| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
10. க²த்தியஸுத்தவண்ணனா
10. Khattiyasuttavaṇṇanā
52. த³ஸமே போ⁴கா³தி⁴ப்பாயாதி போ⁴க³ஸங்ஹரணத்த²ங் ட²பிதாதி⁴ப்பாயா பவத்தஅஜ்ஜா²ஸயா. பஞ்ஞூபவிசாராதி பஞ்ஞவந்தோ ப⁴வெய்யாமாதி ஏவங் பஞ்ஞத்தா²ய பவத்தூபவிசாரா. அயமேவ நேஸங் விசாரோ சித்தே உபவிசரதி. ப³லாதி⁴ட்டா²னாதி ப³லகாயாதி⁴ட்டா²னா. ப³லகாயஞ்ஹி லத்³தா⁴ தே லத்³த⁴பதிட்டா² நாம ஹொந்தி. பத²விபி⁴னிவேஸாதி பத²விஸாமினோ ப⁴விஸ்ஸாமாதி ஏவங் பத²விஅத்தா²ய கதசித்தாபி⁴னிவேஸா. இஸ்ஸரியபரியோஸானாதி ரஜ்ஜாபி⁴ஸேகபரியோஸானா. அபி⁴ஸேகஞ்ஹி பத்வா தே பரியோஸானப்பத்தா நாம ஹொந்தி. இமினா நயேன ஸப்³ப³த்த² அத்தோ² வேதி³தப்³போ³.
52. Dasame bhogādhippāyāti bhogasaṃharaṇatthaṃ ṭhapitādhippāyā pavattaajjhāsayā. Paññūpavicārāti paññavanto bhaveyyāmāti evaṃ paññatthāya pavattūpavicārā. Ayameva nesaṃ vicāro citte upavicarati. Balādhiṭṭhānāti balakāyādhiṭṭhānā. Balakāyañhi laddhā te laddhapatiṭṭhā nāma honti. Pathavibhinivesāti pathavisāmino bhavissāmāti evaṃ pathaviatthāya katacittābhinivesā. Issariyapariyosānāti rajjābhisekapariyosānā. Abhisekañhi patvā te pariyosānappattā nāma honti. Iminā nayena sabbattha attho veditabbo.
ஸேஸபதே³ஸு பனெத்த² அயமதி⁴ப்பாயோ – ப்³ராஹ்மணா தாவ மந்தே லபி⁴த்வா லத்³த⁴பதிட்டா² நாம ஹொந்தி, க³ஹபதிகா யங்கிஞ்சி ஸிப்பங், இத்தீ² குலதா³யஜ்ஜஸாமிகங் புத்தங், சோரா யங்கிஞ்சி ஆவுத⁴ஸத்த²ங் , ஸமணா ஸீலபரிபுண்ணா லத்³த⁴பதிட்டா² நாம ஹொந்தி. தஸ்மா மந்தாதி⁴ட்டா²னாதிஆதீ³னி வுத்தானி.
Sesapadesu panettha ayamadhippāyo – brāhmaṇā tāva mante labhitvā laddhapatiṭṭhā nāma honti, gahapatikā yaṃkiñci sippaṃ, itthī kuladāyajjasāmikaṃ puttaṃ, corā yaṃkiñci āvudhasatthaṃ , samaṇā sīlaparipuṇṇā laddhapatiṭṭhā nāma honti. Tasmā mantādhiṭṭhānātiādīni vuttāni.
ப்³ராஹ்மணானஞ்ச ‘‘யஞ்ஞங் யஜிஸ்ஸாமா’’தி சித்தங் அபி⁴னிவிஸதி, ப்³ரஹ்மலோகே பத்தே பரியோஸானப்பத்தா நாம ஹொந்தி. தஸ்மா தே யஞ்ஞாபி⁴னிவேஸா ப்³ரஹ்மலோகபரியோஸானாதி வுத்தா. கம்மந்தகரணத்தா²ய மனோ ஏதேஸங் அபி⁴னிவிஸதீதி கம்மந்தாபி⁴னிவேஸா. கம்மே நிட்டி²தே பரியோஸானப்பத்தா நாம ஹொந்தீதி நிட்டி²தகம்மந்தபரியோஸானா.
Brāhmaṇānañca ‘‘yaññaṃ yajissāmā’’ti cittaṃ abhinivisati, brahmaloke patte pariyosānappattā nāma honti. Tasmā te yaññābhinivesā brahmalokapariyosānāti vuttā. Kammantakaraṇatthāya mano etesaṃ abhinivisatīti kammantābhinivesā. Kamme niṭṭhite pariyosānappattā nāma hontīti niṭṭhitakammantapariyosānā.
புரிஸாதி⁴ப்பாயாதி புரிஸேஸு பவத்தஅஜ்ஜா²ஸயா. அலங்காரத்தா²ய மனோ உபவிசரதி ஏதிஸ்ஸாதி அலங்காரூபவிசாரா. அஸபத்தீ ஹுத்வா ஏகிகாவ க⁴ரே வஸெய்யந்தி ஏவமஸ்ஸா சித்தங் அபி⁴னிவிஸதீதி அஸபத்தீபி⁴னிவேஸா. க⁴ராவாஸிஸ்ஸரியே லத்³தே⁴ பரியோஸானப்பத்தா நாம ஹொந்தீதி இஸ்ஸரியபரியோஸானா.
Purisādhippāyāti purisesu pavattaajjhāsayā. Alaṅkāratthāya mano upavicarati etissāti alaṅkārūpavicārā. Asapattī hutvā ekikāva ghare vaseyyanti evamassā cittaṃ abhinivisatīti asapattībhinivesā. Gharāvāsissariye laddhe pariyosānappattā nāma hontīti issariyapariyosānā.
பரப⁴ண்ட³ஸ்ஸ ஆதா³னே அதி⁴ப்பாயோ ஏதேஸந்தி ஆதா³னாதி⁴ப்பாயா. க³ஹனே நிலீயனட்டா²னே ஏதேஸங் மனோ உபவிசரதீதி க³ஹனூபவிசாரா. அந்த⁴காரத்தா²ய ஏதேஸங் சித்தங் அபி⁴னிவிஸதீதி அந்த⁴காராபி⁴னிவேஸா. அத³ஸ்ஸனப்பத்தா பரியோஸானப்பத்தா ஹொந்தீதி அத³ஸ்ஸனபரியோஸானா.
Parabhaṇḍassa ādāne adhippāyo etesanti ādānādhippāyā. Gahane nilīyanaṭṭhāne etesaṃ mano upavicaratīti gahanūpavicārā. Andhakāratthāya etesaṃ cittaṃ abhinivisatīti andhakārābhinivesā. Adassanappattā pariyosānappattā hontīti adassanapariyosānā.
அதி⁴வாஸனக்க²ந்தியஞ்ச ஸுசிபா⁴வஸீலே ச அதி⁴ப்பாயோ ஏதேஸந்தி க²ந்திஸோரச்சாதி⁴ப்பாயா. அகிஞ்சனபா⁴வே நிக்³க³ஹணபா⁴வே சித்தங் ஏதேஸங் அபி⁴னிவிஸதீதி ஆகிஞ்சஞ்ஞாபி⁴னிவேஸா. நிப்³பா³னப்பத்தா பரியோஸானப்பத்தா ஹொந்தீதி நிப்³பா³னபரியோஸானா.
Adhivāsanakkhantiyañca sucibhāvasīle ca adhippāyo etesanti khantisoraccādhippāyā. Akiñcanabhāve niggahaṇabhāve cittaṃ etesaṃ abhinivisatīti ākiñcaññābhinivesā. Nibbānappattā pariyosānappattā hontīti nibbānapariyosānā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 10. க²த்தியஸுத்தங் • 10. Khattiyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 10. க²த்தியஸுத்தவண்ணனா • 10. Khattiyasuttavaṇṇanā
