| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) |
༡༠. ཁཏྟིཡསུཏྟཝཎྞནཱ
10. Khattiyasuttavaṇṇanā
༥༢. དསམེ བྷོགཱདྷིཔྤཱཡཱཏི བྷོགསཾཧརཎཏྠཾ ཋཔིཏཱདྷིཔྤཱཡཱ པཝཏྟཨཛ྄ཛྷཱསཡཱ། པཉྙཱུཔཝིཙཱརཱཏི པཉྙཝནྟོ བྷཝེཡྻཱམཱཏི ཨེཝཾ པཉྙཏྠཱཡ པཝཏྟཱུཔཝིཙཱརཱ། ཨཡམེཝ ནེསཾ ཝིཙཱརོ ཙིཏྟེ ཨུཔཝིཙརཏི། བལཱདྷིཊྛཱནཱཏི བལཀཱཡཱདྷིཊྛཱནཱ། བལཀཱཡཉྷི ལདྡྷཱ ཏེ ལདྡྷཔཏིཊྛཱ ནཱམ ཧོནྟི། པཐཝིབྷིནིཝེསཱཏི པཐཝིསཱམིནོ བྷཝིསྶཱམཱཏི ཨེཝཾ པཐཝིཨཏྠཱཡ ཀཏཙིཏྟཱབྷིནིཝེསཱ། ཨིསྶརིཡཔརིཡོསཱནཱཏི རཛྫཱབྷིསེཀཔརིཡོསཱནཱ། ཨབྷིསེཀཉྷི པཏྭཱ ཏེ པརིཡོསཱནཔྤཏྟཱ ནཱམ ཧོནྟི། ཨིམིནཱ ནཡེན སབྦཏྠ ཨཏྠོ ཝེདིཏབྦོ།
52. Dasame bhogādhippāyāti bhogasaṃharaṇatthaṃ ṭhapitādhippāyā pavattaajjhāsayā. Paññūpavicārāti paññavanto bhaveyyāmāti evaṃ paññatthāya pavattūpavicārā. Ayameva nesaṃ vicāro citte upavicarati. Balādhiṭṭhānāti balakāyādhiṭṭhānā. Balakāyañhi laddhā te laddhapatiṭṭhā nāma honti. Pathavibhinivesāti pathavisāmino bhavissāmāti evaṃ pathaviatthāya katacittābhinivesā. Issariyapariyosānāti rajjābhisekapariyosānā. Abhisekañhi patvā te pariyosānappattā nāma honti. Iminā nayena sabbattha attho veditabbo.
སེསཔདེསུ པནེཏྠ ཨཡམདྷིཔྤཱཡོ – བྲཱཧྨཎཱ ཏཱཝ མནྟེ ལབྷིཏྭཱ ལདྡྷཔཏིཊྛཱ ནཱམ ཧོནྟི, གཧཔཏིཀཱ ཡཾཀིཉྩི སིཔྤཾ, ཨིཏྠཱི ཀུལདཱཡཛྫསཱམིཀཾ པུཏྟཾ, ཙོརཱ ཡཾཀིཉྩི ཨཱཝུདྷསཏྠཾ , སམཎཱ སཱིལཔརིཔུཎྞཱ ལདྡྷཔཏིཊྛཱ ནཱམ ཧོནྟི། ཏསྨཱ མནྟཱདྷིཊྛཱནཱཏིཨཱདཱིནི ཝུཏྟཱནི།
Sesapadesu panettha ayamadhippāyo – brāhmaṇā tāva mante labhitvā laddhapatiṭṭhā nāma honti, gahapatikā yaṃkiñci sippaṃ, itthī kuladāyajjasāmikaṃ puttaṃ, corā yaṃkiñci āvudhasatthaṃ , samaṇā sīlaparipuṇṇā laddhapatiṭṭhā nāma honti. Tasmā mantādhiṭṭhānātiādīni vuttāni.
བྲཱཧྨཎཱནཉྩ ‘‘ཡཉྙཾ ཡཛིསྶཱམཱ’’ཏི ཙིཏྟཾ ཨབྷིནིཝིསཏི, བྲཧྨལོཀེ པཏྟེ པརིཡོསཱནཔྤཏྟཱ ནཱམ ཧོནྟི། ཏསྨཱ ཏེ ཡཉྙཱབྷིནིཝེསཱ བྲཧྨལོཀཔརིཡོསཱནཱཏི ཝུཏྟཱ། ཀམྨནྟཀརཎཏྠཱཡ མནོ ཨེཏེསཾ ཨབྷིནིཝིསཏཱིཏི ཀམྨནྟཱབྷིནིཝེསཱ། ཀམྨེ ནིཊྛིཏེ པརིཡོསཱནཔྤཏྟཱ ནཱམ ཧོནྟཱིཏི ནིཊྛིཏཀམྨནྟཔརིཡོསཱནཱ།
Brāhmaṇānañca ‘‘yaññaṃ yajissāmā’’ti cittaṃ abhinivisati, brahmaloke patte pariyosānappattā nāma honti. Tasmā te yaññābhinivesā brahmalokapariyosānāti vuttā. Kammantakaraṇatthāya mano etesaṃ abhinivisatīti kammantābhinivesā. Kamme niṭṭhite pariyosānappattā nāma hontīti niṭṭhitakammantapariyosānā.
པུརིསཱདྷིཔྤཱཡཱཏི པུརིསེསུ པཝཏྟཨཛ྄ཛྷཱསཡཱ། ཨལངྐཱརཏྠཱཡ མནོ ཨུཔཝིཙརཏི ཨེཏིསྶཱཏི ཨལངྐཱརཱུཔཝིཙཱརཱ། ཨསཔཏྟཱི ཧུཏྭཱ ཨེཀིཀཱཝ གྷརེ ཝསེཡྻནྟི ཨེཝམསྶཱ ཙིཏྟཾ ཨབྷིནིཝིསཏཱིཏི ཨསཔཏྟཱིབྷིནིཝེསཱ། གྷརཱཝཱསིསྶརིཡེ ལདྡྷེ པརིཡོསཱནཔྤཏྟཱ ནཱམ ཧོནྟཱིཏི ཨིསྶརིཡཔརིཡོསཱནཱ།
Purisādhippāyāti purisesu pavattaajjhāsayā. Alaṅkāratthāya mano upavicarati etissāti alaṅkārūpavicārā. Asapattī hutvā ekikāva ghare vaseyyanti evamassā cittaṃ abhinivisatīti asapattībhinivesā. Gharāvāsissariye laddhe pariyosānappattā nāma hontīti issariyapariyosānā.
པརབྷཎྜསྶ ཨཱདཱནེ ཨདྷིཔྤཱཡོ ཨེཏེསནྟི ཨཱདཱནཱདྷིཔྤཱཡཱ། གཧནེ ནིལཱིཡནཊྛཱནེ ཨེཏེསཾ མནོ ཨུཔཝིཙརཏཱིཏི གཧནཱུཔཝིཙཱརཱ། ཨནྡྷཀཱརཏྠཱཡ ཨེཏེསཾ ཙིཏྟཾ ཨབྷིནིཝིསཏཱིཏི ཨནྡྷཀཱརཱབྷིནིཝེསཱ། ཨདསྶནཔྤཏྟཱ པརིཡོསཱནཔྤཏྟཱ ཧོནྟཱིཏི ཨདསྶནཔརིཡོསཱནཱ།
Parabhaṇḍassa ādāne adhippāyo etesanti ādānādhippāyā. Gahane nilīyanaṭṭhāne etesaṃ mano upavicaratīti gahanūpavicārā. Andhakāratthāya etesaṃ cittaṃ abhinivisatīti andhakārābhinivesā. Adassanappattā pariyosānappattā hontīti adassanapariyosānā.
ཨདྷིཝཱསནཀྑནྟིཡཉྩ སུཙིབྷཱཝསཱིལེ ཙ ཨདྷིཔྤཱཡོ ཨེཏེསནྟི ཁནྟིསོརཙྩཱདྷིཔྤཱཡཱ། ཨཀིཉྩནབྷཱཝེ ནིགྒཧཎབྷཱཝེ ཙིཏྟཾ ཨེཏེསཾ ཨབྷིནིཝིསཏཱིཏི ཨཱཀིཉྩཉྙཱབྷིནིཝེསཱ། ནིབྦཱནཔྤཏྟཱ པརིཡོསཱནཔྤཏྟཱ ཧོནྟཱིཏི ནིབྦཱནཔརིཡོསཱནཱ།
Adhivāsanakkhantiyañca sucibhāvasīle ca adhippāyo etesanti khantisoraccādhippāyā. Akiñcanabhāve niggahaṇabhāve cittaṃ etesaṃ abhinivisatīti ākiñcaññābhinivesā. Nibbānappattā pariyosānappattā hontīti nibbānapariyosānā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༡༠. ཁཏྟིཡསུཏྟཾ • 10. Khattiyasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡༠. ཁཏྟིཡསུཏྟཝཎྞནཱ • 10. Khattiyasuttavaṇṇanā
