| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ • Aṅguttaranikāya |
೧೦. ಖತ್ತಿಯಸುತ್ತಂ
10. Khattiyasuttaṃ
೫೨. ಅಥ ಖೋ ಜಾಣುಸ್ಸೋಣಿ 1 ಬ್ರಾಹ್ಮಣೋ ಯೇನ ಭಗವಾ ತೇನುಪಸಙ್ಕಮಿ; ಉಪಸಙ್ಕಮಿತ್ವಾ ಭಗವತಾ ಸದ್ಧಿಂ ಸಮ್ಮೋದಿ। ಸಮ್ಮೋದನೀಯಂ ಕಥಂ ಸಾರಣೀಯಂ ವೀತಿಸಾರೇತ್ವಾ ಏಕಮನ್ತಂ ನಿಸೀದಿ। ಏಕಮನ್ತಂ ನಿಸಿನ್ನೋ ಖೋ ಜಾಣುಸ್ಸೋಣಿ ಬ್ರಾಹ್ಮಣೋ ಭಗವನ್ತಂ ಏತದವೋಚ –
52. Atha kho jāṇussoṇi 2 brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho jāṇussoṇi brāhmaṇo bhagavantaṃ etadavoca –
‘‘ಖತ್ತಿಯಾ , ಭೋ ಗೋತಮ, ಕಿಂಅಧಿಪ್ಪಾಯಾ, ಕಿಂಉಪವಿಚಾರಾ, ಕಿಂಅಧಿಟ್ಠಾನಾ, ಕಿಂಅಭಿನಿವೇಸಾ, ಕಿಂಪರಿಯೋಸಾನಾ’’ತಿ? ‘‘ಖತ್ತಿಯಾ ಖೋ, ಬ್ರಾಹ್ಮಣ, ಭೋಗಾಧಿಪ್ಪಾಯಾ ಪಞ್ಞೂಪವಿಚಾರಾ ಬಲಾಧಿಟ್ಠಾನಾ ಪಥವೀಭಿನಿವೇಸಾ ಇಸ್ಸರಿಯಪರಿಯೋಸಾನಾ’’ತಿ।
‘‘Khattiyā , bho gotama, kiṃadhippāyā, kiṃupavicārā, kiṃadhiṭṭhānā, kiṃabhinivesā, kiṃpariyosānā’’ti? ‘‘Khattiyā kho, brāhmaṇa, bhogādhippāyā paññūpavicārā balādhiṭṭhānā pathavībhinivesā issariyapariyosānā’’ti.
‘‘ಬ್ರಾಹ್ಮಣಾ ಪನ, ಭೋ ಗೋತಮ, ಕಿಂಅಧಿಪ್ಪಾಯಾ, ಕಿಂಉಪವಿಚಾರಾ, ಕಿಂಅಧಿಟ್ಠಾನಾ, ಕಿಂಅಭಿನಿವೇಸಾ, ಕಿಂಪರಿಯೋಸಾನಾ’’ತಿ? ‘‘ಬ್ರಾಹ್ಮಣಾ ಖೋ, ಬ್ರಾಹ್ಮಣ, ಭೋಗಾಧಿಪ್ಪಾಯಾ ಪಞ್ಞೂಪವಿಚಾರಾ ಮನ್ತಾಧಿಟ್ಠಾನಾ ಯಞ್ಞಾಭಿನಿವೇಸಾ ಬ್ರಹ್ಮಲೋಕಪರಿಯೋಸಾನಾ’’ತಿ।
‘‘Brāhmaṇā pana, bho gotama, kiṃadhippāyā, kiṃupavicārā, kiṃadhiṭṭhānā, kiṃabhinivesā, kiṃpariyosānā’’ti? ‘‘Brāhmaṇā kho, brāhmaṇa, bhogādhippāyā paññūpavicārā mantādhiṭṭhānā yaññābhinivesā brahmalokapariyosānā’’ti.
‘‘ಗಹಪತಿಕಾ ಪನ, ಭೋ ಗೋತಮ, ಕಿಂಅಧಿಪ್ಪಾಯಾ, ಕಿಂಉಪವಿಚಾರಾ, ಕಿಂಅಧಿಟ್ಠಾನಾ, ಕಿಂಅಭಿನಿವೇಸಾ, ಕಿಂಪರಿಯೋಸಾನಾ’’ತಿ? ‘‘ಗಹಪತಿಕಾ ಖೋ, ಬ್ರಾಹ್ಮಣ, ಭೋಗಾಧಿಪ್ಪಾಯಾ ಪಞ್ಞೂಪವಿಚಾರಾ ಸಿಪ್ಪಾಧಿಟ್ಠಾನಾ ಕಮ್ಮನ್ತಾಭಿನಿವೇಸಾ ನಿಟ್ಠಿತಕಮ್ಮನ್ತಪರಿಯೋಸಾನಾ’’ತಿ।
‘‘Gahapatikā pana, bho gotama, kiṃadhippāyā, kiṃupavicārā, kiṃadhiṭṭhānā, kiṃabhinivesā, kiṃpariyosānā’’ti? ‘‘Gahapatikā kho, brāhmaṇa, bhogādhippāyā paññūpavicārā sippādhiṭṭhānā kammantābhinivesā niṭṭhitakammantapariyosānā’’ti.
‘‘ಇತ್ಥೀ ಪನ, ಭೋ ಗೋತಮ, ಕಿಂಅಧಿಪ್ಪಾಯಾ, ಕಿಂಉಪವಿಚಾರಾ, ಕಿಂಅಧಿಟ್ಠಾನಾ, ಕಿಂಅಭಿನಿವೇಸಾ, ಕಿಂಪರಿಯೋಸಾನಾ’’ತಿ? ‘‘ಇತ್ಥೀ ಖೋ, ಬ್ರಾಹ್ಮಣ, ಪುರಿಸಾಧಿಪ್ಪಾಯಾ ಅಲಙ್ಕಾರೂಪವಿಚಾರಾ ಪುತ್ತಾಧಿಟ್ಠಾನಾ ಅಸಪತೀಭಿನಿವೇಸಾ ಇಸ್ಸರಿಯಪರಿಯೋಸಾನಾ’’ತಿ।
‘‘Itthī pana, bho gotama, kiṃadhippāyā, kiṃupavicārā, kiṃadhiṭṭhānā, kiṃabhinivesā, kiṃpariyosānā’’ti? ‘‘Itthī kho, brāhmaṇa, purisādhippāyā alaṅkārūpavicārā puttādhiṭṭhānā asapatībhinivesā issariyapariyosānā’’ti.
‘‘ಚೋರಾ ಪನ, ಭೋ ಗೋತಮ, ಕಿಂಅಧಿಪ್ಪಾಯಾ, ಕಿಂಉಪವಿಚಾರಾ, ಕಿಂಅಧಿಟ್ಠಾನಾ, ಕಿಂಅಭಿನಿವೇಸಾ, ಕಿಂಪರಿಯೋಸಾನಾ’’ತಿ? ‘‘ಚೋರಾ ಖೋ, ಬ್ರಾಹ್ಮಣ, ಆದಾನಾಧಿಪ್ಪಾಯಾ ಗಹನೂಪವಿಚಾರಾ ಸತ್ಥಾಧಿಟ್ಠಾನಾ ಅನ್ಧಕಾರಾಭಿನಿವೇಸಾ ಅದಸ್ಸನಪರಿಯೋಸಾನಾ’’ತಿ।
‘‘Corā pana, bho gotama, kiṃadhippāyā, kiṃupavicārā, kiṃadhiṭṭhānā, kiṃabhinivesā, kiṃpariyosānā’’ti? ‘‘Corā kho, brāhmaṇa, ādānādhippāyā gahanūpavicārā satthādhiṭṭhānā andhakārābhinivesā adassanapariyosānā’’ti.
‘‘ಸಮಣಾ ಪನ, ಭೋ ಗೋತಮ, ಕಿಂಅಧಿಪ್ಪಾಯಾ, ಕಿಂಉಪವಿಚಾರಾ, ಕಿಂಅಧಿಟ್ಠಾನಾ, ಕಿಂಅಭಿನಿವೇಸಾ, ಕಿಂಪರಿಯೋಸಾನಾ’’ತಿ? ‘‘ಸಮಣಾ ಖೋ, ಬ್ರಾಹ್ಮಣ, ಖನ್ತಿಸೋರಚ್ಚಾಧಿಪ್ಪಾಯಾ ಪಞ್ಞೂಪವಿಚಾರಾ ಸೀಲಾಧಿಟ್ಠಾನಾ ಆಕಿಞ್ಚಞ್ಞಾಭಿನಿವೇಸಾ 3 ನಿಬ್ಬಾನಪರಿಯೋಸಾನಾ’’ತಿ।
‘‘Samaṇā pana, bho gotama, kiṃadhippāyā, kiṃupavicārā, kiṃadhiṭṭhānā, kiṃabhinivesā, kiṃpariyosānā’’ti? ‘‘Samaṇā kho, brāhmaṇa, khantisoraccādhippāyā paññūpavicārā sīlādhiṭṭhānā ākiñcaññābhinivesā 4 nibbānapariyosānā’’ti.
‘‘ಅಚ್ಛರಿಯಂ, ಭೋ ಗೋತಮ, ಅಬ್ಭುತಂ, ಭೋ ಗೋತಮ! ಖತ್ತಿಯಾನಮ್ಪಿ ಭವಂ ಗೋತಮೋ ಜಾನಾತಿ ಅಧಿಪ್ಪಾಯಞ್ಚ ಉಪವಿಚಾರಞ್ಚ ಅಧಿಟ್ಠಾನಞ್ಚ ಅಭಿನಿವೇಸಞ್ಚ ಪರಿಯೋಸಾನಞ್ಚ। ಬ್ರಾಹ್ಮಣಾನಮ್ಪಿ ಭವಂ ಗೋತಮೋ ಜಾನಾತಿ…ಪೇ॰… ಗಹಪತೀನಮ್ಪಿ ಭವಂ ಗೋತಮೋ ಜಾನಾತಿ… ಇತ್ಥೀನಮ್ಪಿ ಭವಂ ಗೋತಮೋ ಜಾನಾತಿ… ಚೋರಾನಮ್ಪಿ ಭವಂ ಗೋತಮೋ ಜಾನಾತಿ … ಸಮಣಾನಮ್ಪಿ ಭವಂ ಗೋತಮೋ ಜಾನಾತಿ ಅಧಿಪ್ಪಾಯಞ್ಚ ಉಪವಿಚಾರಞ್ಚ ಅಧಿಟ್ಠಾನಞ್ಚ ಅಭಿನಿವೇಸಞ್ಚ ಪರಿಯೋಸಾನಞ್ಚ। ಅಭಿಕ್ಕನ್ತಂ, ಭೋ ಗೋತಮ…ಪೇ॰… ಉಪಾಸಕಂ ಮಂ ಭವಂ ಗೋತಮೋ ಧಾರೇತು ಅಜ್ಜತಗ್ಗೇ ಪಾಣುಪೇತಂ ಸರಣಂ ಗತ’’ನ್ತಿ। ದಸಮಂ।
‘‘Acchariyaṃ, bho gotama, abbhutaṃ, bho gotama! Khattiyānampi bhavaṃ gotamo jānāti adhippāyañca upavicārañca adhiṭṭhānañca abhinivesañca pariyosānañca. Brāhmaṇānampi bhavaṃ gotamo jānāti…pe… gahapatīnampi bhavaṃ gotamo jānāti… itthīnampi bhavaṃ gotamo jānāti… corānampi bhavaṃ gotamo jānāti … samaṇānampi bhavaṃ gotamo jānāti adhippāyañca upavicārañca adhiṭṭhānañca abhinivesañca pariyosānañca. Abhikkantaṃ, bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti. Dasamaṃ.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೧೦. ಖತ್ತಿಯಸುತ್ತವಣ್ಣನಾ • 10. Khattiyasuttavaṇṇanā
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧೦. ಖತ್ತಿಯಸುತ್ತವಣ್ಣನಾ • 10. Khattiyasuttavaṇṇanā
