[15] 5. க²ராதி³யஜாதகவண்ணனா

அட்ட²க்கு²ரங் க²ராதி³யேதி இத³ங் ஸத்தா² ஜேதவனே விஹரந்தோ அஞ்ஞதரங் து³ப்³ப³சபி⁴க்கு²ங் ஆரப்³ப⁴ கதே²ஸி. ஸோ கிர பி⁴க்கு² து³ப்³ப³சோ ஓவாத³ங் ந க³ண்ஹாதி. அத² நங் ஸத்தா² புச்சி² ‘‘ஸச்சங் கிர த்வங் பி⁴க்கு² து³ப்³ப³சோ ஓவாத³ங் ந க³ண்ஹாஸீ’’தி? ‘‘ஸச்சங் ப⁴க³வா’’தி. ஸத்தா² ‘‘புப்³பே³பி த்வங் து³ப்³ப³சதாய பண்டி³தானங் ஓவாத³ங் அக்³க³ஹெத்வா பாஸேன ப³த்³தோ⁴ ஜீவிதக்க²யங் பத்தோ’’தி வத்வா அதீதங் ஆஹரி.

அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ மிகோ³ ஹுத்வா மிக³க³ணபரிவுதோ அரஞ்ஞே வஸதி. அத²ஸ்ஸ ப⁴கி³னிமிகீ³ புத்தகங் த³ஸ்ஸெத்வா ‘‘பா⁴திக, அயங் தே பா⁴கி³னெய்யோ, ஏதங் மிக³மாயங் உக்³க³ண்ஹாபேஹீ’’தி படிச்சா²பேஸி. ஸோ தங் பா⁴கி³னெய்யங் ‘‘அஸுகவேலாய நாம ஆக³ந்த்வா உக்³க³ண்ஹாஹீ’’தி ஆஹ. ஸோ வுத்தவேலாய நாக³ச்ச²தி. யதா² ச ஏகதி³வஸங், ஏவங் ஸத்த தி³வஸே ஸத்தோவாதே³ அதிக்கந்தோ ஸோ மிக³மாயங் அனுக்³க³ண்ஹித்வாவ விசரந்தோ பாஸே ப³ஜ்ஜி². மாதாபிஸ்ஸ பா⁴தரங் உபஸங்கமித்வா ‘‘கிங் தே, பா⁴திக, பா⁴கி³னெய்யோ மிக³மாயங் உக்³க³ண்ஹாபிதோ’’தி புச்சி². போ³தி⁴ஸத்தோ ச ‘‘தஸ்ஸ அனோவாத³கஸ்ஸ மா சிந்தயி, ந தே புத்தேன மிக³மாயா உக்³க³ஹிதா’’தி வத்வா இதா³னிபி தங் அனோவதி³துகாமோவ ஹுத்வா இமங் கா³த²மாஹ –

15.

‘‘அட்ட²க்கு²ரங் க²ராதி³யே, மிக³ங் வங்காதிவங்கினங்;

ஸத்தஹி காலாதிக்கந்தங், ந நங் ஓவதி³துஸ்ஸஹே’’தி.

தத்த² அட்ட²க்கு²ரந்தி ஏகேகஸ்மிங் பாதே³ த்³வின்னங் த்³வின்னங் வஸேன அட்ட²க்கு²ரங். க²ராதி³யேதி தங் நாமேன ஆலபதி. மிக³ந்தி ஸப்³ப³ஸங்கா³ஹிகவசனங். வங்காதிவங்கினந்தி மூலே வங்கானி, அக்³கே³ அதிவங்கானீதி வங்காதிவங்கானி, தாதி³ஸானி ஸிங்கா³னி அஸ்ஸ அத்தீ²தி வங்காதிவங்கீ, தங் வங்காதிவங்கினங். ஸத்தஹி காலாதிக்கந்தந்தி ஸத்தஹி ஓவாத³காலேஹி ஓவாத³ங் அதிக்கந்தங். ந நங் ஓவதி³துஸ்ஸஹேதி ஏதங் து³ப்³ப³சமிக³ங் அஹங் ஓவதி³துங் ந உஸ்ஸஹாமி, ஏதஸ்ஸ மே ஓவாத³த்தா²ய சித்தம்பி ந உப்பஜ்ஜதீதி த³ஸ்ஸேதி. அத² நங் து³ப்³ப³சமிக³ங் பாஸே ப³த்³த⁴ங் லுத்³தோ³ மாரெத்வா மங்ஸங் ஆதா³ய பக்காமி.

ஸத்தா²பி ‘‘ந த்வங் பி⁴க்கு² இதா³னேவ து³ப்³ப³சோ, புப்³பே³பி து³ப்³ப³சோயேவா’’தி இமங் த⁴ம்மதே³ஸனங் ஆஹரித்வா அனுஸந்தி⁴ங் க⁴டெத்வா ஜாதகங் ஸமோதா⁴னேஸி. ‘‘ததா³ பா⁴கி³னெய்யோ மிகோ³ து³ப்³ப³சபி⁴க்கு² அஹோஸி, ப⁴கி³னீ உப்பலவண்ணா, ஓவாத³மிகோ³ பன அஹமேவ அஹோஸி’’ந்தி.

க²ராதி³யஜாதகவண்ணனா பஞ்சமா.