༡. ཁེམཱསུཏྟཾ

1. Khemāsuttaṃ

༤༡༠. ཨེཀཾ སམཡཾ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཁེམཱ བྷིཀྑུནཱི ཀོསལེསུ ཙཱརིཀཾ ཙརམཱནཱ ཨནྟརཱ ཙ སཱཝཏྠིཾ ཨནྟརཱ ཙ སཱཀེཏཾ ཏོརཎཝཏྠུསྨིཾ ཝཱསཾ ཨུཔགཏཱ ཧོཏི། ཨཐ ཁོ རཱཛཱ པསེནདི ཀོསལོ སཱཀེཏཱ སཱཝཏྠིཾ གཙྪནྟོ, ཨནྟརཱ ཙ སཱཀེཏཾ ཨནྟརཱ ཙ སཱཝཏྠིཾ ཏོརཎཝཏྠུསྨིཾ ཨེཀརཏྟིཝཱསཾ ཨུཔགཙྪི། ཨཐ ཁོ རཱཛཱ པསེནདི ཀོསལོ ཨཉྙཏརཾ པུརིསཾ ཨཱམནྟེསི – ‘‘ཨེཧི ཏྭཾ, ཨམྦྷོ པུརིས, ཏོརཎཝཏྠུསྨིཾ ཏཐཱརཱུཔཾ སམཎཾ ཝཱ བྲཱཧྨཎཾ ཝཱ ཛཱན ཡམཧཾ ཨཛྫ པཡིརུཔཱསེཡྻ’’ནྟི།

410. Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena khemā bhikkhunī kosalesu cārikaṃ caramānā antarā ca sāvatthiṃ antarā ca sāketaṃ toraṇavatthusmiṃ vāsaṃ upagatā hoti. Atha kho rājā pasenadi kosalo sāketā sāvatthiṃ gacchanto, antarā ca sāketaṃ antarā ca sāvatthiṃ toraṇavatthusmiṃ ekarattivāsaṃ upagacchi. Atha kho rājā pasenadi kosalo aññataraṃ purisaṃ āmantesi – ‘‘ehi tvaṃ, ambho purisa, toraṇavatthusmiṃ tathārūpaṃ samaṇaṃ vā brāhmaṇaṃ vā jāna yamahaṃ ajja payirupāseyya’’nti.

‘‘ཨེཝཾ, དེཝཱ’’ཏི ཁོ སོ པུརིསོ རཉྙོ པསེནདིསྶ ཀོསལསྶ པཊིསྶུཏྭཱ ཀེཝལཀཔྤཾ ཏོརཎཝཏྠུཾ ཨཱཧིཎྜནྟོ ¹ ནཱདྡས ཏཐཱརཱུཔཾ སམཎཾ ཝཱ བྲཱཧྨཎཾ ཝཱ ཡཾ རཱཛཱ པསེནདི ཀོསལོ པཡིརུཔཱསེཡྻ། ཨདྡསཱ ཁོ སོ པུརིསོ ཁེམཾ བྷིཀྑུནིཾ ཏོརཎཝཏྠུསྨིཾ ཝཱསཾ ཨུཔགཏཾ། དིསྭཱན ཡེན རཱཛཱ པསེནདི ཀོསལོ ཏེནུཔསངྐམི; ཨུཔསངྐམིཏྭཱ རཱཛཱནཾ པསེནདིཾ ཀོསལཾ ཨེཏདཝོཙ –

‘‘Evaṃ, devā’’ti kho so puriso rañño pasenadissa kosalassa paṭissutvā kevalakappaṃ toraṇavatthuṃ āhiṇḍanto ² nāddasa tathārūpaṃ samaṇaṃ vā brāhmaṇaṃ vā yaṃ rājā pasenadi kosalo payirupāseyya. Addasā kho so puriso khemaṃ bhikkhuniṃ toraṇavatthusmiṃ vāsaṃ upagataṃ. Disvāna yena rājā pasenadi kosalo tenupasaṅkami; upasaṅkamitvā rājānaṃ pasenadiṃ kosalaṃ etadavoca –

‘‘ནཏྠི ཁོ, དེཝ, ཏོརཎཝཏྠུསྨིཾ ཏཐཱརཱུཔོ སམཎོ ཝཱ བྲཱཧྨཎོ ཝཱ ཡཾ དེཝོ པཡིརུཔཱསེཡྻ། ཨཏྠི ཙ ཁོ, དེཝ, ཁེམཱ ནཱམ བྷིཀྑུནཱི, ཏསྶ བྷགཝཏོ སཱཝིཀཱ ཨརཧཏོ སམྨཱསམྦུདྡྷསྶ། ཏསྶཱ ཁོ པན ཨཡྻཱཡ ཨེཝཾ ཀལྱཱཎོ ཀིཏྟིསདྡོ ཨབྦྷུགྒཏོ – ‘པཎྜིཏཱ, ཝིཡཏྟཱ མེདྷཱཝིནཱི བཧུསྶུཏཱ ཙིཏྟཀཐཱ ཀལྱཱཎཔཊིབྷཱནཱ’ཏི། ཏཾ དེཝོ པཡིརུཔཱསཏཱུ’’ཏི།

‘‘Natthi kho, deva, toraṇavatthusmiṃ tathārūpo samaṇo vā brāhmaṇo vā yaṃ devo payirupāseyya. Atthi ca kho, deva, khemā nāma bhikkhunī, tassa bhagavato sāvikā arahato sammāsambuddhassa. Tassā kho pana ayyāya evaṃ kalyāṇo kittisaddo abbhuggato – ‘paṇḍitā, viyattā medhāvinī bahussutā cittakathā kalyāṇapaṭibhānā’ti. Taṃ devo payirupāsatū’’ti.

ཨཐ ཁོ རཱཛཱ པསེནདི ཀོསལོ ཡེན ཁེམཱ བྷིཀྑུནཱི ཏེནུཔསངྐམི; ཨུཔསངྐམིཏྭཱ ཁེམཾ བྷིཀྑུནིཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ རཱཛཱ པསེནདི ཀོསལོ ཁེམཾ བྷིཀྑུནིཾ ཨེཏདཝོཙ – ‘‘ཀིཾ ནུ ཁོ, ཨཡྻེ, ཧོཏི ཏཐཱགཏོ པརཾ མརཎཱ’’ཏི? ‘‘ཨབྱཱཀཏཾ ཁོ ཨེཏཾ, མཧཱརཱཛ, བྷགཝཏཱ – ‘ཧོཏི ཏཐཱགཏོ པརཾ མརཎཱ’’’ཏི། ‘‘ཀིཾ པནཡྻེ, ན ཧོཏི ཏཐཱགཏོ པརཾ མརཎཱ’’ཏི? ‘‘ཨེཏམྤི ཁོ, མཧཱརཱཛ, ཨབྱཱཀཏཾ བྷགཝཏཱ – ‘ན ཧོཏི ཏཐཱགཏོ པརཾ མརཎཱ’’’ཏི། ‘‘ཀིཾ ནུ ཁོ, ཨཡྻེ, ཧོཏི ཙ ན ཙ ཧོཏི ཏཐཱགཏོ པརཾ མརཎཱ’’ཏི? ‘‘ཨབྱཱཀཏཾ ཁོ ཨེཏཾ, མཧཱརཱཛ, བྷགཝཏཱ – ‘ཧོཏི ཙ ན ཙ ཧོཏི ཏཐཱགཏོ པརཾ མརཎཱ’’’ཏི། ‘‘ཀིཾ པནཡྻེ, ནེཝ ཧོཏི ན ན ཧོཏི ཏཐཱགཏོ པརཾ མརཎཱ’’ཏི། ‘‘ཨེཏམྤི ཁོ, མཧཱརཱཛ, ཨབྱཱཀཏཾ བྷགཝཏཱ – ‘ནེཝ ཧོཏི ན ན ཧོཏི ཏཐཱགཏོ པརཾ མརཎཱ’’’ཏི།

Atha kho rājā pasenadi kosalo yena khemā bhikkhunī tenupasaṅkami; upasaṅkamitvā khemaṃ bhikkhuniṃ abhivādetvā ekamantaṃ nisīdi. Ekamantaṃ nisinno kho rājā pasenadi kosalo khemaṃ bhikkhuniṃ etadavoca – ‘‘kiṃ nu kho, ayye, hoti tathāgato paraṃ maraṇā’’ti? ‘‘Abyākataṃ kho etaṃ, mahārāja, bhagavatā – ‘hoti tathāgato paraṃ maraṇā’’’ti. ‘‘Kiṃ panayye, na hoti tathāgato paraṃ maraṇā’’ti? ‘‘Etampi kho, mahārāja, abyākataṃ bhagavatā – ‘na hoti tathāgato paraṃ maraṇā’’’ti. ‘‘Kiṃ nu kho, ayye, hoti ca na ca hoti tathāgato paraṃ maraṇā’’ti? ‘‘Abyākataṃ kho etaṃ, mahārāja, bhagavatā – ‘hoti ca na ca hoti tathāgato paraṃ maraṇā’’’ti. ‘‘Kiṃ panayye, neva hoti na na hoti tathāgato paraṃ maraṇā’’ti. ‘‘Etampi kho, mahārāja, abyākataṃ bhagavatā – ‘neva hoti na na hoti tathāgato paraṃ maraṇā’’’ti.

‘‘‘ཀིཾ ནུ ཁོ, ཨཡྻེ, ཧོཏི ཏཐཱགཏོ པརཾ མརཎཱ’ཏི, ཨིཏི པུཊྛཱ སམཱནཱ – ‘ཨབྱཱཀཏཾ ཁོ ཨེཏཾ, མཧཱརཱཛ, བྷགཝཏཱ – ཧོཏི ཏཐཱགཏོ པརཾ མརཎཱ’ཏི ཝདེསི། ‘ཀིཾ པནཡྻེ, ན ཧོཏི ཏཐཱགཏོ པརཾ མརཎཱ’ཏི ཨིཏི པུཊྛཱ སམཱནཱ – ‘ཨེཏམྤི ཁོ, མཧཱརཱཛ, ཨབྱཱཀཏཾ བྷགཝཏཱ – ན ཧོཏི ཏཐཱགཏོ པརཾ མརཎཱ’ཏི ཝདེསི། ‘ཀིཾ ནུ ཁོ, ཨཡྻེ, ཧོཏི ཙ ན ཙ ཧོཏི ཏཐཱགཏོ པརཾ མརཎཱ’ཏི ཨིཏི པུཊྛཱ སམཱནཱ – ‘ཨབྱཱཀཏཾ ཁོ ཨེཏཾ, མཧཱརཱཛ, བྷགཝཏཱ – ཧོཏི ཙ ན ཙ ཧོཏི ཏཐཱགཏོ པརཾ མརཎཱ’ཏི ཝདེསི། ‘ཀིཾ པནཡྻེ, ནེཝ ཧོཏི ན ན ཧོཏི ཏཐཱགཏོ པརཾ མརཎཱ’ཏི ཨིཏི པུཊྛཱ སམཱནཱ – ‘ཨེཏམྤི ཁོ, མཧཱརཱཛ, ཨབྱཱཀཏཾ བྷགཝཏཱ – ནེཝ ཧོཏི ན ན ཧོཏི ཏཐཱགཏོ པརཾ མརཎཱ’ཏི ཝདེསི། ‘ཀོ ནུ ཁོ , ཨཡྻེ, ཧེཏུ, ཀོ པཙྩཡོ ཡེནེཏཾ ཨབྱཱཀཏཾ བྷགཝཏཱ’’’ཏི?

‘‘‘Kiṃ nu kho, ayye, hoti tathāgato paraṃ maraṇā’ti, iti puṭṭhā samānā – ‘abyākataṃ kho etaṃ, mahārāja, bhagavatā – hoti tathāgato paraṃ maraṇā’ti vadesi. ‘Kiṃ panayye, na hoti tathāgato paraṃ maraṇā’ti iti puṭṭhā samānā – ‘etampi kho, mahārāja, abyākataṃ bhagavatā – na hoti tathāgato paraṃ maraṇā’ti vadesi. ‘Kiṃ nu kho, ayye, hoti ca na ca hoti tathāgato paraṃ maraṇā’ti iti puṭṭhā samānā – ‘abyākataṃ kho etaṃ, mahārāja, bhagavatā – hoti ca na ca hoti tathāgato paraṃ maraṇā’ti vadesi. ‘Kiṃ panayye, neva hoti na na hoti tathāgato paraṃ maraṇā’ti iti puṭṭhā samānā – ‘etampi kho, mahārāja, abyākataṃ bhagavatā – neva hoti na na hoti tathāgato paraṃ maraṇā’ti vadesi. ‘Ko nu kho , ayye, hetu, ko paccayo yenetaṃ abyākataṃ bhagavatā’’’ti?

‘‘ཏེན ཧི, མཧཱརཱཛ, ཏཉྙེཝེཏྠ པཊིཔུཙྪིསྶཱམི། ཡཐཱ ཏེ ཁམེཡྻ ཏཐཱ ནཾ བྱཱཀརེཡྻཱསི། ཏཾ ཀིཾ མཉྙསི, མཧཱརཱཛ, ཨཏྠི ཏེ ཀོཙི གཎཀོ ཝཱ མུདྡིཀོ ཝཱ སངྑཱཡཀོ ཝཱ ཡོ པཧོཏི གངྒཱཡ ཝཱལུཀཾ ³ གཎེཏུཾ – ཨེཏྟཀཱ ⁴ ཝཱལུཀཱ ཨིཏི ཝཱ, ཨེཏྟཀཱནི ཝཱལུཀསཏཱནི ཨིཏི ཝཱ, ཨེཏྟཀཱནི ཝཱལུཀསཧསྶཱནི ཨིཏི ཝཱ, ཨེཏྟཀཱནི ཝཱལུཀསཏསཧསྶཱནི ཨིཏི ཝཱ’’ཏི? ‘‘ནོ ཧེཏཾ, ཨཡྻེ’’། ‘‘ཨཏྠི པན ཏེ ཀོཙི གཎཀོ ཝཱ མུདྡིཀོ ཝཱ སངྑཱཡཀོ ཝཱ ཡོ པཧོཏི མཧཱསམུདྡེ ཨུདཀཾ གཎེཏུཾ – ཨེཏྟཀཱནི ཨུདཀཱལ༹ྷཀཱནི ཨིཏི ཝཱ, ཨེཏྟཀཱནི ཨུདཀཱལ༹ྷཀསཏཱནི ཨིཏི ཝཱ, ཨེཏྟཀཱནི ཨུདཀཱལ༹ྷཀསཧསྶཱནི ཨིཏི ཝཱ, ཨེཏྟཀཱནི ཨུདཀཱལ༹ྷཀསཏསཧསྶཱནི ཨིཏི ཝཱ’’ཏི? ‘‘ནོ ཧེཏཾ, ཨཡྻེ’’། ‘‘ཏཾ ཀིསྶ ཧེཏུ’’? ‘‘མཧཱཡྻེ, སམུདྡོ གམྦྷཱིརོ ཨཔྤམེཡྻོ དུཔྤརིཡོགཱཧོ’’ཏི། ‘‘ཨེཝམེཝ ཁོ, མཧཱརཱཛ, ཡེན རཱུཔེ ཏཐཱགཏཾ པཉྙཱཔཡམཱནོ པཉྙཱཔེཡྻ ཏཾ རཱུཔཾ ཏཐཱགཏསྶ པཧཱིནཾ ཨུཙྪིནྣམཱུལཾ ཏཱལཱཝཏྠུཀཏཾ ཨནབྷཱཝངྐཏཾ ཨཱཡཏིཾ ཨནུཔྤཱདདྷམྨཾ། རཱུཔསངྑཱཡཝིམུཏྟོ ཁོ, མཧཱརཱཛ, ཏཐཱགཏོ གམྦྷཱིརོ ཨཔྤམེཡྻོ དུཔྤརིཡོགཱཧོ – སེཡྻཐཱཔི མཧཱསམུདྡོ། ‘ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི, ‘ན ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི, ‘ཧོཏི ཙ ན ཙ ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི, ‘ནེཝ ཧོཏི ན ན ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི།

‘‘Tena hi, mahārāja, taññevettha paṭipucchissāmi. Yathā te khameyya tathā naṃ byākareyyāsi. Taṃ kiṃ maññasi, mahārāja, atthi te koci gaṇako vā muddiko vā saṅkhāyako vā yo pahoti gaṅgāya vālukaṃ ⁵ gaṇetuṃ – ettakā ⁶ vālukā iti vā, ettakāni vālukasatāni iti vā, ettakāni vālukasahassāni iti vā, ettakāni vālukasatasahassāni iti vā’’ti? ‘‘No hetaṃ, ayye’’. ‘‘Atthi pana te koci gaṇako vā muddiko vā saṅkhāyako vā yo pahoti mahāsamudde udakaṃ gaṇetuṃ – ettakāni udakāḷhakāni iti vā, ettakāni udakāḷhakasatāni iti vā, ettakāni udakāḷhakasahassāni iti vā, ettakāni udakāḷhakasatasahassāni iti vā’’ti? ‘‘No hetaṃ, ayye’’. ‘‘Taṃ kissa hetu’’? ‘‘Mahāyye, samuddo gambhīro appameyyo duppariyogāho’’ti. ‘‘Evameva kho, mahārāja, yena rūpe tathāgataṃ paññāpayamāno paññāpeyya taṃ rūpaṃ tathāgatassa pahīnaṃ ucchinnamūlaṃ tālāvatthukataṃ anabhāvaṅkataṃ āyatiṃ anuppādadhammaṃ. Rūpasaṅkhāyavimutto kho, mahārāja, tathāgato gambhīro appameyyo duppariyogāho – seyyathāpi mahāsamuddo. ‘Hoti tathāgato paraṃ maraṇā’tipi na upeti, ‘na hoti tathāgato paraṃ maraṇā’tipi na upeti, ‘hoti ca na ca hoti tathāgato paraṃ maraṇā’tipi na upeti, ‘neva hoti na na hoti tathāgato paraṃ maraṇā’tipi na upeti.

‘‘ཡཱཡ ཝེདནཱཡ ཏཐཱགཏཾ པཉྙཱཔཡམཱནོ པཉྙཱཔེཡྻ, སཱ ཝེདནཱ ཏཐཱགཏསྶ པཧཱིནཱ ཨུཙྪིནྣམཱུལཱ ཏཱལཱཝཏྠུཀཏཱ ཨནབྷཱཝངྐཏཱ ཨཱཡཏིཾ ཨནུཔྤཱདདྷམྨཱ། ཝེདནཱསངྑཱཡཝིམུཏྟོ, མཧཱརཱཛ, ཏཐཱགཏོ གམྦྷཱིརོ ཨཔྤམེཡྻོ དུཔྤརིཡོགཱཧོ – སེཡྻཐཱཔི མཧཱསམུདྡོ། ‘ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི, ‘ན ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི, ‘ཧོཏི ཙ ན ཙ ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི, ‘ནེཝ ཧོཏི ན ན ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི།

‘‘Yāya vedanāya tathāgataṃ paññāpayamāno paññāpeyya, sā vedanā tathāgatassa pahīnā ucchinnamūlā tālāvatthukatā anabhāvaṅkatā āyatiṃ anuppādadhammā. Vedanāsaṅkhāyavimutto, mahārāja, tathāgato gambhīro appameyyo duppariyogāho – seyyathāpi mahāsamuddo. ‘Hoti tathāgato paraṃ maraṇā’tipi na upeti, ‘na hoti tathāgato paraṃ maraṇā’tipi na upeti, ‘hoti ca na ca hoti tathāgato paraṃ maraṇā’tipi na upeti, ‘neva hoti na na hoti tathāgato paraṃ maraṇā’tipi na upeti.

‘‘ཡཱཡ སཉྙཱ ཏཐཱགཏཾ…པེ॰… ཡེཧི སངྑཱརེཧི ཏཐཱགཏཾ པཉྙཱཔཡམཱནོ པཉྙཱཔེཡྻ, ཏེ སངྑཱརཱ ཏཐཱགཏསྶ པཧཱིནཱ ཨུཙྪིནྣམཱུལཱ ཏཱལཱཝཏྠུཀཏཱ ཨནབྷཱཝངྐཏཱ ཨཱཡཏིཾ ཨནུཔྤཱདདྷམྨཱ། སངྑཱརསངྑཱཡཝིམུཏྟོ ཁོ, མཧཱརཱཛ, ཏཐཱགཏོ གམྦྷཱིརོ ཨཔྤམེཡྻོ དུཔྤརིཡོགཱཧོ – སེཡྻཐཱཔི མཧཱསམུདྡོ། ‘ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི, ‘ན ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི , ‘ཧོཏི ཙ ན ཙ ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི, ‘ནེཝ ཧོཏི ན ན ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི།

‘‘Yāya saññā tathāgataṃ…pe… yehi saṅkhārehi tathāgataṃ paññāpayamāno paññāpeyya, te saṅkhārā tathāgatassa pahīnā ucchinnamūlā tālāvatthukatā anabhāvaṅkatā āyatiṃ anuppādadhammā. Saṅkhārasaṅkhāyavimutto kho, mahārāja, tathāgato gambhīro appameyyo duppariyogāho – seyyathāpi mahāsamuddo. ‘Hoti tathāgato paraṃ maraṇā’tipi na upeti, ‘na hoti tathāgato paraṃ maraṇā’tipi na upeti , ‘hoti ca na ca hoti tathāgato paraṃ maraṇā’tipi na upeti, ‘neva hoti na na hoti tathāgato paraṃ maraṇā’tipi na upeti.

‘‘ཡེན ཝིཉྙཱཎེ ཏཐཱགཏཾ པཉྙཱཔཡམཱནོ པཉྙཱཔེཡྻ ཏཾ ཝིཉྙཱཎཾ ཏཐཱགཏསྶ པཧཱིནཾ ཨུཙྪིནྣམཱུལཾ ཏཱལཱཝཏྠུཀཏཾ ཨནབྷཱཝངྐཏཾ ཨཱཡཏིཾ ཨནུཔྤཱདདྷམྨཾ། ཝིཉྙཱཎསངྑཱཡཝིམུཏྟོ ཁོ, མཧཱརཱཛ, ཏཐཱགཏོ གམྦྷཱིརོ ཨཔྤམེཡྻོ དུཔྤརིཡོགཱཧོ – སེཡྻཐཱཔི མཧཱསམུདྡོ། ‘ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི, ‘ན ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི, ‘ཧོཏི ཙ ན ཙ ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི, ‘ནེཝ ཧོཏི ན ན ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏཱི’’ཏི། ཨཐ ཁོ རཱཛཱ པསེནདི ཀོསལོ ཁེམཱཡ བྷིཀྑུནིཡཱ བྷཱསིཏཾ ཨབྷིནནྡིཏྭཱ ཨནུམོདིཏྭཱ ཨུཊྛཱཡཱསནཱ ཁེམཾ བྷིཀྑུནིཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམི།

‘‘Yena viññāṇe tathāgataṃ paññāpayamāno paññāpeyya taṃ viññāṇaṃ tathāgatassa pahīnaṃ ucchinnamūlaṃ tālāvatthukataṃ anabhāvaṅkataṃ āyatiṃ anuppādadhammaṃ. Viññāṇasaṅkhāyavimutto kho, mahārāja, tathāgato gambhīro appameyyo duppariyogāho – seyyathāpi mahāsamuddo. ‘Hoti tathāgato paraṃ maraṇā’tipi na upeti, ‘na hoti tathāgato paraṃ maraṇā’tipi na upeti, ‘hoti ca na ca hoti tathāgato paraṃ maraṇā’tipi na upeti, ‘neva hoti na na hoti tathāgato paraṃ maraṇā’tipi na upetī’’ti. Atha kho rājā pasenadi kosalo khemāya bhikkhuniyā bhāsitaṃ abhinanditvā anumoditvā uṭṭhāyāsanā khemaṃ bhikkhuniṃ abhivādetvā padakkhiṇaṃ katvā pakkāmi.

ཨཐ ཁོ རཱཛཱ པསེནདི ཀོསལོ ཨཔརེན སམཡེན ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ རཱཛཱ པསེནདི ཀོསལོ བྷགཝནྟཾ ཨེཏདཝོཙ – ‘‘ཀིཾ ནུ ཁོ, བྷནྟེ, ཧོཏི ཏཐཱགཏོ པརཾ མརཎཱ’’ཏི? ‘‘ཨབྱཱཀཏཾ ཁོ ཨེཏཾ, མཧཱརཱཛ, མཡཱ – ‘ཧོཏི ཏཐཱགཏོ པརཾ མརཎཱ’’’ཏི། ‘‘ཀིཾ པན, བྷནྟེ, ན ཧོཏི ཏཐཱགཏོ པརཾ མརཎཱ’’ཏི? ‘‘ཨེཏམྤི ཁོ, མཧཱརཱཛ, ཨབྱཱཀཏཾ མཡཱ – ‘ན ཧོཏི ཏཐཱགཏོ པརཾ མརཎཱ’’’ཏི། ‘‘ཀིཾ ནུ ཁོ, བྷནྟེ, ཧོཏི ཙ ན ཙ ཧོཏི ཏཐཱགཏོ པརཾ མརཎཱ’’ཏི ? ‘‘ཨབྱཱཀཏཾ ཁོ ཨེཏཾ, མཧཱརཱཛ, མཡཱ – ‘ཧོཏི ཙ ན ཙ ཧོཏི ཏཐཱགཏོ པརཾ མརཎཱ’’’ཏི། ‘‘ཀིཾ པན, བྷནྟེ, ནེཝ ཧོཏི ན ན ཧོཏི ཏཐཱགཏོ པརཾ མརཎཱ’’ཏི? ‘‘ཨེཏམྤི ཁོ, མཧཱརཱཛ, ཨབྱཱཀཏཾ མཡཱ – ‘ནེཝ ཧོཏི ན ན ཧོཏི ཏཐཱགཏོ པརཾ མརཎཱ’’’ཏི། ‘‘ཀིཾ ནུ ཁོ, བྷནྟེ, ཧོཏི ཏཐཱགཏོ པརཾ མརཎཱ’’ཏི ཨིཏི པུཊྛོ སམཱནོ – ‘ཨབྱཱཀཏཾ ཁོ ཨེཏཾ, མཧཱརཱཛ, མཡཱ – ཧོཏི ཏཐཱགཏོ པརཾ མརཎཱ’ཏི ཝདེསི…པེ॰…། ‘‘‘ཀིཾ པན, བྷནྟེ, ནེཝ ཧོཏི ན ན ཧོཏི ཏཐཱགཏོ པརཾ མརཎཱ’ཏི ཨིཏི པུཊྛོ སམཱནོ – ‘‘‘ཨེཏམྤི ཁོ, མཧཱརཱཛ, ཨབྱཱཀཏཾ མཡཱ – ནེཝ ཧོཏི ན ན ཧོཏི ཏཐཱགཏོ པརཾ མརཎཱ’ཏི ཝདེསི། ཀོ ནུ ཁོ, བྷནྟེ, ཧེཏུ, ཀོ པཙྩཡོ, ཡེནེཏཾ ཨབྱཱཀཏཾ བྷགཝཏཱ’’ཏི?

Atha kho rājā pasenadi kosalo aparena samayena yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho rājā pasenadi kosalo bhagavantaṃ etadavoca – ‘‘kiṃ nu kho, bhante, hoti tathāgato paraṃ maraṇā’’ti? ‘‘Abyākataṃ kho etaṃ, mahārāja, mayā – ‘hoti tathāgato paraṃ maraṇā’’’ti. ‘‘Kiṃ pana, bhante, na hoti tathāgato paraṃ maraṇā’’ti? ‘‘Etampi kho, mahārāja, abyākataṃ mayā – ‘na hoti tathāgato paraṃ maraṇā’’’ti. ‘‘Kiṃ nu kho, bhante, hoti ca na ca hoti tathāgato paraṃ maraṇā’’ti ? ‘‘Abyākataṃ kho etaṃ, mahārāja, mayā – ‘hoti ca na ca hoti tathāgato paraṃ maraṇā’’’ti. ‘‘Kiṃ pana, bhante, neva hoti na na hoti tathāgato paraṃ maraṇā’’ti? ‘‘Etampi kho, mahārāja, abyākataṃ mayā – ‘neva hoti na na hoti tathāgato paraṃ maraṇā’’’ti. ‘‘Kiṃ nu kho, bhante, hoti tathāgato paraṃ maraṇā’’ti iti puṭṭho samāno – ‘abyākataṃ kho etaṃ, mahārāja, mayā – hoti tathāgato paraṃ maraṇā’ti vadesi…pe…. ‘‘‘Kiṃ pana, bhante, neva hoti na na hoti tathāgato paraṃ maraṇā’ti iti puṭṭho samāno – ‘‘‘etampi kho, mahārāja, abyākataṃ mayā – neva hoti na na hoti tathāgato paraṃ maraṇā’ti vadesi. Ko nu kho, bhante, hetu, ko paccayo, yenetaṃ abyākataṃ bhagavatā’’ti?

‘‘ཏེན ཧི, མཧཱརཱཛ, ཏཉྙེཝེཏྠ པཊིཔུཙྪིསྶཱམི། ཡཐཱ ཏེ ཁམེཡྻ ཏཐཱ ནཾ བྱཱཀརེཡྻཱསི། ཏཾ ཀིཾ མཉྙསི, མཧཱརཱཛ, ཨཏྠི ཏེ ཀོཙི གཎཀོ ཝཱ མུདྡིཀོ ཝཱ སངྑཱཡཀོ ཝཱ ཡོ པཧོཏི གངྒཱཡ ཝཱལུཀཾ གཎེཏུཾ – ཨེཏྟཀཱ ཝཱལུཀཱ ཨིཏི ཝཱ…པེ॰… ཨེཏྟཀཱནི ཝཱལུཀསཏསཧསྶཱནི ཨིཏི ཝཱ’’ཏི? ‘‘ནོ ཧེཏཾ, བྷནྟེ’’། ‘‘ཨཏྠི པན ཏེ ཀོཙི གཎཀོ ཝཱ མུདྡིཀོ ཝཱ སངྑཱཡཀོ ཝཱ ཡོ པཧོཏི མཧཱསམུདྡེ ཨུདཀཾ གཎེཏུཾ – ཨེཏྟཀཱནི ཨུདཀཱལ༹ྷཀཱནི ཨིཏི ཝཱ…པེ॰… ཨེཏྟཀཱནི ཨུདཀཱལ༹ྷཀསཏསཧསྶཱནི ཨིཏི ཝཱ’’ཏི? ‘‘ནོ ཧེཏཾ, བྷནྟེ’’། ‘‘ཏཾ ཀིསྶ ཧེཏུ’’? ‘‘མཧཱ, བྷནྟེ, སམུདྡོ གམྦྷཱིརོ ཨཔྤམེཡྻོ དུཔྤརིཡོགཱཧོ། ཨེཝམེཝ ཁོ, མཧཱརཱཛ, ཡེན རཱུཔེན ཏཐཱགཏཾ པཉྙཱཔཡམཱནོ པཉྙཱཔེཡྻ, ཏཾ རཱུཔཾ ཏཐཱགཏསྶ པཧཱིནཾ ཨུཙྪིནྣམཱུལཾ ཏཱལཱཝཏྠུཀཏཾ ཨནབྷཱཝངྐཏཾ ཨཱཡཏིཾ ཨནུཔྤཱདདྷམྨཾ། རཱུཔསངྑཱཡཝིམུཏྟོ ཁོ, མཧཱརཱཛ, ཏཐཱགཏོ གམྦྷཱིརོ ཨཔྤམེཡྻོ དུཔྤརིཡོགཱཧོ – སེཡྻཐཱཔི མཧཱསམུདྡོ། ‘ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི…པེ॰… ‘ནེཝ ཧོཏི ན ན ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི། ཡཱཡ ཝེདནཱཡ…པེ॰… ཡཱཡ སཉྙཱཡ…པེ॰… ཡེཧི སངྑཱརེཧི…པེ॰…’’།

‘‘Tena hi, mahārāja, taññevettha paṭipucchissāmi. Yathā te khameyya tathā naṃ byākareyyāsi. Taṃ kiṃ maññasi, mahārāja, atthi te koci gaṇako vā muddiko vā saṅkhāyako vā yo pahoti gaṅgāya vālukaṃ gaṇetuṃ – ettakā vālukā iti vā…pe… ettakāni vālukasatasahassāni iti vā’’ti? ‘‘No hetaṃ, bhante’’. ‘‘Atthi pana te koci gaṇako vā muddiko vā saṅkhāyako vā yo pahoti mahāsamudde udakaṃ gaṇetuṃ – ettakāni udakāḷhakāni iti vā…pe… ettakāni udakāḷhakasatasahassāni iti vā’’ti? ‘‘No hetaṃ, bhante’’. ‘‘Taṃ kissa hetu’’? ‘‘Mahā, bhante, samuddo gambhīro appameyyo duppariyogāho. Evameva kho, mahārāja, yena rūpena tathāgataṃ paññāpayamāno paññāpeyya, taṃ rūpaṃ tathāgatassa pahīnaṃ ucchinnamūlaṃ tālāvatthukataṃ anabhāvaṅkataṃ āyatiṃ anuppādadhammaṃ. Rūpasaṅkhāyavimutto kho, mahārāja, tathāgato gambhīro appameyyo duppariyogāho – seyyathāpi mahāsamuddo. ‘Hoti tathāgato paraṃ maraṇā’tipi na upeti…pe… ‘neva hoti na na hoti tathāgato paraṃ maraṇā’tipi na upeti. Yāya vedanāya…pe… yāya saññāya…pe… yehi saṅkhārehi…pe…’’.

‘‘ཡེན ཝིཉྙཱཎེན ཏཐཱགཏཾ པཉྙཱཔཡམཱནོ པཉྙཱཔེཡྻ, ཏཾ ཝིཉྙཱཎཾ ཏཐཱགཏསྶ པཧཱིནཾ ཨུཙྪིནྣམཱུལཾ ཏཱལཱཝཏྠུཀཏཾ ཨནབྷཱཝངྐཏཾ ཨཱཡཏིཾ ཨནུཔྤཱདདྷམྨཾ། ཝིཉྙཱཎསངྑཱཡཝིམུཏྟོ ཁོ, མཧཱརཱཛ, ཏཐཱགཏོ གམྦྷཱིརོ ཨཔྤམེཡྻོ དུཔྤརིཡོགཱཧོ – སེཡྻཐཱཔི མཧཱསམུདྡོ། ‘ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི, ‘ན ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི, ‘ཧོཏི ཙ ན ཙ ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏི, ‘ནེཝ ཧོཏི ན ན ཧོཏི ཏཐཱགཏོ པརཾ མརཎཱ’ཏིཔི ན ཨུཔེཏཱི’’ཏི།

‘‘Yena viññāṇena tathāgataṃ paññāpayamāno paññāpeyya, taṃ viññāṇaṃ tathāgatassa pahīnaṃ ucchinnamūlaṃ tālāvatthukataṃ anabhāvaṅkataṃ āyatiṃ anuppādadhammaṃ. Viññāṇasaṅkhāyavimutto kho, mahārāja, tathāgato gambhīro appameyyo duppariyogāho – seyyathāpi mahāsamuddo. ‘Hoti tathāgato paraṃ maraṇā’tipi na upeti, ‘na hoti tathāgato paraṃ maraṇā’tipi na upeti, ‘hoti ca na ca hoti tathāgato paraṃ maraṇā’tipi na upeti, ‘neva hoti na na hoti tathāgato paraṃ maraṇā’tipi na upetī’’ti.

‘‘ཨཙྪརིཡཾ, བྷནྟེ, ཨབྦྷུཏཾ, བྷནྟེ! ཡཏྲ ཧི ནཱམ སཏྠུ ཙེཝ ⁷ སཱཝིཀཱཡ ཙ ཨཏྠེན ཨཏྠོ བྱཉྫནེན བྱཉྫནཾ སཾསནྡིསྶཏི , སམེསྶཏི, ན ཝིརོདྷཡིསྶཏི ⁸ ཡདིདཾ ཨགྒཔདསྨིཾ། ཨེཀམིདཱཧཾ, བྷནྟེ, སམཡཾ ཁེམཾ བྷིཀྑུནིཾ ཨུཔསངྐམིཏྭཱ ཨེཏམཏྠཾ ཨཔུཙྪིཾ། སཱཔི མེ ཨཡྻཱ ཨེཏེཧི པདེཧི ཨེཏེཧི བྱཉྫནེཧི ཨེཏམཏྠཾ བྱཱཀཱསི, སེཡྻཐཱཔི བྷགཝཱ། ཨཙྪརིཡཾ, བྷནྟེ, ཨབྦྷུཏཾ, བྷནྟེ! ཡཏྲ ཧི ནཱམ སཏྠུ ཙེཝ སཱཝིཀཱཡ ཙ ཨཏྠེན ཨཏྠོ བྱཉྫནེན བྱཉྫནཾ སཾསནྡིསྶཏི, སམེསྶཏི, ན ཝིརོདྷཡིསྶཏི ཡདིདཾ ཨགྒཔདསྨིཾ། ཧནྡ དཱནི མཡཾ, བྷནྟེ, གཙྪཱམ། བཧུཀིཙྩཱ མཡཾ བཧུཀརཎཱིཡཱ’’ཏི། ‘‘ཡསྶ དཱནི ཏྭཾ, མཧཱརཱཛ, ཀཱལཾ མཉྙསཱི’’ཏི། ཨཐ ཁོ རཱཛཱ པསེནདི ཀོསལོ བྷགཝཏོ བྷཱསིཏཾ ཨབྷིནནྡིཏྭཱ ཨནུམོདིཏྭཱ ཨུཊྛཱཡཱསནཱ བྷགཝནྟཾ ཨབྷིཝཱདེཏྭཱ པདཀྑིཎཾ ཀཏྭཱ པཀྐཱམཱིཏི། པཋམཾ།

‘‘Acchariyaṃ, bhante, abbhutaṃ, bhante! Yatra hi nāma satthu ceva ⁹ sāvikāya ca atthena attho byañjanena byañjanaṃ saṃsandissati , samessati, na virodhayissati ¹⁰ yadidaṃ aggapadasmiṃ. Ekamidāhaṃ, bhante, samayaṃ khemaṃ bhikkhuniṃ upasaṅkamitvā etamatthaṃ apucchiṃ. Sāpi me ayyā etehi padehi etehi byañjanehi etamatthaṃ byākāsi, seyyathāpi bhagavā. Acchariyaṃ, bhante, abbhutaṃ, bhante! Yatra hi nāma satthu ceva sāvikāya ca atthena attho byañjanena byañjanaṃ saṃsandissati, samessati, na virodhayissati yadidaṃ aggapadasmiṃ. Handa dāni mayaṃ, bhante, gacchāma. Bahukiccā mayaṃ bahukaraṇīyā’’ti. ‘‘Yassa dāni tvaṃ, mahārāja, kālaṃ maññasī’’ti. Atha kho rājā pasenadi kosalo bhagavato bhāsitaṃ abhinanditvā anumoditvā uṭṭhāyāsanā bhagavantaṃ abhivādetvā padakkhiṇaṃ katvā pakkāmīti. Paṭhamaṃ.

Next: ༢. ཨནུརཱདྷསུཏྟཾ • 2. Anurādhasuttaṃ

Footnotes:

1. ཨནྭཱཧིཎྜནྟོ (སཱི॰)

2. anvāhiṇḍanto (sī.)

3. ཝཱལིཀཾ (སཱི॰ སྱཱ॰ ཀཾ॰)

4. ཨེཏྟིཀཱ (སཱི॰)

5. vālikaṃ (sī. syā. kaṃ.)

6. ettikā (sī.)

7. སཏྠུནོ ཙེཝ (སཱི॰)

8. ཝིཧཱཡིསྶཏི (སཱི॰ སྱཱ॰ ཀཾ॰), ཝིགཱཡིསྶཏི (ཀ॰)

9. satthuno ceva (sī.)

10. vihāyissati (sī. syā. kaṃ.), vigāyissati (ka.)

Related texts:

ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡. ཁེམཱསུཏྟཝཎྞནཱ • 1. Khemāsuttavaṇṇanā

ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡. ཁེམཱསུཏྟཝཎྞནཱ • 1. Khemāsuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact