| Library / Tipiṭaka / តិបិដក • Tipiṭaka / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) |
១០. ខត្តិយសុត្តវណ្ណនា
10. Khattiyasuttavaṇṇanā
៥២. ទសមេ ភោគាធិប្បាយាតិ ភោគសំហរណត្ថំ ឋបិតាធិប្បាយា បវត្តអជ្ឈាសយា។ បញ្ញូបវិចារាតិ បញ្ញវន្តោ ភវេយ្យាមាតិ ឯវំ បញ្ញត្ថាយ បវត្តូបវិចារា។ អយមេវ នេសំ វិចារោ ចិត្តេ ឧបវិចរតិ។ ពលាធិដ្ឋានាតិ ពលកាយាធិដ្ឋានា។ ពលកាយញ្ហិ លទ្ធា តេ លទ្ធបតិដ្ឋា នាម ហោន្តិ។ បថវិភិនិវេសាតិ បថវិសាមិនោ ភវិស្សាមាតិ ឯវំ បថវិអត្ថាយ កតចិត្តាភិនិវេសា។ ឥស្សរិយបរិយោសានាតិ រជ្ជាភិសេកបរិយោសានា។ អភិសេកញ្ហិ បត្វា តេ បរិយោសានប្បត្តា នាម ហោន្តិ។ ឥមិនា នយេន សព្ពត្ថ អត្ថោ វេទិតព្ពោ។
52. Dasame bhogādhippāyāti bhogasaṃharaṇatthaṃ ṭhapitādhippāyā pavattaajjhāsayā. Paññūpavicārāti paññavanto bhaveyyāmāti evaṃ paññatthāya pavattūpavicārā. Ayameva nesaṃ vicāro citte upavicarati. Balādhiṭṭhānāti balakāyādhiṭṭhānā. Balakāyañhi laddhā te laddhapatiṭṭhā nāma honti. Pathavibhinivesāti pathavisāmino bhavissāmāti evaṃ pathaviatthāya katacittābhinivesā. Issariyapariyosānāti rajjābhisekapariyosānā. Abhisekañhi patvā te pariyosānappattā nāma honti. Iminā nayena sabbattha attho veditabbo.
សេសបទេសុ បនេត្ថ អយមធិប្បាយោ – ព្រាហ្មណា តាវ មន្តេ លភិត្វា លទ្ធបតិដ្ឋា នាម ហោន្តិ, គហបតិកា យំកិញ្ចិ សិប្បំ, ឥត្ថី កុលទាយជ្ជសាមិកំ បុត្តំ, ចោរា យំកិញ្ចិ អាវុធសត្ថំ , សមណា សីលបរិបុណ្ណា លទ្ធបតិដ្ឋា នាម ហោន្តិ។ តស្មា មន្តាធិដ្ឋានាតិអាទីនិ វុត្តានិ។
Sesapadesu panettha ayamadhippāyo – brāhmaṇā tāva mante labhitvā laddhapatiṭṭhā nāma honti, gahapatikā yaṃkiñci sippaṃ, itthī kuladāyajjasāmikaṃ puttaṃ, corā yaṃkiñci āvudhasatthaṃ , samaṇā sīlaparipuṇṇā laddhapatiṭṭhā nāma honti. Tasmā mantādhiṭṭhānātiādīni vuttāni.
ព្រាហ្មណានញ្ច ‘‘យញ្ញំ យជិស្សាមា’’តិ ចិត្តំ អភិនិវិសតិ, ព្រហ្មលោកេ បត្តេ បរិយោសានប្បត្តា នាម ហោន្តិ។ តស្មា តេ យញ្ញាភិនិវេសា ព្រហ្មលោកបរិយោសានាតិ វុត្តា។ កម្មន្តករណត្ថាយ មនោ ឯតេសំ អភិនិវិសតីតិ កម្មន្តាភិនិវេសា។ កម្មេ និដ្ឋិតេ បរិយោសានប្បត្តា នាម ហោន្តីតិ និដ្ឋិតកម្មន្តបរិយោសានា។
Brāhmaṇānañca ‘‘yaññaṃ yajissāmā’’ti cittaṃ abhinivisati, brahmaloke patte pariyosānappattā nāma honti. Tasmā te yaññābhinivesā brahmalokapariyosānāti vuttā. Kammantakaraṇatthāya mano etesaṃ abhinivisatīti kammantābhinivesā. Kamme niṭṭhite pariyosānappattā nāma hontīti niṭṭhitakammantapariyosānā.
បុរិសាធិប្បាយាតិ បុរិសេសុ បវត្តអជ្ឈាសយា។ អលង្ការត្ថាយ មនោ ឧបវិចរតិ ឯតិស្សាតិ អលង្ការូបវិចារា។ អសបត្តី ហុត្វា ឯកិកាវ ឃរេ វសេយ្យន្តិ ឯវមស្សា ចិត្តំ អភិនិវិសតីតិ អសបត្តីភិនិវេសា។ ឃរាវាសិស្សរិយេ លទ្ធេ បរិយោសានប្បត្តា នាម ហោន្តីតិ ឥស្សរិយបរិយោសានា។
Purisādhippāyāti purisesu pavattaajjhāsayā. Alaṅkāratthāya mano upavicarati etissāti alaṅkārūpavicārā. Asapattī hutvā ekikāva ghare vaseyyanti evamassā cittaṃ abhinivisatīti asapattībhinivesā. Gharāvāsissariye laddhe pariyosānappattā nāma hontīti issariyapariyosānā.
បរភណ្ឌស្ស អាទានេ អធិប្បាយោ ឯតេសន្តិ អាទានាធិប្បាយា។ គហនេ និលីយនដ្ឋានេ ឯតេសំ មនោ ឧបវិចរតីតិ គហនូបវិចារា។ អន្ធការត្ថាយ ឯតេសំ ចិត្តំ អភិនិវិសតីតិ អន្ធការាភិនិវេសា។ អទស្សនប្បត្តា បរិយោសានប្បត្តា ហោន្តីតិ អទស្សនបរិយោសានា។
Parabhaṇḍassa ādāne adhippāyo etesanti ādānādhippāyā. Gahane nilīyanaṭṭhāne etesaṃ mano upavicaratīti gahanūpavicārā. Andhakāratthāya etesaṃ cittaṃ abhinivisatīti andhakārābhinivesā. Adassanappattā pariyosānappattā hontīti adassanapariyosānā.
អធិវាសនក្ខន្តិយញ្ច សុចិភាវសីលេ ច អធិប្បាយោ ឯតេសន្តិ ខន្តិសោរច្ចាធិប្បាយា។ អកិញ្ចនភាវេ និគ្គហណភាវេ ចិត្តំ ឯតេសំ អភិនិវិសតីតិ អាកិញ្ចញ្ញាភិនិវេសា។ និព្ពានប្បត្តា បរិយោសានប្បត្តា ហោន្តីតិ និព្ពានបរិយោសានា។
Adhivāsanakkhantiyañca sucibhāvasīle ca adhippāyo etesanti khantisoraccādhippāyā. Akiñcanabhāve niggahaṇabhāve cittaṃ etesaṃ abhinivisatīti ākiñcaññābhinivesā. Nibbānappattā pariyosānappattā hontīti nibbānapariyosānā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ១០. ខត្តិយសុត្តំ • 10. Khattiyasuttaṃ
ដីកា • Tīkā / សុត្តបិដក (ដីកា) • Suttapiṭaka (ṭīkā) / អង្គុត្តរនិកាយ (ដីកា) • Aṅguttaranikāya (ṭīkā) / ១០. ខត្តិយសុត្តវណ្ណនា • 10. Khattiyasuttavaṇṇanā
