| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) |
༧. ཁེམཀསུཏྟཝཎྞནཱ
7. Khemakasuttavaṇṇanā
༨༩. ཨཏྟནིཡནྟི དིཊྛིགཏིཀཔརིཀཔྤིཏསྶ ཨཏྟནོ སནྟཀཾ། ཏེནཱཧ ‘‘ཨཏྟནོ པརིཀྑཱརཛཱཏ’’ནྟི། ཏཎྷཱམཱནོ ཨདྷིགཏོ ཨརཧཏྟསྶ ཨནདྷིགཏཏྟཱ, ནོ དིཊྛིམཱནོ ཨདྷིགཏོ, ཏཐཱ ཀཱམརཱགབྱཱཔཱདཱཔི། ཨནཱགཱམཱི ཀིར ཁེམཀཏྠེརོ, ‘‘སཀདཱགཱམཱི’’ཏི ཀེཙི ཝདནྟི། སནྡྷཱཝནིཀཱཡཱཏི སཉྩརཎེན། ཏེནཱཧ ‘‘པུནཔྤུནཾ གམནཱགམནེནཱ’’ཏི། ཙཏུཀྑཏྟུཾ གམནཱགམནེནཱཏི ཙཏུཀྑཏྟུཾ གམནེན ཙ ཨཱགམནེན ཙ། ཏེནཱཧ – ‘‘ཏཾ དིཝསཾ དྭིཡོཛནཾ ཨདྡྷཱནཾ ཨཱཧིཎྜཱི’’ཏི། ཉཏྭཱཏི ཨཛ྄ཛྷཱསཡཾ ཉཏྭཱ། ཐེརོཏི ཁེམཀཏྠེརོ།
89.Attaniyanti diṭṭhigatikaparikappitassa attano santakaṃ. Tenāha ‘‘attano parikkhārajāta’’nti. Taṇhāmāno adhigato arahattassa anadhigatattā, no diṭṭhimāno adhigato, tathā kāmarāgabyāpādāpi. Anāgāmī kira khemakatthero, ‘‘sakadāgāmī’’ti keci vadanti. Sandhāvanikāyāti sañcaraṇena. Tenāha ‘‘punappunaṃ gamanāgamanenā’’ti. Catukkhattuṃ gamanāgamanenāti catukkhattuṃ gamanena ca āgamanena ca. Tenāha – ‘‘taṃ divasaṃ dviyojanaṃ addhānaṃ āhiṇḍī’’ti. Ñatvāti ajjhāsayaṃ ñatvā. Theroti khemakatthero.
རཱུཔམེཝ ཨསྨཱིཏི ཝདཏཱིཏི རཱུཔཀྑནྡྷམེཝ ‘‘ཨསྨཱི’’ཏི གཱཧསྶ ཝཏྠུཾ ཀཏྭཱ ཝདཏི། ཨདྷིགཏོ ཏཎྷཱམཱནོ།
Rūpameva asmīti vadatīti rūpakkhandhameva ‘‘asmī’’ti gāhassa vatthuṃ katvā vadati. Adhigato taṇhāmāno.
ཨཎུསཧགཏོཏི ཨཎུབྷཱཝཾ གཏོ། ཏེནཱཧ ‘‘སུཁུམོ’’ཏི། ཏཡོ ཁཱརཱ ཝིཡ ཏིསྶོ ཨནུཔསྶནཱ ཙིཏྟསཾཀིལེསསྶ ཝིསོདྷནཏོ། སཱིལགནྡྷཱདཱིཧི གུཎགནྡྷེཧི།
Aṇusahagatoti aṇubhāvaṃ gato. Tenāha ‘‘sukhumo’’ti. Tayo khārā viya tisso anupassanā cittasaṃkilesassa visodhanato. Sīlagandhādīhi guṇagandhehi.
ཀཐེཏུནྟི ཨུདྡེསཝསེན ཀཐེཏུཾ། པཀཱསེཏུནྟི ནིདྡེསཝསེན ཏམཏྠཾ པཀཱསེཏུཾ། ཛཱནཱཔེཏུནྟི ཀཱརཎཝསེན ཛཱནཱཔེཏུཾ། པཏིཊྛཱཔེཏུནྟི ཀཐཱཔེཏུཾ། ཝིཝཊཾ ཀཱཏུནྟི ཨུདཱཧརཎཾ ཝཎྞེཏྭཱ པཱཀཊཾ ཀཱཏུཾ ། སུཝིབྷཏྟཾ ཀཱཏུནྟི ཨནྭཡཏོ བྱཏིརེཀཏོ སུཊྛུ, ཝིབྷཏྟཾ ཀཱཏུཾ། ཨུཏྟཱནཀཾ ཀཱཏུནྟི ཨུཔནཡནིགམེཧི ཏམཏྠཾ ཝིབྷཱུཏཾ ཀཱཏུཾ། ཨཉྙེན ནཱིཧཱརེནཱཏི ཝིཔསྶནཱཝིམུཏྟེན ཙིཏྟཱབྷིནཱིཧཱརེན།
Kathetunti uddesavasena kathetuṃ. Pakāsetunti niddesavasena tamatthaṃ pakāsetuṃ. Jānāpetunti kāraṇavasena jānāpetuṃ. Patiṭṭhāpetunti kathāpetuṃ. Vivaṭaṃ kātunti udāharaṇaṃ vaṇṇetvā pākaṭaṃ kātuṃ . Suvibhattaṃ kātunti anvayato byatirekato suṭṭhu, vibhattaṃ kātuṃ. Uttānakaṃ kātunti upanayanigamehi tamatthaṃ vibhūtaṃ kātuṃ. Aññena nīhārenāti vipassanāvimuttena cittābhinīhārena.
ཁེམཀསུཏྟཝཎྞནཱ ནིཊྛིཏཱ།
Khemakasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya / ༧. ཁེམཀསུཏྟཾ • 7. Khemakasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༧. ཁེམཀསུཏྟཝཎྞནཱ • 7. Khemakasuttavaṇṇanā
