| Library / Tipiṭaka / តិបិដក • Tipiṭaka / អង្គុត្តរនិកាយ • Aṅguttaranikāya |
១០. ខត្តិយសុត្តំ
10. Khattiyasuttaṃ
៥២. អថ ខោ ជាណុស្សោណិ 1 ព្រាហ្មណោ យេន ភគវា តេនុបសង្កមិ; ឧបសង្កមិត្វា ភគវតា សទ្ធិំ សម្មោទិ។ សម្មោទនីយំ កថំ សារណីយំ វីតិសារេត្វា ឯកមន្តំ និសីទិ។ ឯកមន្តំ និសិន្នោ ខោ ជាណុស្សោណិ ព្រាហ្មណោ ភគវន្តំ ឯតទវោច –
52. Atha kho jāṇussoṇi 2 brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho jāṇussoṇi brāhmaṇo bhagavantaṃ etadavoca –
‘‘ខត្តិយា , ភោ គោតម, កិំអធិប្បាយា, កិំឧបវិចារា, កិំអធិដ្ឋានា, កិំអភិនិវេសា, កិំបរិយោសានា’’តិ? ‘‘ខត្តិយា ខោ, ព្រាហ្មណ, ភោគាធិប្បាយា បញ្ញូបវិចារា ពលាធិដ្ឋានា បថវីភិនិវេសា ឥស្សរិយបរិយោសានា’’តិ។
‘‘Khattiyā , bho gotama, kiṃadhippāyā, kiṃupavicārā, kiṃadhiṭṭhānā, kiṃabhinivesā, kiṃpariyosānā’’ti? ‘‘Khattiyā kho, brāhmaṇa, bhogādhippāyā paññūpavicārā balādhiṭṭhānā pathavībhinivesā issariyapariyosānā’’ti.
‘‘ព្រាហ្មណា បន, ភោ គោតម, កិំអធិប្បាយា, កិំឧបវិចារា, កិំអធិដ្ឋានា, កិំអភិនិវេសា, កិំបរិយោសានា’’តិ? ‘‘ព្រាហ្មណា ខោ, ព្រាហ្មណ, ភោគាធិប្បាយា បញ្ញូបវិចារា មន្តាធិដ្ឋានា យញ្ញាភិនិវេសា ព្រហ្មលោកបរិយោសានា’’តិ។
‘‘Brāhmaṇā pana, bho gotama, kiṃadhippāyā, kiṃupavicārā, kiṃadhiṭṭhānā, kiṃabhinivesā, kiṃpariyosānā’’ti? ‘‘Brāhmaṇā kho, brāhmaṇa, bhogādhippāyā paññūpavicārā mantādhiṭṭhānā yaññābhinivesā brahmalokapariyosānā’’ti.
‘‘គហបតិកា បន, ភោ គោតម, កិំអធិប្បាយា, កិំឧបវិចារា, កិំអធិដ្ឋានា, កិំអភិនិវេសា, កិំបរិយោសានា’’តិ? ‘‘គហបតិកា ខោ, ព្រាហ្មណ, ភោគាធិប្បាយា បញ្ញូបវិចារា សិប្បាធិដ្ឋានា កម្មន្តាភិនិវេសា និដ្ឋិតកម្មន្តបរិយោសានា’’តិ។
‘‘Gahapatikā pana, bho gotama, kiṃadhippāyā, kiṃupavicārā, kiṃadhiṭṭhānā, kiṃabhinivesā, kiṃpariyosānā’’ti? ‘‘Gahapatikā kho, brāhmaṇa, bhogādhippāyā paññūpavicārā sippādhiṭṭhānā kammantābhinivesā niṭṭhitakammantapariyosānā’’ti.
‘‘ឥត្ថី បន, ភោ គោតម, កិំអធិប្បាយា, កិំឧបវិចារា, កិំអធិដ្ឋានា, កិំអភិនិវេសា, កិំបរិយោសានា’’តិ? ‘‘ឥត្ថី ខោ, ព្រាហ្មណ, បុរិសាធិប្បាយា អលង្ការូបវិចារា បុត្តាធិដ្ឋានា អសបតីភិនិវេសា ឥស្សរិយបរិយោសានា’’តិ។
‘‘Itthī pana, bho gotama, kiṃadhippāyā, kiṃupavicārā, kiṃadhiṭṭhānā, kiṃabhinivesā, kiṃpariyosānā’’ti? ‘‘Itthī kho, brāhmaṇa, purisādhippāyā alaṅkārūpavicārā puttādhiṭṭhānā asapatībhinivesā issariyapariyosānā’’ti.
‘‘ចោរា បន, ភោ គោតម, កិំអធិប្បាយា, កិំឧបវិចារា, កិំអធិដ្ឋានា, កិំអភិនិវេសា, កិំបរិយោសានា’’តិ? ‘‘ចោរា ខោ, ព្រាហ្មណ, អាទានាធិប្បាយា គហនូបវិចារា សត្ថាធិដ្ឋានា អន្ធការាភិនិវេសា អទស្សនបរិយោសានា’’តិ។
‘‘Corā pana, bho gotama, kiṃadhippāyā, kiṃupavicārā, kiṃadhiṭṭhānā, kiṃabhinivesā, kiṃpariyosānā’’ti? ‘‘Corā kho, brāhmaṇa, ādānādhippāyā gahanūpavicārā satthādhiṭṭhānā andhakārābhinivesā adassanapariyosānā’’ti.
‘‘សមណា បន, ភោ គោតម, កិំអធិប្បាយា, កិំឧបវិចារា, កិំអធិដ្ឋានា, កិំអភិនិវេសា, កិំបរិយោសានា’’តិ? ‘‘សមណា ខោ, ព្រាហ្មណ, ខន្តិសោរច្ចាធិប្បាយា បញ្ញូបវិចារា សីលាធិដ្ឋានា អាកិញ្ចញ្ញាភិនិវេសា 3 និព្ពានបរិយោសានា’’តិ។
‘‘Samaṇā pana, bho gotama, kiṃadhippāyā, kiṃupavicārā, kiṃadhiṭṭhānā, kiṃabhinivesā, kiṃpariyosānā’’ti? ‘‘Samaṇā kho, brāhmaṇa, khantisoraccādhippāyā paññūpavicārā sīlādhiṭṭhānā ākiñcaññābhinivesā 4 nibbānapariyosānā’’ti.
‘‘អច្ឆរិយំ, ភោ គោតម, អព្ភុតំ, ភោ គោតម! ខត្តិយានម្បិ ភវំ គោតមោ ជានាតិ អធិប្បាយញ្ច ឧបវិចារញ្ច អធិដ្ឋានញ្ច អភិនិវេសញ្ច បរិយោសានញ្ច។ ព្រាហ្មណានម្បិ ភវំ គោតមោ ជានាតិ…បេ.… គហបតីនម្បិ ភវំ គោតមោ ជានាតិ… ឥត្ថីនម្បិ ភវំ គោតមោ ជានាតិ… ចោរានម្បិ ភវំ គោតមោ ជានាតិ … សមណានម្បិ ភវំ គោតមោ ជានាតិ អធិប្បាយញ្ច ឧបវិចារញ្ច អធិដ្ឋានញ្ច អភិនិវេសញ្ច បរិយោសានញ្ច។ អភិក្កន្តំ, ភោ គោតម…បេ.… ឧបាសកំ មំ ភវំ គោតមោ ធារេតុ អជ្ជតគ្គេ បាណុបេតំ សរណំ គត’’ន្តិ។ ទសមំ។
‘‘Acchariyaṃ, bho gotama, abbhutaṃ, bho gotama! Khattiyānampi bhavaṃ gotamo jānāti adhippāyañca upavicārañca adhiṭṭhānañca abhinivesañca pariyosānañca. Brāhmaṇānampi bhavaṃ gotamo jānāti…pe… gahapatīnampi bhavaṃ gotamo jānāti… itthīnampi bhavaṃ gotamo jānāti… corānampi bhavaṃ gotamo jānāti … samaṇānampi bhavaṃ gotamo jānāti adhippāyañca upavicārañca adhiṭṭhānañca abhinivesañca pariyosānañca. Abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti. Dasamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ១០. ខត្តិយសុត្តវណ្ណនា • 10. Khattiyasuttavaṇṇanā
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១០. ខត្តិយសុត្តវណ្ណនា • 10. Khattiyasuttavaṇṇanā
