| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៧. ខេមកសុត្តវណ្ណនា
7. Khemakasuttavaṇṇanā
៨៩. អត្តនិយន្តិ ទិដ្ឋិគតិកបរិកប្បិតស្ស អត្តនោ សន្តកំ។ តេនាហ ‘‘អត្តនោ បរិក្ខារជាត’’ន្តិ។ តណ្ហាមានោ អធិគតោ អរហត្តស្ស អនធិគតត្តា, នោ ទិដ្ឋិមានោ អធិគតោ, តថា កាមរាគព្យាបាទាបិ។ អនាគាមី កិរ ខេមកត្ថេរោ, ‘‘សកទាគាមី’’តិ កេចិ វទន្តិ។ សន្ធាវនិកាយាតិ សញ្ចរណេន។ តេនាហ ‘‘បុនប្បុនំ គមនាគមនេនា’’តិ។ ចតុក្ខត្តុំ គមនាគមនេនាតិ ចតុក្ខត្តុំ គមនេន ច អាគមនេន ច។ តេនាហ – ‘‘តំ ទិវសំ ទ្វិយោជនំ អទ្ធានំ អាហិណ្ឌី’’តិ។ ញត្វាតិ អជ្ឈាសយំ ញត្វា។ ថេរោតិ ខេមកត្ថេរោ។
89.Attaniyanti diṭṭhigatikaparikappitassa attano santakaṃ. Tenāha ‘‘attano parikkhārajāta’’nti. Taṇhāmāno adhigato arahattassa anadhigatattā, no diṭṭhimāno adhigato, tathā kāmarāgabyāpādāpi. Anāgāmī kira khemakatthero, ‘‘sakadāgāmī’’ti keci vadanti. Sandhāvanikāyāti sañcaraṇena. Tenāha ‘‘punappunaṃ gamanāgamanenā’’ti. Catukkhattuṃ gamanāgamanenāti catukkhattuṃ gamanena ca āgamanena ca. Tenāha – ‘‘taṃ divasaṃ dviyojanaṃ addhānaṃ āhiṇḍī’’ti. Ñatvāti ajjhāsayaṃ ñatvā. Theroti khemakatthero.
រូបមេវ អស្មីតិ វទតីតិ រូបក្ខន្ធមេវ ‘‘អស្មី’’តិ គាហស្ស វត្ថុំ កត្វា វទតិ។ អធិគតោ តណ្ហាមានោ។
Rūpameva asmīti vadatīti rūpakkhandhameva ‘‘asmī’’ti gāhassa vatthuṃ katvā vadati. Adhigato taṇhāmāno.
អណុសហគតោតិ អណុភាវំ គតោ។ តេនាហ ‘‘សុខុមោ’’តិ។ តយោ ខារា វិយ តិស្សោ អនុបស្សនា ចិត្តសំកិលេសស្ស វិសោធនតោ។ សីលគន្ធាទីហិ គុណគន្ធេហិ។
Aṇusahagatoti aṇubhāvaṃ gato. Tenāha ‘‘sukhumo’’ti. Tayo khārā viya tisso anupassanā cittasaṃkilesassa visodhanato. Sīlagandhādīhi guṇagandhehi.
កថេតុន្តិ ឧទ្ទេសវសេន កថេតុំ។ បកាសេតុន្តិ និទ្ទេសវសេន តមត្ថំ បកាសេតុំ។ ជានាបេតុន្តិ ការណវសេន ជានាបេតុំ។ បតិដ្ឋាបេតុន្តិ កថាបេតុំ។ វិវដំ កាតុន្តិ ឧទាហរណំ វណ្ណេត្វា បាកដំ កាតុំ ។ សុវិភត្តំ កាតុន្តិ អន្វយតោ ព្យតិរេកតោ សុដ្ឋុ, វិភត្តំ កាតុំ។ ឧត្តានកំ កាតុន្តិ ឧបនយនិគមេហិ តមត្ថំ វិភូតំ កាតុំ។ អញ្ញេន នីហារេនាតិ វិបស្សនាវិមុត្តេន ចិត្តាភិនីហារេន។
Kathetunti uddesavasena kathetuṃ. Pakāsetunti niddesavasena tamatthaṃ pakāsetuṃ. Jānāpetunti kāraṇavasena jānāpetuṃ. Patiṭṭhāpetunti kathāpetuṃ. Vivaṭaṃ kātunti udāharaṇaṃ vaṇṇetvā pākaṭaṃ kātuṃ . Suvibhattaṃ kātunti anvayato byatirekato suṭṭhu, vibhattaṃ kātuṃ. Uttānakaṃ kātunti upanayanigamehi tamatthaṃ vibhūtaṃ kātuṃ. Aññena nīhārenāti vipassanāvimuttena cittābhinīhārena.
ខេមកសុត្តវណ្ណនា និដ្ឋិតា។
Khemakasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៧. ខេមកសុត្តំ • 7. Khemakasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៧. ខេមកសុត្តវណ្ណនា • 7. Khemakasuttavaṇṇanā
