| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
7. கே²மகஸுத்தவண்ணனா
7. Khemakasuttavaṇṇanā
89. ஸத்தமே அத்தனியந்தி அத்தனோ பரிக்கா²ரஜாதங். அஸ்மீதி அதி⁴க³தந்தி அஸ்மீதி ஏவங் பவத்தா தண்ஹாமானா அதி⁴க³தா. ஸந்தா⁴வனிகாயாதி புனப்புனங் க³மனாக³மனேன. உபஸங்கமீதி ப³த³ரிகாராமதோ கா³வுதமத்தங் கோ⁴ஸிதாராமங் அக³மாஸி. தா³ஸகத்தே²ரோ பன சதுக்க²த்துங் க³மனாக³மனேன தங்தி³வஸங் த்³வியோஜனங் அத்³தா⁴னங் ஆஹிண்டி³. கஸ்மா பன தங் தே²ரா பஹிணிங்ஸு? விஸ்ஸுதஸ்ஸ த⁴ம்மகதி²கஸ்ஸ ஸந்திகா த⁴ம்மங் ஸுணிஸ்ஸாமாதி. ஸயங் கஸ்மா ந க³தாதி? தே²ரஸ்ஸ வஸனட்டா²னங் அரஞ்ஞங் ஸம்பா³த⁴ங், தத்த² ஸட்டி²மத்தானங் தே²ரானங் டா²துங் வா நிஸீதி³துங் வா ஓகாஸோ நத்தீ²தி ந க³தா. ‘‘இதா⁴க³ந்த்வா அம்ஹாகங் த⁴ம்மங் கதே²தூ’’திபி கஸ்மா பன ந பஹிணிங்ஸூதி? தே²ரஸ்ஸ ஆபா³தி⁴கத்தா. அத² கஸ்மா புனப்புனங் பஹிணிங்ஸூதி? ஸயமேவ ஞத்வா அம்ஹாகங் கதே²துங் ஆக³மிஸ்ஸதீதி. தே²ரோபி தேஸங் அஜ்ஜா²ஸயங் ஞத்வாவ அக³மாஸீதி.
89. Sattame attaniyanti attano parikkhārajātaṃ. Asmīti adhigatanti asmīti evaṃ pavattā taṇhāmānā adhigatā. Sandhāvanikāyāti punappunaṃ gamanāgamanena. Upasaṅkamīti badarikārāmato gāvutamattaṃ ghositārāmaṃ agamāsi. Dāsakatthero pana catukkhattuṃ gamanāgamanena taṃdivasaṃ dviyojanaṃ addhānaṃ āhiṇḍi. Kasmā pana taṃ therā pahiṇiṃsu? Vissutassa dhammakathikassa santikā dhammaṃ suṇissāmāti. Sayaṃ kasmā na gatāti? Therassa vasanaṭṭhānaṃ araññaṃ sambādhaṃ, tattha saṭṭhimattānaṃ therānaṃ ṭhātuṃ vā nisīdituṃ vā okāso natthīti na gatā. ‘‘Idhāgantvā amhākaṃ dhammaṃ kathetū’’tipi kasmā pana na pahiṇiṃsūti? Therassa ābādhikattā. Atha kasmā punappunaṃ pahiṇiṃsūti? Sayameva ñatvā amhākaṃ kathetuṃ āgamissatīti. Theropi tesaṃ ajjhāsayaṃ ñatvāva agamāsīti.
ந க்²வாஹங், ஆவுஸோ, ரூபந்தி யோ ஹி ரூபமேவ அஸ்மீதி வத³தி, தேன இதரே சத்தாரோ க²ந்தா⁴ பச்சக்கா²தா ஹொந்தி. யோ அஞ்ஞத்ர ரூபா வத³தி, தேன ரூபங் பச்சக்கா²தங் ஹோதி. வேத³னாதீ³ஸுபி ஏஸேவ நயோ. தே²ரஸ்ஸ பன ஸமூஹதோ பஞ்சஸுபி க²ந்தே⁴ஸு அஸ்மீதி அதி⁴க³தோ, தஸ்மா ஏவமாஹ. ஹோதேவாதி ஹோதியேவ. அனுஸஹக³தோதி ஸுகு²மோ. ஊஸேதி சா²ரிகாகா²ரே. கா²ரேதி ஊஸகா²ரே. ஸம்மத்³தி³த்வாதி தேமெத்வா கா²தெ³த்வா.
Na khvāhaṃ, āvuso, rūpanti yo hi rūpameva asmīti vadati, tena itare cattāro khandhā paccakkhātā honti. Yo aññatra rūpā vadati, tena rūpaṃ paccakkhātaṃ hoti. Vedanādīsupi eseva nayo. Therassa pana samūhato pañcasupi khandhesu asmīti adhigato, tasmā evamāha. Hotevāti hotiyeva. Anusahagatoti sukhumo. Ūseti chārikākhāre. Khāreti ūsakhāre. Sammadditvāti temetvā khādetvā.
ஏவமேவ கோ²தி எத்த² இத³ங் ஓபம்மஸங்ஸந்த³னங் – கிலிட்ட²வத்த²ங் விய ஹி புது²ஜ்ஜனஸ்ஸ சித்தாசாரோ, தயோ கா²ரா விய திஸ்ஸோ அனுபஸ்ஸனா, தீஹி கா²ரேஹி தோ⁴தவத்த²ங் விய தே³ஸனாய மத்³தி³த்வா டி²தோ அனாகா³மினோ சித்தாசாரோ, அனுஸஹக³தோ ஊஸாதி³க³ந்தோ⁴ விய அரஹத்தமக்³க³வஜ்ஜா² கிலேஸா, க³ந்த⁴கரண்ட³கோ விய அரஹத்தமக்³க³ஞாணங் க³ந்த⁴கரண்ட³கங் ஆக³ம்ம அனுஸஹக³தானங் ஊஸக³ந்தா⁴தீ³னங் ஸமுக்³கா⁴தோ விய அரஹத்தமக்³கே³ன ஸப்³ப³கிலேஸக்க²யோ, க³ந்த⁴பரிபா⁴விதவத்த²ங் நிவாஸெத்வா ச²ணதி³வஸே அந்தரவீதி²யங் ஸுக³ந்த⁴க³ந்தி⁴னோ விசரணங் விய கீ²ணாஸவஸ்ஸ ஸீலக³ந்தா⁴தீ³ஹி த³ஸ தி³ஸா உபவாயந்தஸ்ஸ யதா²காமசாரோ.
Evamevakhoti ettha idaṃ opammasaṃsandanaṃ – kiliṭṭhavatthaṃ viya hi puthujjanassa cittācāro, tayo khārā viya tisso anupassanā, tīhi khārehi dhotavatthaṃ viya desanāya madditvā ṭhito anāgāmino cittācāro, anusahagato ūsādigandho viya arahattamaggavajjhā kilesā, gandhakaraṇḍako viya arahattamaggañāṇaṃ gandhakaraṇḍakaṃ āgamma anusahagatānaṃ ūsagandhādīnaṃ samugghāto viya arahattamaggena sabbakilesakkhayo, gandhaparibhāvitavatthaṃ nivāsetvā chaṇadivase antaravīthiyaṃ sugandhagandhino vicaraṇaṃ viya khīṇāsavassa sīlagandhādīhi dasa disā upavāyantassa yathākāmacāro.
ஆசிக்கி²துந்தி கதே²துங். தே³ஸேதுந்தி பகாஸேதுங். பஞ்ஞாபேதுந்தி ஜானாபேதுங். பட்ட²பேதுந்தி பதிட்டா²பேதுங். விவரிதுந்தி விவடங் காதுங். விப⁴ஜிதுந்தி ஸுவிப⁴த்தங் காதுங். உத்தானீகாதுந்தி உத்தானகங் காதுங். ஸட்டி²மத்தானங் தே²ரானந்தி தே கிர தே²ரேன கதி²தகதி²தட்டா²னே விபஸ்ஸனங் பட்ட²பெத்வா உபரூபரி ஸம்மஸந்தா தே³ஸனாபரியோஸானே அரஹத்தங் பாபுணிங்ஸு. தே²ரோபி அஞ்ஞேன நீஹாரேன அகதெ²த்வா விபஸ்ஸனாஸஹக³தசித்தேனேவ கதே²ஸி. தஸ்மா ஸோபி அரஹத்தங் பாபுணி. தேன வுத்தங் – ‘‘ஸட்டி²மத்தானங் தே²ரானங் பி⁴க்கூ²னங் அனுபாதா³ய ஆஸவேஹி சித்தானி விமுச்சிங்ஸு ஆயஸ்மதோ கே²மகஸ்ஸ சா’’தி. ஸத்தமங்.
Ācikkhitunti kathetuṃ. Desetunti pakāsetuṃ. Paññāpetunti jānāpetuṃ. Paṭṭhapetunti patiṭṭhāpetuṃ. Vivaritunti vivaṭaṃ kātuṃ. Vibhajitunti suvibhattaṃ kātuṃ. Uttānīkātunti uttānakaṃ kātuṃ. Saṭṭhimattānaṃ therānanti te kira therena kathitakathitaṭṭhāne vipassanaṃ paṭṭhapetvā uparūpari sammasantā desanāpariyosāne arahattaṃ pāpuṇiṃsu. Theropi aññena nīhārena akathetvā vipassanāsahagatacitteneva kathesi. Tasmā sopi arahattaṃ pāpuṇi. Tena vuttaṃ – ‘‘saṭṭhimattānaṃ therānaṃ bhikkhūnaṃ anupādāya āsavehi cittāni vimucciṃsu āyasmato khemakassa cā’’ti. Sattamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 7. கே²மகஸுத்தங் • 7. Khemakasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 7. கே²மகஸுத்தவண்ணனா • 7. Khemakasuttavaṇṇanā
