| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೭. ಖೇಮಕಸುತ್ತವಣ್ಣನಾ
7. Khemakasuttavaṇṇanā
೮೯. ಅತ್ತನಿಯನ್ತಿ ದಿಟ್ಠಿಗತಿಕಪರಿಕಪ್ಪಿತಸ್ಸ ಅತ್ತನೋ ಸನ್ತಕಂ। ತೇನಾಹ ‘‘ಅತ್ತನೋ ಪರಿಕ್ಖಾರಜಾತ’’ನ್ತಿ। ತಣ್ಹಾಮಾನೋ ಅಧಿಗತೋ ಅರಹತ್ತಸ್ಸ ಅನಧಿಗತತ್ತಾ, ನೋ ದಿಟ್ಠಿಮಾನೋ ಅಧಿಗತೋ, ತಥಾ ಕಾಮರಾಗಬ್ಯಾಪಾದಾಪಿ। ಅನಾಗಾಮೀ ಕಿರ ಖೇಮಕತ್ಥೇರೋ, ‘‘ಸಕದಾಗಾಮೀ’’ತಿ ಕೇಚಿ ವದನ್ತಿ। ಸನ್ಧಾವನಿಕಾಯಾತಿ ಸಞ್ಚರಣೇನ। ತೇನಾಹ ‘‘ಪುನಪ್ಪುನಂ ಗಮನಾಗಮನೇನಾ’’ತಿ। ಚತುಕ್ಖತ್ತುಂ ಗಮನಾಗಮನೇನಾತಿ ಚತುಕ್ಖತ್ತುಂ ಗಮನೇನ ಚ ಆಗಮನೇನ ಚ। ತೇನಾಹ – ‘‘ತಂ ದಿವಸಂ ದ್ವಿಯೋಜನಂ ಅದ್ಧಾನಂ ಆಹಿಣ್ಡೀ’’ತಿ। ಞತ್ವಾತಿ ಅಜ್ಝಾಸಯಂ ಞತ್ವಾ। ಥೇರೋತಿ ಖೇಮಕತ್ಥೇರೋ।
89.Attaniyanti diṭṭhigatikaparikappitassa attano santakaṃ. Tenāha ‘‘attano parikkhārajāta’’nti. Taṇhāmāno adhigato arahattassa anadhigatattā, no diṭṭhimāno adhigato, tathā kāmarāgabyāpādāpi. Anāgāmī kira khemakatthero, ‘‘sakadāgāmī’’ti keci vadanti. Sandhāvanikāyāti sañcaraṇena. Tenāha ‘‘punappunaṃ gamanāgamanenā’’ti. Catukkhattuṃ gamanāgamanenāti catukkhattuṃ gamanena ca āgamanena ca. Tenāha – ‘‘taṃ divasaṃ dviyojanaṃ addhānaṃ āhiṇḍī’’ti. Ñatvāti ajjhāsayaṃ ñatvā. Theroti khemakatthero.
ರೂಪಮೇವ ಅಸ್ಮೀತಿ ವದತೀತಿ ರೂಪಕ್ಖನ್ಧಮೇವ ‘‘ಅಸ್ಮೀ’’ತಿ ಗಾಹಸ್ಸ ವತ್ಥುಂ ಕತ್ವಾ ವದತಿ। ಅಧಿಗತೋ ತಣ್ಹಾಮಾನೋ।
Rūpameva asmīti vadatīti rūpakkhandhameva ‘‘asmī’’ti gāhassa vatthuṃ katvā vadati. Adhigato taṇhāmāno.
ಅಣುಸಹಗತೋತಿ ಅಣುಭಾವಂ ಗತೋ। ತೇನಾಹ ‘‘ಸುಖುಮೋ’’ತಿ। ತಯೋ ಖಾರಾ ವಿಯ ತಿಸ್ಸೋ ಅನುಪಸ್ಸನಾ ಚಿತ್ತಸಂಕಿಲೇಸಸ್ಸ ವಿಸೋಧನತೋ। ಸೀಲಗನ್ಧಾದೀಹಿ ಗುಣಗನ್ಧೇಹಿ।
Aṇusahagatoti aṇubhāvaṃ gato. Tenāha ‘‘sukhumo’’ti. Tayo khārā viya tisso anupassanā cittasaṃkilesassa visodhanato. Sīlagandhādīhi guṇagandhehi.
ಕಥೇತುನ್ತಿ ಉದ್ದೇಸವಸೇನ ಕಥೇತುಂ। ಪಕಾಸೇತುನ್ತಿ ನಿದ್ದೇಸವಸೇನ ತಮತ್ಥಂ ಪಕಾಸೇತುಂ। ಜಾನಾಪೇತುನ್ತಿ ಕಾರಣವಸೇನ ಜಾನಾಪೇತುಂ। ಪತಿಟ್ಠಾಪೇತುನ್ತಿ ಕಥಾಪೇತುಂ। ವಿವಟಂ ಕಾತುನ್ತಿ ಉದಾಹರಣಂ ವಣ್ಣೇತ್ವಾ ಪಾಕಟಂ ಕಾತುಂ । ಸುವಿಭತ್ತಂ ಕಾತುನ್ತಿ ಅನ್ವಯತೋ ಬ್ಯತಿರೇಕತೋ ಸುಟ್ಠು, ವಿಭತ್ತಂ ಕಾತುಂ। ಉತ್ತಾನಕಂ ಕಾತುನ್ತಿ ಉಪನಯನಿಗಮೇಹಿ ತಮತ್ಥಂ ವಿಭೂತಂ ಕಾತುಂ। ಅಞ್ಞೇನ ನೀಹಾರೇನಾತಿ ವಿಪಸ್ಸನಾವಿಮುತ್ತೇನ ಚಿತ್ತಾಭಿನೀಹಾರೇನ।
Kathetunti uddesavasena kathetuṃ. Pakāsetunti niddesavasena tamatthaṃ pakāsetuṃ. Jānāpetunti kāraṇavasena jānāpetuṃ. Patiṭṭhāpetunti kathāpetuṃ. Vivaṭaṃ kātunti udāharaṇaṃ vaṇṇetvā pākaṭaṃ kātuṃ . Suvibhattaṃ kātunti anvayato byatirekato suṭṭhu, vibhattaṃ kātuṃ. Uttānakaṃ kātunti upanayanigamehi tamatthaṃ vibhūtaṃ kātuṃ. Aññena nīhārenāti vipassanāvimuttena cittābhinīhārena.
ಖೇಮಕಸುತ್ತವಣ್ಣನಾ ನಿಟ್ಠಿತಾ।
Khemakasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೭. ಖೇಮಕಸುತ್ತಂ • 7. Khemakasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೭. ಖೇಮಕಸುತ್ತವಣ್ಣನಾ • 7. Khemakasuttavaṇṇanā
