| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੭. ਖੇਮਕਸੁਤ੍ਤવਣ੍ਣਨਾ
7. Khemakasuttavaṇṇanā
੮੯. ਸਤ੍ਤਮੇ ਅਤ੍ਤਨਿਯਨ੍ਤਿ ਅਤ੍ਤਨੋ ਪਰਿਕ੍ਖਾਰਜਾਤਂ। ਅਸ੍ਮੀਤਿ ਅਧਿਗਤਨ੍ਤਿ ਅਸ੍ਮੀਤਿ ਏવਂ ਪવਤ੍ਤਾ ਤਣ੍ਹਾਮਾਨਾ ਅਧਿਗਤਾ। ਸਨ੍ਧਾવਨਿਕਾਯਾਤਿ ਪੁਨਪ੍ਪੁਨਂ ਗਮਨਾਗਮਨੇਨ। ਉਪਸਙ੍ਕਮੀਤਿ ਬਦਰਿਕਾਰਾਮਤੋ ਗਾવੁਤਮਤ੍ਤਂ ਘੋਸਿਤਾਰਾਮਂ ਅਗਮਾਸਿ। ਦਾਸਕਤ੍ਥੇਰੋ ਪਨ ਚਤੁਕ੍ਖਤ੍ਤੁਂ ਗਮਨਾਗਮਨੇਨ ਤਂਦਿવਸਂ ਦ੍વਿਯੋਜਨਂ ਅਦ੍ਧਾਨਂ ਆਹਿਣ੍ਡਿ। ਕਸ੍ਮਾ ਪਨ ਤਂ ਥੇਰਾ ਪਹਿਣਿਂਸੁ? વਿਸ੍ਸੁਤਸ੍ਸ ਧਮ੍ਮਕਥਿਕਸ੍ਸ ਸਨ੍ਤਿਕਾ ਧਮ੍ਮਂ ਸੁਣਿਸ੍ਸਾਮਾਤਿ। ਸਯਂ ਕਸ੍ਮਾ ਨ ਗਤਾਤਿ? ਥੇਰਸ੍ਸ વਸਨਟ੍ਠਾਨਂ ਅਰਞ੍ਞਂ ਸਮ੍ਬਾਧਂ, ਤਤ੍ਥ ਸਟ੍ਠਿਮਤ੍ਤਾਨਂ ਥੇਰਾਨਂ ਠਾਤੁਂ વਾ ਨਿਸੀਦਿਤੁਂ વਾ ਓਕਾਸੋ ਨਤ੍ਥੀਤਿ ਨ ਗਤਾ। ‘‘ਇਧਾਗਨ੍ਤ੍વਾ ਅਮ੍ਹਾਕਂ ਧਮ੍ਮਂ ਕਥੇਤੂ’’ਤਿਪਿ ਕਸ੍ਮਾ ਪਨ ਨ ਪਹਿਣਿਂਸੂਤਿ? ਥੇਰਸ੍ਸ ਆਬਾਧਿਕਤ੍ਤਾ। ਅਥ ਕਸ੍ਮਾ ਪੁਨਪ੍ਪੁਨਂ ਪਹਿਣਿਂਸੂਤਿ? ਸਯਮੇવ ਞਤ੍વਾ ਅਮ੍ਹਾਕਂ ਕਥੇਤੁਂ ਆਗਮਿਸ੍ਸਤੀਤਿ। ਥੇਰੋਪਿ ਤੇਸਂ ਅਜ੍ਝਾਸਯਂ ਞਤ੍વਾવ ਅਗਮਾਸੀਤਿ।
89. Sattame attaniyanti attano parikkhārajātaṃ. Asmīti adhigatanti asmīti evaṃ pavattā taṇhāmānā adhigatā. Sandhāvanikāyāti punappunaṃ gamanāgamanena. Upasaṅkamīti badarikārāmato gāvutamattaṃ ghositārāmaṃ agamāsi. Dāsakatthero pana catukkhattuṃ gamanāgamanena taṃdivasaṃ dviyojanaṃ addhānaṃ āhiṇḍi. Kasmā pana taṃ therā pahiṇiṃsu? Vissutassa dhammakathikassa santikā dhammaṃ suṇissāmāti. Sayaṃ kasmā na gatāti? Therassa vasanaṭṭhānaṃ araññaṃ sambādhaṃ, tattha saṭṭhimattānaṃ therānaṃ ṭhātuṃ vā nisīdituṃ vā okāso natthīti na gatā. ‘‘Idhāgantvā amhākaṃ dhammaṃ kathetū’’tipi kasmā pana na pahiṇiṃsūti? Therassa ābādhikattā. Atha kasmā punappunaṃ pahiṇiṃsūti? Sayameva ñatvā amhākaṃ kathetuṃ āgamissatīti. Theropi tesaṃ ajjhāsayaṃ ñatvāva agamāsīti.
ਨ ਖ੍વਾਹਂ, ਆવੁਸੋ, ਰੂਪਨ੍ਤਿ ਯੋ ਹਿ ਰੂਪਮੇવ ਅਸ੍ਮੀਤਿ વਦਤਿ, ਤੇਨ ਇਤਰੇ ਚਤ੍ਤਾਰੋ ਖਨ੍ਧਾ ਪਚ੍ਚਕ੍ਖਾਤਾ ਹੋਨ੍ਤਿ। ਯੋ ਅਞ੍ਞਤ੍ਰ ਰੂਪਾ વਦਤਿ, ਤੇਨ ਰੂਪਂ ਪਚ੍ਚਕ੍ਖਾਤਂ ਹੋਤਿ। વੇਦਨਾਦੀਸੁਪਿ ਏਸੇવ ਨਯੋ। ਥੇਰਸ੍ਸ ਪਨ ਸਮੂਹਤੋ ਪਞ੍ਚਸੁਪਿ ਖਨ੍ਧੇਸੁ ਅਸ੍ਮੀਤਿ ਅਧਿਗਤੋ, ਤਸ੍ਮਾ ਏવਮਾਹ। ਹੋਤੇવਾਤਿ ਹੋਤਿਯੇવ। ਅਨੁਸਹਗਤੋਤਿ ਸੁਖੁਮੋ। ਊਸੇਤਿ ਛਾਰਿਕਾਖਾਰੇ। ਖਾਰੇਤਿ ਊਸਖਾਰੇ। ਸਮ੍ਮਦ੍ਦਿਤ੍વਾਤਿ ਤੇਮੇਤ੍વਾ ਖਾਦੇਤ੍વਾ।
Na khvāhaṃ, āvuso, rūpanti yo hi rūpameva asmīti vadati, tena itare cattāro khandhā paccakkhātā honti. Yo aññatra rūpā vadati, tena rūpaṃ paccakkhātaṃ hoti. Vedanādīsupi eseva nayo. Therassa pana samūhato pañcasupi khandhesu asmīti adhigato, tasmā evamāha. Hotevāti hotiyeva. Anusahagatoti sukhumo. Ūseti chārikākhāre. Khāreti ūsakhāre. Sammadditvāti temetvā khādetvā.
ਏવਮੇવ ਖੋਤਿ ਏਤ੍ਥ ਇਦਂ ਓਪਮ੍ਮਸਂਸਨ੍ਦਨਂ – ਕਿਲਿਟ੍ਠવਤ੍ਥਂ વਿਯ ਹਿ ਪੁਥੁਜ੍ਜਨਸ੍ਸ ਚਿਤ੍ਤਾਚਾਰੋ, ਤਯੋ ਖਾਰਾ વਿਯ ਤਿਸ੍ਸੋ ਅਨੁਪਸ੍ਸਨਾ, ਤੀਹਿ ਖਾਰੇਹਿ ਧੋਤવਤ੍ਥਂ વਿਯ ਦੇਸਨਾਯ ਮਦ੍ਦਿਤ੍વਾ ਠਿਤੋ ਅਨਾਗਾਮਿਨੋ ਚਿਤ੍ਤਾਚਾਰੋ, ਅਨੁਸਹਗਤੋ ਊਸਾਦਿਗਨ੍ਧੋ વਿਯ ਅਰਹਤ੍ਤਮਗ੍ਗવਜ੍ਝਾ ਕਿਲੇਸਾ, ਗਨ੍ਧਕਰਣ੍ਡਕੋ વਿਯ ਅਰਹਤ੍ਤਮਗ੍ਗਞਾਣਂ ਗਨ੍ਧਕਰਣ੍ਡਕਂ ਆਗਮ੍ਮ ਅਨੁਸਹਗਤਾਨਂ ਊਸਗਨ੍ਧਾਦੀਨਂ ਸਮੁਗ੍ਘਾਤੋ વਿਯ ਅਰਹਤ੍ਤਮਗ੍ਗੇਨ ਸਬ੍ਬਕਿਲੇਸਕ੍ਖਯੋ, ਗਨ੍ਧਪਰਿਭਾવਿਤવਤ੍ਥਂ ਨਿવਾਸੇਤ੍વਾ ਛਣਦਿવਸੇ ਅਨ੍ਤਰવੀਥਿਯਂ ਸੁਗਨ੍ਧਗਨ੍ਧਿਨੋ વਿਚਰਣਂ વਿਯ ਖੀਣਾਸવਸ੍ਸ ਸੀਲਗਨ੍ਧਾਦੀਹਿ ਦਸ ਦਿਸਾ ਉਪવਾਯਨ੍ਤਸ੍ਸ ਯਥਾਕਾਮਚਾਰੋ।
Evamevakhoti ettha idaṃ opammasaṃsandanaṃ – kiliṭṭhavatthaṃ viya hi puthujjanassa cittācāro, tayo khārā viya tisso anupassanā, tīhi khārehi dhotavatthaṃ viya desanāya madditvā ṭhito anāgāmino cittācāro, anusahagato ūsādigandho viya arahattamaggavajjhā kilesā, gandhakaraṇḍako viya arahattamaggañāṇaṃ gandhakaraṇḍakaṃ āgamma anusahagatānaṃ ūsagandhādīnaṃ samugghāto viya arahattamaggena sabbakilesakkhayo, gandhaparibhāvitavatthaṃ nivāsetvā chaṇadivase antaravīthiyaṃ sugandhagandhino vicaraṇaṃ viya khīṇāsavassa sīlagandhādīhi dasa disā upavāyantassa yathākāmacāro.
ਆਚਿਕ੍ਖਿਤੁਨ੍ਤਿ ਕਥੇਤੁਂ। ਦੇਸੇਤੁਨ੍ਤਿ ਪਕਾਸੇਤੁਂ। ਪਞ੍ਞਾਪੇਤੁਨ੍ਤਿ ਜਾਨਾਪੇਤੁਂ। ਪਟ੍ਠਪੇਤੁਨ੍ਤਿ ਪਤਿਟ੍ਠਾਪੇਤੁਂ। વਿવਰਿਤੁਨ੍ਤਿ વਿવਟਂ ਕਾਤੁਂ। વਿਭਜਿਤੁਨ੍ਤਿ ਸੁવਿਭਤ੍ਤਂ ਕਾਤੁਂ। ਉਤ੍ਤਾਨੀਕਾਤੁਨ੍ਤਿ ਉਤ੍ਤਾਨਕਂ ਕਾਤੁਂ। ਸਟ੍ਠਿਮਤ੍ਤਾਨਂ ਥੇਰਾਨਨ੍ਤਿ ਤੇ ਕਿਰ ਥੇਰੇਨ ਕਥਿਤਕਥਿਤਟ੍ਠਾਨੇ વਿਪਸ੍ਸਨਂ ਪਟ੍ਠਪੇਤ੍વਾ ਉਪਰੂਪਰਿ ਸਮ੍ਮਸਨ੍ਤਾ ਦੇਸਨਾਪਰਿਯੋਸਾਨੇ ਅਰਹਤ੍ਤਂ ਪਾਪੁਣਿਂਸੁ। ਥੇਰੋਪਿ ਅਞ੍ਞੇਨ ਨੀਹਾਰੇਨ ਅਕਥੇਤ੍વਾ વਿਪਸ੍ਸਨਾਸਹਗਤਚਿਤ੍ਤੇਨੇવ ਕਥੇਸਿ। ਤਸ੍ਮਾ ਸੋਪਿ ਅਰਹਤ੍ਤਂ ਪਾਪੁਣਿ। ਤੇਨ વੁਤ੍ਤਂ – ‘‘ਸਟ੍ਠਿਮਤ੍ਤਾਨਂ ਥੇਰਾਨਂ ਭਿਕ੍ਖੂਨਂ ਅਨੁਪਾਦਾਯ ਆਸવੇਹਿ ਚਿਤ੍ਤਾਨਿ વਿਮੁਚ੍ਚਿਂਸੁ ਆਯਸ੍ਮਤੋ ਖੇਮਕਸ੍ਸ ਚਾ’’ਤਿ। ਸਤ੍ਤਮਂ।
Ācikkhitunti kathetuṃ. Desetunti pakāsetuṃ. Paññāpetunti jānāpetuṃ. Paṭṭhapetunti patiṭṭhāpetuṃ. Vivaritunti vivaṭaṃ kātuṃ. Vibhajitunti suvibhattaṃ kātuṃ. Uttānīkātunti uttānakaṃ kātuṃ. Saṭṭhimattānaṃ therānanti te kira therena kathitakathitaṭṭhāne vipassanaṃ paṭṭhapetvā uparūpari sammasantā desanāpariyosāne arahattaṃ pāpuṇiṃsu. Theropi aññena nīhārena akathetvā vipassanāsahagatacitteneva kathesi. Tasmā sopi arahattaṃ pāpuṇi. Tena vuttaṃ – ‘‘saṭṭhimattānaṃ therānaṃ bhikkhūnaṃ anupādāya āsavehi cittāni vimucciṃsu āyasmato khemakassa cā’’ti. Sattamaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੭. ਖੇਮਕਸੁਤ੍ਤਂ • 7. Khemakasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੭. ਖੇਮਕਸੁਤ੍ਤવਣ੍ਣਨਾ • 7. Khemakasuttavaṇṇanā
