| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
7. கே²மஸுத்தவண்ணனா
7. Khemasuttavaṇṇanā
49. ஸத்தமே வுஸிதவாதி வுத்த²ப்³ரஹ்மசரியவாஸோ. கதகரணீயோதி சதூஹி மக்³கே³ஹி கத்தப்³ப³ங் கத்வா டி²தோ. ஓஹிதபா⁴ரோதி க²ந்த⁴பா⁴ரங் கிலேஸபா⁴ரங் அபி⁴ஸங்கா²ரபா⁴ரஞ்ச ஓதாரெத்வா டி²தோ. அனுப்பத்தஸத³த்தோ²தி ஸத³த்தோ² வுச்சதி அரஹத்தங், தங் பத்தோதி அத்தோ². பரிக்கீ²ணப⁴வஸங்யோஜனோதி கீ²ணப⁴வப³ந்த⁴னோ. ஸம்மத³ஞ்ஞா விமுத்தோதி ஸம்மா ஹேதுனா காரணேன ஜானித்வா விமுத்தோ. தஸ்ஸ ந ஏவங் ஹோதி அத்தி² மே ஸெய்யோதி வாதிஆதீ³ஹி ஸெய்யஸ்ஸ ஸெய்யோஹமஸ்மீதி மானாத³யோ தயோ மானா படிக்கி²த்தா. ந ஹி கீ²ணாஸவஸ்ஸ ‘‘அத்தி² மய்ஹங் ஸெய்யோ, அத்தி² ஸதி³ஸோ, அத்தி² ஹீனோ’’தி மானோ ஹோதி. நத்தி² மே ஸெய்யோதிஆதீ³ஹிபி தேயேவ படிக்கி²த்தா. ந ஹி கீ²ணாஸவஸ்ஸ ‘‘அஹமேவ ஸெய்யோ, அஹங் ஸதி³ஸோ, அஹங் ஹீனோ, அஞ்ஞே ஸெய்யாத³யோ நத்தீ²’’தி ஏவங் மானோ ஹோதி.
49. Sattame vusitavāti vutthabrahmacariyavāso. Katakaraṇīyoti catūhi maggehi kattabbaṃ katvā ṭhito. Ohitabhāroti khandhabhāraṃ kilesabhāraṃ abhisaṅkhārabhārañca otāretvā ṭhito. Anuppattasadatthoti sadattho vuccati arahattaṃ, taṃ pattoti attho. Parikkhīṇabhavasaṃyojanoti khīṇabhavabandhano. Sammadaññā vimuttoti sammā hetunā kāraṇena jānitvā vimutto. Tassa na evaṃ hoti atthi me seyyoti vātiādīhi seyyassa seyyohamasmīti mānādayo tayo mānā paṭikkhittā. Na hi khīṇāsavassa ‘‘atthi mayhaṃ seyyo, atthi sadiso, atthi hīno’’ti māno hoti. Natthi me seyyotiādīhipi teyeva paṭikkhittā. Na hi khīṇāsavassa ‘‘ahameva seyyo, ahaṃ sadiso, ahaṃ hīno, aññe seyyādayo natthī’’ti evaṃ māno hoti.
அசிரபக்கந்தேஸூதி அரஹத்தங் ப்³யாகரித்வா அசிரங்யேவ பக்கந்தேஸு. அஞ்ஞங் ப்³யாகரொந்தீதி அரஹத்தங் கதெ²ந்தி. ஹஸமானகா மஞ்ஞே அஞ்ஞங் ப்³யாகரொந்தீதி ஹஸமானா விய கதெ²ந்தி. விகா⁴தங் ஆபஜ்ஜந்தீதி து³க்க²ங் ஆபஜ்ஜந்தி.
Acirapakkantesūti arahattaṃ byākaritvā aciraṃyeva pakkantesu. Aññaṃ byākarontīti arahattaṃ kathenti. Hasamānakā maññe aññaṃ byākarontīti hasamānā viya kathenti. Vighātaṃ āpajjantīti dukkhaṃ āpajjanti.
ந உஸ்ஸேஸு ந ஓமேஸு, ஸமத்தே நோபனீயரேதி எத்த² உஸ்ஸாதி உஸ்ஸிததா ஸெய்யபுக்³க³லா. ஓமாதி ஹீனா. ஸமத்தோதி ஸதி³ஸோ. இதி இமேஸு தீஸுபி ஸெய்யஹீனஸதி³ஸேஸு கீ²ணாஸவா மானேன ந உபனீயரே, ந உபனெந்தி, ந உபக³ச்ச²ந்தீதி அத்தோ². கீ²ணா ஜாதீதி கீ²ணா தேஸங் ஜாதி. வுஸிதங் ப்³ரஹ்மசரியந்தி வுத்த²ங் மக்³க³ப்³ரஹ்மசரியங். சரந்தி ஸங்யோஜனவிப்பமுத்தாதி ஸப்³ப³ஸங்யோஜனேஹி விமுத்தா ஹுத்வா சரந்தி. ஸுத்தேபி கா³தா²யம்பி கீ²ணாஸவோ கதி²தோ.
Na ussesu na omesu, samatte nopanīyareti ettha ussāti ussitatā seyyapuggalā. Omāti hīnā. Samattoti sadiso. Iti imesu tīsupi seyyahīnasadisesu khīṇāsavā mānena na upanīyare, na upanenti, na upagacchantīti attho. Khīṇā jātīti khīṇā tesaṃ jāti. Vusitaṃ brahmacariyanti vutthaṃ maggabrahmacariyaṃ. Caranti saṃyojanavippamuttāti sabbasaṃyojanehi vimuttā hutvā caranti. Suttepi gāthāyampi khīṇāsavo kathito.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. கே²மஸுத்தங் • 7. Khemasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7. கே²மஸுத்தவண்ணனா • 7. Khemasuttavaṇṇanā
