| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā |
၄၁-၄၂. ခန္တိဉာဏပရိယောဂာဟဏဉာဏနိဒ္ဒေသဝဏ္ဏနာ
41-42. Khantiñāṇapariyogāhaṇañāṇaniddesavaṇṇanā
၉၂-၉၃. ခန္တိဉာဏပရိယောဂာဟဏဉာဏနိဒ္ဒေသေသု ရူပံ အနိစ္စတော ဝိဒိတန္တိ အနိစ္စာနုပသ္သနာယ အနိစ္စန္တိ ဉာတံ။ ရူပံ ဒုက္ခတော ဝိဒိတန္တိ ဒုက္ခာနုပသ္သနာယ ဒုက္ခန္တိ ဉာတံ။ ရူပံ အနတ္တတော ဝိဒိတန္တိ အနတ္တာနုပသ္သနာယ အနတ္တာတိ ဉာတံ။ ယံ ယံ ဝိဒိတံ, တံ တံ ခမတီတိ ယံ ယံ ရူပံ အနိစ္စာဒိတော ဝိဒိတံ, တံ တံ ရူပံ အနိစ္စာဒိတော ခမတိ ရုစ္စတိ။ ‘‘ရူပံ အနိစ္စတော ဝိဒိတံ, ယံ ယံ ဝိဒိတံ, တံ တံ ခမတီ’’တိ ဝိသုံ ဝိသုဉ္စ ကတ္ဝာ ကေသုစိ ပောတ္ထကေသု လိခိတံ။ ‘‘ဝေဒနာ သညာ သင္ခာရာ အနိစ္စတော ဝိဒိတာ’’တိအာဒိနာ လိင္ဂဝစနာနိ ပရိဝတ္တေတ္ဝာ ယောဇေတဗ္ဗာနိ။ ဖုသတီတိ ဝိပသ္သနာဉာဏဖုသနေန ဖုသတိ ဖရတိ။ ပရိယောဂဟတီတိ ဝိပသ္သနာဉာဏေန ပဝိသတိ။ ပရိယောဂာဟတီတိပိ ပာဌော။
92-93. Khantiñāṇapariyogāhaṇañāṇaniddesesu rūpaṃ aniccato viditanti aniccānupassanāya aniccanti ñātaṃ. Rūpaṃ dukkhato viditanti dukkhānupassanāya dukkhanti ñātaṃ. Rūpaṃ anattato viditanti anattānupassanāya anattāti ñātaṃ. Yaṃ yaṃ viditaṃ, taṃ taṃ khamatīti yaṃ yaṃ rūpaṃ aniccādito viditaṃ, taṃ taṃ rūpaṃ aniccādito khamati ruccati. ‘‘Rūpaṃ aniccato viditaṃ, yaṃ yaṃ viditaṃ, taṃ taṃ khamatī’’ti visuṃ visuñca katvā kesuci potthakesu likhitaṃ. ‘‘Vedanā saññā saṅkhārā aniccato viditā’’tiādinā liṅgavacanāni parivattetvā yojetabbāni. Phusatīti vipassanāñāṇaphusanena phusati pharati. Pariyogahatīti vipassanāñāṇena pavisati. Pariyogāhatītipi pāṭho.
ခန္တိဉာဏပရိယောဂာဟဏဉာဏနိဒ္ဒေသဝဏ္ဏနာ နိဋ္ဌိတာ။
Khantiñāṇapariyogāhaṇañāṇaniddesavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / ခုဒ္ဒကနိကာယ • Khuddakanikāya / ပဋိသမ္ဘိဒာမဂ္ဂပာဠိ • Paṭisambhidāmaggapāḷi
၄၁. ခန္တိဉာဏနိဒ္ဒေသော • 41. Khantiñāṇaniddeso
၄၂. ပရိယောဂာဟဏဉာဏနိဒ္ဒေသော • 42. Pariyogāhaṇañāṇaniddeso
