| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၂၂. ဗာဝီသတိမဝဂ္ဂော
22. Bāvīsatimavaggo
(၂၁၇) ၁၀. ခဏိကကထာ
(217) 10. Khaṇikakathā
၉၀၆. ဧကစိတ္တက္ခဏိကာ သဗ္ဗေ ဓမ္မာတိ? အာမန္တာ။ စိတ္တေ မဟာပထဝီ သဏ္ဌာတိ, မဟာသမုဒ္ဒော သဏ္ဌာတိ, သိနေရုပဗ္ဗတရာဇာ သဏ္ဌာတိ, အာပော သဏ္ဌာတိ, တေဇော သဏ္ဌာတိ, ဝာယော သဏ္ဌာတိ, တိဏကဋ္ဌဝနပ္ပတယော သဏ္ဌဟန္တီတိ? န ဟေဝံ ဝတ္တဗ္ဗေ။ပေ.။။
906. Ekacittakkhaṇikā sabbe dhammāti? Āmantā. Citte mahāpathavī saṇṭhāti, mahāsamuddo saṇṭhāti, sinerupabbatarājā saṇṭhāti, āpo saṇṭhāti, tejo saṇṭhāti, vāyo saṇṭhāti, tiṇakaṭṭhavanappatayo saṇṭhahantīti? Na hevaṃ vattabbe…pe….
ဧကစိတ္တက္ခဏိကာ သဗ္ဗေ ဓမ္မာတိ? အာမန္တာ။ စက္ခာယတနံ စက္ခုဝိညာဏေန သဟဇာတန္တိ? န ဟေဝံ ဝတ္တဗ္ဗေ။ပေ.။ စက္ခာယတနံ စက္ခုဝိညာဏေန သဟဇာတန္တိ? အာမန္တာ။ နနု အာယသ္မာ သာရိပုတ္တော ဧတဒဝောစ – ‘‘အဇ္ဈတ္တိကဉ္စေဝ, အာဝုသော, စက္ခုံ အပရိဘိန္နံ ဟောတိ, ဗာဟိရာ စ ရူပာ န အာပာထံ အာဂစ္ဆန္တိ, နော စ တဇ္ဇော သမန္နာဟာရော ဟောတိ, နေဝ တာဝ တဇ္ဇသ္သ ဝိညာဏဘာဂသ္သ 1 ပာတုဘာဝော ဟောတိ။ အဇ္ဈတ္တိကဉ္စေဝ, အာဝုသော, စက္ခုံ အပရိဘိန္နံ ဟောတိ, ဗာဟိရာ စ ရူပာ အာပာထံ အာဂစ္ဆန္တိ, နော စ တဇ္ဇော သမန္နာဟာရော ဟောတိ, နေဝ တာဝ တဇ္ဇသ္သ ဝိညာဏဘာဂသ္သ ပာတုဘာဝော ဟောတိ။ ယတော စ ခော, အာဝုသော, အဇ္ဈတ္တိကဉ္စေဝ စက္ခုံ အပရိဘိန္နံ ဟောတိ , ဗာဟိရာ စ ရူပာ အာပာထံ အာဂစ္ဆန္တိ, တဇ္ဇော စ သမန္နာဟာရော ဟောတိ, ဧဝံ တဇ္ဇသ္သ ဝိညာဏဘာဂသ္သ ပာတုဘာဝော ဟောတီ’’တိ 2! အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘စက္ခာယတနံ စက္ခုဝိညာဏေန သဟဇာတ’’န္တိ။
Ekacittakkhaṇikā sabbe dhammāti? Āmantā. Cakkhāyatanaṃ cakkhuviññāṇena sahajātanti? Na hevaṃ vattabbe…pe… cakkhāyatanaṃ cakkhuviññāṇena sahajātanti? Āmantā. Nanu āyasmā sāriputto etadavoca – ‘‘ajjhattikañceva, āvuso, cakkhuṃ aparibhinnaṃ hoti, bāhirā ca rūpā na āpāthaṃ āgacchanti, no ca tajjo samannāhāro hoti, neva tāva tajjassa viññāṇabhāgassa 3 pātubhāvo hoti. Ajjhattikañceva, āvuso, cakkhuṃ aparibhinnaṃ hoti, bāhirā ca rūpā āpāthaṃ āgacchanti, no ca tajjo samannāhāro hoti, neva tāva tajjassa viññāṇabhāgassa pātubhāvo hoti. Yato ca kho, āvuso, ajjhattikañceva cakkhuṃ aparibhinnaṃ hoti , bāhirā ca rūpā āpāthaṃ āgacchanti, tajjo ca samannāhāro hoti, evaṃ tajjassa viññāṇabhāgassa pātubhāvo hotī’’ti 4! Attheva suttantoti? Āmantā. Tena hi na vattabbaṃ – ‘‘cakkhāyatanaṃ cakkhuviññāṇena sahajāta’’nti.
သောတာယတနံ။ပေ.။ ဃာနာယတနံ။ပေ.။ ဇိဝ္ဟာယတနံ။ပေ.။ ကာယာယတနံ ကာယဝိညာဏေန သဟဇာတန္တိ? န ဟေဝံ ဝတ္တဗ္ဗေ။ပေ.။ ကာယာယတနံ ကာယဝိညာဏေန သဟဇာတန္တိ? အာမန္တာ။ နနု အာယသ္မာ သာရိပုတ္တော ဧတဒဝောစ – ‘‘အဇ္ဈတ္တိကော စေဝ, အာဝုသော, ကာယော အပရိဘိန္နော ဟောတိ, ဗာဟိရာ စ ဖောဋ္ဌဗ္ဗာ န အာပာထံ အာဂစ္ဆန္တိ, နော စ။ပေ.။ အဇ္ဈတ္တိကော စေဝ, အာဝုသော, ကာယော အပရိဘိန္နော ဟောတိ, ဗာဟိရာ စ ဖောဋ္ဌဗ္ဗာ အာပာထံ အာဂစ္ဆန္တိ, နော စ။ပေ.။ ယတော စ ခော, အာဝုသော, အဇ္ဈတ္တိကော စေဝ ကာယော အပရိဘိန္နော ဟောတိ, ဗာဟိရာ စ ဖောဋ္ဌဗ္ဗာ အာပာထံ အာဂစ္ဆန္တိ, တဇ္ဇော စ သမန္နာဟာရော ဟောတိ, ဧဝံ တဇ္ဇသ္သ ဝိညာဏဘာဂသ္သ ပာတုဘာဝော ဟောတီ’’တိ 5! အတ္ထေဝ သုတ္တန္တောတိ? အာမန္တာ။ တေန ဟိ န ဝတ္တဗ္ဗံ – ‘‘ကာယာယတနံ ကာယဝိညာဏေန သဟဇာတ’’န္တိ။
Sotāyatanaṃ…pe… ghānāyatanaṃ…pe… jivhāyatanaṃ…pe… kāyāyatanaṃ kāyaviññāṇena sahajātanti? Na hevaṃ vattabbe…pe… kāyāyatanaṃ kāyaviññāṇena sahajātanti? Āmantā. Nanu āyasmā sāriputto etadavoca – ‘‘ajjhattiko ceva, āvuso, kāyo aparibhinno hoti, bāhirā ca phoṭṭhabbā na āpāthaṃ āgacchanti, no ca…pe… ajjhattiko ceva, āvuso, kāyo aparibhinno hoti, bāhirā ca phoṭṭhabbā āpāthaṃ āgacchanti, no ca…pe… yato ca kho, āvuso, ajjhattiko ceva kāyo aparibhinno hoti, bāhirā ca phoṭṭhabbā āpāthaṃ āgacchanti, tajjo ca samannāhāro hoti, evaṃ tajjassa viññāṇabhāgassa pātubhāvo hotī’’ti 6! Attheva suttantoti? Āmantā. Tena hi na vattabbaṃ – ‘‘kāyāyatanaṃ kāyaviññāṇena sahajāta’’nti.
၉၀၇. န ဝတ္တဗ္ဗံ – ‘‘ဧကစိတ္တက္ခဏိကာ သဗ္ဗေ ဓမ္မာ’’တိ? အာမန္တာ။ သဗ္ဗေ ဓမ္မာ နိစ္စာ ဓုဝာ သသ္သတာ အဝိပရိဏာမဓမ္မာတိ? န ဟေဝံ ဝတ္တဗ္ဗေ။ တေန ဟိ ဧကစိတ္တက္ခဏိကာ သဗ္ဗေ ဓမ္မာတိ။
907. Na vattabbaṃ – ‘‘ekacittakkhaṇikā sabbe dhammā’’ti? Āmantā. Sabbe dhammā niccā dhuvā sassatā avipariṇāmadhammāti? Na hevaṃ vattabbe. Tena hi ekacittakkhaṇikā sabbe dhammāti.
ခဏိကကထာ နိဋ္ဌိတာ။
Khaṇikakathā niṭṭhitā.
ဗာဝီသတိမဝဂ္ဂော။
Bāvīsatimavaggo.
တသ္သုဒ္ဒာနံ –
Tassuddānaṃ –
အတ္ထိ ကိဉ္စိ သံယောဇနံ အပ္ပဟာယ ပရိနိဗ္ဗာနံ, အရဟာ ကုသလစိတ္တော ပရိနိဗ္ဗာယတိ, အရဟာ အာနေဉ္ဇေ ဌိတော ပရိနိဗ္ဗာယတိ, အတ္ထိ ဂဗ္ဘသေယ္ယာယ ဓမ္မာဘိသမယော, အတ္ထိ ဂဗ္ဘသေယ္ယာယ အရဟတ္တပ္ပတ္တိ, အတ္ထိ သုပိနဂတသ္သ ဓမ္မာဘိသမယော, အတ္ထိ သုပိနဂတသ္သ အရဟတ္တပ္ပတ္တိ, သဗ္ဗံ သုပိနဂတသ္သ စိတ္တံ အဗ္ယာကတံ, နတ္ထိ ကာစိ အာသေဝနပစ္စယတာ, ဧကစိတ္တက္ခဏိကာ သဗ္ဗေ ဓမ္မာတိ။
Atthi kiñci saṃyojanaṃ appahāya parinibbānaṃ, arahā kusalacitto parinibbāyati, arahā āneñje ṭhito parinibbāyati, atthi gabbhaseyyāya dhammābhisamayo, atthi gabbhaseyyāya arahattappatti, atthi supinagatassa dhammābhisamayo, atthi supinagatassa arahattappatti, sabbaṃ supinagatassa cittaṃ abyākataṃ, natthi kāci āsevanapaccayatā, ekacittakkhaṇikā sabbe dhammāti.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၁၀. ခဏိကကထာဝဏ္ဏနာ • 10. Khaṇikakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁၀. ခဏိကကထာဝဏ္ဏနာ • 10. Khaṇikakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁၀. ခဏိကကထာဝဏ္ဏနာ • 10. Khaṇikakathāvaṇṇanā
