| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. க²த்தியஸுத்தவண்ணனா
4. Khattiyasuttavaṇṇanā
14. சதுத்தே² க²த்தியோ த்³விபத³ந்தி த்³விபதா³னங் ராஜா ஸெட்டோ². கோமாரீதி குமாரிகாலே க³ஹிதா. அயங் ஸேஸப⁴ரியானங் ஸெட்டா²தி வத³தி. புப்³ப³ஜோதி பட²மங் ஜாதோ காணோ வாபி ஹோது குணிஆதீ³னங் வா அஞ்ஞதரோ, யோ பட²மங் ஜாதோ, அயமேவ புத்தோ இமிஸ்ஸா தே³வதாய வாதே³ ஸெட்டோ² நாம ஹோதி. யஸ்மா பன த்³விபதா³தீ³னங் பு³த்³தா⁴த³யோ ஸெட்டா², தஸ்மா ப⁴க³வா படிகா³த²ங் ஆஹ. தத்த² கிஞ்சாபி ப⁴க³வா ஸப்³பே³ஸங்யேவ அபதா³தி³பே⁴தா³னங் ஸத்தானங் ஸெட்டோ², உப்பஜ்ஜமானோ பனேஸ ஸப்³ப³ஸத்தஸெட்டோ² த்³விபதே³ஸுயேவ உப்பஜ்ஜதி, தஸ்மா ஸம்பு³த்³தோ⁴ த்³விபத³ங் ஸெட்டோ²தி ஆஹ. த்³விபதே³ஸு உப்பன்னஸ்ஸ சஸ்ஸ ஸப்³ப³ஸத்தஸெட்ட²பா⁴வோ அப்படிஹதோவ ஹோதி. ஆஜானீயோதி ஹத்தீ² வா ஹோது அஸ்ஸாதீ³ஸு அஞ்ஞதரோ வா, யோ காரணங் ஜானாதி, அயங் ஆஜானீயோவ சதுப்பதா³னங் ஸெட்டோ²தி அத்தோ². கூடகண்ணரஞ்ஞோ கு³ளவண்ணஅஸ்ஸோ விய. ராஜா கிர பாசீனத்³வாரேன நிக்க²மித்வா சேதியபப்³ப³தங் க³மிஸ்ஸாமீதி கலம்ப³னதீ³தீரங் ஸம்பத்தோ, அஸ்ஸோ தீரே ட²த்வா உத³கங் ஓதரிதுங் ந இச்ச²தி , ராஜா அஸ்ஸாசரியங் ஆமந்தெத்வா, ‘‘அஹோ வத தயா அஸ்ஸோ ஸிக்கா²பிதோ உத³கங் ஓதரிதுங் ந இச்ச²தீ’’தி ஆஹ. ஆசரியோ ‘‘ஸுஸிக்கா²பிதோ தே³வ அஸ்ஸோ, ஏதஸ்ஸ ஹி சித்தங் – ‘ஸசாஹங் உத³கங் ஓதரிஸ்ஸாமி, வாலங் தேமிஸ்ஸதி, வாலே திந்தே ரஞ்ஞோ அங்கே³ உத³கங் பாதெய்யா’தி, ஏவங் தும்ஹாகங் ஸரீரே உத³கபாதனப⁴யேன ந ஓதரதி, வாலங் க³ண்ஹாபேதா²’’தி ஆஹ. ராஜா ததா² காரேஸி. அஸ்ஸோ வேகே³ன ஓதரித்வா பாரங் க³தோ. ஸுஸ்ஸூஸாதி ஸுஸ்ஸூஸமானா. குமாரிகாலே வா க³ஹிதா ஹோது பச்சா² வா, ஸுரூபா வா விரூபா வா, யா ஸாமிகங் ஸுஸ்ஸூஸதி பரிசரதி தோஸேதி, ஸா ப⁴ரியானங் ஸெட்டா². அஸ்ஸவோதி ஆஸுணமானோ. ஜெட்டோ² வா ஹி ஹோது கனிட்டோ² வா, யோ மாதாபிதூனங் வசனங் ஸுணாதி, ஸம்படிச்ச²தி, ஓவாத³படிகரோ ஹோதி, அயங் புத்தானங் ஸெட்டோ², அஞ்ஞேஹி ஸந்தி⁴ச்சே²த³காதி³சோரேஹி புத்தேஹி கோ அத்தோ² தே³வதேதி.
14. Catutthe khattiyo dvipadanti dvipadānaṃ rājā seṭṭho. Komārīti kumārikāle gahitā. Ayaṃ sesabhariyānaṃ seṭṭhāti vadati. Pubbajoti paṭhamaṃ jāto kāṇo vāpi hotu kuṇiādīnaṃ vā aññataro, yo paṭhamaṃ jāto, ayameva putto imissā devatāya vāde seṭṭho nāma hoti. Yasmā pana dvipadādīnaṃ buddhādayo seṭṭhā, tasmā bhagavā paṭigāthaṃ āha. Tattha kiñcāpi bhagavā sabbesaṃyeva apadādibhedānaṃ sattānaṃ seṭṭho, uppajjamāno panesa sabbasattaseṭṭho dvipadesuyeva uppajjati, tasmā sambuddho dvipadaṃ seṭṭhoti āha. Dvipadesu uppannassa cassa sabbasattaseṭṭhabhāvo appaṭihatova hoti. Ājānīyoti hatthī vā hotu assādīsu aññataro vā, yo kāraṇaṃ jānāti, ayaṃ ājānīyova catuppadānaṃ seṭṭhoti attho. Kūṭakaṇṇarañño guḷavaṇṇaasso viya. Rājā kira pācīnadvārena nikkhamitvā cetiyapabbataṃ gamissāmīti kalambanadītīraṃ sampatto, asso tīre ṭhatvā udakaṃ otarituṃ na icchati , rājā assācariyaṃ āmantetvā, ‘‘aho vata tayā asso sikkhāpito udakaṃ otarituṃ na icchatī’’ti āha. Ācariyo ‘‘susikkhāpito deva asso, etassa hi cittaṃ – ‘sacāhaṃ udakaṃ otarissāmi, vālaṃ temissati, vāle tinte rañño aṅge udakaṃ pāteyyā’ti, evaṃ tumhākaṃ sarīre udakapātanabhayena na otarati, vālaṃ gaṇhāpethā’’ti āha. Rājā tathā kāresi. Asso vegena otaritvā pāraṃ gato. Sussūsāti sussūsamānā. Kumārikāle vā gahitā hotu pacchā vā, surūpā vā virūpā vā, yā sāmikaṃ sussūsati paricarati toseti, sā bhariyānaṃ seṭṭhā. Assavoti āsuṇamāno. Jeṭṭho vā hi hotu kaniṭṭho vā, yo mātāpitūnaṃ vacanaṃ suṇāti, sampaṭicchati, ovādapaṭikaro hoti, ayaṃ puttānaṃ seṭṭho, aññehi sandhicchedakādicorehi puttehi ko attho devateti.
க²த்தியஸுத்தவண்ணனா நிட்டி²தா.
Khattiyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. க²த்தியஸுத்தங் • 4. Khattiyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. க²த்தியஸுத்தவண்ணனா • 4. Khattiyasuttavaṇṇanā
