསྨཱ། ཨཊྛཀཐཱཡཾ པནཱཏི ཨེཀཙྩམཏདསྶནཾ། ཏཏྠ ‘‘ཨནིཊྛཾ ནཱམ ནཏྠཱི’’ཏི ཡསྨཱ པཊིསེདྷདྭཡེན ཀུསལཀམྨཛསྶ ཨིཊྛབྷཱཝོ ནིཡཏོ, ཏསྨཱ ‘‘ཀུསལཀམྨཛམེཝ ཨིཊྛ’’ནྟི ཨེཝཾ ཨནིཡམེཏྭཱ ‘‘ཀུསལཀམྨཛཾ ཨིཊྛམེཝཱ’’ཏི ཨེཝམེཏྠ ནིཡམོ གཧེཏབྦོཏི དསྶེནྟོ ‘‘ཨཀུསལཀམྨཛམྤཱི’’ཏིཨཱདིམཱཧ། ཀིནྟི ཨཀུསལཀམྨཛཾ སོབྷནཾ, ཡཾ པརེསཾ ཨིཊྛཾ ནཱམ སིཡཱ? ཡདི དུགྒཏིཡཾ ཀེསཉྩི ཏིརཙྪཱནཱནཾ སཎྛཱནཱདིསམྤཏྟི སུགཏིཡཾ སཏྟཱནཾ ཨཀུསལནིསྶནྡེན ཝིརཱུཔརཱུཔཏཱ ཝིཡ ཀུསལནིསྶནྡེན, ཀཐཾ ཏསྶཱ ཨཀུསལཀམྨཛཏཱ། ཨཐ པན ཡཾ ཀེསཉྩི ཨམནཱཔམྤི སམཱནཾ རཱུཔཾ མནཱཔཾ ཧུཏྭཱ ཨུཔཊྛཱཏི, ཏཾ སནྡྷཱཡ ཝུཏྟཾ, ཨེཝམྤི ཡཐཱ ཀེསཉྩི ཏིརཙྪཱནཱདཱིནཾ ཀུསལཀམྨཛཾ མནུསྶཱདིརཱུཔཾ ཨམནཱཔཏོ ཨུཔཊྛཧནྟམྤི ཀུསལཝིཔཱཀསྶེཝ ཨཱརམྨཎབྷཱཝཏོ ཨཏྠཏོ ཨིཊྛམེཝ ནཱམ ཧོཏི, ཨེཝཾ ཨཀུསལཀམྨཛཾ ཀེསཉྩི མནཱཔཾ ཧུཏྭཱ ཨུཔཊྛཧནྟམྤི ཨཀུསལཝིཔཱཀསྶེཝ ཨཱརམྨཎབྷཱཝཏོ ཨཏྠཏོ ཨནིཊྛམེཝ ནཱམ ཧོཏི, ཨེཝཉྩེཏཾ སམྤཊིཙྪིཏབྦཾ། ཨཉྙཐཱ ‘‘ཨཊྛཱནམེཏཾ ཨནཝཀཱསོ, ཡཾ ཀཱཡདུཙྩརིཏསྶ ཨིཊྛོ ཀནྟོ མནཱཔོ ཝིཔཱཀོ ཨུཔྤཛྫེཡྻཱ’’ཏིཨཱདིཨཊྛཱནཔཱལི༹ཡཱ (མ॰ ནི॰ ༣.༡༣༡) ཝིརོདྷོ སིཡཱ། ཏེནེཝཱཧ ‘‘ཀུསལཀམྨཛསྶ པནཱ’’ཏིཨཱདི། སབྦེསནྟི ཨཏྟནོ, པརེསཉྩ ། ཨིཊྛསྶ ཨབྷཱཝོ ཝཏྟབྦོཏི ཡཐཱ ‘‘ཀུསལཀམྨཛཾ ཨནིཊྛཾ ནཱམ ནཏྠཱི’’ཏི ཝུཏྟཾ, ཨེཝཾ ཀིཉྩཱཔི ‘‘ཨཀུསལཀམྨཛཾ ཨིཊྛཾ ནཱམ ནཏྠཱི’’ཏི ཨཊྛཀཐཱཡཾ ན ཝུཏྟཾ, ཏེན པན ནཡདསྶནེན ཨཀུསལཀམྨཛསྶ ཨབྷཱཝོ ཝུཏྟོ ཨེཝ ཧོཏཱིཏི སོ སཾཝཎྞནཱཝསེན ནིདྡྷཱརེཏྭཱ ཝཏྟབྦོཏི ཨདྷིཔྤཱཡོ། ཨེཏེན ཀུསལཀམྨཛམེཝ ཨིཊྛནྟི པུརིམཔདཱཝདྷཱརཎསྶ གཧེཏབྦཏཾ དསྶེཏི།

    Devamanussasampattibhaveti sampattiyutte sampanne devamanussabhave. Samiddhasobhanatāti abhivuddhasobhanatā. Tato evāti sampattivirahato eva, asampannattā evāti attho. Tesaṃyeva hatthiādīnaṃ sukhassa hetubhāvaṃ na gacchanti sāraṇādivasena dukkhapaccayattā. Tesanti hatthirūpādīnaṃ. ‘‘Tassa tassevā’’tiādinā yathāvuttamatthaṃ vivarati. Akusalena attanā katena nibbattaṃ dukkhassa paccayo hotīti yojanā. Tasmāti yasmā kammaṃ yasmiṃ santāne nibbattaṃ, tattheva sukhadukkhānaṃ paccayo hoti, na aññattha, tasmā. Aṭṭhakathāyaṃ panāti ekaccamatadassanaṃ. Tattha ‘‘aniṭṭhaṃ nāma natthī’’ti yasmā paṭisedhadvayena kusalakammajassa iṭṭhabhāvo niyato, tasmā ‘‘kusalakammajameva iṭṭha’’nti evaṃ aniyametvā ‘‘kusalakammajaṃ iṭṭhamevā’’ti evamettha niyamo gahetabboti dassento ‘‘akusalakammajampī’’tiādimāha. Kinti akusalakammajaṃ sobhanaṃ, yaṃ paresaṃ iṭṭhaṃ nāma siyā? Yadi duggatiyaṃ kesañci tiracchānānaṃ saṇṭhānādisampatti sugatiyaṃ sattānaṃ akusalanissandena virūparūpatā viya kusalanissandena, kathaṃ tassā akusalakammajatā. Atha pana yaṃ kesañci amanāpampi samānaṃ rūpaṃ manāpaṃ hutvā upaṭṭhāti, taṃ sandhāya vuttaṃ, evampi yathā kesañci tiracchānādīnaṃ kusalakammajaṃ manussādirūpaṃ amanāpato upaṭṭhahantampi kusalavipākasseva ārammaṇabhāvato atthato iṭṭhameva nāma hoti, evaṃ akusalakammajaṃ kesañci manāpaṃ hutvā upaṭṭhahantampi akusalavipākasseva ārammaṇabhāvato atthato aniṭṭhameva nāma hoti, evañcetaṃ sampaṭicchitabbaṃ. Aññathā ‘‘aṭṭhānametaṃ anavakāso, yaṃ kāyaduccaritassa iṭṭho kanto manāpo vipāko uppajjeyyā’’tiādiaṭṭhānapāḷiyā (ma. ni. 3.131) virodho siyā. Tenevāha ‘‘kusalakammajassa panā’’tiādi. Sabbesanti attano, paresañca . Iṭṭhassa abhāvo vattabboti yathā ‘‘kusalakammajaṃ aniṭṭhaṃ nāma natthī’’ti vuttaṃ, evaṃ kiñcāpi ‘‘akusalakammajaṃ iṭṭhaṃ nāma natthī’’ti aṭṭhakathāyaṃ na vuttaṃ, tena pana nayadassanena akusalakammajassa abhāvo vutto eva hotīti so saṃvaṇṇanāvasena niddhāretvā vattabboti adhippāyo. Etena kusalakammajameva iṭṭhanti purimapadāvadhāraṇassa gahetabbataṃ dasseti.

    ཨིདཱནི ‘‘ཧཏྠིཨཱདཱིནམྤཱི’’ཏིཨཱདིནཱ ཏམེཝཏྠཾ ཝིཝརཏི། ཀུསལཝིཔཱཀསྶཱཏི ཨེཏྠཱཔི ཀུསལཝིཔཱཀསྶེཝ ཨཱརམྨཎནྟི ཨཏྠོ། མནུསྶཱནནྟི ཙ ནིདསྶནམཏྟཾ དཊྛབྦཾ། ཨིཏརེསམྤི ཙ ཨཀུསལཀམྨཛཾ ཨཀུསལཝིཔཱཀསྶེཝ, ཀུསལཀམྨཛཉྩ ཀུསལཝིཔཱཀསྶེཝ ཨཱརམྨཎནྟི དསྶིཏོཝཱཡཾ ནཡོཏི། ཀསྨཱ པན ཨིཊྛཱནིཊྛམིསྶིཏེ ཝཏྠུམྷི མནཱཔཏཱཝ སཎྛཱཏཱིཏི ཨཱཧ ‘‘ཨིཊྛཱརམྨཎེན…པེ॰… སཀྐཱ ཝཏྟུ’’ནྟི། སུཊྛུ ཝུཏྟནྟི ‘‘ཨིཊྛཱནིཊྛཾ ཨེཀནྟཏོ ཝིཔཱཀེནེཝ པརིཙྪིཛྫཏཱི’’ཏི ཝདནྟེཧི ཨིཊྛཱནིཊྛཱརམྨཎཝཝཏྠཱནཾ སམྨདེཝ ཝུཏྟཾ། ཏཾ ཨནུགནྟྭཱཏི ཝིཔཱཀཝསེན ཨིཊྛཱནིཊྛཱརམྨཎཝཝཏྠཱནཾ ཨནུགནྟྭཱ། སབྦཏྠཱཏི སུགཏིདུགྒཏཱིསུ, སབྦེསུ ཝཱ ཨཱརམྨཎེསུ།

    Idāni ‘‘hatthiādīnampī’’tiādinā tamevatthaṃ vivarati. Kusalavipākassāti etthāpi kusalavipākasseva ārammaṇanti attho. Manussānanti ca nidassanamattaṃ daṭṭhabbaṃ. Itaresampi ca akusalakammajaṃ akusalavipākasseva, kusalakammajañca kusalavipākasseva ārammaṇanti dassitovāyaṃ nayoti. Kasmā pana iṭṭhāniṭṭhamissite vatthumhi manāpatāva saṇṭhātīti āha ‘‘iṭṭhārammaṇena…pe… sakkā vattu’’nti. Suṭṭhu vuttanti ‘‘iṭṭhāniṭṭhaṃ ekantato vipākeneva paricchijjatī’’ti vadantehi iṭṭhāniṭṭhārammaṇavavatthānaṃ sammadeva vuttaṃ. Taṃ anugantvāti vipākavasena iṭṭhāniṭṭhārammaṇavavatthānaṃ anugantvā. Sabbatthāti sugatiduggatīsu, sabbesu vā ārammaṇesu.

    ‘‘ཨནིཊྛཱ’’ཏི ཝཙནེནེཝ ཏེསཾ ཨིཊྛཏཱ ནིཝཏྟིཏཱཏི ཨཱཧ ‘‘སདིསཏཱ ཙ རཱུཔཱདིབྷཱཝོཡེཝཱ’’ཏི། ཨིཊྛཱནེཝ རཱུཔཱདཱིནི ཀཱམགུཎཱཏི སུཏྟེ ཝུཏྟཱནཱིཏི མིཏྟཔཊིཔཀྑོ ཨམིཏྟོ ཝིཡ ཨིཊྛཔཊིཔཀྑཱ ཨནིཊྛཱཏི ཨདྷིཔྤེཏཱཏི ཝུཏྟཾ ‘‘ཨནིཊྛཱཏི…པེ॰… ཝོཧཱརོ ཝིཡཱ’’ཏི། སབྦཱནི ཝཱཏི ཨེཏྠ ‘‘པིཡརཱུཔཾ སཱཏརཱུཔ’’ནྟི (དཱི॰ ནི॰ ༢.༤༠༠; མ॰ ནི॰ ༡.༡༣༣; ཝིབྷ॰ ༢༠༣) ཝཙནཏོ ཀཐཾ ཨནིཊྛཱནཾ རཱུཔཱདཱིནཾ ཀཱམགུཎབྷཱཝཱཔཏྟཱིཏི ཙེ? ཏེསམྤི ཝིཔལླཱསཝསེན ཏཎྷཱཝཏྠུབྷཱཝཏོ པིཡརཱུཔབྷཱཝསྶ ཨདྷིཔྤེཏཏྟཱ། ཡདི ཨེཝཾ ཀཐཾ ‘‘ཙཀྑུཝིཉྙེཡྻཱནི རཱུཔཱནི ཨིཊྛཱནཱི’’ཏིཨཱདིསུཏྟཔདཾ (མ॰ ནི॰ ༡.༡༦༦; ༢.༡༥༥; ༣.༥༧; སཾ॰ ནི॰ ༥.༣༠) ནཱིཡཏཱིཏི ཨཱཧ ‘‘ཨཏིསཡེནཱ’’ཏིཨཱདི།

    ‘‘Aniṭṭhā’’ti vacaneneva tesaṃ iṭṭhatā nivattitāti āha ‘‘sadisatā ca rūpādibhāvoyevā’’ti. Iṭṭhāneva rūpādīni kāmaguṇāti sutte vuttānīti mittapaṭipakkho amitto viya iṭṭhapaṭipakkhā aniṭṭhāti adhippetāti vuttaṃ ‘‘aniṭṭhāti…pe… vohāro viyā’’ti. Sabbāni vāti ettha ‘‘piyarūpaṃ sātarūpa’’nti (dī. ni. 2.400; ma. ni. 1.133; vibha. 203) vacanato kathaṃ aniṭṭhānaṃ rūpādīnaṃ kāmaguṇabhāvāpattīti ce? Tesampi vipallāsavasena taṇhāvatthubhāvato piyarūpabhāvassa adhippetattā. Yadi evaṃ kathaṃ ‘‘cakkhuviññeyyāni rūpāni iṭṭhānī’’tiādisuttapadaṃ (ma. ni. 1.166; 2.155; 3.57; saṃ. ni. 5.30) nīyatīti āha ‘‘atisayenā’’tiādi.

    ཨིནྡྲིཡབདྡྷརཱུཔཝསེན པཱལི༹ཡཾ ཧཱིནདུཀནིདྡེསོ པཝཏྟོཏི དསྶེཏུཾ ‘‘དྭཱིསུཔི ཧཱིནཔཎཱིཏཔདེསཱུ’’ཏིཨཱདིམཱཧ། ཨཝཡཝཡོགེ སཱམིཝཙནཾ, ན ཀཏྟརཱིཏི ཨདྷིཔྤཱཡོ། ‘‘ཏེསཾ ཏེསཾ སཏྟཱན’’ནྟི ཨིནྡྲིཡབདྡྷརཱུཔེ ནིདྡིཊྛེ ཀསྨཱ ཀམྨཛཝསེན ཨཏྠོ ཝུཏྟོ, ན ཙཏུསནྟཏིཝསེནཱཏི ཨཱཧ ‘‘སཏྟསནྟཱན…པེ॰… ཝུཏྟ’’ནྟི། པདྷཱནཏྟཱ ཧི ཀམྨཛཝསེན ཨཏྠཾ ཝཏྭཱ སེསེསུ ‘‘ཨེཝཾ ཨུཏུསམུཊྛཱནཱདཱིསུཔཱི’’ཏི ཨཊྛཀཐཱཡཾ ཨཏིདེསོ ཀཏོ ། ‘‘ཏེཧི ཏེཧཱིཏི ཨེཏསྨིཾ ཨཏྠེ’’ཏི ཨིམིནཱ ‘‘ཏེསཾ ཏེས’’ནྟི ཀཏྟརི སཱམིཝཙནཾ ཨཱསངྐཏི། ཏཐཱ སཏི ཝིསཡེ ཝཱ སཱམིཝཙནེ ལདྡྷགུཎཾ དསྶེཏི ‘‘ན ཀམྨཛཝསེནེཝཱ’’ཏིཨཱདིནཱ, ཀམྨཛགྒཧཎཉྩེཏྠ ཨུཔལཀྑཎཾ དཊྛབྦཾ།

    Indriyabaddharūpavasena pāḷiyaṃ hīnadukaniddeso pavattoti dassetuṃ ‘‘dvīsupi hīnapaṇītapadesū’’tiādimāha. Avayavayoge sāmivacanaṃ, na kattarīti adhippāyo. ‘‘Tesaṃ tesaṃ sattāna’’nti indriyabaddharūpe niddiṭṭhe kasmā kammajavasena attho vutto, na catusantativasenāti āha ‘‘sattasantāna…pe… vutta’’nti. Padhānattā hi kammajavasena atthaṃ vatvā sesesu ‘‘evaṃ utusamuṭṭhānādīsupī’’ti aṭṭhakathāyaṃ atideso kato . ‘‘Tehi tehīti etasmiṃ atthe’’ti iminā ‘‘tesaṃ tesa’’nti kattari sāmivacanaṃ āsaṅkati. Tathā sati visaye vā sāmivacane laddhaguṇaṃ dasseti ‘‘na kammajavasenevā’’tiādinā, kammajaggahaṇañcettha upalakkhaṇaṃ daṭṭhabbaṃ.

    མརིཡཱདཱབྷཱུཏནྟི ཨུཏྟམམརིཡཱདཱབྷཱུཏཾ། ཏེནེཝཱཧ ‘‘ཡསྶ ཡེཝ མནཱཔཱ, ཏསྶ ཏེཝ པརམཱ’’ཏི། ཏེསནྟི ཀཱམགུཎཱནཾ། སབྷཱཝཏོཏི ལཀྑཎཏོ།

    Mariyādābhūtanti uttamamariyādābhūtaṃ. Tenevāha ‘‘yassa yeva manāpā, tassa teva paramā’’ti. Tesanti kāmaguṇānaṃ. Sabhāvatoti lakkhaṇato.

    ‘‘ཨེཀསྨིཾཡེཝ ཨསྶཱདནཀུཛ྄ཛྷནཏོ’’ཏིཨཱདིནཱ ‘‘ཡསྨཱ ཏེཡེཝ རཱུཔཱདཡོ ཨེཀོ ཨསྶཱདེཏཱི’’ཏིཨཱདིཀཾ སུཏྟནྟཝིཝརཎཾ ཨིཊྛཱནིཊྛབྷཱཝེ ཧེཏུབྷཱཝེན ཝུཏྟནྟི དསྶེཏི། ཨིཊྛཱནིཊྛགྒཧཎཾ ཧོཏཱིཏི ནིབྦཱནེ ཝིཡ ཨནིཊྛགྒཧཎཾ སཉྙཱཝིཔལླཱསེན ཨཉྙེསུཔི ཨཱརམྨཎེསུ ཨིཊྛཱནིཊྛཱབྷིནིཝེསོ ཧོཏཱིཏི ཨདྷིཔྤཱཡོ།

    ‘‘Ekasmiṃyeva assādanakujjhanato’’tiādinā ‘‘yasmā teyeva rūpādayo eko assādetī’’tiādikaṃ suttantavivaraṇaṃ iṭṭhāniṭṭhabhāve hetubhāvena vuttanti dasseti. Iṭṭhāniṭṭhaggahaṇaṃ hotīti nibbāne viya aniṭṭhaggahaṇaṃ saññāvipallāsena aññesupi ārammaṇesu iṭṭhāniṭṭhābhiniveso hotīti adhippāyo.

    ཝིབྷཱགོ ནཱམ ཨསངྐརོ, ཝིཏྠཱརོ ཙཱཏི ‘‘ཝིབྷཏྟ’’ནྟི པདསྶ ‘‘ཝཝཏྠིཏཾ, པཀཱསིཏ’’ནྟི ཙ ཨཏྠམཱཧ། ཨཉྙེསནྟི ཨཏིཨཌྜྷདལིདྡཱནཾ། ཨིདཾ ཨིཊྛཾ, ཨནིཊྛཉྩ ཧོཏཱིཏི ཨེཏྠ ཙ-སདྡེན ཨནིཊྛཾ, ཨིཊྛཉྩ ཧོཏཱིཏི ཨཡམྤི ཨཏྠོ ཝུཏྟོཏི ཝེདིཏབྦཾ། ཨནིཊྛཾ ཨིཊྛནྟི ཨིཊྛསྶ ‘‘ཨནིཊྛ’’ནྟི, ཨནིཊྛསྶ ‘‘ཨིཊྛ’’ནྟི གཧཎེ ཡཐཱསངྑྱཾ ཡོཛནཱ། ཨིནྡྲིཡཝིཀཱརཱཔཏྟིཨཱདིནཱཏི ཨེཏྠ ཨཱདི-སདྡེན པུབྦཱབྷིསངྑཱརཱདིཾ སངྒཎྷཱཏི། པུརེཏརཾ པཝཏྟཙིཏྟཱབྷིསངྑཱརཝསེནཱཔི ཧི ཝིནཱཝ སཉྙཱཝིཔལླཱསཾ ཨིཊྛཾ ‘‘ཨནིཊྛ’’ནྟི, ཨནིཊྛཉྩ ‘‘ཨིཊྛ’’ནྟི གཡ྄ཧཏཱིཏི།

    Vibhāgo nāma asaṅkaro, vitthāro cāti ‘‘vibhatta’’nti padassa ‘‘vavatthitaṃ, pakāsita’’nti ca atthamāha. Aññesanti atiaḍḍhadaliddānaṃ. Idaṃ iṭṭhaṃ, aniṭṭhañca hotīti ettha ca-saddena aniṭṭhaṃ, iṭṭhañca hotīti ayampi attho vuttoti veditabbaṃ. Aniṭṭhaṃ iṭṭhanti iṭṭhassa ‘‘aniṭṭha’’nti, aniṭṭhassa ‘‘iṭṭha’’nti gahaṇe yathāsaṅkhyaṃ yojanā. Indriyavikārāpattiādināti ettha ādi-saddena pubbābhisaṅkhārādiṃ saṅgaṇhāti. Puretaraṃ pavattacittābhisaṅkhāravasenāpi hi vināva saññāvipallāsaṃ iṭṭhaṃ ‘‘aniṭṭha’’nti, aniṭṭhañca ‘‘iṭṭha’’nti gayhatīti.

    ཏེན ཝིཔཱཀེནཱཏི ཏེན ཀུསལཱཀུསལཝིཔཱཀེན། ཨཱརམྨཎསྶ ཨིཊྛཱནིཊྛཏནྟི ཡཏྠ ཏཾ ཨུཔྤཛྫཏི, ཏསྶ བུདྡྷརཱུཔཱདིཀསྶ གཱུཐཱདིཀསྶ ཙ ཨཱརམྨཎསྶ ཡཐཱཀྐམཾ ཨིཊྛཏཾ ཨནིཊྛཏཉྩ ནིདསྶེཏི། ཝིཛྫམཱནེཔི སཉྙཱཝིཔལླཱསེ ཨཱརམྨཎེན ཝིཔཱཀནིཡམདསྶནནྟི ཨིཊྛཱརམྨཎེ ཀུསལཝིཔཱཀོཝ ཨུཔྤཛྫཏི, ཨནིཊྛཱརམྨཎེ ཨཀུསལཝིཔཱཀོཝཱཏི ཨེཝཾ ཨཱརམྨཎེན ཝིཔཱཀནིཡམདསྶནཾ། ཨཱརམྨཎནིཡམདསྶནཏྠནྟི ཡཾ ཀུསལཝིཔཱཀསྶ ཨཱརམྨཎཾ, ཏཾ ཨིཊྛཾ ནཱམ། ཡཾ ཨཀུསལཝིཔཱཀསྶ ཨཱརམྨཎཾ, ཏཾ ཨནིཊྛཾ ནཱམཱཏི དསྶནཏྠཾ། ཨཱརམྨཎེན ནིཡཱམིཏོ ཧི ཝིཔཱཀོ ཨཏྟནོ ཨུཔཀཱརཀསྶ ཨཱརམྨཎསྶ ནིཡཱམཀོ ཧོཏཱིཏི།

    Tena vipākenāti tena kusalākusalavipākena. Ārammaṇassa iṭṭhāniṭṭhatanti yattha taṃ uppajjati, tassa buddharūpādikassa gūthādikassa ca ārammaṇassa yathākkamaṃ iṭṭhataṃ aniṭṭhatañca nidasseti. Vijjamānepi saññāvipallāse ārammaṇena vipākaniyamadassananti iṭṭhārammaṇe kusalavipākova uppajjati, aniṭṭhārammaṇe akusalavipākovāti evaṃ ārammaṇena vipākaniyamadassanaṃ. Ārammaṇaniyamadassanatthanti yaṃ kusalavipākassa ārammaṇaṃ, taṃ iṭṭhaṃ nāma. Yaṃ akusalavipākassa ārammaṇaṃ, taṃ aniṭṭhaṃ nāmāti dassanatthaṃ. Ārammaṇena niyāmito hi vipāko attano upakārakassa ārammaṇassa niyāmako hotīti.

    དྭཱརནྟརེ དུཀྑསྶ པཙྩཡབྷཱུཏསྶ ཨཱརམྨཎསྶ དྭཱརནྟརེ སུཁཝིཔཱཀུཔྤཱདནཏོ, དྭཱརནྟརེ སུཁསྶ པཙྩཡབྷཱུཏསྶ ཨཱརམྨཎསྶ དྭཱརནྟརེ དུཀྑཝིཔཱཀུཔྤཱདནཏོ ཝིཔཱཀེན ཨཱརམྨཎནིཡམདསྶནེན ཝིཔཱཀཝསེན ཨིཊྛཱནིཊྛཏཱ དསྶིཏཱཏི ཡོཛནཱ།

    Dvārantare dukkhassa paccayabhūtassa ārammaṇassa dvārantare sukhavipākuppādanato, dvārantare sukhassa paccayabhūtassa ārammaṇassa dvārantare dukkhavipākuppādanato vipākena ārammaṇaniyamadassanena vipākavasena iṭṭhāniṭṭhatā dassitāti yojanā.

    ༧. དུཔྤརིགྒཧཊྛེན ཀཱརཎབྷཱུཏེན ལཀྑཎསྶ ཨིནྡྲིཡཱདིསབྷཱཝསྶ དུཔྤཊིཝིཛ྄ཛྷཏཱ, ཨེཝཾ སུཔརིགྒཧཊྛེན ལཀྑཎསུཔྤཊིཝིཛ྄ཛྷཏཱ ཝེདིཏབྦཱ། ‘‘དཱུརེ’’ཏི ཨཝུཏྟསྶཱཏི ལཀྑཎཏོ ‘‘དཱུརེ’’ཏི ཨཀཐིཏསྶ། ཝུཏྟམྤཱིཏི ལཀྑཎཏོ ‘‘དཱུརེ’’ཏི ཝུཏྟམྤི སུཁུམརཱུཔཾ།

    7. Duppariggahaṭṭhena kāraṇabhūtena lakkhaṇassa indriyādisabhāvassa duppaṭivijjhatā, evaṃ supariggahaṭṭhena lakkhaṇasuppaṭivijjhatā veditabbā. ‘‘Dūre’’ti avuttassāti lakkhaṇato ‘‘dūre’’ti akathitassa. Vuttampīti lakkhaṇato ‘‘dūre’’ti vuttampi sukhumarūpaṃ.

    ‘‘བྷིནྡམཱནོ’’ཏི སམྦྷིནྡམཱནོཏི ཝུཏྟཾ ཧོཏཱིཏི ཨཱཧ ‘‘མིསྶཀཾ ཀརོནྟོ’’ཏི། ཡསྨཱ པན བྷེདནཾ ཝིབྷཱགཀརཎམྤི ཧོཏི, ཏསྨཱ དུཏིཡཝིཀཔྤེ ‘‘བྷིནྡམཱནོ’’ཏི པདསྶ ‘‘ཝིསུཾ ཀརོནྟོ’’ཏི ཨཏྠམཱཧ། ཏཏིཡཝིཀཔྤེ པན བྷིནྡམཱནོཏི ཝིནཱསེནྟོཏི ཨཏྠོ། ཏེནཱཧ ‘‘སནྟིཀབྷཱཝཾ བྷིནྡིཏྭཱ དཱུརབྷཱཝཾ, དཱུརབྷཱཝཉྩ བྷིནྡིཏྭཱ སནྟིཀབྷཱཝཾ ཀརོནྟོ’’ཏི། ན ཧི སཀྐཱ སནྟིཀསྶ ཏབྦྷཱཝཾ ཨཝིནཱསེཏྭཱ དཱུརབྷཱཝཾ ཀཱཏུཾ, ཏཐཱ ཨིཏརསྶཱཔི། སནྟིཀབྷཱཝཀརཎེན ན བྷིནྡཏི ན ཝིནཱསེཏི, ན ཙ ཨོཀཱསདཱུརཏོ ལཀྑཎཏོ དཱུརཾ ཝིསུཾ ཀརཎེན བྷིནྡཏི ཝིབྷཱགཾ ཀརོཏི, ནཱཔི ཨོཀཱསདཱུརེན ལཀྑཎཏོ དཱུརཾ ཝོམིསྶཀཀརཎེན བྷིནྡཏི སམྦྷིནྡཏཱིཏི ཡོཛནཱ། ‘‘ཏིདྷཱ ཨཏྠོ དཊྛབྦོ’’ཏི སངྑེཔེན ཝུཏྟམཏྠཾ ‘‘ན ཧཱི’’ཏིཨཱདིནཱ ཝིཝརཏི། ཝིསུཾ ཀརོཏི, ཝོམིསྶཀཾ ཀརོཏཱིཏི ཀརོཏི-སདྡཾ ཨཱནེཏྭཱ སམྦནྡྷོ། ‘‘ཨེཏྠཱཔཱི’’ཏིཨཱདིནཱ ཡཐཱ ‘‘ཨོཀཱསཏོ དཱུརམེཝ བྷིནྡཏཱི’’ཏི ཨེཏྠ ཨོཀཱསཏོ དཱུརསྶ ཨོཀཱསཏོ སནྟིཀབྷཱཝཀརཎཾ ཨདྷིཔྤེཏནྟི ཝིནཱསནཾ བྷེདནཾ, ཨེཝཾ ‘‘ན ལཀྑཎཏོ དཱུརཾ བྷིནྡཏཱི’’ཏི ཨེཏྠཱཔི ལཀྑཎཏོ དཱུརསྶ ལཀྑཎཏོ སནྟིཀབྷཱཝཱཀརཎཾ ཨབྷེདནཾ ཨཝིནཱསནནྟི ཨིམམཏྠཾ དསྶེཏི། ཝོམིསྶཀཀརཎཝིབྷཱགཀརཎཏྠཏཾ སནྡྷཱཡཱཧ ‘‘བྷིནྡམཱནོཏི ཨེཏྠ ཙ ཨཉྙཐཱ བྷེདནཾ ཝུཏྟ’’ནྟི། པཙྪིམནཡེ ཝིནཱསནཏྠམེཝ སནྡྷཱཡ ‘‘བྷེདནཾ ཨིདྷ ཙ ཨཉྙཐཱ ཝུཏྟ’’ནྟི ཨཝོཙ།

    ‘‘Bhindamāno’’ti sambhindamānoti vuttaṃ hotīti āha ‘‘missakaṃ karonto’’ti. Yasmā pana bhedanaṃ vibhāgakaraṇampi hoti, tasmā dutiyavikappe ‘‘bhindamāno’’ti padassa ‘‘visuṃ karonto’’ti atthamāha. Tatiyavikappe pana bhindamānoti vināsentoti attho. Tenāha ‘‘santikabhāvaṃ bhinditvā dūrabhāvaṃ, dūrabhāvañca bhinditvā santikabhāvaṃ karonto’’ti. Na hi sakkā santikassa tabbhāvaṃ avināsetvā dūrabhāvaṃ kātuṃ, tathā itarassāpi. Santikabhāvakaraṇena na bhindati na vināseti, na ca okāsadūrato lakkhaṇato dūraṃ visuṃ karaṇena bhindati vibhāgaṃ karoti, nāpi okāsadūrena lakkhaṇato dūraṃ vomissakakaraṇena bhindati sambhindatīti yojanā. ‘‘Tidhā attho daṭṭhabbo’’ti saṅkhepena vuttamatthaṃ ‘‘na hī’’tiādinā vivarati. Visuṃ karoti, vomissakaṃ karotīti karoti-saddaṃ ānetvā sambandho. ‘‘Etthāpī’’tiādinā yathā ‘‘okāsato dūrameva bhindatī’’ti ettha okāsato dūrassa okāsato santikabhāvakaraṇaṃ adhippetanti vināsanaṃ bhedanaṃ, evaṃ ‘‘na lakkhaṇato dūraṃ bhindatī’’ti etthāpi lakkhaṇato dūrassa lakkhaṇato santikabhāvākaraṇaṃ abhedanaṃ avināsananti imamatthaṃ dasseti. Vomissakakaraṇavibhāgakaraṇatthataṃ sandhāyāha ‘‘bhindamānoti ettha ca aññathā bhedanaṃ vutta’’nti. Pacchimanaye vināsanatthameva sandhāya ‘‘bhedanaṃ idha ca aññathā vutta’’nti avoca.

    རཱུཔཀྑནྡྷནིདྡེསཝཎྞནཱ ནིཊྛིཏཱ།

    Rūpakkhandhaniddesavaṇṇanā niṭṭhitā.

    ༢. ཝེདནཱཀྑནྡྷནིདྡེསཝཎྞནཱ

    2. Vedanākkhandhaniddesavaṇṇanā

    ༨. ཙཀྑཱདཡོ པསཱདཱཏི ཨོལཱ༹རིཀཏྟབྷཱཝཔརིཡཱཔནྣཱ ཙཀྑུསོཏགྷཱནཛིཝ྄ཧཱཔསཱདཱ, མནོམཡཏྟབྷཱཝཔརིཡཱཔནྣཱ ཙཀྑུསོཏཔྤསཱདཱ ཙ། ཀཱཡཝོཧཱརཾ ཨརཧནྟཱིཏི ཀཱཡནྟོགདྷཏྟཱ ཀཱཡེཀདེསཏྟཱ ཙ ཀཱཡོཏི ཝཏྟབྦཏཾ ཨརཧནྟི། ཀཱཡོཏི ཧི ཨཏྟབྷཱཝོཔི ཝུཙྩཏི ‘‘སཀྐཱཡདིཊྛཱི’’ཏིཨཱདཱིསུ (སཾ॰ ནི॰ ༡.༢༡; ༣.༡༥༥), ཀརཛཀཱཡོཔི ‘‘སོ ཨིམམྷཱ ཀཱཡཱ ཨཉྙཾ ཀཱཡཾ ཨབྷིནིམྨིནཱཏཱི’’ཏིཨཱདཱིསུ (པཊི॰ མ॰ ༣.༡༤)། ཏབྦཏྠུཀཱཏི ཙཀྑཱདིནིསྶིཏཱ ཀཱཡིཀཱཏི པརིཡཱཡེན ཝུཏྟཱ, ནིཔྤརིཡཱཡེན པན ཙེཏསིཀཱཝ། ཡཐཱཧ ‘‘ཡཾ ཏསྨིཾ སམཡེ ཏཛྫཱཙཀྑུཝིཉྙཱཎདྷཱཏུསམྥསྶཛཾ ཙེཏསིཀཾ ནེཝ སཱཏཾ ནཱསཱཏཾ ཙེཏོསམྥསྶཛཾ ཨདུཀྑམསུཁཾ ཝེདཡིཏ’’ནྟིཨཱདི (དྷ॰ ས॰ ༡༥༢)། ‘‘ན ཧི ཙཀྑཱདཡོ ཀཱཡཔྤསཱདཱ ཧོནྟཱི’’ཏི ཨིམིནཱ ཀཱཡཔསཱདནིསྶིཏཱ ཝེདནཱ ནིཔྤརིཡཱཡེན ཀཱཡིཀཱཏི དསྶེཏི། ཀཱཡིཀཙེཏསིཀཱདིབྷཱཝེནཱཏི ཨཱདི-སདྡེན ཀུསལཱཀུསལཱབྱཱཀཏཱདིབྷཱཝཱ སངྒཡ྄ཧནྟི། ཏེནཱཏི སུཁཱདིཝེདནེཀདེསསྶ ཨདྡྷཱསམཡཝསེན ཨཏཱིཏཱདིབྷཱཝཱབྷཱཝེན། ཀེཙི པནེཏྠ ‘‘ཧེཊྛཱ དསྶིཏནཡཏྟཱ པཱཀཊཏྟཱ ཨདྡྷཱཝསེན, ཨེཀམུཧུཏྟཱདིཔུབྦཎྷཱདཱིསུ ཨུཏུཨཱདིནཱ རཱུཔསྶ ཝིཡ ཝེདནཱཡ ཝིབྷཱགོ ན གཡ྄ཧཏཱིཏི སམཡཝསེན ཙ ཨཏཱིཏཱདིབྷེདོ ན དསྶིཏོ’’ཏི ཝདནྟི། སནྟཱནཝསེན པཝཏྟཱནམྤི ཝེདནཱནཾ ཙིཏྟེན སམཱུཧཏོ གཧེཏབྦཏཾ སནྡྷཱཡཱཧ ‘‘ཝེདནཱསམུདཱཡོ’’ཏི། ཏེཧཱིཏི ཨདྡྷཱསམཡཝསེན ཨཏཱིཏཱདིབྷཱཝེཧི། ཨེཏྠཱཏི ཨེཏསྨིཾ ཝིབྷངྒེ། ཏེཏི ‘‘ཝེདནེཀདེསཱ’’ཏི ཝུཏྟཱ ཀཱཡིཀཙེཏསིཀཱདིབྷཱཝེན བྷིནྣཱ སུཁཱདིཝེདནཱཝིསེསཱ། ཡདི ཝེདནེཀདེསཱ ཨེཏྠ གཧིཏཱ, ཁཎཔརིཙྪིནྣཱཝ ཏེ གཧེཏབྦཱ, ན སནྟཏིཔརིཙྪིནྣཱཏི ཨཱཧ ‘‘ཨེཀསནྟཏིཡཾ པནཱ’’ཏིཨཱདི། ཏེསཱུཏི སུཁཱདིབྷེདེསུ། བྷེདོཏི ཝིསེསོ། ཏསྶཱཏི སུཁཱདིཝིསེསསྶ། ཡཐཱ ཙེཏྠ, ཨེཝཾ ‘‘ཏཾསཧིཏཏདུཔྤཱདཀཱ’’ཏི ཨེཏྠཱཔི ཏཾ-སདྡེན སུཁཱདིཝིསེསོ པཙྩཱམཊྛོཏི ཝེདིཏབྦོ། སནྟཏི པརིཙྪེདིཀཱ བྷཝིཏུཾ ཨརཧཏཱིཏི སམྦནྡྷོ། སནྟཏིཁཎཝསེནེཝ པརིཙྪེདོ ཝུཏྟོ, ན ཨདྡྷཱསམཡཝསེནཱཏི ཨདྷིཔྤཱཡོ།

    8. Cakkhādayopasādāti oḷārikattabhāvapariyāpannā cakkhusotaghānajivhāpasādā, manomayattabhāvapariyāpannā cakkhusotappasādā ca. Kāyavohāraṃ arahantīti kāyantogadhattā kāyekadesattā ca kāyoti vattabbataṃ arahanti. Kāyoti hi attabhāvopi vuccati ‘‘sakkāyadiṭṭhī’’tiādīsu (saṃ. ni. 1.21; 3.155), karajakāyopi ‘‘so imamhā kāyā aññaṃ kāyaṃ abhinimminātī’’tiādīsu (paṭi. ma. 3.14). Tabbatthukāti cakkhādinissitā kāyikāti pariyāyena vuttā, nippariyāyena pana cetasikāva. Yathāha ‘‘yaṃ tasmiṃ samaye tajjācakkhuviññāṇadhātusamphassajaṃ cetasikaṃ neva sātaṃ nāsātaṃ cetosamphassajaṃ adukkhamasukhaṃ vedayita’’ntiādi (dha. sa. 152). ‘‘Na hi cakkhādayo kāyappasādā hontī’’ti iminā kāyapasādanissitā vedanā nippariyāyena kāyikāti dasseti. Kāyikacetasikādibhāvenāti ādi-saddena kusalākusalābyākatādibhāvā saṅgayhanti. Tenāti sukhādivedanekadesassa addhāsamayavasena atītādibhāvābhāvena. Keci panettha ‘‘heṭṭhā dassitanayattā pākaṭattā addhāvasena, ekamuhuttādipubbaṇhādīsu utuādinā rūpassa viya vedanāya vibhāgo na gayhatīti samayavasena ca atītādibhedo na dassito’’ti vadanti. Santānavasena pavattānampi vedanānaṃ cittena samūhato gahetabbataṃ sandhāyāha ‘‘vedanāsamudāyo’’ti. Tehīti addhāsamayavasena atītādibhāvehi. Etthāti etasmiṃ vibhaṅge. Teti ‘‘vedanekadesā’’ti vuttā kāyikacetasikādibhāvena bhinnā sukhādivedanāvisesā. Yadi vedanekadesā ettha gahitā, khaṇaparicchinnāva te gahetabbā, na santatiparicchinnāti āha ‘‘ekasantatiyaṃ panā’’tiādi. Tesūti sukhādibhedesu. Bhedoti viseso. Tassāti sukhādivisesassa. Yathā cettha, evaṃ ‘‘taṃsahitataduppādakā’’ti etthāpi taṃ-saddena sukhādiviseso paccāmaṭṭhoti veditabbo. Santati paricchedikā bhavituṃ arahatīti sambandho. Santatikhaṇavaseneva paricchedo vutto, na addhāsamayavasenāti adhippāyo.

    ‘‘པུབྦནྟཱཔརནྟམཛ྄ཛྷགཏཱ’’ཏི ནིཊྛིཏཧེཏུཀིཙྩཱ ཨནིཊྛིཏཔཙྩཡཀིཙྩཱཏི ཝུཏྟཱ, ཏཾ པན ཨཏིཀྐནྟཧེཏུཔཙྩཡཀིཙྩནྟི ཨེཝཾ ཝུཏྟསྶ ནཡསྶ ཨུཔལཀྑཎནྟི ཨཱཧ ‘‘པུབྦནྟཱཔརནྟམཛ྄ཛྷགཏཱཏི ཨེཏེན ཧེཏུཔཙྩཡཀིཙྩཝསེན ཝུཏྟནཡཾ དསྶེཏཱི’’ཏི། ཨེཏྠ ཀུསལཱཀུསལཀིརིཡཝེདནཱནཾ རཱུཔསྶ ཝིཡ, ཝིཔཱཀཱནཾ ཝིཡ ཙ ཨཡཾ ནཱམ ཛནཀཧེཏཱུཏི ནིཔྤརིཡཱཡེན ན སཀྐཱ ཝཏྟུཾ, པརིཡཱཡེན པན ཨནནྟརཔཙྩཡབྷཱུཏོ ཧེཏཱུཏི ཝཏྟབྦོ།

    ‘‘Pubbantāparantamajjhagatā’’ti niṭṭhitahetukiccā aniṭṭhitapaccayakiccāti vuttā, taṃ pana atikkantahetupaccayakiccanti evaṃ vuttassa nayassa upalakkhaṇanti āha ‘‘pubbantāparantamajjhagatāti etena hetupaccayakiccavasena vuttanayaṃ dassetī’’ti. Ettha kusalākusalakiriyavedanānaṃ rūpassa viya, vipākānaṃ viya ca ayaṃ nāma janakahetūti nippariyāyena na sakkā vattuṃ, pariyāyena pana anantarapaccayabhūto hetūti vattabbo.

    ༡༡. སནྟཱཔནཀིཙྩནྟི པརིཌཧནཀིཙྩཾ། ཛཱཏིཨཱདིསངྐརནྟི ཛཱཏིསབྷཱཝཔུགྒལལོཀིཡལོཀུཏྟརཏོ སངྐརཾ སམྦྷེདཾ ཨཀཏྭཱ། སམཱནཛཱཏིཡནྟི ཨེཀཛཱཏིཡཾ། སུཁཏོ ཏཛྫཱཏིཡཱ ཨདུཀྑམསུཁཱ པཎཱིཏཱཏི ཡོཛེཏབྦཱཏི སམྦནྡྷོ། སམཱནབྷེདེཏི བྷཱུམནྟརཱདིསམཱནཝིབྷཱགེ། ཨུཔབྲཱུཧིཏཱནཾ དྷཱཏཱུནནྟི ཨུལཱ༹རརཱུཔསམུཊྛཱཔནེན པཎཱིཏཱནཾ རཱུཔདྷམྨཱནཾ། ཝིབཱདྷིཏཱནནྟི ནིཔྤཱིལི༹ཏཱནཾ མིལཱཔིཏཱནཾ། ཨུབྷཡནྟི སུཁཱདིདྭཡཾ། ཨེཏྠ ཙ ཁོབྷནཱ, ཨཱལུལ༹ནཱ ཙ ཀཱཡིཀསུཁསྶ ཝསེན ཝེདིཏབྦཱ། ཨབྷིསནྡནཱ ཛྷཱནསུཁསྶ། མདཡནཱ ཀཱམསུཁསྶ། ཏཐཱ ཚཱདནཱ། ཨཱསིཉྩནཱ སབྦསྶ། ཚཱདནཱ ཨཱསིཉྩནཱ ཝཱ སབྦསྶ ཝསེན ཝེདིཏབྦཱ།

    11. Santāpanakiccanti pariḍahanakiccaṃ. Jātiādisaṅkaranti jātisabhāvapuggalalokiyalokuttarato saṅkaraṃ sambhedaṃ akatvā. Samānajātiyanti ekajātiyaṃ. Sukhato tajjātiyā adukkhamasukhā paṇītāti yojetabbāti sambandho. Samānabhedeti bhūmantarādisamānavibhāge. Upabrūhitānaṃ dhātūnanti uḷārarūpasamuṭṭhāpanena paṇītānaṃ rūpadhammānaṃ. Vibādhitānanti nippīḷitānaṃ milāpitānaṃ. Ubhayanti sukhādidvayaṃ. Ettha ca khobhanā, āluḷanā ca kāyikasukhassa vasena veditabbā. Abhisandanā jhānasukhassa. Madayanā kāmasukhassa. Tathā chādanā. Āsiñcanā sabbassa. Chādanā āsiñcanā vā sabbassa vasena veditabbā.

    སབྷཱཝཱདིབྷེདེན ཙཱཏི སབྷཱཝཔུགྒལལོཀིཡཱདིབྷེདེན ཙ། ཨེཀནྟཔཎཱིཏེ ལོཀུཏྟརེ ཧཱིནཔཎཱིཏཱནཾ པཊིཔདཱནཾ ཝསེན ཧཱིནཔཎཱིཏཏཱ། ཨེཀནྟཧཱིནེ ཨཀུསལེ ཚནྡཱདིཝསེན ཧཱིནཔཎཱིཏཏཱ, ཨོལཱ༹རིཀསུཁུམཏཱ ཙ། ཏཐཱ ཧི ཝུཏྟཾ ཨཊྛཀཐཱཡཾ ‘‘ཡཱ ཨོལཱ༹རིཀཱ, སཱ ཧཱིནཱ། ཡཱ སུཁུམཱ, སཱ པཎཱིཏཱ’’ཏི (ཝིབྷ॰ ཨཊྛ॰ ༡༡)། ཨཀུསལཱདཱིསུ དོསསཧགཏཱདིཨནྟརབྷེདཝསེན ཨུཔཱདཱཡུཔཱདཱཡ ཨོལཱ༹རིཀསུཁུམཏཱ ཏཾཏཾཝཱཔནཝསེན ཝུཙྩཏི, ན ཀུསལཱཀུསལཱདིཝསེནཱཏི ཨཱཧ ‘‘ཏཾཏཾཝཱཔནཝསེན ཀཐནེཔི པརིཝཏྟནཾ ནཏྠཱི’’ཏི། དོསུསྶནྣཏཱཡཱཏི ཀིལེསཱདྷིཀཏཱཡ། ཏཐཱཏི དོསུསྶནྣཏཱཡ། ཀཐཾ པན ཀུསལེསུ དོསུསྶནྣཏཱ? ཨུཔནིསྶཡཝསེན, ཀིལེསཱདྷིཀེཧི སནྟཱནེ པཝཏྟམཱནཱ ཀུསལཱ དྷམྨཱ ཀིལེསེཧི སམྦཱདྷཔྤཏྟིཡཱ ཏིཎཱདཱིཧི སམྦཱདྷཔྤཏྟཱནི ཝིཡ སསྶཱནི ཝིཔུལཕལཨུལཱ༹རཕལཱ ན ཧོནྟཱིཏི། ཏཐཱཏི མནྡདོསཏཱཡ། ཀུསལཱནཾ མནྡདོསཏཱཔི ཝུཏྟནཡཱནུསཱརེན ཝེདིཏབྦཱ། ཨོལཱ༹རིཀསུཁུམནིཀནྟཱིཏི ཨེཏྠ ཨནྟོགདྷཝིསེསཾ ནིཀནྟིཡཱ ཨོལཱ༹རིཀསུཁུམཏཱསཱམཉྙཾ ཝུཏྟཾ། ཡཐཱ ཧེཏྠ ཨོལཱ༹རིཀསཱམཉྙེན ཨོལཱ༹རིཀོལཱ༹རིཀཏརོལཱ༹རིཀཏམཱ ནིཀནྟིཡོ གཡ྄ཧནྟི, ཏཐཱ སུཁུམསུཁུམཏརསུཁུམཏམཱ སུཁུམཏཱསཱམཉྙེན གཡ྄ཧནྟཱིཏི། སུཁུམཏམནིཀནྟིཝཏྠུནྟི ཙེཏྠ ཡཱཝ བྷཝགྒཾ ཝིཔསྶནཱཉཱཎཉྩ ཝེདིཏབྦཾ།

    Sabhāvādibhedena cāti sabhāvapuggalalokiyādibhedena ca. Ekantapaṇīte lokuttare hīnapaṇītānaṃ paṭipadānaṃ vasena hīnapaṇītatā. Ekantahīne akusale chandādivasena hīnapaṇītatā, oḷārikasukhumatā ca. Tathā hi vuttaṃ aṭṭhakathāyaṃ ‘‘yā oḷārikā, sā hīnā. Yā sukhumā, sā paṇītā’’ti (vibha. aṭṭha. 11). Akusalādīsu dosasahagatādiantarabhedavasena upādāyupādāya oḷārikasukhumatā taṃtaṃvāpanavasena vuccati, na kusalākusalādivasenāti āha ‘‘taṃtaṃvāpanavasena kathanepi parivattanaṃ natthī’’ti. Dosussannatāyāti kilesādhikatāya. Tathāti dosussannatāya. Kathaṃ pana kusalesu dosussannatā? Upanissayavasena, kilesādhikehi santāne pavattamānā kusalā dhammā kilesehi sambādhappattiyā tiṇādīhi sambādhappattāni viya sassāni vipulaphalauḷāraphalā na hontīti. Tathāti mandadosatāya. Kusalānaṃ mandadosatāpi vuttanayānusārena veditabbā. Oḷārikasukhumanikantīti ettha antogadhavisesaṃ nikantiyā oḷārikasukhumatāsāmaññaṃ vuttaṃ. Yathā hettha oḷārikasāmaññena oḷārikoḷārikataroḷārikatamā nikantiyo gayhanti, tathā sukhumasukhumatarasukhumatamā sukhumatāsāmaññena gayhantīti. Sukhumatamanikantivatthunti cettha yāva bhavaggaṃ vipassanāñāṇañca veditabbaṃ.

    ༡༣. ཡདི སིཡཱཏི ཡདི ཨསམྤཡོགོ ཝིསཾསཊྛོ སིཡཱ།

    13. Yadi siyāti yadi asampayogo visaṃsaṭṭho siyā.

    སནྟིཀཏོ ཨཀུསལཏོཏི ཨཀུསལབྷཱཝེན སནྟིཀཏོ ལོབྷསཧགཏཱདིཨཀུསལཝེདཡིཏཏོ། ཨཀུསལཱཏི དོསསཧགཏཱདིཨཀུསལཝེདནཱ དཱུརེཏི ཡཐཱ ཨུདྡྷརཱིཡཏི། ཏཏོ དཱུརཏོ ཀུསལཏོཏི ཏཏོ ཨཀུསལཏོ དཱུརཏོ ཀཱམཱཝཙརཱདིཀུསལཝེདཡིཏཏོ ཀུསལཱ ཀཱམཱཝཙརཱདིཀུསལཝེདནཱ། ‘‘ན སཀྐཱ’’ཏི ཝུཏྟཾ ཨུདྡྷརིཏུཾ ཨསཀྐུཎེཡྻཏཾ ‘‘ཏཐཱ ཧི སཏཱི’’ཏིཨཱདིནཱ ཝིཝརཏི། ཏསྨཱཏི ཡསྨཱ དཱུརཏོ སནྟིཀུདྡྷརཎཾ ཝུཏྟནཡེན སནྟིཀཏོ སནྟིཀུདྡྷརཎམེཝ ཧོཏི, ཏཐཱ སཏི ཨཏྠཝིསེསོ ན ཧོཏི, ཨུཔཱདཱཡུཔཱདཱཡ དཱུརསནྟིཀཏཱ ཨིདྷ ཝུཙྩཏི། ཏསྨཱ སནྟིཀཏོ སནྟིཀུདྡྷརཎཉྩ ན སཀྐཱ ཀཱཏུཾ ཨཏྠཝིསེསཱབྷཱཝཏོ, ཨནདྷིཔྤེཏཏྟཱ ཙཱཏི ཨདྷིཔྤཱཡོ།

    Santikatoakusalatoti akusalabhāvena santikato lobhasahagatādiakusalavedayitato. Akusalāti dosasahagatādiakusalavedanā dūreti yathā uddharīyati. Tato dūrato kusalatoti tato akusalato dūrato kāmāvacarādikusalavedayitato kusalā kāmāvacarādikusalavedanā. ‘‘Na sakkā’’ti vuttaṃ uddharituṃ asakkuṇeyyataṃ ‘‘tathā hi satī’’tiādinā vivarati. Tasmāti yasmā dūrato santikuddharaṇaṃ vuttanayena santikato santikuddharaṇameva hoti, tathā sati atthaviseso na hoti, upādāyupādāya dūrasantikatā idha vuccati. Tasmā santikato santikuddharaṇañca na sakkā kātuṃ atthavisesābhāvato, anadhippetattā cāti adhippāyo.

    ནནུ ཙ ཨཏིསཡཝཙནིཙྪཱཝསེན ཨཏྠེཝ ཨཏྠཝིསེསོཏི ཙོདནཾ མནསི ཀཏྭཱ ཨཱཧ ‘‘དཱུརདཱུརཏརཏཱཡ ཝིཡ སནྟིཀསནྟིཀཏརཏཱཡ ཙ ཨནདྷིཔྤེཏཏྟཱ’’ཏི། ཡཱཏི ཨཀུསལཝེདནཱ། ཏཏོཏི ཀུསལཝེདཡིཏཏོ། ཨིདྷ ཝུཏྟསྶ དཱུརསྶཱཏི ཨིམསྨིཾ ཝེདནཱཀྑནྡྷཝིབྷངྒེ ‘‘ཨཀུསལཱ ཝེདནཱ ཀུསལཱབྱཱཀཏཱཧི ཝེདནཱཧི དཱུརེ’’ཏིཨཱདིནཱ (ཝིབྷ॰ ༡༣) ཝུཏྟསྶ དཱུརསྶ། དཱུརཏོ ཨཙྩནྟཝིསབྷཱགཏྟཱཏི ཡཏོ ཡཾ ‘‘དཱུརེ’’ཏི ཝུཏྟཾ, ཏཏོ ཨཙྩནྟཝིསདིསཏྟཱ ཏསྶ ཝསེན དཱུརེ སནྟིཀཾ ནཏྠཱིཏི ན སཀྐཱ དཱུརཏོ སནྟིཀཾ ཨུདྡྷརིཏུཾ། ཨཡཉྷེཏྠ ཨདྷིཔྤཱཡོ – ཧེཊྛཱ ཡཱ ཝེདནཱ ཡཱཡ ཝེདནཱཡ དཱུརེཏི ཝུཏྟཱ, སཱ ཨེཝ ཏསྶཱ ཀེནཙིཔི པརིཡཱཡེན སནྟིཀེཏི ན ཨུདྡྷརིཏབྦཱཏི། སནྟིཀེཏི ཝུཏྟཝེདནཾཡེཝ སནྡྷཱཡ ཝདཏི། བྷིནྣེཏི ལོབྷསཧགཏཱདིཝསེན ཝིབྷཏྟེ། ཏཏྠེཝཱཏི ‘‘སནྟིཀེ’’ཏི ཝུཏྟཨཏྠེ ཨེཝ། ཨིདཾ ཝུཏྟཾ ཧོཏི – ‘‘ཨཀུསལཱ ཝེདནཱ ཨཀུསལཱཡ ཝེདནཱཡ སནྟིཀེ’’ཏི ཨེཝཾ ཝུཏྟཨཀུསལཱཡ ཝེདནཱཡམེཝ ལོབྷསཧགཏཱདིཝསེན ཝིབྷཏྟཱཡ དཱུརབྷཱཝོཔི ལབྦྷཏི། ཨེཝཾ སེསེསུཔཱིཏི།

    Nanu ca atisayavacanicchāvasena attheva atthavisesoti codanaṃ manasi katvā āha ‘‘dūradūrataratāya viya santikasantikataratāya ca anadhippetattā’’ti. Yāti akusalavedanā. Tatoti kusalavedayitato. Idha vuttassa dūrassāti imasmiṃ vedanākkhandhavibhaṅge ‘‘akusalā vedanā kusalābyākatāhi vedanāhi dūre’’tiādinā (vibha. 13) vuttassa dūrassa. Dūrato accantavisabhāgattāti yato yaṃ ‘‘dūre’’ti vuttaṃ, tato accantavisadisattā tassa vasena dūre santikaṃ natthīti na sakkā dūrato santikaṃ uddharituṃ. Ayañhettha adhippāyo – heṭṭhā yā vedanā yāya vedanāya dūreti vuttā, sā eva tassā kenacipi pariyāyena santiketi na uddharitabbāti. Santiketi vuttavedanaṃyeva sandhāya vadati. Bhinneti lobhasahagatādivasena vibhatte. Tatthevāti ‘‘santike’’ti vuttaatthe eva. Idaṃ vuttaṃ hoti – ‘‘akusalā vedanā akusalāya vedanāya santike’’ti evaṃ vuttaakusalāya vedanāyameva lobhasahagatādivasena vibhattāya dūrabhāvopi labbhati. Evaṃ sesesupīti.

    ཡདི སནྟིཀཏོ དཱུརཾ ལབྦྷཏི, ཡདགྒེན དཱུརཾ ལབྦྷཏི, ཏདགྒེན དཱུརཏོ སནྟིཀཾ ཨུདྡྷརིཡེཡྻཱཏི ཙོདནཾ མནསི ཀཏྭཱ ཨཱཧ ‘‘ཨུཔཱདཱཡུཔཱདཱཡ དཱུརཏོ ཙ སནྟིཀཾ ན སཀྐཱ ཨུདྡྷརིཏུ’’ནྟིཨཱདི། ཏསྶཏྠོ – ཡཾ སནྟིཀཏོ དཱུརཾ ལབྦྷཏི, ཡདིཔི ཏཾ ཝིསབྷཱགཊྛེན ལབྦྷཏི, ཏཐཱཔི ཡཾ ཏཏྠ སནྟིཀཾ ལབྦྷཏི, ཏཾ སབྷཱགཊྛེནེཝ ལབྦྷཏཱིཏི སནྟིཀཏོཝ སནྟིཀཾ ཨུདྡྷཊཾ སིཡཱཏི། ཏསྨཱཏི ཡསྨཱ ཝིསབྷཱགཊྛེན དཱུརཏཱ, སབྷཱགཊྛེན ཙ སནྟིཀཏཱ ཨིཙྪིཏཱ, ཏསྨཱ། ལོབྷསཧགཏཱཡ དོསསཧགཏཱ ཝིསབྷཱགཏཱཡ དཱུརེ སམཱནཱ ཀཐཾ སནྟིཀེ བྷཝེཡྻཱཏི ཨདྷིཔྤཱཡོ། ནནུ ཏཱསཾ ཨཀུསལསབྷཱགཏཱ ལབྦྷཏེཝཱཏི ཏཏྠ ཨུཏྟརམཱཧ ‘‘ཝིསབྷཱགཏཱ’’ཏིཨཱདི། ཏཏྠ བྷེདཾ ཨགྒཧེཏྭཱ ན པཝཏྟཏཱིཏི བྷེདཾ ཝིསེསཾ ཨསདིསཏཾ གཧེཏྭཱ ཨེཝ པཝཏྟཏི ཝིསབྷཱགཏཱ། དཱུརཏཱཡཱཏི ཨིདྷཱདྷིཔྤེཏཱཡ དཱུརཏཱཡ སབྷཱགསྶ ཨབྱཱཔཀཏྟཱ དཱུརཏོ སནྟིཀུདྡྷརཎཾ ན སཀྐཱ ཀཱཏུཾ། སཏི ཧི སབྷཱགབྱཱཔཀཏྟེ སིཡཱ སནྟིཀཏཱཏི དཱུརཏོ སནྟིཀུདྡྷརཎཾ སཀྐཱ ཀཱཏུནྟི ཨདྷིཔྤཱཡོ། ‘‘ན ཧཱི’’ཏིཨཱདིནཱ ཏམེཝཏྠཾ པཱཀཊཾ ཀརོཏི། སབྷཱགཏཱཏི སཱམཉྙཾ། བྷེདནྟི ཝིསེསཾ། ཨནྟོགདྷཾ ཀཏྭཱཝཱཏི ཨབྷིབྱཱཔེཏྭཱཝ། ཝིསབྷཱགབྱཱཔཀཏྟཱ སནྟིཀཏཱཡཱཏི ཨིདྷཱདྷིཔྤེཏཝིསབྷཱགཾ བྱཱཔེཏྭཱ པཝཏྟནཏོ ཧེཊྛཱ ཝུཏྟསནྟིཀཏཱཡ སནྟིཀཏོ དཱུརུདྡྷརཎཾ སཀྐཱ ཀཱཏུཾ། ཏམེཝཏྠཾ ‘‘ཨཀུསལཏཱ ཧཱི’’ཏིཨཱདིནཱ པཱཀཊཾ ཀརོཏི།

    Yadi santikato dūraṃ labbhati, yadaggena dūraṃ labbhati, tadaggena dūrato santikaṃ uddhariyeyyāti codanaṃ manasi katvā āha ‘‘upādāyupādāya dūrato ca santikaṃ na sakkā uddharitu’’ntiādi. Tassattho – yaṃ santikato dūraṃ labbhati, yadipi taṃ visabhāgaṭṭhena labbhati, tathāpi yaṃ tattha santikaṃ labbhati, taṃ sabhāgaṭṭheneva labbhatīti santikatova santikaṃ uddhaṭaṃ siyāti. Tasmāti yasmā visabhāgaṭṭhena dūratā, sabhāgaṭṭhena ca santikatā icchitā, tasmā. Lobhasahagatāya dosasahagatā visabhāgatāya dūre samānā kathaṃ santike bhaveyyāti adhippāyo. Nanu tāsaṃ akusalasabhāgatā labbhatevāti tattha uttaramāha ‘‘visabhāgatā’’tiādi. Tattha bhedaṃ aggahetvā na pavattatīti bhedaṃ visesaṃ asadisataṃ gahetvā eva pavattati visabhāgatā. Dūratāyāti idhādhippetāya dūratāya sabhāgassa abyāpakattā dūrato santikuddharaṇaṃ na sakkā kātuṃ. Sati hi sabhāgabyāpakatte siyā santikatāti dūrato santikuddharaṇaṃ sakkā kātunti adhippāyo. ‘‘Na hī’’tiādinā tamevatthaṃ pākaṭaṃ karoti. Sabhāgatāti sāmaññaṃ. Bhedanti visesaṃ. Antogadhaṃ katvāvāti abhibyāpetvāva. Visabhāgabyāpakattā santikatāyāti idhādhippetavisabhāgaṃ byāpetvā pavattanato heṭṭhā vuttasantikatāya santikato dūruddharaṇaṃ sakkā kātuṃ. Tamevatthaṃ ‘‘akusalatā hī’’tiādinā pākaṭaṃ karoti.

    ཝེདནཱཀྑནྡྷནིདྡེསཝཎྞནཱ ནིཊྛིཏཱ།

    Vedanākkhandhaniddesavaṇṇanā niṭṭhitā.

    ༣. སཉྙཱཀྑནྡྷནིདྡེསཝཎྞནཱ

    3. Saññākkhandhaniddesavaṇṇanā

    ༡༧. ཏསྶཱཔཱིཏི སཉྙཱཡཔི། ཏབྦཏྠུཀཏྟཱཏི ཙཀྑུཝཏྠུཀཏྟཱ། པཊིགྷཝིཉྙེཡྻོཏི ཡཐཱཝུཏྟཔཊིགྷཏོ ཝིཛཱནིཏབྦོ པཊིགྷཝསེན གཧེཏབྦོ། ཨུཏྟརཔདལོཔཾ ཀཏྭཱཏི པུརིམཔདེ ཨུཏྟརཔདལོཔཾ ཀཏྭཱ།

    17. Tassāpīti saññāyapi. Tabbatthukattāti cakkhuvatthukattā. Paṭighaviññeyyoti yathāvuttapaṭighato vijānitabbo paṭighavasena gahetabbo. Uttarapadalopaṃ katvāti purimapade uttarapadalopaṃ katvā.

    ཝིཉྙེཡྻབྷཱཝེ, ན ཨུཔྤཏྟིཡནྟི ཨདྷིཔྤཱཡོ། ཝཙནནྟི སདྡོ, ནཱམནྟི ཨཏྠོ། ཝཙནཱདྷཱིནཱཏི གཧེཏབྦཏཾ པཏི སདྡཱདྷཱིནཱ, ནཱམཱཡཏྟགཧཎཱཏི ཨཏྠོ། ཡདེཏྠ ཝཏྟབྦཾ, ཏཾ ནཱམརཱུཔདུཀེ (དྷ॰ ས॰ མཱུལཊཱི॰ ༡༠༡-༡༠༨) ཝུཏྟམེཝ། ཨདྷིཝཙནཾ པཉྙཏྟིཔཀཱསཀཾ ཉཱཔཀཾ ཨེཏེསཾ ཨཏྠཱིཏི ཨདྷིཝཙནཱ ཡཐཱ ཨརིསསོཏི། ཏཏོཛོཏི ཨདྷིཝཙནསངྑཱཏཏོ ཨརཱུཔཀྑནྡྷཏོ ཛཱཏོ། ཨརཱུཔཀྑནྡྷཔརིཡཱཔནྣཏྟཱ ཕསྶེཔི ཡཐཱཝུཏྟོ ཨཏྠོ སམྦྷཝཏཱིཏི དསྶེཏུཾ ‘‘སམྥསྶོཡེཝ ཝཱ’’ཏིཨཱདིམཱཧ། ན ཀེཝལཾ མནོདྭཱརིཀཕསྶེ ཨེཝ, ཨཐ ཁོ པཉྩདྭཱརིཀཕསྶེཔི ‘‘ཝིཉྙེཡྻབྷཱཝེ ཝཙནཾ ཨདྷིཀིཙྩ པཝཏྟཱ ཨདྷིཝཙནཱ’’ཏིཨཱདིཝུཏྟཔྤཀཱརོ ཨཏྠོ སམྦྷཝཏི། ཨིཏཱིཏི ཏསྨཱ། ཏེན པརིཡཱཡེནཱཏི མནོསམྥསྶཛཔརིཡཱཡེན། ཏཏོཛཱཔཱིཏི པཉྩདྭཱརིཀཕསྶཛཱཏཱཔི། ཨཉྙཔྤཀཱརཱསམྦྷཝཏོཏི པཊིགྷསམྥསྶཛཔརིཡཱཡསྶ ཨསམྦྷཝཏོ། ཨཱཝེཎིཀཾ པཊིགྷསམྥསྶཛཏཱ། པཀཱརནྟརཾ ཨདྷིཝཙནསམྥསྶཛཏཱ།

    Viññeyyabhāve, na uppattiyanti adhippāyo. Vacananti saddo, nāmanti attho. Vacanādhīnāti gahetabbataṃ pati saddādhīnā, nāmāyattagahaṇāti attho. Yadettha vattabbaṃ, taṃ nāmarūpaduke (dha. sa. mūlaṭī. 101-108) vuttameva. Adhivacanaṃ paññattipakāsakaṃ ñāpakaṃ etesaṃ atthīti adhivacanā yathā arisasoti. Tatojoti adhivacanasaṅkhātato arūpakkhandhato jāto. Arūpakkhandhapariyāpannattā phassepi yathāvutto attho sambhavatīti dassetuṃ ‘‘samphassoyeva vā’’tiādimāha. Na kevalaṃ manodvārikaphasse eva, atha kho pañcadvārikaphassepi ‘‘viññeyyabhāve vacanaṃ adhikicca pavattā adhivacanā’’tiādivuttappakāro attho sambhavati. Itīti tasmā. Tena pariyāyenāti manosamphassajapariyāyena. Tatojāpīti pañcadvārikaphassajātāpi. Aññappakārāsambhavatoti paṭighasamphassajapariyāyassa asambhavato. Āveṇikaṃ paṭighasamphassajatā. Pakārantaraṃ adhivacanasamphassajatā.

    ཡདི ཨེཝནྟི ཡདི པཉྩདྭཱརིཀཕསྶེཧི ཨུཔྤནྣསཉྙཱ པརིཡཱཡཏོ ནིཔྤརིཡཱཡཏོ ཙ ‘‘ཨདྷིཝཙནསམྥསྶཛཱ’’ཏི ཝུཙྩནྟི, ཨེཝཾ ཙཏྟཱརོཔི ཨརཱུཔིནོ ཁནྡྷཱ ཨེཝཾ ཝཏྟུཾ ཡུཏྟཱ། ཨེཝཾ སནྟེ སཉྙཱཝ ཀསྨཱ ‘‘ཨདྷིཝཙནསམྥསྶཛཱ’’ཏི ཝུཏྟཱཏི ཨཱཧ ‘‘ཏིཎྞཾ ཁནྡྷཱན’’ནྟིཨཱདི། ཏཏྠ ཏིཎྞཾ ཁནྡྷཱནནྟི ཝེདནཱསངྑཱརཝིཉྙཱཎཀྑནྡྷཱནཾ། ཨཏྠཝསེནཱཏི ‘‘ཝཙནཾ ཨདྷིཀིཙྩ པཝཏྟཱ ཨདྷིཝཙནཱ’’ཏིཨཱདིནཱ ཝུཏྟཨཏྠཝསེན ཨནྭཏྠཏཱཝསེན། ཨཏྟནོ པཏྟམྤི ནཱམནྟི ‘‘ཨདྷིཝཙནསམྥསྶཛཱ’’ཏི ཨེཝཾ ཨཏྟནོ ཨནུཔྤཏྟམྤི ནཱམཾ། དྷམྨཱབྷིལཱཔོཏི སབྷཱཝནིརུཏྟི། པུབྦེ ཙཏུནྣཾ ཨརཱུཔཀྑནྡྷཱནཾ སཱདྷཱརཎོཔི ཨདྷིཝཙནསམྥསྶཛཝོཧཱརོ རུལ༹ྷིཝསེན སཉྙཱཡ ཨེཝ པཝཏྟོཏི ཝཏྭཱ ཨིདཱནི སོ ཏདཉྙཱརཱུཔཀྑནྡྷསཱདྷཱརཎོ སཉྙཱཡ ནིཝེསིཏོཏི དསྶེཏུཾ ‘‘ཨཐ ཝཱ’’ཏིཨཱདིམཱཧ། རཛྫིཏྭཱ ཨོལོཀནཱདཱིསཱུཏི ཨེཏྠ ཨཱདི-སདྡེན ཀུཛ྄ཛྷིཏྭཱ ཨོལོཀནཱདི ཝིཡ རཛྫིཏྭཱ སཝནཱདིཔི སངྒཡ྄ཧཏཱིཏི ཝེདིཏབྦཾ, ཏཐཱསོཏཱཝདྷཱནཱདིནོཔི རཏྟཏཱདིཝིཛཱནནནིམིཏྟཏཱསམྦྷཝཏོ། ཙཀྑུསམྥསྶཛཱསཉྙཱཡ པན པཱཀཊབྷཱཝཾ ནིདསྶནཝསེན དསྶེཏུཾ ‘‘ཨོལོཀནཾ ཙཀྑུཝིཉྙཱཎཝིསཡསམཱགམེ’’ཏིཨཱདིམཱཧ།

    Yadievanti yadi pañcadvārikaphassehi uppannasaññā pariyāyato nippariyāyato ca ‘‘adhivacanasamphassajā’’ti vuccanti, evaṃ cattāropi arūpino khandhā evaṃ vattuṃ yuttā. Evaṃ sante saññāva kasmā ‘‘adhivacanasamphassajā’’ti vuttāti āha ‘‘tiṇṇaṃ khandhāna’’ntiādi. Tattha tiṇṇaṃ khandhānanti vedanāsaṅkhāraviññāṇakkhandhānaṃ. Atthavasenāti ‘‘vacanaṃ adhikicca pavattā adhivacanā’’tiādinā vuttaatthavasena anvatthatāvasena. Attano pattampi nāmanti ‘‘adhivacanasamphassajā’’ti evaṃ attano anuppattampi nāmaṃ. Dhammābhilāpoti sabhāvanirutti. Pubbe catunnaṃ arūpakkhandhānaṃ sādhāraṇopi adhivacanasamphassajavohāro ruḷhivasena saññāya eva pavattoti vatvā idāni so tadaññārūpakkhandhasādhāraṇo saññāya nivesitoti dassetuṃ ‘‘atha vā’’tiādimāha. Rajjitvā olokanādīsūti ettha ādi-saddena kujjhitvā olokanādi viya rajjitvā savanādipi saṅgayhatīti veditabbaṃ, tathāsotāvadhānādinopi rattatādivijānananimittatāsambhavato. Cakkhusamphassajāsaññāya pana pākaṭabhāvaṃ nidassanavasena dassetuṃ ‘‘olokanaṃ cakkhuviññāṇavisayasamāgame’’tiādimāha.

    ཨོལོཀནསྶ ཨཔཱཀཊབྷཱཝེ རཏྟཏཱདིཝིཛཱནནཾ ན ཧོཏི, པཱཀཊབྷཱཝེ ཙ ཧོཏཱིཏི ཨཱཧ ‘‘པསཱདཝཏྠུཀཱ ཨེཝཱ’’ཏི། ‘‘ཨཉྙཾ ཙིནྟེནྟ’’ནྟི ཡཾ པུབྦེ ཏེན ཀཐིཏཾ, ཀཱཡེན ཝཱ པཀཱསིཏཾ, ཏཏོ ཨཉྙཾ ཀིཉྩི ཨཏྠཾ ཙིནྟེནྟཾ། ཏེནེཝཱཧ ‘‘ཉཱཏ’’ནྟི།

    Olokanassa apākaṭabhāve rattatādivijānanaṃ na hoti, pākaṭabhāve ca hotīti āha ‘‘pasādavatthukā evā’’ti. ‘‘Aññaṃ cintenta’’nti yaṃ pubbe tena kathitaṃ, kāyena vā pakāsitaṃ, tato aññaṃ kiñci atthaṃ cintentaṃ. Tenevāha ‘‘ñāta’’nti.

    སཉྙཱཀྑནྡྷནིདྡེསཝཎྞནཱ ནིཊྛིཏཱ།

    Saññākkhandhaniddesavaṇṇanā niṭṭhitā.

    ༤. སངྑཱརཀྑནྡྷནིདྡེསཝཎྞནཱ

    4. Saṅkhārakkhandhaniddesavaṇṇanā

    ༢༠. ‘‘ཧེཊྛིམཀོཊིཡཱཏི ཨེཏྠཱ’’ཏི ཨིདཾ པཋམཾ ‘‘ཧེཊྛིམཀོཊིཡཱ’’ཏི ཝཙནཾ སནྡྷཱཡ ཝུཏྟཾ། ཏསྶ ཧི བྷུམྨཝསེན ཨཏྠོ གཧེཏབྦོ། ཏེནཱཧ ‘‘ཏཏྠ ཧི པདྷཱནཾ དསྶིཏ’’ནྟི། ཧེཊྛིམཀོཊིཡཱཝ པདྷཱནཾ དསྶིཏནྟི ཨིམམཏྠཾ གཧེཏྭཱ ‘‘ཡདི ཨེཝ’’ནྟིཨཱདིནཱ ཙོདེཏི། ཨིཏརོ ‘‘ཧེཊྛིམཀོཊིཡཱ པདྷཱནམེཝ དསྶིཏ’’ནྟི ཨེཝམེཏྠ ནིཡམོ གཧེཏབྦོཏི དསྶེནྟོ ‘‘ཨུཔརིམཀོཊིགཏབྷཱཝེནཱ’’ཏིཨཱདིནཱ ཏཾ པརིཧརཏི། པདྷཱནསྶེཝ དསྶནཾ། པདྷཱནེ ཧི དསྶིཏེ ཨཔྤདྷཱནམྤི ཨཏྠཏོ དསྶིཏམེཝ ཧོཏཱིཏི། ཏེནཱཧ ཨཊྛཀཐཱཡཾ ‘‘ཏཾསམྤཡུཏྟསངྑཱརཱ པན ཏཱཡ གཧིཏཱཡ གཧིཏཱཝ ཧོནྟཱི’’ཏི། ཡཾ ཧེཊྛིམཀོཊིཡཾ ལབྦྷཏི, ཏཾ ཨུཔརིམཀོཊིཡམྤི ལབྦྷཏི ཨེཝཱཏི ཨཱཧ ‘‘ཧེཊྛིམཀོཊི ཧི སབྦབྱཱཔིཀཱ’’ཏི། དུཏིཡེ ཀརཎནིདྡེསཏཾ དསྶེཏུཾ ‘‘ཨཱགཏཱཏི སམྦནྡྷོ’’ཏི ཨཱཧ། ཨཱགམནཀིརིཡཱ ཧི ཧེཊྛིམཀོཊིཡཱ ཀརཎབྷཱཝེན ཏཏྠ ཝུཏྟཱཏི། ཡཐཱ ཙ ཨཱགམནཀིརིཡཱཡ, ཨེཝཾ ཝཙནཀིརིཡཱཡཔི ཧེཊྛིམཀོཊིཡཱ ཀརཎབྷཱཝོ སམྦྷཝཏཱིཏི དསྶེཏུཾ ‘‘པུརིམེཔི ཝཱ’’ཏིཨཱདིམཱཧ། ‘‘ཨེཀཱུནཔཉྙཱསཔྤབྷེདེ’’ཏི ཨིདཾ ལོཀིཡཙིཏྟུཔྤཱདེ པཱལི༹ཨཱགཏཱནཾ སངྑཱརཀྑནྡྷདྷམྨཱནཾ ཨུཔརིམཀོཊིཾ སནྡྷཱཡ ཝུཏྟཾ། ཡེཝཱཔནཀདྷམྨེཧི སདྡྷིཾ ཨུཔརིམཀོཊིཡཱ གཡ྄ཧམཱནཱཡ ‘‘ཏེཔཉྙཱསཱ’’ཏི ཝཏྟབྦཾ སིཡཱ, ལོཀུཏྟརཙིཏྟུཔྤཱདཝསེན པན ‘‘སཏྟཔཉྙཱསཱ’’ཏི།

    20. ‘‘Heṭṭhimakoṭiyātietthā’’ti idaṃ paṭhamaṃ ‘‘heṭṭhimakoṭiyā’’ti vacanaṃ sandhāya vuttaṃ. Tassa hi bhummavasena attho gahetabbo. Tenāha ‘‘tattha hi padhānaṃ dassita’’nti. Heṭṭhimakoṭiyāva padhānaṃ dassitanti imamatthaṃ gahetvā ‘‘yadi eva’’ntiādinā codeti. Itaro ‘‘heṭṭhimakoṭiyā padhānameva dassita’’nti evamettha niyamo gahetabboti dassento ‘‘uparimakoṭigatabhāvenā’’tiādinā taṃ pariharati. Padhānasseva dassanaṃ. Padhāne hi dassite appadhānampi atthato dassitameva hotīti. Tenāha aṭṭhakathāyaṃ ‘‘taṃsampayuttasaṅkhārā pana tāya gahitāya gahitāva hontī’’ti. Yaṃ heṭṭhimakoṭiyaṃ labbhati, taṃ uparimakoṭiyampi labbhati evāti āha ‘‘heṭṭhimakoṭi hi sabbabyāpikā’’ti. Dutiye karaṇaniddesataṃ dassetuṃ ‘‘āgatāti sambandho’’ti āha. Āgamanakiriyā hi heṭṭhimakoṭiyā karaṇabhāvena tattha vuttāti. Yathā ca āgamanakiriyāya, evaṃ vacanakiriyāyapi heṭṭhimakoṭiyā karaṇabhāvo sambhavatīti dassetuṃ ‘‘purimepi vā’’tiādimāha. ‘‘Ekūnapaññāsappabhede’’ti idaṃ lokiyacittuppāde pāḷiāgatānaṃ saṅkhārakkhandhadhammānaṃ uparimakoṭiṃ sandhāya vuttaṃ. Yevāpanakadhammehi saddhiṃ uparimakoṭiyā gayhamānāya ‘‘tepaññāsā’’ti vattabbaṃ siyā, lokuttaracittuppādavasena pana ‘‘sattapaññāsā’’ti.

    སངྑཱརཀྑནྡྷནིདྡེསཝཎྞནཱ ནིཊྛིཏཱ།

    Saṅkhārakkhandhaniddesavaṇṇanā niṭṭhitā.

    པཀིཎྞཀཀཐཱཝཎྞནཱ

    Pakiṇṇakakathāvaṇṇanā

    སམུགྒམ-པདསྶ ཏཏྭཏོ པརིཡཱཡཏོ ཙ ཨཏྠཾ དསྶེཏི ‘‘སཉྫཱཏིཡཾ ཨཱདིཨུཔྤཏྟིཡ’’ནྟི། བྷེདཏོ པན སམཱཡོགེ ཨུགྒམནནྟི། ཏཏྠ ཀེན སམཱཡོགེ, ཀུཏོ, ཀཐཉྩ ཨུགྒམནནྟི ཝིཙཱརཎཱཡཾ ཨཱཧ ‘‘ཏཾཏཾཔཙྩཡསམཱཡོགེ’’ཏིཨཱདི། ཏཏྠེཝཱཏི པཉྩཝོཀཱརབྷཝེ ཨེཝ། ཏཏྠ ཧི པཉྩཀྑནྡྷཱ པརིཔུཎྞཱ སམུགྒཙྪནྟི། ཡཐཱདྷིགཏཱནཾ ཨདྷིགཏཔྤཀཱརཱནཾ, པཊིསནྡྷིཀཱནནྟི ཨཏྠོ། ཨོཔཔཱཏིཀསམུགྒམེནེཝ ཙེཏྠ སཾསེདཛསམུགྒམོཔི གཧིཏོཏི དཊྛབྦོ པཉྩཀྑནྡྷཔརིཡཱཔནྣཱནཾ ཏདཱ ཨུཔྤཛྫནཱརཧཱནཾ ཨུཔྤཛྫནཏོ། ཏཏྠ སཾསེདཛཱ ཨུཔྤཛྫིཏྭཱ ཝཌྜྷནྟི, ཨིཏརེ ན ཝཌྜྷནྟཱིཏི ཨིདམེཏེསཾ ནཱནཱཀརཎཾ། སུཁུམཛཱཏིཡལོམཱ ཨེཝ ཀིར ཀེཙི ཨེལ༹ཀཱ ཧིམཝནྟེ ཝིཛྫནྟི, ཏེསཾ ལོམཾ སནྡྷཱཡ ‘‘ཛཱཏིམནྟཨེལ༹ཀལོམ’’ནྟི ཝུཏྟཾ ཨཏིསུཁུམཏྟཱ ཏེསཾ ལོམཱནཾ། ཀེཙི པན ‘‘ཨཛཔཱཀཏིཀེལ༹ཀཱདཱིཧི སངྐརརཧིཏཱནཾ ཏེསཾ ཨེལ༹ཀཝིསེསཱནཾ ནིབྦཏྟེལ༹ཀསྶ ལོམཾ ཛཱཏིཨུཎྞཱ, ཏམྤི ཏངྑཎནིབྦཏྟསྶཱ’’ཏི ཝདནྟི། གབྦྷཾ ཕཱལེཏྭཱ གཧིཏསྶཱཏི ཨཔརེ། ཨེཝཾསཎྛཱནནྟི ཛཱཏིཨུཎྞཾསུནོ པགྒྷརིཏྭཱ ཨགྒེ ཋིཏཏེལབིནྡུསཎྛཱནཾ། ཝཎྞཔྤཊིབྷཱགོཏི རཱུཔཔཊིཙྪནྣོ སཎྛཱནཔཊིཙྪནྣོ ཙ།

    Samuggama-padassa tatvato pariyāyato ca atthaṃ dasseti ‘‘sañjātiyaṃ ādiuppattiya’’nti. Bhedato pana samāyoge uggamananti. Tattha kena samāyoge, kuto, kathañca uggamananti vicāraṇāyaṃ āha ‘‘taṃtaṃpaccayasamāyoge’’tiādi. Tatthevāti pañcavokārabhave eva. Tattha hi pañcakkhandhā paripuṇṇā samuggacchanti. Yathādhigatānaṃ adhigatappakārānaṃ, paṭisandhikānanti attho. Opapātikasamuggameneva cettha saṃsedajasamuggamopi gahitoti daṭṭhabbo pañcakkhandhapariyāpannānaṃ tadā uppajjanārahānaṃ uppajjanato. Tattha saṃsedajā uppajjitvā vaḍḍhanti, itare na vaḍḍhantīti idametesaṃ nānākaraṇaṃ. Sukhumajātiyalomā eva kira keci eḷakā himavante vijjanti, tesaṃ lomaṃ sandhāya ‘‘jātimantaeḷakaloma’’nti vuttaṃ atisukhumattā tesaṃ lomānaṃ. Keci pana ‘‘ajapākatikeḷakādīhi saṅkararahitānaṃ tesaṃ eḷakavisesānaṃ nibbatteḷakassa lomaṃ jātiuṇṇā, tampi taṅkhaṇanibbattassā’’ti vadanti. Gabbhaṃ phāletvā gahitassāti apare. Evaṃsaṇṭhānanti jātiuṇṇaṃsuno paggharitvā agge ṭhitatelabindusaṇṭhānaṃ. Vaṇṇappaṭibhāgoti rūpapaṭicchanno saṇṭhānapaṭicchanno ca.

    སནྟཏིམཱུལཱནཱིཏི ཏསྨིཾ བྷཝེ རཱུཔསནྟཏིཡཱ མཱུལབྷཱུཏཱནི། ཨནེཀིནྡྲིཡསམཱཧཱརབྷཱཝཏོཏི ཡཐཱརཧཾ ཙཀྑཱདིཨནེཀིནྡྲིཡསངྒྷཱཏབྷཱཝཏོ། པདྷཱནངྒནྟི ཨུཏྟམངྒཾ སིརོ།

    Santatimūlānīti tasmiṃ bhave rūpasantatiyā mūlabhūtāni. Anekindriyasamāhārabhāvatoti yathārahaṃ cakkhādianekindriyasaṅghātabhāvato. Padhānaṅganti uttamaṅgaṃ siro.

    ན ཏསྶ ཏསྶ ཁནྡྷསྶ པརིཔུཎྞཏཾ, ཏཾཏཾཁནྡྷེཀདེསསྶེཝ ཝུཏྟཏྟཱཏི ཨདྷིཔྤཱཡོ། ཀཱམཱཝཙརཱནནྟི ཀཱམཱཝཙརསཏྟཱནཾ། པརིཧཱིནཱཡཏནསྶཱཏི པརིཧཱིནསྶ ཙཀྑཱདིཨཱཡཏནསྶ ཝསེན། ཏཏྠ དུགྒཏིཡཾ ཨནྡྷསྶ ཙཀྑུདསཀཝསེན, བདྷིརསྶ སོཏདསཀཝསེན, ཨནྡྷབདྷིརསྶ ཨུབྷཡཝསེན སནྟཏིསཱིསཧཱནི ཝེདིཏབྦཱ། ནཔུཾསཀསྶ པན བྷཱཝཧཱནི ཝུཏྟཱ ཨེཝ། ཏཐཱ ཨནྡྷབདྷིརཱགྷཱནཀསྶ ཙཀྑུསོཏགྷཱནཝསེན། ཏཾ པན དྷམྨཧདཡཝིབྷངྒཔཱལི༹ཡཱ ཝིརུཛ྄ཛྷཏི། ཏཾ པརཏོ ཨཱཝི བྷཝིསྶཏི། རཱུཔཱཝཙརཱནཾ པན ཙཀྑུསོཏཝཏྠུཛཱིཝིཏཝསེན ཙཏྟཱརི སནྟཏིསཱིསཱནཱིཏི ཨིཏརེསཾ ཝསེན སནྟཏིསཱིསཧཱནི ཝེདིཏབྦཱ།

    Na tassa tassa khandhassa paripuṇṇataṃ, taṃtaṃkhandhekadesasseva vuttattāti adhippāyo. Kāmāvacarānanti kāmāvacarasattānaṃ. Parihīnāyatanassāti parihīnassa cakkhādiāyatanassa vasena. Tattha duggatiyaṃ andhassa cakkhudasakavasena, badhirassa sotadasakavasena, andhabadhirassa ubhayavasena santatisīsahāni veditabbā. Napuṃsakassa pana bhāvahāni vuttā eva. Tathā andhabadhirāghānakassa cakkhusotaghānavasena. Taṃ pana dhammahadayavibhaṅgapāḷiyā virujjhati. Taṃ parato āvi bhavissati. Rūpāvacarānaṃ pana cakkhusotavatthujīvitavasena cattāri santatisīsānīti itaresaṃ vasena santatisīsahāni veditabbā.

    ཏེསནྟི པཉྩནྣཾ ཁནྡྷཱནཾ། ཝཏྠུབྷཱཝེནཱཏི ཝིཙཱརཎཱཡ ཨདྷིཊྛཱནབྷཱཝེན། པཊིསནྡྷིཡཾ ཨུཔྤནྣཱ པཝཏྟཱ པཉྩཀྑནྡྷཱཏི པཊིསནྡྷིཀྑཎེ པཝཏྟིཀྑཎེ ཙ པཉྩཀྑནྡྷེ དསྶེཏི། བྷུམྨནིདྡེསོཏི ‘‘པཉྩསུ ཁནྡྷེསཱུ’’ཏི ཨཡཾ བྷུམྨནིདྡེསོ། ཨཉྙཐཱཏི ནིདྡྷཱརཎེ ཨནདྷིཔྤེཏེ། ‘‘བྷཱཝེནབྷཱཝལཀྑཎཏྠེ’’ཏི ཨིདཾ ཝིསཡཱདིཨཏྠཱནཾ ཨིདྷཱསམྦྷཝཏོ ཝུཏྟཾ། ཨུབྷཡནྟི རཱུཔཱརཱུཔཾ། རཱུཔཱརཱུཔསནྟཏིནྟི རཱུཔསམུཊྛཱཔཀཾ རཱུཔསནྟཏིཾ ཨརཱུཔསནྟཏིཉྩ། ‘‘ཝཏྠུ ཨུཔྤཱདཀྑཎེ དུབྦལཾ ཧོཏཱི’’ཏི ཨིདཾ ན པཊིསནྡྷིཀྑཎཾ ཨེཝ, ནཱཔི ཝཏྠུརཱུཔཾ ཨེཝ སནྡྷཱཡ ཝུཏྟནྟི དསྶེནྟོ ཨཱཧ ‘‘སབྦརཱུཔཱནཾ ཨུཔྤཱདཀྑཎེ དུབྦལཏཾ སནྡྷཱཡ ཝུཏྟ’’ནྟི། ‘‘ཏདཱ ཧཱི’’ཏིཨཱདི ཡཐཱཝུཏྟསྶ ཨཏྠསྶ ཀཱརཎཝཙནཾ། ཏཏྠ ཏནྟི རཱུཔཾ། ‘‘ཀམྨཀྑིཏྟཏྟཱ’’ཏི ཨིདཾ ན ཀམྨཛཏཱམཏྟཾ སནྡྷཱཡ ཝུཏྟཾ, ཨཐ ཁོ ཀམྨཛསྶ པཋམུཔྤཏྟིཡཾ ཨཔཏིཊྛིཏཏཾ སནྡྷཱཡཱཏི དསྶེནྟོ ‘‘སཏིཔཱི’’ཏིཨཱདིམཱཧ། ཏཏོ པརནྟི ཏཏོ པཊིསནྡྷིཏོ པརཾ། སདིསསནྟཱནེ ཡཐཱ པཏིཊྛིཏཾ, ན ཏཐཱ ཝིསདིསསནྟཱནེཏི ཨཱཧ ‘‘སམཱནསནྟཏིཡ’’ནྟི།

    Tesanti pañcannaṃ khandhānaṃ. Vatthubhāvenāti vicāraṇāya adhiṭṭhānabhāvena. Paṭisandhiyaṃ uppannā pavattā pañcakkhandhāti paṭisandhikkhaṇe pavattikkhaṇe ca pañcakkhandhe dasseti. Bhummaniddesoti ‘‘pañcasu khandhesū’’ti ayaṃ bhummaniddeso. Aññathāti niddhāraṇe anadhippete. ‘‘Bhāvenabhāvalakkhaṇatthe’’ti idaṃ visayādiatthānaṃ idhāsambhavato vuttaṃ. Ubhayanti rūpārūpaṃ. Rūpārūpasantatinti rūpasamuṭṭhāpakaṃ rūpasantatiṃ arūpasantatiñca. ‘‘Vatthu uppādakkhaṇe dubbalaṃ hotī’’ti idaṃ na paṭisandhikkhaṇaṃ eva, nāpi vatthurūpaṃ eva sandhāya vuttanti dassento āha ‘‘sabbarūpānaṃ uppādakkhaṇe dubbalataṃ sandhāya vutta’’nti. ‘‘Tadā hī’’tiādi yathāvuttassa atthassa kāraṇavacanaṃ. Tattha tanti rūpaṃ. ‘‘Kammakkhittattā’’ti idaṃ na kammajatāmattaṃ sandhāya vuttaṃ, atha kho kammajassa paṭhamuppattiyaṃ apatiṭṭhitataṃ sandhāyāti dassento ‘‘satipī’’tiādimāha. Tato paranti tato paṭisandhito paraṃ. Sadisasantāne yathā patiṭṭhitaṃ, na tathā visadisasantāneti āha ‘‘samānasantatiya’’nti.

    ཨངྒབྷཱཝནྟི ཀཱརཎབྷཱཝཾ། ཏེནེཝཱཧ ‘‘སཧཱཡབྷཱཝ’’ནྟི། ཏེསཾ དྷམྨཱནནྟི ཡེཧི སདྡྷིཾ ཨུཔྤནྣཾ, ཏེསཾ པཊིསནྡྷིཡཾ ཙིཏྟཙེཏསིཀདྷམྨཱནཾ། ཏདཱཏི ཋིཏིཀྑཎེ བྷངྒཀྑཎེ ཙ རཱུཔུཔྤཱདནམེཝ ནཏྠི། ཨནནྟརཱདིཔཙྩཡལཱབྷེན ཨུཔྤཱདཀྑཎེ ཨེཝ ཙིཏྟསྶ བལཝབྷཱཝོ, ན ཨིཏརཏྲ། ཏེནཱཧ ‘‘ཡདཱ ཙ རཱུཔུཔྤཱདནཾ, ཏདཱ ཨུཔྤཱདཀྑཎེ’’ཏི།

    Aṅgabhāvanti kāraṇabhāvaṃ. Tenevāha ‘‘sahāyabhāva’’nti. Tesaṃ dhammānanti yehi saddhiṃ uppannaṃ, tesaṃ paṭisandhiyaṃ cittacetasikadhammānaṃ. Tadāti ṭhitikkhaṇe bhaṅgakkhaṇe ca rūpuppādanameva natthi. Anantarādipaccayalābhena uppādakkhaṇe eva cittassa balavabhāvo, na itaratra. Tenāha ‘‘yadā ca rūpuppādanaṃ, tadā uppādakkhaṇe’’ti.

    ཡེཧཱཀཱརེཧཱིཏི ཨཱཧཱརིནྡྲིཡཔཙྩཡཱདིཨཱཀཱརེཧི། ཡཐཱསམྦྷཝཾ པཙྩཡཱ ཧོནྟཱིཏི ཕསྶཱདཡོ ཨཱཧཱརཱདིཝསེན ཡཐཱརཧཾ པཙྩཡཱ ཧོནྟི། ཝུཏྟཉྷེཏཾ པཊྛཱནེ ‘‘པཊིསནྡྷིཀྑཎེ ཝིཔཱཀཱབྱཱཀཏཱ ཨཱཧཱརཱ སམྤཡུཏྟཀཱནཾ ཁནྡྷཱནཾ, ཀཊཏྟཱ ཙ རཱུཔཱནཾ ཨཱཧཱརཔཙྩཡེན པཙྩཡོ’’ཏིཨཱདི (པཊྛཱ॰ ༡.༡.༤༢༩)།

    Yehākārehīti āhārindriyapaccayādiākārehi. Yathāsambhavaṃ paccayā hontīti phassādayo āhārādivasena yathārahaṃ paccayā honti. Vuttañhetaṃ paṭṭhāne ‘‘paṭisandhikkhaṇe vipākābyākatā āhārā sampayuttakānaṃ khandhānaṃ, kaṭattā ca rūpānaṃ āhārapaccayena paccayo’’tiādi (paṭṭhā. 1.1.429).

    ཙུཏིཙིཏྟེན སདྡྷིཾ ཨུཔྤཛྫམཱནཾ, ཙུཏིཙིཏྟེན ཝཱ ཀཱརཎབྷཱུཏེན ཨུཔྤཛྫམཱནཾ། ཏཏོ པུརིམཏརེཧི ཨུཔྤཛྫམཱནཾ ཝིཡཱཏི ཡཐཱ ཙུཏིཙིཏྟཏོ ཨཱསནྣེཧི པུརིམཏརེཧི ཨུཔྤཛྫམཱནཾ རཱུཔཾ བྷཝནྟརེ ན ཨུཔྤཛྫཏི, ཨེཝཾ ཙུཏིཙིཏྟེན ཨུཔྤཛྫམཱནམྤི ཨནུཔཙྪིནྣེཔི ཝཊྚམཱུལེཏི ཨཀཱརཎཾ ཝཊྚམཱུལཱཝཱུཔསམོ ཙུཏིཙིཏྟསྶ རཱུཔུཔྤཱདནེཏི དསྶེཏི།

    Cuticittena saddhiṃ uppajjamānaṃ, cuticittena vā kāraṇabhūtena uppajjamānaṃ. Tato purimatarehi uppajjamānaṃ viyāti yathā cuticittato āsannehi purimatarehi uppajjamānaṃ rūpaṃ bhavantare na uppajjati, evaṃ cuticittena uppajjamānampi anupacchinnepi vaṭṭamūleti akāraṇaṃ vaṭṭamūlāvūpasamo cuticittassa rūpuppādaneti dasseti.

    ཨརཱུཔསྶཱཏི ཨཱརུཔྤསྶ།

    Arūpassāti āruppassa.

    ཨུཏུནཱཏི པཊིསནྡྷིཙིཏྟསྶ ཋིཏིཀྑཎེ ཨུཔྤནྣེན ཨུཏུནཱ། སམུཊྛིཏེ རཱུཔེཏི པཊིསནྡྷིཙིཏྟསྶ བྷངྒཀྑཎེ རཱུཔེ སམུཊྛིཏེ པཊིསནྡྷིཨནནྟརཾ པཋམབྷཝངྒཙིཏྟཾ རཱུཔཾ སམུཊྛཱཔེཏི། ཨུཔྤཱདནིརོདྷཀྑཎཱཏི ཡཐཱཝུཏྟེསུ སོལ༹སསུ ཙིཏྟེསུ ཨཱདིཙིཏྟསྶ ཨུཔྤཱདཀྑཎོ, སོལ༹སམཙིཏྟསྶ ནིརོདྷཀྑཎོ ཙཱཏི ཝདནྟི, རཱུཔསྶེཝ པན ཨུཔྤཱདནིརོདྷཀྑཎཱ ཝེདིཏབྦཱ།

    Utunāti paṭisandhicittassa ṭhitikkhaṇe uppannena utunā. Samuṭṭhite rūpeti paṭisandhicittassa bhaṅgakkhaṇe rūpe samuṭṭhite paṭisandhianantaraṃ paṭhamabhavaṅgacittaṃ rūpaṃ samuṭṭhāpeti. Uppādanirodhakkhaṇāti yathāvuttesu soḷasasu cittesu ādicittassa uppādakkhaṇo, soḷasamacittassa nirodhakkhaṇo cāti vadanti, rūpasseva pana uppādanirodhakkhaṇā veditabbā.

    དྷརམཱནཀྑཎེ ཨེཝཱཏི ཏསྶ ཨུཏུནོ ཝིཛྫམཱནཀྑཎེ ཨེཝ ཡདི གཧིཏཱ, ‘‘སོལ༹སཙིཏྟཀྑཎཱཡུཀཾ རཱུཔ’’ནྟི ཝུཏྟཾ ཧོཏི སོལ༹སཧེཝ ཙིཏྟེཧི ཏསྶ དྷརམཱནཏཱཡ པརིཙྪིནྣཏྟཱ། ཨུཔྤཱདཀྑཎཾ ཨགྒཧེཏྭཱཏི ཨུཏུནོ དྷརམཱནཀྑཎེ ཨུཔྤཱདཀྑཎཾ ཨགྒཧེཏྭཱ ནིརོདྷཀྑཎོ ཨཐ གཧིཏོ, ‘‘སཏྟརསཙིཏྟཀྑཎཱཡུཀཾ རཱུཔ’’ནྟི ཝུཏྟཾ ཧོཏི ཨུཔྤཱདཀྑཎསཧིཏེན ཙ ཨེཀསྶ ཙིཏྟཀྑཎསྶ གཧིཏཏྟཱ། ‘‘ཨདྷིཀསོལ༹སཙིཏྟཀྑཎཱཡུཀ’’ནྟི ཝུཏྟཾ ཧོཏི ནིརོདྷཀྑཎསྶ བཧིཀཏཏྟཱ།

    Dharamānakkhaṇe evāti tassa utuno vijjamānakkhaṇe eva yadi gahitā, ‘‘soḷasacittakkhaṇāyukaṃ rūpa’’nti vuttaṃ hoti soḷasaheva cittehi tassa dharamānatāya paricchinnattā. Uppādakkhaṇaṃ aggahetvāti utuno dharamānakkhaṇe uppādakkhaṇaṃ aggahetvā nirodhakkhaṇo atha gahito, ‘‘sattarasacittakkhaṇāyukaṃrūpa’’nti vuttaṃ hoti uppādakkhaṇasahitena ca ekassa cittakkhaṇassa gahitattā. ‘‘Adhikasoḷasacittakkhaṇāyuka’’nti vuttaṃ hoti nirodhakkhaṇassa bahikatattā.

    ཨེཝཾ ཨུཔྤཱདནིརོདྷཀྑཎེསུ གཧིཏེསུ ཨགྒཧིཏེསུ ཙ སོལ༹སསཏྟརསཙིཏྟཀྑཎཱཡུཀཏཱ, ཏཏོ ཨདྷིཀཙིཏྟཀྑཎཱཡུཀཏཱ ཙ སིཡཱཏི དསྶེཏྭཱ ཨིདཱནི ཏཏྠ ཋིཏཔཀྑཾ དསྶེནྟོ ‘‘ཡསྨཱ པནཱ’’ཏིཨཱདིམཱཧ། ཏཏྠ ཏསྶ དྷརམཱནཀྑཎེ ཨུཔྤནྣེསཱུཏི ཏསྶ ཨུཏུནོ དྷརམཱནཀྑཎེ ཨུཔྤནྣེསུ སོལ༹སསུ ཙིཏྟེསུ པཊིསནྡྷིཔི ཡསྨཱ གཧིཏཱ, ཏསྨཱ ཨུཏུནོ ཨུཔྤཱདཀྑཎོ དྷརམཱནཀྑཎེ གཧིཏོཏི ནིརོདྷཀྑཎེ ཨགྒཧིཏེ ‘‘རཱུཔེ དྷརནྟེཡེཝ སོལ༹ས ཙིཏྟཱནི ཨུཔྤཛྫིཏྭཱ ནིརུཛ྄ཛྷནྟི, ཏཾ པན སཏྟརསམེན ཙིཏྟེན སདྡྷིཾ ནིརུཛ྄ཛྷཏཱི’’ཏི (ཝིབྷ॰ ཨཊྛ॰ ༢༦ པཀིཎྞཀཀཐཱ) ཨེཝཾ ཨཊྛཀཐཱཡཾ ཝཀྑམཱནཱ ཨདྷིཀསོལ༹སཙིཏྟཀྑཎཱཡུཀཏཱ ཨདྷིཔྤེཏཱ། གཧིཏེ ཝཱ ནིརོདྷཀྑཎེ སོལ༹སཙིཏྟཀྑཎཱཡུཀཏཱ ཨདྷིཔྤེཏཱཏི སམྦནྡྷོ། ཨེཏྠ ཙ ‘‘ཨདྷིཀསོལ༹སཙིཏྟཀྑཎཱཡུཀཏཱ’’ཏི ཨིདཾ པཊིསནྡྷིཙིཏྟསྶ ཨུཔྤཱདཀྑཎོ གཧིཏོཏི ཀཏྭཱ ཝུཏྟཾ། ཡསྨཱ པན པཊིཙྩསམུཔྤཱདཝིབྷངྒཝཎྞནཱཡཾ ‘‘དྭེ བྷཝངྒཱནི, ཨཱཝཛྫནཾ, དསྶནཾ, སམྤཊིཙྪནཾ, སནྟཱིརཎཾ, ཝོཊྛབྦནཾ, པཉྩ ཛཝནཱནི, དྭེ ཏདཱརམྨཎཱནི, ཨེཀཾ ཙུཏིཙིཏྟནྟི པཉྩདས ཙིཏྟཀྑཎཱ ཨཏཱིཏཱ ཧོནྟི, ཨཐཱཝསེསཨེཀཙིཏྟཀྑཎཱཡུཀེ’’ཏི (ཝིབྷ॰ ཨཊྛ॰ ༢༢༧), ཏཐཱ ཏདཱརམྨཎཔརིཡོསཱནཱནི, ‘‘ཨེཀཾ ཙུཏིཙིཏྟཾ, ཏདཝསཱནེ ཏསྨིཉྙེཝ ཨེཀཙིཏྟཀྑཎཊྛིཏིཀེ ཨཱརམྨཎེ པཊིསནྡྷིཙིཏྟཾ ཨུཔྤཛྫཏཱི’’ཏི (ཝིབྷ॰ ཨཊྛ॰ ༢༢༧) ཙ ཝཀྑཏི། ཏསྨཱ རཱུཔསྶ སོལ༹སཙིཏྟཀྑཎཱཡུཀཏཱཡཔི ཨཏྠསིདྡྷི ཧོཏིཡེཝ། ཏེནཱཧ ‘‘སོལ༹སཙིཏྟཀྑཎཱཡུཀཏཱ ཨདྷིཔྤེཏཱ’’ཏི། ཏཐཱཔི ཨུཔྤཛྫིཏྭཱ བྷཝངྒཙལནསྶ པཙྩཡོ ཧོཏི, ན ཨུཔྤཛྫམཱནམེཝཱཏི སཏྟརསཙིཏྟཀྑཎཱཡུཀཏཱ ཝེདིཏབྦཱ།

    Evaṃ uppādanirodhakkhaṇesu gahitesu aggahitesu ca soḷasasattarasacittakkhaṇāyukatā, tato adhikacittakkhaṇāyukatā ca siyāti dassetvā idāni tattha ṭhitapakkhaṃ dassento ‘‘yasmā panā’’tiādimāha. Tattha tassa dharamānakkhaṇe uppannesūti tassa utuno dharamānakkhaṇe uppannesu soḷasasu cittesu paṭisandhipi yasmā gahitā, tasmā utuno uppādakkhaṇo dharamānakkhaṇe gahitotinirodhakkhaṇe aggahite ‘‘rūpe dharanteyeva soḷasa cittāni uppajjitvā nirujjhanti, taṃ pana sattarasamena cittena saddhiṃ nirujjhatī’’ti (vibha. aṭṭha. 26 pakiṇṇakakathā) evaṃ aṭṭhakathāyaṃ vakkhamānā adhikasoḷasacittakkhaṇāyukatā adhippetā. Gahite vā nirodhakkhaṇe soḷasacittakkhaṇāyukatā adhippetāti sambandho. Ettha ca ‘‘adhikasoḷasacittakkhaṇāyukatā’’ti idaṃ paṭisandhicittassa uppādakkhaṇo gahitoti katvā vuttaṃ. Yasmā pana paṭiccasamuppādavibhaṅgavaṇṇanāyaṃ ‘‘dve bhavaṅgāni, āvajjanaṃ, dassanaṃ, sampaṭicchanaṃ, santīraṇaṃ, voṭṭhabbanaṃ, pañca javanāni, dve tadārammaṇāni, ekaṃ cuticittanti pañcadasa cittakkhaṇā atītā honti, athāvasesaekacittakkhaṇāyuke’’ti (vibha. aṭṭha. 227), tathā tadārammaṇapariyosānāni, ‘‘ekaṃ cuticittaṃ, tadavasāne tasmiññeva ekacittakkhaṇaṭṭhitike ārammaṇe paṭisandhicittaṃ uppajjatī’’ti (vibha. aṭṭha. 227) ca vakkhati. Tasmā rūpassa soḷasacittakkhaṇāyukatāyapi atthasiddhi hotiyeva. Tenāha ‘‘soḷasacittakkhaṇāyukatā adhippetā’’ti. Tathāpi uppajjitvā bhavaṅgacalanassa paccayo hoti, na uppajjamānamevāti sattarasacittakkhaṇāyukatā veditabbā.

    ཨོཛཱཡ སབྷཱཝསུཁུམཏཱ ཨུཔཱདཱརཱུཔབྷཱཝཏོ། ཨེཏྠ ཙ མཱཏརཱ ཨཛ྄ཛྷོཧཊཱ ཨོཛཱ བཱཧིརབྦྷཉྫནཾ ཝིཡ གབྦྷམལླིནཱ ཏསྨིཾ སནྟཱནེ ཨོཛཊྛམཀརཱུཔུཔྤཏྟིཡཱ པཙྩཡོ ཧོཏི། ཨཱཧཱརསམུཊྛཱནརཱུཔཔཝེཎིཡཱ ཨོཛཱཡ ཝིཡ སེསཏིསནྟཏིཨོཛཱཡ རཱུཔུཔྤཱདནནྟི ཨུདརིཡེ ཨོཛཱ རཱུཔཾ ན སམུཊྛཱཔེཏི ཨུཏུསམུཊྛཱནབྷཱཝཏོ, ཨུཔཱདིནྣཀཊྛཱནེ ཨེཝ པན སམུཊྛཱཔེཏི, རསཧརཎཱིཧི གནྟྭཱ ཀཱཡཱནུསཊནྟི ཝེདིཏབྦཾ།

    Ojāya sabhāvasukhumatā upādārūpabhāvato. Ettha ca mātarā ajjhohaṭā ojā bāhirabbhañjanaṃ viya gabbhamallinā tasmiṃ santāne ojaṭṭhamakarūpuppattiyā paccayo hoti. Āhārasamuṭṭhānarūpapaveṇiyā ojāya viya sesatisantatiojāya rūpuppādananti udariye ojā rūpaṃ na samuṭṭhāpeti utusamuṭṭhānabhāvato, upādinnakaṭṭhāne eva pana samuṭṭhāpeti, rasaharaṇīhi gantvā kāyānusaṭanti veditabbaṃ.

    ཙིཏྟཉྩེཝཱཏི ཨེཏྠ ཙ-སདྡེན པཊིཡོགཱིནཾ ཀམྨམེཝ སམུཙྩིནོཏི, ན ཙིཏྟེན སམྤཡུཏྟདྷམྨེཏི ཀཏྭཱ ཨཱཧ ‘‘ཙིཏྟསྶ པུབྦངྒམཏཱཡ ཝུཏྟ’’ནྟི། ‘‘ཙིཏྟུཔྤཱདཾ གཎྷཱཏི ‘ཙིཏྟཾ ཨུཔྤནྣཾ ཧོཏཱི’ཏིཨཱདཱིསུ (དྷ॰ ས॰ ༡) ཝིཡ, ན ཀམྨཙེཏནཾ ཝིཡ ཨེཀདྷམྨམེཝཱ’’ཏི ཝུཏྟེ ‘‘ཡཐཱ ཙིཏྟསམུཊྛཱནརཱུཔསྶ ཧེཏུཨཱདཡོ ཙིཏྟསམྤཡུཏྟདྷམྨཱཔི སམུཊྛཱཔཀཱཝ, ཨེཝཾ ཀམྨསམུཊྛཱནརཱུཔསྶ ཀམྨསམྤཡུཏྟཱཔཱི’’ཏི ཙོདནཾ སམུཊྛཱཔེཏྭཱ ཏསྶ པརིཧཱརཾ ཝཏྟུཾ ‘‘ཀམྨསམུཊྛཱནཉྩཱ’’ཏིཨཱདིམཱཧ།

    Cittañcevāti ettha ca-saddena paṭiyogīnaṃ kammameva samuccinoti, na cittena sampayuttadhammeti katvā āha ‘‘cittassa pubbaṅgamatāya vutta’’nti. ‘‘Cittuppādaṃ gaṇhāti ‘cittaṃ uppannaṃ hotī’tiādīsu (dha. sa. 1) viya, na kammacetanaṃ viya ekadhammamevā’’ti vutte ‘‘yathā cittasamuṭṭhānarūpassa hetuādayo cittasampayuttadhammāpi samuṭṭhāpakāva, evaṃ kammasamuṭṭhānarūpassa kammasampayuttāpī’’ti codanaṃ samuṭṭhāpetvā tassa parihāraṃ vattuṃ ‘‘kammasamuṭṭhānañcā’’tiādimāha.

    རཱུཔསྶཱཏི རཱུཔཀྑཎསྶ, རཱུཔསྶ ཝཱ ཨདྡྷུནོ། ནཡདསྶནམཏྟཾ དཊྛབྦཾ པཊིསནྡྷིཀྑཎེ ཨེཝ རཱུཔཱརཱུཔདྷམྨཱནཾ ཨེཀཀྑཎེ པཱཏུབྷཱཝོཏི ཨིམསྶ ཨཏྠསྶ ཨནདྷིཔྤེཏཏྟཱ། ཏེནེཝཱཧ ‘‘ཏཏོ པརམྤི རཱུཔཱརཱུཔཱནཾ སཧུཔྤཏྟིསབྦྷཱཝཏོ’’ཏི། ཡཐཱ ཙ ‘‘པཊིསནྡྷིཀྑཎེ ཨེཝཱ’’ཏི ནིཡམོ ན གཧེཏབྦོ, ཨེཝཾ ‘‘ཨེཀཀྑཎེ ཨེཝ པཱཏུབྷཱཝོ’’ཏིཔི ནིཡམོ ན གཧེཏབྦོཏི དསྶེནྟོ ‘‘ན པནེཏ’’ནྟིཨཱདིམཱཧ། ཏཾདཱིཔནཏྠམེཝཱཏི ཨསམཱནཀཱལཏཱདཱིཔནཏྠམེཝ, ན སཧུཔྤཱདདཱིཔནཏྠཾ། ཨདྡྷཱནཔརིཙྪེདཀཐཱ ཧི ཨཡནྟི།

    Rūpassāti rūpakkhaṇassa, rūpassa vā addhuno. Nayadassanamattaṃ daṭṭhabbaṃ paṭisandhikkhaṇe eva rūpārūpadhammānaṃ ekakkhaṇe pātubhāvoti imassa atthassa anadhippetattā. Tenevāha ‘‘tato parampi rūpārūpānaṃ sahuppattisabbhāvato’’ti. Yathā ca ‘‘paṭisandhikkhaṇe evā’’ti niyamo na gahetabbo, evaṃ ‘‘ekakkhaṇe eva pātubhāvo’’tipi niyamo na gahetabboti dassento ‘‘na paneta’’ntiādimāha. Taṃdīpanatthamevāti asamānakālatādīpanatthameva, na sahuppādadīpanatthaṃ. Addhānaparicchedakathā hi ayanti.

    ཡདི ཨེཝནྟི ཡཐཱ ཕལཔཏྟཱནི, ཨེཝཾ རཱུཔཱརཱུཔདྷམྨཱ ཡདི དནྡྷལཧུཔརིཝཏྟིནོ། ཨསམཱནདྡྷཏྟཱཏི ཨཏུལྱཀཱལཏྟཱ། ནིཙྪིདྡེསཱུཏི ནིབྦིཝརེསུ། ཏེན ནིརནྟརཔྤཝཏྟིཾ ཨེཝ ཝིབྷཱཝེཏི། ཨཡནྟི ཨདྡྷཱནཔརིཙྪེདཀཐཱ། ཙིཏྟཛརཱུཔཱདཱིནཾ ན ཏཐཱ ནིརནྟརབྷཱཝེན པཝཏྟི, ཡཐཱ ཀམྨཛརཱུཔཱནནྟི ཨཱཧ ‘‘ཀམྨཛརཱུཔཔྤཝཏྟིཾ སནྡྷཱཡཱ’’ཏི། ཀམྨཛརཱུཔཱནཾ ཝཱ ཨིཏརེསཾ མཱུལབྷཱཝཏོ པདྷཱནནྟི ‘‘ཀམྨཛརཱུཔཔྤཝཏྟིཾ སནྡྷཱཡཱ’’ཏི ཝུཏྟཾ། ཨཙིཏྟུཔྤཱདཀཏྟཱ ཨབྱཱབཛ྄ཛྷཏཱཡ ནིརོདྷསམཱཔཏྟིཡཱ ནིབྦཱནཔཊིབྷཱགཏཱ ཝེདིཏབྦཱ། པདེ པདཾ ཨཀྐམིཏྭཱཏི ལཀུཎྜཀཔཱདཏཱཡ ཨཏྟནོ ཨཀྐནྟཔདསམཱིཔེ པདཾ ནིཀྑིཔིཏྭཱ། ཡོ ཧི སཱིགྷཔདཝིཀྐམོ ལཀུཎྜཀཔཱདོ, སོ ཨིདྷཱདྷིཔྤེཏོཏི ཨཱཧ ‘‘ལཧུཾ ལཧུཾ ཨཀྐམིཏྭཱཏི ཨཏྠོ’’ཏི། སཧེཝ ནིརུཛ྄ཛྷནྟཱིཏི རཱུཔཾ ཀམྨཛམིདྷཱདྷིཔྤེཏནྟི ཀཏྭཱ ཝུཏྟཾ། ཨུཏུཛཾ པན ཙུཏིཏོ ཨུདྡྷམྤི པཝཏྟཏི ཨེཝ། པུབྦེ ཝུཏྟནྟི ‘‘རཱུཔསྶ སཏྟརསཙིཏྟཀྑཎཱ, ཨརཱུཔསྶ ཏཏོ ཨེཀབྷཱགོ’’ཏི (ཝིབྷ॰ མཱུལཊཱི॰ ༢༠ པཀིཎྞཀཀཐཱཝཎྞནཱ) ཨེཝཾ ཝུཏྟཾ ཨདྡྷཱནཔྤཀཱརཾ།

    Yadi evanti yathā phalapattāni, evaṃ rūpārūpadhammā yadi dandhalahuparivattino. Asamānaddhattāti atulyakālattā. Nicchiddesūti nibbivaresu. Tena nirantarappavattiṃ eva vibhāveti. Ayanti addhānaparicchedakathā. Cittajarūpādīnaṃ na tathā nirantarabhāvena pavatti, yathā kammajarūpānanti āha ‘‘kammajarūpappavattiṃ sandhāyā’’ti. Kammajarūpānaṃ vā itaresaṃ mūlabhāvato padhānanti ‘‘kammajarūpappavattiṃ sandhāyā’’ti vuttaṃ. Acittuppādakattā abyābajjhatāya nirodhasamāpattiyā nibbānapaṭibhāgatā veditabbā. Pade padaṃ akkamitvāti lakuṇḍakapādatāya attano akkantapadasamīpe padaṃ nikkhipitvā. Yo hi sīghapadavikkamo lakuṇḍakapādo, so idhādhippetoti āha ‘‘lahuṃ lahuṃ akkamitvāti attho’’ti. Saheva nirujjhantīti rūpaṃ kammajamidhādhippetanti katvā vuttaṃ. Utujaṃ pana cutito uddhampi pavattati eva. Pubbe vuttanti ‘‘rūpassa sattarasacittakkhaṇā, arūpassa tato ekabhāgo’’ti (vibha. mūlaṭī. 20 pakiṇṇakakathāvaṇṇanā) evaṃ vuttaṃ addhānappakāraṃ.

    ཨེཀུཔྤཱདཏོཏི སམཱནུཔྤཱདཏོ། སམཱནཏྠོ ཧི ཨཡཾ ཨེཀ-སདྡོ། ཨེཀོ དཊྛབྦཱཀཱརོཏི ཨེཀོ ཉཱཏཔརིཉྙཱཡ པསྶིཏབྦཱཀཱརོ། ཨེཝཉྷི སོལ༹སཱཀཱརཱ སིཡུཾ, ཨིཏརཐཱ ཝཱིསཏི, ཏཏོ ཨདྷིཀཱ ཝཱ ཨེཏེ ཨཱཀཱརཱ བྷཝེཡྻུཾ། ཏསྶཱཏི པཙྪིམཀམྨཛསྶ། ཧེཊྛཱ སོལ༹སཀེཏི པརིཡོསཱནསོལ༹སཀསྶ ཨནནྟརཱཏཱིཏསོལ༹སཀེ། པཙྪིམསྶཱཏི ཏཏྠ པཙྪིམཙིཏྟསྶ། ནཱནཱནིརོདྷབྷཱཝཾ ཝིཡ ཨེཀུཔྤཱདབྷཱཝམྤི པཙྪིམཀམྨཛསྶ ཋཔནེ ཀཱརཎཾ ཨནིཙྪནྟོ ‘‘ཡདི པནཱ’’ཏི སཱསངྐཾ ཝདཏི། ‘‘སབྦམྤཱི’’ཏིཨཱདིནཱ ཏཏྠ ཨཏིཔྤསངྒཾ དསྶེཏི། ཝཛྫེཏབྦཾ ནཱནུཔྤཱདཾ ཨེཀནིརོདྷཾ། གཧེཏབྦཾ ཨེཀུཔྤཱདནཱནཱནིརོདྷཾ། ཨུབྷཡམྤི ཏདཱ ནཏྠི ཨནུཔྤཛྫནཏོ། ཏེནེཝཱཧ ‘‘ཀམྨཛརཱུཔསྶ ཨནུཔྤཏྟིཏོ’’ཏི། ཏཏོ པུབྦེཏི པཙྪིམཀམྨཛརཱུཔུཔྤཛྫནཏོ ཨོརཾ། ཨཉྙསྶཱཏི ཡསྶ ཙིཏྟསྶ ཨུཔྤཱདཀྑཎེ ཨུཔྤནྣཾ, ཏཏོ ཨཉྙསྶ ཙིཏྟསྶ། ཋིཏིཀྑཎེ ཨུཔྤནྣསྶ ཨེཀུཔྤཱདཏཱ, བྷངྒཀྑཎེ ཨུཔྤནྣསྶ ནཱནཱནིརོདྷཏཱ ཙ ནཏྠཱིཏི ཨཱཧ ‘‘ཋིཏིབྷངྒཀྑཎེསུ ཨུཔྤནྣརཱུཔཱནི ཝཛྫེཏྭཱ’’ཏི། ཏེནཱཏི རཱུཔེན། ‘‘སངྑལིཀསྶ ཝིཡ སམྦནྡྷོ’’ཏི ཨེཏེན ཨཝིཙྪིནྣསམྦནྡྷོ ཨིདྷ ‘‘པཝེཎཱི’’ཏི ཨདྷིཔྤེཏོཏི དསྶེཏི། ཨཉྙཐཱཏི ཝིཙྪིཛྫམཱནམྤི གཧེཏྭཱ ‘‘པཝེཎཱི’’ཏི ཝུཙྩམཱནེ། ན ཧི རཱུཔདྷམྨཱནཾ ཨརཱུཔདྷམྨཱནཾ ཝིཡ ཨནནྟརཔཙྩཡབྷཱཝོ ཨཏྠཱིཏི རཱུཔདྷམྨཱནཾ བྷངྒཀྑཎེ ཨུཔྤནྣརཱུཔདྷམྨེ ཨགྒཧེཏྭཱ ‘‘ཨཊྛཙཏྟཱལཱིསཱ’’ཏི ཝུཏྟཾ། ཏེསཾ པན གཧཎེ ཨེཀཱུནཔཉྙཱསཱཝ སིཡཱཏི ཨཱཧ ‘‘ཨེཀཱུནཔཉྙཱསཀམྨཛིཡཝཙནཾ ཀཏྟབྦཾ སིཡཱ’’ཏི།

    Ekuppādatoti samānuppādato. Samānattho hi ayaṃ eka-saddo. Eko daṭṭhabbākāroti eko ñātapariññāya passitabbākāro. Evañhi soḷasākārā siyuṃ, itarathā vīsati, tato adhikā vā ete ākārā bhaveyyuṃ. Tassāti pacchimakammajassa. Heṭṭhā soḷasaketi pariyosānasoḷasakassa anantarātītasoḷasake. Pacchimassāti tattha pacchimacittassa. Nānānirodhabhāvaṃ viya ekuppādabhāvampi pacchimakammajassa ṭhapane kāraṇaṃ anicchanto ‘‘yadi panā’’ti sāsaṅkaṃ vadati. ‘‘Sabbampī’’tiādinā tattha atippasaṅgaṃ dasseti. Vajjetabbaṃ nānuppādaṃ ekanirodhaṃ. Gahetabbaṃ ekuppādanānānirodhaṃ. Ubhayampi tadā natthi anuppajjanato. Tenevāha ‘‘kammajarūpassa anuppattito’’ti. Tato pubbeti pacchimakammajarūpuppajjanato oraṃ. Aññassāti yassa cittassa uppādakkhaṇe uppannaṃ, tato aññassa cittassa. Ṭhitikkhaṇe uppannassa ekuppādatā, bhaṅgakkhaṇe uppannassa nānānirodhatā ca natthīti āha ‘‘ṭhitibhaṅgakkhaṇesuuppannarūpāni vajjetvā’’ti. Tenāti rūpena. ‘‘Saṅkhalikassa viya sambandho’’ti etena avicchinnasambandho idha ‘‘paveṇī’’ti adhippetoti dasseti. Aññathāti vicchijjamānampi gahetvā ‘‘paveṇī’’ti vuccamāne. Na hi rūpadhammānaṃ arūpadhammānaṃ viya anantarapaccayabhāvo atthīti rūpadhammānaṃ bhaṅgakkhaṇe uppannarūpadhamme aggahetvā ‘‘aṭṭhacattālīsā’’ti vuttaṃ. Tesaṃ pana gahaṇe ekūnapaññāsāva siyāti āha ‘‘ekūnapaññāsakammajiyavacanaṃ kattabbaṃ siyā’’ti.

    སུདཱིཔནཏྟཱཏི སུཁདཱིཔནཏྟཱ, ནཡདསྶནབྷཱཝེན ཝཱ སུཊྛུ དཱིཔནཏྟཱ། ཏེནེཝཱཧ ‘‘ཨེཏེན ཧི ནཡེནཱ’’ཏིཨཱདི། ཏཏྠ ཏནྟི རཱུཔཾ། ཏེནཱཏི རཱུཔེན། ཨུབྷཡཏྠཱཏི པཙྪིམཀམྨཛརཱུཔཔྤཝཏྟིཡཾ, ཏཏོ པུབྦེ ཙ། ཨཉྙསྶཱཏི ཨེཀསྶ ཙིཏྟསྶ ཋིཏིཀྑཎེ ཨུཔྤཛྫིཏྭཱ ཏཏོ ཨཉྙསྶ ཙིཏྟསྶ། ཏསྶཱཏི རཱུཔསྶ། ཨེཏྠ ཙ པཙྪིམཀམྨཛརཱུཔཔྤཝཏྟིཡཾ ནིརུཛ྄ཛྷནཀནྟི ཝུཏྟཾ ཏཏོ པུརེཏརཔྤཝཏྟཾ རཱུཔཾ ཝེདིཏབྦཾ། ཙཏུསནྟཏིཀརཱུཔེནཱཏིཨཱདི ཡཐཱཝུཏྟསངྒཧགམནདསྶནཾ། ཨེཏྠཱཏི ཨེཏསྨིཾ ནཱནུཔྤཱདེཀནིརོདྷཏཱདཱིཔནེ། ཋིཏིཀྑཎེཏི ཨརཱུཔསྶ རཱུཔསྶ ཙ ཋིཏིཀྑཎེ ཨུཔྤནྣསྶ རཱུཔསྶ ཙ ཨརཱུཔསྶ ཙ དསྶིཏཏྟཱ། ཨདསྶིཏསྶཱཏི ཡཐཱ ཨེཝ ཨེཏྠ, ཨེཝཾ ཏཏྠ ཝིབྷཛིཏྭཱ ཨདསྶིཏསྶ། ཀསྨཱ པནེཏྠ པཙྪིམཀམྨཛེན དཱིཔནཱཡཾ སམཏིཾསཀམྨཛརཱུཔགྒཧཎཾ ཀཏནྟི ཨཱཧ ‘‘སམཏིཾས…པེ॰… ཡོཛིཏ’’ནྟི། ཏཏོ ཀམྨཏོ ཛཱཏཱ ཏཾཀམྨཛཱ, ཏེསུ། སངྑརོཏཱིཏི སངྑཱརོ, ཛཱིཝིཏཉྩ ཏཾ སངྑཱརོ ཙཱཏི ཛཱིཝིཏསངྑཱརོ, ཨཱཡུ། ཛཱིཝིཏེན སངྑརཱིཡནྟཱིཏི ཛཱིཝིཏསངྑཱརཱ, ཨུསྨཱདཡོ།

    Sudīpanattāti sukhadīpanattā, nayadassanabhāvena vā suṭṭhu dīpanattā. Tenevāha ‘‘etena hi nayenā’’tiādi. Tattha tanti rūpaṃ. Tenāti rūpena. Ubhayatthāti pacchimakammajarūpappavattiyaṃ, tato pubbe ca. Aññassāti ekassa cittassa ṭhitikkhaṇe uppajjitvā tato aññassa cittassa. Tassāti rūpassa. Ettha ca pacchimakammajarūpappavattiyaṃ nirujjhanakanti vuttaṃ tato puretarappavattaṃ rūpaṃ veditabbaṃ. Catusantatikarūpenātiādi yathāvuttasaṅgahagamanadassanaṃ. Etthāti etasmiṃ nānuppādekanirodhatādīpane. Ṭhitikkhaṇeti arūpassa rūpassa ca ṭhitikkhaṇe uppannassa rūpassa ca arūpassa ca dassitattā. Adassitassāti yathā eva ettha, evaṃ tattha vibhajitvā adassitassa. Kasmā panettha pacchimakammajena dīpanāyaṃ samatiṃsakammajarūpaggahaṇaṃ katanti āha ‘‘samatiṃsa…pe… yojita’’nti. Tato kammato jātā taṃkammajā, tesu. Saṅkharotīti saṅkhāro, jīvitañca taṃ saṅkhāro cāti jīvitasaṅkhāro, āyu. Jīvitena saṅkharīyantīti jīvitasaṅkhārā, usmādayo.

    ཨཉྙསྶ ཨུཔྤཱདཀྑཎེཏི ཡསྶ ཙིཏྟསྶ ཨུཔྤཱདཀྑཎེ ཨུཔྤནྣཾ རཱུཔཾ ཨཉྙསྶ ཏཏོ སཏྟརསམསྶ ཨུཔྤཱདཀྑཎེ, ཋིཏིཀྑཎེ ཨུཔྤནྣཾ ཨཉྙསྶ ཋིཏིཀྑཎེཏི སམྦནྡྷོ། ‘‘ཝུཏྟནྟི ཨདྷིཔྤཱཡོ’’ཏི ཨིདཾ པཱལི༹ཡཱ ཝིརུཛ྄ཛྷནྟམྤི ཨཊྛཀཐཱཡཾ ཨཱགཏབྷཱཝདསྶནཏྠཾ ཝུཏྟནྟི ཨཡམེཏྠ ཨདྷིཔྤཱཡོཏི ཨཏྠོ། ཀསྨཱཏི ཙིཏྟསམུཊྛཱནརཱུཔཾ སནྡྷཱཡ པཱལི༹ པཝཏྟཱ, ཨཊྛཀཐཱཡཾ པན ཀམྨཛརཱུཔནྟི སཱ ཏཱཡ ཀེན ཀཱརཎེན ཝིརུཛ྄ཛྷཏཱིཏི ཨཱཧ ‘‘ཙཏུ…པེ॰… བྷཝིཏབྦཏྟཱ’’ཏི, ནིཔྥནྣསྶཱཏི ཨདྷིཔྤཱཡོ། ཏེནཱཧ ཨཊྛཀཐཱཡཾ ‘‘ཡོ ཙཱཡཾ ཙིཏྟསམུཊྛཱནསྶ…པེ॰… ཀམྨཱདིསམུཊྛཱནསྶཱཔི ཨཡམེཝ ཁཎནིཡམོ’’ཏི (ཝིབྷ॰ ཨཊྛ॰ ༢༦ པཀིཎྞཀཀཐཱ)། ཨེཏེཧཱིཏི ཡཐཱནཱིཏོ ཡམཀཔཱཋོ, ‘‘ཀཱཡསངྑཱརོ ཙིཏྟསམུཊྛཱནོ’’ཏིཨཱདིཀོ ཨཊྛཀཐཱཔདེསོཏི ཨེཏེཧི ། ནཏྠིཡེཝ ཨེཀུཔྤཱདཨེཀནིརོདྷདཱིཔནཏོཏི ཨདྷིཔྤཱཡོ། ཏེན ཧི ཝུཏྟཾ ‘‘ཡེན ཙིཏྟེན སདྡྷིཾ ཨུཔྤཛྫཏི, ཏཏོ པཊྛཱཡ སཏྟརསམེན སདྡྷིཾ ནིརུཛ྄ཛྷཏཱི’’ཏིཨཱདི།

    Aññassauppādakkhaṇeti yassa cittassa uppādakkhaṇe uppannaṃ rūpaṃ aññassa tato sattarasamassa uppādakkhaṇe, ṭhitikkhaṇe uppannaṃ aññassa ṭhitikkhaṇeti sambandho. ‘‘Vuttanti adhippāyo’’ti idaṃ pāḷiyā virujjhantampi aṭṭhakathāyaṃ āgatabhāvadassanatthaṃ vuttanti ayamettha adhippāyoti attho. Kasmāti cittasamuṭṭhānarūpaṃ sandhāya pāḷi pavattā, aṭṭhakathāyaṃ pana kammajarūpanti sā tāya kena kāraṇena virujjhatīti āha ‘‘catu…pe… bhavitabbattā’’ti, nipphannassāti adhippāyo. Tenāha aṭṭhakathāyaṃ ‘‘yo cāyaṃ cittasamuṭṭhānassa…pe… kammādisamuṭṭhānassāpi ayameva khaṇaniyamo’’ti (vibha. aṭṭha. 26 pakiṇṇakakathā). Etehīti yathānīto yamakapāṭho, ‘‘kāyasaṅkhāro cittasamuṭṭhāno’’tiādiko aṭṭhakathāpadesoti etehi . Natthiyeva ekuppādaekanirodhadīpanatoti adhippāyo. Tena hi vuttaṃ ‘‘yena cittena saddhiṃ uppajjati, tato paṭṭhāya sattarasamena saddhiṃ nirujjhatī’’tiādi.

    པུན ‘‘ཨེཏེཧཱི’’ཏི ཨིམིནཱ ཨེཀུཔྤཱདནཱནཱནིརོདྷནཱནུཔྤཱདཨེཀནིརོདྷདཱིཔནཝསེན པཝཏྟཱ ཨཊྛཀཐཱཔདེསཱ གཧིཏཱཏི ཝེདིཏབྦཾ, ཨུབྷཡཏྠཱཔི ཝཱ ཨེཏེཧི ཨཱཙརིཡེཧཱིཏི ཨཏྠོ། ཏཏིཡོ བྷཱགོ, ཏེན ཨདྷིཀཱ སོལ༹སཙིཏྟཀྑཎཱཡུཀཏཱ ཏཏིཡ…པེ॰… ཡུཀཏཱ ཝུཏྟཱཏི སམྦནྡྷོ། ཏཏིཡ བྷཱགོཏི ཙ ཨུཔྤཱདཊྛིཏིཀྑཎེ ཨུཔཱདཱཡ བྷངྒཀྑཎོ ཨདྷིཔྤེཏོ། ཡསྨིཾ ཨེཀཱདས ཙིཏྟཀྑཎཱ ཨཏཱིཏཱ, ཨཝསེསཔཉྩཙིཏྟཀྑཎཱཡུཀེ, ཡསྨིཾ པཉྩདས ཙིཏྟཀྑཎཱ ཨཏཱིཏཱ, ཨཝསེསཨེཀཙིཏྟཀྑཎཱཡུཀེ ཏསྨིཾཡེཝ ཨཱརམྨཎེཏི ཡོཛེཏབྦཾ། ཨུབྷཡཉྩེཏཾ ཡཐཱཀྐམཾ མནོདྭཱརེ པཉྩདྭཱརེ ཙ ཨཱཔཱཐགཏཾ ཝེདིཏབྦཾ། ན ཁོ པནེཝཾ སཀྐཱ ཝིཉྙཱཏུཾ ཨེཀཙིཏྟཀྑཎཱཏཱིཏཾ ཨཱརམྨཎཾ སནྡྷཱཡ པཊིཙྩསམུཔྤཱདཝིབྷངྒཊྛཀཐཱཡཾ (ཝིབྷ॰ ཨཊྛ॰ ༢༢༧) ཏཐཱ ཝུཏྟནྟི དསྶེནྟོ ‘‘ན ཧི སཀྐཱ’’ཏིཨཱདིམཱཧ། པཉྩདསཱཏི ཨཏིརེཀཔཉྩདས ཙིཏྟཀྑཎཱ ཨཏཱིཏཱཏི སམྦནྡྷོ། ‘‘ཏསྨཱ’’ཏིཨཱདིནཱ ཡཏྠ ཁཎེཀདེསཾ ཨགྒཧིཏནྟི ན སཀྐཱ ཝཏྟུཾ, ཏམེཝ དསྶེཏི། ཨེཝཾ ཏཱཝ ན རཱུཔཾ སཏྟརསཙིཏྟཀྑཎཱཡུཀཾ, ནཱཔི ཏཏིཡབྷཱགཱདྷིཀསོལ༹སཙིཏྟཀྑཎཱཡུཀཾ, ཨཐ ཁོ སོལ༹སཙིཏྟཀྑཎཱཡུཀམེཝཱཏི དསྶིཏཾ ཧོཏི།

    Puna ‘‘etehī’’ti iminā ekuppādanānānirodhanānuppādaekanirodhadīpanavasena pavattā aṭṭhakathāpadesā gahitāti veditabbaṃ, ubhayatthāpi vā etehi ācariyehīti attho. Tatiyo bhāgo, tena adhikā soḷasacittakkhaṇāyukatā tatiya…pe… yukatā vuttāti sambandho. Tatiya bhāgoti ca uppādaṭṭhitikkhaṇe upādāya bhaṅgakkhaṇo adhippeto. Yasmiṃ ekādasa cittakkhaṇā atītā, avasesapañcacittakkhaṇāyuke, yasmiṃ pañcadasa cittakkhaṇā atītā, avasesaekacittakkhaṇāyuke tasmiṃyeva ārammaṇeti yojetabbaṃ. Ubhayañcetaṃ yathākkamaṃ manodvāre pañcadvāre ca āpāthagataṃ veditabbaṃ. Na kho panevaṃ sakkā viññātuṃ ekacittakkhaṇātītaṃ ārammaṇaṃ sandhāya paṭiccasamuppādavibhaṅgaṭṭhakathāyaṃ (vibha. aṭṭha. 227) tathā vuttanti dassento ‘‘na hi sakkā’’tiādimāha. Pañcadasāti atirekapañcadasa cittakkhaṇā atītāti sambandho. ‘‘Tasmā’’tiādinā yattha khaṇekadesaṃ aggahitanti na sakkā vattuṃ, tameva dasseti. Evaṃ tāva na rūpaṃ sattarasacittakkhaṇāyukaṃ, nāpi tatiyabhāgādhikasoḷasacittakkhaṇāyukaṃ, atha kho soḷasacittakkhaṇāyukamevāti dassitaṃ hoti.

    ཀསྨཱ པནེཏྠ རཱུཔམེཝ སམཱནེཔི ཨནིཙྩསངྑཏཱདིབྷཱཝེ ཙིརཱཡུཀཾ ཛཱཏནྟི? དནྡྷཔརིཝཏྟིབྷཱཝཏོ། ཨརཱུཔདྷམྨཱ ཧི སཱརམྨཎཱ ཙིཏྟཔུབྦངྒམཱ, ཏེ ཡཐཱབལཾ ཨཏྟནོ ཨཱརམྨཎཝིབྷཱཝནཝསེན པཝཏྟནྟཱིཏི ཏདཏྠནིཔྥཏྟིསམནནྟརམེཝ ནིརུཛ྄ཛྷནཏོ ལཧུཔརིཝཏྟིནོ། ཏེནཱཧ བྷགཝཱ, ‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི ཨེཝཾ ལཧུཔརིཝཏྟཾ, ཡདིདཾ, བྷིཀྑཝེ, ཙིཏྟ’’ནྟི (ཨ॰ ནི॰ ༡.༤༨)། རཱུཔདྷམྨཱ པན ཨནཱརམྨཎཱ, ཏེ ཨཱརམྨཎཝསེན ཨརཱུཔདྷམྨེཧི ཝིབྷཱཝེཏབྦཱ། སཱ ཙ ནེསཾ ཝོཧཱརཱནུགུཎཱ ཝིབྷཱཝེཏབྦཏཱ ཨཏྟནོ དནྡྷཔརིཝཏྟིཏཱཡ, ཏེསཉྩ ལཧུཔརིཝཏྟིཏཱཡ སོལ༹སཧི སཏྟརསཧི ཝཱ ཙིཏྟཀྑཎེཧི ནིཔྤཛྫཏཱིཏི རཱུཔམེཝེཏྠ ཙིརཱཡུཀཾ ཛཱཏཾ། ཀིཉྩ – ལཧུཝིཉྙཱཎཝིསཡསནྟཏིམཏྟཱདྷཱིནཝུཏྟིཏཱཡ ཏིཎྞཾ ཁནྡྷཱནཾ, ཨཱརམྨཎཱུཔལདྡྷིམཏྟབྷཱཝཏོ ཝིཉྙཱཎསྶ ཙ ལཧུཔརིཝཏྟིཏཱ, དནྡྷམཧཱབྷཱུཏཔྤཙྩཡཏཱཡ པན རཱུཔསྶ དནྡྷཔརིཝཏྟིཏཱ། ནཱནཱདྷཱཏཱུསུ ཏཐཱགཏསྶེཝ ཡཐཱབྷཱུཏཉཱཎཾ, ཏེན ཙ རཱུཔམེཝ པུརེཛཱཏཔཙྩཡོ ཝུཏྟོ, པཙྪཱཛཱཏཔཙྩཡོ ཙ ཏསྶེཝཱཏི ན ཨེཏྠ ཨནིཙྩསངྑཏཱདིབྷཱཝསཱམཉྙེན རཱུཔཱརཱུཔཾ སམཱནཱཡུཀཾ པརིཀཔྤེཏབྦཾ། ཝུཏྟནཡེན རཱུཔམེཝ ཙིརཱཡུཀནྟི ནིཊྛམེཏྠ གནྟབྦཾ།

    Kasmā panettha rūpameva samānepi aniccasaṅkhatādibhāve cirāyukaṃ jātanti? Dandhaparivattibhāvato. Arūpadhammā hi sārammaṇā cittapubbaṅgamā, te yathābalaṃ attano ārammaṇavibhāvanavasena pavattantīti tadatthanipphattisamanantarameva nirujjhanato lahuparivattino. Tenāha bhagavā, ‘‘nāhaṃ, bhikkhave, aññaṃ ekadhammampi samanupassāmi evaṃ lahuparivattaṃ, yadidaṃ, bhikkhave, citta’’nti (a. ni. 1.48). Rūpadhammā pana anārammaṇā, te ārammaṇavasena arūpadhammehi vibhāvetabbā. Sā ca nesaṃ vohārānuguṇā vibhāvetabbatā attano dandhaparivattitāya, tesañca lahuparivattitāya soḷasahi sattarasahi vā cittakkhaṇehi nippajjatīti rūpamevettha cirāyukaṃ jātaṃ. Kiñca – lahuviññāṇavisayasantatimattādhīnavuttitāya tiṇṇaṃ khandhānaṃ, ārammaṇūpaladdhimattabhāvato viññāṇassa ca lahuparivattitā, dandhamahābhūtappaccayatāya pana rūpassa dandhaparivattitā. Nānādhātūsu tathāgatasseva yathābhūtañāṇaṃ, tena ca rūpameva purejātapaccayo vutto, pacchājātapaccayo ca tassevāti na ettha aniccasaṅkhatādibhāvasāmaññena rūpārūpaṃ samānāyukaṃ parikappetabbaṃ. Vuttanayena rūpameva cirāyukanti niṭṭhamettha gantabbaṃ.

    ཡཐཱ ཙ རཱུཔསྶ སཏྟརསཙིཏྟཀྑཎཱཡུཀཏཱ, ཏཏིཡབྷཱགཱདྷིཀསོལ༹སཙིཏྟཀྑཎཱཡུཀཏཱ ཝཱ ན ཧོཏི, ཏཾ དསྶེཏྭཱ ཡྭཱཡཾ ཨཊྛཀཐཱཡཾ ཙིཏྟསྶ ཋིཏིཀྑཎེ རཱུཔུཔྤཱདོ ཝུཏྟོ, ཏཏྠ ཋིཏིཀྑཎམེཝ ཏཱཝ ཙིཏྟསྶ ཨནནུཛཱནནྟོ ‘‘ཡོ ཙེཏྠ…པེ॰… ཝིཙཱརེཏབྦོ’’ཏི ཝཏྭཱ ཡམཀེ ཨུཔྤནྣཨུཔྤཛྫམཱནཝཱརཱདིཔཱལི༹ཾ ཨཱཧརནྟོ ‘‘ཙིཏྟཡམཀེ’’ཏིཨཱདིམཱཧ། ཏཏྠ པརིཔུཎྞཝིསྶཛྫནེཏི ཨུབྷཡམྤི ཡམཀཔདཾ ཨཧཱཔེཏྭཱ ཀཏཝིསྶཛྫནེ། ཨུཔྤཱདཀྑཎེ ཨནཱགཏཉྩཱཏི ཨུཔྤཱདཀྑཎེ ཙ ཙིཏྟཾ, ཨནཱགཏཉྩ ཙིཏྟཾ ན ནིརུདྡྷཾ, ནིརུཛ྄ཛྷམཱནནྟི ཨཏྠོ། ཋིཏིཀྑཎཱབྷཱཝཾ ཙིཏྟསྶ དཱིཔེཏཱིཏི ཨུཔྤནྣཨུཔྤཛྫམཱནཝཱརཱདཱིསུ ‘‘ཋིཏིཀྑཎེ’’ཏི ཨཝཙནཾ ཙིཏྟསྶ ཋིཏིཀྑཎཾ ནཱམ ནཏྠཱིཏི ཨིམམཏྠཾ དཱིཔེཏི བོདྷེཏི། ན ཧི ཡཐཱདྷམྨསཱསནེ ཨབྷིདྷམྨེ ལབྦྷམཱནསྶ ཨཝཙནེ ཀཱརཎཾ དིསྶཏཱིཏི ཨདྷིཔྤཱཡོ། ན ཀེཝལམབྷིདྷམྨེ ཨཝཙནམེཝ ཙིཏྟསྶ ཋིཏིཀྑཎཱབྷཱཝཛོཏཀཾ, ཨཔིཙ ཁོ སུཏྟནྟཔཱལི༹པཱིཏི དསྶེནྟོ ‘‘སུཏྟེསུཔཱི’’ཏིཨཱདིམཱཧ། ཏཏྠ ཨཉྙཐཏྟཾ ནཱམ པུབྦཱཔརཝིསེསོ། ཁཎདྭཡསམངྒིཾ ཋིཏནྟི པཙྩུཔྤནྣསྶ ཋིཏབྷཱཝམཱཧ། ཨཉྙཐཏྟཾ པན སནྟཱནེཡེཝ ཝེདིཏབྦཾ།

    Yathā ca rūpassa sattarasacittakkhaṇāyukatā, tatiyabhāgādhikasoḷasacittakkhaṇāyukatā vā na hoti, taṃ dassetvā yvāyaṃ aṭṭhakathāyaṃ cittassa ṭhitikkhaṇe rūpuppādo vutto, tattha ṭhitikkhaṇameva tāva cittassa ananujānanto ‘‘yo cettha…pe… vicāretabbo’’ti vatvā yamake uppannauppajjamānavārādipāḷiṃ āharanto ‘‘cittayamake’’tiādimāha. Tattha paripuṇṇavissajjaneti ubhayampi yamakapadaṃ ahāpetvā katavissajjane. Uppādakkhaṇe anāgatañcāti uppādakkhaṇe ca cittaṃ, anāgatañca cittaṃ na niruddhaṃ, nirujjhamānanti attho. Ṭhitikkhaṇābhāvaṃ cittassa dīpetīti uppannauppajjamānavārādīsu ‘‘ṭhitikkhaṇe’’ti avacanaṃ cittassa ṭhitikkhaṇaṃ nāma natthīti imamatthaṃ dīpeti bodheti. Na hi yathādhammasāsane abhidhamme labbhamānassa avacane kāraṇaṃ dissatīti adhippāyo. Na kevalamabhidhamme avacanameva cittassa ṭhitikkhaṇābhāvajotakaṃ, apica kho suttantapāḷipīti dassento ‘‘suttesupī’’tiādimāha. Tattha aññathattaṃ nāma pubbāparaviseso. Khaṇadvayasamaṅgiṃ ṭhitanti paccuppannassa ṭhitabhāvamāha. Aññathattaṃ pana santāneyeva veditabbaṃ.

    ཨེཏྠ ཙ ཀེཙི ‘‘ཡཐཱབྷཱུཏོ དྷམྨོ ཨུཔྤཛྫཏི, ཀིཾ ཏཐཱབྷཱུཏོཝ བྷིཛྫཏི, ཨུདཱཧུ ཨཉྙཐཱབྷཱུཏོ? ཡདི ཏཐཱབྷཱུཏོཝ བྷིཛྫཏི, ན ཛརཏཱཡ སམྦྷཝོ། ཨཐ ཨཉྙཐཱབྷཱུཏོ, ཨཉྙོ ཨེཝ སོཏི སབྦཐཱཔི ཋིཏིཀྑཎསྶ ཨབྷཱཝོཡེཝཱ’’ཏི ཝདནྟི། ཏཏྠ ཨེཀདྷམྨཱདྷཱརབྷཱཝེཔི ཨུཔྤཱདནིརོདྷཱནཾ ཨཉྙོཝ ཨུཔྤཱདཀྑཎོ, ཨཉྙོ ནིརོདྷཀྑཎོ། ཨུཔྤཱདཱཝཏྠཉྷི ཨུཔཱདཱཡ ཨུཔྤཱདཀྑཎོ, ནིརོདྷཱཝཏྠཾ ཨུཔཱདཱཡ ནིརོདྷཀྑཎོ། ཨུཔྤཱདཱཝཏྠཱཡ ཙ བྷིནྣཱ ནིརོདྷཱཝཏྠཱཏི ཨེཀསྨིཾཡེཝ སབྷཱཝདྷམྨེ ཡཐཱ ཨིཙྪིཏབྦཱ, ཨཉྙཐཱ ཨཉྙོཝ དྷམྨོ ཨུཔྤཛྫཏི, ཨཉྙོ དྷམྨོ ནིརུཛ྄ཛྷཏཱིཏི ཨཱཔཛྫེཡྻ, ཨེཝཾ ནིརོདྷཱཝཏྠཱཡ ཝིཡ ནིརོདྷཱབྷིམུཁཱཝཏྠཱཡཔི བྷཝིཏབྦཾ། སཱ ཋིཏི, ཛརཏཱ ཙཱཏི སམྤཊིཙྪིཏབྦམེཏཾ། ཡདི ཨེཝཾ ཀསྨཱ པཱལི༹ཡཾ ཋིཏིཀྑཎོ ན ཝུཏྟོཏི? ཝིནེཡྻཛ྄ཛྷཱསཡཱནུརོདྷེན ནཡདསྶནཝསེན པཱལི༹ གཏཱཏི ཝེདིཏབྦཱ། ཨབྷིདྷམྨདེསནཱཔི ཧི ཀདཱཙི ཝིནེཡྻཛ྄ཛྷཱསཡཱནུརོདྷེན པཝཏྟཏི། ཏཐཱ ཧི རཱུཔསྶ ཨུཔྤཱདོ ‘‘ཨུཔཙཡོ, སནྟཏཱི’’ཏི བྷིནྡིཏྭཱ དེསིཏོ། ཧེཏུསམྤཡུཏྟདུཀཱདིདེསནཱ ཙེཏྠ ནིདསྶིཏབྦཱ།

    Ettha ca keci ‘‘yathābhūto dhammo uppajjati, kiṃ tathābhūtova bhijjati, udāhu aññathābhūto? Yadi tathābhūtova bhijjati, na jaratāya sambhavo. Atha aññathābhūto, añño eva soti sabbathāpi ṭhitikkhaṇassa abhāvoyevā’’ti vadanti. Tattha ekadhammādhārabhāvepi uppādanirodhānaṃ aññova uppādakkhaṇo, añño nirodhakkhaṇo. Uppādāvatthañhi upādāya uppādakkhaṇo, nirodhāvatthaṃ upādāya nirodhakkhaṇo. Uppādāvatthāya ca bhinnā nirodhāvatthāti ekasmiṃyeva sabhāvadhamme yathā icchitabbā, aññathā aññova dhammo uppajjati, añño dhammo nirujjhatīti āpajjeyya, evaṃ nirodhāvatthāya viya nirodhābhimukhāvatthāyapi bhavitabbaṃ. Sā ṭhiti, jaratā cāti sampaṭicchitabbametaṃ. Yadi evaṃ kasmā pāḷiyaṃ ṭhitikkhaṇo na vuttoti? Vineyyajjhāsayānurodhena nayadassanavasena pāḷi gatāti veditabbā. Abhidhammadesanāpi hi kadāci vineyyajjhāsayānurodhena pavattati. Tathā hi rūpassa uppādo ‘‘upacayo, santatī’’ti bhinditvā desito. Hetusampayuttadukādidesanā cettha nidassitabbā.

    ‘‘ཡསྶ ཝཱ པནཱ’’ཏིཨཱདི པུཙྪཱཝཙནཾ། ཏསྶ ‘‘ནོ’’ཏི ཝིསྶཛྫནཾ། སམུདཡསཙྩཾ ནིརུཛ྄ཛྷཏཱིཏི ཙིཏྟུཔྤཱདསྶ ནིརོདྷཀྑཎོ ཝུཏྟོ། ཨཡམེཏྠ ཨདྷིཔྤཱཡོ – ཡདི ཙིཏྟསྶ བྷངྒཀྑཎེ རཱུཔཾ ཨུཔྤཛྫེཡྻ, ཏཾ དུཀྑསཙྩནྟི ཀཏྭཱ ‘‘ནོ’’ཏི ཝཏྟུཾ ན སཀྐཱ, ཝུཏྟཉྩེཏཾ། ཏསྨཱ ཝིཉྙཱཡཏི ‘‘ཙིཏྟསྶ ནིརོདྷཀྑཎེ རཱུཔུཔྤཱདོ ནཏྠཱི’’ཏི། ཏཡིདམཀཱརཎཾ། ཨརཱུཔལོཀཉྷི སནྡྷཱཡ, ཙིཏྟསམུཊྛཱནརཱུཔཾ ཝཱ ‘‘ནོ’’ཏི སཀྐཱ ཝཏྟུནྟི། ཨཡཉྷི ཡམཀདེསནཱཡ པཀཏི, ཡདིདཾ ཡཐཱསམྦྷཝཡོཛནཱ། ཨེཏེན ‘‘ན ཙ ཙིཏྟསམུཊྛཱནརཱུཔམེཝཱ’’ཏིཨཱདིཝཙནཾ པཊིཀྑིཏྟཾ དཊྛབྦཾ། ཨཐ ཝཱ པཙྩཱསཏྟིཉཱཡེན ཡཾ སམུདཡསཙྩཾ ནིརུཛ྄ཛྷཏི, ཏེན ཡཾ དུཀྑསཙྩཾ ཨུཔྤཱདེཏབྦཾ ཙིཏྟཙེཏསིཀཏཔྤཊིབདྡྷརཱུཔསངྑཱཏཾ, ཏསྶ ཏདཱ ཨུཔྤཏྟི ནཏྠཱིཏི ‘‘ནོ’’ཏི ཝིསྶཛྫནཾ, ན སབྦསྶ།

    ‘‘Yassavā panā’’tiādi pucchāvacanaṃ. Tassa ‘‘no’’ti vissajjanaṃ. Samudayasaccaṃ nirujjhatīti cittuppādassa nirodhakkhaṇo vutto. Ayamettha adhippāyo – yadi cittassa bhaṅgakkhaṇe rūpaṃ uppajjeyya, taṃ dukkhasaccanti katvā ‘‘no’’ti vattuṃ na sakkā, vuttañcetaṃ. Tasmā viññāyati ‘‘cittassa nirodhakkhaṇe rūpuppādo natthī’’ti. Tayidamakāraṇaṃ. Arūpalokañhi sandhāya, cittasamuṭṭhānarūpaṃ vā ‘‘no’’ti sakkā vattunti. Ayañhi yamakadesanāya pakati, yadidaṃ yathāsambhavayojanā. Etena ‘‘na ca cittasamuṭṭhānarūpamevā’’tiādivacanaṃ paṭikkhittaṃ daṭṭhabbaṃ. Atha vā paccāsattiñāyena yaṃ samudayasaccaṃ nirujjhati, tena yaṃ dukkhasaccaṃ uppādetabbaṃ cittacetasikatappaṭibaddharūpasaṅkhātaṃ, tassa tadā uppatti natthīti ‘‘no’’ti vissajjanaṃ, na sabbassa.

    སཧུཔྤཱདེཀནིརོདྷཝཙནཏོཏི ‘‘ཡསྶ ཀཱཡསངྑཱརོ ནིརུཛ྄ཛྷཏི, ཏསྶ ཙིཏྟསངྑཱརོ ནིརུཛ྄ཛྷཏཱིཏི? ཨཱམནྟཱ’’ཏི (ཡམ॰ ༢.སངྑཱརཡམཀ.༧༩) ཨེཝཾ སཧུཔྤཱདསཧནིརོདྷཝཙནཏོ། ཏེན ཝཙནེནཱཏི ‘‘ཡསྶ ཀཱཡསངྑཱརོ’’ཏིཨཱདིཝཙནེན། ཨཉྙརཱུཔཱནནྟི ཀམྨཨུཏུཨཱཧཱརཛརཱུཔཱནཾ། སཧུཔྤཱདསཧནིརོདྷཱདིཀཱནནྟི ཨེཏྠཱཡཾ ཡོཛནཱ – ཨཔྤཊིཀྑིཏྟསཧུཔྤཱདསཧནིརོདྷཨནནུཉྙཱཏནཱནུཔྤཱདནཱནཱནིརོདྷཨནིཝཱརིཏཨབྱཱཀཏབྷཱཝཱནཾ ཀམྨཛཱདཱིནནྟི། ཨེཏེནཱཏི ‘‘ཡསྶ ཀུསལཱ དྷམྨཱ ཨུཔྤཛྫནྟཱི’’ཏིཨཱདིཀེན (ཡམ॰ ༣.དྷམྨཡམཀ.༡༦༣) པཱཋེན, ‘‘ན ཙིཏྟསམུཊྛཱནརཱུཔམེཝཱ’’ཏི ཡུཏྟིཝཙནེན ཙ། ཡམཀཔཱལི༹ཨནུསྶརཎེཏི ཡཐཱདསྶིཏཙིཏྟཡམཀཔཱལི༹ཡཱ ཡཐཱརུཏཝསེནེཝ ཨནུསྶརཎེ ཝིཛྫམཱནེ། བྷིཛྫམཱནཏཱཏི ཙིཏྟསྶ བྷིཛྫམཱནཏཱ ནཱམ ནིརུཛ྄ཛྷམཱནཏཱ ཋིཏིཡཱ ཨབྷཱཝཏོ། སཧཱཡབྷཱཝཾ ནཱཔི གཙྪཏི ནིསྶཡཏྠིབྷཱཝཱདིནཱ པཙྩཡབྷཱཝཱབྷཱཝཏོ། ཨུཔྤཱདཀྑཎེ ཨེཝ ཧི ཨནནྟརཱདིཔཙྩཡལཱབྷེན ཙིཏྟསྶ བལཝཏཱ། ཨེཝཉྩ སཏཱིཏི ཨེཝཉྩ ཨུཏུནཱཔི བྷཝངྒཙིཏྟསྶ ཨུཔྤཱདཀྑཎེཡེཝ རཱུཔསམུཊྛཱཔནེ སཏི། ཏཾཙིཏྟཀྑཎེཏི ཏསྶ ཙིཏྟསྶ ཁཎེ, ཁཎདྭཡེཔཱིཏི ཨཏྠོ། ཏེནེཝཱཏི ཨཏིལཧུཔརིཝཏྟིབྷཱཝེནེཝ། ཨཐ ཝཱ ཏེནེཝཱཏི དནྡྷཔརིཝཏྟིཀཏཱཡ རཱུཔསྶ སཀལཾ ཨེཀཙིཏྟཀྑཎཾ ཨུཔྤཛྫམཱནབྷཱཝེནེཝ། ཏནྟི ཙིཏྟཾ། པཊིསནྡྷིཙིཏྟཾ སམྤཡུཏྟདྷམྨཱནཾ ཝིཡ སཧཛཱཏརཱུཔདྷམྨཱནམྤི སཧཛཱཏཱདིཔཙྩཡེན པཙྩཡོ ཧོཏཱིཏི ཨཱཧ ‘‘པཊིསནྡྷིཏོ ཨུདྡྷ’’ནྟི། ཙིཏྟསམུཊྛཱནཱནཾ ཙིཏྟཾ སཧཛཱཏཱདིཔཙྩཡོ ཧོཏིཡེཝཱཏི ཝུཏྟཾ ‘‘ཨཙིཏྟསམུཊྛཱནཱན’’ནྟི། ཏདནནྟརནྟི ཡེན ཙིཏྟེན སཧུཔྤནྣཾ, ཏསྶ ཙིཏྟསྶ ཨནནྟརཾ། ཏནྟི རཱུཔཾ། ཏདནནྟརཾ ཙིཏྟནྟི སཧུཔྤནྣཙིཏྟཱནནྟརཾ ཙིཏྟཾ། ཡདི ཨེཝནྟི ཡདི སཀལཾ ཙིཏྟཀྑཎཾ རཱུཔཾ ཨུཔྤཛྫམཱནམེཝ ཧོཏི, ཙིཏྟསྶ ཨུཔྤཱདཀྑཎེ ཨེཝ རཱུཔསྶ ཨུཔྤཱདཱརམྦྷོཏི ཨཱཧ ‘‘ན, ཙིཏྟནིརོདྷཀྑཎེ རཱུཔུཔྤཱདཱརམྦྷཱབྷཱཝཏོ’’ཏི། ཙིཏྟཀྑཎེཏི ཨཏྟནཱ སཧུཔྤནྣཙིཏྟསྶ ཁཎེ། ཏནྟི རཱུཔཾ། རཱུཔསམུཊྛཱཔནཔུརེཛཱཏཔཙྩཡཀིཙྩནྟི རཱུཔསམུཊྛཱཔནཀིཙྩཉྩ པུརེཛཱཏཔཙྩཡཀིཙྩཉྩ། ཋིཏིཔྤཏྟིཝིསེསཱལཱབྷནྟི ཋིཏིཔྤཏྟིཡཱ ལདྡྷབྦོ ཡོ ཝིསེསོ, ཏསྶ ཨལཱབྷཾ། ཨིདཾ ཝུཏྟནྟི ‘‘ཡེན སཧུཔྤཛྫཏི, ཏཾཙིཏྟཀྑཎེ རཱུཔཾ ཨུཔྤཛྫམཱནམེཝཱ’’ཏི ཨིདཾ པརིཡཱཡེན ཝུཏྟཾ།

    Sahuppādekanirodhavacanatoti ‘‘yassa kāyasaṅkhāro nirujjhati, tassa cittasaṅkhāro nirujjhatīti? Āmantā’’ti (yama. 2.saṅkhārayamaka.79) evaṃ sahuppādasahanirodhavacanato. Tena vacanenāti ‘‘yassa kāyasaṅkhāro’’tiādivacanena. Aññarūpānanti kammautuāhārajarūpānaṃ. Sahuppādasahanirodhādikānanti etthāyaṃ yojanā – appaṭikkhittasahuppādasahanirodhaananuññātanānuppādanānānirodhaanivāritaabyākatabhāvānaṃ kammajādīnanti. Etenāti ‘‘yassa kusalā dhammā uppajjantī’’tiādikena (yama. 3.dhammayamaka.163) pāṭhena, ‘‘na cittasamuṭṭhānarūpamevā’’ti yuttivacanena ca. Yamakapāḷianussaraṇeti yathādassitacittayamakapāḷiyā yathārutavaseneva anussaraṇe vijjamāne. Bhijjamānatāti cittassa bhijjamānatā nāma nirujjhamānatā ṭhitiyā abhāvato. Sahāyabhāvaṃ nāpi gacchati nissayatthibhāvādinā paccayabhāvābhāvato. Uppādakkhaṇe eva hi anantarādipaccayalābhena cittassa balavatā. Evañca satīti evañca utunāpi bhavaṅgacittassa uppādakkhaṇeyeva rūpasamuṭṭhāpane sati. Taṃcittakkhaṇeti tassa cittassa khaṇe, khaṇadvayepīti attho. Tenevāti atilahuparivattibhāveneva. Atha vā tenevāti dandhaparivattikatāya rūpassa sakalaṃ ekacittakkhaṇaṃ uppajjamānabhāveneva. Tanti cittaṃ. Paṭisandhicittaṃ sampayuttadhammānaṃ viya sahajātarūpadhammānampi sahajātādipaccayena paccayo hotīti āha ‘‘paṭisandhito uddha’’nti. Cittasamuṭṭhānānaṃ cittaṃ sahajātādipaccayo hotiyevāti vuttaṃ ‘‘acittasamuṭṭhānāna’’nti. Tadanantaranti yena cittena sahuppannaṃ, tassa cittassa anantaraṃ. Tanti rūpaṃ. Tadanantaraṃ cittanti sahuppannacittānantaraṃ cittaṃ. Yadi evanti yadi sakalaṃ cittakkhaṇaṃ rūpaṃ uppajjamānameva hoti, cittassa uppādakkhaṇe eva rūpassa uppādārambhoti āha ‘‘na, cittanirodhakkhaṇe rūpuppādārambhābhāvato’’ti. Cittakkhaṇeti attanā sahuppannacittassa khaṇe. Tanti rūpaṃ. Rūpasamuṭṭhāpanapurejātapaccayakiccanti rūpasamuṭṭhāpanakiccañca purejātapaccayakiccañca. Ṭhitippattivisesālābhanti ṭhitippattiyā laddhabbo yo viseso, tassa alābhaṃ. Idaṃ vuttanti ‘‘yena sahuppajjati, taṃcittakkhaṇe rūpaṃ uppajjamānamevā’’ti idaṃ pariyāyena vuttaṃ.

    ཡཾ ཡསྶ སམྦནྡྷིབྷཱཝེན ཝུཏྟཾ, ཏཾ དཱུརེ ཋིཏམྤི ཏེན སམྦནྡྷནཱིཡནྟི ཨཱཧ ‘‘ཏཏོ པརཾ…པེ॰… ཨེཏེན སཧ སམྦནྡྷོ’’ཏི། ཏསྨཱ ‘‘ཏཏོ’’ཏི ཨེཏྠ ཏཾསདྡེན ཙུཏིཾ པཙྩཱམསཏཱིཏི ཝུཏྟཾ ‘‘ཙུཏིཏོ པརནྟི ཨཏྠོ’’ཏི།

    Yaṃ yassa sambandhibhāvena vuttaṃ, taṃ dūre ṭhitampi tena sambandhanīyanti āha ‘‘tato paraṃ…pe… etena saha sambandho’’ti. Tasmā ‘‘tato’’ti ettha taṃsaddena cutiṃ paccāmasatīti vuttaṃ ‘‘cutito paranti attho’’ti.

    ནཏྠཱིཏི ཀཏྭཱཏི ཡདིཔི ཡཐཱ ཨཊྛཀཐཱཡཾ ཝུཏྟཾ, ཏཐཱ ཨེཀུཔྤཱདེཀནིརོདྷཏཱ རཱུཔཱནཾ ཨརཱུཔེཧི, ཨརཱུཔཱནཉྩ རཱུཔེཧི ནཏྠི། ཡཐཱ ཙ ཨམྷེཧི ཝུཏྟཾ, ཏཐཱ ཨཏྠེཝཱཏི ཨདྷིཔྤཱཡོ།

    Natthītikatvāti yadipi yathā aṭṭhakathāyaṃ vuttaṃ, tathā ekuppādekanirodhatā rūpānaṃ arūpehi, arūpānañca rūpehi natthi. Yathā ca amhehi vuttaṃ, tathā atthevāti adhippāyo.

    ཙཏུཏྠསྶ པཀཱརསྶ ཝུཙྩམཱནཏྟཱ ‘‘ཏཡོ པཀཱརེ ཨཱཧཱ’’ཏི ཝུཏྟཾ།

    Catutthassa pakārassa vuccamānattā ‘‘tayo pakāre āhā’’ti vuttaṃ.

    ‘‘ཏེསཾཡེཝ རཱུཔཱནཾ ཀཱཡཝིཀཱརོ’’ཏིཨཱདིནཱ པརིནིཔྥནྣཱནཾ ཝིཀཱརཱདིབྷཱཝཾ དསྶེཏྭཱ ‘‘སབྦཾ པརིནིཔྥནྣཾ སངྑཏམེཝཱ’’ཏི ཝདནྟེན པརིནིཔྥནྣཏཱཔརིཡཱཡོ དསྶིཏོ། པུབྦནྟཱཔརནྟཔརིཙྪིནྣོཏི པཱཏུབྷཱཝཝིདྡྷཾསབྷཱཝཔརིཙྪིནྣོ, ཨུདཡབྦཡཔརིཙྪིནྣོ ཝཱ། ‘‘ཨཡཾ དཏྟོ ནཱམ ཧོཏཱུ’’ཏིཨཱདིནཱ ནཱམཀརཎཾ ནཱམགྒཧཎཾ། སམཱཔཛྫནཾ ནིརོདྷསམཱཔཏྟིཡཱ སམཐཝིཔསྶནཱནུཀྐམེན ནཱམཀཱཡསྶ ནིརོདྷམེཝ། ཨཱདི-སདྡེན སཏྟཀསིཎཱདིཔཉྙཏྟིཡཱ པཉྙཱཔནཾ སངྒཎྷཱཏི། ནིཔྥཱདིཡམཱནོཏི སཱདྷིཡམཱནོ།

    ‘‘Tesaṃyeva rūpānaṃ kāyavikāro’’tiādinā parinipphannānaṃ vikārādibhāvaṃ dassetvā ‘‘sabbaṃ parinipphannaṃ saṅkhatamevā’’ti vadantena parinipphannatāpariyāyo dassito. Pubbantāparantaparicchinnoti pātubhāvaviddhaṃsabhāvaparicchinno, udayabbayaparicchinno vā. ‘‘Ayaṃ datto nāma hotū’’tiādinā nāmakaraṇaṃ nāmaggahaṇaṃ. Samāpajjanaṃ nirodhasamāpattiyā samathavipassanānukkamena nāmakāyassa nirodhameva. Ādi-saddena sattakasiṇādipaññattiyā paññāpanaṃ saṅgaṇhāti. Nipphādiyamānoti sādhiyamāno.

    པཀིཎྞཀཀཐཱཝཎྞནཱ ནིཊྛིཏཱ།

    Pakiṇṇakakathāvaṇṇanā niṭṭhitā.

    ཀམཱདིཝིནིཙྪཡཀཐཱཝཎྞནཱ

    Kamādivinicchayakathāvaṇṇanā

    ཨུཔྤཏྟིཀྐམཱདཱིསུ དེསནཱཀྐམོཔི ལབྦྷཏེཝཱཏི ‘‘ཙཏྟཱརོ སཏིཔཊྛཱནཱཏིཨཱདིཀོ དེསནཱཀྐམོཝཱ’’ཏི ཝུཏྟཾ། ཨནུཔུབྦུཀྐཾསཏོཏི དཱནསཱིལཀཱམཱདཱིནཝཱདིདསྶནནེཀྑམྨཀཐཱནཾ ཨནུཀྐམེན ཨུཀྐཊྛབྷཱཝཏོ ཀཐཱནཾ ཨནུཔུབྦུཀྐཾསཏཱ ཝུཏྟཱ། ཏེན ཨུཀྐཾསཀྐམོ ནཱམཱཡཾ ཝིསུཾ ཀམོཏི དསྶེཏི། ཏཐཱཔི དཱནཱདཱིནཾ དེསནཱཀྐམཱཝརོདྷནེ ཀཱརཎམཱཧ ‘‘ཨུཔྤཏྟིཨཱདིཝཝཏྠཱནཱབྷཱཝཏོ’’ཏི། ཏཏྠ ཨཱདི-སདྡེན པཧཱནཔཊིཔཏྟིབྷཱུམིཀྐམེ སངྒཎྷཱཏི། ‘‘ཙཀྑུཨཱདཱིནམྤི ཝིསཡབྷཱུཏ’’ནྟི ཨིམིནཱ པཉྩརཱུཔིནྡྲིཡགོཙརཏཱ ཨདྷིཔྤེཏཱཏི ཨཱཧ ‘‘ཨེཀདེསེནཱ’’ཏིཨཱདི། ཨེཀདེསེནཱཏི བཱཧིརོལཱ༹རིཀཱཡཏནེཧི། ཨེཏྠཱཏི ‘‘ཡཾ ཝེདཡཏི, ཏཾ སཉྫཱནཱཏཱི’’ཏི ཨེཏསྨིཾ པདེ ཝུཏྟནཡེན།

    Uppattikkamādīsu desanākkamopi labbhatevāti ‘‘cattāro satipaṭṭhānātiādiko desanākkamovā’’ti vuttaṃ. Anupubbukkaṃsatoti dānasīlakāmādīnavādidassananekkhammakathānaṃ anukkamena ukkaṭṭhabhāvato kathānaṃ anupubbukkaṃsatā vuttā. Tena ukkaṃsakkamo nāmāyaṃ visuṃ kamoti dasseti. Tathāpi dānādīnaṃ desanākkamāvarodhane kāraṇamāha ‘‘uppattiādivavatthānābhāvato’’ti. Tattha ādi-saddena pahānapaṭipattibhūmikkame saṅgaṇhāti. ‘‘Cakkhuādīnampi visayabhūta’’nti iminā pañcarūpindriyagocaratā adhippetāti āha ‘‘ekadesenā’’tiādi. Ekadesenāti bāhiroḷārikāyatanehi. Etthāti ‘‘yaṃ vedayati, taṃ sañjānātī’’ti etasmiṃ pade vuttanayena.

    ཏཾསབྷཱཝཏཱནིཝཏྟནཏྠནྟི ཨནཱསཝདྷམྨསབྷཱཝཏཱནིཝཏྟནཏྠཾ། ཨནཱསཝཱ ཁནྡྷེསྭེཝ ཝུཏྟཱཏི ཨཏྠོ སཱསཝཱནམྤི ཁནྡྷེསུ ཝུཏྟཏྟཱ། ནནུ ཙ ཨནཱསཝདྷམྨོ ཁནྡྷེསུ ཨཝུཏྟོཔི ཨཏྠཱིཏི? སཙྩཾ ཨཏྠི, ཁནྡྷཱདྷིཀཱརེ ཁནྡྷཔརིཡཱཔནྣཱ ཨེཝ ཨནཱསཝཱ གཡ྄ཧནྟཱིཏི ནཱཡཾ དོསོ།

    Taṃsabhāvatānivattanatthanti anāsavadhammasabhāvatānivattanatthaṃ. Anāsavā khandhesveva vuttāti attho sāsavānampi khandhesu vuttattā. Nanu ca anāsavadhammo khandhesu avuttopi atthīti? Saccaṃ atthi, khandhādhikāre khandhapariyāpannā eva anāsavā gayhantīti nāyaṃ doso.

    ཡཐཱ ཕསྶཱདཡོ ཝིསེསཏོ ཏདནུགུཎཝུཏྟིཏཱཡ སངྑཏཱབྷིསངྑརཎསབྷཱཝཱཏི སངྑཱརཀྑནྡྷེ སམཝརུདྡྷཱ, ན ཨེཝཾ ཝེདནཱསཉྙཱཝིཉྙཱཎཱནཱིཏི རཱུཔདྷམྨཱ ཝིཡ ཏཱནི ཝིསུཾ ཁནྡྷབྷཱཝེན ཝུཏྟཱནི། ཨེཏེན ཕསྶཱདཱིནཾ ཝིསུཾ ཁནྡྷསདྡཝཙནཱིཡཏཱབྷཱཝོ ཝུཏྟོཏི ཝེདིཏབྦོ། ཏེན ཝུཏྟཾ ‘‘ཕུསནཱདཡོ པནཱ’’ཏིཨཱདི། ཨིཏིཨཱདཱིནཉྩ སུཏྟཱནནྟི ཨེཏྠ ཨཱདི-སདྡེན ‘‘རཱུཔེ ཁོ, བྷིཀྑཝེ, སཏི རཱུཔཾ ཨུཔཱདཱཡ རཱུཔཾ ཨབྷིནིཝིསྶ ཨུཔྤཛྫནྟི སཾཡོཛནཱབྷིནིཝེསཝིནིབནྡྷཱ། ཝེདནཱཡ…པེ॰… སཉྙཱཡ… སངྑཱརེསུ… ཝིཉྙཱཎེ སཏི ཝིཉྙཱཎཾ ཨུཔཱདཱཡ ཝིཉྙཱཎཾ ཨབྷིནིཝིསྶ ཨུཔྤཛྫནྟི སཾཡོཛནཱབྷིནིཝེསཝིནིབནྡྷཱ’’ཏི (སཾ॰ ནི॰ ༣.༡༥༨), ཏཐཱ ‘‘ཨཧཾ རཱུཔཾ, མམ རཱུཔནྟི པརིཡུཊྛཊྛཱཡཱི ཧོཏཱི’’ཏི (སཾ॰ ནི॰ ༣.༡) ཙ ཨེཝམཱདཱིནཾ སུཏྟཔདཱནཾ སངྒཧོ དཊྛབྦོ། ཨེཏེནཱཏི ཨཏྟནཱ དསྶིཏསུཏྟེན། ཝཀྑམཱནསུཏྟཝསེན ཙཱཏི ‘‘རཱུཔེ ཁོ, བྷིཀྑཝེ, སཏཱི’’ཏིཨཱདིཀསྶ ཨཊྛཀཐཱཡཾ (ཝིབྷ॰ ཨཊྛ॰ ༢༦ པཀིཎྞཀཀཐཱ) ཝཀྑམཱནསྶ སུཏྟསྶ ཝསེན། ‘‘པརིཏྟཱརམྨཎཱདིཝསེན ན ཝཏྟབྦཱ’’ཏི ཨེཏེན ནཝཏྟབྦཱརམྨཎཱཔི དིཊྛི ཁནྡྷེ ཨེཝ ནིསྶཱཡ ཨུཔྤཛྫཏི, པགེཝ ཁནྡྷཱརམྨཎཱཏི དསྶེཏི།

    Yathā phassādayo visesato tadanuguṇavuttitāya saṅkhatābhisaṅkharaṇasabhāvāti saṅkhārakkhandhe samavaruddhā, na evaṃ vedanāsaññāviññāṇānīti rūpadhammā viya tāni visuṃ khandhabhāvena vuttāni. Etena phassādīnaṃ visuṃ khandhasaddavacanīyatābhāvo vuttoti veditabbo. Tena vuttaṃ ‘‘phusanādayo panā’’tiādi. Itiādīnañca suttānanti ettha ādi-saddena ‘‘rūpe kho, bhikkhave, sati rūpaṃ upādāya rūpaṃ abhinivissa uppajjanti saṃyojanābhinivesavinibandhā. Vedanāya…pe… saññāya… saṅkhāresu… viññāṇe sati viññāṇaṃ upādāya viññāṇaṃ abhinivissa uppajjanti saṃyojanābhinivesavinibandhā’’ti (saṃ. ni. 3.158), tathā ‘‘ahaṃ rūpaṃ, mama rūpanti pariyuṭṭhaṭṭhāyī hotī’’ti (saṃ. ni. 3.1) ca evamādīnaṃ suttapadānaṃ saṅgaho daṭṭhabbo. Etenāti attanā dassitasuttena. Vakkhamānasuttavasena cāti ‘‘rūpe kho, bhikkhave, satī’’tiādikassa aṭṭhakathāyaṃ (vibha. aṭṭha. 26 pakiṇṇakakathā) vakkhamānassa suttassa vasena. ‘‘Parittārammaṇādivasena na vattabbā’’ti etena navattabbārammaṇāpi diṭṭhi khandhe eva nissāya uppajjati, pageva khandhārammaṇāti dasseti.

    ཝེདནཱཀཱརཎཱཡཱཏི ཝེདནཱཡཱཏནཱཡ། ཚཱདཱཔནཏོཏི རོཙཱཔནཏོ། བཱཧུལླེནཱཏི བཧུལབྷཱཝེན། ཨུཔཱདཱནཀྑནྡྷཱ ཧི བཱཧུལླཔྤཝཏྟིཀཱ, ན ཨིཏརེ།

    Vedanākāraṇāyāti vedanāyātanāya. Chādāpanatoti rocāpanato. Bāhullenāti bahulabhāvena. Upādānakkhandhā hi bāhullappavattikā, na itare.

    པུཊཾ ཀཏྭཱཏི ཙ ཚཏྟསདིསཾ པུཊཾ བནྡྷཾ ཀཏྭཱ། ཝཏྠུམྷཱིཏི ཙཀྑཱདིཝཏྠུམྷི། ཝཊྚགཏཝེདནཾ སནྡྷཱཡ ཝུཏྟཾ། སཱ ཧི ཨིདྷ དཊྛབྦབྷཱཝེ ཋིཏཱ། ཨཱུནེཧཱིཏི ཝཏྠུནཱ, ཀིལེསེཧི ཙ ཨཱུནེཧི།

    Puṭaṃ katvāti ca chattasadisaṃ puṭaṃ bandhaṃ katvā. Vatthumhīti cakkhādivatthumhi. Vaṭṭagatavedanaṃ sandhāya vuttaṃ. Sā hi idha daṭṭhabbabhāve ṭhitā. Ūnehīti vatthunā, kilesehi ca ūnehi.

    མཱཡཱཡཱཏི ཨིནྡཛཱལཱདིམཱཡཱཡ པཡོགོ མཱཡཱཏི ཨདྷིཔྤཱཡེནཱཧ ‘‘མཱཡཱཡ དསྶིཏཾ རཱུཔཾ ‘མཱཡཱ’ཏི ཨཱཧཱ’’ཏི། ཝཏྠུབྷཱཝཱདིཏོཏི ཨཱདི-སདྡེན ཨཱརམྨཎསམྤཡུཏྟཱདིཀེ སངྒཎྷཱཏི། ཀཏྠཙཱིཏི རཱུཔཀྑནྡྷཱདིཀེ། ཀོཙི ཝིསེསོཏི ཨསུབྷཱདིཀོཝ།

    Māyāyāti indajālādimāyāya payogo māyāti adhippāyenāha ‘‘māyāya dassitaṃ rūpaṃ ‘māyā’ti āhā’’ti. Vatthubhāvāditoti ādi-saddena ārammaṇasampayuttādike saṅgaṇhāti. Katthacīti rūpakkhandhādike. Koci visesoti asubhādikova.

    ཏསྶཱཏི ཨཛ྄ཛྷཏྟིཀརཱུཔསྶ། ཡསྶ ཀཱམརཱགཔྤཧཱནམུཁེན སབྦརཱགཔྤཧཱནཾ སམྦྷཝཏི, ཏཾ སནྡྷཱཡཱཧ ‘‘ཀཱམརཱགམུཁེན ཝཱ སབྦལོབྷཔྤཧཱནཾ ཝདཏཱི’’ཏི། ཡོཛེཏབྦནྟི ཝེདནཱཡ ཚནྡརཱགཾ པཛཧནྟོ ཏསྶཱ སམུདཡབྷཱུཏེ ཕསྶེཔི ཚནྡརཱགཾ པཛཧཏཱིཏི ཡོཛེཏབྦནྟི། པརིཉྙཏྟཡསྶ ཡོཛནཱ པཱཀཊཱ ཨེཝ།

    Tassāti ajjhattikarūpassa. Yassa kāmarāgappahānamukhena sabbarāgappahānaṃ sambhavati, taṃ sandhāyāha ‘‘kāmarāgamukhena vā sabbalobhappahānaṃ vadatī’’ti. Yojetabbanti vedanāya chandarāgaṃ pajahanto tassā samudayabhūte phassepi chandarāgaṃ pajahatīti yojetabbanti. Pariññattayassa yojanā pākaṭā eva.

    ཏཏོཏི དུཀྑུཔྤཱདནསུཁཝིནཱསནཱནཾ ཨདསྶནཏོ། བྷིནྡཏཱིཏི ཝིནཱསེཏི། ཏནྟི མནོསཉྩེཏནཱཧཱརཾ ཉཱཏཏཱིརཎཔརིཉྙཱཧི པརིགྒཎྷཱཏི ཏཱིརེཏི།

    Tatoti dukkhuppādanasukhavināsanānaṃ adassanato. Bhindatīti vināseti. Tanti manosañcetanāhāraṃ ñātatīraṇapariññāhi pariggaṇhāti tīreti.

    ཏཾ པཛཧནྟོཏི ཨཝིཛྫཾ པཛཧནྟོ། པརཱམཊྛནྟི པརཱམཱསསངྑཱཏཱཡ དིཊྛིཡཱ ནིཙྩཱདིཝསེན གཧིཏཾ། ཝིཉྙཱཎཾ ནིཙྩཏོ པསྶནྟོ དིཊྛུཔཱདཱནཾ ཨུཔཱདིཡཏཱིཏི ཨཡམཏྠོ ‘‘ཏདེཝིདཾ ཝིཉྙཱཎཾ སནྡྷཱཝཏི སཾསརཏི, ཨནཉྙ’’ནྟིཨཱདིསུཏྟཔདེཧི (མ॰ ནི॰ ༡.༣༩༦) དཱིཔེཏབྦོ།

    Taṃ pajahantoti avijjaṃ pajahanto. Parāmaṭṭhanti parāmāsasaṅkhātāya diṭṭhiyā niccādivasena gahitaṃ. Viññāṇaṃ niccato passanto diṭṭhupādānaṃ upādiyatīti ayamattho ‘‘tadevidaṃ viññāṇaṃ sandhāvati saṃsarati, anañña’’ntiādisuttapadehi (ma. ni. 1.396) dīpetabbo.

    ཀམཱདིཝིནིཙྪཡཀཐཱཝཎྞནཱ ནིཊྛིཏཱ།

    Kamādivinicchayakathāvaṇṇanā niṭṭhitā.

    སུཏྟནྟབྷཱཛནཱིཡཝཎྞནཱ ནིཊྛིཏཱ།

    Suttantabhājanīyavaṇṇanā niṭṭhitā.

    ༢. ཨབྷིདྷམྨབྷཱཛནཱིཡཝཎྞནཱ

    2. Abhidhammabhājanīyavaṇṇanā

    ༣༤. ཏཾ ཝཏྭཱཏི ཏཾ བྷཱུམིཝསེན ཛཱནིཏབྦཏཾ ‘‘སབྦཱཔི ཙཏུབྷཱུམིཀཝེདནཱ’’ཏིཨཱདིནཱ ཝཏྭཱ། སམྤཡུཏྟཏོ དསྶིཏཏཱདཱིཏི ཨེཏྠ ཨཱདི-སདྡེན ཧེཏུཛཱཏིབྷཱུམིཨིནྡྲིཡཝཏྠུསམྥསྶཛབྷེདཏོ དསྶིཏཏཾ ཨནཝསེསཏོ སངྒཎྷཱཏི།

    34. Taṃvatvāti taṃ bhūmivasena jānitabbataṃ ‘‘sabbāpi catubhūmikavedanā’’tiādinā vatvā. Sampayuttato dassitatādīti ettha ādi-saddena hetujātibhūmiindriyavatthusamphassajabhedato dassitataṃ anavasesato saṅgaṇhāti.

    ཡདིཔི ཏཾ-སདྡོ པུབྦེ ཝུཏྟསྶ སཱམཉྙཏོ པཊིནིདྡེསོ, ཏཐཱཔི ཨནནྟརམེཝ པཙྩཱམསིཏུཾ ཡུཏྟོ ཨིཏརཏྠ ཨསམྦྷཝཏོཏི ཨཱཧ ‘‘ཨཊྛ…པེ॰… ཡོཛནཱ’’ཏི། ‘‘ཨཊྛཝིདྷཏྟཱབྷཱཝཏོ’’ཏི ཨིམིནཱ ཏཾ ཨསམྦྷཝཾ དསྶེཏི།

    Yadipi taṃ-saddo pubbe vuttassa sāmaññato paṭiniddeso, tathāpi anantarameva paccāmasituṃ yutto itarattha asambhavatoti āha ‘‘aṭṭha…pe… yojanā’’ti. ‘‘Aṭṭhavidhattābhāvato’’ti iminā taṃ asambhavaṃ dasseti.

    པཱུརཎཏྠམེཝ ཝུཏྟོ, ཨཔུབྦཏཱབྷཱཝཏོཏི ཨཏྠོ།

    Pūraṇatthameva vutto, apubbatābhāvatoti attho.

    གཧཎཝཌྜྷནཝསེནཱཏི གཧཎསྶ ཝཌྜྷནཝསེན། གཧཎནྟི ཙེཏྠ ཀཐནཾ དཊྛབྦཾ, ཏསྶ ཝཌྜྷནཾ ཏསྨིཾ ཏསྨིཾ ཋཱནེ ཨཝུཏྟསྶ ཀཐནཾ། ཏེནཱཧ ‘‘པུབྦེ གཧིཏཏོ ཨཉྙསྶ གཧཎཾ ཝཌྜྷན’’ནྟི, ཏཏོ ཨེཝ ཙ ‘‘པུརིམགཧིཏེ ཨཉྙུཔཙཡཝསེནཱ’’ཏི ཝུཏྟཾ། ‘‘ཝཌྜྷནསདྡོ ཚེདནཏྠོ’’ཏི ཨིདཾ ཡཐཱ ཨསིཝཱ ‘‘སིཝཱ’’ཏི, དིཊྛཉྩ ‘‘ཨདིཊྛ’’ནྟི ཝུཙྩཏི, ཨེཝཾ དཊྛབྦཾ། ནཡནཱིཧརཎནྟི ནཱིཡཏཱིཏི ནཡོ, དེསནཱ, ཏསྶ ནཱིཧརཎཾ པཝཏྟནཾ། ཝཌྜྷནཀནཡོཏི ཡཐཱཝུཏྟཝཌྜྷནཀཝསེན པཝཏྟོ དེསནཱནཡོ། ཨཉྙེ བྷེདཱཏི ཨེཀཝིདྷཙཏུབྦིདྷཱདཡོ བྷེདཱ། ཡདི ཨཝིསིཊྛཱ, ཀསྨཱ ཝུཏྟཱཏི ཨཱཧ ‘‘ཏཐཱཔཱི’’ཏིཨཱདི། ཏཏྠ པཉྙཱཔྤབྷེདཛནནཏྠནྟི དྷམྨཝིསཡཱཡ པབྷེདགཏཱཡ པཉྙཱཡ ཝིནེཡྻཱནཾ ནིབྦཏྟནཏྠཾ, ཝིཛྫཱཊྛཱནཱདིཝསེན ཝིནེཡྻཱནཾ དྷམྨཔཊིསམྦྷིདཱཡ ཨུཔྤཱདནཏྠནྟི ཨཏྠོ། ཨབྷིཉྙེཡྻདྷམྨཝིབྷཱགཏཱཡ སམྨསནཝཱརསྶ ཝིསཡབྷཱཝཏོ ཝུཏྟཾ ‘‘ཨེཀེཀསྶ ཝཱརསྶ གཧིཏསྶ ནིཡྻཱནམུཁབྷཱཝཏོ’’ཏི། ཨིཏརེཔི བྷེདཱ ཝུཏྟཱཏི དུཝིདྷཏིཝིདྷབྷེདཱནཾ ཡཾ ནཱནཏྟཾ, ཏསྶ ཝསེན ཨིཏརེ བྷེདཱ ཨནཱནཏྟཱཔི ཡཐཱཝུཏྟཀཱརཎཏོ ཝུཏྟཱ། ‘‘ན ཀེཝལ’’ནྟིཨཱདིནཱ བྷེདཱནཾ ཨཉྙམཉྙཔེཀྑཏཾ དསྶེཏྭཱ ‘‘ཏསྨཱ’’ཏིཨཱདིནཱ ཏེསཾ ཝིསིཊྛཏཾ དསྶེཏི།

    Gahaṇavaḍḍhanavasenāti gahaṇassa vaḍḍhanavasena. Gahaṇanti cettha kathanaṃ daṭṭhabbaṃ, tassa vaḍḍhanaṃ tasmiṃ tasmiṃ ṭhāne avuttassa kathanaṃ. Tenāha ‘‘pubbe gahitato aññassa gahaṇaṃ vaḍḍhana’’nti, tato eva ca ‘‘purimagahite aññupacayavasenā’’ti vuttaṃ. ‘‘Vaḍḍhanasaddo chedanattho’’ti idaṃ yathā asivā ‘‘sivā’’ti, diṭṭhañca ‘‘adiṭṭha’’nti vuccati, evaṃ daṭṭhabbaṃ. Nayanīharaṇanti nīyatīti nayo, desanā, tassa nīharaṇaṃ pavattanaṃ. Vaḍḍhanakanayoti yathāvuttavaḍḍhanakavasena pavatto desanānayo. Aññe bhedāti ekavidhacatubbidhādayo bhedā. Yadi avisiṭṭhā, kasmā vuttāti āha ‘‘tathāpī’’tiādi. Tattha paññāppabhedajananatthanti dhammavisayāya pabhedagatāya paññāya vineyyānaṃ nibbattanatthaṃ, vijjāṭṭhānādivasena vineyyānaṃ dhammapaṭisambhidāya uppādanatthanti attho. Abhiññeyyadhammavibhāgatāya sammasanavārassa visayabhāvato vuttaṃ ‘‘ekekassa vārassa gahitassa niyyānamukhabhāvato’’ti. Itarepi bhedā vuttāti duvidhatividhabhedānaṃ yaṃ nānattaṃ, tassa vasena itare bhedā anānattāpi yathāvuttakāraṇato vuttā. ‘‘Na kevala’’ntiādinā bhedānaṃ aññamaññapekkhataṃ dassetvā ‘‘tasmā’’tiādinā tesaṃ visiṭṭhataṃ dasseti.

    ཡཐཱ དུཀམཱུལཀཱདཱིསུ བྷེདཱ གཎནཱནུཔུབྦིཡཱ པཝཏྟཱ པབྷེདནྟརཱཔེཀྑཱ, ན ཨེཝམེཏེ། ཨེཏེ པན སཏྟཝིདྷཱདིབྷེདཱ པབྷེདནྟརནིརཔེཀྑཱ ཀེཝལཾ བཧུཝིདྷབྷཱཝསཱམཉྙེནེཝ ཝུཏྟཱཏི དསྶེཏི ‘‘ཨཉྙཔྤབྷེདནིརཔེཀྑཱ’’ཏིཨཱདིནཱ། དུཀཏིཀཔདཏྠཱནཾ ཡཐཱརཧཾ ཨཔེཀྑིཏབྦཱཔེཀྑཀབྷཱཝེན ཝུཏྟཏྟཱ ཡཐཱ དུཀེ ཋཔེཏྭཱ ཝུཏྟཱ ཏིཀཱ ཏཏྠ པཀྑིཏྟཱ ནཱམ ཛཱཏཱ, ཨེཝཾ ཏིཀདུཀཔདཏྠཱནཾ ཨཔེཀྑིཏབྦཱཔེཀྑཀབྷཱཝེན ཝུཏྟཏྟཱ དུཀེ ཝཏྭཱ ཝུཏྟེསུཔི ཏིཀེསུ ཏེ པཀྑིཏྟཱ ནཱམ ཧོནྟཱིཏི ཨཱཧ ‘‘པརཏོ…པེ॰… ཡོཛིཏཏྟཱ’’ཏི།

    Yathā dukamūlakādīsu bhedā gaṇanānupubbiyā pavattā pabhedantarāpekkhā, na evamete. Ete pana sattavidhādibhedā pabhedantaranirapekkhā kevalaṃ bahuvidhabhāvasāmaññeneva vuttāti dasseti ‘‘aññappabhedanirapekkhā’’tiādinā. Dukatikapadatthānaṃ yathārahaṃ apekkhitabbāpekkhakabhāvena vuttattā yathā duke ṭhapetvā vuttā tikā tattha pakkhittā nāma jātā, evaṃ tikadukapadatthānaṃ apekkhitabbāpekkhakabhāvena vuttattā duke vatvā vuttesupi tikesu te pakkhittā nāma hontīti āha ‘‘parato…pe… yojitattā’’ti.

    སམཱནཝཱིཐིཡནྟི ཨེཀཝཱིཐིཡཾ། ཙཀྑུསངྒྷཊྚནཱཡཱཏི ཙཀྑུརཱུཔཔཊིགྷཱཏེན། སོཏི ཙཀྑུརཱུཔཔཊིགྷཱཏོ། ཏདུཔྤཱདིཀཱཏི ཏསྶ ཙཀྑུསམྥསྶསྶ ཨུཔྤཱདིཀཱ། སཱཏི ཨཱཝཛྫནཝེདནཱ། ནནུ ཙ ཝེདནཱཔཙྩཡོ ཕསྶོ ཝུཏྟོ, ན ཕསྶཔཙྩཡཱ ཝེདནཱཏི? ན, ཝེདནཱསཱིསེན ཙིཏྟུཔྤཱདསྶ གཧིཏཏྟཱཏི། ཏཔྤཡོཛནཏྟཱཏི ཙཀྑུསམྥསྶཔཡོཛནཏྟཱ། པཡོཛཡཏཱིཏི པཡོཛནཾ, ཕལཾ།

    Samānavīthiyanti ekavīthiyaṃ. Cakkhusaṅghaṭṭanāyāti cakkhurūpapaṭighātena. Soti cakkhurūpapaṭighāto. Taduppādikāti tassa cakkhusamphassassa uppādikā. Sāti āvajjanavedanā. Nanu ca vedanāpaccayo phasso vutto, na phassapaccayā vedanāti? Na, vedanāsīsena cittuppādassa gahitattāti. Tappayojanattāti cakkhusamphassapayojanattā. Payojayatīti payojanaṃ, phalaṃ.

    རཱུཔཱཝཙརཱརཱུཔཱཝཙརཱནཾ ཝིཔཱཀཱནནྟི ཨདྷིཔྤཱཡོ། ཏེ ཧི ཨིདྷ ཨགྒཧིཏཱ། ཏེནེཝཱཧ ‘‘ཏེསཾ སཡམེཝ མནོདྭཱརབྷཱུཏཏྟཱ’’ཏིཨཱདི། ཏཏོཏི བྷཝངྒཏོ། ཙཀྑུསམྥསྶཔཙྩཡཱདིཀུསལཱདཱིནནྟི ཨེཏྠ པུརིམེན ཨཱདི-སདྡེན ‘‘སོཏསམྥསྶཔཙྩཡཱ’’ཏི ཨེཝམཱདཡོ སངྒཧིཏཱ, དུཏིཡེན ཨཀུསལཱདཡོ། ‘‘ཀཱམཱཝཙརཨཊྛཀུསལཙིཏྟཝསེནཱ’’ཏིཨཱདིནཱ ཀུསལཱབྱཱཀཏཱནམྤི ཀཱམཱཝཙརཱནཾཡེཝ ཡོཛིཏཏྟཱ ཝུཏྟཾ ‘‘སམཱནཝཱིཐིཡཾ ལབྦྷམཱནཏཱ ཨཊྛཀཐཱཡཾ ཝུཏྟཱ’’ཏི། ཝེདནཱཔཱིཏིསནིདསྶནཏྟིཀཝཛྫཱནཾ ཨེཀཱུནཝཱིསཏིཡཱ ཏིཀཱནཾ ཝསེན ཨེཀཱུནཝཱིསཏིཙཏུཝཱིསཏིཀཱ། ཡདི ཨསམཱནཝཱིཐིཡམྤི ཀུསལཱདཱིནཾ ལབྦྷམཱནཏཱ ཡོཛེཏབྦཱ, ཨཐ ཀསྨཱ སམཱནཝཱིཐིཡཾཡེཝ ཡོཛིཏཱཏི ཨཱཧ ‘‘ཨཊྛཀཐཱཡཾ པནཱ’’ཏིཨཱདི། ཏེནེཝཱཏི ཨསམཱནཝཱིཐིཡཾ ཨཔྤཊིཀྑིཏྟཏྟཱཡེཝ།

    Rūpāvacarārūpāvacarānaṃ vipākānanti adhippāyo. Te hi idha aggahitā. Tenevāha ‘‘tesaṃ sayameva manodvārabhūtattā’’tiādi. Tatoti bhavaṅgato. Cakkhusamphassapaccayādikusalādīnanti ettha purimena ādi-saddena ‘‘sotasamphassapaccayā’’ti evamādayo saṅgahitā, dutiyena akusalādayo. ‘‘Kāmāvacaraaṭṭhakusalacittavasenā’’tiādinā kusalābyākatānampi kāmāvacarānaṃyeva yojitattā vuttaṃ ‘‘samānavīthiyaṃ labbhamānatāaṭṭhakathāyaṃ vuttā’’ti. Vedanāpītisanidassanattikavajjānaṃ ekūnavīsatiyā tikānaṃ vasena ekūnavīsaticatuvīsatikā. Yadi asamānavīthiyampi kusalādīnaṃ labbhamānatā yojetabbā, atha kasmā samānavīthiyaṃyeva yojitāti āha ‘‘aṭṭhakathāyaṃ panā’’tiādi. Tenevāti asamānavīthiyaṃ appaṭikkhittattāyeva.

    ཙིཏྟསམྦནྡྷོཏི ཙིཏྟེན སམྦནྡྷོ ཙིཏྟསམྦནྡྷཾ ཀཏྭཱ ཙིཏྟསཱིསེན ཝེདནཱཡ ཀཐནཾ། ཏིཀབྷཱུམིཝསེནཱཏི ཀུསལཏྟིཀཱདིཏིཀཝསེན, ཀཱམཱཝཙརཱདིབྷཱུམིཝསེན ཙ། དྭཱརཏིཀཝསེནཱཏི ཙཀྑཱདིཨུཔྤཏྟིདྭཱརཝསེན, ཀུསལཏྟིཀཱདིཏིཀཝསེན ཙ། ཡཏྠ ཀཏྠཙཱིཏི དཱིཔེཏབྦསྶ ཨཏྠསྶ ཝིསེསཱབྷཱཝཏོ སཏྟཝིདྷབྷེདཱདཱིསུ ཡཏྠ ཀཏྠཙི། ན ཙ དྭཱརཾ ཨནཱམཊྛནྟི ཡོཛནཱ། ཏེན སཏྟཝིདྷབྷེདཏོ ཏིཾསཝིདྷབྷེདེ ཝིསེསཾ དསྶེཏི། ཡདིཔི ཨུབྷཡཏྠ བྷཱུམིཡོ ཨཱགཏཱ, རཱུཔཱཝཙརཱདིབྷཱུམིཨཱམསནེན པན ཨསམཱནཝཱིཐིཡཾ ལབྦྷམཱནཏཱ དསྶིཏཱཏི ཨཱཧ ‘‘ཨཏིབྱཏྟཱ ཙ ཨེཏྠ སམཱནཱསམཱནཝཱིཐཱིསུ ལབྦྷམཱནཏཱ’’ཏི། སུཁདཱིཔནཱནི ཧོནྟི དྭཱརབྷཱུམིཨཱམསནམུཁེན ཝེདནཱཀྑནྡྷསྶ ཝིབྷཏྟཏྟཱ། ན བྷཱུམིཡོ ཨཔེཀྑིཏྭཱ ཋཔིཏཱཏི ཀཐེཏབྦབྷཱཝེན བྷཱུམིཡོ ཨཔེཀྑིཏྭཱ ན ཋཔིཏཱ, བྷཱུམིཝིབྷཱགེན ན ཀཐིཏཱཏི ཨཏྠོ། ཨཔེཀྑིཏབྦརཧིཏཱཏི དྭཱརབྷཱུམཱིནཾ ཨགྒཧིཏཏྟཱ ཨཱཀངྑིཏབྦདྭཱརཱདིཝིསེསརཧིཏཱ།

    Cittasambandhoti cittena sambandho cittasambandhaṃ katvā cittasīsena vedanāya kathanaṃ. Tikabhūmivasenāti kusalattikāditikavasena, kāmāvacarādibhūmivasena ca. Dvāratikavasenāti cakkhādiuppattidvāravasena, kusalattikāditikavasena ca. Yattha katthacīti dīpetabbassa atthassa visesābhāvato sattavidhabhedādīsu yattha katthaci. Na ca dvāraṃ anāmaṭṭhanti yojanā. Tena sattavidhabhedato tiṃsavidhabhede visesaṃ dasseti. Yadipi ubhayattha bhūmiyo āgatā, rūpāvacarādibhūmiāmasanena pana asamānavīthiyaṃ labbhamānatā dassitāti āha ‘‘atibyattā ca ettha samānāsamānavīthīsu labbhamānatā’’ti. Sukhadīpanāni honti dvārabhūmiāmasanamukhena vedanākkhandhassa vibhattattā. Na bhūmiyo apekkhitvā ṭhapitāti kathetabbabhāvena bhūmiyo apekkhitvā na ṭhapitā, bhūmivibhāgena na kathitāti attho. Apekkhitabbarahitāti dvārabhūmīnaṃ aggahitattā ākaṅkhitabbadvārādivisesarahitā.

    ‘‘ཨུཔནིསྶཡཀོཊིཡཱ’’ཏི ཨེཏྠ ནིཔྤརིཡཱཡཏོ པརིཡཱཡཏོ ཙ ཨུཔནིསྶཡཀོཊིདསྶནམུཁེན ཨིདྷཱདྷིཔྤེཏཨུཔནིསྶཡཀོཊིཾ དསྶེཏུཾ ‘‘སདྡྷཾ ཨུཔནིསྶཱཡཱ’’ཏིཨཱདི ཝུཏྟཾ། ཏཏྠ ཨུཔནིསྶཡཱནནྟི ཝེདནཱཡ ཨུཔནིསྶཡབྷཱུཏཱནཾ། དསྶནནྟི ཙཀྑུཝིཉྙཱཎཾ, དིསྭཱ ཝཱ གཧཎཾ། ཨུཔནིསྶཡནྟབྷཱཝེནཱཏི ལཱམཀཱུཔནིསྶཡབྷཱཝེན། ཡདི གྷཱཡནཱདཱིནི ཨུཔནིསྶཡོ བྷཝེཡྻུཾ, པཀཏཱུཔནིསྶཡཱནེཝ སིཡུཾ། པཀཏཱུཔནིསྶཡོ ཙ ནཱནཱཝཱིཐིཡཾཡེཝཱཏི ཏདལཱབྷཝཙནཾ ཨིདྷ ནཱནཱཝཱིཐིཛོཏཀནྟི དསྶེཏི ‘‘གྷཱནཱདིདྭཱརེསཱུ’’ཏིཨཱདིནཱ། ཀསིཎཔརིཀམྨཱདཱིནནྟི ཀསིཎཔརིཀམྨསམཱཔཏྟིནིབྦཏྟནཝིཔསྶནཱཝཌྜྷནཱདཱིནཾ། ཏདལཱབྷོཏི ཨུཔནིསྶཡཱལཱབྷོ, སོ ཙ གྷཱཡནཱདཱིཧི པརེསཾ པཊིཔཏྟིཡཱ ཛཱནིཏུཾ ཨསཀྐུཎེཡྻཏྟཱ། ཨནྟིམབྷཝིཀབོདྷིསཏྟཱདཱིནཾ སཝནེན ཝིནཱ ཏཾཕུསནཾ སིཡཱ མཱུལཱུཔནིསྶཡོཏི ‘‘ཡེབྷུཡྻེནཱ’’ཏི ཝུཏྟཾ།

    ‘‘Upanissayakoṭiyā’’ti ettha nippariyāyato pariyāyato ca upanissayakoṭidassanamukhena idhādhippetaupanissayakoṭiṃ dassetuṃ ‘‘saddhaṃ upanissāyā’’tiādi vuttaṃ. Tattha upanissayānanti vedanāya upanissayabhūtānaṃ. Dassananti cakkhuviññāṇaṃ, disvā vā gahaṇaṃ. Upanissayantabhāvenāti lāmakūpanissayabhāvena. Yadi ghāyanādīni upanissayo bhaveyyuṃ, pakatūpanissayāneva siyuṃ. Pakatūpanissayo ca nānāvīthiyaṃyevāti tadalābhavacanaṃ idha nānāvīthijotakanti dasseti ‘‘ghānādidvāresū’’tiādinā. Kasiṇaparikammādīnanti kasiṇaparikammasamāpattinibbattanavipassanāvaḍḍhanādīnaṃ. Tadalābhoti upanissayālābho, so ca ghāyanādīhi paresaṃ paṭipattiyā jānituṃ asakkuṇeyyattā. Antimabhavikabodhisattādīnaṃ savanena vinā taṃphusanaṃ siyā mūlūpanissayoti ‘‘yebhuyyenā’’ti vuttaṃ.

    སམྤནྣཛ྄ཛྷཱསཡོཏི ཝིཝཊྚཱུཔནིསྶཡསམྤཏྟིཡཱ སམྤནྣཛ྄ཛྷཱསཡོ། ཏེནཱཏི ‘‘ཨེཝཾ ཙཀྑུཝིཉྙཱཎ’’ནྟི ཝཙནེན། ཏདུཔནིསྶཡནྟི ཏཏོ པརཾ ཨུཔྤནྣཀསིཎརཱུཔདསྶནཱདཱིནཾ ཨུཔནིསྶཡབྷཱུཏཾ།

    Sampannajjhāsayoti vivaṭṭūpanissayasampattiyā sampannajjhāsayo. Tenāti ‘‘evaṃ cakkhuviññāṇa’’nti vacanena. Tadupanissayanti tato paraṃ uppannakasiṇarūpadassanādīnaṃ upanissayabhūtaṃ.

    ཐཱམགམནཾ ནཱམ ཀཱམརཱགཱདཱིནཾཡེཝ ཨཱཝེཎིཀོ སབྷཱཝོཏི ཨཱཧ ‘‘ཨཔྤཧཱིནཀཱམརཱགཱདིཀསྶ ཝཱ’’ཏི། ‘‘རཱགོ ཨུཔྤནྣོ’’ཏིཨཱདིནཱ ཨིཊྛཱནིཊྛཱརམྨཎེ རཱགཔཊིགྷཱནཾ ཨུཔྤཏྟིཝིཙཱརཎཱཝ ཝུཏྟཱ, ན ནེསཾ ཀིཙྩཝིསེསོཏི ཀིཙྩཝིསེསེན ཝུཏྟེ དསྶེནྟོ ‘‘ཨསམཔེཀྑནཱཡཱ’’ཏིཨཱདིམཱཧ། པཝཏྟཱ ཝེདནཱཏི ཨཏྠོ། པཀཱརནྟརེནཱཏི ཙཀྑུསམྥསྶཔཙྩཡཱ ཨུཔྤནྣཀིལེསཱནཾ སམཏིཀྐམནསངྑཱཏེན པཀཱརནྟརེན། ཏཐཱ བྷཱཝནཱཝསེནཱཏི ཨེཏྠ ཏཐཱ-སདྡེན ཙཀྑུསམྥསྶསྶ ཙཏུབྷཱུམིཀཝེདནཱཡ ཨུཔནིསྶཡབྷཱཝོ ཨེཝ པཀཱརནྟརེན ཀཐིཏོཏི ཨིམམེཝཏྠཾ ཨཱཀཌྜྷཏི། བྷཱཝནཱཡེཝེཏྠ པཀཱརནྟརཾ།

    Thāmagamanaṃ nāma kāmarāgādīnaṃyeva āveṇiko sabhāvoti āha ‘‘appahīnakāmarāgādikassa vā’’ti. ‘‘Rāgo uppanno’’tiādinā iṭṭhāniṭṭhārammaṇe rāgapaṭighānaṃ uppattivicāraṇāva vuttā, na nesaṃ kiccavisesoti kiccavisesena vutte dassento ‘‘asamapekkhanāyā’’tiādimāha. Pavattā vedanāti attho. Pakārantarenāti cakkhusamphassapaccayā uppannakilesānaṃ samatikkamanasaṅkhātena pakārantarena. Tathā bhāvanāvasenāti ettha tathā-saddena cakkhusamphassassa catubhūmikavedanāya upanissayabhāvo eva pakārantarena kathitoti imamevatthaṃ ākaḍḍhati. Bhāvanāyevettha pakārantaraṃ.

    སབྦཾ སམྨསནཾ བྷཱཝནཱཏི ཝེདིཏབྦཱ, ན ནཱིཝརཎཔྤཧཱནཔརིཉྙཱཝ།

    Sabbaṃ sammasanaṃ bhāvanāti veditabbā, na nīvaraṇappahānapariññāva.

    ཨཉྙམཉྙསྶ ཙཱཏི ཕོཊྛབྦམཧཱབྷཱུཏེསུ ཨིཏརཱིཏརསྶ, ཨཱཔོདྷཱཏུཡཱ ཙ ཝསེན།

    Aññamaññassa cāti phoṭṭhabbamahābhūtesu itarītarassa, āpodhātuyā ca vasena.

    ཏེསནྟི ཛཱཏིཨཱདཱིནཾ, ཀམྨཏྠེ ཙེཏཾ སཱམིཝཙནཾ། སཧཛཱཏསྶ མནོསམྥསྶསྶ བལཝཔཙྩཡབྷཱཝཾ དསྶེཏཱིཏི སམྦནྡྷོ། ཏསྶ ཝཱ དསྶནསྶཱཏི ཏསྶ ཝཱ ཛཱཏིཨཱདིཀེ བྷཡཏོ དསྶནཝསེན པཝཏྟསྶ ཀཱམཱཝཙརཉཱཎསྶ།

    Tesanti jātiādīnaṃ, kammatthe cetaṃ sāmivacanaṃ. Sahajātassa manosamphassassa balavapaccayabhāvaṃ dassetīti sambandho. Tassa vā dassanassāti tassa vā jātiādike bhayato dassanavasena pavattassa kāmāvacarañāṇassa.

    ཏདེཝ ཨཏྟནོ ཕལསྶེཝ ཕལབྷཱཝེནཱཏི ‘‘མནོསམྥསྶོ’’ཏི ཕསྶསྶ ཀཱརཎབྷཱཝེན ཡཾ ཝུཏྟཾ, ཏདེཝ ཝིཉྙཱཎཾ ཨཏྟནོ ཕལསྶ ཕལབྷཱཝེན ཝུཏྟསྶ ཕསྶསྶ ‘‘ཙཀྑུསམྥསྶཛ’’ནྟིཨཱདིནཱ ཕལབྷཱཝེན ཝཏྟུཾ ན ཡུཏྟཾ། ‘‘མནོསམྥསྶོ’’ཏིཨཱདིནཱ ལབྦྷམཱནོཔི ཝིཉྙཱཎཾ པཊིཙྩ ཕསྶསྶ པཙྩཡབྷཱཝོ ཧེཏུཕལསངྐརཔརིཧརཎཏྠཾ ན ཝུཏྟོཏི ཝཏྭཱ ཡདིཔི ཕསྶོ ཝིཉྙཱཎསྶ པཙྩཡོ ཧོཏི, ན པན ཕསྶསྶ ཝིཡ ཝིཉྙཱཎཾ སོ ཏསྶ ཝིསེསཔཙྩཡོ ཧོཏཱིཏི ཝིཉྙཱཎསྶ ཙཀྑུསམྥསྶཛཱདིཏཱ ན ཝུཏྟཱཏི དསྶེཏུཾ ‘‘ཡསྨཱ ཝཱ’’ཏིཨཱདི ཝུཏྟཾ།

    Tadeva attano phalasseva phalabhāvenāti ‘‘manosamphasso’’ti phassassa kāraṇabhāvena yaṃ vuttaṃ, tadeva viññāṇaṃ attano phalassa phalabhāvena vuttassa phassassa ‘‘cakkhusamphassaja’’ntiādinā phalabhāvena vattuṃ na yuttaṃ. ‘‘Manosamphasso’’tiādinā labbhamānopi viññāṇaṃ paṭicca phassassa paccayabhāvo hetuphalasaṅkarapariharaṇatthaṃ na vuttoti vatvā yadipi phasso viññāṇassa paccayo hoti, na pana phassassa viya viññāṇaṃ so tassa visesapaccayo hotīti viññāṇassa cakkhusamphassajāditā na vuttāti dassetuṃ ‘‘yasmā vā’’tiādi vuttaṃ.

    ཨབྷིདྷམྨབྷཱཛནཱིཡཝཎྞནཱ ནིཊྛིཏཱ།

    Abhidhammabhājanīyavaṇṇanā niṭṭhitā.

    ༣. པཉྷཔུཙྪཀཝཎྞནཱ

    3. Pañhapucchakavaṇṇanā

    ༡༥༠. ཏཾ ཏཾ སམུདཱཡནྟི ཏཾ ཏཾ ཙིཏྟུཔྤཱདསངྑཱཏདྷམྨསམུདཱཡཾ, ཨནཝསེསརཱུཔདྷམྨསམུདཱཡཉྩ། ཡཐཱསམྦྷཝནྟི ཙོཔནཾ པཏྟོ སཾཝརོ ཚཊྛདྭཱརེ, ཨིཏརོ ཚསུཔཱིཏི ཨེཝཾ ཡཐཱསམྦྷཝཾ། ཏཏོཏི ཨབྷིཛ྄ཛྷཱདོམནསྶཱདིཏོ། ཡཐཱཡོགནྟི ཡོ སཾཝརིཏབྦོ, ཏདནུརཱུཔཾ།

    150. Taṃtaṃ samudāyanti taṃ taṃ cittuppādasaṅkhātadhammasamudāyaṃ, anavasesarūpadhammasamudāyañca. Yathāsambhavanti copanaṃ patto saṃvaro chaṭṭhadvāre, itaro chasupīti evaṃ yathāsambhavaṃ. Tatoti abhijjhādomanassādito. Yathāyoganti yo saṃvaritabbo, tadanurūpaṃ.

    ཀཏྠཙཱིཏི ཏེ ཨེཝ པརིཝཊྚེ སཱམཉྙེན ཝདཏི། ཀཏྠཙཱིཏི ཝཱ ཏེསུ པརིཝཊྚེསུ ཀིསྨིཉྩིཔི པདེསེ། ཀིཉྩིཔི ཨཔྤཀམྤི། ཨེཀོཝ པརིཙྪེདོ, ན ཨཱཡཏནཝིབྷངྒཱདཱིསུ ཝིཡ ནཱནཱཏི ཨདྷིཔྤཱཡོ།

    Katthacīti te eva parivaṭṭe sāmaññena vadati. Katthacīti vā tesu parivaṭṭesu kismiñcipi padese. Kiñcipi appakampi. Ekova paricchedo, na āyatanavibhaṅgādīsu viya nānāti adhippāyo.

    པཉྷཔུཙྪཀཝཎྞནཱ ནིཊྛིཏཱ།

    Pañhapucchakavaṇṇanā niṭṭhitā.

    ཁནྡྷཝིབྷངྒཝཎྞནཱ ནིཊྛིཏཱ།

    Khandhavibhaṅgavaṇṇanā niṭṭhitā.




    Next: ༢. ཨཱཡཏནཝིབྷངྒོ • 2. Āyatanavibhaṅgo




    Related texts:



    ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / ཝིབྷངྒཔཱལི༹ • Vibhaṅgapāḷi / ༡. ཁནྡྷཝིབྷངྒོ • 1. Khandhavibhaṅgo

    ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / སམྨོཧཝིནོདནཱི-ཨཊྛཀཐཱ • Sammohavinodanī-aṭṭhakathā
    ༡. སུཏྟནྟབྷཱཛནཱིཡཝཎྞནཱ • 1. Suttantabhājanīyavaṇṇanā
    ༢. ཨབྷིདྷམྨབྷཱཛནཱིཡཝཎྞནཱ • 2. Abhidhammabhājanīyavaṇṇanā
    ༣. པཉྷཱཔུཙྪཀཝཎྞནཱ • 3. Pañhāpucchakavaṇṇanā

    ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / ཝིབྷངྒ-མཱུལཊཱིཀཱ • Vibhaṅga-mūlaṭīkā / ༡. ཁནྡྷཝིབྷངྒོ • 1. Khandhavibhaṅgo


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact