| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೧೦. ಖತ್ತಿಯಸುತ್ತವಣ್ಣನಾ
10. Khattiyasuttavaṇṇanā
೫೨. ದಸಮೇ ಭೋಗಾಧಿಪ್ಪಾಯಾತಿ ಭೋಗಸಂಹರಣತ್ಥಂ ಠಪಿತಾಧಿಪ್ಪಾಯಾ ಪವತ್ತಅಜ್ಝಾಸಯಾ। ಪಞ್ಞೂಪವಿಚಾರಾತಿ ಪಞ್ಞವನ್ತೋ ಭವೇಯ್ಯಾಮಾತಿ ಏವಂ ಪಞ್ಞತ್ಥಾಯ ಪವತ್ತೂಪವಿಚಾರಾ। ಅಯಮೇವ ನೇಸಂ ವಿಚಾರೋ ಚಿತ್ತೇ ಉಪವಿಚರತಿ। ಬಲಾಧಿಟ್ಠಾನಾತಿ ಬಲಕಾಯಾಧಿಟ್ಠಾನಾ। ಬಲಕಾಯಞ್ಹಿ ಲದ್ಧಾ ತೇ ಲದ್ಧಪತಿಟ್ಠಾ ನಾಮ ಹೋನ್ತಿ। ಪಥವಿಭಿನಿವೇಸಾತಿ ಪಥವಿಸಾಮಿನೋ ಭವಿಸ್ಸಾಮಾತಿ ಏವಂ ಪಥವಿಅತ್ಥಾಯ ಕತಚಿತ್ತಾಭಿನಿವೇಸಾ। ಇಸ್ಸರಿಯಪರಿಯೋಸಾನಾತಿ ರಜ್ಜಾಭಿಸೇಕಪರಿಯೋಸಾನಾ। ಅಭಿಸೇಕಞ್ಹಿ ಪತ್ವಾ ತೇ ಪರಿಯೋಸಾನಪ್ಪತ್ತಾ ನಾಮ ಹೋನ್ತಿ। ಇಮಿನಾ ನಯೇನ ಸಬ್ಬತ್ಥ ಅತ್ಥೋ ವೇದಿತಬ್ಬೋ।
52. Dasame bhogādhippāyāti bhogasaṃharaṇatthaṃ ṭhapitādhippāyā pavattaajjhāsayā. Paññūpavicārāti paññavanto bhaveyyāmāti evaṃ paññatthāya pavattūpavicārā. Ayameva nesaṃ vicāro citte upavicarati. Balādhiṭṭhānāti balakāyādhiṭṭhānā. Balakāyañhi laddhā te laddhapatiṭṭhā nāma honti. Pathavibhinivesāti pathavisāmino bhavissāmāti evaṃ pathaviatthāya katacittābhinivesā. Issariyapariyosānāti rajjābhisekapariyosānā. Abhisekañhi patvā te pariyosānappattā nāma honti. Iminā nayena sabbattha attho veditabbo.
ಸೇಸಪದೇಸು ಪನೇತ್ಥ ಅಯಮಧಿಪ್ಪಾಯೋ – ಬ್ರಾಹ್ಮಣಾ ತಾವ ಮನ್ತೇ ಲಭಿತ್ವಾ ಲದ್ಧಪತಿಟ್ಠಾ ನಾಮ ಹೋನ್ತಿ, ಗಹಪತಿಕಾ ಯಂಕಿಞ್ಚಿ ಸಿಪ್ಪಂ, ಇತ್ಥೀ ಕುಲದಾಯಜ್ಜಸಾಮಿಕಂ ಪುತ್ತಂ, ಚೋರಾ ಯಂಕಿಞ್ಚಿ ಆವುಧಸತ್ಥಂ , ಸಮಣಾ ಸೀಲಪರಿಪುಣ್ಣಾ ಲದ್ಧಪತಿಟ್ಠಾ ನಾಮ ಹೋನ್ತಿ। ತಸ್ಮಾ ಮನ್ತಾಧಿಟ್ಠಾನಾತಿಆದೀನಿ ವುತ್ತಾನಿ।
Sesapadesu panettha ayamadhippāyo – brāhmaṇā tāva mante labhitvā laddhapatiṭṭhā nāma honti, gahapatikā yaṃkiñci sippaṃ, itthī kuladāyajjasāmikaṃ puttaṃ, corā yaṃkiñci āvudhasatthaṃ , samaṇā sīlaparipuṇṇā laddhapatiṭṭhā nāma honti. Tasmā mantādhiṭṭhānātiādīni vuttāni.
ಬ್ರಾಹ್ಮಣಾನಞ್ಚ ‘‘ಯಞ್ಞಂ ಯಜಿಸ್ಸಾಮಾ’’ತಿ ಚಿತ್ತಂ ಅಭಿನಿವಿಸತಿ, ಬ್ರಹ್ಮಲೋಕೇ ಪತ್ತೇ ಪರಿಯೋಸಾನಪ್ಪತ್ತಾ ನಾಮ ಹೋನ್ತಿ। ತಸ್ಮಾ ತೇ ಯಞ್ಞಾಭಿನಿವೇಸಾ ಬ್ರಹ್ಮಲೋಕಪರಿಯೋಸಾನಾತಿ ವುತ್ತಾ। ಕಮ್ಮನ್ತಕರಣತ್ಥಾಯ ಮನೋ ಏತೇಸಂ ಅಭಿನಿವಿಸತೀತಿ ಕಮ್ಮನ್ತಾಭಿನಿವೇಸಾ। ಕಮ್ಮೇ ನಿಟ್ಠಿತೇ ಪರಿಯೋಸಾನಪ್ಪತ್ತಾ ನಾಮ ಹೋನ್ತೀತಿ ನಿಟ್ಠಿತಕಮ್ಮನ್ತಪರಿಯೋಸಾನಾ।
Brāhmaṇānañca ‘‘yaññaṃ yajissāmā’’ti cittaṃ abhinivisati, brahmaloke patte pariyosānappattā nāma honti. Tasmā te yaññābhinivesā brahmalokapariyosānāti vuttā. Kammantakaraṇatthāya mano etesaṃ abhinivisatīti kammantābhinivesā. Kamme niṭṭhite pariyosānappattā nāma hontīti niṭṭhitakammantapariyosānā.
ಪುರಿಸಾಧಿಪ್ಪಾಯಾತಿ ಪುರಿಸೇಸು ಪವತ್ತಅಜ್ಝಾಸಯಾ। ಅಲಙ್ಕಾರತ್ಥಾಯ ಮನೋ ಉಪವಿಚರತಿ ಏತಿಸ್ಸಾತಿ ಅಲಙ್ಕಾರೂಪವಿಚಾರಾ। ಅಸಪತ್ತೀ ಹುತ್ವಾ ಏಕಿಕಾವ ಘರೇ ವಸೇಯ್ಯನ್ತಿ ಏವಮಸ್ಸಾ ಚಿತ್ತಂ ಅಭಿನಿವಿಸತೀತಿ ಅಸಪತ್ತೀಭಿನಿವೇಸಾ। ಘರಾವಾಸಿಸ್ಸರಿಯೇ ಲದ್ಧೇ ಪರಿಯೋಸಾನಪ್ಪತ್ತಾ ನಾಮ ಹೋನ್ತೀತಿ ಇಸ್ಸರಿಯಪರಿಯೋಸಾನಾ।
Purisādhippāyāti purisesu pavattaajjhāsayā. Alaṅkāratthāya mano upavicarati etissāti alaṅkārūpavicārā. Asapattī hutvā ekikāva ghare vaseyyanti evamassā cittaṃ abhinivisatīti asapattībhinivesā. Gharāvāsissariye laddhe pariyosānappattā nāma hontīti issariyapariyosānā.
ಪರಭಣ್ಡಸ್ಸ ಆದಾನೇ ಅಧಿಪ್ಪಾಯೋ ಏತೇಸನ್ತಿ ಆದಾನಾಧಿಪ್ಪಾಯಾ। ಗಹನೇ ನಿಲೀಯನಟ್ಠಾನೇ ಏತೇಸಂ ಮನೋ ಉಪವಿಚರತೀತಿ ಗಹನೂಪವಿಚಾರಾ। ಅನ್ಧಕಾರತ್ಥಾಯ ಏತೇಸಂ ಚಿತ್ತಂ ಅಭಿನಿವಿಸತೀತಿ ಅನ್ಧಕಾರಾಭಿನಿವೇಸಾ। ಅದಸ್ಸನಪ್ಪತ್ತಾ ಪರಿಯೋಸಾನಪ್ಪತ್ತಾ ಹೋನ್ತೀತಿ ಅದಸ್ಸನಪರಿಯೋಸಾನಾ।
Parabhaṇḍassa ādāne adhippāyo etesanti ādānādhippāyā. Gahane nilīyanaṭṭhāne etesaṃ mano upavicaratīti gahanūpavicārā. Andhakāratthāya etesaṃ cittaṃ abhinivisatīti andhakārābhinivesā. Adassanappattā pariyosānappattā hontīti adassanapariyosānā.
ಅಧಿವಾಸನಕ್ಖನ್ತಿಯಞ್ಚ ಸುಚಿಭಾವಸೀಲೇ ಚ ಅಧಿಪ್ಪಾಯೋ ಏತೇಸನ್ತಿ ಖನ್ತಿಸೋರಚ್ಚಾಧಿಪ್ಪಾಯಾ। ಅಕಿಞ್ಚನಭಾವೇ ನಿಗ್ಗಹಣಭಾವೇ ಚಿತ್ತಂ ಏತೇಸಂ ಅಭಿನಿವಿಸತೀತಿ ಆಕಿಞ್ಚಞ್ಞಾಭಿನಿವೇಸಾ। ನಿಬ್ಬಾನಪ್ಪತ್ತಾ ಪರಿಯೋಸಾನಪ್ಪತ್ತಾ ಹೋನ್ತೀತಿ ನಿಬ್ಬಾನಪರಿಯೋಸಾನಾ।
Adhivāsanakkhantiyañca sucibhāvasīle ca adhippāyo etesanti khantisoraccādhippāyā. Akiñcanabhāve niggahaṇabhāve cittaṃ etesaṃ abhinivisatīti ākiñcaññābhinivesā. Nibbānappattā pariyosānappattā hontīti nibbānapariyosānā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೧೦. ಖತ್ತಿಯಸುತ್ತಂ • 10. Khattiyasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೧೦. ಖತ್ತಿಯಸುತ್ತವಣ್ಣನಾ • 10. Khattiyasuttavaṇṇanā
