| Library / Tipiṭaka / திபிடக • Tipiṭaka / கதா²வத்து²பாளி • Kathāvatthupāḷi |
22. பா³வீஸதிமவக்³கோ³
22. Bāvīsatimavaggo
(217) 10. க²ணிககதா²
(217) 10. Khaṇikakathā
906. ஏகசித்தக்க²ணிகா ஸப்³பே³ த⁴ம்மாதி? ஆமந்தா. சித்தே மஹாபத²வீ ஸண்டா²தி, மஹாஸமுத்³தோ³ ஸண்டா²தி, ஸினேருபப்³ப³தராஜா ஸண்டா²தி, ஆபோ ஸண்டா²தி, தேஜோ ஸண்டா²தி, வாயோ ஸண்டா²தி, திணகட்ட²வனப்பதயோ ஸண்ட²ஹந்தீதி? ந ஹேவங் வத்தப்³பே³…பே॰….
906. Ekacittakkhaṇikā sabbe dhammāti? Āmantā. Citte mahāpathavī saṇṭhāti, mahāsamuddo saṇṭhāti, sinerupabbatarājā saṇṭhāti, āpo saṇṭhāti, tejo saṇṭhāti, vāyo saṇṭhāti, tiṇakaṭṭhavanappatayo saṇṭhahantīti? Na hevaṃ vattabbe…pe….
ஏகசித்தக்க²ணிகா ஸப்³பே³ த⁴ம்மாதி? ஆமந்தா. சக்கா²யதனங் சக்கு²விஞ்ஞாணேன ஸஹஜாதந்தி? ந ஹேவங் வத்தப்³பே³…பே॰… சக்கா²யதனங் சக்கு²விஞ்ஞாணேன ஸஹஜாதந்தி? ஆமந்தா. நனு ஆயஸ்மா ஸாரிபுத்தோ ஏதத³வோச – ‘‘அஜ்ஜ²த்திகஞ்சேவ, ஆவுஸோ, சக்கு²ங் அபரிபி⁴ன்னங் ஹோதி, பா³ஹிரா ச ரூபா ந ஆபாத²ங் ஆக³ச்ச²ந்தி, நோ ச தஜ்ஜோ ஸமன்னாஹாரோ ஹோதி, நேவ தாவ தஜ்ஜஸ்ஸ விஞ்ஞாணபா⁴க³ஸ்ஸ 1 பாதுபா⁴வோ ஹோதி. அஜ்ஜ²த்திகஞ்சேவ, ஆவுஸோ, சக்கு²ங் அபரிபி⁴ன்னங் ஹோதி, பா³ஹிரா ச ரூபா ஆபாத²ங் ஆக³ச்ச²ந்தி, நோ ச தஜ்ஜோ ஸமன்னாஹாரோ ஹோதி, நேவ தாவ தஜ்ஜஸ்ஸ விஞ்ஞாணபா⁴க³ஸ்ஸ பாதுபா⁴வோ ஹோதி. யதோ ச கோ², ஆவுஸோ, அஜ்ஜ²த்திகஞ்சேவ சக்கு²ங் அபரிபி⁴ன்னங் ஹோதி , பா³ஹிரா ச ரூபா ஆபாத²ங் ஆக³ச்ச²ந்தி, தஜ்ஜோ ச ஸமன்னாஹாரோ ஹோதி, ஏவங் தஜ்ஜஸ்ஸ விஞ்ஞாணபா⁴க³ஸ்ஸ பாதுபா⁴வோ ஹோதீ’’தி 2! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ங் – ‘‘சக்கா²யதனங் சக்கு²விஞ்ஞாணேன ஸஹஜாத’’ந்தி.
Ekacittakkhaṇikā sabbe dhammāti? Āmantā. Cakkhāyatanaṃ cakkhuviññāṇena sahajātanti? Na hevaṃ vattabbe…pe… cakkhāyatanaṃ cakkhuviññāṇena sahajātanti? Āmantā. Nanu āyasmā sāriputto etadavoca – ‘‘ajjhattikañceva, āvuso, cakkhuṃ aparibhinnaṃ hoti, bāhirā ca rūpā na āpāthaṃ āgacchanti, no ca tajjo samannāhāro hoti, neva tāva tajjassa viññāṇabhāgassa 3 pātubhāvo hoti. Ajjhattikañceva, āvuso, cakkhuṃ aparibhinnaṃ hoti, bāhirā ca rūpā āpāthaṃ āgacchanti, no ca tajjo samannāhāro hoti, neva tāva tajjassa viññāṇabhāgassa pātubhāvo hoti. Yato ca kho, āvuso, ajjhattikañceva cakkhuṃ aparibhinnaṃ hoti , bāhirā ca rūpā āpāthaṃ āgacchanti, tajjo ca samannāhāro hoti, evaṃ tajjassa viññāṇabhāgassa pātubhāvo hotī’’ti 4! Attheva suttantoti? Āmantā. Tena hi na vattabbaṃ – ‘‘cakkhāyatanaṃ cakkhuviññāṇena sahajāta’’nti.
ஸோதாயதனங்…பே॰… கா⁴னாயதனங்…பே॰… ஜிவ்ஹாயதனங்…பே॰… காயாயதனங் காயவிஞ்ஞாணேன ஸஹஜாதந்தி? ந ஹேவங் வத்தப்³பே³…பே॰… காயாயதனங் காயவிஞ்ஞாணேன ஸஹஜாதந்தி? ஆமந்தா. நனு ஆயஸ்மா ஸாரிபுத்தோ ஏதத³வோச – ‘‘அஜ்ஜ²த்திகோ சேவ, ஆவுஸோ, காயோ அபரிபி⁴ன்னோ ஹோதி, பா³ஹிரா ச பொ²ட்ட²ப்³பா³ ந ஆபாத²ங் ஆக³ச்ச²ந்தி, நோ ச…பே॰… அஜ்ஜ²த்திகோ சேவ, ஆவுஸோ, காயோ அபரிபி⁴ன்னோ ஹோதி, பா³ஹிரா ச பொ²ட்ட²ப்³பா³ ஆபாத²ங் ஆக³ச்ச²ந்தி, நோ ச…பே॰… யதோ ச கோ², ஆவுஸோ, அஜ்ஜ²த்திகோ சேவ காயோ அபரிபி⁴ன்னோ ஹோதி, பா³ஹிரா ச பொ²ட்ட²ப்³பா³ ஆபாத²ங் ஆக³ச்ச²ந்தி, தஜ்ஜோ ச ஸமன்னாஹாரோ ஹோதி, ஏவங் தஜ்ஜஸ்ஸ விஞ்ஞாணபா⁴க³ஸ்ஸ பாதுபா⁴வோ ஹோதீ’’தி 5! அத்தே²வ ஸுத்தந்தோதி? ஆமந்தா. தேன ஹி ந வத்தப்³ப³ங் – ‘‘காயாயதனங் காயவிஞ்ஞாணேன ஸஹஜாத’’ந்தி.
Sotāyatanaṃ…pe… ghānāyatanaṃ…pe… jivhāyatanaṃ…pe… kāyāyatanaṃ kāyaviññāṇena sahajātanti? Na hevaṃ vattabbe…pe… kāyāyatanaṃ kāyaviññāṇena sahajātanti? Āmantā. Nanu āyasmā sāriputto etadavoca – ‘‘ajjhattiko ceva, āvuso, kāyo aparibhinno hoti, bāhirā ca phoṭṭhabbā na āpāthaṃ āgacchanti, no ca…pe… ajjhattiko ceva, āvuso, kāyo aparibhinno hoti, bāhirā ca phoṭṭhabbā āpāthaṃ āgacchanti, no ca…pe… yato ca kho, āvuso, ajjhattiko ceva kāyo aparibhinno hoti, bāhirā ca phoṭṭhabbā āpāthaṃ āgacchanti, tajjo ca samannāhāro hoti, evaṃ tajjassa viññāṇabhāgassa pātubhāvo hotī’’ti 6! Attheva suttantoti? Āmantā. Tena hi na vattabbaṃ – ‘‘kāyāyatanaṃ kāyaviññāṇena sahajāta’’nti.
907. ந வத்தப்³ப³ங் – ‘‘ஏகசித்தக்க²ணிகா ஸப்³பே³ த⁴ம்மா’’தி? ஆமந்தா. ஸப்³பே³ த⁴ம்மா நிச்சா து⁴வா ஸஸ்ஸதா அவிபரிணாமத⁴ம்மாதி? ந ஹேவங் வத்தப்³பே³. தேன ஹி ஏகசித்தக்க²ணிகா ஸப்³பே³ த⁴ம்மாதி.
907. Na vattabbaṃ – ‘‘ekacittakkhaṇikā sabbe dhammā’’ti? Āmantā. Sabbe dhammā niccā dhuvā sassatā avipariṇāmadhammāti? Na hevaṃ vattabbe. Tena hi ekacittakkhaṇikā sabbe dhammāti.
க²ணிககதா² நிட்டி²தா.
Khaṇikakathā niṭṭhitā.
பா³வீஸதிமவக்³கோ³.
Bāvīsatimavaggo.
தஸ்ஸுத்³தா³னங் –
Tassuddānaṃ –
அத்தி² கிஞ்சி ஸங்யோஜனங் அப்பஹாய பரினிப்³பா³னங், அரஹா குஸலசித்தோ பரினிப்³பா³யதி, அரஹா ஆனேஞ்ஜே டி²தோ பரினிப்³பா³யதி, அத்தி² க³ப்³ப⁴ஸெய்யாய த⁴ம்மாபி⁴ஸமயோ, அத்தி² க³ப்³ப⁴ஸெய்யாய அரஹத்தப்பத்தி, அத்தி² ஸுபினக³தஸ்ஸ த⁴ம்மாபி⁴ஸமயோ, அத்தி² ஸுபினக³தஸ்ஸ அரஹத்தப்பத்தி, ஸப்³ப³ங் ஸுபினக³தஸ்ஸ சித்தங் அப்³யாகதங், நத்தி² காசி ஆஸேவனபச்சயதா, ஏகசித்தக்க²ணிகா ஸப்³பே³ த⁴ம்மாதி.
Atthi kiñci saṃyojanaṃ appahāya parinibbānaṃ, arahā kusalacitto parinibbāyati, arahā āneñje ṭhito parinibbāyati, atthi gabbhaseyyāya dhammābhisamayo, atthi gabbhaseyyāya arahattappatti, atthi supinagatassa dhammābhisamayo, atthi supinagatassa arahattappatti, sabbaṃ supinagatassa cittaṃ abyākataṃ, natthi kāci āsevanapaccayatā, ekacittakkhaṇikā sabbe dhammāti.
Footnotes:
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 10. க²ணிககதா²வண்ணனா • 10. Khaṇikakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 10. க²ணிககதா²வண்ணனா • 10. Khaṇikakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 10. க²ணிககதா²வண்ணனா • 10. Khaṇikakathāvaṇṇanā
