| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. খেমকসুত্তং
7. Khemakasuttaṃ
৮৯. একং সমযং সম্বহুলা থেরা ভিক্খূ কোসম্বিযং ৰিহরন্তি ঘোসিতারামে। তেন খো পন সমযেন আযস্মা খেমকো বদরিকারামে ৰিহরতি আবাধিকো দুক্খিতো বাল়্হগিলানো। অথ খো থেরা ভিক্খূ সাযন্হসমযং পটিসল্লানা ৰুট্ঠিতা আযস্মন্তং দাসকং আমন্তেসুং – ‘‘এহি ত্ৰং, আৰুসো দাসক, যেন খেমকো ভিক্খু তেনুপসঙ্কম; উপসঙ্কমিত্ৰা খেমকং ভিক্খুং এৰং ৰদেহি – ‘থেরা তং, আৰুসো খেমক, এৰমাহংসু – কচ্চি তে, আৰুসো, খমনীযং, কচ্চি যাপনীযং, কচ্চি দুক্খা ৰেদনা পটিক্কমন্তি নো অভিক্কমন্তি, পটিক্কমোসানং পঞ্ঞাযতি নো অভিক্কমো’’’তি? ‘‘এৰমাৰুসো’’তি খো আযস্মা দাসকো থেরানং ভিক্খূনং পটিস্সুত্ৰা যেনাযস্মা খেমকো তেনুপসঙ্কমি; উপসঙ্কমিত্ৰা আযস্মন্তং খেমকং এতদৰোচ – ‘‘থেরা তং, আৰুসো খেমক, এৰমাহংসু – ‘কচ্চি তে, আৰুসো, খমনীযং…পে॰… নো অভিক্কমো’’’তি? ‘‘ন মে, আৰুসো, খমনীযং ন যাপনীযং…পে॰… অভিক্কমোসানং পঞ্ঞাযতি নো পটিক্কমো’’তি।
89. Ekaṃ samayaṃ sambahulā therā bhikkhū kosambiyaṃ viharanti ghositārāme. Tena kho pana samayena āyasmā khemako badarikārāme viharati ābādhiko dukkhito bāḷhagilāno. Atha kho therā bhikkhū sāyanhasamayaṃ paṭisallānā vuṭṭhitā āyasmantaṃ dāsakaṃ āmantesuṃ – ‘‘ehi tvaṃ, āvuso dāsaka, yena khemako bhikkhu tenupasaṅkama; upasaṅkamitvā khemakaṃ bhikkhuṃ evaṃ vadehi – ‘therā taṃ, āvuso khemaka, evamāhaṃsu – kacci te, āvuso, khamanīyaṃ, kacci yāpanīyaṃ, kacci dukkhā vedanā paṭikkamanti no abhikkamanti, paṭikkamosānaṃ paññāyati no abhikkamo’’’ti? ‘‘Evamāvuso’’ti kho āyasmā dāsako therānaṃ bhikkhūnaṃ paṭissutvā yenāyasmā khemako tenupasaṅkami; upasaṅkamitvā āyasmantaṃ khemakaṃ etadavoca – ‘‘therā taṃ, āvuso khemaka, evamāhaṃsu – ‘kacci te, āvuso, khamanīyaṃ…pe… no abhikkamo’’’ti? ‘‘Na me, āvuso, khamanīyaṃ na yāpanīyaṃ…pe… abhikkamosānaṃ paññāyati no paṭikkamo’’ti.
অথ খো আযস্মা দাসকো যেন থেরা ভিক্খূ তেনুপসঙ্কমি; উপসঙ্কমিত্ৰা থেরে ভিক্খূ এতদৰোচ – ‘‘খেমকো, আৰুসো, ভিক্খু এৰমাহ – ‘ন মে, আৰুসো, খমনীযং…পে॰… অভিক্কমোসানং পঞ্ঞাযতি নো পটিক্কমো’’’তি। ‘‘এহি ত্ৰং, আৰুসো দাসক, যেন খেমকো ভিক্খু তেনুপসঙ্কম; উপসঙ্কমিত্ৰা খেমকং ভিক্খুং এৰং ৰদেহি – ‘থেরা তং, আৰুসো খেমক, এৰমাহংসু – পঞ্চিমে, আৰুসো, উপাদানক্খন্ধা ৰুত্তা ভগৰতা, সেয্যথিদং – রূপুপাদানক্খন্ধো, ৰেদনুপাদানক্খন্ধো, সঞ্ঞুপাদানক্খন্ধো, সঙ্খারুপাদানক্খন্ধো, ৰিঞ্ঞাণুপাদানক্খন্ধো । ইমেসু আযস্মা খেমকো পঞ্চসু উপাদানক্খন্ধেসু কিঞ্চি অত্তং ৰা অত্তনিযং ৰা সমনুপস্সতী’’’তি?
Atha kho āyasmā dāsako yena therā bhikkhū tenupasaṅkami; upasaṅkamitvā there bhikkhū etadavoca – ‘‘khemako, āvuso, bhikkhu evamāha – ‘na me, āvuso, khamanīyaṃ…pe… abhikkamosānaṃ paññāyati no paṭikkamo’’’ti. ‘‘Ehi tvaṃ, āvuso dāsaka, yena khemako bhikkhu tenupasaṅkama; upasaṅkamitvā khemakaṃ bhikkhuṃ evaṃ vadehi – ‘therā taṃ, āvuso khemaka, evamāhaṃsu – pañcime, āvuso, upādānakkhandhā vuttā bhagavatā, seyyathidaṃ – rūpupādānakkhandho, vedanupādānakkhandho, saññupādānakkhandho, saṅkhārupādānakkhandho, viññāṇupādānakkhandho . Imesu āyasmā khemako pañcasu upādānakkhandhesu kiñci attaṃ vā attaniyaṃ vā samanupassatī’’’ti?
‘‘এৰমাৰুসো’’তি খো আযস্মা দাসকো থেরানং ভিক্খূনং পটিস্সুত্ৰা যেনাযস্মা খেমকো তেনুপসঙ্কমি; উপসঙ্কমিত্ৰা…পে॰… থেরা তং, আৰুসো খেমক, এৰমাহংসু – ‘‘পঞ্চিমে, আৰুসো, উপাদানক্খন্ধা ৰুত্তা ভগৰতা, সেয্যথিদং – রূপুপাদানক্খন্ধো…পে॰… ৰিঞ্ঞাণুপাদানক্খন্ধো। ইমেসু আযস্মা খেমকো পঞ্চসু উপাদানক্খন্ধেসু কিঞ্চি অত্তং ৰা অত্তনিযং ৰা সমনুপস্সতী’’তি? ‘‘পঞ্চিমে , আৰুসো, উপাদানক্খন্ধা ৰুত্তা ভগৰতা, সেয্যথিদং – রূপুপাদানক্খন্ধো…পে॰… ৰিঞ্ঞাণুপাদানক্খন্ধো। ইমেসু খ্ৰাহং, আৰুসো, পঞ্চসু উপাদানক্খন্ধেসু ন কিঞ্চি অত্তং ৰা অত্তনিযং ৰা সমনুপস্সামী’’তি।
‘‘Evamāvuso’’ti kho āyasmā dāsako therānaṃ bhikkhūnaṃ paṭissutvā yenāyasmā khemako tenupasaṅkami; upasaṅkamitvā…pe… therā taṃ, āvuso khemaka, evamāhaṃsu – ‘‘pañcime, āvuso, upādānakkhandhā vuttā bhagavatā, seyyathidaṃ – rūpupādānakkhandho…pe… viññāṇupādānakkhandho. Imesu āyasmā khemako pañcasu upādānakkhandhesu kiñci attaṃ vā attaniyaṃ vā samanupassatī’’ti? ‘‘Pañcime , āvuso, upādānakkhandhā vuttā bhagavatā, seyyathidaṃ – rūpupādānakkhandho…pe… viññāṇupādānakkhandho. Imesu khvāhaṃ, āvuso, pañcasu upādānakkhandhesu na kiñci attaṃ vā attaniyaṃ vā samanupassāmī’’ti.
অথ খো আযস্মা দাসকো যেন থেরা ভিক্খূ তেনুপসঙ্কমি; উপসঙ্কমিত্ৰা থেরে ভিক্খূ এতদৰোচ – ‘‘খেমকো, আৰুসো, ভিক্খু এৰমাহ – ‘পঞ্চিমে, আৰুসো, উপাদানক্খন্ধা ৰুত্তা ভগৰতা, সেয্যথিদং – রূপুপাদানক্খন্ধো…পে॰… ৰিঞ্ঞাণুপাদানক্খন্ধো। ইমেসু খ্ৰাহং, আৰুসো, পঞ্চসু উপাদানক্খন্ধেসু ন কিঞ্চি অত্তং ৰা অত্তনিযং ৰা সমনুপস্সামী’’’তি। ‘‘এহি ত্ৰং, আৰুসো দাসক, যেন খেমকো ভিক্খু তেনুপসঙ্কম; উপসঙ্কমিত্ৰা খেমকং ভিক্খুং এৰং ৰদেহি – ‘থেরা তং, আৰুসো খেমক, এৰমাহংসু – পঞ্চিমে, আৰুসো, উপাদানক্খন্ধা ৰুত্তা ভগৰতা, সেয্যথিদং – রূপুপাদানক্খন্ধো…পে॰… ৰিঞ্ঞাণুপাদানক্খন্ধো। নো চে কিরাযস্মা খেমকো ইমেসু পঞ্চসু উপাদানক্খন্ধেসু কিঞ্চি অত্তং ৰা অত্তনিযং ৰা সমনুপস্সতি। তেনহাযস্মা খেমকো অরহং খীণাসৰো’’’তি।
Atha kho āyasmā dāsako yena therā bhikkhū tenupasaṅkami; upasaṅkamitvā there bhikkhū etadavoca – ‘‘khemako, āvuso, bhikkhu evamāha – ‘pañcime, āvuso, upādānakkhandhā vuttā bhagavatā, seyyathidaṃ – rūpupādānakkhandho…pe… viññāṇupādānakkhandho. Imesu khvāhaṃ, āvuso, pañcasu upādānakkhandhesu na kiñci attaṃ vā attaniyaṃ vā samanupassāmī’’’ti. ‘‘Ehi tvaṃ, āvuso dāsaka, yena khemako bhikkhu tenupasaṅkama; upasaṅkamitvā khemakaṃ bhikkhuṃ evaṃ vadehi – ‘therā taṃ, āvuso khemaka, evamāhaṃsu – pañcime, āvuso, upādānakkhandhā vuttā bhagavatā, seyyathidaṃ – rūpupādānakkhandho…pe… viññāṇupādānakkhandho. No ce kirāyasmā khemako imesu pañcasu upādānakkhandhesu kiñci attaṃ vā attaniyaṃ vā samanupassati. Tenahāyasmā khemako arahaṃ khīṇāsavo’’’ti.
‘‘এৰমাৰুসো’’তি খো আযস্মা দাসকো থেরানং ভিক্খূনং পটিস্সুত্ৰা যেনাযস্মা খেমকো…পে॰… থেরা তং, আৰুসো খেমক, এৰমাহংসু – ‘‘পঞ্চিমে, আৰুসো, উপাদানক্খন্ধা ৰুত্তা ভগৰতা, সেয্যথিদং – রূপুপাদানক্খন্ধো…পে॰… ৰিঞ্ঞাণুপাদানক্খন্ধো; নো চে কিরাযস্মা খেমকো ইমেসু পঞ্চসু উপাদানক্খন্ধেসু কিঞ্চি অত্তং ৰা অত্তনিযং ৰা সমনুপস্সতি, তেনহাযস্মা খেমকো অরহং খীণাসৰো’’তি। ‘‘পঞ্চিমে, আৰুসো, উপাদানক্খন্ধা ৰুত্তা ভগৰতা, সেয্যথিদং – রূপুপাদানক্খন্ধো…পে॰… ৰিঞ্ঞাণুপাদানক্খন্ধো। ইমেসু খ্ৰাহং, আৰুসো, পঞ্চসু উপাদানক্খন্ধেসু ন কিঞ্চি অত্তং ৰা অত্তনিযং ৰা সমনুপস্সামি , ন চম্হি অরহং খীণাসৰো; অপি চ মে, আৰুসো, পঞ্চসু উপাদানক্খন্ধেসু ‘অস্মী’তি অধিগতং, ‘অযমহমস্মী’তি ন চ সমনুপস্সামী’’তি।
‘‘Evamāvuso’’ti kho āyasmā dāsako therānaṃ bhikkhūnaṃ paṭissutvā yenāyasmā khemako…pe… therā taṃ, āvuso khemaka, evamāhaṃsu – ‘‘pañcime, āvuso, upādānakkhandhā vuttā bhagavatā, seyyathidaṃ – rūpupādānakkhandho…pe… viññāṇupādānakkhandho; no ce kirāyasmā khemako imesu pañcasu upādānakkhandhesu kiñci attaṃ vā attaniyaṃ vā samanupassati, tenahāyasmā khemako arahaṃ khīṇāsavo’’ti. ‘‘Pañcime, āvuso, upādānakkhandhā vuttā bhagavatā, seyyathidaṃ – rūpupādānakkhandho…pe… viññāṇupādānakkhandho. Imesu khvāhaṃ, āvuso, pañcasu upādānakkhandhesu na kiñci attaṃ vā attaniyaṃ vā samanupassāmi , na camhi arahaṃ khīṇāsavo; api ca me, āvuso, pañcasu upādānakkhandhesu ‘asmī’ti adhigataṃ, ‘ayamahamasmī’ti na ca samanupassāmī’’ti.
অথ খো আযস্মা দাসকো যেন থেরা ভিক্খূ…পে॰… থেরে ভিক্খূ এতদৰোচ – ‘‘খেমকো, আৰুসো, ভিক্খু এৰমাহ – পঞ্চিমে, আৰুসো, উপাদানক্খন্ধা ৰুত্তা ভগৰতা, সেয্যথিদং – রূপুপাদানক্খন্ধো…পে॰… ৰিঞ্ঞাণুপাদানক্খন্ধো। ইমেসু খ্ৰাহং, আৰুসো, পঞ্চসু উপাদানক্খন্ধেসু ন কিঞ্চি অত্তং ৰা অত্তনিযং ৰা সমনুপস্সামি, ন চম্হি অরহং খীণাসৰো; অপি চ মে , আৰুসো, পঞ্চসু উপাদানক্খন্ধেসু ‘অস্মী’তি অধিগতং, ‘অযমহমস্মী’তি ন চ সমনুপস্সামী’’তি।
Atha kho āyasmā dāsako yena therā bhikkhū…pe… there bhikkhū etadavoca – ‘‘khemako, āvuso, bhikkhu evamāha – pañcime, āvuso, upādānakkhandhā vuttā bhagavatā, seyyathidaṃ – rūpupādānakkhandho…pe… viññāṇupādānakkhandho. Imesu khvāhaṃ, āvuso, pañcasu upādānakkhandhesu na kiñci attaṃ vā attaniyaṃ vā samanupassāmi, na camhi arahaṃ khīṇāsavo; api ca me , āvuso, pañcasu upādānakkhandhesu ‘asmī’ti adhigataṃ, ‘ayamahamasmī’ti na ca samanupassāmī’’ti.
‘‘এহি ত্ৰং, আৰুসো দাসক, যেন খেমকো ভিক্খু তেনুপসঙ্কম; উপসঙ্কমিত্ৰা খেমকং ভিক্খুং এৰং ৰদেহি – ‘থেরা তং, আৰুসো খেমক, এৰমাহংসু – যমেতং, আৰুসো খেমক, অস্মীতি ৰদেসি, কিমেতং অস্মীতি ৰদেসি? রূপং অস্মীতি ৰদেসি, অঞ্ঞত্র রূপা অস্মীতি ৰদেসি, ৰেদনং… সঞ্ঞং… সঙ্খারে… ৰিঞ্ঞাণং অস্মীতি ৰদেসি, অঞ্ঞত্র ৰিঞ্ঞাণা অস্মীতি ৰদেসি। যমেতং, আৰুসো খেমক, অস্মীতি ৰদেসি। কিমেতং অস্মীতি ৰদেসী’’’তি?
‘‘Ehi tvaṃ, āvuso dāsaka, yena khemako bhikkhu tenupasaṅkama; upasaṅkamitvā khemakaṃ bhikkhuṃ evaṃ vadehi – ‘therā taṃ, āvuso khemaka, evamāhaṃsu – yametaṃ, āvuso khemaka, asmīti vadesi, kimetaṃ asmīti vadesi? Rūpaṃ asmīti vadesi, aññatra rūpā asmīti vadesi, vedanaṃ… saññaṃ… saṅkhāre… viññāṇaṃ asmīti vadesi, aññatra viññāṇā asmīti vadesi. Yametaṃ, āvuso khemaka, asmīti vadesi. Kimetaṃ asmīti vadesī’’’ti?
‘‘এৰমাৰুসো’’তি খো আযস্মা দাসকো থেরানং ভিক্খূনং পটিস্সুত্ৰা যেনাযস্মা খেমকো তেনুপসঙ্কমি; উপসঙ্কমিত্ৰা আযস্মন্তং খেমকং এতদৰোচ – থেরা তং, আৰুসো খেমক, এৰমাহংসু – ‘‘যমেতং, আৰুসো খেমক, ‘অস্মী’তি ৰদেসি, কিমেতং ‘অস্মী’তি ৰদেসি? রূপং ‘অস্মী’তি ৰদেসি অঞ্ঞত্র রূপা ‘অস্মী’তি ৰদেসি? ৰেদনং… সঞ্ঞং… সঙ্খারে… ৰিঞ্ঞাণং ‘অস্মী’তি ৰদেসি অঞ্ঞত্র ৰিঞ্ঞাণা ‘অস্মী’তি ৰদেসি? যমেতং, আৰুসো খেমক, ‘অস্মী’তি ৰদেসি, কিমেতং ‘অস্মী’তি ৰদেসি’’তি? ‘‘অলং, আৰুসো দাসক, কিং ইমায সন্ধাৰনিকায! আহরাৰুসো, দণ্ডং; অহমেৰ যেন থেরা ভিক্খূ তেনুপসঙ্কমিস্সামী’’তি।
‘‘Evamāvuso’’ti kho āyasmā dāsako therānaṃ bhikkhūnaṃ paṭissutvā yenāyasmā khemako tenupasaṅkami; upasaṅkamitvā āyasmantaṃ khemakaṃ etadavoca – therā taṃ, āvuso khemaka, evamāhaṃsu – ‘‘yametaṃ, āvuso khemaka, ‘asmī’ti vadesi, kimetaṃ ‘asmī’ti vadesi? Rūpaṃ ‘asmī’ti vadesi aññatra rūpā ‘asmī’ti vadesi? Vedanaṃ… saññaṃ… saṅkhāre… viññāṇaṃ ‘asmī’ti vadesi aññatra viññāṇā ‘asmī’ti vadesi? Yametaṃ, āvuso khemaka, ‘asmī’ti vadesi, kimetaṃ ‘asmī’ti vadesi’’ti? ‘‘Alaṃ, āvuso dāsaka, kiṃ imāya sandhāvanikāya! Āharāvuso, daṇḍaṃ; ahameva yena therā bhikkhū tenupasaṅkamissāmī’’ti.
অথ খো আযস্মা খেমকো দণ্ডমোলুব্ভ যেন থেরা ভিক্খূ তেনুপসঙ্কমি; উপসঙ্কমিত্ৰা থেরেহি ভিক্খূহি সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নং খো আযস্মন্তং খেমকং থেরা ভিক্খূ এতদৰোচুং – ‘‘যমেতং, আৰুসো খেমক, ‘অস্মী’তি ৰদেসি, কিমেতং ‘অস্মী’তি ৰদেসি? রূপং ‘অস্মী’তি ৰদেসি, অঞ্ঞত্র রূপা ‘অস্মী’তি ৰদেসি? ৰেদনং… সঞ্ঞং… সঙ্খারে… ৰিঞ্ঞাণং ‘অস্মী’তি ৰদেসি, অঞ্ঞত্র ৰিঞ্ঞাণা ‘অস্মী’তি ৰদেসি? যমেতং, আৰুসো খেমক, ‘অস্মী’তি ৰদেসি, কিমেতং ‘অস্মী’তি ৰদেসী’’তি? ‘‘ন খ্ৰাহং, আৰুসো, রূপং ‘অস্মী’তি ৰদামি; নপি অঞ্ঞত্র রূপা ‘অস্মী’তি ৰদামি। ন ৰেদনং… ন সঞ্ঞং… ন সঙ্খারে… ন ৰিঞ্ঞাণং ‘অস্মী’তি ৰদামি; নপি অঞ্ঞত্র ৰিঞ্ঞাণা ‘অস্মী’তি ৰদামি। অপি চ মে, আৰুসো, পঞ্চসু উপাদানক্খন্ধেসু ‘অস্মী’তি অধিগতং ‘অযমহমস্মী’তি ন চ সমনুপস্সামি’’।
Atha kho āyasmā khemako daṇḍamolubbha yena therā bhikkhū tenupasaṅkami; upasaṅkamitvā therehi bhikkhūhi saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinnaṃ kho āyasmantaṃ khemakaṃ therā bhikkhū etadavocuṃ – ‘‘yametaṃ, āvuso khemaka, ‘asmī’ti vadesi, kimetaṃ ‘asmī’ti vadesi? Rūpaṃ ‘asmī’ti vadesi, aññatra rūpā ‘asmī’ti vadesi? Vedanaṃ… saññaṃ… saṅkhāre… viññāṇaṃ ‘asmī’ti vadesi, aññatra viññāṇā ‘asmī’ti vadesi? Yametaṃ, āvuso khemaka, ‘asmī’ti vadesi, kimetaṃ ‘asmī’ti vadesī’’ti? ‘‘Na khvāhaṃ, āvuso, rūpaṃ ‘asmī’ti vadāmi; napi aññatra rūpā ‘asmī’ti vadāmi. Na vedanaṃ… na saññaṃ… na saṅkhāre… na viññāṇaṃ ‘asmī’ti vadāmi; napi aññatra viññāṇā ‘asmī’ti vadāmi. Api ca me, āvuso, pañcasu upādānakkhandhesu ‘asmī’ti adhigataṃ ‘ayamahamasmī’ti na ca samanupassāmi’’.
‘‘সেয্যথাপি, আৰুসো, উপ্পলস্স ৰা পদুমস্স ৰা পুণ্ডরীকস্স ৰা গন্ধো। যো নু খো এৰং ৰদেয্য – ‘পত্তস্স গন্ধো’তি ৰা ‘ৰণ্ণস্স 1 গন্ধো’তি ৰা ‘কিঞ্জক্খস্স গন্ধো’তি ৰা সম্মা নু খো সো ৰদমানো ৰদেয্যা’’তি? ‘‘নো হেতং, আৰুসো’’। ‘‘যথা কথং, পনাৰুসো, সম্মা ব্যাকরমানো ব্যাকরেয্যা’’তি? ‘‘‘পুপ্ফস্স গন্ধো’তি খো, আৰুসো, সম্মা ব্যাকরমানো ব্যাকরেয্যা’’তি। ‘‘এৰমেৰ খ্ৰাহং, আৰুসো, ন রূপং ‘অস্মী’তি ৰদামি, নপি অঞ্ঞত্র রূপা ‘অস্মী’তি ৰদামি। ন ৰেদনং… ন সঞ্ঞং… ন সঙ্খারে… ন ৰিঞ্ঞাণং ‘অস্মী’তি ৰদামি, নপি অঞ্ঞত্র ৰিঞ্ঞাণা ‘অস্মী’তি ৰদামি। অপি চ মে, আৰুসো, পঞ্চসু উপাদানক্খন্ধেসু ‘অস্মী’তি অধিগতং ‘অযমহমস্মী’তি ন চ সমনুপস্সামি’’।
‘‘Seyyathāpi, āvuso, uppalassa vā padumassa vā puṇḍarīkassa vā gandho. Yo nu kho evaṃ vadeyya – ‘pattassa gandho’ti vā ‘vaṇṇassa 2 gandho’ti vā ‘kiñjakkhassa gandho’ti vā sammā nu kho so vadamāno vadeyyā’’ti? ‘‘No hetaṃ, āvuso’’. ‘‘Yathā kathaṃ, panāvuso, sammā byākaramāno byākareyyā’’ti? ‘‘‘Pupphassa gandho’ti kho, āvuso, sammā byākaramāno byākareyyā’’ti. ‘‘Evameva khvāhaṃ, āvuso, na rūpaṃ ‘asmī’ti vadāmi, napi aññatra rūpā ‘asmī’ti vadāmi. Na vedanaṃ… na saññaṃ… na saṅkhāre… na viññāṇaṃ ‘asmī’ti vadāmi, napi aññatra viññāṇā ‘asmī’ti vadāmi. Api ca me, āvuso, pañcasu upādānakkhandhesu ‘asmī’ti adhigataṃ ‘ayamahamasmī’ti na ca samanupassāmi’’.
‘‘কিঞ্চাপি, আৰুসো, অরিযসাৰকস্স পঞ্চোরম্ভাগিযানি সংযোজনানি পহীনানি ভৰন্তি, অথ খ্ৰস্স হোতি – ‘যো চ পঞ্চসু উপাদানক্খন্ধেসু অনুসহগতো অস্মীতি মানো, অস্মীতি ছন্দো, অস্মীতি অনুসযো অসমূহতো। সো অপরেন সমযেন পঞ্চসু উপাদানক্খন্ধেসু উদযব্বযানুপস্সী ৰিহরতি – ইতি রূপং, ইতি রূপস্স সমুদযো, ইতি রূপস্স অত্থঙ্গমো; ইতি ৰেদনা… ইতি সঞ্ঞা… ইতি সঙ্খারা… ইতি ৰিঞ্ঞাণং, ইতি ৰিঞ্ঞাণস্স সমুদযো, ইতি ৰিঞ্ঞাণস্স অত্থঙ্গমো’তি। তস্সিমেসু পঞ্চসু উপাদানক্খন্ধেসু উদযব্বযানুপস্সিনো ৰিহরতো যোপিস্স হোতি পঞ্চসু উপাদানক্খন্ধেসু অনুসহগতো ‘অস্মী’তি, মানো ‘অস্মী’তি, ছন্দো ‘অস্মী’তি অনুসযো অসমূহতো, সোপি সমুগ্ঘাতং গচ্ছতি।
‘‘Kiñcāpi, āvuso, ariyasāvakassa pañcorambhāgiyāni saṃyojanāni pahīnāni bhavanti, atha khvassa hoti – ‘yo ca pañcasu upādānakkhandhesu anusahagato asmīti māno, asmīti chando, asmīti anusayo asamūhato. So aparena samayena pañcasu upādānakkhandhesu udayabbayānupassī viharati – iti rūpaṃ, iti rūpassa samudayo, iti rūpassa atthaṅgamo; iti vedanā… iti saññā… iti saṅkhārā… iti viññāṇaṃ, iti viññāṇassa samudayo, iti viññāṇassa atthaṅgamo’ti. Tassimesu pañcasu upādānakkhandhesu udayabbayānupassino viharato yopissa hoti pañcasu upādānakkhandhesu anusahagato ‘asmī’ti, māno ‘asmī’ti, chando ‘asmī’ti anusayo asamūhato, sopi samugghātaṃ gacchati.
‘‘সেয্যথাপি , আৰুসো, ৰত্থং সংকিলিট্ঠং মলগ্গহিতং। তমেনং সামিকা রজকস্স অনুপদজ্জুং। তমেনং রজকো ঊসে ৰা খারে ৰা গোমযে ৰা সম্মদ্দিত্ৰা অচ্ছে উদকে ৰিক্খালেতি। কিঞ্চাপি তং হোতি ৰত্থং পরিসুদ্ধং পরিযোদাতং, অথ খ্ৰস্স হোতি যেৰ অনুসহগতো ঊসগন্ধো ৰা খারগন্ধো ৰা গোমযগন্ধো ৰা অসমূহতো। তমেনং রজকো সামিকানং দেতি। তমেনং সামিকা গন্ধপরিভাৰিতে করণ্ডকে নিক্খিপন্তি। যোপিস্স হোতি অনুসহগতো ঊসগন্ধো ৰা খারগন্ধো ৰা গোমযগন্ধো ৰা অসমূহতো, সোপি সমুগ্ঘাতং গচ্ছতি। এৰমেৰ খো, আৰুসো, কিঞ্চাপি অরিযসাৰকস্স পঞ্চোরম্ভাগিযানি সংযোজনানি পহীনানি ভৰন্তি, অথ খ্ৰস্স হোতি যেৰ পঞ্চসু উপাদানক্খন্ধেসু অনুসহগতো ‘অস্মী’তি, মানো ‘অস্মী’তি, ছন্দো ‘অস্মী’তি অনুসযো অসমূহতো। সো অপরেন সমযেন পঞ্চসু উপাদানক্খন্ধেসু উদযব্বযানুপস্সী ৰিহরতি। ‘ইতি রূপং, ইতি রূপস্স সমুদযো, ইতি রূপস্স অত্থঙ্গমো; ইতি ৰেদনা… ইতি সঞ্ঞা… ইতি সঙ্খারা… ইতি ৰিঞ্ঞাণং, ইতি ৰিঞ্ঞাণস্স সমুদযো, ইতি ৰিঞ্ঞাণস্স অত্থঙ্গমো’তি। তস্স ইমেসু পঞ্চসু উপাদানক্খন্ধেসু উদযব্বযানুপস্সিনো ৰিহরতো যোপিস্স হোতি পঞ্চসু উপাদানক্খন্ধেসু অনুসহগতো ‘অস্মী’তি, মানো ‘অস্মী’তি, ছন্দো ‘অস্মী’তি অনুসযো অসমূহতো, সোপি সমুগ্ঘাতং গচ্ছতী’’তি।
‘‘Seyyathāpi , āvuso, vatthaṃ saṃkiliṭṭhaṃ malaggahitaṃ. Tamenaṃ sāmikā rajakassa anupadajjuṃ. Tamenaṃ rajako ūse vā khāre vā gomaye vā sammadditvā acche udake vikkhāleti. Kiñcāpi taṃ hoti vatthaṃ parisuddhaṃ pariyodātaṃ, atha khvassa hoti yeva anusahagato ūsagandho vā khāragandho vā gomayagandho vā asamūhato. Tamenaṃ rajako sāmikānaṃ deti. Tamenaṃ sāmikā gandhaparibhāvite karaṇḍake nikkhipanti. Yopissa hoti anusahagato ūsagandho vā khāragandho vā gomayagandho vā asamūhato, sopi samugghātaṃ gacchati. Evameva kho, āvuso, kiñcāpi ariyasāvakassa pañcorambhāgiyāni saṃyojanāni pahīnāni bhavanti, atha khvassa hoti yeva pañcasu upādānakkhandhesu anusahagato ‘asmī’ti, māno ‘asmī’ti, chando ‘asmī’ti anusayo asamūhato. So aparena samayena pañcasu upādānakkhandhesu udayabbayānupassī viharati. ‘Iti rūpaṃ, iti rūpassa samudayo, iti rūpassa atthaṅgamo; iti vedanā… iti saññā… iti saṅkhārā… iti viññāṇaṃ, iti viññāṇassa samudayo, iti viññāṇassa atthaṅgamo’ti. Tassa imesu pañcasu upādānakkhandhesu udayabbayānupassino viharato yopissa hoti pañcasu upādānakkhandhesu anusahagato ‘asmī’ti, māno ‘asmī’ti, chando ‘asmī’ti anusayo asamūhato, sopi samugghātaṃ gacchatī’’ti.
এৰং ৰুত্তে, থেরা ভিক্খূ আযস্মন্তং খেমকং এতদৰোচুং – ‘‘ন খো 3 মযং আযস্মন্তং খেমকং ৰিহেসাপেখা পুচ্ছিম্হ, অপি চাযস্মা খেমকো পহোসি তস্স ভগৰতো সাসনং ৰিত্থারেন আচিক্খিতুং দেসেতুং পঞ্ঞাপেতুং পট্ঠপেতুং ৰিৰরিতুং ৰিভজিতুং উত্তানীকাতুং। তযিদং আযস্মতা খেমকেন তস্স ভগৰতো সাসনং ৰিত্থারেন আচিক্খিতং দেসিতং পঞ্ঞাপিতং পট্ঠপিতং ৰিৰরিতং ৰিভজিতং উত্তানীকত’’ন্তি।
Evaṃ vutte, therā bhikkhū āyasmantaṃ khemakaṃ etadavocuṃ – ‘‘na kho 4 mayaṃ āyasmantaṃ khemakaṃ vihesāpekhā pucchimha, api cāyasmā khemako pahosi tassa bhagavato sāsanaṃ vitthārena ācikkhituṃ desetuṃ paññāpetuṃ paṭṭhapetuṃ vivarituṃ vibhajituṃ uttānīkātuṃ. Tayidaṃ āyasmatā khemakena tassa bhagavato sāsanaṃ vitthārena ācikkhitaṃ desitaṃ paññāpitaṃ paṭṭhapitaṃ vivaritaṃ vibhajitaṃ uttānīkata’’nti.
ইদমৰোচ আযস্মা খেমকো। অত্তমনা থেরা ভিক্খূ আযস্মতো খেমকস্স ভাসিতং অভিনন্দুং। ইমস্মিঞ্চ পন ৰেয্যাকরণস্মিং ভঞ্ঞমানে সট্ঠিমত্তানং থেরানং ভিক্খূনং অনুপাদায আসৰেহি চিত্তানি ৰিমুচ্চিংসু, আযস্মতো খেমকস্স চাতি। সত্তমং।
Idamavoca āyasmā khemako. Attamanā therā bhikkhū āyasmato khemakassa bhāsitaṃ abhinanduṃ. Imasmiñca pana veyyākaraṇasmiṃ bhaññamāne saṭṭhimattānaṃ therānaṃ bhikkhūnaṃ anupādāya āsavehi cittāni vimucciṃsu, āyasmato khemakassa cāti. Sattamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. খেমকসুত্তৰণ্ণনা • 7. Khemakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৭. খেমকসুত্তৰণ্ণনা • 7. Khemakasuttavaṇṇanā
