| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
৭. খেমকসুত্তৰণ্ণনা
7. Khemakasuttavaṇṇanā
৮৯. অত্তনিযন্তি দিট্ঠিগতিকপরিকপ্পিতস্স অত্তনো সন্তকং। তেনাহ ‘‘অত্তনো পরিক্খারজাত’’ন্তি। তণ্হামানো অধিগতো অরহত্তস্স অনধিগতত্তা, নো দিট্ঠিমানো অধিগতো, তথা কামরাগব্যাপাদাপি। অনাগামী কির খেমকত্থেরো, ‘‘সকদাগামী’’তি কেচি ৰদন্তি। সন্ধাৰনিকাযাতি সঞ্চরণেন। তেনাহ ‘‘পুনপ্পুনং গমনাগমনেনা’’তি। চতুক্খত্তুং গমনাগমনেনাতি চতুক্খত্তুং গমনেন চ আগমনেন চ। তেনাহ – ‘‘তং দিৰসং দ্ৰিযোজনং অদ্ধানং আহিণ্ডী’’তি। ঞত্ৰাতি অজ্ঝাসযং ঞত্ৰা। থেরোতি খেমকত্থেরো।
89.Attaniyanti diṭṭhigatikaparikappitassa attano santakaṃ. Tenāha ‘‘attano parikkhārajāta’’nti. Taṇhāmāno adhigato arahattassa anadhigatattā, no diṭṭhimāno adhigato, tathā kāmarāgabyāpādāpi. Anāgāmī kira khemakatthero, ‘‘sakadāgāmī’’ti keci vadanti. Sandhāvanikāyāti sañcaraṇena. Tenāha ‘‘punappunaṃ gamanāgamanenā’’ti. Catukkhattuṃ gamanāgamanenāti catukkhattuṃ gamanena ca āgamanena ca. Tenāha – ‘‘taṃ divasaṃ dviyojanaṃ addhānaṃ āhiṇḍī’’ti. Ñatvāti ajjhāsayaṃ ñatvā. Theroti khemakatthero.
রূপমেৰ অস্মীতি ৰদতীতি রূপক্খন্ধমেৰ ‘‘অস্মী’’তি গাহস্স ৰত্থুং কত্ৰা ৰদতি। অধিগতো তণ্হামানো।
Rūpameva asmīti vadatīti rūpakkhandhameva ‘‘asmī’’ti gāhassa vatthuṃ katvā vadati. Adhigato taṇhāmāno.
অণুসহগতোতি অণুভাৰং গতো। তেনাহ ‘‘সুখুমো’’তি। তযো খারা ৰিয তিস্সো অনুপস্সনা চিত্তসংকিলেসস্স ৰিসোধনতো। সীলগন্ধাদীহি গুণগন্ধেহি।
Aṇusahagatoti aṇubhāvaṃ gato. Tenāha ‘‘sukhumo’’ti. Tayo khārā viya tisso anupassanā cittasaṃkilesassa visodhanato. Sīlagandhādīhi guṇagandhehi.
কথেতুন্তি উদ্দেসৰসেন কথেতুং। পকাসেতুন্তি নিদ্দেসৰসেন তমত্থং পকাসেতুং। জানাপেতুন্তি কারণৰসেন জানাপেতুং। পতিট্ঠাপেতুন্তি কথাপেতুং। ৰিৰটং কাতুন্তি উদাহরণং ৰণ্ণেত্ৰা পাকটং কাতুং । সুৰিভত্তং কাতুন্তি অন্ৰযতো ব্যতিরেকতো সুট্ঠু, ৰিভত্তং কাতুং। উত্তানকং কাতুন্তি উপনযনিগমেহি তমত্থং ৰিভূতং কাতুং। অঞ্ঞেন নীহারেনাতি ৰিপস্সনাৰিমুত্তেন চিত্তাভিনীহারেন।
Kathetunti uddesavasena kathetuṃ. Pakāsetunti niddesavasena tamatthaṃ pakāsetuṃ. Jānāpetunti kāraṇavasena jānāpetuṃ. Patiṭṭhāpetunti kathāpetuṃ. Vivaṭaṃ kātunti udāharaṇaṃ vaṇṇetvā pākaṭaṃ kātuṃ . Suvibhattaṃ kātunti anvayato byatirekato suṭṭhu, vibhattaṃ kātuṃ. Uttānakaṃ kātunti upanayanigamehi tamatthaṃ vibhūtaṃ kātuṃ. Aññena nīhārenāti vipassanāvimuttena cittābhinīhārena.
খেমকসুত্তৰণ্ণনা নিট্ঠিতা।
Khemakasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৭. খেমকসুত্তং • 7. Khemakasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৭. খেমকসুত্তৰণ্ণনা • 7. Khemakasuttavaṇṇanā
