| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
১০. খত্তিযসুত্তৰণ্ণনা
10. Khattiyasuttavaṇṇanā
৫২. দসমে ভোগাধিপ্পাযাতি ভোগসংহরণত্থং ঠপিতাধিপ্পাযা পৰত্তঅজ্ঝাসযা। পঞ্ঞূপৰিচারাতি পঞ্ঞৰন্তো ভৰেয্যামাতি এৰং পঞ্ঞত্থায পৰত্তূপৰিচারা। অযমেৰ নেসং ৰিচারো চিত্তে উপৰিচরতি। বলাধিট্ঠানাতি বলকাযাধিট্ঠানা। বলকাযঞ্হি লদ্ধা তে লদ্ধপতিট্ঠা নাম হোন্তি। পথৰিভিনিৰেসাতি পথৰিসামিনো ভৰিস্সামাতি এৰং পথৰিঅত্থায কতচিত্তাভিনিৰেসা। ইস্সরিযপরিযোসানাতি রজ্জাভিসেকপরিযোসানা। অভিসেকঞ্হি পত্ৰা তে পরিযোসানপ্পত্তা নাম হোন্তি। ইমিনা নযেন সব্বত্থ অত্থো ৰেদিতব্বো।
52. Dasame bhogādhippāyāti bhogasaṃharaṇatthaṃ ṭhapitādhippāyā pavattaajjhāsayā. Paññūpavicārāti paññavanto bhaveyyāmāti evaṃ paññatthāya pavattūpavicārā. Ayameva nesaṃ vicāro citte upavicarati. Balādhiṭṭhānāti balakāyādhiṭṭhānā. Balakāyañhi laddhā te laddhapatiṭṭhā nāma honti. Pathavibhinivesāti pathavisāmino bhavissāmāti evaṃ pathaviatthāya katacittābhinivesā. Issariyapariyosānāti rajjābhisekapariyosānā. Abhisekañhi patvā te pariyosānappattā nāma honti. Iminā nayena sabbattha attho veditabbo.
সেসপদেসু পনেত্থ অযমধিপ্পাযো – ব্রাহ্মণা তাৰ মন্তে লভিত্ৰা লদ্ধপতিট্ঠা নাম হোন্তি, গহপতিকা যংকিঞ্চি সিপ্পং, ইত্থী কুলদাযজ্জসামিকং পুত্তং, চোরা যংকিঞ্চি আৰুধসত্থং , সমণা সীলপরিপুণ্ণা লদ্ধপতিট্ঠা নাম হোন্তি। তস্মা মন্তাধিট্ঠানাতিআদীনি ৰুত্তানি।
Sesapadesu panettha ayamadhippāyo – brāhmaṇā tāva mante labhitvā laddhapatiṭṭhā nāma honti, gahapatikā yaṃkiñci sippaṃ, itthī kuladāyajjasāmikaṃ puttaṃ, corā yaṃkiñci āvudhasatthaṃ , samaṇā sīlaparipuṇṇā laddhapatiṭṭhā nāma honti. Tasmā mantādhiṭṭhānātiādīni vuttāni.
ব্রাহ্মণানঞ্চ ‘‘যঞ্ঞং যজিস্সামা’’তি চিত্তং অভিনিৰিসতি, ব্রহ্মলোকে পত্তে পরিযোসানপ্পত্তা নাম হোন্তি। তস্মা তে যঞ্ঞাভিনিৰেসা ব্রহ্মলোকপরিযোসানাতি ৰুত্তা। কম্মন্তকরণত্থায মনো এতেসং অভিনিৰিসতীতি কম্মন্তাভিনিৰেসা। কম্মে নিট্ঠিতে পরিযোসানপ্পত্তা নাম হোন্তীতি নিট্ঠিতকম্মন্তপরিযোসানা।
Brāhmaṇānañca ‘‘yaññaṃ yajissāmā’’ti cittaṃ abhinivisati, brahmaloke patte pariyosānappattā nāma honti. Tasmā te yaññābhinivesā brahmalokapariyosānāti vuttā. Kammantakaraṇatthāya mano etesaṃ abhinivisatīti kammantābhinivesā. Kamme niṭṭhite pariyosānappattā nāma hontīti niṭṭhitakammantapariyosānā.
পুরিসাধিপ্পাযাতি পুরিসেসু পৰত্তঅজ্ঝাসযা। অলঙ্কারত্থায মনো উপৰিচরতি এতিস্সাতি অলঙ্কারূপৰিচারা। অসপত্তী হুত্ৰা একিকাৰ ঘরে ৰসেয্যন্তি এৰমস্সা চিত্তং অভিনিৰিসতীতি অসপত্তীভিনিৰেসা। ঘরাৰাসিস্সরিযে লদ্ধে পরিযোসানপ্পত্তা নাম হোন্তীতি ইস্সরিযপরিযোসানা।
Purisādhippāyāti purisesu pavattaajjhāsayā. Alaṅkāratthāya mano upavicarati etissāti alaṅkārūpavicārā. Asapattī hutvā ekikāva ghare vaseyyanti evamassā cittaṃ abhinivisatīti asapattībhinivesā. Gharāvāsissariye laddhe pariyosānappattā nāma hontīti issariyapariyosānā.
পরভণ্ডস্স আদানে অধিপ্পাযো এতেসন্তি আদানাধিপ্পাযা। গহনে নিলীযনট্ঠানে এতেসং মনো উপৰিচরতীতি গহনূপৰিচারা। অন্ধকারত্থায এতেসং চিত্তং অভিনিৰিসতীতি অন্ধকারাভিনিৰেসা। অদস্সনপ্পত্তা পরিযোসানপ্পত্তা হোন্তীতি অদস্সনপরিযোসানা।
Parabhaṇḍassa ādāne adhippāyo etesanti ādānādhippāyā. Gahane nilīyanaṭṭhāne etesaṃ mano upavicaratīti gahanūpavicārā. Andhakāratthāya etesaṃ cittaṃ abhinivisatīti andhakārābhinivesā. Adassanappattā pariyosānappattā hontīti adassanapariyosānā.
অধিৰাসনক্খন্তিযঞ্চ সুচিভাৰসীলে চ অধিপ্পাযো এতেসন্তি খন্তিসোরচ্চাধিপ্পাযা। অকিঞ্চনভাৰে নিগ্গহণভাৰে চিত্তং এতেসং অভিনিৰিসতীতি আকিঞ্চঞ্ঞাভিনিৰেসা। নিব্বানপ্পত্তা পরিযোসানপ্পত্তা হোন্তীতি নিব্বানপরিযোসানা।
Adhivāsanakkhantiyañca sucibhāvasīle ca adhippāyo etesanti khantisoraccādhippāyā. Akiñcanabhāve niggahaṇabhāve cittaṃ etesaṃ abhinivisatīti ākiñcaññābhinivesā. Nibbānappattā pariyosānappattā hontīti nibbānapariyosānā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১০. খত্তিযসুত্তং • 10. Khattiyasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১০. খত্তিযসুত্তৰণ্ণনা • 10. Khattiyasuttavaṇṇanā
