| Library / Tipiṭaka / തിപിടക • Tipiṭaka / കഥാവത്ഥുപാളി • Kathāvatthupāḷi |
൨൨. ബാവീസതിമവഗ്ഗോ
22. Bāvīsatimavaggo
(൨൧൭) ൧൦. ഖണികകഥാ
(217) 10. Khaṇikakathā
൯൦൬. ഏകചിത്തക്ഖണികാ സബ്ബേ ധമ്മാതി? ആമന്താ. ചിത്തേ മഹാപഥവീ സണ്ഠാതി, മഹാസമുദ്ദോ സണ്ഠാതി, സിനേരുപബ്ബതരാജാ സണ്ഠാതി, ആപോ സണ്ഠാതി, തേജോ സണ്ഠാതി, വായോ സണ്ഠാതി, തിണകട്ഠവനപ്പതയോ സണ്ഠഹന്തീതി? ന ഹേവം വത്തബ്ബേ…പേ॰….
906. Ekacittakkhaṇikā sabbe dhammāti? Āmantā. Citte mahāpathavī saṇṭhāti, mahāsamuddo saṇṭhāti, sinerupabbatarājā saṇṭhāti, āpo saṇṭhāti, tejo saṇṭhāti, vāyo saṇṭhāti, tiṇakaṭṭhavanappatayo saṇṭhahantīti? Na hevaṃ vattabbe…pe….
ഏകചിത്തക്ഖണികാ സബ്ബേ ധമ്മാതി? ആമന്താ. ചക്ഖായതനം ചക്ഖുവിഞ്ഞാണേന സഹജാതന്തി? ന ഹേവം വത്തബ്ബേ…പേ॰… ചക്ഖായതനം ചക്ഖുവിഞ്ഞാണേന സഹജാതന്തി? ആമന്താ. നനു ആയസ്മാ സാരിപുത്തോ ഏതദവോച – ‘‘അജ്ഝത്തികഞ്ചേവ, ആവുസോ, ചക്ഖും അപരിഭിന്നം ഹോതി, ബാഹിരാ ച രൂപാ ന ആപാഥം ആഗച്ഛന്തി, നോ ച തജ്ജോ സമന്നാഹാരോ ഹോതി, നേവ താവ തജ്ജസ്സ വിഞ്ഞാണഭാഗസ്സ 1 പാതുഭാവോ ഹോതി. അജ്ഝത്തികഞ്ചേവ, ആവുസോ, ചക്ഖും അപരിഭിന്നം ഹോതി, ബാഹിരാ ച രൂപാ ആപാഥം ആഗച്ഛന്തി, നോ ച തജ്ജോ സമന്നാഹാരോ ഹോതി, നേവ താവ തജ്ജസ്സ വിഞ്ഞാണഭാഗസ്സ പാതുഭാവോ ഹോതി. യതോ ച ഖോ, ആവുസോ, അജ്ഝത്തികഞ്ചേവ ചക്ഖും അപരിഭിന്നം ഹോതി , ബാഹിരാ ച രൂപാ ആപാഥം ആഗച്ഛന്തി, തജ്ജോ ച സമന്നാഹാരോ ഹോതി, ഏവം തജ്ജസ്സ വിഞ്ഞാണഭാഗസ്സ പാതുഭാവോ ഹോതീ’’തി 2! അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘ചക്ഖായതനം ചക്ഖുവിഞ്ഞാണേന സഹജാത’’ന്തി.
Ekacittakkhaṇikā sabbe dhammāti? Āmantā. Cakkhāyatanaṃ cakkhuviññāṇena sahajātanti? Na hevaṃ vattabbe…pe… cakkhāyatanaṃ cakkhuviññāṇena sahajātanti? Āmantā. Nanu āyasmā sāriputto etadavoca – ‘‘ajjhattikañceva, āvuso, cakkhuṃ aparibhinnaṃ hoti, bāhirā ca rūpā na āpāthaṃ āgacchanti, no ca tajjo samannāhāro hoti, neva tāva tajjassa viññāṇabhāgassa 3 pātubhāvo hoti. Ajjhattikañceva, āvuso, cakkhuṃ aparibhinnaṃ hoti, bāhirā ca rūpā āpāthaṃ āgacchanti, no ca tajjo samannāhāro hoti, neva tāva tajjassa viññāṇabhāgassa pātubhāvo hoti. Yato ca kho, āvuso, ajjhattikañceva cakkhuṃ aparibhinnaṃ hoti , bāhirā ca rūpā āpāthaṃ āgacchanti, tajjo ca samannāhāro hoti, evaṃ tajjassa viññāṇabhāgassa pātubhāvo hotī’’ti 4! Attheva suttantoti? Āmantā. Tena hi na vattabbaṃ – ‘‘cakkhāyatanaṃ cakkhuviññāṇena sahajāta’’nti.
സോതായതനം…പേ॰… ഘാനായതനം…പേ॰… ജിവ്ഹായതനം…പേ॰… കായായതനം കായവിഞ്ഞാണേന സഹജാതന്തി? ന ഹേവം വത്തബ്ബേ…പേ॰… കായായതനം കായവിഞ്ഞാണേന സഹജാതന്തി? ആമന്താ. നനു ആയസ്മാ സാരിപുത്തോ ഏതദവോച – ‘‘അജ്ഝത്തികോ ചേവ, ആവുസോ, കായോ അപരിഭിന്നോ ഹോതി, ബാഹിരാ ച ഫോട്ഠബ്ബാ ന ആപാഥം ആഗച്ഛന്തി, നോ ച…പേ॰… അജ്ഝത്തികോ ചേവ, ആവുസോ, കായോ അപരിഭിന്നോ ഹോതി, ബാഹിരാ ച ഫോട്ഠബ്ബാ ആപാഥം ആഗച്ഛന്തി, നോ ച…പേ॰… യതോ ച ഖോ, ആവുസോ, അജ്ഝത്തികോ ചേവ കായോ അപരിഭിന്നോ ഹോതി, ബാഹിരാ ച ഫോട്ഠബ്ബാ ആപാഥം ആഗച്ഛന്തി, തജ്ജോ ച സമന്നാഹാരോ ഹോതി, ഏവം തജ്ജസ്സ വിഞ്ഞാണഭാഗസ്സ പാതുഭാവോ ഹോതീ’’തി 5! അത്ഥേവ സുത്തന്തോതി? ആമന്താ. തേന ഹി ന വത്തബ്ബം – ‘‘കായായതനം കായവിഞ്ഞാണേന സഹജാത’’ന്തി.
Sotāyatanaṃ…pe… ghānāyatanaṃ…pe… jivhāyatanaṃ…pe… kāyāyatanaṃ kāyaviññāṇena sahajātanti? Na hevaṃ vattabbe…pe… kāyāyatanaṃ kāyaviññāṇena sahajātanti? Āmantā. Nanu āyasmā sāriputto etadavoca – ‘‘ajjhattiko ceva, āvuso, kāyo aparibhinno hoti, bāhirā ca phoṭṭhabbā na āpāthaṃ āgacchanti, no ca…pe… ajjhattiko ceva, āvuso, kāyo aparibhinno hoti, bāhirā ca phoṭṭhabbā āpāthaṃ āgacchanti, no ca…pe… yato ca kho, āvuso, ajjhattiko ceva kāyo aparibhinno hoti, bāhirā ca phoṭṭhabbā āpāthaṃ āgacchanti, tajjo ca samannāhāro hoti, evaṃ tajjassa viññāṇabhāgassa pātubhāvo hotī’’ti 6! Attheva suttantoti? Āmantā. Tena hi na vattabbaṃ – ‘‘kāyāyatanaṃ kāyaviññāṇena sahajāta’’nti.
൯൦൭. ന വത്തബ്ബം – ‘‘ഏകചിത്തക്ഖണികാ സബ്ബേ ധമ്മാ’’തി? ആമന്താ. സബ്ബേ ധമ്മാ നിച്ചാ ധുവാ സസ്സതാ അവിപരിണാമധമ്മാതി? ന ഹേവം വത്തബ്ബേ. തേന ഹി ഏകചിത്തക്ഖണികാ സബ്ബേ ധമ്മാതി.
907. Na vattabbaṃ – ‘‘ekacittakkhaṇikā sabbe dhammā’’ti? Āmantā. Sabbe dhammā niccā dhuvā sassatā avipariṇāmadhammāti? Na hevaṃ vattabbe. Tena hi ekacittakkhaṇikā sabbe dhammāti.
ഖണികകഥാ നിട്ഠിതാ.
Khaṇikakathā niṭṭhitā.
ബാവീസതിമവഗ്ഗോ.
Bāvīsatimavaggo.
തസ്സുദ്ദാനം –
Tassuddānaṃ –
അത്ഥി കിഞ്ചി സംയോജനം അപ്പഹായ പരിനിബ്ബാനം, അരഹാ കുസലചിത്തോ പരിനിബ്ബായതി, അരഹാ ആനേഞ്ജേ ഠിതോ പരിനിബ്ബായതി, അത്ഥി ഗബ്ഭസേയ്യായ ധമ്മാഭിസമയോ, അത്ഥി ഗബ്ഭസേയ്യായ അരഹത്തപ്പത്തി, അത്ഥി സുപിനഗതസ്സ ധമ്മാഭിസമയോ, അത്ഥി സുപിനഗതസ്സ അരഹത്തപ്പത്തി, സബ്ബം സുപിനഗതസ്സ ചിത്തം അബ്യാകതം, നത്ഥി കാചി ആസേവനപച്ചയതാ, ഏകചിത്തക്ഖണികാ സബ്ബേ ധമ്മാതി.
Atthi kiñci saṃyojanaṃ appahāya parinibbānaṃ, arahā kusalacitto parinibbāyati, arahā āneñje ṭhito parinibbāyati, atthi gabbhaseyyāya dhammābhisamayo, atthi gabbhaseyyāya arahattappatti, atthi supinagatassa dhammābhisamayo, atthi supinagatassa arahattappatti, sabbaṃ supinagatassa cittaṃ abyākataṃ, natthi kāci āsevanapaccayatā, ekacittakkhaṇikā sabbe dhammāti.
Footnotes:
Related texts:
അട്ഠകഥാ • Aṭṭhakathā / അഭിധമ്മപിടക (അട്ഠകഥാ) • Abhidhammapiṭaka (aṭṭhakathā) / പഞ്ചപകരണ-അട്ഠകഥാ • Pañcapakaraṇa-aṭṭhakathā / ൧൦. ഖണികകഥാവണ്ണനാ • 10. Khaṇikakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-മൂലടീകാ • Pañcapakaraṇa-mūlaṭīkā / ൧൦. ഖണികകഥാവണ്ണനാ • 10. Khaṇikakathāvaṇṇanā
ടീകാ • Tīkā / അഭിധമ്മപിടക (ടീകാ) • Abhidhammapiṭaka (ṭīkā) / പഞ്ചപകരണ-അനുടീകാ • Pañcapakaraṇa-anuṭīkā / ൧൦. ഖണികകഥാവണ്ണനാ • 10. Khaṇikakathāvaṇṇanā
