| Library / Tipiṭaka / д̇ибидага • Tipiṭaka / бан̃жабагаран̣а-анудийгаа • Pañcapakaraṇa-anuṭīkā |
2. канд̇хаяамагам̣
2. Khandhayamakaṃ
1. бан̣н̣ад̇д̇ивааро
1. Paṇṇattivāro
уд̣̇д̣̇зсаваараван̣н̣анаа
Uddesavāravaṇṇanā
2-3. канд̇хаяамагз …бз… барин̃н̃аа жа вад̇д̇аб̣б̣аад̇и ид̣̇ам̣ бад̇хаанабхаавзна вад̇д̇аб̣б̣ад̣̇ассанам̣. абхин̃н̃зяяагат̇аа хи абхид̇хаммо, саа жа яаавад̣̇зва барин̃н̃ад̇д̇аад̇и барин̃н̃аасу жа на винаа д̇ийран̣абарин̃н̃ааяа бахаанабарин̃н̃аа, д̇ийран̣ан̃жа самбун̣н̣абараануг̇г̇ахасса ад̇хиббзд̇ад̇д̇аа гаалабуг̇г̇алогаасавибхааг̇амукзна канд̇хаанам̣ висум̣ саха жа уббаад̣̇анирод̇халагкан̣абариг̇г̇ахавасзна саад̇исаяам̣ самбхавад̇и, наан̃н̃ат̇аад̇и имамад̇т̇ам̣ д̣̇ассзнд̇о ‘‘часу гаалабхзд̣̇зсу…бз… барин̃н̃аа жа вад̇д̇аб̣б̣аа’’д̇и бад̇хаанам̣ вад̇д̇аб̣б̣ам̣ уд̣̇д̇харад̇и. д̇ад̇т̇а бана яат̇аа на д̇ийран̣абарин̃н̃ааяа винаа бахаанабарин̃н̃аа, звам̣ д̇ийран̣абарин̃н̃аа винаа н̃аад̇абарин̃н̃ааяа. саа жа суд̇амаяан̃аан̣амуулигаад̇и д̣̇зсанаагусало сад̇т̇аа анваяад̇о б̣яад̇ирзгад̇о жа самуд̣̇ааяааваяавабад̣̇ад̇т̇аад̣̇ивибхааг̇ад̣̇ассанамукзна канд̇хзсу барин̃н̃ааббабхзд̣̇ам̣ багаасзд̇угаамо ‘‘бан̃жагканд̇хаа’’д̇иаад̣̇инаа д̣̇зсанам̣ аарабхийд̇и д̣̇ассзнд̇о ‘‘д̇з бана канд̇хаа’’д̇иаад̣̇имааха. бан̃жахи бад̣̇зхийд̇и бан̃жахи самуд̣̇ааяабад̣̇зхи.
2-3. Khandhayamake…pe… pariññā ca vattabbāti idaṃ padhānabhāvena vattabbadassanaṃ. Abhiññeyyakathā hi abhidhammo, sā ca yāvadeva pariññattāti pariññāsu ca na vinā tīraṇapariññāya pahānapariññā, tīraṇañca sampuṇṇaparānuggahassa adhippetattā kālapuggalokāsavibhāgamukhena khandhānaṃ visuṃ saha ca uppādanirodhalakkhaṇapariggahavasena sātisayaṃ sambhavati, nāññathāti imamatthaṃ dassento ‘‘chasu kālabhedesu…pe… pariññā ca vattabbā’’ti padhānaṃ vattabbaṃ uddharati. Tattha pana yathā na tīraṇapariññāya vinā pahānapariññā, evaṃ tīraṇapariññā vinā ñātapariññāya. Sā ca sutamayañāṇamūlikāti desanākusalo satthā anvayato byatirekato ca samudāyāvayavapadatthādivibhāgadassanamukhena khandhesu pariññāppabhedaṃ pakāsetukāmo ‘‘pañcakkhandhā’’tiādinā desanaṃ ārabhīti dassento ‘‘te pana khandhā’’tiādimāha. Pañcahi padehīti pañcahi samudāyapadehi.
д̇ад̇т̇аад̇и д̇зсу самуд̣̇ааяааваяавабад̣̇зсу. д̇хаммод̇и руббанаад̣̇иго н̃зяяад̇хаммо. самуд̣̇ааяабад̣̇ассаад̇и руубагканд̇хаад̣̇исамуд̣̇ааяабад̣̇асса. яад̣̇иби аваяававинимуд̇д̇о барамад̇т̇ад̇о самуд̣̇ааяо наама над̇т̇и, яат̇аа бана аваяаво самуд̣̇ааяо на ход̇и, звам̣ на самуд̣̇ааяоби аваяавод̇и сад̇иби самуд̣̇ааяааваяаваанам̣ бхзд̣̇з д̣̇виннам̣ бад̣̇аанам̣ самаанаад̇хигаран̣абхаавад̇о ад̇т̇зваабхзд̣̇од̇и бад̣̇ад̣̇ваяасса самаанад̇т̇ад̇ааяа сияаа аасан̇гаад̇и ааха ‘‘зд̇асмим̣ сам̣саяадтаанз’’д̇и. ‘‘жагкааяад̇анам̣ руубагканд̇хаг̇ан̣анам̣ г̇ажчад̇и, вин̃н̃аан̣агканд̇хо д̇аж̇ж̇аа мановин̃н̃аан̣ад̇хаад̇уу’’д̇иаад̣̇ийсу згад̣̇зсо самуд̣̇ааяабад̣̇ад̇т̇о вуд̇д̇о, ‘‘яам̣ гин̃жи руубам̣…бз… аяам̣ вужжад̇и руубагканд̇хо’’д̇иаад̣̇ийсу (вибха. 2) бана сагалод̇и ааха ‘‘руубаад̣̇и…бз… ад̇т̇о’’д̇и. аваяавабад̣̇аанан̃жзд̇т̇а висзсанависзсид̇аб̣б̣ависаяаанам̣ самаанаад̇хигаран̣ад̇ааяа самуд̣̇ааяабад̣̇ад̇т̇ад̇аа вуд̇д̇аа, д̇ад̇о зва самуд̣̇ааяабад̣̇аанамби аваяавабад̣̇ад̇т̇ад̇аа. на хи висзсанависзсид̇аб̣б̣аанам̣ ад̇т̇аанам̣ ажжанд̇ам̣ бхзд̣̇о абхзд̣̇о ваа ижчид̇о, ат̇а ко бхзд̣̇аабхзд̣̇о, д̇асмаа абхзд̣̇ад̣̇ассанавасзна батаманаяо вуд̇д̇о, бхзд̣̇ад̣̇ассанавасзна д̣̇уд̇ияанаяо. яо хи руббанаад̣̇исан̇каад̇о раасадто аваяавабад̣̇зхи руубаад̣̇исад̣̇д̣̇зхи жа канд̇хасад̣̇д̣̇зна жа висзсанависзсид̇аб̣б̣абхаавзна бхинд̣̇ид̇ваа вуд̇д̇о, свааяам̣ ад̇т̇ад̇о раасибхаавзна абзгкид̇о руббанаад̣̇иад̇т̇о зваад̇и.
Tatthāti tesu samudāyāvayavapadesu. Dhammoti ruppanādiko ñeyyadhammo. Samudāyapadassāti rūpakkhandhādisamudāyapadassa. Yadipi avayavavinimutto paramatthato samudāyo nāma natthi, yathā pana avayavo samudāyo na hoti, evaṃ na samudāyopi avayavoti satipi samudāyāvayavānaṃ bhede dvinnaṃ padānaṃ samānādhikaraṇabhāvato atthevābhedoti padadvayassa samānatthatāya siyā āsaṅkāti āha ‘‘etasmiṃ saṃsayaṭṭhāne’’ti. ‘‘Cakkhāyatanaṃ rūpakkhandhagaṇanaṃ gacchati, viññāṇakkhandho tajjā manoviññāṇadhātū’’tiādīsu ekadeso samudāyapadattho vutto, ‘‘yaṃ kiñci rūpaṃ…pe… ayaṃ vuccati rūpakkhandho’’tiādīsu (vibha. 2) pana sakaloti āha ‘‘rūpādi…pe… attho’’ti. Avayavapadānañcettha visesanavisesitabbavisayānaṃ samānādhikaraṇatāya samudāyapadatthatā vuttā, tato eva samudāyapadānampi avayavapadatthatā. Na hi visesanavisesitabbānaṃ atthānaṃ accantaṃ bhedo abhedo vā icchito, atha kho bhedābhedo, tasmā abhedadassanavasena paṭhamanayo vutto, bhedadassanavasena dutiyanayo. Yo hi ruppanādisaṅkhāto rāsaṭṭho avayavapadehi rūpādisaddehi ca khandhasaddena ca visesanavisesitabbabhāvena bhinditvā vutto, svāyaṃ atthato rāsibhāvena apekkhito ruppanādiattho evāti.
яат̇аа аваяавабад̣̇зхи вужжамааноби самуд̣̇ааяабад̣̇асса ад̇т̇о ход̇и, звам̣ самуд̣̇ааяабад̣̇зхи вужжамааноби аваяавабад̣̇асса ад̇т̇од̇и ‘‘руубагканд̇хо руубан̃жзва руубагканд̇хо жа, руубагканд̇хо руубанд̇и? ааманд̇аа’’д̇иаад̣̇инаа бад̣̇асод̇ханаа гад̇аад̇и д̣̇ассзнд̇о ааха ‘‘руубаад̣̇иаваяавабад̣̇зхи…бз… бад̣̇асод̇ханавааро вуд̇д̇о’’д̇и. д̇ад̇т̇а згажжасса аваяавабад̣̇асса ан̃н̃ад̇т̇а вуд̇д̇ияаа аваяавабад̣̇ад̇т̇асса самуд̣̇ааяабад̣̇ад̇т̇ад̇ааяа сияаа анзганд̇игад̇аа, самуд̣̇ааяабад̣̇асса бана д̇ам̣ над̇т̇ийд̇и самуд̣̇ааяабад̣̇ад̇т̇асса аваяавабад̣̇ад̇т̇ад̇ааяа б̣яабхижаараабхааво ‘‘руубагканд̇хо руубанд̇и? ааманд̇аа’’д̇и баал̣ияаа багаасид̇од̇и вуд̇д̇ам̣ ‘‘руубаад̣̇и…бз… д̣̇ассзд̇у’’нд̇и.
Yathā avayavapadehi vuccamānopi samudāyapadassa attho hoti, evaṃ samudāyapadehi vuccamānopi avayavapadassa atthoti ‘‘rūpakkhandho rūpañceva rūpakkhandho ca, rūpakkhandho rūpanti? Āmantā’’tiādinā padasodhanā katāti dassento āha ‘‘rūpādiavayavapadehi…pe… padasodhanavāro vutto’’ti. Tattha ekaccassa avayavapadassa aññattha vuttiyā avayavapadatthassa samudāyapadatthatāya siyā anekantikatā, samudāyapadassa pana taṃ natthīti samudāyapadatthassa avayavapadatthatāya byabhicārābhāvo ‘‘rūpakkhandho rūpanti? Āmantā’’ti pāḷiyā pakāsitoti vuttaṃ ‘‘rūpādi…pe… dassetu’’nti.
‘‘руубагканд̇хо’’д̇иаад̣̇ийсу канд̇хад̇т̇асса висзсид̇аб̣б̣ад̇д̇аа вуд̇д̇ам̣ ‘‘бад̇хаанабхууд̇асса канд̇хабад̣̇ассаа’’д̇и. взд̣̇анаад̣̇иубабад̣̇ад̇т̇асса жа самбхавад̇о ‘‘взд̣̇анаагканд̇хо’’д̇иаад̣̇ийсу. руубааваяавабад̣̇зна вуд̇д̇ассаад̇и руубасан̇каад̇зна аваяавабад̣̇зна висзсанабхаавзна вуд̇д̇асса канд̇хад̇т̇асса руубагканд̇хабхааво ход̇и. д̇зна вуд̇д̇ам̣ ‘‘руубагканд̇хо руубанд̇и? ааманд̇аа’’д̇и. д̇ад̇т̇аад̇и д̇асмим̣ руубагканд̇хабад̣̇з. бад̇хаанабхууд̇зна висзсид̇аб̣б̣ад̇д̇аа канд̇хааваяавабад̣̇зна вуд̇д̇асса руббанадтасса гим̣ взд̣̇анаагканд̇хаад̣̇ибхааво ход̇ийд̇и яож̇анаа. самаанз аваяавабад̣̇аабхид̇хзяяабхаавз аббад̇хаанзна бад̣̇зна яо ад̇т̇о вин̃н̃ааяад̇и, со гасмаа бад̇хаанзна на вин̃н̃ааяад̇ийд̇и ад̇хиббааяо. канд̇хааваяавабад̣̇зна вуд̇д̇о д̇хаммод̇и раасадтамааха. д̇ад̇т̇а гожийд̇и руббанадто. гзнажи самуд̣̇ааяабад̣̇знаад̇и руубагканд̇хабад̣̇зна, на взд̣̇анаагканд̇хаад̣̇ибад̣̇зна. д̇знааха ‘‘на саб̣б̣о саб̣б̣знаа’’д̇и. зса наяо взд̣̇анаагканд̇хаад̣̇ийсу. руубаруубагканд̇хаад̣̇иаваяавасамуд̣̇ааяабад̣̇асод̇ханамукзна д̇ад̇т̇а жа жад̇угканд̇хавасзна бавад̇д̇аа баал̣иг̇ад̇и бад̣̇асод̇ханамуулажаггавааро. зван̃жа д̣̇ассзнд̇знаад̇и иминаа явааяам̣ руубаад̣̇иаваяавабад̣̇зхи руубагканд̇хаад̣̇исамуд̣̇ааяабад̣̇зхи жа д̣̇ассид̇аагааро ад̇т̇ависзсо, д̇ам̣ бажжаамасад̇и. висзсанабхааво бхзд̣̇агад̇ааяа сааман̃н̃ад̇о аважчзд̣̇агад̇д̇аа, висзсид̇аб̣б̣абхааво абхзд̣̇аяог̇зна бхзд̣̇анд̇арад̇о авижчинд̣̇ид̇аб̣б̣ад̇д̇аа, самаанаад̇хигаран̣абхааво д̇зсам̣ бхзд̣̇аабхзд̣̇аанам̣ згавад̇т̇усанниссаяад̇д̇аа.
‘‘Rūpakkhandho’’tiādīsu khandhatthassa visesitabbattā vuttaṃ ‘‘padhānabhūtassa khandhapadassā’’ti. Vedanādiupapadatthassa ca sambhavato ‘‘vedanākkhandho’’tiādīsu. Rūpāvayavapadena vuttassāti rūpasaṅkhātena avayavapadena visesanabhāvena vuttassa khandhatthassa rūpakkhandhabhāvo hoti. Tena vuttaṃ ‘‘rūpakkhandho rūpanti? Āmantā’’ti. Tatthāti tasmiṃ rūpakkhandhapade. Padhānabhūtena visesitabbattā khandhāvayavapadena vuttassa ruppanaṭṭhassa kiṃ vedanākkhandhādibhāvo hotīti yojanā. Samāne avayavapadābhidheyyabhāve appadhānena padena yo attho viññāyati, so kasmā padhānena na viññāyatīti adhippāyo. Khandhāvayavapadena vutto dhammoti rāsaṭṭhamāha. Tattha kocīti ruppanaṭṭho. Kenaci samudāyapadenāti rūpakkhandhapadena, na vedanākkhandhādipadena. Tenāha ‘‘na sabbo sabbenā’’ti. Esa nayo vedanākkhandhādīsu. Rūparūpakkhandhādiavayavasamudāyapadasodhanamukhena tattha ca catukkhandhavasena pavattā pāḷigati padasodhanamūlacakkavāro. Evañca dassentenāti iminā yvāyaṃ rūpādiavayavapadehi rūpakkhandhādisamudāyapadehi ca dassitākāro atthaviseso, taṃ paccāmasati. Visesanabhāvo bhedakatāya sāmaññato avacchedakattā, visesitabbabhāvo abhedayogena bhedantarato avicchinditabbattā, samānādhikaraṇabhāvo tesaṃ bhedābhedānaṃ ekavatthusannissayattā.
д̇знаад̇и яат̇аавуд̇д̇зна висзсанависзсид̇аб̣б̣абхаавзна. зд̇т̇аад̇и зд̇асмим̣ самаанаад̇хигаран̣з. д̇знаад̇и ваа самаанаад̇хигаран̣абхаавзна. зд̇т̇аад̇и руубагканд̇хабад̣̇з. яат̇аа нийлуббалабад̣̇з уббалависзсанабхууд̇ам̣ нийлам̣ висидтамзва ход̇и, на яам̣ гин̃жи, звамид̇хааби канд̇хависзсанабхууд̇ам̣ руубамби висидтамзва сияаад̇и д̣̇ассзнд̇о ‘‘гим̣ канд̇хад̇о…бз… ход̇ий’’д̇и ааха. д̇ат̇аа ‘‘руубан̃жа д̇ам̣ канд̇хо жаа’’д̇и самаанаад̇хигаран̣абхаавзнзва яам̣ руубам̣, со канд̇хо. яо канд̇хо, д̇ам̣ руубанд̇и аяамби аабанно зваад̇и ааха ‘‘саб̣б̣зва…бз… висзсид̇аб̣б̣аа’’д̇и. висзсанзна жа наама нид̣̇д̇хаарид̇аруубзна бхавид̇аб̣б̣ам̣ аважчзд̣̇агад̇д̇аа, на анид̣̇д̇хаарид̇аруубзнаад̇и ааха ‘‘гим̣ бана д̇а’’нд̇иаад̣̇и, д̇ассзва г̇ахид̇ад̇д̇аа на бияаруубасаад̇аруубассаад̇и ад̇хиббааяо. на хи д̇ам̣ канд̇хависзсанабхаавзна г̇ахид̇ам̣, виссаж̇ж̇анам̣ гад̇ам̣ д̇ассзваад̇и яож̇анаа. на канд̇хад̇о ан̃н̃ам̣ руубам̣ ад̇т̇ийд̇и ид̣̇ам̣ руббанадто руубанд̇и гад̇ваа вуд̇д̇ам̣, на хи со канд̇хавинимуд̇д̇о ад̇т̇и. д̇знзваад̇и яат̇аавуд̇д̇аруубасса канд̇хавинимуд̇д̇асса абхаавзнзва. ‘‘бияаруубам̣ саад̇аруубам̣, д̣̇ассзнд̇знаббага’’нд̇и жа аад̣̇ийсу ад̇ад̣̇ад̇т̇асса руубасад̣̇д̣̇асса лаб̣бхамаанад̇д̇аа ‘‘д̇зна руубасад̣̇д̣̇знаа’’д̇и висзсзд̇ваа вуд̇д̇ам̣. вужжамаанам̣ бхууд̇убаад̣̇ааяамби бхзд̣̇ам̣ д̇хаммаж̇аад̇ам̣. суд̣̇д̇хзнаад̇и гзвалзна, руубасад̣̇д̣̇зна винаабийд̇и ад̇т̇о. д̇аяид̣̇ам̣ багаран̣аад̣̇иаважчиннад̇ам̣ санд̇хааяа вуд̇д̇ам̣, самаанаад̇хигаран̣ад̇ам̣ ваа. яо хи руубасад̣̇д̣̇зна самаанаад̇хигаран̣о канд̇хасад̣̇д̣̇о, д̇зна яат̇аавуд̇д̇аруубасад̣̇д̣̇зна вияа д̇ад̣̇ад̇т̇о вужжад̇зва. д̇знааха ‘‘канд̇хаа руубагканд̇хо’’д̇и. яад̣̇иби яат̇аавуд̇д̇ам̣ руубам̣ канд̇хо зва жа, канд̇хо бана на руубамзваад̇и ааха ‘‘на жа саб̣б̣з…бз… висзсид̇аб̣б̣аа’’д̇и. д̇знзваад̇и аруубасабхаавасса канд̇хасса ад̇т̇ибхаавзнзва. д̇зд̇и канд̇хаа. вибхаж̇ид̇аб̣б̣аад̇и ‘‘канд̇хаа руубагканд̇хо’’д̇и бад̣̇ам̣ уд̣̇д̇харид̇ваа ‘‘руубагканд̇хо канд̇хо жзва руубагканд̇хо жа, авасзсаа канд̇хаа на руубагканд̇хо’’д̇иаад̣̇инаа вибхааг̇зна д̣̇ассзд̇аб̣б̣аа.
Tenāti yathāvuttena visesanavisesitabbabhāvena. Etthāti etasmiṃ samānādhikaraṇe. Tenāti vā samānādhikaraṇabhāvena. Etthāti rūpakkhandhapade. Yathā nīluppalapade uppalavisesanabhūtaṃ nīlaṃ visiṭṭhameva hoti, na yaṃ kiñci, evamidhāpi khandhavisesanabhūtaṃ rūpampi visiṭṭhameva siyāti dassento ‘‘kiṃ khandhato…pe… hotī’’ti āha. Tathā ‘‘rūpañca taṃ khandho cā’’ti samānādhikaraṇabhāveneva yaṃ rūpaṃ, so khandho. Yo khandho, taṃ rūpanti ayampi āpanno evāti āha ‘‘sabbeva…pe… visesitabbā’’ti. Visesanena ca nāma niddhāritarūpena bhavitabbaṃ avacchedakattā, na aniddhāritarūpenāti āha ‘‘kiṃ pana ta’’ntiādi, tasseva gahitattā na piyarūpasātarūpassāti adhippāyo. Na hi taṃ khandhavisesanabhāvena gahitaṃ, vissajjanaṃ kataṃ tassevāti yojanā. Na khandhato aññaṃ rūpaṃ atthīti idaṃ ruppanaṭṭho rūpanti katvā vuttaṃ, na hi so khandhavinimutto atthi. Tenevāti yathāvuttarūpassa khandhavinimuttassa abhāveneva. ‘‘Piyarūpaṃ sātarūpaṃ, dassentenappaka’’nti ca ādīsu atadatthassa rūpasaddassa labbhamānattā ‘‘tena rūpasaddenā’’ti visesetvā vuttaṃ. Vuccamānaṃ bhūtupādāyampi bhedaṃ dhammajātaṃ. Suddhenāti kevalena, rūpasaddena vināpīti attho. Tayidaṃ pakaraṇādiavacchinnataṃ sandhāya vuttaṃ, samānādhikaraṇataṃ vā. Yo hi rūpasaddena samānādhikaraṇo khandhasaddo, tena yathāvuttarūpasaddena viya tadattho vuccateva. Tenāha ‘‘khandhā rūpakkhandho’’ti. Yadipi yathāvuttaṃ rūpaṃ khandho eva ca, khandho pana na rūpamevāti āha ‘‘na ca sabbe…pe… visesitabbā’’ti. Tenevāti arūpasabhāvassa khandhassa atthibhāveneva. Teti khandhā. Vibhajitabbāti ‘‘khandhā rūpakkhandho’’ti padaṃ uddharitvā ‘‘rūpakkhandho khandho ceva rūpakkhandho ca, avasesā khandhā na rūpakkhandho’’tiādinā vibhāgena dassetabbā.
канд̇хаанам̣ руубависзсана…бз… сам̣саяо ход̇ийд̇и зд̇т̇а гим̣ канд̇хад̇о ан̃н̃ааби взд̣̇анаа ад̇т̇и, яад̇о винивад̇д̇аа взд̣̇анаа канд̇хависзсанам̣ ход̇и, саб̣б̣з жа канд̇хаа гим̣ канд̇хависзсанабхууд̇ааяа взд̣̇анааяа висзсид̇аб̣б̣аад̇и звам̣ яож̇анаа взд̣̇ид̇аб̣б̣аа. гзжийд̇и анубхаванаад̣̇иббагаараа. гзнажи висзсанзнаад̇и взд̣̇анаад̣̇инаа висзсанзна.
Khandhānaṃ rūpavisesana…pe… saṃsayo hotīti ettha kiṃ khandhato aññāpi vedanā atthi, yato vinivattā vedanā khandhavisesanaṃ hoti, sabbe ca khandhā kiṃ khandhavisesanabhūtāya vedanāya visesitabbāti evaṃ yojanā veditabbā. Kecīti anubhavanādippakārā. Kenaci visesanenāti vedanādinā visesanena.
зд̇т̇а жа руубаад̣̇ибан̣н̣ад̇д̇и канд̇хабан̣н̣ад̇д̇и жа ‘‘руубам̣ канд̇хо, канд̇хаа руубагканд̇хо’’д̇иаад̣̇инаа висум̣ саха жа руббанаад̣̇игз ад̇т̇з бавад̇д̇амаанаа гад̣̇аажи аваяавабхууд̇з бавад̇д̇ад̇и, гад̣̇аажи самуд̣̇ааяабхууд̇з, д̇ассаа бана д̇ат̇аа бавад̇д̇анаагаарз нид̣̇д̇хаарид̇з яасмаа руубаад̣̇игканд̇хаа бад̣̇ад̇о ад̇т̇ад̇о жа висод̇хид̇аа наама хонд̇и д̇аб̣б̣исаяаган̇каабанод̣̇анад̇о, д̇асмаа ‘‘руубагканд̇хо руубан̃жзва руубагканд̇хо жа, руубагканд̇хо руубанд̇и? ааманд̇аа’’д̇иаад̣̇инаяаббавад̇д̇зна батамаваарзна руубаад̣̇иаваяавабад̣̇зхи аваяавад̇т̇о вияа самуд̣̇ааяад̇т̇оби вужжад̇и, д̇ат̇аа самуд̣̇ааяабад̣̇зхибийд̇и аяамад̇т̇о д̣̇ассид̇о. ‘‘руубам̣ руубагканд̇хо, канд̇хаа взд̣̇анаагканд̇хо’’д̇иаад̣̇инаяаббавад̇д̇зна бана д̣̇уд̇ияаваарзна висзсаваажий вияа руубаад̣̇иаваяавабад̣̇зхи сааман̃н̃абхууд̇знаби д̇ам̣д̇ам̣висидтзна канд̇хааваяавабад̣̇зна со со зва самуд̣̇ааяад̇т̇о вужжад̇и, на саб̣б̣од̇и аяамад̇т̇о д̣̇ассид̇о. канд̇хавинимуд̇д̇асса яат̇аад̇хиббзд̇асса абхааваа яад̣̇иби канд̇хоязва руубам̣, со бана на саб̣б̣о руубам̣, ат̇а ко д̇ад̣̇згад̣̇зсо, д̇ат̇аа взд̣̇анаад̣̇аяобийд̇и аяамад̇т̇о ‘‘руубам̣ канд̇хо, канд̇хаа рууба’’нд̇иаад̣̇инаяаббавад̇д̇зна д̇ад̇ияаваарзна д̣̇ассид̇о. ‘‘руубам̣ канд̇хо, канд̇хаа взд̣̇анаагканд̇хо’’д̇иаад̣̇инаяаббавад̇д̇зна бана жад̇уд̇т̇аваарзна ‘‘руубам̣ канд̇хо’’д̇и руубасса канд̇хабхаавз нижчид̇з канд̇хо наамааяам̣ на гзвалам̣ руубамзва, ат̇а ко взд̣̇анаад̣̇и жаад̇и взд̣̇анаад̣̇ийнамби канд̇хабхааваббагаасанз на саб̣б̣з канд̇хаа взд̣̇анаад̣̇ивисзсаванд̇о, гзжид̣̇зва бана д̇зна д̇зна висзсзна д̇ат̇аа вужжанд̇ийд̇и аяамад̇т̇о д̣̇ассид̇о. звам̣ д̣̇ассзнд̇ий жзсаа баал̣и канд̇хаанам̣ яат̇аавуд̇д̇абан̣н̣ад̇д̇исод̇ханамукзна саруубаавад̇хааран̣ааяа сам̣вад̇д̇ад̇и, д̇ан̃жа д̇зсам̣ яаавад̣̇зва уббаад̣̇аад̣̇инижчаяад̇т̇анд̇и д̣̇ассзнд̇о ‘‘звам̣ язсам̣…бз… взд̣̇ид̇аб̣б̣о’’д̇и ааха.
Ettha ca rūpādipaṇṇatti khandhapaṇṇatti ca ‘‘rūpaṃ khandho, khandhā rūpakkhandho’’tiādinā visuṃ saha ca ruppanādike atthe pavattamānā kadāci avayavabhūte pavattati, kadāci samudāyabhūte, tassā pana tathā pavattanākāre niddhārite yasmā rūpādikkhandhā padato atthato ca visodhitā nāma honti tabbisayakaṅkhāpanodanato, tasmā ‘‘rūpakkhandho rūpañceva rūpakkhandho ca, rūpakkhandho rūpanti? Āmantā’’tiādinayappavattena paṭhamavārena rūpādiavayavapadehi avayavattho viya samudāyatthopi vuccati, tathā samudāyapadehipīti ayamattho dassito. ‘‘Rūpaṃ rūpakkhandho, khandhā vedanākkhandho’’tiādinayappavattena pana dutiyavārena visesavācī viya rūpādiavayavapadehi sāmaññabhūtenapi taṃtaṃvisiṭṭhena khandhāvayavapadena so so eva samudāyattho vuccati, na sabboti ayamattho dassito. Khandhavinimuttassa yathādhippetassa abhāvā yadipi khandhoyeva rūpaṃ, so pana na sabbo rūpaṃ, atha kho tadekadeso, tathā vedanādayopīti ayamattho ‘‘rūpaṃ khandho, khandhā rūpa’’ntiādinayappavattena tatiyavārena dassito. ‘‘Rūpaṃ khandho, khandhā vedanākkhandho’’tiādinayappavattena pana catutthavārena ‘‘rūpaṃ khandho’’ti rūpassa khandhabhāve nicchite khandho nāmāyaṃ na kevalaṃ rūpameva, atha kho vedanādi cāti vedanādīnampi khandhabhāvappakāsane na sabbe khandhā vedanādivisesavanto, kecideva pana tena tena visesena tathā vuccantīti ayamattho dassito. Evaṃ dassentī cesā pāḷi khandhānaṃ yathāvuttapaṇṇattisodhanamukhena sarūpāvadhāraṇāya saṃvattati, tañca tesaṃ yāvadeva uppādādinicchayatthanti dassento ‘‘evaṃ yesaṃ…pe… veditabbo’’ti āha.
згад̣̇зсзби самуд̣̇ааяавохааро д̣̇иссад̇и яат̇аа бадо д̣̇ад̣дхо, самуд̣̇д̣̇о д̣̇идтод̇и ааха ‘‘жаггааваяавабхаавад̇о жаггаанийд̇и яамагаани вуд̇д̇ааний’’д̇и. б̣анд̇хид̇ваад̇и яамагабхаавзна б̣анд̇хид̇ваа, яамагамуулабхаавзнзва ваа. муулабхаавзна г̇ахан̣ам̣ самб̣анд̇хабхааво, д̇ам̣самб̣анд̇хад̇аа жа муулабад̣̇аад̣̇ийнам̣ наабхиаад̣̇исад̣̇исад̇аа д̣̇адтаб̣б̣аа. абуб̣б̣асса вад̇д̇аб̣б̣асса абхаавад̇о наяид̇ха д̣̇зсанаа ман̣д̣алабхаавзнзва самб̣аж̇жхад̇ийд̇и ааха ‘‘на ман̣д̣алабхаавзна самб̣аж̇жханад̇о’’д̇и. яад̣̇иби руубагканд̇хамуулагз абуб̣б̣ам̣ над̇т̇и, взд̣̇анаагканд̇хаад̣̇имуулагзсу бана сан̃н̃аад̣̇имукзна д̣̇зсанаббавад̇д̇ияам̣ абуб̣б̣авасзнзва г̇ад̇о сияаа ман̣д̣алабхаавзна самб̣анд̇хо, на д̇ат̇аа баато бавад̇д̇од̇и ааха ‘‘взд̣̇анаагканд̇ха…бз… самб̣анд̇хзнаа’’д̇и. бажчимасса буримзна асамб̣аж̇жханамзва хи хздтимасод̇ханам̣. суд̣̇д̇хагканд̇халаабхамад̇д̇амзва г̇ахзд̇ваад̇и ‘‘канд̇хаа рууба’’нд̇и зд̇т̇а канд̇хаад̇и канд̇хасад̣̇д̣̇зна лаб̣бхамаанам̣ руубаад̣̇ийхи асаммиссам̣ канд̇хадтамад̇д̇амзва уд̣̇д̣̇зсавасзна г̇ахзд̇ваа. яад̣̇иби уд̣̇д̣̇зсз канд̇хависзсанам̣ руубаад̣̇и ‘‘канд̇хаа рууба’’нд̇и суд̣̇д̇харуубаад̣̇имад̇д̇амзва г̇ахид̇ам̣, д̇ат̇ааби висзсарахид̇асса сааман̃н̃асса абхаавад̇о д̇ад̇т̇а суд̣̇д̇харуубаад̣̇имад̇д̇ад̇ааяа адтад̇ваа. канд̇хависзсанабхаавасан̇каад̇анд̇и яат̇аад̇хиг̇ад̇ам̣ канд̇хаанам̣ висзсанабхаавзна гат̇ид̇ам̣ руббанаад̣̇игам̣ висзсанад̇т̇ам̣ д̣̇ассзд̇ум̣. гзваламзва д̇ам̣ аг̇г̇ан̣ханд̇о канд̇хасад̣̇д̣̇зна саха яож̇зд̇ваа…бз… вибхад̇д̇ад̇д̇аа суд̣̇д̇хагканд̇хаваарод̇и вуд̇д̇од̇и яож̇анаа.
Ekadesepi samudāyavohāro dissati yathā paṭo daḍḍho, samuddo diṭṭhoti āha ‘‘cakkāvayavabhāvato cakkānīti yamakāni vuttānī’’ti. Bandhitvāti yamakabhāvena bandhitvā, yamakamūlabhāveneva vā. Mūlabhāvena gahaṇaṃ sambandhabhāvo, taṃsambandhatā ca mūlapadādīnaṃ nābhiādisadisatā daṭṭhabbā. Apubbassa vattabbassa abhāvato nayidha desanā maṇḍalabhāveneva sambajjhatīti āha ‘‘na maṇḍalabhāvena sambajjhanato’’ti. Yadipi rūpakkhandhamūlake apubbaṃ natthi, vedanākkhandhādimūlakesu pana saññādimukhena desanappavattiyaṃ apubbavaseneva gato siyā maṇḍalabhāvena sambandho, na tathā pāṭho pavattoti āha ‘‘vedanākkhandha…pe… sambandhenā’’ti. Pacchimassa purimena asambajjhanameva hi heṭṭhimasodhanaṃ. Suddhakkhandhalābhamattameva gahetvāti ‘‘khandhā rūpa’’nti ettha khandhāti khandhasaddena labbhamānaṃ rūpādīhi asammissaṃ khandhaṭṭhamattameva uddesavasena gahetvā. Yadipi uddese khandhavisesanaṃ rūpādi ‘‘khandhā rūpa’’nti suddharūpādimattameva gahitaṃ, tathāpi visesarahitassa sāmaññassa abhāvato tattha suddharūpādimattatāya aṭṭhatvā. Khandhavisesanabhāvasaṅkhātanti yathādhigataṃ khandhānaṃ visesanabhāvena kathitaṃ ruppanādikaṃ visesanatthaṃ dassetuṃ. Kevalameva taṃ aggaṇhanto khandhasaddena saha yojetvā…pe… vibhattattā suddhakkhandhavāroti vuttoti yojanā.
уд̣̇д̣̇зсаваараван̣н̣анаа нидтид̇аа.
Uddesavāravaṇṇanā niṭṭhitā.
1. бан̣н̣ад̇д̇ивааро
1. Paṇṇattivāro
нид̣̇д̣̇зсаваараван̣н̣анаа
Niddesavāravaṇṇanā
26. звам̣ вуд̇д̇анд̇и звам̣ д̣̇ваарааламб̣анзхи сад̣̇д̇хим̣ д̣̇ваараббавад̇д̇ад̇хаммавибхааг̇авасзна вуд̇д̇ам̣. бияасабхаавам̣ бияаж̇аад̇игам̣ ‘‘гат̇ам̣ руубзна ко, аавусо’’д̇иаад̣̇ийсу вияа бияасабхаавадтзна руубам̣, на руббанадтзнаад̇и вуд̇д̇ам̣ ‘‘бияаруубам̣…бз… руубам̣ на руубагканд̇хо’’д̇и. руббанадтзна руубагканд̇хабарияаабаннамби жагкаад̣̇и бияасабхаавамад̇д̇аважанижчаавасзна бияаруубамзва ануббависад̇и, на руубагканд̇ханд̇и ааха ‘‘бияасабхаава…бз… на руубагканд̇ход̇и вуд̇д̇а’’нд̇и. ‘‘яо бана яад̇т̇а висзсо’’д̇и вуд̇д̇о висзсасад̣̇д̣̇о наанувад̇д̇ад̇ийд̇и ад̇хиббааязнааха ‘‘важанасзсо’’д̇и. на хи ад̇хигаарад̇о лаб̣бхамаанасса аж̇жхаахаран̣агижжам̣ ад̇т̇и. д̣̇идтисан̃н̃аад̇и ваа бад̣̇уд̣̇д̇хаарояам̣ взд̣̇ид̇аб̣б̣о. висзсад̇аа банассаа ‘‘висзсам̣ ван̣н̣аяиссаамаа’’д̇и бадин̃н̃ааяа зва баагадаа. ‘‘авасзсаа сан̇каараа’’д̇и зд̇т̇ааби зсзва наяо. сам̣яож̇анавасзна ж̇аанаад̇и абхинивисад̇ийд̇и сан̃н̃аа д̣̇идтийд̇и ааха ‘‘д̣̇идти зва сан̃н̃аа’’д̇и. д̣̇идти жаад̇и жа-сад̣̇д̣̇зна авасидтам̣ бабан̃жам̣ сан̇г̇ан̣хаад̇и. д̇ат̇аа хи ‘‘бабан̃жасан̃н̃аасан̇каа’’д̇и зд̇т̇а бабан̃жасууд̣̇анияам̣ (ма. ни. адта. 1.201) вуд̇д̇ам̣ ‘‘сан̃н̃аанаамзна ваа бабан̃жаа зва вуд̇д̇аа’’д̇и.
26. Evaṃvuttanti evaṃ dvārālambanehi saddhiṃ dvārappavattadhammavibhāgavasena vuttaṃ. Piyasabhāvaṃ piyajātikaṃ ‘‘kathaṃ rūpena kho, āvuso’’tiādīsu viya piyasabhāvaṭṭhena rūpaṃ, na ruppanaṭṭhenāti vuttaṃ ‘‘piyarūpaṃ…pe… rūpaṃ na rūpakkhandho’’ti. Ruppanaṭṭhena rūpakkhandhapariyāpannampi cakkhādi piyasabhāvamattavacanicchāvasena piyarūpameva anuppavisati, na rūpakkhandhanti āha ‘‘piyasabhāva…pe… na rūpakkhandhoti vutta’’nti. ‘‘Yo pana yattha viseso’’ti vutto visesasaddo nānuvattatīti adhippāyenāha ‘‘vacanaseso’’ti. Na hi adhikārato labbhamānassa ajjhāharaṇakiccaṃ atthi. Diṭṭhisaññāti vā paduddhāroyaṃ veditabbo. Visesatā panassā ‘‘visesaṃ vaṇṇayissāmā’’ti paṭiññāya eva pākaṭā. ‘‘Avasesā saṅkhārā’’ti etthāpi eseva nayo. Saṃyojanavasena jānāti abhinivisatīti saññā diṭṭhīti āha ‘‘diṭṭhi eva saññā’’ti. Diṭṭhi cāti ca-saddena avasiṭṭhaṃ papañcaṃ saṅgaṇhāti. Tathā hi ‘‘papañcasaññāsaṅkhā’’ti ettha papañcasūdaniyaṃ (ma. ni. aṭṭha. 1.201) vuttaṃ ‘‘saññānāmena vā papañcā eva vuttā’’ti.
28. ‘‘канд̇хаа взд̣̇анаагканд̇хо’’д̇и зд̇асмим̣ ануломз яат̇аа саруубад̣̇ассанзна виссаж̇ж̇анам̣ лаб̣бхад̇и, на звам̣ ‘‘на канд̇хаа на взд̣̇анаагканд̇хо’’д̇и бадиломз, ид̇ха бана бадиважанзна виссаж̇ж̇ананд̇и д̇ад̣̇ад̇т̇ам̣ виваранд̇о ‘‘канд̇хасад̣̇д̣̇аббавад̇д̇ияаа жа абхаавз взд̣̇анаагканд̇хасад̣̇д̣̇аббавад̇д̇ияаа жа абхааво’’д̇и ааха. д̇зна сад̇д̇аабадисзд̇хз аяам̣ на-гаарод̇и д̣̇ассзд̇и. сад̣̇д̣̇аг̇г̇ахан̣ан̃жзд̇т̇а сад̣̇д̣̇аниб̣анд̇ханад̇д̇аа бан̃н̃ад̇д̇ияаа сад̣̇д̣̇асабхааг̇ад̇ам̣ ваа санд̇хааяа гад̇ам̣. бан̣н̣ад̇д̇исод̇ханан̃хзд̇ам̣. д̇знааха ‘‘бан̣н̣ад̇д̇исод̇ханамад̇д̇амзва гарод̇ий’’д̇и. д̇зна нид̣̇д̇хаарзд̇аб̣б̣асса д̇хамманд̇арасса абхаавам̣ д̣̇ассзд̇и. яад̇о вуд̇д̇ам̣ ‘‘на ан̃н̃ад̇хаммасаб̣бхааво звзд̇т̇а бамаан̣а’’нд̇и. зван̃жа гад̇ваад̇иаад̣̇инаа яат̇аавуд̇д̇амад̇т̇ам̣ баатанд̇арзна самад̇т̇зд̇и. гаамам̣ гад̇т̇ажи сад̇иби канд̇хз над̇т̇и взд̣̇анаагканд̇хо, аканд̇хад̇д̇асабхааваа бана над̇т̇и взд̣̇анаад̇и ‘‘на канд̇хаа на взд̣̇анаагканд̇ход̇и? ааманд̇аа’’д̇и вуд̇д̇анд̇и звам̣ ваа зд̇ам̣ д̣̇адтаб̣б̣ам̣. д̇знааха адтагат̇ааяам̣ ‘‘бан̃н̃ад̇д̇иниб̣б̣аанасан̇каад̇аа’’д̇иаад̣̇и.
28. ‘‘Khandhā vedanākkhandho’’ti etasmiṃ anulome yathā sarūpadassanena vissajjanaṃ labbhati, na evaṃ ‘‘na khandhā na vedanākkhandho’’ti paṭilome, idha pana paṭivacanena vissajjananti tadatthaṃ vivaranto ‘‘khandhasaddappavattiyā ca abhāve vedanākkhandhasaddappavattiyā ca abhāvo’’ti āha. Tena sattāpaṭisedhe ayaṃ na-kāroti dasseti. Saddaggahaṇañcettha saddanibandhanattā paññattiyā saddasabhāgataṃ vā sandhāya kataṃ. Paṇṇattisodhanañhetaṃ. Tenāha ‘‘paṇṇattisodhanamattameva karotī’’ti. Tena niddhāretabbassa dhammantarassa abhāvaṃ dasseti. Yato vuttaṃ ‘‘na aññadhammasabbhāvo evettha pamāṇa’’nti. Evañca katvātiādinā yathāvuttamatthaṃ pāṭhantarena samattheti. Kāmaṃ katthaci satipi khandhe natthi vedanākkhandho, akhandhattasabhāvā pana natthi vedanāti ‘‘na khandhā na vedanākkhandhoti? Āmantā’’ti vuttanti evaṃ vā etaṃ daṭṭhabbaṃ. Tenāha aṭṭhakathāyaṃ ‘‘paññattinibbānasaṅkhātā’’tiādi.
39. ‘‘руубад̇о ан̃н̃з’’д̇и зд̇т̇а бхууд̇убаад̣̇ааяа д̇хаммо вияа бияасабхаавоби руубасад̣̇д̣̇аабхид̇хзяяад̇аасааман̃н̃зна г̇ахид̇од̇и ааха ‘‘логуд̇д̇араа взд̣̇анаад̣̇аяо д̣̇адтаб̣б̣аа’’д̇и. аббавад̇д̇имад̇д̇амзваад̇и канд̇хасад̣̇д̣̇аббавад̇д̇ияаа абхаавз руубасад̣̇д̣̇аббавад̇д̇ияаа жа абхаавод̇и бан̣н̣ад̇д̇исод̇ханамад̇д̇ад̇ам̣язва санд̇хааяа вад̣̇ад̇и, д̇ат̇аа жааха ‘‘зван̃жа гад̇ваа’’д̇иаад̣̇и. д̇знзд̇ам̣ д̣̇ассзд̇и – яат̇аа жагкуд̇о ан̃н̃асса саб̣б̣ассаби сабхаавад̇хаммасса ааяад̇анаг̇г̇ахан̣зна г̇ахид̇ад̇д̇аа д̇ад̣̇убхаяавинимуд̇д̇ам̣ гин̃жи над̇т̇ийд̇и гзвалам̣ бан̃н̃ад̇д̇исод̇ханад̇т̇ам̣ д̇амзва абхаавам̣ д̣̇ассзд̇ум̣ ‘‘жагкун̃жа ааяад̇анз жа табзд̇ваа авасзсаа на жзва жагку на жа ааяад̇ана’’нд̇и вуд̇д̇ам̣, звамид̇хааби д̇ад̣̇ад̇т̇амзва убхаяавинимуд̇д̇асса абхаавам̣ д̣̇ассзд̇ум̣ ‘‘руубан̃жа канд̇хз жа табзд̇ваа авасзсаа на жзва руубам̣ на жа канд̇хаа’’д̇и вуд̇д̇анд̇и. висамобан̃н̃аасо. ‘‘жагкун̃жа ааяад̇анз жа табзд̇ваа’’д̇и зд̇т̇а хи авасзсаг̇г̇ахан̣зна г̇аяхамаанам̣ гин̃жи над̇т̇ийд̇и саггаа вад̇д̇ум̣ ааяад̇анавинимуд̇д̇асса сабхаавад̇хаммасса абхааваа. д̇знааха ‘‘яад̣̇и сияаа’’д̇и. ‘‘руубан̃жа канд̇хз жа табзд̇ваа’’д̇и зд̇т̇а бана на д̇ат̇аа саггаа вад̇д̇ум̣ канд̇хавинимуд̇д̇асса сабхаавад̇хаммасса ад̇т̇ибхаавад̇о. яад̣̇и бана д̇аад̣̇исам̣ канд̇хаг̇ад̇ам̣ д̇хаммаж̇аад̇ам̣ над̇т̇ийд̇и звамид̣̇ам̣ вуд̇д̇ам̣ сияаа, звам̣ сад̇и яуд̇д̇амзд̇ам̣ сияаа. д̇ат̇аа хи ‘‘адтагат̇ааяам̣ банаа’’д̇иаад̣̇инаа бан̃н̃ад̇д̇иг̇г̇ахан̣амзва уд̣̇д̇харийяад̇и. д̇ан̣хаавад̇т̇у жа на сияаа авасзсаг̇г̇ахан̣зна г̇аяхамаананд̇и аанзд̇ваа самб̣анд̇хо. канд̇хо жа сияаад̇и яож̇анаа.
39. ‘‘Rūpato aññe’’ti ettha bhūtupādāya dhammo viya piyasabhāvopi rūpasaddābhidheyyatāsāmaññena gahitoti āha ‘‘lokuttarā vedanādayodaṭṭhabbā’’ti. Appavattimattamevāti khandhasaddappavattiyā abhāve rūpasaddappavattiyā ca abhāvoti paṇṇattisodhanamattataṃyeva sandhāya vadati, tathā cāha ‘‘evañca katvā’’tiādi. Tenetaṃ dasseti – yathā cakkhuto aññassa sabbassapi sabhāvadhammassa āyatanaggahaṇena gahitattā tadubhayavinimuttaṃ kiñci natthīti kevalaṃ paññattisodhanatthaṃ tameva abhāvaṃ dassetuṃ ‘‘cakkhuñca āyatane ca ṭhapetvā avasesā na ceva cakkhu na ca āyatana’’nti vuttaṃ, evamidhāpi tadatthameva ubhayavinimuttassa abhāvaṃ dassetuṃ ‘‘rūpañca khandhe ca ṭhapetvā avasesā na ceva rūpaṃ na ca khandhā’’ti vuttanti. Visamopaññāso. ‘‘Cakkhuñca āyatane ca ṭhapetvā’’ti ettha hi avasesaggahaṇena gayhamānaṃ kiñci natthīti sakkā vattuṃ āyatanavinimuttassa sabhāvadhammassa abhāvā. Tenāha ‘‘yadi siyā’’ti. ‘‘Rūpañca khandhe ca ṭhapetvā’’ti ettha pana na tathā sakkā vattuṃ khandhavinimuttassa sabhāvadhammassa atthibhāvato. Yadi pana tādisaṃ khandhagataṃ dhammajātaṃ natthīti evamidaṃ vuttaṃ siyā, evaṃ sati yuttametaṃ siyā. Tathā hi ‘‘aṭṭhakathāyaṃ panā’’tiādinā paññattiggahaṇameva uddharīyati. Taṇhāvatthu ca na siyā avasesaggahaṇena gayhamānanti ānetvā sambandho. Khandho ca siyāti yojanā.
нид̣̇д̣̇зсаваараван̣н̣анаа нидтид̇аа.
Niddesavāravaṇṇanā niṭṭhitā.
2. бавад̇д̇иваараван̣н̣анаа
2. Pavattivāravaṇṇanā
50-205. миссагагаалабхзд̣̇зсу яамагзсу бад̣̇аанам̣ бхиннагаалад̇д̇аа сияаа ад̇т̇ависзсод̇и ааха ‘‘амиссагагаалабхзд̣̇зсу ваарзсу ад̇т̇ависзсаабхаавад̇о’’д̇и. ид̣̇аани д̇амзвад̇т̇ам̣ ‘‘буримасса хий’’д̇иаад̣̇инаа виварад̇и. д̇знаад̇и ад̇т̇ависзсаабхаавзна. зд̇т̇аад̇и зд̇асмим̣ бавад̇д̇иваарабаатз, зд̇иссам̣ ваа бавад̇д̇иваараван̣н̣анааяам̣. ча зва вуд̇д̇аа, на наваад̇и ад̇хиббааяо. д̇знааха ‘‘ад̇ийд̇знаа’’д̇иаад̣̇и. зд̇з бана д̇аяод̇и ад̇д̇анаа висум̣ ананд̇арам̣ д̣̇ассид̇з санд̇хааяааха. яат̇аад̣̇ассид̇аад̇и адтагат̇ааяам̣ нид̣̇д̇хаарзд̇ваа д̣̇ассид̇аб̣б̣аагаараа бажжуббаннзнаад̇ийд̇аад̣̇аяо яз баал̣ияам̣ уж̇угамзва ааг̇ад̇аа. ‘‘на висум̣ виж̇ж̇анд̇ий’’д̇и вуд̇д̇амзвад̇т̇ам̣ ‘‘д̇ад̇т̇а д̇ад̇т̇а хий’’д̇иаад̣̇инаа баагадад̇арам̣ гарод̇и. д̇ад̇т̇а бадиломабужчаахийд̇и ‘‘яасса ваа бана взд̣̇анаагканд̇хо уббаж̇ж̇ид̇т̇а, д̇асса руубагканд̇хо уббаж̇ж̇ад̇ий’’д̇и звамаад̣̇игаахи батамабад̣̇з вуд̇д̇асса бадиломавасзна бавад̇д̇аахи. д̇знзваад̇и наяад̇о яож̇зд̇ум̣ саггун̣зяяад̇д̇аа зва. миссагагаалабхзд̣̇зсу жаад̇и на гзвалам̣ амиссагагаалабхзд̣̇зсуязва, ат̇а ко миссагагаалабхзд̣̇зсу жаад̇и ад̇т̇о. на яож̇анаасугарад̇ааяа зва буримз аяож̇анаа, ат̇а ко сукаг̇г̇ахан̣ад̇т̇амбийд̇и д̣̇ассзнд̇о ааха ‘‘амиссага…бз… вуд̇д̇ааний’’д̇и.
50-205. Missakakālabhedesu yamakesu padānaṃ bhinnakālattā siyā atthavisesoti āha ‘‘amissakakālabhedesu vāresu atthavisesābhāvato’’ti. Idāni tamevatthaṃ ‘‘purimassa hī’’tiādinā vivarati. Tenāti atthavisesābhāvena. Etthāti etasmiṃ pavattivārapāṭhe, etissaṃ vā pavattivāravaṇṇanāyaṃ. Cha eva vuttā, na navāti adhippāyo. Tenāha ‘‘atītenā’’tiādi. Ete pana tayoti attanā visuṃ anantaraṃ dassite sandhāyāha. Yathādassitāti aṭṭhakathāyaṃ niddhāretvā dassitabbākārā paccuppannenātītādayo ye pāḷiyaṃ ujukameva āgatā. ‘‘Na visuṃ vijjantī’’ti vuttamevatthaṃ ‘‘tattha tattha hī’’tiādinā pākaṭataraṃ karoti. Tattha paṭilomapucchāhīti ‘‘yassa vā pana vedanākkhandho uppajjittha, tassa rūpakkhandho uppajjatī’’ti evamādikāhi paṭhamapade vuttassa paṭilomavasena pavattāhi. Tenevāti nayato yojetuṃ sakkuṇeyyattā eva. Missakakālabhedesu cāti na kevalaṃ amissakakālabhedesuyeva, atha kho missakakālabhedesu cāti attho. Na yojanāsukaratāya eva purime ayojanā, atha kho sukhaggahaṇatthampīti dassento āha ‘‘amissaka…pe… vuttānī’’ti.
язна гааран̣знаад̇и язна згабад̣̇ад̣̇ваяасан̇г̇ахид̇аанам̣ канд̇хаанам̣ уббаад̣̇асса нирод̇хасса лаабхасан̇каад̇зна гааран̣зна. яат̇ааггамам̣ бурзбан̃хо бажчаабан̃ход̇и жа наамам̣ вуд̇д̇ам̣. жа-сад̣̇д̣̇зна бурзбажчаабан̃ход̇и жа наамам̣ вуд̇д̇анд̇и нид̣̇д̇хаарзд̇ваа яож̇зд̇аб̣б̣ам̣. д̇ад̇т̇а бана ‘‘згабад̣̇ад̣̇ваяасан̇г̇ахид̇аана’’нд̇и ид̣̇ам̣ згаж̇жхам̣ гад̇ваа г̇ахзд̇аб̣б̣ам̣. д̇амзвад̇т̇амби виварад̇и ‘‘яасса хий’’д̇иаад̣̇инаа. д̇ад̇т̇а яассаад̇и яасса бан̃хасса. ‘‘бан̃хо’’д̇и жзд̇т̇а бужчанавасзна бавад̇д̇ам̣ важанам̣ взд̣̇ид̇аб̣б̣ам̣. д̇знзвааха ‘‘барибуурзд̇ваа виссаж̇ж̇зд̇аб̣б̣ад̇т̇асан̇г̇ан̣ханад̇о’’д̇и. д̇ам̣ саруубад̣̇ассанзна виссаж̇ж̇анам̣ д̇ам̣виссаж̇ж̇анам̣, д̇ам̣ ваа яат̇аавуд̇д̇ам̣ виссаж̇ж̇анам̣ зд̇ассаад̇и д̇ам̣виссаж̇ж̇ано, д̇асса д̇ам̣виссаж̇ж̇анасса. буримагодтаасзнаад̇и буримзна уд̣̇д̣̇зсабад̣̇зна. д̇зна хи виссаж̇ж̇анабад̣̇асса самаанад̇т̇ад̇аа ид̇ха сад̣̇исад̇т̇ад̇аа. згзна бад̣̇знаад̇и згзна бад̇хаанааббад̇хаанзна яамагабад̣̇зна, на батамабад̣̇знзваад̇и ад̇т̇о. уббаад̣̇анирод̇халаабхасааман̃н̃амад̇д̇знаад̇и уббаад̣̇асса ваа нирод̇хасса ваа лаб̣бхамаанад̇ааяа самаанад̇аамад̇д̇зна. саннидтаанабад̣̇а…бз… яуд̇д̇анд̇и ид̣̇ам̣ адтагат̇ааяам̣ ‘‘яад̇т̇а руубагканд̇хо нуббаж̇ж̇ад̇ий’’д̇иаад̣̇инаа бурзбан̃хасса д̣̇ассид̇ад̇д̇аа вуд̇д̇ам̣. яад̣̇иби д̇ад̇т̇а ‘‘уббаж̇ж̇ад̇ий’’д̇и виссаж̇ж̇ид̇ад̇д̇аа взд̣̇анаагканд̇хасса уббаад̣̇о лаб̣бхад̇ийд̇и вуд̇д̇ам̣, яо бана саннидтаанабад̣̇асан̇г̇ахид̇о руубагканд̇хасса ануббаад̣̇о баал̣ияам̣ анун̃н̃аад̇аруубзна тид̇о, д̇асса васзна бурзбан̃хо яуд̇д̇од̇и ад̇хиббааяо. зван̃хи буримагодтаасзна сад̣̇исад̇т̇ад̇аа ход̇и.
Yena kāraṇenāti yena ekapadadvayasaṅgahitānaṃ khandhānaṃ uppādassa nirodhassa lābhasaṅkhātena kāraṇena. Yathākkamaṃ purepañho pacchāpañhoti ca nāmaṃ vuttaṃ. Ca-saddena purepacchāpañhoti ca nāmaṃ vuttanti niddhāretvā yojetabbaṃ. Tattha pana ‘‘ekapadadvayasaṅgahitāna’’nti idaṃ ekajjhaṃ katvā gahetabbaṃ. Tamevatthampi vivarati ‘‘yassa hī’’tiādinā. Tattha yassāti yassa pañhassa. ‘‘Pañho’’ti cettha pucchanavasena pavattaṃ vacanaṃ veditabbaṃ. Tenevāha ‘‘paripūretvā vissajjetabbatthasaṅgaṇhanato’’ti. Taṃ sarūpadassanena vissajjanaṃ taṃvissajjanaṃ, taṃ vā yathāvuttaṃ vissajjanaṃ etassāti taṃvissajjano, tassa taṃvissajjanassa. Purimakoṭṭhāsenāti purimena uddesapadena. Tena hi vissajjanapadassa samānatthatā idha sadisatthatā. Ekena padenāti ekena padhānāppadhānena yamakapadena, na paṭhamapadenevāti attho. Uppādanirodhalābhasāmaññamattenāti uppādassa vā nirodhassa vā labbhamānatāya samānatāmattena. Sanniṭṭhānapada…pe… yuttanti idaṃ aṭṭhakathāyaṃ ‘‘yattha rūpakkhandho nuppajjatī’’tiādinā purepañhassa dassitattā vuttaṃ. Yadipi tattha ‘‘uppajjatī’’ti vissajjitattā vedanākkhandhassa uppādo labbhatīti vuttaṃ, yo pana sanniṭṭhānapadasaṅgahito rūpakkhandhassa anuppādo pāḷiyaṃ anuññātarūpena ṭhito, tassa vasena purepañho yuttoti adhippāyo. Evañhi purimakoṭṭhāsena sadisatthatā hoti.
‘‘яасса руубагканд̇хо нуббаж̇ж̇ид̇т̇а, д̇асса взд̣̇анаагканд̇хо нуббаж̇ж̇ид̇т̇аа’’д̇и зд̇т̇а руубагканд̇хасса ануббаннабуб̣б̣ад̇аабадигкзбамукзна ид̇арасса бадигкибийяад̇ийд̇и руубагканд̇хассзва яат̇аавуд̇д̇абадигкзбо бад̇хаанабхаавзна вуд̇д̇о. зсзва наяо ан̃н̃зсуби зд̣̇исзсу таанзсууд̇и ааха ‘‘саннидтаанад̇т̇ассзва бадигкибанам̣ бадигкзбо’’д̇и . ‘‘яасса руубагканд̇хо уббаж̇ж̇ад̇и, д̇асса взд̣̇анаагканд̇хо нируж̇жхад̇ий’’д̇и зд̇т̇а бана руубагканд̇хасса уббаад̣̇алагкан̣ам̣ гад̇ваа взд̣̇анаагканд̇хасса нирод̇хо бужчийяад̇ийд̇и со зва ‘‘но’’д̇и бадисзд̇хийяад̇и. зса наяо ан̃н̃зсуби зд̣̇исзсу таанзсууд̇и вуд̇д̇ам̣ ‘‘сам̣саяад̇т̇анивааран̣ам̣ бадисзд̇хо’’д̇и. ‘‘на-гааравирахид̇а’’нд̇и зд̇зна бадисзд̇хасса бадисзд̇хид̇амааха. яад̣̇и звам̣ баал̣иг̇ад̇ибадисзд̇хависсаж̇ж̇анаанам̣ го висзсод̇и ааха ‘‘д̇ад̇т̇а уббад̇д̇ий’’д̇иаад̣̇и.
‘‘Yassa rūpakkhandho nuppajjittha, tassa vedanākkhandho nuppajjitthā’’ti ettha rūpakkhandhassa anuppannapubbatāpaṭikkhepamukhena itarassa paṭikkhipīyatīti rūpakkhandhasseva yathāvuttapaṭikkhepo padhānabhāvena vutto. Eseva nayo aññesupi edisesu ṭhānesūti āha ‘‘sanniṭṭhānatthasseva paṭikkhipanaṃ paṭikkhepo’’ti . ‘‘Yassa rūpakkhandho uppajjati, tassa vedanākkhandho nirujjhatī’’ti ettha pana rūpakkhandhassa uppādalakkhaṇaṃ katvā vedanākkhandhassa nirodho pucchīyatīti so eva ‘‘no’’ti paṭisedhīyati. Esa nayo aññesupi edisesu ṭhānesūti vuttaṃ ‘‘saṃsayatthanivāraṇaṃ paṭisedho’’ti. ‘‘Na-kāravirahita’’nti etena paṭisedhassa paṭisedhitamāha. Yadi evaṃ pāḷigatipaṭisedhavissajjanānaṃ ko visesoti āha ‘‘tattha uppattī’’tiādi.
д̇ад̣̇згад̣̇зсабагкзбавасзнаад̇и д̇зсам̣ жад̇уннам̣ бан̃хаанам̣ бан̃жаннан̃жа виссаж̇ж̇анаанам̣ згад̣̇зсасса багкибанавасзна. д̇знааха адтагат̇ааяам̣ ‘‘батамз таанз барибун̣н̣абан̃хасса буримагодтаасз саруубад̣̇ассанзнаа’’д̇иаад̣̇и. яо банзд̇т̇а бан̃хзсу виссаж̇ж̇анзсу жа сад̇д̇авийсад̇ияаа таанзсу багкзбам̣ лабхад̇и, д̇ам̣ д̣̇ассзд̇ум̣ ‘‘барибун̣н̣абан̃хо зваа’’д̇иаад̣̇и вуд̇д̇ам̣. баал̣ивавад̇т̇аанад̣̇ассанаад̣̇ид̇од̇и зд̇т̇а аад̣̇и-сад̣̇д̣̇зна бужчаавибхан̇г̇о виссаж̇ж̇анаатаанаани згасмим̣ бан̃хз яож̇анаанаяод̇и имзсам̣ сан̇г̇ахо д̣̇адтаб̣б̣о.
Tadekadesapakkhepavasenāti tesaṃ catunnaṃ pañhānaṃ pañcannañca vissajjanānaṃ ekadesassa pakkhipanavasena. Tenāha aṭṭhakathāyaṃ ‘‘paṭhame ṭhāne paripuṇṇapañhassa purimakoṭṭhāse sarūpadassanenā’’tiādi. Yo panettha pañhesu vissajjanesu ca sattavīsatiyā ṭhānesu pakkhepaṃ labhati, taṃ dassetuṃ ‘‘paripuṇṇapañho evā’’tiādi vuttaṃ. Pāḷivavatthānadassanāditoti ettha ādi-saddena pucchāvibhaṅgo vissajjanāṭhānāni ekasmiṃ pañhe yojanānayoti imesaṃ saṅgaho daṭṭhabbo.
суд̣̇д̇хааваасаананд̇иаад̣̇и баал̣ияаа бад̣̇ам̣ уд̣̇д̇харид̇ваа ад̇т̇ад̣̇ассанад̇т̇ам̣ аарад̣̇д̇хам̣. ‘‘яасса яад̇т̇а руубагканд̇хо нуббаж̇ж̇ид̇т̇а, д̇асса д̇ад̇т̇а взд̣̇анаагканд̇хо нуббаж̇ж̇ид̇т̇аа’’д̇и имасса виссаж̇ж̇анам̣ ход̇и ‘‘суд̣̇д̇хааваасаанам̣ д̇зсам̣ д̇ад̇т̇аа’’д̇и. д̇ад̇т̇а згабхуумияам̣ д̣̇уд̇ияаа убабад̇д̇и над̇т̇ийд̇и згиссаа бхуумияаа згасса арияабуг̇г̇аласса д̣̇уд̇ияаваарам̣ бадисанд̇хиг̇г̇ахан̣ам̣ над̇т̇ийд̇и ад̇т̇о. д̇ад̇ияаваараад̣̇ийсу вад̇д̇аб̣б̣амзва над̇т̇и. свааяамад̇т̇о яат̇аа н̃аабид̇о ход̇и, д̇ам̣ д̣̇ассзд̇ум̣ ‘‘бадисанд̇хид̇о бабхуд̇и хи…бз… бавад̇д̇аа’’д̇и вуд̇д̇ам̣. д̇зна ад̣̇д̇хаабажжуббаннавасзнааяам̣ д̣̇зсанаа бавад̇д̇аад̇и д̣̇ассзд̇и. аад̣̇аананигкзбабарижчиннам̣ гаммаж̇асанд̇аанам̣ згад̇д̇зна г̇ахзд̇ваа д̇асса васзна уббаад̣̇анирод̇хзсу вужжамаанзсу агаммаж̇зсу гусалаад̣̇ийсу гат̇анд̇и жод̣̇анааяам̣ д̇зби ид̇ха д̇ам̣ниссид̇аа зва гад̇аад̇и д̣̇ассзнд̇о ааха ‘‘д̇асмин̃хи…бз… д̣̇ассид̇аа’’д̇и. д̇знзваад̇и гаммаж̇асанд̇аанзнзва. д̇асмаад̇и згагамманиб̣б̣ад̇д̇асса вибаагасанд̇аанасса згад̇д̇зна г̇ахид̇ад̇д̇аа. д̇ассаад̇и гаммаж̇асанд̇аанасса. бан̃жасу суд̣̇д̇хааваасзсу яат̇аа бажжзгам̣ ‘‘згиссаа бхуумияаа д̣̇уд̇ияаа убабад̇д̇и над̇т̇ий’’д̇и яат̇аавуд̇д̇абаал̣ияаа вин̃н̃ааяад̇и, звам̣ ‘‘суд̣̇д̇хааваасаана’’нд̇и ависзсаважанад̇о сагалзби суд̣̇д̇хааваасз саа над̇т̇ийд̇и д̇ааяа гасмаа на вин̃н̃ааяад̇ийд̇и жод̣̇анам̣ самудтаабзд̇ваа саяамзва барихарид̇ум̣ ‘‘гасмаа банаа’’д̇иаад̣̇имааха. д̇ад̇т̇а суд̣̇д̇хааваасзсу хздтаабхуумигасса асад̇и инд̣̇рияабарибаагз убарибхуумисамуббад̇д̇и на саггаа бадисзд̇хзд̇ум̣ уд̣̇д̇хам̣сод̇аважанад̇о. уд̣̇д̇хамасса д̇ан̣хаасод̇ам̣ ваддасод̇ан̃жаад̇и хи уд̣̇д̇хам̣сод̇о. д̇знааха ‘‘уд̣̇д̇хам̣сод̇абаал̣исаб̣бхааваа’’д̇и. сам̣санд̣̇зд̇аб̣б̣аад̇и яат̇аа на вируж̇жханд̇и, звам̣ нзд̇аб̣б̣аа. д̇ат̇аа жзва сам̣ван̣н̣ид̇ам̣.
Suddhāvāsānantiādi pāḷiyā padaṃ uddharitvā atthadassanatthaṃ āraddhaṃ. ‘‘Yassa yattha rūpakkhandho nuppajjittha, tassa tattha vedanākkhandho nuppajjitthā’’ti imassa vissajjanaṃ hoti ‘‘suddhāvāsānaṃ tesaṃ tatthā’’ti. Tattha ekabhūmiyaṃ dutiyā upapatti natthīti ekissā bhūmiyā ekassa ariyapuggalassa dutiyavāraṃ paṭisandhiggahaṇaṃ natthīti attho. Tatiyavārādīsu vattabbameva natthi. Svāyamattho yathā ñāpito hoti, taṃ dassetuṃ ‘‘paṭisandhito pabhuti hi…pe… pavattā’’ti vuttaṃ. Tena addhāpaccuppannavasenāyaṃ desanā pavattāti dasseti. Ādānanikkhepaparicchinnaṃ kammajasantānaṃ ekattena gahetvā tassa vasena uppādanirodhesu vuccamānesu akammajesu kusalādīsu kathanti codanāyaṃ tepi idha taṃnissitā eva katāti dassento āha ‘‘tasmiñhi…pe… dassitā’’ti. Tenevāti kammajasantāneneva. Tasmāti ekakammanibbattassa vipākasantānassa ekattena gahitattā. Tassāti kammajasantānassa. Pañcasu suddhāvāsesu yathā paccekaṃ ‘‘ekissā bhūmiyā dutiyā upapatti natthī’’ti yathāvuttapāḷiyā viññāyati, evaṃ ‘‘suddhāvāsāna’’nti avisesavacanato sakalepi suddhāvāse sā natthīti tāya kasmā na viññāyatīti codanaṃ samuṭṭhāpetvā sayameva pariharituṃ ‘‘kasmā panā’’tiādimāha. Tattha suddhāvāsesu heṭṭhābhūmikassa asati indriyaparipāke uparibhūmisamuppatti na sakkā paṭisedhetuṃ uddhaṃsotavacanato. Uddhamassa taṇhāsotaṃ vaṭṭasotañcāti hi uddhaṃsoto. Tenāha ‘‘uddhaṃsotapāḷisabbhāvā’’ti. Saṃsandetabbāti yathā na virujjhanti, evaṃ netabbā. Tathā ceva saṃvaṇṇitaṃ.
зд̇зна саннидтаанзнаад̇и ан̇гид̇огаасабхаавируубуббаад̣̇асанниссаязна нижчаязна. висзсид̇аа д̇ат̇аабхаавируубабхаавино. асан̃н̃асад̇д̇аабийд̇и на гзвалам̣ бан̃жавогаараа зва, ат̇а ко асан̃н̃асад̇д̇ааби. д̇з зва асан̃н̃асад̇д̇з зва г̇ахзд̇ваа буримагодтаасзд̇и ад̇хиббааяо. д̇зна яз саннидтаанзна важ̇ж̇ид̇аад̇и д̇зна яат̇аавуд̇д̇асаннидтаанзна яз вирахид̇аа, д̇з д̇ат̇аа на вад̇д̇аб̣б̣аад̇и ад̇т̇о. ид̣̇аани ‘‘д̇з д̇ад̇о’’д̇иаад̣̇инаа д̣̇ассзд̇и. д̇ад̇од̇и асан̃н̃аабхавад̇о. бажчимабхавигаананд̇и зд̇т̇а бажчимабхавам̣ саруубад̇о д̣̇ассзд̇ум̣ ‘‘гим̣ бан̃жавогаараад̣̇ий’’д̇иаад̣̇и вуд̇д̇ам̣. абажчимабхавигаанамби аруубаанам̣ аруубабхавз яат̇аа руубагканд̇хо нуббаад̣̇и, звам̣ д̇ад̇т̇а бажчимабхавигаанам̣ взд̣̇анаагканд̇хобийд̇и ааха ‘‘зд̇зна саннидтаанзна сан̇г̇ахид̇ад̇д̇аа’’д̇и. д̇знааха ‘‘д̇зсам̣…бз… аахаа’’д̇и. д̇ад̇т̇а д̇зсанд̇и бажчимабхавигаанам̣. д̇ад̇т̇аад̇и аруубабхавз. ид̇араануббад̇д̇ибхааван̃жаад̇и ид̇арасса взд̣̇анаагканд̇хасса ануббаж̇ж̇анасаб̣бхаавамби. саббадисанд̇хигаанамби суд̣̇д̇хааваасаанам̣ канд̇хабхзд̣̇асса бариниб̣б̣аанабарияааяо ол̣ааригад̣̇осаббахаанад̇о гилзсуубасамасааман̃н̃зна вуд̇д̇од̇и взд̣̇ид̇аб̣б̣ам̣.
Etena sanniṭṭhānenāti aṅkitokāsabhāvirūpuppādasannissayena nicchayena. Visesitā tathābhāvirūpabhāvino. Asaññasattāpīti na kevalaṃ pañcavokārā eva, atha kho asaññasattāpi. Te eva asaññasatte eva gahetvā purimakoṭṭhāseti adhippāyo. Tena ye sanniṭṭhānena vajjitāti tena yathāvuttasanniṭṭhānena ye virahitā, te tathā na vattabbāti attho. Idāni ‘‘te tato’’tiādinā dasseti. Tatoti asaññābhavato. Pacchimabhavikānanti ettha pacchimabhavaṃ sarūpato dassetuṃ ‘‘kiṃ pañcavokārādī’’tiādi vuttaṃ. Apacchimabhavikānampi arūpānaṃ arūpabhave yathā rūpakkhandho nuppādi, evaṃ tattha pacchimabhavikānaṃ vedanākkhandhopīti āha ‘‘etena sanniṭṭhānena saṅgahitattā’’ti. Tenāha ‘‘tesaṃ…pe… āhā’’ti. Tattha tesanti pacchimabhavikānaṃ. Tatthāti arūpabhave. Itarānuppattibhāvañcāti itarassa vedanākkhandhassa anuppajjanasabbhāvampi. Sappaṭisandhikānampi suddhāvāsānaṃ khandhabhedassa parinibbānapariyāyo oḷārikadosappahānato kilesūpasamasāmaññena vuttoti veditabbaṃ.
саб̣б̣зсан̃хи д̇зсанд̇и д̇ам̣д̇ам̣бхуумияам̣ тид̇аанам̣ саб̣б̣зсам̣ суд̣̇д̇хааваасаанам̣. яат̇аа банаад̇иаад̣̇инаа вуд̇д̇амзвад̇т̇ам̣ баагадад̇арам̣ гарод̇и. ананд̇аа логад̇хаад̇уяод̇и ид̣̇ам̣ огаасасса барижчзд̣̇аабхаавам̣язва д̣̇ассзд̇ум̣ вуд̇д̇ам̣. буг̇г̇алавасзна самаанаад̇хаарад̇ааяа самаанагаалад̇д̇зна асамбхаванд̇о огаасавасзна бана самбхаванд̇о сам̣гин̣н̣аа вияа хонд̇ийд̇и ааха ‘‘сам̣гин̣н̣ад̇аа ход̇ий’’д̇и.
Sabbesañhi tesanti taṃtaṃbhūmiyaṃ ṭhitānaṃ sabbesaṃ suddhāvāsānaṃ. Yathā panātiādinā vuttamevatthaṃ pākaṭataraṃ karoti. Anantā lokadhātuyoti idaṃ okāsassa paricchedābhāvaṃyeva dassetuṃ vuttaṃ. Puggalavasena samānādhāratāya samānakālattena asambhavanto okāsavasena pana sambhavanto saṃkiṇṇā viya hontīti āha ‘‘saṃkiṇṇatā hotī’’ti.
бавад̇д̇иваараван̣н̣анаа нидтид̇аа.
Pavattivāravaṇṇanā niṭṭhitā.
3. барин̃н̃ааваараван̣н̣анаа
3. Pariññāvāravaṇṇanā
206-208. д̇ассаабийд̇и буг̇г̇алогаасаваарассаби. огаасз буг̇г̇алассзваад̇и яат̇ааг̇ахид̇з огаасз яо буг̇г̇ало, д̇ассзва огаасависидтабуг̇г̇алассзваад̇и ад̇т̇о. яат̇аа бана буг̇г̇алаваарз лаб̣бхамаанз буг̇г̇алогаасаваароби лаб̣бхад̇и, звам̣ огаасаваароби лаб̣бхзяяаад̇и жод̣̇анам̣ санд̇хааяааха ‘‘огаасаваароби жаа’’д̇и. д̇асмаад̇и яасмаа вужжамааноби огаасо буг̇г̇аласса висзсабхаавзнзва вужжзяяа, на висум̣, д̇асмаа.
206-208. Tassāpīti puggalokāsavārassapi. Okāse puggalassevāti yathāgahite okāse yo puggalo, tasseva okāsavisiṭṭhapuggalassevāti attho. Yathā pana puggalavāre labbhamāne puggalokāsavāropi labbhati, evaṃ okāsavāropi labbheyyāti codanaṃ sandhāyāha ‘‘okāsavāropi cā’’ti. Tasmāti yasmā vuccamānopi okāso puggalassa visesabhāveneva vucceyya, na visuṃ, tasmā.
ан̃н̃ат̇аад̇и бавад̇д̇иваарз вияа аад̣̇аананигкзбабарижчиннам̣ гаммаж̇асанд̇аанам̣ згад̇д̇зна г̇ахзд̇ваа д̇асса уббаад̣̇анирод̇хавасзна барин̃н̃ааважанз. ‘‘яо руубагканд̇хам̣ бариж̇аанаад̇ий’’д̇и саннидтаанабад̣̇асан̇г̇ахид̇ад̇т̇аабхаавад̣̇ассанамукзна ид̇арассаби абхаавам̣ д̣̇ассзд̇ум̣ ‘‘рубагканд̇хабариж̇аананасса абхааваа’’д̇и вуд̇д̇ам̣. ‘‘ааманд̇аа’’д̇и жа гад̇ам̣, д̇асмаа бавад̇д̇з жид̇д̇агкан̣авасзнзвзд̇т̇а д̇аяо ад̣̇д̇хо лаб̣бханд̇ийд̇и ад̇т̇о. ‘‘аг̇г̇амаг̇г̇асаман̇г̇ин̃жа араханд̇ан̃жаа’’д̇и д̣̇виннам̣ бад̣̇аанам̣ ‘‘руубагканд̇хан̃жа на бариж̇аананд̇и взд̣̇анаагканд̇хан̃жа на бариж̇аанид̇т̇аа’’д̇и д̣̇вийхи бад̣̇зхи яат̇ааггамам̣ самб̣анд̇хо. ‘‘табзд̇ваа авасзсаа буг̇г̇алаа’’д̇и бана бажжзгам̣ яож̇зд̇аб̣б̣ам̣. аг̇г̇амаг̇г̇а…бз… над̇т̇ийд̇и иминаа арахад̇д̇амаг̇г̇ан̃аан̣ассзва барин̃н̃аамад̇т̇агаббад̇д̇ияаа барин̃н̃аагижжам̣ саад̇исаяам̣, д̇ад̣̇абхааваа на ид̇арзсанд̇и д̣̇ассзд̇и. яад̇о д̇ассзва важ̇ируубамад̇аа вуд̇д̇аа, сзсаанан̃жа виж̇ж̇уубамад̇аа. д̇знаад̇и д̇зна яат̇аавуд̇д̇зна важанзна. д̇ад̣̇авасзсасаб̣б̣абуг̇г̇алзд̇и д̇ад̇о аг̇г̇амаг̇г̇асаман̇г̇ид̇о авасзсасаб̣б̣абуг̇г̇алз. имам̣ бана яат̇аавуд̇д̇ад̣̇осам̣ барихаранд̇аа ‘‘бут̇уж̇ж̇анаад̣̇аяо санд̇хааяаа’’д̇и вад̣̇анд̇и.
Aññathāti pavattivāre viya ādānanikkhepaparicchinnaṃ kammajasantānaṃ ekattena gahetvā tassa uppādanirodhavasena pariññāvacane. ‘‘Yo rūpakkhandhaṃ parijānātī’’ti sanniṭṭhānapadasaṅgahitatthābhāvadassanamukhena itarassapi abhāvaṃ dassetuṃ ‘‘rupakkhandhaparijānanassa abhāvā’’ti vuttaṃ. ‘‘Āmantā’’ti ca kataṃ, tasmā pavatte cittakkhaṇavasenevettha tayo addho labbhantīti attho. ‘‘Aggamaggasamaṅgiñca arahantañcā’’ti dvinnaṃ padānaṃ ‘‘rūpakkhandhañca na parijānanti vedanākkhandhañca na parijānitthā’’ti dvīhi padehi yathākkamaṃ sambandho. ‘‘Ṭhapetvā avasesā puggalā’’ti pana paccekaṃ yojetabbaṃ. Aggamagga…pe… natthīti iminā arahattamaggañāṇasseva pariññāmatthakappattiyā pariññākiccaṃ sātisayaṃ, tadabhāvā na itaresanti dasseti. Yato tasseva vajirūpamatā vuttā, sesānañca vijjūpamatā. Tenāti tena yathāvuttena vacanena. Tadavasesasabbapuggaleti tato aggamaggasamaṅgito avasesasabbapuggale. Imaṃ pana yathāvuttadosaṃ pariharantā ‘‘puthujjanādayo sandhāyā’’ti vadanti.
барин̃н̃ааваараван̣н̣анаа нидтид̇аа.
Pariññāvāravaṇṇanā niṭṭhitā.
канд̇хаяамагаван̣н̣анаа нидтид̇аа.
Khandhayamakavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / яамагабаал̣и • Yamakapāḷi / 2. канд̇хаяамагам̣ • 2. Khandhayamakaṃ
адтагат̇аа • Aṭṭhakathā / абхид̇хаммабидага (адтагат̇аа) • Abhidhammapiṭaka (aṭṭhakathā) / бан̃жабагаран̣а-адтагат̇аа • Pañcapakaraṇa-aṭṭhakathā / 2. канд̇хаяамагам̣ • 2. Khandhayamakaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / бан̃жабагаран̣а-мууладийгаа • Pañcapakaraṇa-mūlaṭīkā / 2. канд̇хаяамагам̣ • 2. Khandhayamakaṃ
