| Library / Tipiṭaka / ਤਿਪਿਟਕ • Tipiṭaka / ਅਙ੍ਗੁਤ੍ਤਰਨਿਕਾਯ (ਅਟ੍ਠਕਥਾ) • Aṅguttaranikāya (aṭṭhakathā) |
੧੦. ਖਤ੍ਤਿਯਸੁਤ੍ਤવਣ੍ਣਨਾ
10. Khattiyasuttavaṇṇanā
੫੨. ਦਸਮੇ ਭੋਗਾਧਿਪ੍ਪਾਯਾਤਿ ਭੋਗਸਂਹਰਣਤ੍ਥਂ ਠਪਿਤਾਧਿਪ੍ਪਾਯਾ ਪવਤ੍ਤਅਜ੍ਝਾਸਯਾ। ਪਞ੍ਞੂਪવਿਚਾਰਾਤਿ ਪਞ੍ਞવਨ੍ਤੋ ਭવੇਯ੍ਯਾਮਾਤਿ ਏવਂ ਪਞ੍ਞਤ੍ਥਾਯ ਪવਤ੍ਤੂਪવਿਚਾਰਾ। ਅਯਮੇવ ਨੇਸਂ વਿਚਾਰੋ ਚਿਤ੍ਤੇ ਉਪવਿਚਰਤਿ। ਬਲਾਧਿਟ੍ਠਾਨਾਤਿ ਬਲਕਾਯਾਧਿਟ੍ਠਾਨਾ। ਬਲਕਾਯਞ੍ਹਿ ਲਦ੍ਧਾ ਤੇ ਲਦ੍ਧਪਤਿਟ੍ਠਾ ਨਾਮ ਹੋਨ੍ਤਿ। ਪਥવਿਭਿਨਿવੇਸਾਤਿ ਪਥવਿਸਾਮਿਨੋ ਭવਿਸ੍ਸਾਮਾਤਿ ਏવਂ ਪਥવਿਅਤ੍ਥਾਯ ਕਤਚਿਤ੍ਤਾਭਿਨਿવੇਸਾ। ਇਸ੍ਸਰਿਯਪਰਿਯੋਸਾਨਾਤਿ ਰਜ੍ਜਾਭਿਸੇਕਪਰਿਯੋਸਾਨਾ। ਅਭਿਸੇਕਞ੍ਹਿ ਪਤ੍વਾ ਤੇ ਪਰਿਯੋਸਾਨਪ੍ਪਤ੍ਤਾ ਨਾਮ ਹੋਨ੍ਤਿ। ਇਮਿਨਾ ਨਯੇਨ ਸਬ੍ਬਤ੍ਥ ਅਤ੍ਥੋ વੇਦਿਤਬ੍ਬੋ।
52. Dasame bhogādhippāyāti bhogasaṃharaṇatthaṃ ṭhapitādhippāyā pavattaajjhāsayā. Paññūpavicārāti paññavanto bhaveyyāmāti evaṃ paññatthāya pavattūpavicārā. Ayameva nesaṃ vicāro citte upavicarati. Balādhiṭṭhānāti balakāyādhiṭṭhānā. Balakāyañhi laddhā te laddhapatiṭṭhā nāma honti. Pathavibhinivesāti pathavisāmino bhavissāmāti evaṃ pathaviatthāya katacittābhinivesā. Issariyapariyosānāti rajjābhisekapariyosānā. Abhisekañhi patvā te pariyosānappattā nāma honti. Iminā nayena sabbattha attho veditabbo.
ਸੇਸਪਦੇਸੁ ਪਨੇਤ੍ਥ ਅਯਮਧਿਪ੍ਪਾਯੋ – ਬ੍ਰਾਹ੍ਮਣਾ ਤਾવ ਮਨ੍ਤੇ ਲਭਿਤ੍વਾ ਲਦ੍ਧਪਤਿਟ੍ਠਾ ਨਾਮ ਹੋਨ੍ਤਿ, ਗਹਪਤਿਕਾ ਯਂਕਿਞ੍ਚਿ ਸਿਪ੍ਪਂ, ਇਤ੍ਥੀ ਕੁਲਦਾਯਜ੍ਜਸਾਮਿਕਂ ਪੁਤ੍ਤਂ, ਚੋਰਾ ਯਂਕਿਞ੍ਚਿ ਆવੁਧਸਤ੍ਥਂ , ਸਮਣਾ ਸੀਲਪਰਿਪੁਣ੍ਣਾ ਲਦ੍ਧਪਤਿਟ੍ਠਾ ਨਾਮ ਹੋਨ੍ਤਿ। ਤਸ੍ਮਾ ਮਨ੍ਤਾਧਿਟ੍ਠਾਨਾਤਿਆਦੀਨਿ વੁਤ੍ਤਾਨਿ।
Sesapadesu panettha ayamadhippāyo – brāhmaṇā tāva mante labhitvā laddhapatiṭṭhā nāma honti, gahapatikā yaṃkiñci sippaṃ, itthī kuladāyajjasāmikaṃ puttaṃ, corā yaṃkiñci āvudhasatthaṃ , samaṇā sīlaparipuṇṇā laddhapatiṭṭhā nāma honti. Tasmā mantādhiṭṭhānātiādīni vuttāni.
ਬ੍ਰਾਹ੍ਮਣਾਨਞ੍ਚ ‘‘ਯਞ੍ਞਂ ਯਜਿਸ੍ਸਾਮਾ’’ਤਿ ਚਿਤ੍ਤਂ ਅਭਿਨਿવਿਸਤਿ, ਬ੍ਰਹ੍ਮਲੋਕੇ ਪਤ੍ਤੇ ਪਰਿਯੋਸਾਨਪ੍ਪਤ੍ਤਾ ਨਾਮ ਹੋਨ੍ਤਿ। ਤਸ੍ਮਾ ਤੇ ਯਞ੍ਞਾਭਿਨਿવੇਸਾ ਬ੍ਰਹ੍ਮਲੋਕਪਰਿਯੋਸਾਨਾਤਿ વੁਤ੍ਤਾ। ਕਮ੍ਮਨ੍ਤਕਰਣਤ੍ਥਾਯ ਮਨੋ ਏਤੇਸਂ ਅਭਿਨਿવਿਸਤੀਤਿ ਕਮ੍ਮਨ੍ਤਾਭਿਨਿવੇਸਾ। ਕਮ੍ਮੇ ਨਿਟ੍ਠਿਤੇ ਪਰਿਯੋਸਾਨਪ੍ਪਤ੍ਤਾ ਨਾਮ ਹੋਨ੍ਤੀਤਿ ਨਿਟ੍ਠਿਤਕਮ੍ਮਨ੍ਤਪਰਿਯੋਸਾਨਾ।
Brāhmaṇānañca ‘‘yaññaṃ yajissāmā’’ti cittaṃ abhinivisati, brahmaloke patte pariyosānappattā nāma honti. Tasmā te yaññābhinivesā brahmalokapariyosānāti vuttā. Kammantakaraṇatthāya mano etesaṃ abhinivisatīti kammantābhinivesā. Kamme niṭṭhite pariyosānappattā nāma hontīti niṭṭhitakammantapariyosānā.
ਪੁਰਿਸਾਧਿਪ੍ਪਾਯਾਤਿ ਪੁਰਿਸੇਸੁ ਪવਤ੍ਤਅਜ੍ਝਾਸਯਾ। ਅਲਙ੍ਕਾਰਤ੍ਥਾਯ ਮਨੋ ਉਪવਿਚਰਤਿ ਏਤਿਸ੍ਸਾਤਿ ਅਲਙ੍ਕਾਰੂਪવਿਚਾਰਾ। ਅਸਪਤ੍ਤੀ ਹੁਤ੍વਾ ਏਕਿਕਾવ ਘਰੇ વਸੇਯ੍ਯਨ੍ਤਿ ਏવਮਸ੍ਸਾ ਚਿਤ੍ਤਂ ਅਭਿਨਿવਿਸਤੀਤਿ ਅਸਪਤ੍ਤੀਭਿਨਿવੇਸਾ। ਘਰਾવਾਸਿਸ੍ਸਰਿਯੇ ਲਦ੍ਧੇ ਪਰਿਯੋਸਾਨਪ੍ਪਤ੍ਤਾ ਨਾਮ ਹੋਨ੍ਤੀਤਿ ਇਸ੍ਸਰਿਯਪਰਿਯੋਸਾਨਾ।
Purisādhippāyāti purisesu pavattaajjhāsayā. Alaṅkāratthāya mano upavicarati etissāti alaṅkārūpavicārā. Asapattī hutvā ekikāva ghare vaseyyanti evamassā cittaṃ abhinivisatīti asapattībhinivesā. Gharāvāsissariye laddhe pariyosānappattā nāma hontīti issariyapariyosānā.
ਪਰਭਣ੍ਡਸ੍ਸ ਆਦਾਨੇ ਅਧਿਪ੍ਪਾਯੋ ਏਤੇਸਨ੍ਤਿ ਆਦਾਨਾਧਿਪ੍ਪਾਯਾ। ਗਹਨੇ ਨਿਲੀਯਨਟ੍ਠਾਨੇ ਏਤੇਸਂ ਮਨੋ ਉਪવਿਚਰਤੀਤਿ ਗਹਨੂਪવਿਚਾਰਾ। ਅਨ੍ਧਕਾਰਤ੍ਥਾਯ ਏਤੇਸਂ ਚਿਤ੍ਤਂ ਅਭਿਨਿવਿਸਤੀਤਿ ਅਨ੍ਧਕਾਰਾਭਿਨਿવੇਸਾ। ਅਦਸ੍ਸਨਪ੍ਪਤ੍ਤਾ ਪਰਿਯੋਸਾਨਪ੍ਪਤ੍ਤਾ ਹੋਨ੍ਤੀਤਿ ਅਦਸ੍ਸਨਪਰਿਯੋਸਾਨਾ।
Parabhaṇḍassa ādāne adhippāyo etesanti ādānādhippāyā. Gahane nilīyanaṭṭhāne etesaṃ mano upavicaratīti gahanūpavicārā. Andhakāratthāya etesaṃ cittaṃ abhinivisatīti andhakārābhinivesā. Adassanappattā pariyosānappattā hontīti adassanapariyosānā.
ਅਧਿવਾਸਨਕ੍ਖਨ੍ਤਿਯਞ੍ਚ ਸੁਚਿਭਾવਸੀਲੇ ਚ ਅਧਿਪ੍ਪਾਯੋ ਏਤੇਸਨ੍ਤਿ ਖਨ੍ਤਿਸੋਰਚ੍ਚਾਧਿਪ੍ਪਾਯਾ। ਅਕਿਞ੍ਚਨਭਾવੇ ਨਿਗ੍ਗਹਣਭਾવੇ ਚਿਤ੍ਤਂ ਏਤੇਸਂ ਅਭਿਨਿવਿਸਤੀਤਿ ਆਕਿਞ੍ਚਞ੍ਞਾਭਿਨਿવੇਸਾ। ਨਿਬ੍ਬਾਨਪ੍ਪਤ੍ਤਾ ਪਰਿਯੋਸਾਨਪ੍ਪਤ੍ਤਾ ਹੋਨ੍ਤੀਤਿ ਨਿਬ੍ਬਾਨਪਰਿਯੋਸਾਨਾ।
Adhivāsanakkhantiyañca sucibhāvasīle ca adhippāyo etesanti khantisoraccādhippāyā. Akiñcanabhāve niggahaṇabhāve cittaṃ etesaṃ abhinivisatīti ākiñcaññābhinivesā. Nibbānappattā pariyosānappattā hontīti nibbānapariyosānā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਅਙ੍ਗੁਤ੍ਤਰਨਿਕਾਯ • Aṅguttaranikāya / ੧੦. ਖਤ੍ਤਿਯਸੁਤ੍ਤਂ • 10. Khattiyasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਅਙ੍ਗੁਤ੍ਤਰਨਿਕਾਯ (ਟੀਕਾ) • Aṅguttaranikāya (ṭīkā) / ੧੦. ਖਤ੍ਤਿਯਸੁਤ੍ਤવਣ੍ਣਨਾ • 10. Khattiyasuttavaṇṇanā
